ပြည်ပကုန်သွယ်မှုသတင်းများ

          မြန်မာနိုင်ငံသည် အဓိကအားဖြင့် ခေါက်ဆွဲအပါအဝင် တန်ဖိုးမြင့်စားသောက်ကုန်များကို ကိုရီးယားနိုင်ငံ၊ ဂျပန်နိုင်ငံနှင့် ASEAN သို့ပို့ဆောင်လျက်ရှိကြောင်း မြန်မာ့စားသောက်ကုန် ထုတ်လုပ်ရေးနှင့် တင်ပို့ရေးအဖွဲ့အစည်းမှ ပြောကြားချက်အရ သိရပါသည်။ ၎င်းအဖွဲ့အစည်းမှ အမှုဆောင်တစ်ဦးက “၎င်းတို့အနေဖြင့် ထုတ်လုပ်မှုစရိတ်ကိုလျော့ချပါက အိမ်နီးချင်းနိုင်ငံများအကြား ဈေးကွက်ပြိုင်ဆိုင်မှုများကို ပိုမိုတိုးမြင့်နိုင်မည်ဖြစ်ကြောင်း၊ တင်ပို့မှုများမြှင့်တင်နိုင်ကြောင်းနှင့် အခွင့်အလမ်းများကိုဖန်တီးပြီး အခက်အခြများကို ဖြေရှင်းနိုင်ကြောင်း၊ ထုတ်လုပ်မှုနှင့် ထုပ်ပိုးခြင်းများ‌ ကောင်းမွန်‌‌‌စေရန်အတွက် ထုပ်ပိုးခြင်းအတွက်လိုအပ်သော ကုန်ကြမ်းပစ္စည်းများကို ပိုမိုတင်သွင်းရန်လိုအပ်ကြောင်း” ပြောကြားခဲ့ပါသည်။ မြန်မာနိုင်ငံသည် ခေါက်ဆွဲများကို ဒေသတွင်းဈေးကွက်များသို့ ပို့ဆောင်လျက်ရှိပြီး ဟင်းသီးဟင်းရွက်ခြောက်များ၊ နှမ်းမှုန့်များ၊ ပျားရည်နှင့် တစ်ခြားသော တန်ဖိုးမြင့်စားသောက်ကုန်များကို ဂျပန်နိုင်ငံနှင့် တောင်ကိုရီးယားနိုင်ငံများသို့ ပို့ဆောင်လျက်ရှိ‌ကြောင်း သိရပါသည်။ ထို့အပြင် သရက်သီး၊ ဒူးရင်းသီး၊ ကော်ဖိ၊ ထောပတ်သီးနှင့် တစ်ခြားသောသစ်သီးများမှပြုလုပ်သော တန်ဖိုးမြင့် တင်ပို့ကုန်များကို Belarus နှင့် တစ်ခြားသောနိုင်ငံများသို့ တင်ပို့နိုင်ရန် ကြိုးပမ်းလျက်ရှိကြောင်း သိရှိရပါသည်။

Source: Gobal New Light of Myanmar                                         

DOCA (ရန်ကုန်)

