သတင်းနှင့် လှုပ်ရှားမှုများ

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆေးဆိုင်များတွင် ရောင်းချလျက်ရှိသော တိုင်းရင်းဆေးအမျိုးမျိုးတို့တွင် ကုန်အညွှန်းအမှတ်အသားဖော်ပြခြင်းဆိုင်ရာ ပြည့်စုံစွာ ဖော်ပြပါရှိခြင်းရှိ/မရှိကို ဩဂုတ်လ ၁၂ ရက်နေ့၊နံနက်(၁၀:၀၀) နာရီခွဲအချိန်တွင် ပူးပေါင်းအဖွဲ့ဖြင့် ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရသည်။

    ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင်မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံ၊ မြို့နယ်ကျန်းမာရေးဦးစီးဌာနမှ တာဝန်ရှိသူများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ရန်ကုန်တောင်ပိုင်းခရိုင်၊ စားသုံးသူရေးရာဦးစီးမှူးရုံး၏ ညွှန်ကြားချက်အရ စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှု ရှိစေရေးတို့အတွက် ကော့မှူးမြို့နယ် စည်ပင်သာယာမြို့မဈေးအတွင်း/အပြင်ရှိ ဆေးဆိုင်များတွင် ဖြန့်ဖြူးရောင်းချလျက်ရှိသော တိုင်းရင်းဆေးဝါးများတွင် မြန်မာနိုင်ငံ တိုင်းရင်းဆေးဝါးဦးစီးဌာနမှ ခွင့်ပြုချက်မှတ်ပုံတင်အမှတ်နှင့် စားသုံးသူရေးရာဦးစီးဌာနမှ သတ်မှတ်ထားသော ကုန်အညွှန်းအမှတ်အသားဖော်ပြခြင်းဆိုင်ရာ ကုန်စည်(င)ဆေးဝါးနှင့် ဖြည့်စွက်အစာများဖြစ်သော တိုင်းရင်းဆေးအမျိုးမျိုးတို့တွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဘေးထွက်ဆိုးကျိုး၊ ကြိုတင်သတိပေးချက်တို့အား ပြည့်စုံစွာ ဖော်ပြထားခြင်းရှိ/မရှိ ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)

     ရန်ကုန်တိုင်းဒေသကြီး၊ တွံတေးခရိုင် ကော့မှူးမြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူးရုံးခန်းမ၌ ဩဂုတ်လ ၂၀ ရက်နေ့၊နံနက် (၁၀:၀၀)နာရီခွဲအချိန်တွင် စားအုန်းဆီဖြန့်ဖြူးခြင်းလုပ်ငန်းများနှင့် ပတ်သက်၍ လုပ်ငန်းညှိနှိုင်းအစည်းအဝေး ကျင်းပခဲ့ကြောင်း သိရသည်။

