ပြည်ပကုန်သွယ်မှုသတင်းများ

ဂျပန်နိုင်ငံသို့ ဆန်တင်ပို့မှုမြှင့်တင်နိုင်ရန် ကမ္ဘောဒီးယား ကြိုးပမ်း

ကမ္ဘောဒီးယားနိုင်ငံ ပို့ကုန်မြှင့်တင်ရေးလုပ်ငန်းအဖွဲ့၏ ဥက္ကဋ္ဌဖြစ်သူ စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနမှ အတွင်းဝန် Samheng Bora ဦးဆောင်သော ကိုယ်စားလှယ်အဖွဲ့ သည် ဂျပန်ဈေးကွက်သို့ ကမ္ဘောဒီးယား ဆန်တင်ပို့မှု မြှင့်တင်နိုင်ရေးအတွက် ဇန်နဝါရီ ၂၃ ရက်မှ ၂၄ ရက်နေ့အထိ ဂျပန်နိုင်ငံ၏ ထိပ်တန်း ဆန်တင်သွင်းသူ (၃) ဦးနှင့် အဆင့်မြင့်အရာရှိ ဆွေးနွေးပွဲများပြုလုပ်ခဲ့ကြကြောင်း သိရပါသည်။

အဆိုပါ ဆွေးနွေးပွဲများတွင် ကမ္ဘောဒီးယားအစိုးရ အနေဖြင့် ပို့ကုန်မြှင့်တင်ရေးလုပ်ငန်း အဖွဲ့မှတစ်ဆင့် လယ်ယာထွက်ကုန်များ တိုးချဲ့တင်ပို့နိုင်ရေးနှင့် ကမ္ဘောဒီးယားဆန်ကို နိုင်ငံတကာ အရည်အသွေး စံချိန်စံညွှန်းများနှင့် ကိုက်ညီစေရေး ကြိုးပမ်းဆောင်ရွက်လျက်ရှိကြောင်း၊ နှစ်နိုင်ငံ အကြား ကုန်သွယ်မှုဆက်ဆံရေးကို မြှင့်တင်ရန်နှင့် ပူးပေါင်းဆောင်ရွက်ရေး လမ်းကြောင်းသစ်များ ရှာဖွေရန်တို့ကို ရည်မှန်းချက်ချမှတ် လုပ်ဆောင်လျက်ရှိကြောင်း အတွင်းဝန် Samheng Bora က အလေးပေး ပြောကြားခဲ့ပါသည်။

ဂျပန်ကုမ္ပဏီများ အနေဖြင့် ကမ္ဘောဒီးယား၏ ဆန်စပါးကဏ္ဍအပေါ် စိတ်ဝင်စားမှုကို အခိုင် အမာ ဖော်ပြခဲ့ကြပြီး အလားအလာရှိသောဈေးကွက်အဖြစ် အသိအမှတ်ပြုလျက် ကမ္ဘောဒီးယား ဆန်အား ထောက်ပံ့ရေးကွင်းဆက်သို့ မိတ်ဆက်ခြင်းအပေါ် စိတ်ဝင်စားမှုရှိကြောင်း ပြသခဲ့ကြ ပါသည်။

နှစ်ဘက် ကိုယ်စားလှယ်များသည် အပြုသဘောဆောင်ပြီး ပူးပေါင်းဆောင်ရွက်သည့် အချက်များကို ထုတ်ဖော်ပြောကြားခဲ့ပြီး ဂျပန်နိုင်ငံတွင် ကမ္ဘောဒီးယားဆန်ကို ဈေးကွက်မြှင့်တင် ရန်နှင့် နှစ်နိုင်ငံ ကုန်သွယ်မှု ခိုင်မာစေမည့် ကတိကဝတ်များကို ထပ်လောင်းအတည်ပြုခဲ့ကြောင်း၊ ဂျပန်နိုင်ငံ၏ ထိပ်တန်းဆန်တင်သွင်းသူ (၃) ဦးသည် ဂျပန်ဈေးကွက်ဝေစု၏ ၈၀ ရာခိုင်နှုန်းကို စုပေါင်းရယူထားပြီး ၎င်းတို့အနက် ITOCHU ကော်ပိုရေးရှင်းသည် ဂျပန်နိုင်ငံ၏ အကြီးဆုံး ဆန် တင်သွင်းသူ ဖြစ်ကြောင်း သိရပါသည်။

Source: The Khmer Today, 26 Jan 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ထိုင်းနိုင်ငံ၏ ဆန်တင်ပို့မှု ၂၀ ရာခိုင်နှုန်းကျော် ကျဆင်းလျက်ရှိ

ပြည်ပကုန်သွယ်မှုသတင်းများ

ယခုနှစ်တွင် ထိုင်းနိုင်ငံ၏ဆန်တင်ပို့မှုသည် ၂၄ ရာခိုင်နှုန်းခန့် လျော့နည်းပြီး တန်ချိန် ၇.၅ သန်းသို့ ကျဆင်းဖွယ်ရှိကြောင်း ထိုင်းနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ဇန်နဝါရီ ၂၈ ရက်နေ့တွင်ထုတ်ပြန်ခဲ့ပါသည်။

အိန္ဒိယနိုင်ငံ၏ ဆန်တင်ပို့မှု ပြန်လည်ဦးမော့လာခြင်းနှင့် အခြားဆန်ထုတ်လုပ်သည့်နိုင်ငံ များမှ တင်ပို့မှုတိုးမြှင့်လာခြင်းတို့ကြောင့် ထိုကဲ့သို့ လျှော့ချခန့်မှန်းခြင်းဖြစ်ကြောင်း နိုင်ငံခြား ကုန်သွယ်ရေးဦးစီးဌာန၏ အကြီးအကဲဖြစ်သူ Arada Fuangtong က သတင်းစာရှင်းလင်းပွဲတစ်ခု တွင် ပြောကြားခဲ့ပါသည်။ ရာသီဥတု ခြောက်သွေ့မှုအခြေအနေ လျော့ပါးသက်သာလာခြင်းက သီးနှံအထွက်တိုးတက်မှုကို အထောက်အပံ့ပြုမှုနှင့်အတူ အင်ဒိုနီးရှားနိုင်ငံကဲ့သို့ ဆန်ကို အဓိက တင်သွင်းနေသည့်နိုင်ငံများမှ ဝယ်လိုအား ကျဆင်းလျက်ရှိသည်ဟု အဆိုပါ ဝန်ကြီးဌာနက ဖော်ပြ ထားပါသည်။