          ကမ္ဘောဒီးယားနိုင်ငံသည် ၂၀၂၅ ခုနှစ်၊ ပထမ ၁၁ လအတွင်း အမေရိကန်ဒေါ်လာ ၂၇.၃၇ ဘီလီယံတန်ဖိုးရှိ ထုတ်ကုန်များတင်ပို့ခဲ့ပြီး ယခင်နှစ်ထက် ၁၄ ရာခိုင်နှုန်း မြင့်တက်လာခဲ့ကြောင်း ကမ္ဘောဒီးယားနိုင်ငံ၊ အကောက်ခွန်နှင့် ယစ်မျိုးခွန် ဦးစီးဌာန (GDCE) ၏ ၁၀.၁၂.၂၀၂၅ ရက်နေ့တွင် ထုတ်ပြန်ခဲ့သော အစီရင်ခံစာတွင် ဖော်ပြထားသည်။ အစီရင်ခံစာအရ ကမ္ဘောဒီးယားနိုင်ငံအတွက် ထိပ်တန်းပို့ကုန်တင်ပို့သည့်နိုင်ငံ (၅) နိုင်ငံမှာ အမေရိကန်၊ ဗီယက်နမ်၊ တရုတ်၊ ဂျပန်နှင့် ကနေဒါတို့ဖြစ်သည်။ ၂၀၂၅ ခုနှစ် ဇန်နဝါရီလမှ နိုဝင်ဘာလအထိ ကမ္ဘောဒီးယားနိုင်ငံသို့ စုစုပေါင်း အမေရိကန်ဒေါ်လာ ၃၀.၆၅ ဘီလီယံ တင်သွင်းခဲ့ပြီး ယခင်နှစ်ကာလတူထက် ၁၈ ရာခိုင်နှုန်း မြင့်တက်လာခဲ့ကြောင်း အစီရင်ခံစာတွင် ဖော်ပြထားသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ပြောရေးဆိုခွင့်ရှိသူ Penn Sovicheat က ဒေသတွင်း ဘက်စုံစီးပွားရေး မိတ်ဖက်အဖွဲ့(GDCE)၊ ကမ္ဘောဒီးယားနိုင်ငံ၏ တရုတ်၊ တောင်ကိုရီးယားနှင့် အာရပ်စော်ဘွားများပြည်ထောင်စုတို့နှင့် ပူးပေါင်းဆောင်ရွက်သော နှစ်နိုင်ငံလွတ်လပ်သော ကုန်သွယ်ရေးသဘောတူညီချက်များ (FTA) တို့သည် ကမ္ဘောဒီးယား၏ ကုန်သွယ်မှုတိုးတက်မှုကို အရှိန်အဟုန်မြှင့်တင်ပေးခဲ့ကြောင်း ပြောကြားခဲ့ပါသည်။

Source: Khmer Times                                                        

DOCA(ရန်ကုန်)

