ပြည်ပကုန်သွယ်မှုသတင်းများ

     ဗီယက်နမ်နိုင်ငံရှိ ဥရောပကုန်သည်ကြီးများအသင်း(EuroCham)က ဗီယက်နမ်၏ တည်ငြိမ်သော စီးပွားရေးဖွံ့ဖြိုးတိုးတက်မှုအပေါ် ယုံကြည်ချက်ရှိကြောင်း ဘယ်လ်ဂျီယံနိုင်ငံရှိ ဗီယက်နမ်သံရုံးတွင် ကျင်းပပြုလုပ်ခဲ့သည့် ဆွေးနွေးပွဲ၌ ပြောကြားခဲ့ပါသည်။ ဇူလိုင်လ ၂ ရက်နေ့က ကျင်းပခဲ့သည့်အခမ်းအနားတွင် ဘယ်လ်ဂျီယံဆိုင်ရာ ဗီယက်နမ်သံအမတ်ကြီး Nguyen Van Thao က ဗီယက်နမ်နှင့် ဥရောပသမဂ္ဂအကြား အစိမ်းရောင်နှင့်စီးပွားရေးဖွံ့ဖြိုးတိုးတက်မှုကို ထိန်းထားခြင်း၊ ပြန်လည်အသုံးပြုနိုင်သော စွမ်းအင်နယ်ပယ်နှင့် သဘာဝပတ်ဝန်းကျင်ကာကွယ်ခြင်းတို့တွင် ပူးပေါင်းဆောင်ရွက်မှု၏ အရေးပါမှုကို အသားပေးပြောကြားခဲ့ကြောင်း သိရပါသည်။

      သံအမတ်ကြီးက ဗီယက်နမ်နိုင်ငံသည် ဥရောပသမဂ္ဂနှင့် EuroCham တို့၏ ပူး‌ပေါင်း ‌‌ဆောင်ရွက်မှုကို တန်ဖိုးထားပါကြောင်းနှင့် EuroCham ၏ ပြန်လည်အသုံးပြုနိုင်သောစွမ်းအင် တွင် ပူးပေါင်းဆောင်ရွက်မှုနှင့် ကျွမ်းကျင်မှုသည် ဗီယက်နမ်နိုင်ငံ၏ ဖန်လုံအိမ် ဓာတ်ငွေ့ ထုတ်လွှင့်မှုနှင့် ရာသီဥတုပြောင်းလဲခြင်းတို့ကို တုန့်ပြန်ရန် အားထုတ်မှုတို့တွင် အရေးပါသည့် ပါဝင်မှုကို ပြုလုပ်နိုင်မည်ဟု ပြောကြားခဲ့ပါသည်။ တရားမဝင်၊ အစီရင်ခံစာမတင်၊ စည်းမျဉ်းနှင့် မကိုက်ညီဘဲ ငါးဖမ်းခြင်းများနှင့်ပတ်သက်၍ ဥ‌ရောပကော်မရှင်က ဗီယက်နမ်ပင်လယ်စာများကို အဝါကဒ်ပြ သတိပေးထားခြင်းကို ပယ်ဖျက်ပေးစေရေးအတွက် တိုက်တွန်းပြောကြားပေးရန် သံအမတ်ကြီးက EuroCham ကို တောင်းဆိုခဲ့ကြောင်း သိရပါသည်။

       Just Energy Transition Partneiship(JETP)အတွက် သံအမတ်ကြီးသည် ဗီယက်နမ် တွင် JETP ကို အားပေးမြှင့်တင်ရာတွင် EuroCham ၏ အခန်းကဏ္ဍကို အသိအမှတ်ပြုခဲ့ပြီး ပူးပေါင်း‌ဆောင်ရွက်မှုကို ထိရောက်စွာ အကောင်အထည်‌ဖော်ရေးအတွက် EuroCham က အနီးကပ်ပူးပေါင်းပေးရန် မျှော်လင့်ကြောင်း ပြောကြားခဲ့ပါသည်။