အိန္ဒိယနိုင်ငံ၏နောက်တွင် ဒုတိယမြောက် ကမ္ဘာ့အများဆုံး ဆန်တင်ပို့သည့် ထိုင်းနိုင်ငံ အနေဖြင့် ဒီဇင်ဘာလတွင် ဆန်တင်ပို့မှု ၇.၁ ရာခိုင်နှုန်း ကျဆင်းခဲ့သော်လည်း ၆ နှစ်တာကာလ အတွင်း အမြင့်ဆုံးအဖြစ် ၂၀၂၄ ခုနှစ်၌ ဆန်တန်ချိန် ၉.၉၅ သန်း တင်ပို့လျက် နှစ်အလိုက် တိုးတက်မှု ၁၃.၄ ရာခိုင်နှုန်း ရရှိခဲ့ကြောင်း သိရှိရပါသည်။

Source : Bangkok Post , 28 Jan 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ရုရှားထံမှ ရေနံတင်သွင်းရန် အင်ဒိုနီးရှား စဉ်းစားနေ

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံအနေဖြင့် ၂၀၂၂ ခုနှစ် ရုရှား-ယူကရိန်း ပဋိပက္ခဖြစ်ပွားပြီးကတည်းက ဥရောပ၏ ကြီးမားသည့် ပိတ်ဆို့အရေးယူမှုကို ကြုံတွေ့နေရသော ရုရှားနိုင်ငံထံမှ ရေနံများ ဝယ်ယူ ရန် စဉ်းစားနေသည်ဟု ဗီယက်နမ်သတင်းဌာနက ဇန်နဝါရီလ ၂၆ ရက်နေ့တွင် ဖော်ပြထားသည်။

ဘရာဇီး၊ ရှရှား၊ အိန္ဒိယ၊ တရုတ်နှင့် တောင်အာဖရိကနိုင်ငံများ ဦးဆောင်ပါဝင်သည့် BRICS စီးပွားရေးမဟာမိတ်အဖွဲ့သို့ အင်ဒိုနီးရှား၏ အဖွဲ့ဝင်အဖြစ် ဝင်ရောက်မှုက နိုင်ငံတကာပိတ်ဆို့ အရေးယူမှုများကြောင့် ကမ္ဘာ့စံသတ်မှတ်ချက် ဈေးနှုန်းအောက် ကျဆင်းလျက်ရှိသော ရုရှားရေနံ ကို တင်သွင်းနိုင်ရေးအတွက် အခွင့်အလမ်းများ ဖွင့်ပေးခဲ့ခြင်းဖြစ်ကြောင်း အင်ဒိုနီးရှား စွမ်းအင် ဝန်ကြီး Mr. Bahlil Lahadalia က မကြာသေးမီက ပြောကြားခဲ့သည်။

သို့သော်လည်း ရုရှားရေနံအပေါ် အင်ဒိုနီးရှား၏ စိတ်ဝင်စားမှုသည် ရေနံအရောင်းအဝယ် သဘောတူညီချက်ပြုလုပ်ပါက အနောက်နိုင်ငံများနှင့် ဆက်ဆံရေး ထိခိုက်မှုရှိလာမည်ကို စိုးရိမ်မှု များဖြစ်ပေါ်စေခဲ့သည်။ ဥရောပသမဂ္ဂ သံတမန်တစ်ဦးကမူ ရုရှားထံမှဖြစ်စေ အခြားမည်သည့် နိုင်ငံမှဖြစ်စေ အင်ဒိုနီးရှား၏ ရေနံဝယ်ယူတင်သွင်းမှုအပေါ် ဥရောပသမဂ္ဂအနေဖြင့် အလေးထား လိမ့်မည်မဟုတ်ကြောင်း ထုတ်ဖော်ပြောကြားထားသည်။

တစ်ချိန်တည်းမှာပင် အင်ဒိုနီးရှားနိုင်ငံဆိုင်ရာ ရုရှားသံအမတ်ကြီး Mr. Sergei Tolchenov က ရှရှားနိုင်ငံအနေဖြင့် ရေနံဝယ်ယူရေး စေ့စပ်ညှိနှိုင်းမှုများကို တံခါးဖွင့်ပေးထားကြောင်း၊ အင်ဒိုနီးရှားနှင့် ရေနံရောင်းဝယ်မှုဆိုင်ရာ ဆွေးနွေးပြောဆိုမှုများ လုပ်ဆောင်နိုင်ခဲ့ကြောင်း၊ ရှရှားနိုင်ငံသည် နိုင်ငံတကာဘဏ္ဍာရေးစနစ်တွင် အထီးကျန်ဖြစ်နေသောကြောင့် ဒေသတွင်း ငွေကြေးများ၊ ရူပီးယားနှင့် ရူဘယ်တို့ကို နှစ်နိုင်ငံအကြား ကုန်သွယ်မှုတွင် အသုံးပြုရန် ဆွေးနွေး ညှိနှိုင်းခဲ့ကြောင်း မှတ်ချက်ပြုပြောကြားခဲ့သည်။