          ဘရာဇီးနိုင်ငံသည် အိမ်နီးချင်းနိုင်ငံဖြစ်သော အိန္ဒိယနိုင်ငံကို ကျော်လွန်၍ ကမ္ဘာ့ဝါဂွမ်း အများဆုံးတင်သွင်းသည့် နိုင်ငံများထဲမှ တစ်နိုင်ငံဖြစ်သည့် ဘင်္ဂလားဒေ့ရှ်နိုင်ငံ၏ အဓိက ဝါဂွမ်းတင်သွင်းသည့်နိုင်ငံဖြစ်လာကြောင်း အမေရိကန်နိုင်ငံစိုက်ပျိုးရေးဦးစီးဌာန (USDA) ၏ ထုတ်ပြန် ချက်အရ သိရပါသည်။ ဈေးကွက်နှစ် ၂၀၂၄-၂၀၂၅ ခုနှစ်အတွင်း ဩဂုတ်လအစတွင် ဘင်္ဂလားဒေ့ရှ် နိုင်ငံသည် ချည်စိမ်းအထုပ်ရေ ၈.၂၈ သန်းခန့် တင်သွင်းခဲ့ကြောင်း သိရပါသည်။ ဘရာဇီးနိုင်ငံသည် ဘင်္ဂလားဒေ့ရှ်နိုင်ငံသို့ ချည်စိမ်းအထုပ်ရေ ၁.၉ သန်းခန့် တင်ပို့ခဲ့ကြောင်းနှင့် ၎င်းပမာဏသည် တင်သွင်းမှုစုစုပေါင်း၏ ၂၃ ရာခိုင်နှုန်းခန့်ဖြစ်ကြောင်း သိရပါသည်။ အိန္ဒိယနိုင်ငံသည်လည်း ဘင်္ဂလားဒေ့ရှ်နိုင်ငံသို့ ချည်စိမ်းအထုပ်‌ရေ ၁.၄ သန်းခန့် တင်ပို့ခဲ့ပြီး ဒုတိယအများဆုံးတင်ပို့ သည့်နိုင်ငံဖြစ်ကြောင်း သိရပါသည်။ USDA၏ အစီရင်ခံစာအရ ဘရားဇီးနိုင်ငံမှ တင်ပို့သော ဝါဂွမ်းများသည် ဘင်္ဂလားဒေ့ရှ်နိုင်ငံ ဝါဂွမ်းကြိတ်စက်များအကြားတွင် ၎င်း၏ ‌ဈေးနှုန်းသက်သာမှုကြောင့် ရေပန်းစားလျက်ရှိကြောင်း သိရပါသည်။ လက်ရှိဈေးကွက်နှစ် ၂၀၂၆ ခုနှစ်အတွက် USDA က ဘင်္ဂလားဒေ့ရှ်နိုင်ငံသည် ဝါဂွမ်းအထုပ်ရေ ၈.၄ သန်းခန့်တင်သွင်းလိမ့်မည်ဖြစ်ကြောင်း ယခင် ‌ဈေးကွက်နှစ် ၂၀၂၅ ခုနှစ် MY 25 ထက် ၁.၄ ရာခိုင်နှုန်းခန့်မြင့်တက်လာနိုင်ကြောင်း ခန့်မှန်းချက်အားထုတ်ပြန်ကြေညာခဲ့ပါသည်။ ပြည်တွင်းတွင် ဝါဂွမ်းများကို ၄၅၀၀မှ၄၆၀၀ ဟက်တာဧကအတွင်းသာ စိုက်ပျိုးလျက်ရှိသည့်အတွက် တစ်နှစ်ပတ်လုံးဝါဂွမ်းထုတ်လုပ်မှုသည် အထုပ်‌ရ ၁၅၃၀၀၀ ခန့်သာရှိကြောင်း သိရပါသည်။ ဘင်္ဂလား‌ဒေ့ရှ်နိုင်ငံ အထည်အလိပ်လုပ်ငန်း၏ တစ်နှစ်ပတ်လုံး ဝါဂွမ်းသုံးစွဲမှုသည် အထုပ်ရေ ၁၅ သန်းခန့်ရှိသဖြင့် နိုင်ငံခြားမှ တင်ပို့သော ဝါဂွမ်းများကိုသာ မှီခိုနေရကြောင်း သိရပါသည်။ ဝါဂွမ်းကြိတ်ဆက်လုပ်ငန်းသည် ချည်စိမ်းများကို အသုံးပြု၍ ချည်လုံးနှင် ချည်မျှင်များကို ယခင်တန်ချိန် ၁.၇ သန်းခန့် ထုတ်လုပ်ရာမှ ၂၀၂၆ ခုနှစ်တွင် တန်ချိန် ၁.၉ သန်းခန့်ထုတ်လုပ်မှု တိုးမြှင့်မည်ဖြစ်ကြောင်း သိရပါသည်။ ချည်စိမ်းတင်သွင်းမှုများ မြင့်တက်နေသော်လည်း ဘင်္ဂလား‌ဒေ့ရှ်နိုင်ငံ အသင့်ဝတ် အဝတ်အစား ထုတ်လုပ်သည့်လုပ်ငန်းသည် ချည်မျှင်နှင့်အထည်များ ပိုမိုတင်သွင်းရန် မျှော်မှန်းလျက်ရှိကြောင်း သိရပါသည်။ ဘင်္ဂလားနိုင်ငံသို့ ချည်မျှင်အများဆုံးတင်ပို့သည့် နိုင်ငံသည် အိန္ဒိယနိုင်ငံဖြစ်ပြီး အဆို တင်ပို့မှုများပြားခြင်းသည် ၎င်းနိုင်ငံ၏ ကြီးမားသော ဝါကြိတ်ဆက်များရှိနေခြင်းကြောင့်ဖြစ်ပြီး အထည်တင်ပို့မှုအများဆုံး နိုင်ငံသည် တရုတ်နိုင်ငံဖြစ်ကြောင်း သိရှိရပါသည်။

