ပြည်ပကုန်သွယ်မှုသတင်းများ

     ထိုင်းနိုင်ငံတွင် V8 Intertrading ကုမ္ပဏီအနေဖြင့် ယင်လပ်ရှင်နာဝပ်ထရာအစိုးရ၏ ဆန် အပေါင်ခံထားသည့် အစီအစဉ် (rice-pledging scheme) မှ ကျန်ရှိသော ဆန်တန်ချိန် ၁၅၀၀၀ ကို လေလံဈေး အမြင့်ဆုံးဖြစ်သည့် ဆန် (၁) တန်လျှင် ဘတ် ၁၉၀၇၀ ဖြင့် တင်ဒါအောင်မြင်ခဲ့ကြောင်း သိရှိရသည်။

    လေလံပွဲ၏ ရလဒ်သည် အထင်ကြီးဖွယ်ကောင်းလှပြီး အစိုးရအတွက် အနည်းဆုံး ဘတ်ငွေ ၂၈၆ သန်း ရရှိမည်ဟု မျှော်လင့်ကြောင်း၊ အဆိုပါလေလံတင်ရောင်းချပွဲကို ဆန်အရောင်းအဝယ် ပါးချိန်တွင် စီစဉ်ကျင်းပခဲ့သည့်အတွက် လာမည့်နိုဝင်ဘာလတွင် ကျရောက်မည့် သီးနှံရာသီတွင် ဆန်ရောင်းချခြင်းကို ထိခိုက်စေမည်မဟုတ်ကြောင်း၊ ဆန်များကို ဂိုဒေါင်ထဲတွင် အချိန်ကြာမြင့်စွာ သိုလှောင်ထားသော်လည်း အရည်အသွေး ကောင်းမွန်သောဆန်များဟု အာမခံထားသော အစိုးရ ၏ ဆန်သိုလှောင်မှုအစီအမံများအပေါ် လေလံဆွဲသည့် ကုမ္ပဏီများအနေဖြင့် ယုံကြည်ကြသည်ကို လေလံဈေးနှုန်းမှ လှစ်ဟဖော်ပြနေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဖြစ်သူ Phumtham Wechayachai က ပြောကြားခဲ့သည်။

    ဆယ်စုနှစ်သက်တမ်းကြာ သိုလှောင်ထားသည့် နောက်ဆုံးဆန်ဟောင်းများရောင်းချမှုကို Public Warehouse Organisation (PWO) မှ ဦးဆောင်၍ ၁၇-၆-၂၀၂၄နေ့တွင် ကျင်းပခဲ့ရာ ကုမ္ပဏီ(၇)ခုအနက် (၆)မှ ပါဝင်၍ လေလံဆွဲခဲ့ကြောင်း၊ လေလံပွဲတွင် ရောင်းချသော အငြင်းပွား ဖွယ် ဆန်အပေါင်ခံထားသည့် အစီအစဉ်မှ လက်ကျန်ဆန်များမှာ ဆူရင်ပြည်နယ်ရှိ Kittichaiနှင့် Poolphol ဂိုဒေါင်များမှ ၁၀၀ ရာခိုင်နှုန်းပြည့် ထိုင်းစံပယ်ဆန်များဖြစ်ကြောင်း သိရှိရသည်။

     V8 Intertrading ကုမ္ပဏီသည် Poolphol ဂိုဒေါင်မှ ဆန်ဟောင်းများအတွက် ဆန် လေလံစျေးနှုန်းကို ဘတ် ၆၄ သန်းဝန်းကျင်နှင့် Kittichai ဂိုဒေါင်မှ ဆန်ဟောင်းများအတွက် ဆန် လေလံဈေးနှုန်းကို ဘတ် ၂၂၂ သန်းဖြင့် အဆိုပြုခဲ့သည်။ လေလံဈေးနှုန်းများကို အသေးစိတ် ကြည့် မည်ဆိုပါက V8 Intertrading ကုမ္ပဏီမှ ဆန်တစ်တန်လျှင် ဘတ် ၁၉၀၇၀ ခန့် (တစ်ကီလိုလျှင် ၁၉.၀၇၀ ဘတ်) နှုန်းဖြင့် လေလံဈေးသတ်မှတ်ခဲ့ကြောင်း သိရှိရသည်။ လေလံအောင်သည့် ရလဒ် များ အားလုံးကို ၂၁-၆-၂၀၂၄ နေ့တွင် ကြေညာပြီးပါက V8 Intertrading ကုမ္ပဏီအနေဖြင့် ဝယ်ယူ မှု ပြီးမြောက်ရန်အတွက် PWO နှင့် ရက်ပေါင်း ၃၀ အတွင်း စာချုပ်ချုပ်ဆိုရမည်ဖြစ်သည်။

