သတင်းနှင့် လှုပ်ရှားမှုများ

      စစ်ကိုင်းတိုင်း‌‌ဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း(၂)ဦးတို့သည် (၁၁.၈.၂၀၂၂)ရက်နေ့၊ နံနက်(၁၀:၀၀)နာရီတွင် မုံရွာမြို့၊ ကမ်းနားလမ်းရှိ မြသီရိဆန်၊ ဆီရောင်းဝယ်ရေးလုပ်ငန်းရှင်နှင့် တွေ့ဆုံ၍ ဆန်၊ ဆီများ၏ လက်ရှိဖြစ်ပေါ်နေသော ဈေးနှုန်းများအခြေအနေ၊ ရောင်းဝယ်ဖောက်ကားမှုနှင့် ဈေးကွက်တွင် ကြုံတွေ့နေရသော အခက်အခဲများအား တွေ့ဆုံဆွေးနွေးမေးမြန်းခြင်းဆောင်ရွက်ခဲ့ပါသည်။ မြသီရိ ဆန်၊ ဆီရောင်း ဝယ်ရေးလုပ်ငန်းပိုင်ရှင်ဦး‌‌ငွေမိုးက ယခုရက်များတွင် ဆန်ဈေးအနည်းငယ်မြင့်တက်လာကြောင်း၊ ရွှေဘိုပေါ်ဆန်း(၁)အိတ်လျှင် (၇၅၀၀၀)ကျပ်၊ ဧရာမင်းဆန်(၁)အိတ်လျှင်(၅၅၀၀၀)ကျပ်ဖြစ်ပြီး ယခင်အပတ်နှင့် နှိုင်းယှဉ်ပါက (၅၀၀၀)ကျပ်ခန့် ဈေးအနည်းငယ်တက်လာကြောင်း၊ စားသုံးဆီ ဈေးနှုန်းများအနေဖြင့် ပဲဆီ(၁)ပိဿာလျှင် (၁၂၀၀၀)ကျပ်၊ နှမ်းဆီ(၁)ပိဿာလျှင် (၉၀၀၀)ကျပ်၊ နေကြာဆီ(၁)ပိဿာလျှင် (၉၀၀၀)ကျပ်နှင့် စားအုန်းဆီ(၁)ပိဿာလျှင် (၉၀၀၀)ကျပ် နှုန်းရောင်းချကြောင်း၊ ဩဂုတ်လဆန်းပိုင်းက ကုမ္ပဏီများထံမှ ရည်ညွှန်းဈေး (၅၁၀၀)ကျပ်ဖြင့် ဝယ်ခွင့်ရခဲ့သော စားအုန်းဆီများအား (၁)ပိဿာလျှင်(၅၅၀၀)ကျပ်ဖြင့် ခရိုင်ဆီအသင်းဦးဆောင်မှုဖြင့် ရောင်းချရန် အစီအစဉ်ရှိပါကြောင်း၊ ရောင်းချမည့်ရက်ကိုလည်း ကွင်းဆင်းစိစစ်ပေးနိုင်ရန်အတွက် စားသုံးသူရေးရာဌာနသို့ တင်ပြဆောင်ရွက်သွားမည်ဖြစ်ပါကြောင်း၊ အခက်အခဲများအနေဖြင့် စားအုန်းဆီများ ဝယ်ယူရာတွင် ခက်ခဲသည့်အတွက် တစ်ခါတစ်ရံ ပြင်ပပေါက်ဈေးဖြင့် ဝယ်ယူရောင်းချရပြီး ဈေးအနည်းငယ်တက်ရကြောင်း၊ စားအုန်းဆီများ ရည်ညွှန်းဈေးဖြင့် ဝယ်ယူရရှိနိုင်ရေး ကူညီဆောင်ရွက်ပေးစေလိုကြောင်း ဆွေးနွေးပြောကြားခဲ့ပါ သည်။