      EuroCham ၏ ဥက္ကဌ  Dominik Meicble က ဆွေးနွေးပွဲသည် လက်ရှိအနာဂတ်တွင် EuroCham နှင့် ဗီယက်နမ်မိတ်ဖက်များအကြား စီးပွားရေးတိုးတက်မှုကို ထိန်းထားနိုင်‌ရေးကို အာရုံစိုက်အသားပေးဆွေးနွေးခဲ့ကြောင်း ပြောကြားခဲ့ပါသည်။ ထို့ပြင် Meicble က ဥရောပကော်မရှင်နှင့် အစည်းအဝေးများအတွင်း ဗီယက်နမ်ပင်လယ်စာများကို အဝါကဒ်ပြ သတိပေးထားခြင်းကို ပယ်ဖျက်ရန် စဉ်းစားပေးရန်အတွက် တောင်းဆိုကြောင်းနှင့်် EurCham က ထုတ်ပြန်သည့် စီးပွားရေးယုံကြည်ချက်အညွှန်းကလည်း ၎င်းတို့၏ အဖွဲ့ဝင်များသည် ဗီယက်နမ် နိုင်ငံ၏ စီးပွားရေးနှင့်အခွင့်အလမ်းများ သယ်ဆောင်လာနိုင်မှုအပေါ် အကောင်းမြင်ချက်ရှိသည်ကိုပြသကြောင်း ပြောကြားခဲ့ပါသည်။

      ဗီယက်နမ်နိုင်ငံသည် ပြည်ပရင်းနှီးမြှုပ်နှံမှုများကို ဆွဲဆောင်ရန်အတွက် တည်ငြိမ်သော ရင်းနှီးမြှုပ်နှံမှုပတ်ဝန်းကျင်၊ ကောင်းမွန်စွာ လေ့ကျင့်သင်ကြားထားသော လုပ်သားအင်အားနှင့် အစိုးရနှင့် စီးပွား‌ရေးလုပ်ငန်းရှင်များအကြား ပွင့်လင်းမြင်သာမှုရှိခြင်းကြောင့် နိုင်ငံ၏ စီးပွားရေး မြင်ကွင်းမှာ အလားအလာကောင်းနေကြောင်း သိရပါသည်။ Miechle က ဗီယက်နမ်ကို ငွေကြေးဖောင်းပွမှုနှင့်ပတ်သက်၍ သင့်လျော်သည့်အဆင့်တွင် ထိန်းထားရန်၊ အခြေခံအဆောက်အအုံဖွံ့ဖြိုးတိုးတက်ရေးတွင် အများပိုင်ရင်းနှီးမြှုပ်နှံမှုများကိုမြှင့်တင်ရန် အကြံပြုခဲ့ကြောင်း သိရပါသည်။

Source: Vietnam Plus

DOCA(ရန်ကုန်)

      တရုတ်နိုင်ငံ၏ BYD ကားကုမ္ပဏီသည် ၎င်းတို့၏ အရှေ့တောင်အာရှတွင် ပထမဆုံး လျှပ်စစ်ကားစက်ရုံကို ထိုင်းနိုင်ငံတွင် ၄-၇-၂၀၂၄ နေ့က ဖွင့်လှစ်ခဲ့ပါသည်။ BYD ၏ CEO နှင့်ဥက္ကဌ ဖြစ်သူ Wang Chuanfu က ထိုင်းနိုင်ငံသည် လျှပ်စစ်ကားနှင့်ပတ်သက်၍ မြင်သာသည့် ရှုမြင်မှုရှိပြီး ကားထုတ်လုပ်မှုခေတ်သစ်တစ်ခုကို ဝင်ရောက်လာကြောင်းနှင့် BYD က နည်းပညာ ကို တရုတ်နိုင်ငံမှ ထိုင်းနိုင်ငံသို့ သယ်ဆောင်လာမည်ဟု ပြောကြားခဲ့ပါသည်။ BYD စက်ရုံသည် အစိုးရ၏ ထောက်ပံ့ငွေနှင့် အခွန်မက်လုံးများအကူအညီဖြင့် ထိုင်းနိုင်ငံတွင် စက်ရုံများ တည်ဆောက်မည့် တရုတ်လျှပ်စစ်ကားထုတ်လုပ်သူများထံမှ အမေရိကန်ဒေါ်လာ ၁.၄၄ ဘီလီယံကျော်တန်ဖိုးရှိ ရင်းနှီးမြှုပ်နှံမှုလှိုင်း၏ အစိတ်အပိုင်းတစ်ခုဖြစ်ကြောင်း သိရပါသည်။

