ပြည်ပကုန်သွယ်မှုသတင်းများ

             United Arab Emirates (UAE)နှင့် ဗြိတိန်တို့မှ ခေါင်းဆောင်များသည် ဆက်ဆံရေးခိုင်မာစေရန်နှင့် ပူးပေါင်းဆောင်ရွက်ရေးနယ်ပယ်များကို ရှာဖွေရန် ၉.၁၂.၂၀၂၄ ရက်နေ့ (တနင်္လာနေ့) တွင် တွေ့ဆုံခဲ့ကြကြောင်း UAE ၏ တရားဝင်သတင်းအေဂျင်စီ WAM မှ ထုတ်ပြန်ချက်အရသိရသည်။UAE သမ္မတ Sheikh Mohamad bin Zayed AI Nahyan နှင့် လာရောက်လည်ပတ်သော ဗြိတိသျှဝန်ကြီးချုပ် Keir Starmer တို့မှ နှစ်နိုင်ငံကြား သမိုင်းဝင်ဆက်ဆံရေးကို တည်ဆောက်ရာတွင် ပူးပေါင်းဆောင်ရွက်မှုပိုမိုခိုင်မာလာစေရန် ကတိကဝတ်များကို ထပ်မံအတည်ပြုခဲ့ကြောင်း WAM မှပြောကြားခဲ့သည်။WAM ၏အဆိုအရ ဆွေးနွေးပွဲတွင်‌‌ဒေသတွင်းနှင့်နိုင်ငံတကာအကျိုးစီးပွားများ အထူးသဖြင့်အရှေ့အလယ်ပိုင်း‌ဒေသဆိုင်ရာ ဖွံ့ဖြိုးတိုးတက်မှုများကို ဆွေးနွေးခဲ့ကြောင်းသိရသည်။ နှစ်နိုင်ငံခေါင်းဆောင်များသည် ဒေသတွင်းနှင့် ကမ္ဘာလုံးဆိုင်ရာ ငြိမ်းချမ်းရေး၊လုံခြုံရေးနှင့်တည်ငြိမ်ရေးရရှိရန် ကြိုးပမ်းအားထုတ်မှုများကို ပံ့ပိုးကူညီရန် ၎င်းတို့နိုင်ငံများ၏ ကတိကဝတ်များအား အလေးပေးပြောကြားခဲ့ကြသည်။ UAE သမ္မတသည် တနင်္လာနေ့တွင်ဥရောပကော်မရှင်၏ ဥက္ကဌ  Ursula von der Leyen နှင့် ဖုန်းမှတဆင့်ဆက်သွယ်ပြောကြားခဲ့ကြပြီး အရှေ့အလယ်ပိုင်း အထူးသဖြင့် ဆီးရီးယားတွင် နောက်ဆုံးဖြစ်ပေါ်တိုးတက်မှုများကို အာရုံစိုက်ရန်ပြောကြား ခဲ့ကြကြောင်း UAE သမ္မတရုံး၏ထုတ်ပြန်ချက်အရသိရသည်။ Sheikh Mohamed မှ ဆီးရီးယား၏ စည်းလုံးညီညွတ်မှု၊ အချုပ်အခြာအာဏာနှင့်နယ်မြေစိုးမိုးမှုအတွက် UAE ၏ ကတိကဝတ်ကိုထပ်မံအတည်ပြုခဲ့ပြီး နိုင်ငံအတွင်းလုံခြုံရေးနှင့် တည်ငြိမ်ရေးတို့ကိုအာမခံရန် အရေးကြီးကြောင်းအလေးပေးပြောကြားခဲ့ကြောင်းသိရှိရပါသည်။

Source : Xinhua

 DOCA(ရန်ကုန်)

