HighLight News

             စားသုံးသူရေးရာဦးစီးဌာန၊ မြန်အောင်မြို့နယ်တာဝန်ခံသည်(၅.၃.၂၀၂၅)ရက်နေ့ နံနက် (၁၀:၃၀) နာရီအချိန်တွင် မြန်အောင်မြို့၊ စိန်ဝတ်မှုံ(၁)လမ်း၊အမှတ်(၁)ရပ်ကွက်ရှိ “တက်သစ်” မုန့်မျိုးစုံ လုပ်ငန်းရှင်နှင့်တွေ့ဆုံ၍ ပြည်တွင်းကုန်သွယ်မှုဖွံ့ဖြိုးတိုးတက်စေရေးဆွေးနွေးခြင်းကို ဆောင်ရွက်ခဲ့ကြောင်းသိရသည်။

              ထိုသို့တွေ့ဆုံဆွေးနွေးခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစွာအသုံးပြုနိုင်စေရန်၊  ထုတ်ကုန်များလုံခြုံစိတ်ချရမှုရှိစေရန်၊  ကုန်စည်၏အမျိုးအမည်၊ အသားတင်ပမာဏ၊ ထားသိုသိမ်းဆည်းမှုအညွှန်းများအား မြန်မာဘာသာဖြင့်ဖော်ပြရန်နှင့်  ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြနိုင်ရေး၊ သတ်မှတ်အရည်အသွေးပြည့်မီသော ကုန်စည်များကိုသာရောင်းချရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့်ဝန်ဆောင်မှု ဥပဒေပုဒ်မ၄(ဂ)အရ အွန်လိုင်းစနစ်ဖြင့်ရောင်းချခြင်း (Online Sales)လုပ်ငန်းများကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်သည့် အမိန့်ကြော်ငြာစာ(၅၀/၂၀၂၃)ကိုလည်းကောင်း၊ အွန်လိုင်း စနစ်ဖြင့် ရောင်းချခြင်းလုပ်ငန်းနှင့်စပ်လျဉ်း၍ အမိန့်ကြော်ငြာစာ၊ အမိန့်၊ ညွှန်ကြားချက်များ ထုတ်ပြန် ခွင့်ကို ကုန်သွယ်ရေးဦးစီးဌာနအား အပ်နှင်းသည့် အမိန့်ကြော်ငြာစာအမှတ် (၄၉/၂၀၂၃) ကို လည်းကောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်များမှတ်ပုံတင် ဆောင်ရွက်ရန်အတွက် အွန်လိုင်းစနစ်ဖြင့်ရောင်းချခြင်းလုပ်ငန်း မှတ်ပုံတင်ခြင်းဆိုင်ရာအမိန့်ကြော်ငြာစာ (၅၁/၂၀၂၃)ကို ၂၁.၇.၂၀၂၃ ရက်နေ့တွင် အတည်ပြုပြဌာန်းခဲ့ပြီးဖြစ်၍ အမိန့်ကြော်ငြာစာထုတ်ပြန်ပြီး (၆)လပြည့် သည့် ၂၀.၁.၂၀၂၄ ရက်နေ့မှစ၍ Mobile Application, Website, Social Media(Facebook  Page, Viber, Messenger, TikTok, YouTube etc.,)ကို အသုံးပြုပြီး ကုန်စည် (သို့) ဝန်ဆောင်မှုများ ရောင်းချ သည့်လုပ်ငန်းများအား အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ဆောင်ရွက်ရန်နှင့် မှတ်ပုံတင် ဆောင်ရွက်ခြင်းမရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည် ဖြစ်ကြောင်းကြေငြာခဲ့ပြီး လျှောက်လွှာတင်သွင်းလာသည့်လုပ်ငန်းများအား စားသုံးသူရေးရာဦးစီး ဌာနမှ မြေပြင်ကွင်းဆင်းစစ်ဆေးဆောင်ရွက်ပြီး မှတ်ပုံတင်လက်မှတ်များ ထုတ်ပေးလျက်ရှိပါသည်။