     ၂၀၃၀ ပြည့်နှစ်တွင် ထိုင်းနိုင်ငံသည် ၎င်းတို့၏နှစ်စဉ်ယာဉ်ထုတ်လုပ်မှု ၂. သန်း၏ ၃၀ ရာခိုင်နှုန်းကို လျှပ်စစ်ယာဉ်များသို့ ကူးပြောင်းရန် ရည်ရွယ်ထားကြောင်း အစိုးရ၏ အစီအစဉ်အရ သိရပါသည်။ ထိုင်းနိုင်ငံသည် ဒေသတွင်းကားတပ်ဆင်ခြင်းနှင့် တင်ပို့ရာအချက်အခြာ နေရာ တစ်ခု ဖြစ်ပြီး ဂျပန်ကားထုတ်လုပ်သူများဖြစ်သည့် Toyota Motor၊ Honda Motor Co နှင့် Isuzu Motors တို့က ယခင်ကတည်းက လွှမ်းမိုးထားသည်ဟု သိရပါသည်။ BYD သည် ထိုင်းနိုင်ငံ ကို အာဆီယံနှင့် အခြားနိုင်ငံများသို့တင်ပို့ရန် ထုတ်လုပ်မှုအချက်အခြာနေရာအဖြစ် အသုံးပြုမည် ဟု ရင်းနှီးမြှုပ်နှံမှု ဘုတ်အဖွဲ့၏ အတွင်းရေးမှူးချုပ် Narit Therdsteerasukdi က ပြောကြားခဲ့ပါ သည်။ စက်ရုံသည် ဝန်ထမ်းအင်အား ၁၀၀၀၀ ခန့် ခန့်အပ်သွားမည်ဖြစ်ပြီး နှစ်စဉ် Plug-in hybrids များ ပါဝင်သော ယာဉ်အစီးရေ ၁၅၀၀၀၀ ထုတ်လုပ်နိုင်စွမ်းရှိကြောင်း သိရပါသည်။ မော်တော်ယာဉ်များအပြင် ဘက္ထရီများနှင့် အခြားအရေးကြီးသော အစိတ်အပိုင်းများကိုပါ ထိုင်းနိုင်ငံရှိ စက်ရုံတွင် တပ်ဆင်သွားမည်ဟု သိရပါသည်။

Source: Bangkok Post

DOCA(ရန်ကုန်)

      အိန္ဒိယနှင့်ကိုရီးယားနှစ်နိုင်ငံအကြား ရှိပြီးသော လွတ်လပ်သည့် ကုန်သွယ်မှုသဘောတူညီချက် FTA ကိုအဆင့်မြှင့်တင်ရန် ဆွေးနွေးမှုများနှင့်အတူ ကုန်သွယ်ရေးဦးစီးဌာနသည် အကြီးစားစက်မှုလုပ်ငန်း၊ သံမဏိလုပ်ငန်းနှင့် ဓာတုဗေဒပစ္စည်းလုပ်ငန်းများအပါအဝင် ဝန်ကြီးဌာနများနှင့်ချိတ်ဆက်ကာ ကမ်းလှမ်းမှုစာရင်းကိုပြင်ဆင်နေကြောင်း တာဝန်ရှိသူတစ်ဦးကပြောကြားခဲ့သည်။

       ထိုစာရင်းပြင်ဆင်မှုသည် နှစ်နိုင်ငံအကြားရှိပြီးသား FTA အဆင့်မြှင့်တင်မှုအတွက် ဘက်စုံစီးပွားရေးမိတ်ဖက်ဆက်ဆံမှုသဘောတူညီချက်(CEPA)ဟုအမည်ပေးထားသည့် စေ့စပ်ညှိနှိုင်းမှု၏ တစ်စိတ်တစ်ပိုင်းဖြစ်သည်။

