ပြည်ပကုန်သွယ်မှုသတင်းများ

              တင်ပို့သည့်ပမာဏတွင် ၅.၁ ရာခိုင်နှုန်းလျော့ကျခဲ့သော်လည်းတန်ဖိုးတွင် ၄၅.၄ ရာခိုင်နှုန်း မြင့်တက်ခဲ့သည့်အတွက် ဗီယက်နမ်သည် ၂၀၂၄ ခုနှစ်တွင် ငရုတ်ကောင်းတင်ပို့မှုမှတစ်ဆင့် ဝင်ငွေ အမေရိကန်ဒေါ်လာ ၁.၄ ဘီလီယံနီးပါး ရရှိခဲ့ကြောင်း ဗီယက်နမ်နိုင်ငံ ငရုတ်ကောင်းနှင့် ဟင်းခတ်အမွှေးအကြိုင်အသင်း (VPSA) ၏အဆိုအရ သိရပါသည်။ ဒီဇင်ဘာလတစ်လတည်းတွင် ငရုတ်ကောင်းအမည်းတန်ချိန် ၁၂၇၇၁ နှင့်ငရုတ်ကောင်းအဖြူတန်ချိန် ၂၄၉၄ တန်ပါဝင်သော ငရုတ်ကောင်းစုစုပေါင်း တန်ချိန် ၁၅၂၆၅ တန်တင်ပို့ခဲ့ပြီး ဝင်ငွေအမေရိကန်ဒေါ်လာ ၁၀၀.၆ သန်းရရှိခဲ့ကြောင်းသိရပါသည်။ နိုဝင်ဘာလနှင့်နှိုင်းယှဉ်ပါက ပမာဏတွင် ၄.၃ ရာခိုင်နှုန်းနှင့် ဝင်ငွေတွင် ၅.၅ ရာခိုင်နှုန်းကျဆင်းခဲ့ကြောင်း သိရပါသည်။ ဒီဇင်ဘာလတွင် ပျမ်းမျှတင်ပို့သည့် ဈေးနှုန်းများမှာ ငရုတ်ကောင်းအမည်း တစ်တန်လျှင်အမေရိကန်ဒေါ်လာ ၆၄၇၆ နှင့် ငရုတ်ကောင်းအဖြူ တစ်တန်လျှင် အမေရိကန်ဒေါ်လာ ၈၁၉၈ ရှိကြောင်းသိရပါသည်။ ၂၀၂၄ တစ်နှစ်လုံးတွင် ဗီယက်နမ်နိုင်ငံသည် ငရုတ်ကောင်းအမည်းတန်ချိန် ၂၂၀၂၆၉ နှင့် ငရုတ်ကောင်း အဖြူတန်ချိန် ၃၀၃၃၁ ပါဝင်သော ငရုတ်ကောင်းတန်ချိန် ၂၅၀၆၀၀ တန်တင်ပို့ခဲ့ပြီးဝင်ငွေ အမေရိကန်ဒေါ်လာ ၁.၃ ဘီလီယံရရှိခဲ့ကြောင်းသိရပါသည်။ တင်ပို့သည့်ပမာဏတွင် လျော့ကျခဲ့ သော်လည်း တင်ပို့သည့်ဈေးနှုန်းမြင့်တက်ခဲ့သောကြောင့် ဝင်ငွေရရှိမှုတွင် မြင့်တက်ခဲ့ကြောင်း သိရပါသည်။ ၂၀၂၄ ခုနှစ်တွင် ငရုတ်ကောင်းအနက်‌ ပျမ်းမျှဈေးနှုန်းမှာ တစ်တန်လျှင် အမေရိကန် ဒေါ်လာ ၅၁၅၄ (၄၉.၇ရာခိုင်နှုန်းမြင့်တက်) နှင့် ငရုတ်ကောင်းအဖြူပျမ်းမျှဈေးနှုန်းမှာ တစ်တန်လျှင် အမေရိကန်ဒေါ်လာ ၆၈၈၄ (၃၈.၉ ရာခိုင်နှုန်းမြင့်တက်) တို့ ဖြစ်ကြောင်း သိရပါသည်။ ထိုသို့ဈေးနှုန်းမြင့်တက်ရခြင်းသည် လတ်တလောနှစ်များအတွင်း အရည်အသွေးနှင့် ငရုတ်ကောင်းအမှတ်တံဆိပ်ပုံရိပ်မြင့်တက်ရန် နိုင်ငံ၏အားထုတ်မှုကြောင့်ဖြစ်ကြောင်း သိရ ပါသည်။ အမေရိကန်နိုင်ငံသည် တန်ချိန် ၇၂၃၃၁ တန်ဖြင့် ဗီယက်နမ်ငရုတ်ကောင်း အဓိကတင်သွင်းသူဖြစ်ပြီး ဗီယက်နမ်၏စုစုပေါင်းတင်ပို့သည့်ပမာဏ၏ ၂၈.၉ ရာခိုင်နှုန်း ရှိကြောင်း သိရပါသည်။ အခြားအဓိကဈေးကွက်များတွင် ယူအေအီး၊ ဂျာမနီနှင့် နယ်သာလန်တို့ ပါဝင်ပြီး အိန္ဒိယနှင့်တရုတ်သို့တင်ပို့မှုမှာမူ သိသာစွာကျဆင်းခဲ့ကြောင်းသိရပါသည်။ တစ်ချိန် တည်းမှာပင် ဗီယက်နမ်သည် အမေရိကန်ဒေါ်လာ ၁၇၆.၂ သန်းတန်ဖိုးရှိသော ငရုတ်ကောင်းတန်ချိန် ၃၆၇၂၇ တန်ကို ပြုပြင်ထုတ်လုပ်တင်ပို့ရန်အတွက် တင်သွင်းခဲ့ကြောင်း သိရပါသည်။ အင်ဒိုနီးရှားနိုင်ငံသည်တန်ချိန် ၁၇၁၉၄ တန်ဖြင့် ဗီယက်နမ်အားအဓိကရောင်းချသူ ဖြစ်ကြောင်းသိရပါသည်။