            တရုတ်နိုင်ငံသည် အီသီယိုးပီးယားနိုင်ငံ၏ ထိပ်တန်းကော်ဖီတင်ပို့သောနိုင်ငံများတွင် တစ်နိုင်ငံအပါအဝင်ဖြစ်လာသောကြောင့် တရုတ်နိုင်ငံ၏ လျှင်မြန်စွာတိုးတက်နေသော ကော်ဖီစျေးကွက်အတွင်းသို့ ထိုးဖောက်ဝင်ရောက်နိုင်ရန်အတွက် အီသီယိုးပီးယားနိုင်ငံမှ စိတ်ဝင်စားလျက်ရှိကြောင်း အီသီယိုးပီးယားအစိုးရမှ ပြောကြားခဲ့သည်။ Ethiopian Coffee and Tea Authority (ECTA) မှ တာဝန်ရှိသူများက အရှေ့အာဖရိကနိုင်ငံမှ ကော်ဖီကိုစိတ်ဝင်စားကြသော တရုတ်စီးပွားရေး ကိုယ်စားလှယ်များနှင့်ဆွေးနွေးစဥ်အတွင်း ယင်းကဲ့သို့ပြောကြားခဲ့ခြင်းဖြစ်ကြောင်း ECTA မှ ၉.၁၂.၂၀၂၄ ရက်နေ့တွင်ထုတ်ပြန်သော ကြေညာချက်တွင်ဖော်ပြခဲသည်။ ဆွေးနွေးမှုအတွင်း ECTA မှ တာဝန်ရှိသူများနှင့် အီသီယိုးပီးယားကော်ဖီတင်ပို့သူများက တရုတ်နိုင်ငံသည် အီသီယိုးပီးယားမှ‌ ကော်ဖီတင်ပို့‌ရောင်းချသူများအတွက် စျေးကွက်ကြီးထွားလာမှုနှင့် အရေးပါမှုကိုအလေးပေးပြောကြားခဲ့ပြီး တရုတ်နိုင်ငံသည် အီသီယိုးပီးယား၏ ထိပ်တန်းကော်ဖီတင်ပို့သော နိုင်ငံ ၁၀ နိုင်ငံတွင် အပါအဝင်ဖြစ်လာခဲ့ကြောင်း ပြောကြားခဲ့သည်။ မကြာသေးမီ နှစ်များအတွင်း အီသီယိုးပီးယားကော်ဖီများအား တရုတ်နိုင်ငံအတွင်းသို့ တင်ပို့မှုမြှင့်တင်လိုက်ပြီးနောက် တရုတ်လူမျိုးများအကြား အီသီယိုးပီးယားကော်ဖီ၏ လူကြိုက်များလာမှုသည် အီသီယိုးပီးယားကော်ဖီတင်ပို့မှု တိုးမြင့်လာစေရန်အတွက်တွန်းအားတစ်ခုဖြစ်လာစေခဲ့ကြောင်း တာဝန်ရှိသူများနှင့် ကော်ဖီတင်ပို့သူများ၏ ပြောကြားချက်အရသိရသည်။ အာဏာပိုင်များထံမှ မကြာသေးမီက အချက်အလက်များအရ လွန်ခဲ့သောသုံးနှစ်က အီသီယိုးပီးယားမှ တရုတ်နိုင်ငံသို့ ကော်ဖီတင်ပို့မှုပမာဏသည် နှစ်စဥ် ၂၇ ရာခိုင်နှုန်းပျမ်းမျှတိုးတက်ခဲ့ကြောင်းသိရသည်။ အီသီယိုးပီးယားနိုင်ငံသည် ၎င်း၏ ကော်ဖီထုတ်လုပ်မှုအတွက်လူသိများပြီး ၂၀၂၄ ဇူလိုင် ၇ ရက်နေ့ကကုန်ဆုံးခဲ့သော အီသီယိုးပီးယားနိုင်ငံ၏ ဘဏ္ဏာနှစ်အတွင်းကော်ဖီတင်ပို့မှုမှ အ‌မေရိကန် ဒေါ်လာ ၁.၄၃ ဘီလီယံ ရရှိခဲ့ပြီးအရှေ့အာဖရိကနိုင်ငံသည် လက်ရှိ ၂၀၂၄/၂၀၂၅ ဘဏ္ဏာနှစ်အတွင်း အမေရိကန်ဒေါ်လာ ၂ ဘီလီယံတိုးမြင့်ရရှိနိုင်ရန် လည်းမျှော်မှန်းထားလျက်ရှိသည်။ အာရေဗျကာကော်ဖီ၏ မူလအစဟုသတ်မှတ်ထားသော အီသီယိုးပီးယားသည် အာဖရိကတိုက်တွင် ကုန်ပစ္စည်းအများဆုံး ထုတ်လုပ်တင်ပို့သောနိုင်ငံဖြစ်ပြီး ကော်ဖီထုတ်လုပ်မှုသည် နိုင်ငံ၏ စီးပွားရေးကျောရိုးအဖြစ်လည်း အသိအမှတ်ပြုထားကြသည်။ ၎င်းတို့၏ကော်ဖီသည် ဝိုင်မှ သစ်သီးနှင့် ချောကလက်အရသာအထိ များပြားလှသောအရည်အသွေးနှင့် အရသာတို့ကြောင့် လူသိများပြီး နိုင်ငံတကာမှဝယ်လိုအားမှာလည်း မြင့်မားကြောင်းသိရှိရပါသည်။

