သတင်းနှင့် လှုပ်ရှားမှုများ

     ပဲခူးတိုင်း‌‌ဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံတာဝန်ခံ ဦးမင်းဇော်၊ မြို့နယ်တာဝန်ခံ ဦးမြင့်သူတို့နှင့်အတူ ဩဂုတ်လ ၃၀ ရက်နေ့ က Diamond Dragon Co.,Ltd က တောင်ငူမြို့ အခြေခံလူတန်းစားများရာ ရပ်ကွက်များတွင် စားသုံးဆီများအား သက်သာသောဈေးနှုန်းဖြင့် ရောင်းချနေမှုများကို ကြီးကြပ်ဆောင်ရွက်ပေးပါသည်။

     Diamond Dragon Co.,Ltd သည် စားသုံးဆီ ၅၀ ကျပ်သား တစ်ဘူးလျှင် ၃၁၀၀ ကျပ်၊ (တစ်ပိဿာလျှင် ၆၂၀၀ ကျပ်)နှုန်းဖြင့် တောင်ငူမြို့ အမှတ် ၁၈ ရပ်ကွက်၊ ငွေလှံအိုးကုန်းတွင် စားသုံးဆီပိဿာ ၆၆၀ ကိုလည်းကောင်း၊ အမှတ် ၂၂ ရပ်ကွက်၊ မင်းကြီးညိုတွင်  စားသုံးဆီပိဿာ ၆၆၀ ကိုလည်းကောင်း ရောင်းချပေးခဲ့ပါသည်။ ၎င်းကုမ္ပဏီသည် တောင်ငူခရိုင်အတွင်း အခြေခံ လူတန်းစားများသို့ စားသုံးဆီများကို သက်သာသောနှုန်းထားဖြင့် ရောင်းချပေးလျှက်ရှိရာ ဩဂုတ်လ ၃၀ ရက်နေ့အထိ ၈၉၃၂ ပိဿာကို ရောင်းချပေးပြီးဖြစ်ပါသည်။

    စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီနှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ အစီအစဉ်ဖြင့် တောင်ငူခရိုင် စားသုံးသူရေးရာဦးစီးဌာန နှင့် တောင်ငူခရိုင်မှ ဆီကုန်သည်များပူးပေါင်း၍ တရားဝင်တင်သွင်း ဖြန့်ဖြူးရောင်းချနေသည့် စားအုန်းဆီများကို ကော်မတီမှ အပတ်စဉ်ထုတ်ပြန်ကြေညာလျှက်ရှိသည့် သတ်မှတ်ရည်ညွှန်း ဈေးနှုန်းအပေါ် ဒေသအလိုက် သယ်ယူပို့ဆောင်ခ ကုန်ကျစရိတ်များ ထပ်ပေါင်း၍ အခြေခံ လူတန်းစားများသို့ ဖြစ်သင့်ဖြစ်ထိုက်သည့် ဈေးနှုန်းများဖြင့် စားသုံးဆီများရောင်းချခြင်းကို ဆောင်ရွက်လျှက်ရှိကြောင်း သိရပါသည်။

DOCA(ပဲခူး)

   ပဲခူးတိုင်း‌‌ဒေသကြီး၊ တောင်ငူမြို့နယ် အားကစားနှင့်ကာယပညာဦးစီးဌာနက ကြီးမှူးကျင်းပသည့် လူငယ်ရေး အသိပညာပေးဟောပြောပွဲကို စက်တင်ဘာ ၇ ရက်နေ့ နံနက်ပိုင်းက တောင်ငူမြို့ အမှတ်(၂)အခြေခံ ပညာအထက်တန်းကျောင်း ဖိုးကွန်းခန်းမ၌ ကျင်းပြုလုပ်ရာ စားသုံးသူရေးရာဦးစီးဌာန၊ တောင်ငူ ခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်တက်ရောက်၍ စားသုံးသူကာကွယ်ရေးဆိုင်ရာ များကို အသိပညာပေး ဟောပြောခဲ့ပါသည်။

   အခမ်းအနားတွင် စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဦးစောသန်းထိုက် ကျော်က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးနှင့်တာဝန်များ၊ စားသုံးသူနစ်နာဆုံးရှုံမှုမရှိစေရေးအတွက် စစ်ဆေးရေးအရာရှိများက ဈေးကွက်အတွင်း ကွင်းဆင်း လေ့လာစောင့်ကြည့်နေမှုများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများ ဖတ်ရှု သင့်ပုံများနှင့် စားသုံးသူနစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်ခြင်းများကို ရှင်းလင်းဟော ပြောပါသည်။

