HighLight News

        ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် အနောက်ခြမ်းရှိ မှော်တောကျေးရွာအုပ်စု ဓမ္မာရုံတွင် ဩဂုတ်လ(၁၈)ရက်နေ့၊ နေ့လယ်(၁၂:၀၀)နာရီအချိန်တွင် စားသုံးသူပြည်သူများအား ကုန်စည်(သို့မဟုတ်) ဝန်ဆောင်မှုနှင့်စပ်လျဉ်း၍ စားသုံးသူ၏ အခွင့်အရေးနှင့် အကျိုးစီးပွားကို ကာကွယ်ပေးခြင်းဆိုင်ရာ အသိပညာပေး ဟောပြောပွဲကျင်းပပြုလုပ်ခဲ့ကြောင်း သိရှိရသည်။

        အဆိုပါ အသိပညာပေး ဟောပြောပွဲတွင် မှော်တောကျေးရွာအုပ်စု အုပ်ချုပ်ရေးမှူးက အသိပညာပေး ဟောပြောပွဲကျင်းပရခြင်း၏ အကျိုးတရားများအကြောင်း အဖွင့်အမှာစကား ပြောကြားခဲ့ပြီး ကော့မှူးမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းက စားသုံးသူကာကွယ်ရေး ဥပဒေကို ၂၀၁၉ခုနှစ် မတ်လ (၁၅)ရက်နေ့တွင် ပြည်ထောင်စုလွှတ်တော် ဥပဒေအမှတ်(၉)အရ အတည်ပြုပြဋ္ဌာန်းလိုက်ကြောင်း ၎င်းဥပဒေတွင်ပါရှိသော စားသုံးသူ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ စားသုံးသူကာကွယ် ပေးခြင်း ဆိုင်ရာအချက်များမှ ကုန်စည်(သို့မဟုတ်)ဝန်ဆောင်မှုနှင့် စပ်လျဉ်း၍ စားသုံးသူ၏ အခွင့်အရေးနှင့် အကျိုးစီးပွားများကို ကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင် တို့အကြား ကော်မရှင်နှင့်ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသော လုပ်ငန်းစဉ်များအကြောင်း ကော်မရှင်ဖွဲ့စည်းခြင်းနှင့် ကော်မရှင်၏ လုပ်ပိုင်ခွင့်နှင့် လုပ်ငန်းတာဝန်များ စားသုံးသူရေးရာဦးစီးဌာန၏ လုပ်ပိုင်ခွင့်နှင့် လုပ်ငန်းတာဝန်များ ၎င်းဥပဒေ၏ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာ အချက်များမှ ကုန်ပစ္စည်းများအပေါ်တွင် ကုန်အညွှန်းအမှတ်အသားဖော်ပြရာ၌ စီးပွားရေးလုပ်ငန်းရှင်များအနေဖြင့် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ မဖြစ်မနေ ရေးသားဖော်ပြရမည့်အချက်များအား အကျယ်တဝင့် ရှင်းလင်းဟောပြောပေးခဲ့ပြီး ကျေးရွာ၏ စားသုံးသူပြည်သူများ၏ သိရှိလိုသည့် မေးမြန်းချက်များအား ပြန်လည်ဖြေရှင်းပေးခဲ့ကြောင်း သိရှိရပါသည်။

DOCA(ရန်ကုန်)

        ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်  သီလဝါစက်မှုဇုန်အတွင်းရှိ Wilmar ဆီကန်မှထုတ်လုပ်ပေးလျက်ရှိသော စားအုန်းဆီများကို ရန်ကုန်တိုင်းဒေသကြီးအတွင်း မြို့နယ်များနှင့် အခြားတိုင်းဒေသကြီး/ပြည်နယ်များရှိ ဆီကိုယ်စားလှယ်များသို့ စားအုန်းဆီ နေ့စဉ်ထုတ်ပေးလျက်ရှိကြောင်း သိရှိရသည်။