      ထို့နောက် ခရိုင်ဦးစီးမှူးက ကုန်ပစ္စည်းများကို ဈေးကစားရန်ရည်ရွယ်၍ သိုလှောင်ထား၍ မရကြောင်း၊ စားအုန်းဆီများကိုလည်း ကြီးကြပ်ရေးကော်မတီက အပတ်စဉ်ထုတ်ပြန်ကြောညာ လျက်ရှိသော သတ်မှတ်ရည်ညွှန်းဈေးအပေါ် ဒေသအလိုက်သယ်ယူပို့ဆောင်ခ ကုန်ကျစရိတ်များ ထပ်ပေါင်း၍ (၂)ရာခိုင်နှုန်း အမြတ်ထက်မပိုသောဈေးများဖြင့်သာ ရောင်းချသင့်ကြောင်း၊ စားအုန်းဆီ ရည်ညွှန်းဈေးနှုန်းများဖြင့် စဉ်ဆက်မပြတ်ဝယ်ယူရရှိနိုင်ရေးအတွက် မိမိတို့ဌာနကလည်း မြန်မာနိုင်ငံ ဆီကုန်သည်များ၊ ဆီလုပ်ငန်းရှင်များအသင်းနှင့် ချိတ်ဆက်ဆောင်ရွက်လျက်ရှိပါကြောင်း ဆွေးနွေး ပြောကြားခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။

DOCA(စစ်ကိုင်း)                                                                 

      စစ်ကိုင်းတိုင်းဒေသကြီး မိုးနှောင်းရာသီ စိုက်ပျိုးရေးနှင့် မွေးမြူရေးထုတ်ကုန်များတိုးမြှင့်ရေး လုပ်ငန်းညှိနှိုင်းအစည်းအဝေးကို ၂၀၂၂ခုနှစ် စက်တင်ဘာလ(၆)ရက်နေ့၌ တိုင်းဒေသကြီးစိုက်ပျိုးရေး ဦးစီးဌာနရုံးတွင်ကျင်းပရာ တိုင်းဒေသကြီးဝန်ကြီးချုပ် ဦးမြတ်ကျော်က စစ်ကိုင်းတိုင်းဒေသကြီး သည် စိုက်ပျိုးရေးအားဖြင့် အရေးပါသည့်တိုင်းဒေသကြီး တစ်ခုဖြစ်ပြီးသည့်အတွက် ဒေသတွင်း ဆန်ဖူလုံမှုမှာ ၂၁၂.၇၉ ရာခိုင်နှုန်း၊ စားသုံးဆီဖူလုံမှုမှာ ၅၀၄.၃၄ ရာခိုင်နှုန်းနှင့် ပဲမျိုးစုံဖူလုံမှုမှာ ၉၆၄.၃၀ ရာခိုင်နှုန်း ရှိသည့်အတွက် တိုင်းဒေသကြီးစီးပွားရေးရဲ့ ၃၀ ရာခိုင်နှုန်းကျော်သည် စိုက်ပျိုးရေးအပေါ် မှီခိုနေပါကြောင်း၊ လယ်ယာစိုက်ပျိုးရေးကဏ္ဍအနေနဲ့ စစ်ကိုင်းတိုင်း ဒေသကြီးမှာ စုစုပေါင်းမြေရိယာ ၂၃၁ သိန်းကျော် ရှိသည့်အနက် အသားတင်စိုက်ပျိုးမြေ ၄၅.၆ သိန်းကျော်ရှိပြီး သီးထပ်၊ သီးညှပ် ဧကသိန်း ၉၀ ခန့် စိုက်ပျိုးလျက်ရှိပါကြောင်း၊ အဟာရပြည့်ဝပြီး ဈေးနှုန်းချိုသာသည့် စိုက်ပျိုးရေးနှင့် မွေးမြူရေး ထုတ်ကုန်များအား ပြည်သူများပေါများစွာ စားသုံးနိုင်ကြရန်အတွက် ဘက်စုံကဏ္ဍစုံမှ ကြိုးပမ်းဆောင်ရွက်ပေးသွားမှာဖြစ်ပါကြောင်း၊ စိုက်ပျိုးရေး၊ မွေးမြူရေးနှင့် လယ်ယာကဏ္ဍကို အခြေခံသည့်ကုန်ထုတ်လုပ်ငန်းများ ဖွံ့ဖြိုးတိုး တက်စေရေး ဆက်စပ်ဌာနများ၊ ပုဂ္ဂလိကလုပ်ငန်းရှင်များ၊ တောင်သူများနှင့် လုပ်ငန်းစဉ် ကွင်းဆက်တစ်လျောက်တွင် ပါဝင်သူများအားလုံးပူးပေါင်း၍ စံချိန်စံညွှန်း ပြည့်မီသည့် အရည်အသွေးကောင်း ထုတ်ကုန်များထုတ်လုပ်နိုင်ရေး ကြိုးစားဆောင်ရွက်ပြီး ရေရှည် တည်တံ့သော စီးပွားဖြစ်စိုက်ပျိုးမွေးမြူရေး လုပ်ငန်းများပေါ်ထွန်းလာစေရေး ကြိုးပမ်းရန် လိုအပ်ပြီး တိုင်းဒေသကြီး အစိုးရအဖွဲ့အနေဖြင့် လိုအပ်သည်များကို ကူညီဖြည့်ဆည်း ဆောင်ရွက် ပေးသွားမည် ဖြစ်ပါကြောင်း ပြောကြားခဲ့သည်။