Vietnam Plus

DOCA(ရန်ကုန်)

               ရုရှားနိုင်ငံတစ်ဝှမ်း ခရီးသွားအခွန်အသစ်သည် ဗုဒ္ဓဟူးနေ့တွင် အကျုံးဝင်ပြီး ယခင်အပန်း ဖြေစခန်းကြေးကို အစားထိုးလိုက်ကြောင်း RIA Novosti သတင်းဌာနက ဗုဒ္ဓဟူးနေ့တွင် ဖော်ပြခဲ့သည်။ ၂၀၂၅ ခုနှစ် ဇန်နဝါရီလ ၁ ရက်နေ့မှစတင်၍ ဟိုတယ်များနှင့် အခြားတည်းခိုခန်းများတွင် တည်းခိုသည့် ခရီးသွားများသည် ၎င်းတို့၏ တည်းခိုစရိတ်၏ နောက်ထပ် ၁ ရာခိုင်နှုန်းအား ပေး‌ဆောင်ရမည်ဖြစ်ပြီး ဒေသတွင်းခရီးသွားလာရေး အခြေခံအဆောက်အအုံများ အားကောင်းလာစေရန် အဆင့်လိုက်အစီအစဉ်တစ်ခုအဖြစ် စတင်လိုက်ခြင်း ဖြစ်ကြောင်းသိရ သည်။ ဒေသဆိုင်ရာ အာဏာပိုင်များ၏ ဆုံးဖြတ်ချက်အရ အခွန်ကို ဒေသဆိုင်ရာစည်းကြပ်မှုအဖြစ် အကောင်အထည်ဖော်ရန် ဒေသဆိုင်ရာအာဏာပိုင်များ၏ ဆုံးဖြတ်ခွင့်ကိုပေးသည့် ကဏ္ဍသစ်တွင် "Tourist Tax" ဟု ခေါင်းစဉ်တပ်ထား သည့် ၂၀၂၄ ခုနှစ် ဇူလိုင်လတွင် ရုရှားအခွန်ကုဒ်ကို ပြင်ဆင်ချက်၏ တစ်စိတ်တစ်ပိုင်းအဖြစ် မိတ်ဆက်ခဲ့သည်။ အထူးသဖြင့် တည်ထောင်ထားသော သို့မဟုတ် ထွန်းသစ်စခရီးသွားလုပ်ငန်းနယ်ပယ်များရှိ ဒေသအများအပြားသည် အဆိုပါအစီအစဉ်ကို လက်ခံကျင့်သုံးနေပြီဖြစ်သည်။ လက်ရှိမူဘောင်အရ ခရီးသွားအခွန် သည် ၂၀၂၅ ခုနှစ်တွင် ၁ ရာခိုင်နှုန်းဖြင့် စတင်မည်ဖြစ်ပြီး ၂၀၂၇ ခုနှစ်တွင် ၃ ရာခိုင်နှုန်းအထိ တဖြည်းဖြည်း တိုးလာမည် ဖြစ်ကြောင်းသိရသည်။

Source : Xinhua

DOCA(ရန်ကုန်)

