ပြည်ပကုန်သွယ်မှုသတင်းများ

          ဗီယက်နမ်နိုင်ငံသည် အစိုးရကသတ်မှတ်ထားသည့်  ၂၀၂၅ ခုနှစ် စီးပွားရေးကြီးထွားမှု ရည်မှန်းချက် ၈ ရာခိုင်နှုန်းပြည့်မီရန် များစွာသော စီမံချက်များ ဆောင်ရွက်သွားမည်ဟု စီမံကိန်း နှင့် ရင်းနှီးမြှုပ်နှံမှုဝန်ကြီးဌာန ဒုတိယဝန်ကြီးဖြစ်သူ Nguyen Duc Tam က ဇန်နဝါရီလ ၈ ရက် နေ့က အစိုးရသတင်းစာရှင်းလင်းပွဲတွင် အကျဉ်းချုပ်ပြောကြားခဲ့ပါသည်။ Tam က ၂၀၂၄ ခုနှစ် ဒီဇင်ဘာလကုန်ပိုင်းတွင် ဝန်ကြီးချုပ်က ဝန်ကြီးဌာနများနှင့် ကဏ္ဍများအား ၂၀၂၅ ခုနှစ်တွင် အနည်းဆုံးစီးပွားရေးကြီးထွားနှုန်း ၈ ရာခိုင်နှုန်းရရှိရန်အတွက် အကောင်အထည်ဖော်ကြရန် တရားဝင်ထုတ်ပြန်ခဲ့သည်ဟု ပြောကြားခဲ့ပါသည်။ ထိုထဲတွင် Hanoi၊ Ho Chi Minh၊ Binh Duong နှင့် Dong Nai ကဲ့သို့သောအဓိကစီးပွားရေးမြို့ကြီးများအတွက် မျှော်လင့်ချက်မြင့်မားစွာ ထားရှိမှုပါဝင်ကြောင်း သိရပါသည်။ အကယ်၍ ထိုဒေသများသည် ၂၀၂၄ စီးပွားရေးရလဒ်များ ထက် ကြီးထွားခဲ့ပါက နိုင်ငံစီးပွားရေးအတွက် သိသာထင်ရှားစွာ ပူးပေါင်းပါဝင်ပေးနိုင်မည်ဟု သိရပါသည်။ Tam က ၎င်း၏ဝန်ကြီးဌာနသည် ၂၀၂၅ ခုနှစ်တွင် အဖွဲ့အစည်းမူဘောင်တိုးတက် ရေးနှင့် ဆန်းသစ်တီထွင်မှုများ ဆက်လက်ပြုလုပ်သွားရန် အာမခံခဲ့ကြောင်း ပြောကြားခဲ့ပါ သည်။ လာမည့် ၉ ကြိမ်မြောက် အမျိုးသားညီလာခံတွင် အစိုးရသည် စီမံခန့်ခွဲမှုဥပဒေနှင့် စီးပွားရေးလုပ်ငန်းများနှင့် ကုန်ထုတ်လုပ်ခြင်းတို့တွင် နိုင်ငံတော်မတည်ငွေသုံးစွဲမှုပါဝင်‌သော များစွာသောဥပဒေများကို