     ဆက်လက်၍ တက်ရောက်ကြသော တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး စိုက်ပျိုးရေး၊ မွေးမြူရေးကြီးကြပ်မှု ကော်မတီအဖွဲ့ဝင်များ၊ မွေးမြူရေးလုပ်ငန်းရှင်များ၊ ကုန်သည် စက်မှုလုပ်ငန်းရှင်များက စိုက်ပျိုးရေး၊ မွေးမြူရေးနှင့် လယ်ယာကဏ္ဍကို အခြေခံသည့် ကုန်ထုတ် လုပ်ငန်းများ ဖွံ့ဖြိုးတိုးတက်စေရေး ဆောင်ရွက်ထားရှိမှုများနှင့် အစီအမံများ၊ ဆက်လက် ဆောင်ရွက်လိုသည့် လုပ်ငန်းများကို ဆွေးနွေးခဲ့ကြပါသည်။ အဆိုပါဆွေးနွေးပွဲတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးကျော်ကျော်လွင်က စိုက်ပျိုးရေးနှင့် ဒေသထုတ်ကုန်များ ထုတ်လုပ်ပိုလျှံမှုဈေးကွက်လက်ကျန်၊ ကုန်သွယ်နိုင်မှုအခြေအနေ၊ လက်ရှိဈေးနှုန်းနှင့် ဈေးကွက်အလားအလာများအားဆွေးနွေးပါသည်။ မြန်မာကုန်သွယ်မြှင့်တင်ရေးအဖွဲ့၊ တိုင်းဒေသကြီးတာဝန်ခံ ဒေါ်နှင်းပန်းဖြူက လယ်ယာထွက် ကုန်များ ဈေးကွက်ရရှိရေး ဆောင်ရွက်ပေးမည့်အစီအစဉ်များ၊ ပြည်ပကုန်သွယ်ဖက်နိုင်ငံများနှင့် ကုန်သွယ်ချိတ်ဆက်မှုများကို ဆွေးနွေးပါသည်။ ထို့နောက် တိုင်းဒေသကြီးအစိုးရအဖွဲ့က ဆွေးနွေးတင်ပြချက်များအပေါ် ညှိနှိုင်းပေါင်းစပ်၍ လိုအပ်သည်များကို ကူညီဖြည့်ဆည်းပေးခဲ့ကြောင်း သိရှိရပါသည်။

DOCA(စစ်ကိုင်း)                 

       ရခိုင်ပြည်နယ်၊ စားသုံးသူရေးရာဦးစီးဌာန၊ အမ်းမြို့နယ်တာဝန်ခံ ဦးအောင်မင်းခိုင်၊ ဒုဦးစီးမှူးနှင့် ဝန်ထမ်းများသည် (၅-၉-၂၀၂၂)နေ့ နံနက် (၁၀:၀၀)နာရီခန့်အချိန်တွင် အမ်းမြို့နယ် အမှတ် (၃)ရပ်ကွက်ရှိ “ဘကြီးအောင်” ဆားစက်ရုံသို့ သွားရောက်၍ ဆားထုတ်လုပ်နေမှုအခြေအနေများအား ကွင်းဆင်းလေ့လာခြင်းနှင့် ဈေးကွက်စောင့် ကြည့်စစ်ဆေးခြင်းဆောင်ရွက်ခဲ့ပါသည်။