    ထို့နောက် စံနှုန်းအမျိုးမျိုးနှင့် ကိုက်ညီရန်အတွက် ကုမ္ပဏီအနေဖြင့် ဆန်အရည်အသွေး မြှင့်တင်ရန် လိုအပ်မည်ဖြစ်ကြောင်း၊ အဆိုပါဆန်များကို ပြည်တွင်းရောင်းချရန်အတွက် ထိုင်းနိုင်ငံ၊ ပြည်တွင်းကုန်သွယ်ရေးဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီးဌာနတို့တွင် လည်းကောင်း၊ ပြည်ပတင်ပို့ရန်အတွက် နိုင်ငံခြားကုန်သွယ်မှုဦးစီးဌာနတွင်လည်းကောင်း အသီး သီး ထောက်ခံချက်ယူရမည်ဖြစ်ကြောင်း Mr Phumtham က ပြောကြားခဲ့သည်။

Source: Bangkok Post, 18 June, 2024

     အနောက်ကမ္ဘာခြမ်း၌ ဆန်စပါးစိုက်ပျိုးထုတ်လုပ်မှု အကြီးမားဆုံးဖြစ်သည့် ဘရာဇီးနိုင်ငံအနေဖြင့် ဆယ်စုနှစ် ၂ ခုကာလအတွင်း အမြင့်မားဆုံးပမာဏအဖြစ် ၂၀၂၄ ခုနှစ်တွင် ဆန်တန်ချိန် ၁.၃ သန်းအထိ တင်သွင်းရဖွယ်ရှိသည်။ ဆန်စပါး အဓိကစိုက်ပျိုးထုတ်လုပ်ရာ Rio Grande do Sul နယ်မြေဒေသ၌ ရာသီဥတုဆိုးရွားမှုနှင့် ဒေသတစ်ခုလုံး ရေလွှမ်းနစ်မြုပ်ကြောင့် ၂၀၂၃-၂၄ သီးနှံ ရာသီတွင် ဘရာဇီးနိုင်ငံ၏ ဆန်ထွက်ရှိမှုမှာ တန်ချိန် ၇ သန်းခန့်သာ ရှိနိုင်မည်ဟု အမေရိကန် စိုက်ပျိုးရေးဦးစီးဌာနမှ ဇွန်လအတွက်ထုတ်ဝေသည့် Grain: World Markets and Trade’ report အစီရင်ခံစာ၌ ဖော်ပြခဲ့ပြီးနောက် ယခုကဲ့သို့ အခြေအနေ ပေါ်ပေါက်လာခြင်းဖြစ်သည်။

     ပြည်တွင်း၌ ဆန်ပြတ်လပ်မှုနှင့် ကြုံတွေ့လာရနိုင်ခြေအပေါ် တုံ့ပြန်မှုအဖြစ် ဘရာဇီးအစိုးရ သည် အချို့သော ဆန်အမျိုးအစားများ တင်သွင်းရာတွင် စည်းကြပ်သော အကောက်ခွန်နှုန်းထား များကို ၂၀၂၄ ခုနှစ် မေလ ၂၁ ရက်နေ့မှ နှစ်ကုန်ဆုံးချိန်အထိ ဆိုင်းငံ့ထားရှိခဲ့သည်။ ထို့အပြင် ယခု နှစ်အတွင်း ဆန်တန်ချိန် ၁ သန်းကို တင်သွင်းခွင့်ပြုမည်ဟု အစိုးရက ကြေညာချက် ထုတ်ပြန်ထား သည်။ အဆိုပါ အစီအစဉ်အရ ဇွန်လ ၆ ရက်နေ့၌ ပထမအကြိမ်အဖြစ် ဆန်တန်ချိန် ၃ သိန်းကို တင်ဒါခေါ်ယူခဲ့ရာတွင် ဆန်တန်ချိန် ၂၆၀၀၀၀ အတွက် တင်ဒါအောင်မြင်မှုရှိခဲ့သည်။ အဆိုပါ ဆန် များအား မည်သည့်ပင်ရင်းဒေသမှ တင်သွင်းမည်မှာ သေချာမှုမရှိသေးသော်လည်း နိုင်ငံပိုင် ဝယ်ယူ ရေးကုမ္ပဏီဖြစ်သော CONAB သည် စက်တင်ဘာလ ၈ ရက်နေ့ အရောက် တင်သွင်းရန် ညွှန်ကြား ထားပြီး ဘရာဇီးငွေကြေးအားဖြင့် ရောင်းဈေး ၁ ကီလိုဂရမ်လျှင် ၄ ရီရယ် (၀.၇၆ ဒေါ်လာခန့်) နှုန်းဖြင့် ၅ ကီလိုဂရမ်ဝင် ဆန်အိတ်များဖြင့် ဖြန့်ဖြူးမည်ဖြစ်သည်။