Source : Xinhua

DOCA(ရန်ကုန်)

             ကမ္ဘောဒီးယားတော်ဝင်အစိုးရ (RGC) သည် ဒေသတွင်းနှင့် ဥရောပနိုင်ငံ (၆) နိုင်ငံနှင့် အခွန်နှစ်ဆကောက်ခံခြင်းဆိုင်ရာသဘောတူညီချက်များ (DTAs)  ညှိနှိုင်းမှုများဆောင်ရွက်ခြင်းဖြင့် နိုင်ငံတော်၏ရင်းနှီးမြှုပ်နှံမှုကဏ္ဍအား မြှင့်တင်ရန်ဆောင်ရွက်နေကြသည်။ ကမ္ဘောဒီးယားနိုင်ငံသည် စင်္ကာပူ၊ တရုတ်၊ ထိုင်း၊ ဘရူနိုင်း၊ ဗီယက်နမ်၊ အင်ဒိုနီးရှာ၊ တရုတ်၊ ဟောင်ကောင်၊ မလေးရှား၊ တောင်ကိုရီးယားနိုင်ငံတို့နှင့် (DTA) သဘောတူညီချက်များ အကောင်အထည်ဖော်ဆောင်ရွက်နေကြောင်း စီးပွားရေးနှင့်ဘဏ္ဍာရေးဝန်ကြီး Aun Pornmoniroth ကပြောကြာခဲ့သည်။ ကမ္ဘောဒီးယားတော်ဝင်အစိုးရသည် ‌ဒေသတွင်းနိုင်ငံများစွာနှင့် အခွန်နှစ်ဆကောက်ခံခြင်း ဆိုင်ရာသဘောတူညီချက်များကို ဆွေးနွေးမှုများပြုလုပ်ပြီး နိုင်ငံတကာစီးပွားရေးနှင့် ရင်းနှီးမြှုပ်နှံမှုများအတွက် အထောက်အကူဖြစ်စေရန်ကြိုးပမ်းနေကြောင်း၊ (DTA) သည် နိုင်ငံခြားတိုက်ရိုက်ရင်းနှီးမြှုပ်နှံမှု (FDI) များကို ဆွဲဆောင်ရန်နှင့်နိုင်ငံတကာယှဉ်ပြိုင်နိုင်စွမ်းကို တိုးမြင့်လာစေရန်အတွက် အရေးပါသောအခန်းကဏ္ဍမှပါဝင်ကြောင်း ထမ်မံပြောကြားခဲ့သည်။ ကမ္ဘောဒီးယားနိုင်ငံတွင် အခွန်ကောက်ခံရန်တာဝန်ရှိသည့် အဖွဲ့အစည်းနှစ်ခုရှိသည်။ တစ်ခုမှာ ဝင်ငွေခွန်၊ လစာခွန်၊ တန်းဖိုးထပ်ခွန်နှင့် ပစ္စည်းအခွန်စသည့် ပြည်တွင်းအခွန်များကို အဓိကထားကောက်ခံသည့် (GDT) ဖြစ်ပြီး ကျန်တစ်ခုမှာ ကုန်စည်ဝင်ရောက်ခြင်းနှင့်ကောက်ခံခြင်းကို ဆောင်ရွက်သည့် အကောက်ခွန်နှင့်ကုန်စည်စီးဆင်းမှုဦးစီးဌာန (GDCE) ဖြစ်သည်။ အစိုးရသည် ၂၀၂၄ ခုနှစ်ပထမနှစ်ဝက်အတွင်း အခွန်ကောက်ခံမှုမှဝင်ငွေ အမေရိကန်ဒေါ်လာ ၂.၉ ဘီလီယံ ရရှိခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