    အဆိုပါသဘောတူညီချက်ကို ၂၀၁၀ခုနှစ်၊ ဇန်နဝါရီလတွင် စတင်အကောင်အထည်ဖော်ခဲ့ပြီး ယခုအချိန်အထိ ဆွေးနွေးပွဲ(၁၀)ပွဲအထိကျင်းပပြုလုပ်ပြီးစီးခဲ့ပြီဖြစ်သည်။ နှစ်ဖက်စလုံး၏ တောင်းဆိုချက်စာရင်းများကိုဖလှယ်ပြီး ကမ်းလှမ်းချက်စာရင်းများကိုလုပ်‌ဆောင်နေကြောင်း သံမဏိ၊ အကြီးစားစက်မှုလုပ်ငန်း၊ အထည်အလိပ်၊ ဓာတုဗေဒနှင့် ရေနံ စသည့်ဌာနများအပါအဝင် မတူညီသောဝန်ကြီးဌာနများနှင့်ဆွေးနွေးလျက်ရှိကြောင်း တာဝန်ရှိသူတစ်ဦးကပြောကြားခဲ့သည်။ အိန္ဒိယသည် အဆိုပါကုန်ပစ္စည်းများ တင်ပို့မှုကိုမြှင့်တင်ရန်ရည်ရွယ်ချက်ဖြင့် ‌တောင်ကိုရီးယားမှ သံမဏိ၊ ဆန်နှင့် ပုစွန်ကဲ့သို့သော ကုန်ပစ္စည်းတချို့အတွက် ‌ဈေးကွက်ပိုမိုရရှိရန်ကြိုးပမ်းခဲ့ကြောင်း အဆိုပါတာဝန်ရှိသူက ပြောကြားခဲ့သည်။ 

       ထိုသဘောတူညီချက်များတွင် နှစ်နိုင်ငံ သို့မဟုတ် ထို့ထက်မကသောနိုင်ငံများသည် ကုန်သွယ်မှုမြှင့်တင်ရန်နှင့် ရင်းနှီးမြှုပ်နှံမှုများမြှင့်တင်ရန်အတွက် ကုန်ပစ္စည်းအရေအတွက် အများဆုံးထည့်ဝင်သည့်အပေါ် အကောက်ခွန်ကို သိသိသာသာလျှော့ချခြင်း သို့မဟုတ် ဖယ်ရှားပစ်ခြင်းတို့ပြုလုပ်သွားမည်ဖြစ်ကြောင်းသိရသည်။

     အိန္ဒိယနှစ်နိုင်ငံကြား ကုန်သွယ်မှုလိုငွေများကြီးထွားလာမှုအပေါ် စိုးရိမ်မှုများမြင့်တက်လာခဲ့ပြီး ကိုရီးယားသို့ အိန္ဒိယ၏ပို့ကုန်များတင်ပို့မှုသည် ၂၀၂၁-၂၀၂၂ ခုနှစ်အတွင်း ၈ဘီလီယံကျော်ရရှိခဲ့ပြီး ၂၀၂၂-၂၀၂၃ ခုနှစ်အတွင်း ၆.၆၅ဘီလီယံကျော်နှင့် ၂၀၂၃-၂၀၂၄ ခုနှစ်အတွင်း ၆.၄၁ဘီလီယံကျော်သို့ကျဆင်းသွားခဲ့သည်။

          စီးပွား‌ရေးဆိုင်ရာအကြံပေးအဖွဲ့ Global Trade Research Initative (GTRT)၏ အဆိုအရ အိန္ဒိယနှင့် တောင်ကိုရီးယားတို့၏ ကုန်သွယ်မှုလိုငွေသည် ပိုမိုမြင့်မားသောနှုန်းထားဖြင့် တိုးမြင့်လာလျက်ရှိပြီး အိန္ဒိယနှင့်တောင်ကိုရီးယားကုန်သွယ်မှုသည် CEPA အကောင်အထည်ဖော်ခြင်းမပြုမီနှင့် ပြုပြီးကာလများတွင် သိသိသာသာထင်ရှားသော ပြောင်းလဲမှုများကိုပြသခဲ့သည်ဟု ၎င်းကဆိုသည်။

          CEPA(၂၀၀၇-၂၀၀၉)မတိုင်မီ အိန္ဒိယမှ တောင်ကိုရီးယားသို့ ပျမ်းမျှပို့ကုန်တန်ဖိုးမှာ ၃.၄ဘီလီယံရှိပြီး ပျမ်းမျှသွင်းကုန်မှာ ၇.၃ဘီလီယံရှိကာ ပျမ်းမျှကုန်သွယ်မှုလိုငွေမှာ ၄ဘီလီယံအထိရှိခဲ့သည်။

       CEPA (၂၀၂၂-၂၀၂၄)နောက်ပိုင်းတွင် ပျမ်းမျှပို့ကုန်သည် ၇.၁ဘီလီယံအထိတိုးလာပြီး သွင်းကုန်သည် ၁၉.၉၁ဘီလီယံအထိတိုးလာကာ ပျမ်းမျှကုန်သွယ်မှုလိုငွေမှာ ၁၂.၈ဘီလီယံအထိတိုးလာကြောင်းနှင့် ပျမ်းမျှကုန်သွယ်မှုလိုငွေမှာ ၁၂.၈ဘီလီယံအထိရှိလာခဲ့သည်ဟု GTRT ၏ အစီရင်ခံစာကဆိုသည်။