     အစိုးရအနေဖြင့် ဆန်ရောင်းလိုအားကို တည်ငြိမ်စေရန်နှင့် ပြည်တွင်းဈေးနှုန်းများအား ထိန်းသိမ်းနိုင်ရန်အတွက် ရည်ရွယ်ဆောင်ရွက်ခြင်းဖြစ်သော်လည်း လတ်တလော စပါးရိတ်သိမ်း ပြီးချိန်၌ အသစ်ထပ်မံ ဝင်ရောက်လာမည့်ဆန်များကြောင့် ရောင်းလိုအားပိုလျှံမှုရှိမည့် အရေးကို စိုးရိမ်မကင်းဖြစ်လျက်ရှိသော ပြည်တွင်းရှိ ဆန်စပါး စိုက်ပျိုးထုတ်လုပ်သူများက ကန့်ကွက်လျက် ရှိကြသည်။ ဘရာဇီးနိုင်ငံသည် သမားရိုးကျအားဖြင့် မာကိုဆာသဘောတူညီချက် အဖွဲ့ဝင်နိုင်ငံများ ကိုသာ အခွန်ကင်းလွတ်ခွင့်ဖြင့် ဆန်တင်သွင်းခွင့်ပြုထားပြီး ပါရာဂွေးနှင့် ဥရုဂွေး နိုင်ငံများထံမှ အဓိကတင်သွင်းခြင်းဖြစ်သည်။ အာဂျင်တီးနားနိုင်ငံထံမှ ဆန်ဝယ်ယူတင်သွင်းမှုမှာ အနည်းငယ်မျှ သာရှိသည်။ လက်ရှိချမှတ်ထားသည့် မူဝါဒအရ မာကိုဆာ အဖွဲ့ဝင်မဟုတ်သော နိုင်ငံများသည် လည်း အကောက်ခွန်ကင်းလွတ်လျက် ဆန်တင်သွင်းနိုင်ခွင့်ရှိသည်။ ၂၀၂၀ ပြည့်နှစ်၌ အလားတူ ခွင့်ပြုခဲ့ချိန်တွင် အမေရိကန်နိုင်ငံထံမှ ဆန်တန်ချိန် ၈၂၀၀၀ ကျော် တင်သွင်းခဲ့မှုက သွင်းကုန် ပမာဏမြင့်တက်မှုကို ဖြစ်ပေါ်စေခဲ့သည်။

     ဘရာဇီး၏ သွင်းကုန်မူဝါဒ ပြောင်းလဲဖော်ဆောင်မှုသည် နိုင်ငံ၏ ဆန်တင်ပို့မှုအပေါ်တွင် လည်း သက်ရောက်နိုင်ဖွယ်ရှိသည်။ ၂၀၂၂ ခုနှစ်၌ ဘရာဇီးနိုင်ငံသည် လက်တင်အမေရိကဒေသသို့ ဆန်တင်ပို့လျက် ဈေးကွက်ရယူနိုင်သည့်အပြင် အိန္ဒိယ၏ ဆန်တင်ပို့မှုပိတ်ပင်ချိန်၌ အာဖရိက ဈေးကွက်သို့လည်း တိုးချဲ့တင်ပို့နိုင်ခဲ့သည်။ သို့သော် ၂၀၂၃-၂၄ သီးနှံရာသီတွင် ဆန်စပါးလုပ်ငန်း နယ်ပယ်၌ ထိခိုက်မှုများက ဘရာဇီး၏ ဆန်ပို့ကုန်ဈေးနှုန်းများကို မြင့်တက်မှုဖြစ်ပေါ်စေပြီး ၎င်း၏ ဝယ်လက်နိုင်ငံများသည် ဈေးနှုန်းအရ ပိုမိုယှဉ်ပြိုင်နိုင်စွမ်းရှိသော အမေရိကန်နိုင်ငံသို့ ပြောင်းလဲ ဝယ်ယူဖွယ်ရှိနေသည်။