ပြင်ဆင်ရန်စီစဉ်ထားကြောင်း သိရပါသည်။ သို့သော် စီးပွားရေး လုပ်ငန်းဥပဒေကိုပြန်လည်ဆန်းစစ်ခြင်းသည် ကုမ္ပဏီများစွာထံမှ စိန်ခေါ်မှုများနှင့် ရင်ဆိုင်ရန် မျှော်လင့်ရကြောင်း သိရပါသည်။ ထို့ပြင် မက်ခရိုစီးပွားရေးတည်ငြိမ်ရေး၊ ငွေကြေးဖောင်းပွမှု ထိမ်းချုပ်ခြင်းနှင့် အဓိကစီးပွားရေးမျှချေရှိရေးအတွက် စီမံချက်များအကောင်အထည်ဖော်သွား မည်ဟု သိရပါသည်။ အခြားအဓိကဖြေရှင်းချက်များတွင် ရင်းနှီးမြှုပ်နှံမှု၊ ပြည်တွင်းစားသုံးမှုနှင့် ပို့ကုန်-သွင်းကုန်များစသည့် စီးပွားရေးမောင်းနှင်အားများကို ထပ်မံကြိုးပမ်းမှုတို့ပါဝင်ကြောင်း သိရပါသည်။ စီမံကိန်းနှင့် ရင်းနှီးမြှုပ်နှံမှု ဝန်ကြီးဌာနသည်၂၀၂၅ ခုနှစ်အား ပြည်တွင်းနှင့် ပြည်ပမှခရီးသွားများအား ဆွဲဆောင်ရန်အားထုတ်မှုပါဝင်သော ပြည်တွင်းစားသုံးမှု ကိုလှုံ့ဆော် မည့် နှစ်တစ်နှစ်အဖြစ် သတ်မှတ်ထားကြောင်း သိရပါသည်။ ထို့ပြင် ဟာလာကုန်ပစ္စည်း ဈေးကွက်အားမြှင့်တင်ခြင်းနှင့်အတူ လွတ်လပ်သောကုန်သွယ်ရေး သဘောတူညီချက် ၁၇ ချက်ကို အကောင်အထည်ဖော်ရန် အရှိန်မြှင့်ဆောင်ရွက်သွားမည်ဟု သိရပါသည်။ အခြေခံ အဆောက်အအုံဖွံ့ဖြိုးတိုးတက်ရေးသည်လည်း စီးပွားရေးဖွံ့ဖြိုးတိုးတက်ရေးအတွက် အဓိက မောင်းနှင်အားတစ်ခုဖြစ်သောကြောင့် ၂၀၂၅ နှစ်ကုန်ပိုင်းတွင် ကီလိုမီတာ ၃၀၀၀ ရှည်လျားသော အဝေးပြေးကားလမ်းနှင့် ကီလိုမီတာ ၁၀၀၀ ရှည်လျားသော ကမ်းရိုးတန်း လမ်းမကို အကောင် အထည်ဖော်နိုင်ရန် မျှော်လင့်ရကြောင်း Tam ကအသားပေးပြောကြားခဲ့ ပါသည်။