အင်ဒိုနီးရှားနိုင်ငံ အနေဖြင့် တစ်ရက်လျှင် ရေနံစည်ပေါင်း ၇၀၀၀၀၀ မှ ၈၀၀၀၀၀ အတွင်း သာ ထုတ်လုပ်နိုင်ပြီး နိုင်ငံ့ရေနံလိုအပ်ချက်၏ ထက်ဝက်သာထုတ်လုပ်နိုင်သည်။ အင်ဒိုနီးရှားသည် ရေနံကို အဓိကအားဖြင့် ရေနံတင်ပို့သူနိုင်ငံများအဖွဲ့ (OPEC) အဖွဲ့ဝင်နိုင်ငံများထံမှ တင်သွင်းပြီး ရေနံနှင့် သဘာဝ ဓာတ်ငွေ့တင်သွင်းမှုသည် ၂၀၂၄ ခုနှစ်တွင် စုစုပေါင်းအမေရိကန်ဒေါ်လာ ၃၆.၃ ဘီလီယံခန့်ရှိသည်ဟု အင်ဒိုနီးရှား ဗဟိုစာရင်းအင်းအေဂျင်စီ (BPS) က ဖော်ပြထားကြောင်း သတင်းရရှိပါသည်။

Source: Việt Nam News, Sunday, Jan 26, 2025 လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

တရုတ်နိုင်ငံ၏ ကားထုတ်လုပ်သူ Geely သည် EV မော်ဒယ် Geely EX5 အား အင်ဒိုနီးရှားတွင် စတင်မိတ်ဆက်

ပြည်ပကုန်သွယ်မှုသတင်းများ

တရုတ်နိုင်ငံ၏မော်တော်ကားကုမ္ပဏီ Geely Auto မှ Geely EX5 မော်ဒယ်ကို အင်ဒိုနီးရှားစျေးကွက်အတွက် ၎င်း၏ပထမဆုံးမော်ဒယ်အဖြစ် ဇန်နဝါရီ ၂၃ ရက်နေ့ကမိတ်ဆက် ခဲ့သည်။ အင်ဒိုနီးရှားသည်စမတ်ကျပြီး ရေရှည်တည်တံ့သော ရွှေ့လျှားသွားလာမှုအတွက် ဗဟိုချက်ဖြစ်လာရန် အလားအလာကောင်းများရှိကြောင်း အခိုင်အမာယုံကြည်ထားပြီး Geely သည်နည်းပညာရေရှည်တည်တံ့မှုနှင့်ထူးခြားသောမောင်းနှင်မှု အတွေ့အကြုံကိုဦးစားပေးသည့်‌ ရွှေ့လျားသွားလာမှုဆိုင်ရာဖြေရှင်းချက်များအားပေးဆောင်ရန် အဆင်သင့်ရှိကြောင်း Geely Auto International Corporation ၏ဒုတိယ ဥက္ကဌ Evin Ye က ပြောကြားခဲ့သည်။ သူ၏အဆိုအရ ကုမ္ပဏီသည်ကျွန်းစုနိုင်ငံ၌ ‌ဒေသန္တရမော်တော်ယာဥ် ထုတ်လုပ်ရန်အတွက် စက်ရုံတစ်ရုံကို တည်ထောင်ပြီး ၂၀၂၅ ခုနှစ်တတိယ သုံးလပတ်တွင် စတင်ထုတ်လုပ်နိုင်ရန်စီစဥ်ထားသည်။ ရင်းနှီးမြှုပ်နှံမှုနှင့်မြေအောက်စက်မှုဝန်ကြီးဌာနမှ အရှေ့အာရှ၊ တောင်အာရှ၊ အရှေ့အလယ်ပိုင်း နှင့် အာဖရိကရင်းနှီးမြှုပ်နှံမှုမြင့်တင်ရေး ဒါရိုက်တာ Cahyo Purnomo က တရုတ်၏ရင်းနှီးမြှုပ်နှံ မှုသည် ဆက်လက်တိုးတက်လာနေပြီးအထူးသဖြင့် အင်ဒိုနီးရှား၏ စက်မှုဖွံဖြိုးတိုးတက်ရေး အတွက် အထူးသဖြင့်လျှပ်စစ်ကားကဏ္ဍတွင်အ‌‌ရေးကြီးသောအစိတ် အပိုင်းတစ်ခုဖြစ်ကြောင်း ပြောကြားခဲ့သည်။ Geely Auto သည်နိုင်ငံပေါင်း ၁၀၀ ကျော်တွင် လုပ်ငန်းများလည်ပတ်နေသော တရုတ်နိုင်ငံ HongZhou အခြေစိုက်မော်တော်ယာဥ်ထုတ်လုပ်သူ Geely Holding Group ၏ လုပ်ငန်းခွဲတစ်ခုဖြစ်သည်။

DOCA(ရန်ကုန်)

ဥရောပသမဂ္ဂအဖွဲ့ဝင်အားလုံးနှင့် လွတ်လပ်သောကုန်သွယ်ရေးသဘောတူညီချက်များ ရယူရန် ထိုင်းစီစဉ်