     ထို့အတူ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ခင်သူဇာဝင်း က စာဖတ်ခြင်း၏ အကျိုးကျေးဇူးနှင့် မူးယစ်ဆေးဝါး အန္တရာယ်များကို လည်းကောင်း၊ အားကစား နှင့် ကာယပညာဦးစီးဌာနမှ အားကစားမှူး ဒေါ်သူဇာထွေးက အားကစားလှုပ်ရှားခြင်း၏ အကျိုး ကျေးဇူးများကို လည်းကောင်း ဟောပြောခဲ့ကြောင်းနှင့် ဟောပြောပွဲသို့ ကျောင်းသားကျောင်းသူ ၂၅၀ ဦး တက်ရောက်ကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီးအစိုးရအဖွဲ့၏ လမ်းညွှန်ချက်အရ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးသည် အခြေခံလူတန်းစားများ ဆန်နှင့်စားသုံးဆီများ ဈေးနှုန်းသက်သာစွာ ဝယ်ယူ စားသုံးနိုင်ရန်အတွက် တောင်ငူခရိုင်အတွင်းရှိ ဆန်ကုန်သည်များ၊ ဆန်စက်လုပ်ငန်းရှင်များနှင့် ညှိနှိုင်း၍ ဆန်များကိုလည်းကောင်း၊ ဆီကုန်သည်များနှင့် ညှိနှိုင်း၍ စားသုံးဆီများကို လည်းကောင်း သက်သာသောနှုန်းထားဖြင့် ဆောင်ရွက်လျှက်ရှိပါသည်။

   ဩဂုတ်လအတွင်း တောင်ငူခရိုင်အတွင်းရှိ သက်ဆိုင်ရာမြို့နယ်များမှ ဆန်ကုန်သည်များ၊ ဆန်စက်လုပ်ငန်းရှင်များနှင့်ညှိနှိုင်း၍ တောင်ငူ၊ ရေတာရှည်၊ အုတ်တွင်း၊ ထန်းတပင်နှင့် ဖြူးမြို့နယ် များတွင် သက်သာသောဈေးနှုန်းဖြင့် ဆန်အိတ် ၃၉၈ ကိုရောင်းချပေးနိုင်ခဲ့ပါသည်။

  စားအုန်းဆီတင်သွင်းသည့် ကုမ္ပဏီများမှ စားအုန်းဆီများကို ဖြန့်ဖြူးရောင်းချခဲ့ရာ ဝယ်ယူရရှိသည့် လက်ကားကုန်သည်များအနေဖြင့် စားအုန်းဆီများကို ရန်ကုန်အထိုင်ဈေး ရည်ညွှန်း လက်ကားဈေးနှုန်းအပေါ် သယ်ယူပို့ဆောင်ခ ကုန်ကျစရိတ်များထပ်ပေါင်း၍ ၂ ရာခိုင်နှုန်း အမြတ် ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချလျှက်ရှိရာ ဩဂုတ်လ အတွင်း Six Winner Brothers, Grand Unity နှင့် First Top ကုမ္ပဏီ ၃ ခုမှ တောင်ငူခရိုင်အတွင်း အခြေခံလူတန်းစားများသို့ စားအုန်းဆီ ပိဿာ ၃၅၀၉၀ ရောင်းချနိုင်ခဲ့ပါသည်။

    ထို့အတူ Diamond Dragon Co.,Ltd သည် Yarthetpan အမှတ်တံဆိပ် အဆင့်မြင့် စားအုန်းဆီ ၉၅၉၂ ပိဿာကို ရောင်းချပေးခဲ့ပါသည်။ တောင်ငူခရိုင်ဦးစီးမှူးရုံးအနေဖြင့် ဆန်နှင့် စားသုံးဆီများကို အခြေခံလူတန်းစားများသို့ သက်သာသောဈေးနှုန်းဖြင့် ဆက်လက်ရောင်းချနိုင်ရေး သက်ဆိုင်ရာလုပ်ငန်းရှင်များနှင့် ညှိနှိုင်းဆောင်ရွက်လျှက်ရှိကြောင်း သိရပါသည်။

DOCA(ပဲခူး)

     ပဲခူးတိုင်းဒေသကြီး အနောက်နတ်တလင်းခရိုင် ဇီးကုန်းမြို့နယ်တွင် မိုးစပါး ကောက်စောစပါးများ စတင်ရိတ်သိမ်းနေမှုအား ၂၆.၈.၂၀၂၂ ရက်နေ့၌ မော်ရအုပ်စု ထန်းတပင်ကျေးရွာမှ တောင်သူဦးဟန်ကြီး စိုက်ဧက ၇ ဧက စိုက်ပျိုးထားသည့်အနက်မှ ကောက်စောစပါး GW-11 စပါးတစ်ဧက စတင်ရိတ်သိမ်းနေမှုအား စားသုံးသူရေးရာဦးစီးဌာန မြို့နယ်တာဝန်ခံမှ သွားရောက် တွေ့ဆုံမေးမြန်းခဲ့ပါသည်။