DOCA(ရန်ကုန်)

          စီးပွားရေးနှင့်ကုန်သွယ်ရေး ပူးပေါင်းဆောင်ရွက်မှုသည် ဗီယက်နမ်-တရုတ်ဆက်ဆံရေး တွင် အားကောင်းတည်ငြိမ်သော ဖွံ့ဖြိုးတိုးတက်မှုနှင့်အတူ တောက်ပစွာရှိနေကြောင်း တရုတ် နိုင်ငံရှိ ဗီယက်နမ်ကုန်သွယ်ရေးအတိုင်ပင်ခံပုဂ္ဂိုလ်ဖြစ်သူ Nong Duc Lai က ဗီယက်နမ်သတင်း အေဂျင်စီနှင့် အင်တာဗျူးတွင် ပြောကြားခဲ့ကြောင်း သိရပါသည်။ Lai က တရုတ်နှင့် များစွာသော ၎င်းတို့၏မိတ်ဖက်များအကြား ကုန်သွယ်မှုကျဆင်းနေသော်လည်း ဗီယက်နမ်သည် တရုတ်နှင့် ကုန်သွယ်ရေးဆက်ဆံမှုတည်ငြိမ်သည့် နိုင်ငံအနည်းငယ်ထဲမှတစ်ခုအဖြစ် ဆက်လက် ရှိနေကြောင်း‌ ပြောကြားခဲ့ပါသည်။ ဗီယက်နမ်သည် တရုတ်၏ ကမ္ဘာပေါ်တွင် စတုတ္ထ အကြီးမားဆုံး ကုန်သွယ်ရေးမိတ်ဖက်ဖြစ်ပြီး အာဆီယံတွင်အကြီးဆုံးဖြစ်ကြောင်းသိရပါသည်။ နှစ်နိုင်ငံကြား ကုန်သွယ်မှုသည် မြင့်မားစွာကြီးထွားလျှက်ရှိပြီး ၂၀၂၄ ၏ ပထမ ၁၁ လတာ ကာလတွင် နှစ်နိုင်ငံကြား အပြန်အလှန်ကုန်သွယ်မှုတန်ဖိုး အမေရိကန်ဒေါ်လာ ၂၃၅.၄ ဘီလီယံ ရောက်ရှိခဲ့ပြီး ၂၀၂၃ တူညီသည့်ကာလထက် ၁၄ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုပမာဏသည် ၂၀၂၄ နှစ်ကုန်တွင် အမေရိကန်ဒေါ်လာ ၂၅၀ ဘီလီယံကျော်ထိ‌ ရောက်ရှိခဲ့ ကြောင်း သိရပါသည်။ ဗီယက်နမ်စိုက်ပျိုးရေးထုတ်ကုန်များ တရုတ်ဈေးကွက်ဝင်ရောက်မှု တိုးတက်မှုမှာလည်း အားကောင်းခဲ့ကြောင်း သိရပါသည်။ နှစ်နိုင်ငံသည် ဗီယက်နမ်မှ လတ်ဆတ်သောအုန်းသီးများ၊ အေးခဲထားသောဒူးရင်းသီးများနှင့် မွေးမြူရေးမိကျောင်းများကို တရုတ်သို့တင်ပို့ရန် သံတမံခင်း ကျင့်ဝတ်များကို လက်မှတ်ရေးထိုးပြီးဖြစ်ကြောင်း သိရပါသည်။ ၂၀၂၅ ခုနှစ် ကုန်သွယ်ရေးနှင့် ပတ်သတ်၍ အတိုင်ပင်ခံပုဂ္ဂိုလ်က လတ်တလော အပြန်အလှန် မိတ်ဖက်ဖွဲ့မှု ဖွံ့ဖြိုးတိုးတက်လာမှုနှင့်အတူ ခေါင်းဆောင်အမြင့်ပိုင်းများကြား အပြန်အလှန် အလည်အပတ်ခရီးသွားလာမှုများကြောင့် ပူးပေါင်းဆောင်းရွက်မှုများ အားကောင်း လာလျက် ရှိကြောင်းသိရပါသည်။ ထိုလည်ပတ်မှု များသည် ကဏ္ဍအားလုံးတွင်ပိုမိုနက်ရှိုင်းသော ပူးပေါင်း ဆောင်ရွက်မှုများအတွက် လမ်းကြောင်း ဖန်တီးပေးနိုင်မည်ဖြစ်ပြီး စီးပွားရေးနှင့် ကုန်သွယ်ရေး မိတ်ဖက်ဖွဲ့မှုမှာ အရေးပါသော ဒေါက်တိုင် အဖြစ် ဆက်လက်တည်ရှိနေကြောင်း သိရပါသည်။ ထိုလတ်တလော နှစ်နိုင်ငံခေါင်းဆောင်များ အကြား အပြန်အလှန်အလည်အပတ် ခရီးစဉ်များ အတွင်း စီးပွားရေးနှင့် ကုန်သွယ်ရေး ပူးပေါင်း ဆောင်ရွက်မှုကို အဓိကထားသော များစွာသော သဘောတူညီချက်များကို လက်မှတ်ရေးထိုးခဲ့ ကြပြီး ၂၀၂၅ ခုနှစ်မှ အလွန်အထိ ပူးပေါင်း ဆောင်ရွက်မှုအတွက် ခြေလှမ်းတစ်ရပ်ကိုဖန်တီး နိုင်ခဲ့ကြောင်းသိရပါသည်။

DOCA(ရန်ကုန်)