Source: The Daily Star                                                              

DOCA (ရန်ကုန်)

          အစ္စရေးနိုင်ငံဆိုင်ရာဗီယက်နမ်သံရုံ၏ ကုန်သွယ်ရေးအတိုင်ပင်ခံဖြစ်သူ Le Thai Hoa သည် ပူးပေါင်းဆောင်ရွက်မှုအခွင့်အလမ်းများကိုရှာဖွေရန်၊ နည်းပညာသစ်များကိုလေ့လာရန်နှင့် နှစ်နိုင်ငံအကြားစိုက်ပျိုးမွေးမြူရေးကဏ္ဍတွင် ကုန်သွယ်ရေးဆက်နွယ်မှုမြှင့်တင်ရန်အတွက် အစ္စရေးနိုင်ငံတောင်ပိုင်းရှိ Ofakim မြို့တော်တွင် ဒီဇင်ဘာလ ၈ ရက်နေ့နှင့် ၉ ရက်နေ့က ကျင်းပခဲ့သည့် ၂၀၂၅ ခုနှစ် Agro-Mashov ပြပွဲကိုတက်ရောက်ခဲ့ကြောင်း သိရပါသည်။ ယခုနှစ်သည် အစ္စရေး၏ အကြီးမားဆုံးစိုက်ပျိုးမွေးမြူရေးပွဲအခမ်းအနားများထဲမှ တစ်ခုဖြစ်သည့် Agro-Mashov ၏ ၃၄ ကြိမ်မြောက် အခမ်းအနားဖြစ်ကြောင်း သိရပါသည်။ ထိုပြပွဲကို အစ္စရေးနှင့် ကမ္ဘာတစ်ဝှမ်းမှ စိုက်ပျိုး‌ရေးသမားများ၊ စီးပွားရေးသမားများ၊ သုတေသနသမားများနှင့် ကျွမ်းကျင်ပညာရှင်များတက်ရောက်ခဲ့ကြောင်း သိရပါသည်။ ထိုပြပွဲသည် စိုက်ပျိုးရေးတန်ဖိုး ကွင်းဆက်၏ များစွာသောကဏ္ဍများမှ လည်ပတ်သူထောင်ဂဏန်းကျော်ကို ဆွဲဆောင်နိုင်ရန် မျှော်မှန်းရကြောင်း သိရပါသည်။ ၎င်းပြပွဲသည် စီးပွားရေးလုပ်ငန်းများက လုပ်ငန်းနယ်ပယ်၏ နောက်ဆုံးဦးတည်ရာကိုသိရှိရန်၊ မိတ်ဖက်ဖွဲ့မှုများပြုလုပ်ရန်နှင့် ရင်းနှီးမြှုပ်နှံမှုအခွင့်အလမ်း များကိုရှာဖွေရန် ဘက်ပေါင်းဆုံကွန်ယက်ချိတ်ဆက်မှုစင်မြင့်တစ်ခုဖြစ်ခဲ့ကြောင်း သိရပါသည်။ လည်ပတ်သူများသည် စိုက်ပျိုးရေးဒရုန်းများ၊ ဒစ်ဂျစ်တယ်ပရိုဂရမ်များ၊ စက်ပစ္စည်းများ၊ ကောက်ရိတ်သိမ်းသည့်မျိုးကွဲသစ်များ၊ ဖန်လုံအိမ်စနစ်များ၊ ထုတ်ပိုးမှုနည်းပညာများ၊ ထောက်ပံ့ ပို့ဆောင်ရေးဖြေရှင်းချက်များနှင့် မွေးမြူရေးနှင့် ရေလုပ်ငန်းတွင်ဆန်းသစ်တီထွင်မှုများပါဝင်သည့် ကျယ်ပြန့်သောအဆင့်မြင့်နည်းပညာနှင့် စက်ပစ္စည်းများကိုရှာဖွေရန်အခွင့်အလမ်းများကို ပိုင်ဆိုင်ခဲ့ကြောင်း သိရပါသည်။ ထို့ပြင်ပြပွဲတွင် များစွာသောကွန်းဖရန့်များ၊ အလုပ်ရုံဆွေးနွေးပွဲများနှင့် အတွေ့အကြုံဝေမျှသည့် အစည်းအဝေးများကျင်းပခဲ့ကြောင်း သိရပါသည်။ ဆွေးနွေးမှုများတွင် စိုက်ပျိုးမွေးမြူရေးဆိုင်ရာဈေးကွက်တင်ခြင်း၊ ဈေးကွက်ဖွံ့ဖြိုးတိုးတက်ရေး၊ ဒေတာပရိုဂရမ်များ၊ ဘဏ္ဍာရေးစီမံခန့်ခွဲမှုနှင့် အနုစိတ်နည်းပညာများပါဝင်ကြောင်း သိရပါသည်။ နှစ်ရက်တာကျင်းပခဲ့သည့်ပြပွဲအတွင်း တက်ရောက်လည်ပတ်သူများသည် ပြခန်းများတွင် ခင်းကျင်းပြသထားသည့် နောက်ဆုံးပေါ်သစ်သီးနှင့် ဟင်းသီးဟင်းရွက်မျိုးကွဲများကို စမ်းသပ်ရန်အခွင့်အလမ်းရရှိခဲ့ပြီး အဆင့်မြင့်စိုက်ပျိုးမွေးမြူရေးနည်းပညာများနှင့် ဖြေရှင်းချက်များကိုလေ့လာခဲ့ကြကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          ဗီယက်နမ်သည် ၂၀၂၅ ခုနှစ်၏ ပထမ ၁၁ လတွင် စံချိန်တင်ကုန်သွယ်ရေးပိုငွေ အမေရိကန်ဒေါ်လာ ၂၀.၅၃ ဘီလီယံရရှိခဲ့ကြောင်း ဘဏ္ဍာရေးဝန်ကြီးဌာနအောက်ရှိ အမျိုးသားစာရင်းအင်းရုံး ကထုတ်ပြန်ခဲ့ပါသည်။ ထိုကာလအတွင်း စုစုပေါင်းကုန်ပစ္စည်းများ တင်သွင်းမှုနှင့် တင်ပို့မှုတန်ဖိုး မှာ အမေရိကန်ဒေါ်လာ ၈၂၇.၇၅ ဘီလီယံတန်ဖိုးရှိခဲ့ပြီး တင်ပို့မှုတွင် ၁၆.၁ ရာခိုင်နှုန်းနှင့် တင်သွင်းမှုတွင် ၁၈.၄ ရာခိုင်နှုန်းမြင့်တက်ခဲ့ကြောင်း သိရပါသည်။ ထို ၁၁ လတာကာလတွင် စုစုပေါင်း တင်ပို့မှုတန်ဖိုးမှာ အမေရိကန်ဒေါ်လာ ၄၃၀.၁၄ ဘီလီယံရှိခဲ့ပြီး ၁၆.၁ ရာခိုင်နှုန်းမြင့်တက်ခဲ့ ကြောင်း သိရပါသည်။ ပြည်တွင်းကဏ္ဍက အမေရိကန်ဒေါ်လာ ၁၀၂.၄၁ ဘီလီယံတန်ဖိုးတင်ပို့ခဲ့ပြီး နိုင်ငံခြားရင်းနှီးမြှုပ်နှံမှုကဏ္ဍက အမေရိကန်‌ဒေါ်လာ ၃၂၇.