             အိန္ဒိယနိုင်ငံတွင် ၎င်း၏ဥာဏ်ရည်တု (AI) နှင့် cloud ဝန်ဆောင်မှုများကို တိုးချဲ့ရန် အမေရိကန် ဒေါ်လာ ၃ ဘီလီယံ ရင်းနှီးမြှုပ်နှံမည့် အစီအစဉ်ကို Microsoft က ဇန်နဝါရီ ၇ ရက်တွင် ကြေညာခဲ့သည်။ အိန္ဒိယရှိ ထိပ်တန်း cloud နှင့် AI ပံ့ပိုးပေးသူများထဲမှ တစ်ခုအပါအဝင်ဖြစ်‌သော Microsoft သည် India ရှိ datacenter ဒေသ ၃ ခုတွင် လုပ်ငန်းများ လည်ပတ်နေပြီး ၎င်း၏ စတုတ္ထမြောက်‌ဒေသအား လာမည့်နှစ်တွင် လုပ်ငန်းများလည်ပတ်နိုင်ရန်အတွက် ပြင်ဆင်နေကြောင်း ကုမ္ပဏီ၏ ပြောကြားချက်အရ သိရသည်။ India ၏ AI startup များနှင့် သုတေသန အသိုက်အဝန်းကို ဝန်ဆောင်မှုပေးရန်အတွက် အရွယ်အစားကြီးမားသော AI ကွန်ပျူတာဂေဟ စနစ်ကို ဖွံ့ဖြိုးတိုးတက်စေရန် ဒေါ်လာ ၃ ဘီလီယံတန်ဖိုးရှိသော ရင်းနှီးမြှုပ်နှံမှုကို အသုံးချ သွားမည်ဖြစ်သည်။ Microsoft သည် အိန္ဒိယနိုင်ငံရှိ B2B startups များအတွက် အသိုင်းအဝိုင်း တစ်ခုဖြစ်သည့် SaaSBoomi နှင့် AI နားလည်မှုစာချွန်လွှာကို လက်မှတ်ရေးထိုးခဲ့ကြောင်းလည်း သိရသည်။ ၎င်းတို့သည် အိန္ဒိယမြို့ငယ်များနှင့် မြို့ငယ်များရှိ စွန့်ဦးတီထွင် လုပ်ငန်းရှင်များကို နည်ပညာအသိများမြှင့်တင်‌ပေးနိုင်ရန် ကြိုးပမ်းမည်ဖြစ်ပြီး Indian AI နှင့် SaaS startups များအတွက် နောက်ထပ် ၁.၅ ဘီလီယံ ဖက်စပ်အရင်းအနှီးရန်ပုံငွေဖြင့် ဆွဲဆောင်မည်ဖြစ်သည်။

Source : Xinhua

DOCA(ရန်ကုန်)

            ၂၀၂၄ ခုနှစ်အတွင်း ကမ္ဘောဒီးယားနိုင်ငံ၏ လယ်ယာစိုက်ပျိုးရေးကဏ္ဍတွင် အဓိကပို့ကုန် ကုန်စည်များသည် သိသိသာသာမြင့်တက်လာခဲ့သည်။ ကမ္ဘောဒီးယားနိုင်ငံသည် တရုတ်၊ ဗီယက်နမ်နှင့်ထိုင်းနိုင်ငံတို့ကို ဆန်၊ ငှက်ပျောသီး၊ သရက်သီး၊ ပီလောပီနံ၊ သီဟိုဠ်စေ့၊ ပြောင်း၊ ငရုတ်ကောင်းနှင့် ဆေးရွက်ကြီးတို့ကို အဓိကတင်ပို့ခဲ့သည်။ ၂၀၂၄ ခုနှစ်၊ ဇန်နဝါရီလမှနိုဝင်ဘာလ အတွင်း ကမ္ဘောဒီးယားနိုင်ငံသည် စပါးတင်ပို့မှုမှ ကန်ဒေါ်လာ ၁,၂၇၁ သန်းနှင့် ဆန်တင်ပို့မှုမှ ကန်ဒေါ်လာ ၄၃၈ သန်းရရှိခဲ့ပြီး တစ်နှစ်ထက်တစ်နှစ် ၁၆.၄၂ ရာခိုင်နှုန်းနှင့် ၃.၉၇ ရာခိုင်နှုန်း အသီးသီးတိုးလာကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MOC) ၏ တရား ဝင်ထုတ်ပြန်ချက်များအရ သိရသည်။ ကမ္ဘောဒီးယားသည် ပီလောပီနံတင်ပို့မှုမှ ကန်ဒေါ်လာ ၆၂၂ သန်း၊ ရာဘာတင်ပို့မှုမှ ကန်ဒေါ်လာ ၅၂၃ သန်းရှိခဲ့ပြီး ၁၃.၄၂ ရာခိုင်နှုန်းနှင့် ၁၅.၈၁ ရာခိုင်နှုန်းအသီးသီး ရှိခဲ့သည်။ နိုင်ငံတော်သည် သီဟိုဠ်စေ့တင်ပို့မှုမှ ကန်ဒေါ်လာ ၅၀၂ သန်း၊ သရက်သီးတင်ပို့မှုမှ ကန်ဒေါ်လာ ၁၃၈ သန်းရှိခဲ့သည်။ သို့သော်လည်း ငှက်ပျောသီးတင်ပို့မှုမှာ ၁၁.၂ ရာခိုင်နှုန်းကျဆင်းခဲပြီး ကန်ဒေါ်လာ ၁၃၈ သန်းရရှိခဲ့ကြောင်း အစီရင်ခံစာတွင်ဖော်ပြထား သည်။ အခြားလယ်ယာထွက်ကုန်များဖြစ်သည့် ပြောင်း၊ ငရုတ်ကောင်းနှင့်ဆေးရွက်ကြီးတင်ပို့မှုမှ စုစုပေါင်း ဝင်ငွေ အမေရိကန်ဒေါ်လာ ၃၁၀ သန်းရရှိခဲ့သည်။ စိုက်ပျိုးရေးကဏ္ဍသည် အခြားသောကဏ္ဍများထက် ကမ္ဘောဒီးယားနိုင်ငံ၏ လူမှုရေးနှင့်စီးပွားရေးဖွံ့ဖြိုးတိုးတက်ရေးတို့ကို ပံ့ပိုး ရာတွင်အရေးပါသောအခန်းကဏ္ဍမှပါဝင်နေကြောင်း အစီရင်ခံစာတွင်ဖော်ပြထားကြောင်းသိရှိရပါသည်။