          ဗီယက်နမ်လျှပ်စစ်ဓာတ်အား(EVN) သည် Ninh Thuan ပြည်နယ်ရှိ နျူကလိယစွမ်းအင် စက်ရုံများပါဝင်သော စွမ်းအင်စီမံကိန်းသစ်များ၏ ရင်းနှီးမြှုပ်နှံသူအဖြစ် ဆက်လက် တည်ရှိ နေနိုင်ကြောင်း ညွှန်ကြားရေးမှူးဖြစ်သူ Nguyen Anh Tuan  ဇန်နဝါရီလ ၆ ရက်နေ့က ဟနွိုင်းမြို့တွင် ကျင်းပခဲ့သော EVN ၏ နှစ်ကုန်ဆန်းစစ်ချက်ညီလာခံတွင် ပြောကြားခဲ့ပါသည်။ Tuan ၏ အဆိုအရ နျူကလိယစွမ်းအင်သည် တည်ငြိမ်ခြင်း၊ သဘာဝပတ်ဝန်းကျင်နှင့် သင့်လျော်ခြင်းနှင့် တည်ငြိမ်သော စွမ်းအင်အရင်းအမြစ်ဖြစ်ခြင်းတို့အပြင် ထိုစွမ်းအင်ကို ဖွံ့ဖြိုး တိုးတက်အောင် ဆောင်ရွက်ခြင်းအားဖြင့် နိုင်ငံ၏စွမ်းအင်ပံ့ပိုးမှုကို ကွဲပြားစေနိုင်သောကြောင့် စွမ်းအင်ဖူလုံရေးနှင့် ၂၀၅၀ တွင်ကာဗွန်ထုတ်လွှင့်မှုကို သုညထိလျှော့ချရေးတို့တွင် ပံ့ပိုးပေး နိုင်မည်ဟု သိရပါ သည်။ ဇန်နဝါရီလ ၃ ရက်နေ့ကထုတ်ပြန်ခဲ့သည့် Directive 01 တွင် ဝန်ကြီးချုပ် Pham Minh Chinh က စက်မှုနှင့်ကုန်သွယ်ရေးဝန်ကြီးဌာနအား Ninh Thuan နျူကလိယစွမ်းအင် စက်ရုံများအား ငါးနှစ်အတွင်းအကောင်အထည်ဖော်ရန်နှင့် ပြီးမြောက်ရန် အတွက်ကြီးကြပ်ရန် ညွှန်ကြားခဲ့ကြောင်းသိရပါသည်။ ယခုနှစ်အတွက် GDP ကြီးထွားမှု ရန်မှန်းချက် ၈ ရာခိုင်နှုန်းနှင့်အတူ လျှပ်စစ်စွမ်းအားသုံးစွဲမှုမှာ ၁.၅ ဆတိုးမြင့်လာမည်ဖြစ်သည့် အတွက် နိုင်ငံ၏လျှပ်စစ်စနစ်သို့ ထပ်တိုး ၈၀၀၀-၁၀၀၀၀ မဂ္ဂါဝပ်လိုအပ်လာမည်ဟု Tuan ကပြောကြားခဲ့ပါသည်။ ထို့ကြောင့် EVN သည် Ninh Thuan နျူကလိယစက်ရုံများနှင့်အတူ စွမ်းအင်စီမံကိန်းသစ်များတွင် အဓိက ရင်းနှီးမြှုပ်နှံသူအနေဖြင့် ပူးပေါင်းဆောင်ရွက်မှုကို ဆက်လက်တာဝန်ပေးအပ်ရန် ဝန်ကြီးချုပ် အား ကမ်းလှမ်းခဲ့ကြောင်းသိရပါသည်။ Tuan က EVN သည် ဆောက်လုပ်ချိန်နှင့် ပြင်ဆင်ချိန် တိုတောင်းသော အရေးပေါ်စီမံကိန်းများ အမြန် အကောင်အထည်ဖော်ရန်အတွက် ဝန်ကြီးချုပ်၊ ဝန်ကြီးဌာနများနှင့် ပြည်တွင်းအာဏာပိုင်များ ထံမှ ပံ့ပိုးမှုကိုတောင်းဆိုခဲ့ကြောင်းလည်း သိရပါ သည်။

DOCA(ရန်ကုန်)