၇၃ ဘီလီယံတန်ဖိုးတင်ပို့ခဲ့ကြောင်း သိရပါသည်။ ကုန်ပစ္စည်းအမျိုး အစား ၂၆ ခုတင်ပို့မှုမှာ အမေရိကန်ဒေါ်လာ ၁ ဘီလီယံကျော်အသီး သီးနှင့် အမျိုးအစား ၈ ခုတင်ပို့မှုမှာ အမေရိကန်‌ဒေါ်လာ ၁၀ ဘီလီယံကျော်အသီးသီးရှိခဲ့ကြောင်း သိရပါသည်။  တင်ပို့မှုတွင် ပြုပြုထုတ်လုပ်ထားသောစက်မှုထုတ်ကုန်တင်ပို့မှုတန်ဖိုးမှာ အမေရိ ကန်ဒေါ်လာ ၃၈၁.၇၂ ဘီလီယံ၊ စိုက်ပျိုးမွေးမြူရေးနှင့် သစ်တောထုတ်ကုန်တင်ပို့မှုတန်ဖိုးမှာ အမေရိကန်ဒေါ်လာ ၃၅.၅၈ ဘီလီယံ၊ ရေထွက်ကုန် တင်ပို့မှုတန်ဖိုးမှာ အမေရိကန်ဒေါ်လာ ၁၀.၃၂ ဘီလီယံနှင့် လောင်စာနှင့် သတ္ထုတင်ပို့မှုတန်ဖိုးမှာ အမေရိကန်ဒေါ်လာ ၂.၅၂ ဘီလီယံတန်ဖိုးရှိခဲ့ကြောင်း သိရပါသည်။ တစ်ချိန်တည်းမှာပင် ဗီယက်နမ်သည် ထို ၁၁ လတာကာလတွင် အမေရိကန်ဒေါ်လာ ၄၀၉.၆၁ ဘီလီယံတန်ဖိုးတင်သွင်းခဲ့ကြောင်း သိရပါသည်။ ပြည်တွင်းကဏ္ဍမှ အမေရိကန်ဒေါ်လာ ၁၂၈.၄ ဘီလီယံတန်ဖိုးတင်သွင်းခဲ့ပြီး နိုင်ငံခြားရင်းနှီးမြှုပ်နှံမှုကဏ္ဍမှ အမေရိကန်ဒေါ်လာ ၂၈၁.၂၁ ဘီလီယံတန်ဖိုးတင်သွင်းခဲ့ကြောင်း သိရပါသည်။ ကုန်ပစ္စည်းအမျိုးအစား ၄၇ ခုတင်သွင်းမှုမှာ အမေရိကန်ဒေါ်လာ ၁ ဘီလီယံကျော်အသီးသီးနှင့် ၆ ခုတင်သွင်းမှုမှာ အမေရိ ကန်ဒေါ်လာ ၁၀ ဘီလီယံကျော် အသီးသီးရှိခဲ့ကြောင်း သိရပါသည်။ တင်သွင်းမှုတွင် မတည်ကုန်ပစ္စည်းများ တင်သွင်းမှုတန်ဖိုးမှာ အမေရိကန်ဒေါ်လာ ၃၈၃.၉၆ ဘီလီယံနှင့် စားသုံးကုန်ပစ္စည်းများ တင်သွင်းမှုမှာ အမေရိကန်ဒေါ်လာ ၂၅.၆၅ ဘီလီယံတန်ဖိုးရှိကြောင်း သိရပါသည်။ တရုတ်သည် အမေရိကန်ဒေါ်လာ ၁၆၇.၅ ဘီလီယံဖြင့် ဗီယက်နမ်၏ အကြီးမားဆုံးတင်သွင်းသည့် ဈေးကွက်ဖြစ်ကြောင်း သိရှိရပါသည်။

Vietnam Plus                                                                            

DOCA (ရန်ကုန်)