             ကမ္ဘောဒီးယားနိုင်ငံ ကုန်သည်ကြီးများအသင်း (CCC) သည် နိုင်ငံအတွင်းရှိ ဒစ်ဂျစ်တယ်စီးပွားရေးနှင့် ရင်နှီးမြှုပ်နှံမှုအားပြုပြင်ပြောင်းလဲမှုများ၏ အခြေအနေသစ်တွင် တော်ဝင်အစိုးရ ၏မူဝါဒနှင့်အညီ ရင်းနှီးမြှုပ်နှံမှုများ မြှင့်တင်ရန်ကတိပြုခဲ့ကြသည်။ ၂၀၂၄ ခုနှစ်အတွင်း အလုပ်များကိုပြန်လည်သုံးသပ်ရန်နှင့် ၂၀၂၅ ခုနှစ်အတွက် ရည်းမှန်းချက်များချမှတ်ရန် နှစ်ပတ်လည် အစည်းအဝေးတွင် ကတိပြုခဲ့ခြင်းဖြစ်သည်။ စီးပွားရေးအခင်းအကျင်း၏ လျင်မြန်စွာပြောင်းလဲတိုးတက်မှုနှင့် ကမ္ဘောဒီးယား၏ လက်ရှိရင်းနှီးမြှုပ်နှံမှုပတ်ဝန်းကျင် ပြုပြင် ပြောင်းလဲရေးများကြောင့် (CCC) သည် နိုင်ငံခြားတိုက်ရိုက်ရင်းနှီးမြှုပ်နှံမှု (FDI) အား ဆွဲဆောင်ရန်နှင့် ပြည်တွင်းရင်းနှီးမြှုပ်နှံမှုများကို လှုံ့ဆော်ရန်တက်ကြွစွာလုပ်ဆောင်နေကြောင်း ဥက္ကဋ္ဌ Kith Meng မှ ပြောကြားခဲ့သသည်။ အဆိုပါအစည်းအဝေးတွင် ပြည်နယ်ကုန်သည်ကြီးများအသင်း၏ လုပ်ငန်း ဆောင်ရွက်မှုများ၊ စိန်ခေါ်မှုများ၊ ဖြေရှင်းချက်များ နှင့်အကြံပြုချက်များ အထူးသဖြင့် ပြည်နယ်အသီးသီးရှိ ကုန်သည်ကြီးအသင်းများအတွက် ၂၀၂၅ခုနှစ်လုပ်ငန်းလမ်းညွှန်ချက်များကို အလေးထားဆွေးနွေးခဲ့သည်။ CCC သည် ရင်းနှီးမြှုပ်နှံသူများ အတွက်ရင်းနှီးမှုအခွင့်အလမ်း၊ ကုန်သွယ်မှု၊ ခရီးသွားလုပ်ငန်းနှင့် ယဉ်ကျေးမှုတို့ကို မြှင့်တင်ရန် အတွက် ဂျပန်၊ ကနေဒါ၊ အမေရိကန် စသည့်အလားအလာရှိသောကုန်သွယ်မှုနိုင်ငံများတွင် ၎င်း၏နိုင်ငံခြားဆက်ဆံရေးရုံးများကို ထူထောင်ထားသည်။ ကမ္ဘောဒီးယားဖွံ့ဖြိုးတိုးတက်ရေး ကောင်စီ (CDC) ၏အဆိုအရ နိုင်ငံတော် သည် ၂၀၂၄ ခုနှစ်၊ ပထမ ၁၀ လအတွင်းအမေရိကန် ဒေါ်လာ၅.၅ ဘီလီယံတန်ဖိုးရှိသော စီမံကိန်းများ ၃၄၆ ခုကို အတည်ပြုခဲ့ပြီး အလုပ်အကိုင် ၂၆၆,၀၀၀ ကျော်ကိုဖန်တီးပေးခဲ့သည်။ စီမံကိန်းအသစ်များသည် အထည်ချုပ်၊ ခရီးသွား ကုန်ပစ္စည်းနှင့် ဖိနပ်ကဏ္ဍ၊ ဟိုတယ် ဖွံ့ဖြိုး တိုးတက်ရေး၊ ရေအားလျှပ်စစ်ဓာတ်အားပေးစက်ရုံ၊ ဆိပ်ကမ်း၊ ဆိုလာဓာတ်အားပေးစက်ရုံများ၊ စိုက်ပျိုးရေး၊ ကားတယာစက်ရုံများ၊ အထူးစီးပွားရေး ဇုန်များနှင့် အခြေခံအဆောက်အအုံများ အပေါ်တွင် အဓိကထားလုပ်ဆောင်နေကြောင်းသိရှိရပါသည်။