Source: Miller Magazine, 14 Jun 2024

    ကောက်ပဲသီးနှံ ရောင်းလိုအားပိုလျှံမှုနှင့် စားသုံးမှုကျဆင်းခြင်းတို့အရ ပြည်ပမှ ဝယ်ယူမှုကို ယခင်က ကြီးမားစွာ လုပ်ဆောင်ခဲ့ရခြင်းမရှိသော တရုတ်နိုင်ငံ အနေဖြင့် ရာသီဥတုခြောက်သွေ့မှု ဒဏ်ကို ကြုံတွေ့ရခြင်းကြောင့် ဂျုံနှင့် ပြောင်းတို့ အထွက်လျော့ကျမည်ဟု ခန့်မှန်းရပြီး ကောက်ပဲ သီးနှံ တင်သွင်းမှု မြင့်တက်လာဖွယ်ရှိသည်ဟု တရုတ်နိုင်ငံအခြေစိုက် စိုက်ပျိုးရေး အတိုင်ပင်ခံ လုပ်ငန်းဖြစ်သော BOABC ကို ကိုးကားလျက် Bloomberg သတင်းဌာနက ဖော်ပြထားသည်။

     တရုတ်နိုင်ငံ၏ ဂျုံစိုက်ပျိုးထုတ်လုပ်မှုမှာ ၂၀၂၅ ခုနှစ် ဇွန်လတွင် ကုန်ဆုံးမည့် ဈေးကွက် ရာသီနှစ်အတွင်း ၁.၂၄% ‌လျော့နည်းလျက် တန်ချိန် ၁၃၄ သန်း ခန့်သာ ထွက်ရှိနိုင်ကြောင်း၊ အလား တူ ၂၀၂၅ ခုနှစ် အောက်တိုဘာလအထိ ဈေးကွက်ရာသီကာလ၌ ပြောင်းစိုက်ပျိုးထုတ်လုပ်မှုမှာ ၂.၂၆% လျော့နည်းလျက် တန်ချိန် ၂၈၂ သန်းခန့်သို့ ကျဆင်းထွက်ရှိနိုင်မည်ဖြစ်ကြောင်း BOABC က ပြောဆိုခဲ့သည်။

    တရုတ်နိုင်ငံ လယ်ယာစိုက်ပျိုးရေးဝန်ကြီးဌာန၏ အချက်အလက်များအရ အပူချိန် မြင့်မား မှုနှင့် မိုးရေချိန်လျော့နည်းရရှိမှုတို့သည် အဆိုပါကောက်ပဲသီးနှံများအား အဓိကစိုက်ပျိုးရာ နိုင်ငံ၏ မြောက်ပိုင်းနယ်မြေဒေသများတွင် ခြောက်သွေ့မှုကို ဖြစ်ပေါ်စေခဲ့ကြောင်း၊ ၎င်း၏ အကျိုးဆက်က နွေသီးနှံများ စိုက်ပျိုးထုတ်လုပ်မှုကို ထိခိုက်မှုရှိကြောင်း သိရှိရသည်။

    ထိုကဲ့သို့ ဂျုံနှင့်ပြောင်း အဓိကစိုက်ပျိုးရာနယ်မြေများတွင် မြင့်မားသော အပူချိန်နှင့်အတူ ခြောက်သွေ့ရာသီဥတု ဖြစ်ပေါ်မှုသည် လာမည့် ၁၀ ရက်ခန့်ကာလအထိ ဆက်လက်တည်ရှိပြီး သီးနှံစိုက်ပျိုးမှုကို ဆိုးရွားစွာ ထိခိုက်စေဖွယ်ရှိသည်။ ခြောက်သွေ့မှုဒဏ်ကို ရင်ဆိုင်ဖြေရှင်းနိုင်ရန် အတွက် သီးနှံများ အဓိကစိုက်ပျိုးထုတ်လုပ်သူများထံသို့ ကိုယ်စားလှယ်အဖွဲ့များကို စိုက်ပျိုးရေးဝန်ကြီးဌာနက စေလွှတ်ထားကြောင်း Bloomberg သတင်းဌာနက ဖော်ပြထားသည်။