     ဦးအောင်မင်းခိုင်နှင့်ဝန်ထမ်းများ ကွင်းဆင်းလေ့လာချက်အရ “ဘကြီးအောင်”ဆားစက်သည် အိုင်အိုဒင်းဆားတစ်မျိုးတည်းသာထုတ်လုပ်ပြီး (၅၀)ကျပ်သားဝင် ပလတ်စတစ်အိတ်များဖြင့် သေသပ်စွာထုပ်ပိုး၍ “လွင်”အမှတ်တံဆိပ်ဖြင့် တစ်နေ့ ဆား (၄၈၀)ပိဿာခန့်အား (၃၀)ပိဿာဝင် အိတ်များဖြင့်ထည့်ကာ ဒေသတွင်းဖြန့်ဖြူးရောင်းချနေခြင်း၊ ဆား (၅၀)ကျပ်သား တစ်ထုပ်လျှင် စက်ရုံဈေး (၃၀၀)ကျပ်ဖြင့် ဖြန့်ဖြူးရောင်းချနေခြင်း၊ ထုပ်ပိုးသည့် ပလတ်စတစ်အိတ်ပေါ်တွင်ဖော်ပြထား သည့်ကုန်အညွှန်းအမှတ်အသားများအား ကုန်ပစ္စည်းအမျိုးအမည်၊ အသားတင်ပမာဏ၊ ထားသို သိမ်းဆည်းမှု၊ သုံးစွဲပုံနည်းလမ်းများအားလည်း မြန်မာဘာသာဖြင့် ဖော်ပြထားရှိကြောင်းစိစစ် တွေ့ရှိရပါ သည်။

    ဦးအောင်မင်းခိုင်၊ ဒုဦးစီးမှူးမှ ၂၀၁၉ စားသုံးသူကာကွယ်ရေးဥပဒေပြဌာန်းချက်၊ ကုန်ပစ္စည်း အမျိုးအစားအလိုက် ဖော်ပြရမည့်ကုန်အညွှန်းအမှတ်အသားများနှင့်ပတ်သက်၍ ရှင်းလင်းပြောကြား ခြင်း၊ စက်ရုံဝန်းကျင်သန့်ရှင်းမှုရှိစေရေးနှင့်ကောင်းမွန်သောထုတ်လုပ်မှုကျင့်စဉ်နှင့်အညီ ထုတ်လုပ်ရေး အသိပညာ‌ပေးပြောကြား ခြင်းဆောင်ရွက်ခဲ့ပါကြောင်း သတင်းရရှိပါ သည်။

DOCA(ရခိုင်)

     မွန်ပြည်နယ်၊ စားသုံးသူရေးရာဦးစီးဌာန၊ ပေါင်မြို့နယ်တာဝန်ခံသည် ပေါင်မြို့နယ် ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ လူကုန်ကူးမှုတိုက်ဖျက်ရေး (မော်လမြိုင်)၊ မြို့နယ်ကြက်ခြေနီအသင်းတို့နှင့် ပူးပေါင်း၍ ၆.၉.၂၀၂၂ ရက်နေ့တွင် ပေါင်မြို့နယ်၊ အထက (မင်းတန်း) ကျောင်းတွင် ကျင်းပပြုလုပ်သည့် လူကုန်ကူးမှုတိုက်ဖျက်ရေးအထိမ်းအမှတ်ဟောပြောပွဲ၌ စားသုံးသူကာကွယ်ရေးဆိုင်ရာ အသိပညာပေးခြင်းကို ဟောပြောဆွေးနွေးခဲ့ပါသည်။

      အဆိုပါ ဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်တင်ဇာစိုးက စာဖတ်ရှိန်မြှင့်တင်ရေးအသိပညာပေးခြင်းခေါင်းစဉ်ဖြင့်လည်းကောင်း၊ လူကုန်ကူးမှု တိုက်ဖျက်ရေး (မော်လမြိုင်)မှ ရဲအုပ်စိုးကျော်က လူကုန်ကူးမှုတားဆီးကာကွယ်ရေးအသိပညာပေးခြင်း ခေါင်းစဉ်ဖြင့်လည်းကောင်း၊ မြို့နယ်ကြက်ခြေနီအသင်း ဥက္ကဌ ဦးအောင်မင်းနိုင်က ရှေးဦးသူနာပြုစုနည်းနှင့် ကြက်ခြေနီအသင်းအကြောင်း သိကောင်းစရာခေါင်းစဉ်ဖြင့်လည်းကောင်း၊ စားသုံးသူရေးရာဦးစီးဌာန၊ ပေါင်မြို့နယ်တာဝန်ခံ ဦးနေဇင်သက်က စားသုံးသူကာကွယ်ရေး အသိပညာပေးခြင်း ခေါင်းစဉ်ဖြင့်လည်းကောင်း ဟောပြောဆွေးနွေးခဲ့ကြောင်း သိရှိရပါသည်။