        ထိုသို့ ထုတ်ပေးလျက်ရှိသော စားအုန်းဆီများအား  ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ အပတ်စဉ် တနင်္လာနေ့တိုင်း ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည်ဖြန့်ဖြူး  ရောင်းချသူများအနေဖြင့် ဒေသအရောက် ဈေးနှုန်းများအပေါ် (၂)ရာခိုင်နှုန်း အမြတ်ထက်မပိုသော ဈေးနှုန်းဖြင့်သာ ဈေးကွက်အတွင်းသို့ ပြန်လည်ဖြန့်ဖြူး ရောင်းချစေရေးနှင့် ဈေးနှုန်းအဆမတန် မြှင့်တင်ရောင်းချခြင်းများ မပြုလုပ်စေရေး၊ စားသုံးသူပြည်သူများ စားသုံးဆီဝယ်ယူသုံးစွဲရာတွင် ဘေးအန္တရာယ်ကင်းရှင်းသော စားသုံးဆီများကို သင့်တင့်မျှတသော ဈေးနှုန်းဖြင့် ဝယ်ယူစားသုံး နိုင်စေရေးတို့အတွက်လည်း တောင်ပိုင်းခရိုင်ဦးစီးမှူးရုံးမှဝန်ထမ်းများက ကွင်းဆင်းကြပ်မတ် ဆောင်ရွက်လျက်ရှိရာ (၁၁.၈.၂၀၂၅)ရက်နေ့ မှ (၁၆.၈.၂၀၂၅)ရက်နေ့အထိ ဆီကုမ္ပဏီ (၂၁)ခုနှင့် စားအုန်းဆီ တန်ချိန် (၃၁၄၇.၅၀၁)တန်ကို ထုတ်ပေးခဲ့ကြောင်း သိရှိရပါသည်။

DOCA(ရန်ကုန်)

          စားသုံးသူရေးရာဦးစီးဌာနသည် ရန်ကုန်မြောက်ပိုင်းခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးကျော်ခိုင်ပါ(၃)ဦးတို့သည် (၁၅.၈.၂၀၂၅)ရက်နေ့ (၁၂:၀၀)နာရီအချိန်တွင် ဆက်သွယ်ရေးဝန်ဆောင်မှု(အင်တာနက်ဝန်ဆောင်မှု)လုပ်ငန်းများသို့ မြေပြင်ကွင်းဆင်းစစ်ဆေးခြင်း လုပ်ငန်းများ ဆောင်ရွက်ခဲ့ပါသည်။

          ထိုသို့ဆောင်ရွက်ခဲ့ရာတွင် အမှတ်(၁၃)၊ မင်းဓမ္မလမ်း၊ အရှေ့ကြို့ကုန်းရပ်ကွက်၊ အင်းစိန်မြို့နယ်ရှိ EAGER Communication Group Co.,Ltd သို့ သွားရောက်၍ အမှုဆောင်အရာရှိ ဦးချမ်းမြဦးနှင့် အထွေထွေမန်နေဂျာ ဒေါ်သီတာမွန်တို့အား ကုမ္ပဏီမှဆောင်ရွက်လျက်ရှိသည့် ဝန်ဆောင်မှုလုပ်ငန်းများကို မေးမြန်းခဲ့ရာ မိမိတို့ကုမ္ပဏီသည် ECG အမည်ဖြင့် Possive Optical Fiber Network Access Service ဝန်ဆောင်မှုပေးခြင်းလုပ်ငန်းအား Business to Business အစီအစဉ်ဖြင့် ဆောင်ရွက်လျက်ရှိကြောင်း၊ End User သို့ တိုက်ရိုက်ဝန်ဆောင်မှုပေးခြင်းမဟုတ်ပါကြောင်း ရှင်းလင်းပြောကြားခဲ့ပြီး စားသုံးသူရေးရာဦးစီးဌာနမှ ဝန်ထမ်းများမှလည်း စားသုံးသူနစ်နာမှု မရှိစေရေးအတွက် စီးပွားရေးလုပ်ငန်းရှင်မှ သိသင့်သိထိုက်သည့်အချက်များအား အသိပညာပေး ဆွေးနွေးပြောကြားခဲ့ကြောင်း သိရှိရပါသည်။

DOCA (ရန်ကုန်)

          စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဦးစီးမှူးပါ(၃)ဦးတို့သည် (၁၅.၈.၂၀၂၅)ရက်နေ့ နံနက်(၀၉:၃၀) နာရီအချိန်တွင် အင်းစိန်မြို့နယ်၊ အင်းစိန်ဈေးအတွင်းရှိ စားသုံးဆီနှင့် ငါးအမျိုးမျိုးတို့အား အင်းစိန်ဈေးစည်ပင်သာယာရေးအဖွဲ့တို့ပူးပေါင်း၍ ဈေးနှုန်းများ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

          ထိုသို့ဈေးကွက်အတွင်း မြေပြင်ကွင်းဆင်းစစ်ဆေးရာတွင် ပြည်သူများ၏ စားဝတ်နေရေးပြေလည်မှုကို ရှေးရှု့လျက် ကုန်ဈေးနှုန်းတည်ငြိမ်ရေးနှင့်ကုန်စည်စီးဆင်းမှု မှန်ကန်စေရေးတို့အတွက် အခြေခံစားကုန်ပစ္စည်းဈေးနှုန်းများကောက်ခံခြင်း၊ ငါးအမျိုးမျိုးတို့၏ ဈေးနှုန်းများ ကောက်ခံခဲ့ရာတွင် ဩဂုတ်လပထမပတ်ဈေးနှုန်းများနှင့် သိသာစွာကွာခြားမှုမရှိဘဲ စားအုန်းဆီ ဈေးနှုန်းမှာ ယခင်အပတ်ထက် ဈေးနှုန်းအနည်းငယ်မြင့်တက်လာသည်ကို တွေ့ရှိရပြီး အပတ်စဉ် ကွင်းဆင်းစစ်ဆေး ဆောင်ရွက်ခြင်းများ ပြုလုပ်လျက်ရှိကြောင်း သိရှိရပါသည်။

DOCA (ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၊ မြို့သစ်ရပ်ကွက်၊ အ.ထ.က (ကော့မှူး) အခြေခံပညာအထက်တန်းကျောင်း၌ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် အခြေခံပညာဦးစီးဌာနတို့ ပူးပေါင်း၍ စာဖတ်ရှိန်မြှင့်တင်ရေးလှုပ်ရှားမှုအဖြစ် ဟောပြောပွဲ၊ လူငယ်စကားဝိုင်း၊ ကျပန်းစကားပြောပြိုင်ပွဲ၊ ပုံပြင်ပြောပြိုင်ပွဲ၊ ကဗျာရွတ်ဆိုင်ပြိုင်ပွဲနှင့် ဂိမ်းကစားပြိုင်ပွဲများကို ဩဂုတ်လ(၁၄)ရက်နေ့၊ နံနက်(၀၉:၀၀)နာရီအချိန်တွင် ကျင်းပပြုလုပ်ခဲ့ကြောင်း သိရှိရသည်။