               အွန်လိုင်းစနစ်ဖြင့်ရောင်းချသည့်လုပ်ငန်းရှင်ပြည်သူများအား မှတ်ပုံတင်ဆောင်ရွက်ရန် သိရှိ နိုင်ရေးအတွက် ၇.၃.၂၀၂၅ရက် သောကြာနေ့တွင် မန္တလေးတိုင်းဒေသကြီး၊ စားသုံးသူရေးရာဦးစီး ဌာနမှ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ အမရပူရမြို့နယ်၊ ပြန်ကြားရေးနှင့် ပြည်သူ့ဆက်ဆံရေးဦးစီးမှူးရုံးရှိ Community Centre ၌ မြို့နယ်တာဝန်ခံ ဒေါ်တင်တင်လှ၊ ဦးစီးအရာရှိနှင့် စားသုံးသူရေးရာဦးစီးဌာန၊အမရပူရမြို့နယ်တာဝန်ခံအရာရှိ ဒေါ်အိအိထွေး၊ ဦးစီးအရာရှိ တို့မှ အွန်လိုင်းစနစ်ဖြင့်ရောင်းချခြင်းလုပ်ငန်းများမှတ်ပုံတင်ဆောင်ရွက်ခြင်းဆိုင်ရာ အသိပညာTalk Show ကျင်းပပြုလုပ်ခဲ့ကြောင်းသိရှိရပါသည်။ အဆိုပါဆွေးနွေးပွဲတွင် အွန်လိုင်းစနစ်ဖြင့် ရောင်းချ ခြင်းလုပ်ငန်းမှတ်ပုံတင်ဆောင်ရွက်ခြင်းဆိုင်ရာ အမိန့်ထုတ်ပြန်ချက်၊ အွန်လိုင်းစနစ်ဖြင့်ရောင်းချခြင်း (Online Sales) မှတ်ပုံတင်လက်မှတ် အမျိုးအစား နှင့်မှတ်ပုံတင်သက်တမ်း၊ အွန်လိုင်းစနစ်ဖြင့် ရောင်းချခြင်းလုပ်ငန်းမှတ်ပုံတင်ဆောင်ရွက်ရန်လိုအပ်သည့် လုပ်ငန်းအမျိုးအစားများ၊ မှတ်ပုံတင် ဆောင်ရွက်ရန် လိုအပ်သည့်အချက်အလက်များ၊ မှတ်ပုံတင်ဆောင်ရွက်ခြင်း၏အကျိုးကျေးဇူးများအား အများပြည်သူများသိရှိနိုင်ရေးအတွက် ရှင်းလင်းဆွေးနွေးခဲ့ကြောင်းသတင်းရရှိပါသည်။

DOCA(မန္တလေး)

           စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံး၌ ဆန်စပါးကုန်သည်ကြီးများအသင်းနှင့် ညှိနှိုင်းတွေ့ဆုံပြီး ဆန်ကြမ်းများရောနှောရောင်းချခြင်းမရှိစေရန် ဆွေးနွေးပွဲကို ၈.၃.၂၀၂၅ နေ့လယ် (၁၃:၀၀) နာရီအချိန်တွင် ကျင်းပခဲ့ကြောင်းသိရသည်။

            အဆိုပါဆွေးနွေးပွဲသို့တက်ရောက်လာကြသော  ဆန်စပါးကုန်သည်ကြီးများအသင်း ဆန်လက်လီ/လက်ကား ရောင်းချသူများအား ခရိုင်ဦးစီးမှူးဦးသန်းစိုးမှ ရွှေဘိုပေါ်ဆန်းနှင့် ဧရာ ပေါ်ဆန်းများတွင် ဆန်ကြမ်းအမျိုးအစားများ ရောနှောရောင်းချမှု မရှိစေရေးနှင့် ရောင်းချခြင်းများ မဖြစ်ပေါ်စေရေးတို့အတွက် သင့်တင့်မျှတသော ဆန်ဈေးကွက်၊ဆန်ဈေးနှုန်းများဖြင့် ရောင်းချစေရေး၊ ဆန်အရည်အသွေးအမျိုးအစားများ မှန်ကန်စေရေး၊ ဆန်တင်ချိန်(၂၅)၊ (၅၀၀) အိတ်နှင့် စပါး တင်း(၂၅၀၀) အထက်သိုလှောင်ထားပါက MyRo တွင်မှတ်ပုံတင်ရန်နှင့် MyRo တွင်မှတ်ပုံတင် သက်တမ်းပြည့်ပြီးက ဆက်လက်မှတ်ပုံတင်သက်တမ်းတိုးရန်၊ MyRoတွင်မှတ်ပုံတင်ထားပြီးသော ဆန်ဆိုင်များအား အိတ်အဝင်အထွက် လက်ကျန်စာရင်းများ လစဉ်ပေးပို့ရန်နှင့် ဆန်လက်လီ/ လက်ကား ရောင်းချသူများအား အရောင်းဆိုင်များသို့ဌာနမှ ကွင်းဆင်းစစ်ဆေးသည့်အခါ ပူးပေါင်းဆောင်ရွက်ပေးပါရန်တို့ကို ဆွေးနွေးပြောကြားခဲ့ပြီး၊ ထိုဆွေးနွေးပွဲတွင် ဆန်လက်လီ/ လက်ကား ရောင်းချသူ (၇)ဦးနှင့် စုစုပေါင်းတက်ရောက်သူဦးရေ (၁၅)ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