     အဆိုပါ ဟောပြောပွဲနှင့် ပြပွဲ/ပြိုင်ပွဲ များသို့ ဆရာ/ဆရာမများ၊ ကျောင်းသား/ကျောင်းသူ၊ စုစုပေါင်း (၃၂၅) ဦး တက်ရောက်ခဲ့ပြီး လူကုန်ကူးမှုနှင့်ပတ်သက်သော လက်ကမ်းစာစောင်များ၊ စားသုံးသူကာကွယ်ရေးနှင့်ပတ်သက်သော လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိပါသည်။

DOCA(မွန်)

      မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ စက်တင်ဘာ ၇ ရက်၊ နေ့လယ် (၁၃:၀၀) နာရီတွင် ကုန်သွယ်လယ်ယာဝန်ထမ်းဟောင်းများနှင့် စားသုံးသူရေးရာဦးစီးဌာနမှဝန်ထမ်း များလူမှုကူညီရေးအဖွဲ့ (၂/၂၀၂၂) အစည်းအဝေးကို ကျင်းပပြုလုပ်ခဲ့သည်။

   အစည်းအဝေးတွင် ကုန်သွယ်လယ်ယာဝန်ထမ်းဟောင်းများနှင့် စားသုံးသူရေးရာဦးစီးဌာနမှ ဝန်ထမ်းများလူမှုကူညီရေးအဖွဲ့ ဥက္ကဌ ဦးဖေသိန်းမှ အဖွင့်အမှာစကားပြောကြားပြီး ဘဏ္ဍာရေးမှူးဖြစ်သော ပြည်နယ်ဦးစီးမှူး ဦးဝင်းထွန်းမှ ရန်ပုံငွေအခြေအနေများကို တင်ပြဆွေးနွေးခဲ့ပါသည်။ ဆက်လက်၍ တက်ရောက်လာသူများမှ အဖွဲ့၏ရှေ့လုပ်ငန်းစဉ်များကို ဆွေးနွေးရာတွင် ယခုလက်ရှိအချိန်တွင် ကုန်ဈေးနှုန်းများအဆမတန်မြင့်တက်နေသည့်အတွက် ယခင်ကနာရေးအတွက် (၁၀၀၀၀၀) ကျပ် ထောက်ပံ့ပေးခြင်းအစား ယခုနောက်ပိုင်းတွင်နာရေးအတွက် (၂၀၀၀၀၀) ကျပ် ထောက်ပံ့ပေးရန်၊ ယခင်အစည်းအဝေးကို (၄) လတစ်ကြိမ်ကျင်းပရာမှ ယခု (၆) လ တစ်ကြိမ်၊ (၁) နှစ်လျှင် (၂) ကြိမ် ကျင်းပပြုလုပ်ဆောင်ရွက်ရန်၊ ဝန်ထမ်းဟောင်းများအစည်းအဝေးသို့ တက်ရောက်သည့်အခါ အဆင်ပြေစေရန် ကြိုပို့ယာဉ်အားအသင်းမှစီစဉ်ပေးနိုင်ရန်၊ မြို့နယ်များတွင် အသင်းဝင်ရန် ကျန်ရှိနေသော ဝန်ထမ်းဟောင်းများမှ အသင်းဝင်ရောက်နိုင်ရေးအတွက် ကော်မတီမှ စည်းရုံးရေးအဖွဲ့ဝင်များနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ဖြင့် ပူးပေါင်းဆောင်ရွက် ပေးရန်၊ ရန်ပုံငွေထည့်ဝင်မှုအား Kpay ဖြင့် ပေးသွင်းနိုင်ရေးနှင့် ဝန်ထမ်းဟောင်းများ တစ်ဦးနှင့်တစ်ဦးအဆက်အသွယ်ရှိစေရန် Messenger Group ဖြင့်ဆောင်ရွက်ပေးသွားရန် စသည့် အကြောင်းအရာများအား ဆွေးနွေးခဲ့ကြသည်။

     အဆိုပါ အစည်းအဝေးသို့ ကုန်သွယ်လယ်ယာဝန်ထမ်းဟောင်းများနှင့် စားသုံးသူရေးရာဦးစီးဌာနမှ ဝန်ထမ်းများ စုစုပေါင်း (၂၈) ယောက် တက်ရောက်ခဲ့ပြီး အစည်းအဝေးအား (၁၄:၀၀) နာရီတွင် ရုပ်သိမ်းခဲ့ကြောင်း သိရှိရပါသည်။

DOCA(မွန်)