ပြည်ပကုန်သွယ်မှုသတင်းများ

ထိုင်းနိုင်ငံသည် ဥရောပသမဂ္ဂအဖွဲ့ဝင်နိုင်ငံအားလုံးနှင့် လွတ်လပ်သောကုန်သွယ်ရေး သဘောတူညီချက်များ လက်မှတ်ရေးထိုးရန်စီစဉ်ထားကြောင်း ဝန်ကြီးချုပ် Paetongtarn Shinawatra က ဇန်နဝါရီလ ၂၅ ရက်နေ့က ပြောကြားခဲ့ပါသည်။ ဝန်ကြီးချုပ်သည် ထိုမှတ်ချက် ကိုဆွစ်ဇာလန်နိုင်ငံတွင် ကျင်းပခဲ့သည့် ၂၀၂၅ ကမ္ဘာ့စီးပွားရေးဖိုရမ်(WEF)တက်ရောက်ပြီး ပြန်လည် ရောက်ရှိချိန်တွင်‌ ပြောကြားခဲ့ခြင်းဖြစ်ကြောင်း သိရပါသည်။ Ms Paetongtarn သည် ဇန်နဝါရီလ ၂၃ ရက်‌နေ့၌ WEF တွင်သီးခြားအနေဖြင့် ထိုင်းနိုင်ငံနှင့် ဥ‌ရောပလွတ်လပ်သော ကုန်သွယ်ရေးအသင်း (EFTA) ကြား လွတ်လပ်သောကုန်သွယ်ရေးသဘောတူညီချက်(FTA) ကို လက်မှတ်ရေးထိုးခဲ့ကြောင်း သိရပါသည်။ EFTA တွင် ဆွစ်ဇာလန်၊ ‌နော်ဝေ၊ အိုက်စလန်နှင့် လတ်ချင်စတိန်းနိုင်ငံတို့ပါဝင်ကြောင်း သိရပါသည်။ ထိုသဘောတူညီချက်သည် လတ်တလော အစိုးရ၏ ပထမဆုံး FTA ဖြစ်ကြောင်း သိရပါသည်။ ထိုင်းနိုင်ငံနှင့် EFTA နိုင်ငံများအကြား စီးပွားရေးဆက်နွယ်မှုအားကောင်းစေမည့်အပြင် FTA သည် အဆင့်မြင့်နည်းပညာနှင့် ဆန်းသစ် တီထွင်မှု၊ လူသားအရင်းမြစ်ဖွံ့ဖြိုးတိုးတက်မှု၊ အသေးစာအလတ်စားလုပ်ငန်းများကြေညာ မြင့်တင်မှုနှင့် စဉ်ဆက်မပြတ်ဖွံ့ဖြိုးတိုးတက်မှု အစရှိသည့် ဧရိယာများတွင် အနီးကပ်ပူးပေါင်း ဆောင်ရွက်မှုကို မြှင့်တင်ပေးနိုင်မည်ဟု သိရပါသည်။ Ms Paetongtarn ကအစိုးရသည် ကျန်ရှိ နေသေးသည့် ဥရောပသမဂ္ဂအဖွဲ့ဝင်နိုင်ငံများနှင့် ယခုနှစ်ကုန်တွင် FTA များလက်မှတ်ရေးထိုး နိုင်ရန် ကြိုးပမ်းသွားမည်ဖြစ်ကြောင်းပြောကြားခဲ့ပါသည်။ ထိုအစည်းအဝေးအတွင်း ဝန်ကြီးချုပ် သည် ဆီမီးကွန်ဒတ်တာလုပ်ငန်း၊ ဒေတာစင်တာများနှင့် အစိမ်းရောင်စွမ်းအင်ပါဝင်သည့် အနာဂတ်လုပ်ငန်းများတွင် ရင်းနှီးမြှုပ်နှံမှုအခွင့်အလမ်းများကို ပြည်ပရင်းနှီးမြှုပ်နှံသူများနှင့် တွေ့ဆုံဆွေးနွေးခဲ့ကြောင်း သိရပါသည်။ ထို့ပြင် ဝန်ကြီးချုပ်သည် အကယ်၍ ထိုကုမ္ပဏီများက ထိုင်းနိုင်ငံတွင်ထုတ်လုပ်သည့်စက်ရုံများတည်ထောင်ရန်ဆုံးဖြတ်ခဲ့ပါက ထိုင်းလုပ်သားများအား အဆင့်မြင့်နည်းပညာများကို ကျွမ်းကျင်မှုရှိစေရေးအတွက် ကူညီပေးရန် တောင်းဆိုခဲ့ကြောင်း သိရပါသည်။ ဘတ် ၁ ထရီလီယံတန်ကြေးရှိသည့် Land Bridge စီမံကိန်းနှင့် ပတ်သတ်၍ ဝန်ကြီးချုပ်က ဒူဘိုင်းတွင်အခြေစိုက်သည့် ကမ္ဘာ့ထိပ်တန်း ထောက်ပံ့ပို့ဆောင်ရေးကုမ္ပဏီကြီး ဖြစ်သည့် DP World သည် ထိုစီမံကိန်း၏ အဓိကရင်းနှီးမြှုပ်နှံသူဖြစ်လာမည်ဟု မျှော်လင့်ရ ကြောင်း ပြောကြားခဲ့ပါသည်။ အစိုးရပြောခွင့်ရပုဂ္ဂိုလ်၏ ပြောကြားချက်အရ Ms Paetongtarn သည် ၅၅ ကြိမ်မြောက် ကမ္ဘာ့စီးပွားရေးဖိုရမ်တွင် ကမ္ဘာ့ထိပ်တန်းလုပ်ငန်းများမှ ထိပ်တန်း အလုပ်အမှုဆောင်အဖွဲ့ဝင်များနှင့် တွေ့ဆုံခဲ့ကြောင်းပြောကြားခဲ့ပါသည်။ ထိုလုပ်ငန်းများထဲမှ တစ်ခု သည် DP World ၏ CEO ဖြစ်သူ Sultan Ahmed Bin Sulayem ဖြစ်ကြောင်း သိရပါ သည်။ DP World သည်လည်း အာဆီယံနှင့် ကမ္ဘာ့ကုန်သွယ်ရေးကွန်ယက်ကိုချိတ်ဆက်ပေးမည့် Land Bridge စီမံကိန်းတွင်ရင်းနှီးမြှုပ်နှံမှုအလားအလာရှာဖွေရန်နှင့် Inland Container Depot (ICD) တိုးချဲ့ရေးပါဝင်သည့် ထိုင်းနိုင်ငံ၏ထောက်ပံ့ပို့ဆောင်ရေးစွမ်းရည်မြှင့်တင်ပေးရန်အတွက် အားကောင်းသောစိတ်ဝင်စားမှုကို ပြသခဲ့ကြောင်း သိရပါသည်။ Ms Paetongtarn က WEF သည် ထိုင်းနိုင်ငံ၏ အလားအလားနှင့် အခွင့်အလမ်းများကို ကမ္ဘာ့အသိုက်အဝန်းသို့ ပြသနိုင်ရန် ပံ့ပိုးပေး နိုင်ခဲ့ကြောင်း ပြောကြားခဲ့ပါသည်။