    ထို့ပြင် အိန္ဒိယပို့ကုန်လုပ်ငန်းရှင်များသည် တင်းကြပ်သောစံချိန်စံညွှန်းများ၊ စည်းမျဉ်းများအပါအဝင် တောင်ကိုရီးယားတွင် အကောက်ခွန်မဲ့အတားအဆီးအမျိုးမျိုးနှင့်ရင်ဆိုင်နေရပြီး အဆိုပါ အတားအဆီးများသည် အိန္ဒိယကုန်ပစ္စည်းများ တောင်ကိုရီးယားဈေးကွက်သို့ ထိုးဖောက်ဝင်ရောက်ရန် ခက်ခဲစေသည်ဟု ၎င်းကဆိုသည်။

         ပုစွန်၊ ဆန်၊ သံမဏိ၊ ဆေးဝါးနှင့် အိန္ဒိယလယ်ယာထွက်ကုန်များအတွက် ပိုမိုကောင်းမွန်သော ဈေးကွက်ရရှိနိုင်ရေး စိန်ခေါ်မှုများရှိကြောင်း အိန္ဒိယစီးပွား‌ရေးလုပ်ငန်းများသည် အဆိုပါကဏ္ဍများတွင် ထိရောက်စွာယှဉ်ပြိုင်နိုင်ရန် ပိုမိုအခွင့်သာသော နည်းလမ်းနည်းစနစ်များကိုရှာဖွေနေကြောင်း GTRI တည်ထောင်သူ Ajay Srivastava ကပြောကြားခဲ့သည်။

       ကုန်ပစ္စည်းများ၏ ဦးစားပေးအကောက်ခွန်အတွက် အရည်အချင်းပြည့်မီမှုကိုဆုံးဖြတ်ပေးသည့် CEPA လက်အောက်ရှိ မူလပြဋ္ဌာန်းချက်စည်းမျဥ်းများနှင့်ပက်သက်၍ စိုးရိမ်မှုများရှိကြောင်း အိန္ဒိယသည် အဆိုပါစည်းမျဥ်းများကို အလွန်အမင်းကန့်သတ်မှုမရှိစေရန်နှင့် ၎င်းသည် ကုန်သွယ်မှုကို အနှောက်အယှက်မဖြစ်စေဘဲ ချောမွေ့စေရန်ရည်ရွယ်ကြောင်း၊ နှစ်နိုင်ငံအကြား ကုန်သွယ်မှုနှင့်ရင်းနှီးမြုပ်နှံချောမွေ့စေရန်အတွက် အသိအမှတ်ပြုလက်မှတ်များ အပြန်အလှန်ရေးထိုးရန်လိုအပ်ကြောင်း Ajay Srivastava ကပြောကြားခဲ့သည်။

Source: Trend Force.com

DOCA(ရန်ကုန်)

       Volkswagen Group နှင့် Rivian Automotive တို့သည် မျိုးဆက်သစ် EV ကားများထုတ်လုပ်ရန် ဖက်စပ်လုပ်ငန်းတစ်ခုဖွဲ့စည်းရန် ရည်ရွယ်ချက်ကို ဇွန်လ ၂၅ရက်နေ့တွင် ကြေညာခဲ့သည်။

      သဘောတူညီချက်၊ စည်းကမ်းချက်များအရ Volkswagen သည် Rivian တွင် ကနဦး ဒေါ်လာ ၁ဘီလီယံရင်းနှီးမြှုပ်နှံမည်ဖြစ်ပြီး မိတ်ဖက်ပူးပေါင်းမှုကာလအတွင်း နောက်ထပ် ဒေါ်လာ ၄ဘီလီယံအထိ ရင်းနှီးမြှုပ်နှံရန်မျှော်လင့်ထားသည်။