Source: SS Rice News, 19 Jun 2024

          အိန္ဒိယနိုင်ငံအနေဖြင့် ကုလားပဲထုတ်လုပ်မှုကျဆင်းခြင်းကြောင့် ပြည်တွင်း၌ရောင်းလိုအား နည်းပါးလျက်ရှိမှုကို မြှင့်တင်ရန်အတွက် ယခင်နှစ် ဒီဇင်ဘာလမှစတင်၍ စားတော်ပဲများကို အကောက်ခွန် ကင်းလွတ်ခွင့်ပြုလျက် တန်ချိန် ၁.၆ သန်း တင်သွင်းမှုအပြင် ဩစတေးလျနိုင်ငံထံမှ ကုလားပဲတန်ချိန် ၁.၁ သန်းခန့်အထိကိုလည်း တင်သွင်းဖွယ်ရှိကြောင်း အိန္ဒိယ Financial Express သတင်းဌာနက ဖော်ပြပါသည်။

          ပြည်တွင်း၌ ပဲမျိုးစုံစိုက်ပျိုးထုတ်လုပ်မှုတွင် ၅၀% ခန့် ပါဝင်လျက်ရှိသော ကုလားပဲများ ထွက်ရှိမှုမှာ သိသာစွာကျဆင်းခဲ့ရာ အိန္ဒိယအစိုးရသည် စားတော်ပဲနှင့် ကုလားပဲတို့အား သွင်းကုန် အခွန်ကင်းလွတ်ခွင့်ပြုခြင်း အပါအဝင် အခြားသောပဲမျိုးများ ထွက်ရှိမှုမြှင့်တင်နိုင်ရေး တောင်သူ များသို့ တွန်းအားပေးမည့် အစီအမံများစွာကို ချမှတ်လုပ်ဆောင်လျက်ရှိသည်။ ပဲမျိုးစုံ ကုန်သွယ် ရောင်းဝယ်သည့် ဦးဆောင်ကုမ္ပဏီကြီး တစ်ခုဖြစ်သော Mayur Global ကော်ပိုရေးရှင်းမှ အကြီး အကဲဖြစ်သူ Harsha Rai က လွန်ခဲ့သောလ၌ ကုလားပဲတင်သွင်းမှုအပေါ် အကောက်ခွန်စည်းကြပ် မှုကို ဖယ်ရှားပေးခဲ့သည့် အစိုးရ၏ အချိန်အခါသင့်ဆောင်ရွက်ချက်က ဩစတေးလျရှိ စိုက်ပျိုးသူ များသို့ အပြုသဘောဆောင်သော အချက်ပြမှုဖြစ်ခဲ့ပြီး ယခုနှစ်တွင် တိုးမြှင့်စိုက်ပျိုးမှုကို ဖြစ်ပေါ် စေခဲ့ကြောင်း၊ ဩစတေးလျမှ ရိတ်သိမ်းထွက်ရှိသော ကုလားပဲများသည် အိန္ဒိယဈေးကွက်သို့ စက်တင်ဘာလခန့်တွင် ဝင်ရောက်နိုင်ကြောင်း ပြောကြားခဲ့သည်။