Source: Khmer Times

DOCA(ရန်ကုန်)

            ၂၀၂၄ ခုနှစ်တွင် ဗီယက်နမ်၌ လုပ်ငန်း စုစုပေါင်း ၇၆၁၇၉ ခု လုပ်ငန်းလည်ပတ်မှု ပြန်လည်စတင်ခဲ့ကြောင်း စီမံကိန်းနှင့်ရင်းနှီးမြှုပ်နှံမှုဝန်ကြီးဌာနအောက်ရှိ စီးပွားရေးမှတ်ပုံတင် အေဂျင်စီ၏ အဆိုအရသိရပါသည်။ ပျမ်းမျှအားဖြင့် တစ်လလျှင် လုပ်ငန်း ၆၃၄၈ ခု လည်ပတ်မှု ပြန်လည်စတင်ခြင်းဖြစ်ကြောင်းသိရပါသည်။ ထို့ကြောင့် ၂၀၂၄ ခုနှစ်တွင် ဗီယက်နမ်၌ လုပ်ငန်းသစ်အရေအတွက်နှင့် လုပ်ငန်းလည်ပတ်မှုပြန်လည်စတင်သည့်လုပ်ငန်း အရေအတွက် မှာ ၂၃၃၄၁၉ ခုရှိခဲ့ကြောင်းသိရပါသည်။ လုပ်ငန်းသစ်အရေအတွက် ၁၅၇၂၄၀ ခု တည်ထောင် ခဲ့ပြီး နိုင်ငံစီးပွားရေးအနေဖြင့် မတည်မှတ်ပုံတင်မှုတန်ဖိုး အမေရိကန်‌ဒေါ်လာ ၁၄၀.၆ ဘီလီယံ ရရှိခဲ့ကြောင်းသိရပါသည်။ အသစ်တည်ထောင်သည့်လုပ်ငန်းအများစုမှာ မတည်ရင်းနှီးငွေ ဗီယက်နမ်ဒေါင် ၁ ဘီလီယံမှ ၁၀ ဘီလီယံထက်နည်းသည့် အသေးစားလုပ်ငန်းများဖြစ်ပြီး အရေအတွက်မှာ ၁၄၅၄၆၄ ခုရှိကြောင်းသိရပါသည်။ ဝန်ဆောင်မှုကဏ္ဍတွင် လုပ်ငန်းသစ် အရေအတွက် ၁၁၈၈၄၀ ခုရှိပြီး စက်မှုနှင့်ဆောက်လုပ်ရေးကဏ္ဍတွင် လုပ်ငန်းသစ် ၃၆၇၇၈ ခုရှိကြောင်းသိရပါသည်။ တစ်ချိန်တည်းမှာပင် ၂၀၂၄ ခုနှစ်တွင် လုပ်ငန်းအရေအတွက် ၁၉၇၈၆၁  ခု ဈေးကွက်မှထွက်ခွာခဲ့ပြီး အများစုမှာ ယာယီရပ်ဆိုင်းခြင်းဖြစ်ကြောင်း သိရှိရပါသည်။

Vietnam Plus

DOCA(ရန်ကုန်)