        Rivian သည် R၊ S SUV ကဲ့သို့သော အရည်အသွေးကောင်းမွန်၍ ဆွဲဆောင်မှုရှိသော လျှပ်စစ်ကားတချို့ဖန်တီးထားပြီး R₂ နှင့် R₃ X ကဲ့သို့သော မော်ဒယ်များအတွက် ကြီးမားသောအစီအစဉ်များရှိသည်။ သို့သော်လည်း ကုမ္ပဏီသည် အဆိုပါယာဉ်များအား ထုတ်လုပ်ရန်ကြေညာသည့်အဆင့်၌ပင် ငွေကြေးကုန်ကျမှုများရှိခဲ့သည်။ ၂၀၂၄ခုနှစ်၊ ပထမ(၃)လပတ်တွင် Rivian ကုမ္ပဏီသည် စုစုပေါင်းအမြတ်ငွေဒေါ်လာ ၅၂၇သန်းဆုံးရှုံးခဲ့ကြောင်းသိရသည်။

         အခြားတစ်ဖက်တွင် Volkswagen သည် ပိုမိုခိုင်မာသော ဘဏ္ဍာရေးဆိုင်ရာ အခြေအနေများကိုပိုင်ဆိုင်၍ ၎င်းတို့၏ EV အမျိုးအစားများသည် ကိုယ်ပိုင်နည်းစနစ်များဖြင့် အထင်ကြီးစရာကောင်းနေသော်လည်း Rivian ကားများနှင့်ယှဉ်ပါက နည်းပညာနှင့်ဖွံ့ဖြိုးတိုးတက်မှုတွင် ရိုးရှင်းလျက်ရှိနေသည်။ ဤဖက်စပ်လုပ်ဆောင်မှုသည် တစ်စိတ်တစ်ပိုင်းအဖြစ် တီထွင်ထုတ်လုပ်ထားသောနည်းပညာမှ အကျိုးအမြတ်ရရှိသည့် ပထမဆုံးမော်တော်ယာဉ်များသည် (၁၀)စုနှစ်ကုန်ပိုင်းအထိ ဈေးကွက်သို့ဝင်‌ရောက်နိုင်ဖွယ်ရှိသည်။

       Rivian ၏ တည်ထောင်သူနှင့်အမှုဆောင်အရာရှိချုပ် RJ Scaringe သည် ဘဏ္ဍာရေးနှင့် ယာဉ်ဖွံ့ဖြိုးတိုးတက်ရေးကဏ္ဍ (၂)ခုလုံးမှ သ‌ဘောတူညီချက်အသစ်နှင့်ပတ်သက်၍ အကောင်းမြင်ကြောင်း၊ ဤပူးပေါင်းဆောင်ရွက်မှုသည် Volkswagen Group ၏ ကမ္ဘာလုံးဆိုင်ရာ လက်လှမ်းမီမှုမှတစ်ဆင့် Software နှင့် Design များကို ပိုမိုကျယ်ပြန့်သောဈေးကွက်သို့ ယူဆောင်လာရန် မျှော်လင့်ရုံသာမက ဤပူးပေါင်းဆောင်ရွက်မှုသည်  ကြီးမားသောတိုးတက်မှုအတွက် အရင်းအနှီးလိုအပ်ချက်များပြည့်စုံစေမည်ဖြစ်ကြောင်းပြောကြားခဲ့သည်။

       ကန်ဒေါ်လာ ၁ဘီလီယံ ကနဦးရင်းနှီးမြှုပ်နှံမှုအား ယခုနှစ်ကုန်တွင် စတင်မည်ဖြစ်ပြီး ဖက်စပ်လုပ်ငန်းအား ၂၀၂၅ခုနှစ်၊ စတုတ္ထလပတ်တွင် အပြီးသတ်နိုင်မည်ဟုမျှော်လင့်ထားကြသည်။ နောက်ထပ်ဒေါ်လာ ၄ဘီလီယံရင်းနှီးမြှုပ်နှံမှုအား ၂၀၂၅ခုနှစ်နှင့် ၂၀၂၆ခုနှစ်တွင် တစ်နှစ်လျှင် ၂ဘီလီယံနှုန်းဖြင့် ရင်းနှီးမြှုပ်နှံသွားမည်ဖြစ်သည်။