     အဆိုပါ လုပ်ငန်းညှိနှိုင်းအစည်းအဝေးတွင် ကော့မှူးမြို့နယ်စီမံအုပ်ချုပ်ရေးအဖွဲ့၊ ဥက္ကဌက ကော့မှူးမြို့နယ်အတွင်းရှိ လူဦးရေ စုစုပေါင်း ၁၃၅၀၉၂ ဦးအား စားအုန်းဆီ လူတစ်ဦး တစ်ရက်စာနှုန်းအား ၂.၂၅ ကျပ်သားဖြင့် တွက်ချက်၍ တစ်မြို့နယ်လုံးအတိုင်းအတာအနေဖြင့် စားအုန်းဆီခွဲတမ်းများကို ယခုအချိန်တွင် ပြည့်မီအောင်ရရှိထားပြီး ဖြစ်သလို ကော့မှူးမြို့နယ် တွင် လက်လီ/လက်ကား ထုတ်ယူဖြန့်ဖြူးရောင်းချခွင့်ရရှိထားသည့် အီကိုဟာမိုနီနှင့် ဇမ္ဗူကံထွန်းကုမ္ပဏီများမှ စားအုန်းဆီကိုယ်စားလှယ် ဦးသိန်းထွဋ်၊ ဒေါ်ခင်ပြုံးဝေ၊ ဦးဇော်လတ်စိုး (ကိုယ်စား) ဒေါ်ဥမ္မာမျိုး တို့အနေဖြင့် ကော့မှူးမြို့နယ်အတွင်း စားအုန်းဆီ သယ်ယူ/ဖြန့်ဖြူး ရောင်းချပေးနေသည့် ဆီကိုယ်စားလှယ်စာရင်းနှင့် တစ်ပတ်စာရရှိသည့် ဆီပေပါစာရင်း ဖြန့်ဖြူး ရောင်းချပေးနေသည့် လူဦးရေတို့အား စနစ်တကျ မှတ်တမ်းထားရှိရန်နှင့် စားအုန်းဆီ ကိုယ်စားလှယ်များအနေဖြင့် ရရှိသည့် တစ်ပတ်စာ စားအုန်းဆီခွဲတမ်းများအား လက်ကျန်မထားဘဲ စားသုံးသူပြည်သူများသို့ ဖြန့်ဖြူးရောင်းချပေးကြရန်တို့အား ဆွေးနွေးပြောကြားခဲ့ပြီး ရန်ကုန်တိုင်းဒေသကြီး တွံတေးခရိုင်စီမံအုပ်ချုပ်ရေးအဖွဲ့၊ အဖွဲ့ဝင်(၁)က ကော့မှူးမြို့နယ်တွင် စားအုန်းဆီ ခွဲတမ်းများအား စားသုံးသူပြည်သူများအတွက် အပြည့်အဝခွဲတမ်းများ လုံလောက် အောင်ရရှိထားသော်လည်း စားအုန်းဆီဝယ်ယူရရှိမှု အခက်အခဲများရှိနေကြောင်း ကျေးရွာအချို့မှ အုပ်ချုပ်ရေးမှူးများ၏ တင်ပြလာမှုများ ရှိလာသဖြင့် စားအုန်းဆီကိုယ်စားလှယ်များအနေဖြင့် ရပ်ကွက်ကျေးရွာများရှိ လူဦးရေ စုစုပေါင်းအား လူတစ်ဦး ၂.၂၅ ကျပ်သားဖြင့် ဆီခွဲတမ်းအား တွက်ချက်၍ ရပ်ကွက်၊ ကျေးရွာအုပ်စုများရှိ နေ့စဉ် စားသုံးဆီဖြန့်ဖြူး ရောင်းချပေးသည့် ဆီကိုယ်စားလှယ်(သို့မဟုတ်) ကုန်ခြောက်ဆိုင်တို့ကို စားအုန်းဆီ သက်မှတ်ခွဲတမ်းများအား ဖြန့်ဖြူးရောင်းချပေးကြရန် ပြောကြားခဲ့ကြောင်း သိရသည်။

DOCA(ရန်ကုန်)

     ၂၃.၈.၂၀၂၄ ရက်နေ့တွင် ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ် တာဝန်ခံရုံးမှ ဝန်ထမ်းများသည် ဘီးလင်းမြို့နယ် နှင်းပုလဲကျေးရွာရှိ အ.မ.ကနှင်းပုလဲ (မြောက်) အခြေခံပညာမူလတန်းကျောင်းတွင် စားသုံးသူကာကွယ်ရေး အသိပညာပေး ဟောပြောဆွေးနွေးပွဲ ကျင်းပခဲ့ပြုလုပ်ခဲ့သည်။

   အဆိုပါ ဟောပြောဆွေးနွးပွဲတွင် ကျောင်းအုပ်ဆရာမကြီး ဒေါ်လှိုင်လှိုင်အေးမှ အဖွင့်အမှာစကားပြောကြား၍ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ် တာဝန်ခံရုံးမှ မြို့နယ်တာဝန်ခံ ဒေါ်ဇင်ဖြူဝင်း(ဦးစီးမှူး)က စားသုံးသူရေးရာဦးစီးဌာန၏ ရည်မှန်းချက်၊ မျှော်မှန်းချက်များ၊ စားသုံးသူအကာအကွယ်ပေးရေး ဥပဒေပါ ပြဌာန်းချက်များ ဖြစ်သည့် ကုန်ညွှန်းအမှတ်အသား ပြည့်စုံမှသာလျှင် စိတ်ချယုံကြည်စွာ ကုန်စည်နှင့် ဝန်ဆောင်မှုများအား ရွေးချယ်ဝယ်ယူသုံးစွဲတတ်စေရန် သတိပြုရမည့် အချက်များကို ဟောပြောဆွေးနွေးပြီးနောက် သထုံခရိုင်စားသုံးသူရေးရာဦးစီးဌာန၊ သထုံခရိုင်ဦးစီးမှူးရုံး၊ ဒုတိယဦးစီးမှူး ဦးစည်သူက စားသုံးသူတိုင်းရယူခွင့်ရှိသော စားသုံးသူအခွင့်အရေး(၈)ချက်၊ လိုက်နာရမည့်တာဝန် (၄) ရပ်တို့ကိုဟောပြောဆွေးနွေး၍ စားသုံးသူများ နစ်နာဆုံးရှုံးမှုများ ဖြစ်ပေါ်လာပါက ဖြေရှင်းဆောင်ရွက်နိုင်မှု နည်းလမ်းများကိုလည်း ဟောပြောဆွေးနွေး ခဲ့သည်။ အဆိုပါ အသိပညာပေးဟောပြောပွဲသို့ ကျောင်းအုပ်ဆရာမကြီး ဒေါ်လှိုင်လှိုင်အေးနှင့် ဆရာ/ဆရာမ (၆) ဦး၊ ကျောင်းသား/ ကျောင်းသူ (၇၈) ဦးတို့တက်ရောက်၍ ဌာနမှ လက်ကမ်းစာစောင်များ ဖြန့်ဝေ​ပေးအပ်ခဲ့ကြောင်း သိရှိရပါသည်။