          အိန္ဒိယပြည်တွင်းဈေးကွက်၌ ကုလားပဲဈေးနှုန်းများသည် ၂၀၂၃ ခုနှစ် အောက်တိုဘာလမှ စတင်၍ မြင့်တက်လာခဲ့ရာ အဓိကစိုက်ပျိုးထုတ်လုပ်သည့် ရာဂျပ်စတန်နှင့် မဒ္ဒရာပရာဒေ့ရှ် ပြည်နယ်များတွင် လက်ရှိကာလ၌ အခြေခံရည်ညွှန်းဈေးနှုန်း ၁ ကွင်တယ် (၁၀၀ ကီလိုဂရမ်) လျှင် ၅၄၄၀ ရူပီးနှုန်းထက် ပိုမိုပြီး ရူပီး ၇၁၀၀ နှုန်းခန့်ဖြင့် ရောင်းဝယ်လျက်ရှိသည်။ ကုလားပဲဈေးနှုန်း များ ရူပီး ၇၀၀၀ ကိုကျော်လွန်ရောက်ရှိမှုသည် လွန်ခဲ့သော နှစ်ကာလများအတွင်း ပထမဆုံး အကြိမ်ဖြစ်ကြောင်း ကုန်သည်များက ပြောဆိုကြသည်။ အိန္ဒိယ စိုက်ပျိုးရေးဝန်ကြီးဌာနက ၂၀၂၃-၂၄ သီးနှံရာသီနှစ်တွင် ကုလားပဲစိုက်ပျိုးထုတ်လုပ်မှုမှာ ယခင်နှစ်ထွက်ရှိမှုအောက် တန်ချိန် ၀.၆၉ သန်းခန့် လျော့နည်းလျက် တန်ချိန် ၁၁.၅၇ သန်းခန့် ထွက်ရှိနိုင်မည်ဟု ခန့်မှန်းထားသည်။ သို့ရာ တွင် ကုန်သည်များကမူ အဆိုပါ ပမာဏထက် ပိုမိုလျော့နည်းနိုင်သည်ဟု ပြောဆိုလျက်ရှိသည်။

          ကုန်သွယ်ရေး သတင်းအရင်းအမြစ်များမှ ပြောဆိုမှုအရ ကုလားပဲဈေးနှုန်းသည် အခြေခံ ရည်ညွှန်းဈေးနှုန်း၏အထက်၌ တည်ရှိနေသဖြင့် လက်ရှိ ဧပြီ-ဇွန် ဈေးကွက်ရာသီကာလအတွင်း အစိုးရ၏ ဝယ်ယူရေးအေဂျင်စီဖြစ်သော NAFED သမဝါယမအသင်းချုပ်သည် ကုလားပဲ အရန် ရိက္ခာ ဝယ်ယူရန် တန်ချိန် ၁ သန်း လျာထားချက်အပေါ် တန်ချိန် ၄၀၀၀၀ ခန့်သာ ဝယ်ယူရရှိခဲ့ ကြောင်း၊ ဈေးနှုန်းထောက်ပံ့မှု အစီအစဉ်အောက်တွင် NAFED သည် ၂၀၂၂-၂၃ ခုနှစ်၌ ကုလားပဲ တန်ချိန် ၂.၆ သန်းနှင့် ၂၀၂၃-၂၄ ခုနှစ်တွင် တန်ချိန် ၂.၃ သန်း အသီးသီး ဝယ်ယူရရှိခဲ့ကြောင်း၊ အရန် ရိက္ခာ ကုလားပဲ စုဆောင်းထားရှိမှုမှာ လက်ရှိကာလ၌ စံသတ်မှတ်ချက်ဖြစ်သော တန်ချိန် ၁ သန်း အောက်သို့ လျော့နည်းကျဆင်းလျက်ရှိကြောင်း သိရှိရသည်။

Source: Financial Express, 13 Jun 2024

        တရုတ်၊ ဂျပန်နှင့် တောင်ကိုရီးယားတို့သည် မျဉ်းတကြောင်းကိုဖြတ်ကျော်၍ သုံးပွင့်ဆိုင်ကုန်သွယ်ရေး သဘောတူညီချက်ကို ရယူနိုင်လျှင် အကျိုးရှိမည်ဖြစ်သော်လည်း ပထဝီနိုင်ငံရေး တင်းမာမှုနှင့် အခြားသော ပြဿနာများကြောင့် ကြီးမားသော စိန်ခေါ်မှုများကို ကျော်လွှားရမည်ဟု ကျွမ်းကျင်သူများက ဆိုသည်။