Source: Khmer Times

DOCA(ရန်ကုန်)

               ကမ္ဘောဒီးယား၏ စီးပွားရေးနှင့် ဘဏ္ဍာရေးဝန်ကြီး Aun Pornmoniroth က ၂၀၂၄ ခုနှစ်တွင် ကမ္ဘောဒီးယားနိုင်ငံ၏ စီးပွားရေးသည် ၆ ရာခိုင်နှုန်းအထိတိုးတက်လာခဲ့ပြီး အဓိက အားဖြင့် ပို့ကုန်ဦးစားပေးကဏ္ဍများတွင် အစိုးရအနေဖြင့် ဆက်လက်ပံ့ပိုးပေးမည်ဖြစ်ကြောင်း ပြောကြားခဲ့သည်။ ရေရှည်တည်တံ့ခိုင်မြဲသော ငြိမ်းချမ်းရေး၊ လူမှုရေး၊ လုံခြုံရေးနှင့် နိုင်ငံရေးတည်ငြိမ်မှုတို့နှင့် အတူ ကမ္ဘောဒီးယားသည် မြင့်မားသောဖွံ့ဖြိုးတိုးတက်မှုတို့ကို အစဉ်အမြဲထိန်းသိမ်းထားပြီး စီးပွားရေးဖွံဖြိုးတိုးတက်မှုနှင့် ဆင်ရဲမွဲတေမှုလျော့ချရေးတို့ကိုဆောင်ရွက်ရန် ပြောကြားခဲ့သည်။ ၂၀၂၄ ခုနှစ်နှင့် ၂၀၂၅ ခုနှစ်တို့တွင် စီးပွားရေးတိုးတက်မှုအနေဖြင့် ၆ ရာခိုင်နှုန်းနှင့် ၆.၃ ရာခိုင်နှုန်း အသီးသီးတိုးတက်ရန်မျှော်မှန်းထားပြီး အဓိကအားဖြင့် ပို့ကုန် ကဏ္ဍကိုဦးတည်သော အထည်ချုပ်ကဏ္ဍများတွင် အစိုးရအနေဖြင့်ဆက်လက်ပံ့ပိုးနေကြောင်း ပြောကြားခဲ့သည်။ အနေရာထိုင်ခင်းနှင့် အခြားသောကဏ္ဍများသည် အရှိန်အဟုန်ဖြင့် တိုးတက်လျက်ရှိပြီး အထည်ချုပ်မဟုတ်သောစက်မှုလုပ်ငန်းများ အထူးသဖြင့် မော်တော်ယာဉ် တပ်ဆင်ရေး၊ အစားအသောက်နှင့် အဖျော်ယမကာထုတ်လုပ်ရေးတွင် တိုးတက်လာစေရန် ဆက်လက်ပံ့ပိုးပေးသွားမည်ဖြစ်ကြောင်းထပ်မံပြောကြားခဲ့သည်။ ၂၀၂၄ ခုနှစ်နှင့် ၂၀၂၅ ခုနှစ် တွင်ငွေကြေးဖောင်းပွမှုနှုန်းမှာ ၂.၇ ရာခိုင်နှုန်းနှင့် ၂.၅ ရာခိုင်နှုန်းအသီးသီးရှိမည်ဟု Aun Pornmoniroth က ခန့်မှန်းထားသည်။

Source: Khmer Times

DOCA(ရန်ကုန်)