      ဤရင်းနှီးမြှုပ်နှံမှုသည် အနာဂတ် EV ဖွံ့ဖြိုးတိုးတက်မှုအတွက် ကြီးမားသောပြောင်းလဲမှုတစ်ခုဖြစ်လာနိုင်သည်။ ထို့ပြင် ၎င်းသည် Rivian ကုမ္ပဏီအတွက် နောက်ဆုံးပေါ်မျိုးဆက်သစ်ကားများ ထုတ်လုပ်နိုင်ရန် လမ်းကြောင်းတစ်ခုဖွင့်လှစ်ပေးနိုင်ပြီး Volkswagen ကုမ္ပဏီအတွက် ဝယ်ယူသုံးစွဲသူများထံသို့ EV ကားများအား သက်သာသောဈေးနှုန်းများဖြင့် ရောင်းချပေးနိုင်စေမည်ဖြစ်သည်။

Source: roadandtrack

DOCA(ရန်ကုန်)

       ကမ္ဘာ့စီးပွားရေးအခက်အခဲများနှင့် ပထဝီဝင်နိုင်ငံရေးပဋိပက္ခများ ဆက်လက်ဖြစ်ပွားနေသော်လည်း နှစ်နိုင်ငံအကြားကုန်သွယ်မှုမှာ အထင်ကြီးလောက်စရာ ပြန်လည်ကောင်းမွန်လာကြောင်း စက်မှုနှင့်ကုန်သွယ်ရေးဝန်ကြီးဌာန၏ ထုတ်ပြန်ချက်အရသိရသည်။

         တရုတ်နိုင်ငံသည် ဗီယက်နမ်နိုင်ငံ၏ အကြီးဆုံးကုန်သွယ်ဖက်၊ အကြီးဆုံးဈေးကွက်နှင့် ဗီယက်နမ်၏ ဒုတိယအကြီးဆုံးပို့ကုန်ဈေးကွက်အဖြစ် ဆက်လက်တည်ရှိနေသည်။

        အထွေထွေစာရင်းအင်းရုံး၏ Update များအရ တရုတ်နိုင်ငံသို့ ဗီယက်နမ်နိုင်ငံ၏ပို့ကုန်များသည် ယခုနှစ် ပထမနှစ်ဝက်တွင် ကန်ဒေါ်လာ ၂၇.၈ဘီလီယံအထိရောက်ရှိခဲ့ပြီး ယမန်နှစ် အလားတူကာလထက် ၅.၃ရာခိုင်နှုန်းမြင့်တက်လာကြောင်းသိရသည်။ ပြန်လည်သုံးသပ်ကာလတွင် ဗီယက်နမ်မှ ဒေါ်လာ ၆၇ဘီလီယံတန်ဖိုးရှိသော ကုန်ပစ္စည်းများတင်သွင်းခဲ့ပြီး ၃၄.၇ရာခိုင်နှုန်းမြင့်တက်လာခဲ့သည်။

      ဘေဂျင်းရှိ ဗီယက်နမ်ကုန်သွယ်‌ရေးရုံးက တရုတ်စီးပွားရေးသည် အပြုသဘောဖြင့် ပြန်လည်ကောင်းမွန်လာသည်ဟုဆိုသည်။ ဗီယက်နမ်သည် တရုတ်နိုင်ငံသို့ ပို့ကုန်များတိုးမြှင့်တင်ပို့နိုင်ရန် အခွင့်အလမ်းများစွာရှိကြောင်း ကုန်သွယ်‌ရေးရုံးက ထောက်ပြခဲ့သည်။ တရုတ်စီးပွားရေးလုပ်ငန်းများသည် ကုန်ထုတ်လုပ်ငန်းများနှင့် စိုက်ပျိုးထုတ်လုပ်သည့်ထုတ်ကုန်များ အထူးသဖြင့် ဒူးရင်းသီး၊ ဖရဲသီးနှင့် ငှက်ပျောသီးကဲ့သို့သော ဗီယက်နမ်မှ သစ်သီးဝလံများဝယ်ယူရန် စိတ်ဝင်စားမှုကိုပြသနေသည်။

       လက်ရှိအချိန်အထိ လတ်ဆတ်သောအုန်းသီးများနှင့် အေးခဲထားသော ဒူးရင်းသီးများအား တရားဝင်တင်ပို့နိုင်ရန်အတွက် ညှိနှိုင်းမှုများပြီးစီးသွားပြီဖြစ်သောကြောင့် စိုက်ပျိုးရေးထွက်ကုန်အများအပြားအား တရုတ်နိုင်ငံသို့ တရားဝင်တင်ပို့လျက်ရှိကြောင်းသိရှိရပါသည်။

Source: vnexpress

DOCA(ရန်ကုန်)