        အဆိုပါနိုင်ငံများ၏  လွတ်လပ်သော ကုန်သွယ်မှု သဘောတူညီချက် အတွက် ဆွေးနွေးပွဲများ သည် ၂၀၁၉ ခုနှစ်ကတည်းက ရပ်တန့်သွားသော်လည်း သုံးနိုင်ငံကြား ကုန်သွယ်ရေးနှင့်ပတ်သက်သည့် ပြီးပြည့်စုံ သောကုန်သွယ်ရေးတစ်ရပ်ပြုလုပ်ရန်  ပြီးခဲ့သည့် တနင်္လာနေ့တွင် တရုတ်ဝန်ကြီးချုပ် Li Qiang၊ ဂျပန်ဝန်ကြီးချုပ် Fumio Kishida နှင့် တောင်ကိုရီးယားသမ္မတ Yoon Suk Yeol တို့ တက်ရောက်ခဲ့သည့် သုံးနိုင်ငံထိပ်သီး အစည်းအဝေးတွင် မီးမောင်းထိုးပြခဲ့သည်။

        လေးနှစ်အတွင်း ပထမဆုံးအကြိမ်အဖြစ် ထိပ်သီးအစည်းအဝေးတွင် ခေါင်းဆောင်သုံးဦးသည် FTA ဆိုင်ရာ ဆွေးနွေးပွဲများ ပြန်လည်စတင်မည်ဟု ကတိပြုခဲ့ကြသည်။

        တရုတ်-ဂျပန်-တောင်ကိုရီးယား FTA ဆွေးနွေးပွဲများ အမြန်ဆုံးပြန်စရန် တရုတ်သမ္မတ Li က "စီးပွားရေးနှင့် ကုန်သွယ်မှု ချိတ်ဆက်မှုကို နက်ရှိုင်းအောင်၊ စက်မှုကွင်းဆက်နှင့် ထောက်ပံ့ရေးကွင်းဆက်၏ တည်ငြိမ်မှုနှင့် ချောမွေ့မှုကို ထိန်းသိမ်းရန်၊ တောင်ကိုရီးယားနှင့် ဂျပန်တို့ကို တောင်းဆိုခဲ့သည်။သုံးရက်အကြာ မေလ ၃၀ ရက်တွင် တရုတ်ကုန်သွယ်ရေးဝန်ကြီးဌာနက စေ့စပ်ညှိနှိုင်းမှုများကို အရှိန်မြှင့်ရန် အသင့်ရှိကြောင်း ပြောကြားခဲ့သည်။

        ဒေသတွင်းနှင့် ကမ္ဘာ့စီးပွားရေးကို တည်ငြိမ်စွာ ပြန်လည်ဦးမော့လာစေရန် မျှော်မှန်းထားသည့် FTA ဆိုင်ရာ ဆွေးနွေးပွဲများသည်  တရုတ်နိုင်ငံအတွက် အလွန်အရေးပါသည်ဟု ဝန်ကြီးဌာနမှ ပြောရေးဆိုခွင့်ရှိသူ He Yadong က နိုင်ငံပိုင်သတင်းအေဂျင်စီ ဆင်ဟွာတွင် ဖော်ပြခဲ့သည်။

        တစ်ချိန်တည်းတွင်ပင် ကိုရီးယားသမ္မတ ယွန်းက အဆိုပါသုံးနိုင်ငံသည် "ကုန်သွယ်မှုနှင့် ရင်းနှီးမြှုပ်နှံမှုအတွက် ပွင့်လင်းမြင်သာပြီး ခန့်မှန်းနိုင်သော ပတ်ဝန်းကျင်တစ်ခု ဖန်တီးရန်နှင့် ဘေးကင်းသော ထောက်ပံ့ရေးကွင်းဆက်တစ်ခု ထူထောင်ရန် ဆုံးဖြတ်ခဲ့သည်" ဟု ပြောကြားခဲ့သည်။

        ထိပ်သီးအစည်းအဝေးအပြီးတွင် ကျင်းပသည့် သုံးနိုင်ငံစီးပွားရေးဆိုင်ရာ အစည်းအဝေးတွင် စီးပွားရေးလုပ်ငန်းခေါင်းဆောင်များက ပုဂ္ဂလိကကဏ္ဍတွင် စီးပွားရေးပူးပေါင်းဆောင်ရွက်မှုဆိုင်ရာ ပူးတွဲ သုတေသနပြုရန် လုပ်ငန်းအဖွဲ့တစ်ခု ဖွဲ့စည်းရန် သဘောတူညီခဲ့ကြသည်။

DOCA(မန္တလေး)