          ကမ္ဘောဒီးယားနိုင်ငံနှင့် ဗီယက်နမ်နိုင်ငံတို့အကြား အဓိကဖြတ်ကျော်သောနေရာဖြစ်သည့် Bavet International Border Gate သည် ၂၀၂၄ ခုနှစ်အတွင်း နိုင်ငံပေါင်း ၁၇၂ နိုင်ငံမှ ခရီးသွားစုစုပေါင်း ၁.၅၇ သန်း စံချိန်တင်ရရှိခဲ့ပြီး ၂၀၂၃ ခုနှစ်နှင့်နှိုင်းယှဉ်ပါက ၁၅.၈ ရာခိုင်နှုန်းတိုးတက်ခဲ့ကြောင်း Bavet မြို့၊ အပြည်ပြည်ဆိုင်ရာနယ်ခြားဂိတ်စစ်ဆေးရေးရုံးမှ လက်ထောက်အကြီးအကဲ Puth Sopheakeo ကအစီရင်ခံခဲ့သည်။ အဆိုပါခရီးသည်များသည် ပြည်ပနိုင်ငံများမှ ၎င်းတို့၏လုပ်ငန်းတာဝန်များပြီးမြောက်ပါပြီးကမ္ဘောဒီးယားနိုင်ငံသို့ ပြန်လည် ရောက်ရှိလာသည့် ပြည်တွင်းလုပ်ငန်းရှင်များ၊ ဆွေးနွေးမှုများပြုလုပ်ခြင်း၊ ကုန်သွယ်မှု ဖလှယ်ရာတွင်ပါဝင်ခြင်းနှင့် အားလပ်ရက်တွင် အပန်းဖြေလာရောက်သူများပါဝင်ကြကြောင်း Puth Sopheakeo ကပြောကြားခဲ့သည်။ ကမ္ဘောဒီးယားတော်ဝန်အစိုးရ (RGC) ၏ ဦးဆောင်မှု အပေါ် ဧည့်သည်များ၏ယုံကြည်မှုကြောင့် နိုင်ငံတော်သို့ဝင်ရောက်သည့် နိုင်ငံခြားခရီးသည် အများအပြားရှိကြောင်း အလေးပေးပြာကြားခဲ့သည်။ Bavet International Border Gate မှ တာဝန်ရှိသူတစ်ဦး၏ ပြောကြားချက်အရ နိုင်ငံအတွင်းသို့ ဥရောပခရီးသွားဧည့်သည် အရေအတွက်တိုးလာပြီး ခရီးသွားအများစုသည် ဖနွမ်းပင်မြို့သို့ တည်းခိုရန်သွားရောက်ခဲ့ ကြောင်းသိရသည်။ ထို့နောက် Siem Reap ပြည်နယ်ရှိ Angkor Wat ဘုရားကျောင်းသို့ သွားရောက်လည်ပတ်ကြပြီး နိုင်ငံတစ်ဝန်းရှိ အခြားနာမည်ကြီးနေရာများသို့ သွာရောက် လည်ပတ်သူများ ဖြစ်ကြောင်းသိရသည်။

DOCA(ရန်ကုန်)

ကမ္ဘောဒီးယားနိုင်ငံ၏ ၂၀၂၅ ခုနှစ်အတွက် သီဟိုဠ်စေ့ထုတ်လုပ်မှုသည် ရာသီဥတု အခြေ အနေအပေါ် မူတည်၍ တန်ချိန် ၇၀၀၀၀၀ မှ ၉၀၀၀၀၀ အတွင်း ထွက်ရှိမည်ဟု ကမ္ဘောဒီးယား သီဟိုဠ်စေ့အသင်း (CAC) က ခန့်မှန်းထားကြောင်း သိရှိရသည်။

          အကယ်၍ ရာသီဥတုကောင်းမွန်ပါက ယခုနှစ်အတွက် သီဟိုဠ်စေ့ အထွက်ပမာဏသည် ၂၀၂၄ ခုနှစ်နှင့် အလားတူရရှိနိုင်ကြောင်း၊ ရာသီဥတုအခြေအနေ အပေါ်မူတည်၍ သီဟိုဠ်စေ့ တန် ချိန် ၇၀၀၀၀၀နှင့် ၉၀၀၀၀၀ အကြား ထွက်ရှိမည်ဟု မျှော်မှန်းထားကြောင်း၊ သို့သော်လည်း ရာသီဥတုဖောက်ပြန်မှုသည် ယခုနှစ် သီဟိုဠ်စေ့ရိတ်သိမ်းမှုအား ဆိုးရွားစွာထိခိုက်စေမည်ကို စိုးရိမ် မှုရှိကြောင်း၊ ရေအရင်းအမြစ်နှင့် မိုးလေဝသဝန်ကြီးဌာနက သီဟိုဠ်စေ့ ခူးဆွတ်ရိတ်သိမ်းသည့် ခြောက်သွေ့ရာသီကာလအတွင်း မိုးရွာသွန်းနိုင်ခြေရှိသည်ဟု ဖော်ပြထားပြီး ထိုသို့ဖြစ်ပေါ်ပါက သီးနှံအထွက်ပမာဏသည် ၁၀ ရာခိုင်နှုန်းမှ ၃၀ ရာခိုင်နှုန်းအထိ လျော့ကျနိုင်ကြောင်းဖြင့် CAC အသင်း ဥက္ကဋ္ဌ Uon Silot က Khmer Times သို့ ပြောကြားခဲ့သည်။