             စားသုံးသူသူရေးရာဦးစီးဌာန၊ ကျောက်ဆည်ခရိုင်ဦးစီးမှူးမှ စစ်ဆေးရေးအရှိများသည် ၂၀၂၅ ခုနှစ်၊ မတ်လ(၄)ရက်နေ့တွင် ကျောက်ဆည်ခရိုင်အတွင်းရှိ ကျောက်ဆည်၊ စဉ့်ကိုင်၊ မြစ်သားမြို့နယ်များရှိ CP ကြက်ကင်၊ ကြက်ကြော်ဆိုင်များသို့ သွားရောက်၍ကွင်းဆင်းစစ်ဆေးခဲ့ပါသည်။ ထိုသို့ ကွင်းဆင်းစစ်ဆေးရာတွင် CP ကြက်အူချောင်း၊ ဝက်အူချောင်းများပေါ်တွင် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်း ဖော်ပြချက်များ ပါဝင်မှုရှိ/ မရှိစစ်ဆေးခဲ့ရာ အချို့ ကြက်အူချောင်း၊ ဝက်အူချောင်းများ ထုတ်ပိုးသည့် ကုန်ပစ္စည်းများမှာပြည့်စုံစွာပါရှိသော်လည်း အချို့မှာပြည့်စုံစွာပါရှိခြင်းမရှိသည့်အတွက် ဆိုင်ရှင်အား အမှတ်တံဆိပ်များပေါ်၌ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများ ပြည့်စုံစွာပါရှိစေရေးအတွက် အသေးစိတ်ရှင်းလင်းပြောကြားခဲ့ကြောင်း သတင်းရရှိပါသည်။

DOCA(မန္တလေး)

          ကယားပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ စားသုံးသူပြည်သူများ၏ အခွင့်အရေးနှင့် အကျိုးစီးပွားကို ထိရောက်စွာကာကွယ်ပေးနိုင်ရန် အသိပညာပေး လုပ်ငန်းများနှင့် စီးပွားရေးလုပ်ငန်းရှင်များအား ၂၀၁၉စားသုံးသူကာကွယ်ရေးဥပဒေအား ရှင်းလင်းအသိပေးဆောင်ရွက်ခြင်းဖြင့် လုပ်ငန်းများ ဥပဒေနှင့်အညီ ထုတ်လုပ်ဖြန့်ဖြူး၊ တင်သွင်းရောင်းချနိုင်ရန်အတွက် စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်းများ ဆောင်ရွက်လျက်ရှိပါသည်။

           ၂၀၂၅ခုနှစ်၊ ဖေဖော်ဝါရီလတွင်  စားသုံးသူရေးရာဦးစီးဌာန၊ အစည်းအဝေးခန်းမ၌ လွိုင်ကော်မြို့ပေါ်ရှိ စားသုံးဆီအရောင်းဆိုင် လုပ်ငန်းရှင်( ၈ )ဦးနှင့် တွေ့ဆုံဆွေးနွေးခြင်း (၂)ကြိမ်၊ ဆန်အရောင်းဆိုင်လုပ်ငန်းရှင်( ၈ )ဦးနှင့် တွေ့ဆုံဆွေးနွေးခြင်း( ၁ )ကြိမ်၊ စုစုပေါင်း (၃)ကြိမ် ဆောင်ရွက်ခဲ့ကြောင်းနှင့် သူနာပြုနှင့်သားဖွားသင်တန်းကျောင်းသို့ စားသုံးသူကာကွယ်ရေး အသိပညာပေးဟောပြောဆွေးနွေးခြင်း၊ အသေးစားစက်မှုလက်မှုလုပ်ငန်းဦးစီးဌာန သို့ Online စနစ်ဖြင့် ရောင်းချခြင်းလုပ်ငန်းနှင့်စပ်လျဉ်း၍ အသိပညာပေး ဟောပြောဆွေးနွေး ခြင်းနှင့် ရွှေကယားသောက်ရေသန့်စက်ရုံသို့ စားသုံးသူကာကွယ်ရေး အသိပညာပေးဟော ပြောဆွေးနွေးခြင်း စုစုပေါင်း( ၃ )ကြိမ် ဆောင်ရွက်နိုင်ခဲ့ကြောင်း သိရှိရပါသည်။

DOCA(ကယား)