DOCA(ရန်ကုန်)

၂၀၂၄ ခုနှစ်တွင် ဗီယက်နမ်-စင်ကာပူကုန်သွယ်မှု စံချိန်တင်မြင့်တက်

ပြည်ပကုန်သွယ်မှုသတင်းများ

၂၀၂၄ ခုနှစ်တွင် ဗီယက်နမ်နှင့်စင်ကာပူ၏အပြန်အလှန်ကုန်သွယ်မှုသည် စင်ကာပူ ဒေါ်လာ ၃၁.၆၇ ဘီလီယံဖြင့် စံချိန်တင်မြင့်တက်ခဲ့ကြောင်း Vietnam Plus သတင်းဌာန၏ ဇန်နဝါရီလ ၂၇ ရက်နေ့က ဖော်ပြချက်အရ သိရပါသည်။ ဗီယက်နမ်၏ စင်ကာပူသို့တင်ပို့မှုသည် တစ်နှစ်ပတ်လုံး စံချိန်တင်ကြီးထွားခဲ့ပြီး ၁၀ လဆက်တိုက် ၁၅ ရာခိုင်နှုန်းစီ မြင့်တက်ခဲ့ကြောင်း သိရပါသည်။ စင်ကာပူသို့ ဗီယက်နမ်၏ အီလတ်ထရောနစ်ပစ္စည်းများ၊ စက်ပစ္စည်းများနှင့် မှန်အစရှိသည့် အဓိကပို့ကုန်များနှင့် ဆန်၊ ပင်လယ်စာနှင့် ဟင်းသီးဟင်းရွက် ဆီများ အစရှိသည့် စိုက်ပျိုးမွေးမြူရေးထုတ်ကုန်များ တင်ပို့မှုမှာ သိသာစွာအားကောင်းခဲ့ကြောင်း သိရပါသည်။ ဒီဇင်ဘာလတစ်လတည်းတွင် အပြန်အလှန်ကုန်သွယ်မှုမှာ စင်ကာပူဒေါ်လာ ၃.၀၆ ဘီလီယံဖြင့် ၂၀၂၃ ခုနှစ်ဒီဇင်ဘာလထက် ၁၉.၂၄ ရာခိုင်နှုန်းမြင့်တက်ခဲ့ကြောင်း သိရပါသည်။ တစ်နှစ်လုံးတွင် မူ ဗီယက်နမ်သည် စင်ကာပူသို့ စင်ကာပူဒေါ်လာ ၈.၅၈ ဘီလီယံတန်ဖိုး တင်ပို့ခဲ့ပြီး စင်ကာပူ ဒေါ်လာ ၂၃.၀၉ ဘီလီယံတန်ဖိုး တင်သွင်းခဲ့ကာ ၂၀၂၃ ခုနှစ်ကထက် ၃၀.၈ ရာခိုင်နှုန်းနှင့် ၃.၂၄ ရာခိုင်နှုန်းအသီးသီး မြင့်တက်ခဲ့ကြောင်း သိရပါသည်။ ထို့ကြောင့် ဗီယက်နမ်သည် စင်ကာပူ၏ ၁၁ နိုင်ငံမြောက်အကြီးမားဆုံး ကုန်သွယ်ရေးမိတ်ဖက်ဖြစ်ပြီး ၁၀ နိုင်ငံမြောက်အကြီးမားဆုံး တင်ပို့ ရာဈေးကွက်အဖြစ် ရပ်တည်နေကြောင်း သိရပါသည်။ ထိုအပေါင်းလက္ခဏာဆောင်သည့်ရလဒ် များရှိနေသော်လည်း စင်ကာပူရှိ ဗီယက်နမ်ကုန်သွယ်ရေးရုံး၏ အကြီးအကဲဖြစ်သူ Cao Xuan Thang က အဓိကစီးပွားရေးအင်အားကြီးနိုင်ငံများတွင် ပထဝီနိုင်ငံရေးတင်းမာမှုများဖြစ်ပေါ်ရန် အလားအလာများရှိနေသောကြောင့် စင်ကာပူရှိစီးပွားရေးကျွမ်းကျင်သူများသည် ၂၀၂၅ အလာအလာနှင့်ပတ်သတ်၍ သတိထားလျှက်ရှိကြောင်း မှတ်ချက်ပြုခဲ့ပါသည်။ ရုံးသည်လည်း ဗီယက်နမ် မွေးမြူရေးတိရိစ္ဆာန်အသားများနှင့် ဥများ စင်ကာပူဈေးကွက်အတွင်းသို့ ဝင်ရောက်နိုင် ရေး ကူညီရန် လုပ်ဆောင်လျှက်ရှိကြောင်း သိရပါသည်။

DOCA(ရန်ကုန်)

ဂျပန်နိုင်ငံသို့ သီဟိုဠ်စေ့တင်ပို့မှု မြှင့်တင်နိုင်ရန် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန တွေ့ဆုံဆွေးနွေး

ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) မှ အတွင်း ရေးမှူး Samheng Bora၊ ပို့ကုန်မြှင့်တင်ရေးလုပ်ငန်းအဖွဲ့ ဥက္ကဋ္ဌ Kim Sreyroth နှင့် MIRARTH Holdings ၏ CEO Kazuichi Shimada နှင့် တိုကျိုမြို့ရှိ MIRARTH Holdings ရုံးချုပ်တွင် တွေ့ဆုံဆွေးနွေးမှုများ ဆောင်ရွက်ခဲ့ကြသည်။ ဆွေးနွေးမှုများတွင် ကမ္ဘောဒီးယား သီဟိုဠ်စေ့ ထွက်ကုန်များ ဂျပန်ဈေးကွက်သို့ မြှင့်တင်နိုင်ရေးကို အဓိကထားဆွေးနွေးခဲ့ကြပြီး MIRARTH Holdings က ၎င်းတို့၏ရည်ရွယ်ချက်မှာ ဂျပန်နိုင်ငံ၊ အိုဆာကာမြို့တွင် ကျင်းပသော World Expo 2025 တွင် ကမ္ဘောဒီးယားနိုင်ငံနှင့် ပူးပေါင်းကာ စိုက်ပျိုးရေးကဏ္ဍတွင် အလားအလာ ရှိသောထုတ်ကုန်များ အထူးသဖြင့် ဆန်၊ ငရုတ်ကောင်းနှင့် သီဟိုဠ်စေ့ကဲ့သို့သော ကမ္ဘောဒီးယား ထုတ်ကုန်များကို မြင့်တင်ရန် ၂၇-၁-၂၀၂၅ ရက်နေ့တွင် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာ (MoC) မှသတင်းထုတ်ပြန်ခဲ့သည်။ Samheng Bora သည် MIRARTH Holdings အနေ ဖြင့်ကမ္ဘောဒီးယားနိုင်ငံတွင် ၎င်း၏ ရင်းနှီးမြှုပ်နှံမှုများနှင့် ပူးပေါင်းဆောင်ရွက်မှုကို ချဲ့ထွင်ရန် အထူးသဖြင့် ပြည်တွင်းသီဟိုဠ်စေ့ ထုတ်လုပ်မှုကဏ္ဍဖွံ့ဖြိုးတိုးတက်ရေး၊ ကမ္ဘောဒီးယား ထုတ်ကုန်တန်ဖိုး ကွင်းဆက်မြှင့်တင်ရေး၊ ဒေသတွင်း အလုပ်အကိုင်အခွင့်အလမ်းများ ဖန်တီး ပေးရေးနှင့် နိုင်ငံတော်၏စီးပွားရေးဖွံဖြိုး တိုးတက်ရေးတို့ကို ပံ့ပိုးကူညီရန် တိုက်တွန်းခဲ့သည်။ ကုမ္ပဏီသည် ကမ္ဘောဒီးယားသီဟိုဠ်စေ့ကို တစ်ကမ္ဘာလုံးတွင်မြှင့်တင်ရန် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ပို့ကုန်မြှင့်တင်ရေးလုပ်ငန်းအဖွဲ့နှင့် နီးကပ်စွာ လက်တွဲဆောင်ရွက်သွားရန် အဆင်သင့်ရှိကြောင်း ထုတ်ဖော်ပြောကြားခဲ့သည်။ နှစ်ဖက်လုံးမှ ကမ္ဘောဒီးယားအတွက် စီးပွားရေးနှင့်ကုန်သွယ်မှု ရလာဒ်များ ပိုမိုကောင်းမွန်စေရန် နှစ်ဖက်လုံးမှ ကမ္ဘောဒီးယားလယ်ယာထွက်ကုန်များ အထူးသဖြင့် သီဟိုဠ်စေ့တင်ပို့မှု ပိုမိုအားကောင်း လာစေရန် ၎င်းတို့၏ ထင်မြင်ချက်များများကို ထုတ်ဖော်ပြောကြားခဲ့ကြသည်။

DOCA(ရန်ကုန်)

ဗီယက်နမ်၏ ဆန်တင်ပို့မှုကဏ္ဍသည် ၂၀၂၅ ခုနှစ်တွင် ပို့ကုန်စိန်ခေါ်မှုများနှင့် ရင်ဆိုင်ရဖွယ်ရှိ

ပြည်ပကုန်သွယ်မှုသတင်းများ

ဗီယက်နမ်နိုင်ငံ၏ဆန်တင်ပို့မှုကဏ္ဍသည် ၂၀၂၄ ခုနှစ်တွင် အောင်မြင်မှုများရရှိခဲ့ပြီး‌‌နောက် ၂၀၂၅ ခုနှစ်တွင် စိန်ခေါ်မှုများစွာနှင့်ရင်ဆိုင်ရဖွယ်ရှိကြောင်း ဇန်နဝါရီ ၃၁ ရက်နေ့က ကျွမ်းကျင်သူ များ၏ဖော်ပြချက်အရသိရသည်။ အထူးသဖြင့်ဝယ်လိုအားအားနည်းလာပြီး တင်ပို့ လျှက်ရှိ‌သောနိုင်ငံများအကြား ပြိုင်ဆိုင်မှုပြင်းထန်လာသောကြောင့် ဗီယက်နမ်နိုင်ငံ၏ဆန်တင်ပို့ မှုသည် ၂၀၂၄ ခုနှစ်နှင့် နှိုင်းယှဉ်ပါက ပမာဏနှင့်ဈေးနှုန်းနှစ်မျိုးစလုံး ကျဆင်းနိုင်ဖွယ် ရှိကြောင်း ခန့်မှန်းထားကြခြင်းဖြစ်သည်။ ရိတ်သိမ်းရာသီမတိုင်မီဗီယက်နမ်နိုင်ငံ၏ ဆန်ဈေးနှုန်းမှာမြင့်မား လျှက်ရှိသောကြောင့် တင်သွင်းသူအများအပြားသည် ၎င်းတို့၏ ဆန်ထောက်ပံ့မှုရရှိ‌ ရေးအတွက် အခြားနိုင်ငံများသို့ဦးတည်လာကြသည်။ ထို့ကြောင့် ၂၀၂၅ ခုနှစ် ဗီယက်နမ်နိုင်ငံ၏ဆန်ဈေးနှုန်း သည် ၂၀၂၃ ခုနှစ် နှင့် ၂၀၂၄ ခုနှစ်တို့ထက်နိမ့်ကျနိုင်ဖွယ်ရှိပြီး ၂၀၂၂ ခုနှစ် အဆင့်အောက်သို့ပင် ကျဆင်းသွားခြင်း သို့မဟုတ် ၎င်းထက်အနည်းငယ်မျှသာတိုးလာခြင်းတို့ကြုံတွေ့ ရနိုင်သည်ဟု ခန့်မှန်းထားကြသည်။ ဗီယက်နမ် စိုက်ပျိုးရေးနှင့် ကျေးလက်ဒေသ ဖွံ့ဖြိုးတိုးတက်ရေးဝန်ကြီး ဌာန၏အဆိုအရ နိုင်ငံ၏ဆန်တင်ပို့မှုသည် ၂၀၂၄ ခုနှစ်တွင် ပမာဏအားဖြင့်တန်ချိန် ၉ သန်း နှင့် တန်ဖိုးအားဖြင့် အမေရိကန် ဒေါ်လာ ၅.၇ ဘီလီယံ ထိစံချိန်တင်ရရှိခဲ့ကြောင်းသိရသည်။