          အဆိုပါအချက်ကြောင့် လယ်သမားများအနေဖြင့် CAC အသင်း၏ လမ်းညွှန်ချက်များနှင့် အညီ အစီအမံများချမှတ် ဆောင်ရွက်ရန် လိုအပ်ကြောင်း၊ အထူးသဖြင့် ၂၀၂၄ ခုနှစ် နှစ်လယ်ပိုင်း၌ ပို့ချပညာပေးခဲ့သော အော်ဂဲနစ် စိုက်ပျိုးရေးအလေ့အကျင့်များကို လုပ်ဆောင်ရန် အရေးကြီးသည် ဟု Silot က အလေးပေးပြောကြားခဲ့သည်။ ၂၀၂၅ ခုနှစ် ရိတ်သိမ်းရာသီအတွင်း ဖြစ်နိုင်ခြေရှိသော အထွက်နှုန်းထိခိုက်နိုင်သည့် ရာသီဥတုဆိုင်ရာ အန္တရာယ်များကို လျှော့ချရန်အတွက် သီဟိုဠ်စေ့ စိုက်ပျိုးသူများအနေဖြင့် ၎င်းတို့၏ စိုက်ခင်းများကို ပုံမှန်စောင့်ကြည့်ရန် တိုက်တွန်းကြောင်း မကြာ သေးမီကာလ၌ CAC က ကြေညာချက် ထုတ်ပြန်ခဲ့သည်။

          CAC သည် ရာသီဥတုပြောင်းလဲမှု၏ သက်ရောက်မှုများကို တိုက်ဖျက်ရန်အတွက် ရေရှည် တည်တံ့သော မဟာဗျူဟာတစ်ခုအဖြစ် အော်ဂဲနစ်အလေ့အကျင့်များကို အကောင်အထည်ဖော် ရန် ထောက်ခံအားပေးကြောင်း၊ ကမ္ဘောဒီးယားတွင် သီဟိုဠ်စေ့ ရိတ်သိမ်းရာသီသည် ပုံမှန်အားဖြင့် ဖေဖော်ဝါရီလ၌ စတင်ပြီး မေလတွင် ကုန်ဆုံးကြောင်း၊ သို့ရာတွင် သီဟိုဠ်စေ့ ခူးဆွတ်ရိတ်သိမ်းမှု သည် ရာသီဥတု အခြေအနေ၊ ရာသီဥတုပြောင်းလဲမှုနှင့် အခြောက်ခံခြင်းနှင့် ပြုပြင်ထိန်းသိမ်းခြင်း အတွက် စံအလေ့အကျင့် အားနည်းခြင်းများကဲ့သို့သော သက်ရောက်မှုများအပေါ် မူတည်ကြောင်း သိရှိရသည်။

          ကမ္ဘောဒီးယား စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန၏ အဆိုအရ ကမ္ဘော ဒီးယားနိုင်ငံသည် မြေမျက်နှာပြင် ဧရိယာအလိုက် သီဟိုဠ်စေ့စိုက်ပျိုးမှုတွင် ခန့်မှန်းခြေ ၅၈၀၁၁၇ ဟက်တာဖြင့် ကမ္ဘာ့တတိယအဆင့်၌ ရပ်တည်နေကြောင်း၊ Kampong Thom ပြည်နယ်သည် ဧရိယာ ၁၄၇၇၀၀ ဟက်တာခန့်ဖြင့် သီဟိုဠ်စိုက်ပျိုးမှု အကြီးမားဆုံးဖြစ်ကြောင်း၊ ၎င်း၏နောက်၌ Kratie ပြည်နယ်သည် ဟက်တာ ၁၀၂၅၀၀ နှင့် Ratanakiri ပြည်နယ်သည် ဟက်တာ ၉၇၂၀၀ တို့ဖြင့် စိုက်ပျိုးထုတ်လုပ်လျက်ရှိကြောင်း သိရှိရသည်။

          ကမ္ဘောဒီးယားနိုင်ငံ၏ သီဟိုဠ်စေ့ထုတ်လုပ်မှုသည် ယခုနှစ်၌ တန်ချိန် ၈၅၀၀၀၀ ထွက်ရှိ ခဲ့ပြီး ၂၆.၈ ရာခိုင်နှုန်း တိုးတက်လာကြောင်း၊ ပြည်ပသို့ တင်ပို့မှုမှာ တန်ချိန် ၈၁၅၀၀၀ ရှိပြီး ၃၁ ရာခိုင်နှုန်း တိုးတက်ခဲ့ကြောင်း၊ ဗီယက်နမ်နိုင်ငံသို့ တင်ပို့မှုမှာ ၇၉၃၄၅၃ တန်ဖြင့် ပြောင်းလဲမှု မရှိကြောင်း သိရှိရသည်။

Source: Khmer Times, 12 January, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)