        အဆိုပါ အခမ်းအနားတွင် ခရိုင်စီမံခန့်ခွဲရေးနှင့်အုပ်ချုပ်ရေးကော်မတီမှ အဖွဲ့ဝင်(၂) ဦးဝင်းထွန်းနိုင်မှ အဖွင့်အမှာစကားပြောကြားခဲ့ပြီးနောက် မြို့နယ်စီမံခန့်ခွဲရေးနှင့်အုပ်ချုပ်ရေး ကော်မတီအဖွဲ့ဝင်(၂) ဦးမြင့်ဦးနှင့် မြို့နယ်ပညာရေးမှူး ဒေါ်နုနုကြည်တို့မှ အမှာစကားများပြောကြားခဲ့ပြီး မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူး ဒေါ်ဇာခြည်စိမ့်က စာဖတ်ရှိန်မြှင့်တင်ရေးလှုပ်ရှားမှု ကျင်းပပြုလုပ်ရခြင်း၏ ရည်ရွယ်ချက်အား အကျယ်တဝင့်ရှင်း လင်းပြောကြားခဲ့ပါသည်။ ဆက်လက်၍ လူငယ်စကားဝိုင်းနှင့် ပြိုင်ပွဲများအား ကျင်းပရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ဇာခြည်စိမ့်က ဦးဆောင် ဆွေးနွေးသူအဖြစ် ဆောင်ရွက်ပြီး လူငယ်နှင့်နည်းပညာခေါင်းစဉ်ဖြင့် Grade-11 မှ မကေဇင်ထိုက် ကလည်းကောင်း၊ လူငယ်နှင့်စာပေခေါင်းစဉ်ဖြင့် Grade-11 မှ မကြည်စင်ဦးကလည်းကောင်း၊ လူငယ်နှင့်စာရိတ္တခေါင်းစဉ်ဖြင့် Grade-11 မှ မသက်မြတ်နိုးကလည်းကောင်း၊ လူငယ်နှင့်ယဉ်ကျေးမှုခေါင်းစဉ်ဖြင့်  Grade-11 မှ မအိရွှေဇင်ဝင်းက လည်းကောင်း၊ လူငယ်နှင့် ကျန်းမာရေး ခေါင်းစဉ်ဖြင့် Grade-11 မှ မောင်မင်းနိုင်ဦးကလည်းကောင်း အသီးသီးဆွေးနွေးခဲ့ကြရာ ကျောင်းသား/ကျောင်းသူများက သိရှိလိုသည်များကို မေးမြန်းရာ တာဝန်ရှိသူများက ပြန်လည်ဖြေ ကြားခဲ့ပြီး၊ ကျောင်းအုပ်ဆရာမကြီး ဒေါ်လှလှအေးက ကျေးဇူးတင်စကား ပြောကြားခဲ့ပါသည်။

          ထို့နောက် ကျပန်းစကားပြောပြိုင်ပွဲ၊ ပုံပြင်ပြောပြိုင်ပွဲ၊ ကဗျာရွတ်ဆိုပြိုင်ပွဲ၊ ဂိမ်းကစားပြိုင်ပွဲများ ဆက်လက်ကျင်းပပြုလုပ်ခဲ့ရာ မူလတန်းအဆင့်၊ အလယ်တန်းအဆင့် ကျောင်းသား/ ကျောင်းသူလေးများ ဝင်ရောက်ယဉ်ပြိုင်ခဲ့ကြပြီး လူငယ်စကားဝိုင်းတွင်ပါဝင်ဆွေးနွေးသူများနှင့် ပြိုင်ပွဲတွင် ပထမ၊ ဒုတိယ၊ တတိယဆုရရှိသူများကို တာဝန်ရှိသူများက ဆုများအသီးသီး ပေးအပ်ခဲ့ကြပါသည်။ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ပြသထားသော အသိပညာပေး နံရံကပ်စာစောင်များနှင့် သုတ၊ ရသစာအုပ်/ စာစောင်များ ပြသထားရာ တက်ရောက်လာသော ဌာနဆိုင်ရာများ၊ အမျိုးသမီးရေးရာအဖွဲ့ဝင်များ၊ မိခင်နှင့်ကလေးစောင့်ရှောက်ရေးအဖွဲ့ဝင်များ၊ ဆရာ/ ဆရာမများနှင့် ကျောင်းသား/ ကျောင်းသူများမှ လေ့လာကြည့်ရှုခဲ့ကြောင်း သိရှိရပါသည်။

         အဆိုပါအခမ်းအနားသို့ မြို့နယ်စီမံခန့်ခွဲရေးနှင့်အုပ်ချုပ်မှုကော်မတီအဖွဲ့ဝင်များ၊ မြို့နယ်အဆင့်ဌာနဆိုင်ရာများ၊ မြို့နယ်စာရေးဆရာအသင်း အတွင်းရေးမှူး ဦးခင်ဇော်၊ မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ၊ မိခင်နှင့်ကလေးစောင့်ရှောက်ရေး အဖွဲ့ဝင်များ၊ အမျိုးသမီးရေးရာအဖွဲ့ဝင်များ၊ ကျောင်းအုပ်ဆရာမကြီးနှင့် ဆရာ/ဆရာမများ ၊ကျောင်းသား/ ကျောင်းသူများ စုစုပေါင်း (၂၀၀)ဦးခန့်တက်ရောက်ခဲ့ပါကြောင်း သိရှိရပါသည်။

DOCA(ရန်ကုန်)