DOCA(ရန်ကုန်)

အာရှအလယ်ပိုင်းမှ ဝယ်လိုအားကြောင့် တရုတ်နိုင်ငံ၏ တစ်ပတ်ရစ်ကားများတင်ပို့မှု မြင့်တက်လာ

ပြည်ပကုန်သွယ်မှုသတင်းများ

တရုတ်နိုင်ငံ၏ တစ်ပတ်ရစ်ကားများတင်ပို့မှုသည် အရှိန်အဟုန်ဖြင့် တိုးတက်လျက်ရှိပြီး အာရှအလယ်ပိုင်းသည် တင်ပို့မှုအတွက်အဓိကစျေးကွက်တစ်ခုဖြစ်လာခဲ့သည်။ တရုတ်နိုင်ငံ အနောက်မြောက်ပိုင်းကာဇက်စတန်နှင့် ဆက်သွယ်ထားသော ကမ္ဘာ့အကြီးဆုံး ဆိပ်ကမ်း ဖြစ်သည့် Khogoros Gateway သည် တင်ပို့မှုအတွက် အဓိကအချက်အချာ ဖြစ်လာကြောင်း ရှန်ဟိုင်း အခြေစိုက် တရုတ်အစိုးရမီဒီယာ Yicai Global ၏ဖော်ပြချက်အရသိရသည်။ အစပိုင်းတွင် ကုန်ပစ္စည်းများနှင့် အင်ဂျင်နီယာပိုင်းဆိုင်ရာ အစိတ်အပိုင်းများကိုသာ အာရုံစိုက် တင်ပိုခဲ့ပြီး အထူးသဖြင့် ၂၀၂၂ ခုနှစ်တွင် တရုတ်မော်တော်ယာဥ်ထုတ်လုပ်သူများသည် ဥဇဘက်ကစ္စတန် ကဲ့သို့ ဗဟိုအာရှစျေးကွက်များအား စတင်ပစ်မှတ်ထားလာသည့်အချိန်မှစ၍ ဆိပ်ကမ်းမှ တစ်ပတ်ရစ်မော်တော်ယာဉ်များတင်ပို့မှု မြင့်တက်လာခဲ့ခြင်းဖြစ်သည်။ ၂၀၂၄ ခုနှစ်တွင် ထို ဆိပ်ကမ်းမှ ကားအစီးရေ ၄၀၀,၃၀၀ တင်ပို့နိုင်ခဲ့ပြီး ကားတင်ပို့မှုစုစုပေါင်း၏ ၆၀ ရာခိုင်နှုန်းမှာ လုပ်ငန်းသုံးယာဉ်များဖြစ်သည်။ ရထားလမ်းများအပါအဝင် ဆိပ်ကမ်းမှ လုပ်ငန်းသုံးယာဉ် စုစုပေါင်း တင်ပို့မှုမှာ အစီးရေ ၄၀၀,၀၀၀ ကျော်ရှိပြီး ၂၀၂၃ ခုနှစ်နှင့် နှိုင်းယှဉ်ပါက ကားအစီးရေ ၁၀၀,၀၀၀ ကျော် တိုးလာကြောင်းသိရသည်။ ၂၀၂၃ ခုနှစ် မတ်လတွင် နိုင်ငံတစ်ဝန်း တစ်ပတ်ရစ် ကား တင်ပို့ရောင်းချမှု စတင်လုပ်ဆောင်ချိန်မှစ၍ အာဏာပိုင်များသည် မော်တော်ယာဉ် လွှဲပြောင်းမှတ်ပုံတင်ခြင်းနှင့် လိုင်စင်လျှောက်ထား ခြင်းကဲ့သို့သော လုပ်ငန်းစဉ်များကိုအဆင်‌ပြေ ချောမွေ့စေရန် ဆောင်ရွက်‌ပေးခဲ့ပြီး စီးပွားရေး လုပ်ငန်းများကို ပံ့ပိုးကူညီရန်နှင့် ၎င်းတို့၏ တစ်ကမ္ဘာလုံးဆိုင်ရာ ယှဉ်ပြိုင်နိုင်စွမ်းကို မြှင့်တင်ရန် အစီအမံများကိုလည်း မိတ်ဆက်ပေးခဲ့ သည်။ ဤကဲ့သို့ တင်ပို့မှုတိုးတက်နေသော်လည်း တရုတ်နိုင်ငံ၏ ကားဟောင်းတင်ပို့ရောင်းချမှု သည် ဂျပန်နိုင်ငံ(အစီးရေ ၁၀၀၀၀၀၀)၊ အမေရိကန်နိုင်ငံ(အစီးရေ ၉၀၀၀၀၀)နှင့် တောင်ကိုရီးယားနိုင်ငံ(အစီးရေ ၅၀၀,၀၀၀) တို့၏ နောက်တွင်ရှိနေသေးသည်။ Guangzhou အခြေစိုက် Global-Ucar Technology သည် တရုတ်နိုင်ငံ၏ အကြီးဆုံးတစ်ပတ်ရစ်ကားတင်ပို့သူ ဖြစ်ပြီး ၂၀၂၄ ခုနှစ်ကတင်ပို့မှုမှာ ၆၇ ရာခိုင်နှုန်းတိုးလာကြောင်း အစီရင်ခံခဲ့သည်။ တရုတ်ကား ကုမ္ပဏီများသည် တစ်ကမ္ဘာလုံး အတိုင်းအတာဖြင့် ဈေးကွက်ချဲ့ထွင်နေကြပြီးနိုင်ငံ၏တစ်ပတ်ရစ် ကားတင်ပို့မှုကဏ္ဍသည် ပြည်တွင်းစီးပွားရေးနှင့်နိုင်ငံတကာကုန်သွယ်မှု နှစ်ခုစလုံးကိုပံ့ပိုးပေးကာ စဉ်ဆက်မပြတ် တိုးတက်လာစေရန် ဆောင်ရွက်လျှက်ရှိကြောင်းသိရသည်။