      မိုးစပါးစိုက်တောင်သူ ဦးဟန်ကြီးမှ မိုးစပါးများကို မေလ ပထမပတ်မှ စတင်၍ စပါးကြဲခင်း များ စတင်စိုက်ပျိုးခဲ့ပြီး စိုက်ခင်းမြေ စက်မောင်းခတစ်ဧကလျှင် တစ်ထပ်မောင်းခ ၃၂၀၀၀/ကျပ်နှုန်း ဖြင့် ၂ ထပ်၊ မျိုးစပါး GW-11 တစ်အိတ်လျှင် ၁၂၀၀၀/ကျပ်ဖြင့် ၂ အိတ်၊ ဓါတ်မြေသြဇာ တစ်အိတ်လျှင် ၉၀၀၀၀/ကျပ်နှုန်းဖြင့် ၂ အိတ်၊ ပိုးသတ်ဆေး၊ ပေါင်းသတ်ဆေး၊ သုံးစွဲမှု ခန့်မှန်း ကုန်ကျစရိတ် ၄၀၀၀၀/ကျပ်၊ စိုက်ပျိုးချိန်မှ ရိတ်သိမ်းချိန်အထိ လုပ်သားခ စုစုပေါင်း ၂၅၀၀၀/ကျပ်၊ တစ်ဧက ရိတ်သိမ်းခ ၆၅၀၀၀/ကျပ်၊ ယခင်နှစ် ၅၅၀၀၀/ကျပ်သာရှိခဲ့ပါသည်။ တစ်ဧက စုစုပေါင်း ကုန်ကျစရိတ်မှာ ၃၉၈၀၀၀/ကျပ် ခန့်မှန်းကုန်ကျကြောင်း သိရှိရပါသည်။ တစ်ဧကလျှင် အထွက်နှုန်း ၇၀ တင်းနှုန်းခန့်ထွက်ရှိပါသည်။ ၅၀ ပေါင်တင်း ၁၀၀ ဈေးနှုန်းမှာ ဆယ်သိန်းကျပ်ဖြင့် အစိုဓာတ် သတ်မှတ်ချက်မရှိ ကွင်းအရောက် ကုန်သည်ကြီးများ လာရောက်ဝယ်ယူလျှက်ရှိကြောင်း သိရှိရပါသည်။ တစ်ဧကဝင်ငွေမှာ ခုနှစ်သိန်းခန့်ရရှိနိုင်ပြီး တစ်ဧကအကျိုးအမြတ်မှာ သုံးသိန်းကျော်ခန့် အမြတ်ရရှိနိုင်ပါကြောင်း သိရှိရပါသည်။

DOCA(ပဲခူး)

   ဧရာဝတီတိုင်းဒေသကြီး၊ မအူပင်ခရိုင်၊ မိတ်ဖက်ဌာနများဖြစ်သော အထွေထွေအုပ်ချုပ်ရေးဦးစီးဌာန၊ ဆီကုန်သည်များအသင်း၊ ဆန်စက်ပိုင်ရှင်များအသင်း၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် မအူပင်ခရိုင် စားသုံးသူရေးရာဦးစီးဌာနနှင့် အခြားမိတ်ဖက်ဌာနများနှင့် ပူးပေါင်း၍ မအူပင်မြို့နယ် အမှတ်(၁)ရပ်ကွက်၊ အမှတ်(၂)ရပ်ကွက်များရှိ လုပ်သားပြည်သူများအား (၆.၉.၂၀၂၂) ရက်နေ့ နံနက်(၀၈း၀၀) အချိန်တွင် ကံလေးလုံးကျောင်းရှေ့၌ ဆန်၊ဆီ၊ဆား၊ကြက်ဥနှင့် ဒေသထွက်ကုန် ဟင်းသီးဟင်းရွက်များကို ဈေးနှုန်းသက်သာစွာဖြင့် ရောင်းချပေးခဲ့ပါသည်။

   အဆိုပါ အခြေခံစားသောက်ကုန်များမှာ ဆန်တစ်ပြည် ၁၅၀၀/-၊ ဆီ (၅၀)ကျပ်သား ၂၅၀၀/-၊ ကြက်ဥ (၆)လုံးလျှင် ၁၀၀၀/-၊နှင့် ဆား(၅၀)သားလျှင် ၂၀၀/-၊ ဟင်းသီးဟင်းရွက်များကိုပါ ဈေးနှုန်းချိုသာစွာဖြင့် ရောင်းချပေးခဲ့ကြောင်း သတင်းရရှိပါသည်။

DOCA (ဧရာဝတီ)