DOCA(ရန်ကုန်)

ဇမ်ဘီယာနိုင်ငံ၏ ကြေးနီထုတ်လုပ်မှုမှာစံချိန်တင်မြင့်မားလျှက်ရှိ

ပြည်ပကုန်သွယ်မှုသတင်းများ

ဇမ်ဘီယာနိုင်ငံ၏ ကြေးနီထုတ်လုပ်မှုသည် ၂၀၂၃ ခုနှစ်နှင့်နှိုင်းယဉ်ပါက ၂၀၂၄ ခုနှစ်တွင် တိုးလာကြောင်း အကြီးတန်းအစိုးရအရာရှိတစ်ဦးက ဇန်နဝါရီ ၂၃ ရက်နေ့ကပြောကြား ခဲ့သည်။

မိုင်းတွင်းနှင့်ဓာတ်သတ္တုတွင်းဖွံ့ဖြိုးတိုးတက်ရေးဝန်ကြီး Paul Kabuswe မှ ဇမ်ဘီယာနိုင်ငံ သည် ၂၀၂၃ ခုနှစ်က ကြေးနီမတ်ထရစ်တန်ချိန် ၇၃၂၅၈၃ ထုတ်လုပ်ခဲ့ပြီးပြီးခဲ့သော ၂၀၂၄ ခုနှစ်တွင် မတ်ထရစ်တန်ချိန်၈၂၀၆၇၆ ထုတ်လုပ်နိုင်ခဲ့ကြောင်း နှိုင်းယှဥ်‌ပြောကြားချက်အရသိရသည်။

ထုတ်လုပ်မှုတိုးတက်နှုန်းမှာ ၁၂ ရာခိုင်နှုန်းတိုးလာခဲ့ပြီး နိုင်ငံ၏ အကြီးမားဆုံးမိုင်းတွင်းနှစ်ခု ဖြစ်သည့် Konkola Copper Mines နှင့် Mopani Copper Mines တို့တွင် အကြီးစားသတ္တု တူးဖော် ခြင်းနှင့်လုပ်ငန်းပြန်လည်စတင်ခြင်းများကြောင့် အဓိကအားဖြင့် ရင်းနှီးမြှပ်နှံမှုများတိုးလာခြင်း ကြောင့်ဖြစ်ကြောင်းအဆိုပါတာဝန်ရှိသူကဆိုသည်။ ဓာတ်သတ္တုထုတ်လုပ်မှုတိုးမြင့်လာပြီးအထူးသ ဖြင့် ၂၀၃၁ ခုနှစ်တွင် နှစ်စဥ်ကြေးနီတန်ချိန် ၃ သန်းခန့်ရရှိရန်လုပ်ဆောင်ခြင်းအား အဓိကအာရုံစိုက် လျှက်ရှိကြောင်း Kabuswe က သတင်းစာရှင်းလင်းပွဲတစ်ခုတွင် သတင်းထောက်များအားပြောကြား ခဲ့သည်။

DOCA(ရန်ကုန်)

Languages

Main menu

ပြည်ပကုန်သွယ်မှုသတင်းများ

ဂျပန်နိုင်ငံသို့ ဆန်တင်ပို့မှုမြှင့်တင်နိုင်ရန် ကမ္ဘောဒီးယား ကြိုးပမ်း

ထိုင်းနိုင်ငံ၏ ဆန်တင်ပို့မှု ၂၀ ရာခိုင်နှုန်းကျော် ကျဆင်းလျက်ရှိ

ရုရှားထံမှ ရေနံတင်သွင်းရန် အင်ဒိုနီးရှား စဉ်းစားနေ

တရုတ်နိုင်ငံ၏ ကားထုတ်လုပ်သူ Geely သည် EV မော်ဒယ် Geely EX5 အား အင်ဒိုနီးရှားတွင် စတင်မိတ်ဆက်

ဥရောပသမဂ္ဂအဖွဲ့ဝင်အားလုံးနှင့် လွတ်လပ်သောကုန်သွယ်ရေးသဘောတူညီချက်များ ရယူရန် ထိုင်းစီစဉ်

၂၀၂၄ ခုနှစ်တွင် ဗီယက်နမ်-စင်ကာပူကုန်သွယ်မှု စံချိန်တင်မြင့်တက်

ဗီယက်နမ်၏ ဆန်တင်ပို့မှုကဏ္ဍသည် ၂၀၂၅ ခုနှစ်တွင် ပို့ကုန်စိန်ခေါ်မှုများနှင့် ရင်ဆိုင်ရဖွယ်ရှိ

အာရှအလယ်ပိုင်းမှ ဝယ်လိုအားကြောင့် တရုတ်နိုင်ငံ၏ တစ်ပတ်ရစ်ကားများတင်ပို့မှု မြင့်တက်လာ

ဇမ်ဘီယာနိုင်ငံ၏ ကြေးနီထုတ်လုပ်မှုမှာစံချိန်တင်မြင့်မားလျှက်ရှိ

Pages

You are here

ပြည်ပကုန်သွယ်မှုသတင်းများ

Pages