DOCA(မွန်)

    ဧရာဝတီတိုင်းဒေသကြီး၊ မအူပင်ခရိုင် ကျုံစုတ်ကျေးရွာ လှေဆိပ်တွင် လှေထိုးစပါး စိုက်ပျိုးထွက်ရှိနေသဖြင့် မအူပင်ခရိုင်၊ စားသုံးသူရေးရာဦးစီးဌာနမှ၊ ခရိုင်ဦးစီးမှူး၊ ဒုခရိုင်ဦးစီးမှူးနှင့် ဝန်ထမ်းများသည် (၂၅.၈.၂၀၂၄)ရက်နေ့၊ နံနက်(၀၉:၃၀)နာရီအချိန်က သွားရောက်ကွင်းဆင်းလေ့လာခဲ့ကြသည်။

     ကွင်းဆင်းလေ့လာရာတွင် လှေထိုးစပါးကို မအူပင်မြို့နယ် ကျုံစုပ်၊ ကညင်ဝ၊ ကနူး၊ ပဲခိုစု၊ အလန်းကြီးစသည့် ကျေးရွာများမှ တောင်သူလယ်သမားများသည် မေလဆန်းပိုင်တွင် စတင်စိုက်ပျိုးကြပြီး စိုက်ပျိုးသော စပါးမျိုးများမှာ GW-11၊ ဆင်းသုခ၊ မင်းဧရာ၊ ရက် ၉၀၊ 912နှင့် စဖိုသာ စပါးမျိုးများ စိုက်ပျိုးကြောင်း လေ့လာသိရှိရသည်။ မိုးတွင်းကာလ ရေတောထဲတွင်ရိတ်သိမ်းရသောကြောင့် လှေထိုးစပါးဟုခေါ်တွင်ပြီး လှေထိုးစပါးများ ဇူလိုင်လဆန်းပိုင်းတွင် စတင်စိုက်ပျိုးပြီး ဇူလိုင်လလယ်လောက်တွင် တစ်နေ့လျှင် စပါးတင်း၅၀၀၀ ခန့် ထွက်ပေါ်ရောင်းချနေရကြောင်း၊ ဩဂုတ်လနှင့် စက်တင်ဘာ ယခုရက်ပိုင်းတွင် တစ်နေ့လျှင် စပါးတင်း (၁၀၀၀၀)ခန့် ထွက်ရှိရောင်းချနေကြောင်း၊ ဈေးကွက်အနေဖြင့် မအူပင်မှ စက်ပိုင်များသာမက ပုသိမ်၊ ညောင်တုန်း၊ ဓနုဖြူ၊ ရေကြည်၊နှင့် ကျိုတ်လတ်မြို့နယ်များရှိ ဆန်စက်ပိုင်ရှင်များမှ လာရောက်ဝယ်ယူလျက်ရှိကြောင်း သိရှိရပါသည်။

     ၂၅.၈.၂၀၂၄ နေ့တွင် လှေထိုး၊ စပါးတင်း(၁၀၀)လျှင် (၁၂၅၀၀၀၀) တစ်ဆယ့်နှစ်သိန်း ငါးသောင်းခန့်ဖြင့် အရောင်းအဝယ်ဖြစ်နေပြီး ရက်(၉၀)စပါးးတင်း (၁၀၀)လျှင် (၁၃)သိန်းဖြင့် အရောင်းအဝယ် တွင်ကျယ်လျက်ရှိ ကြောင်း ပွဲစား ဦးစိုးနိုင်ထံမှ သိရှိရပါသည်၊

DOCA(ဧရာဝတီ)

     ဧရာဝတီတိုင်းဒေသကြီး၊ ဖျာပုံခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး ဦးထွေးသိမ်းနှင့် မြို့နယ်တာဝန်ခံ ဦးမင်းဇော်တို့သည် အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ ၂၀၂၄ ခုနှစ်၊ ဩဂုတ်လ (၂၃) ရက်နေ့၊ နံနက် (၁၁:၀၀) နာရီအချိန်တွင် ဖျာပုံမြို့၊ ချောင်းတွင်းကျေးရွာရှိ “ဓနဝတီ”ဆန်စက်နှင့် “ဓနဧရာ” ဆန်စက်များသို့ ထုတ်ကုန်လုံခြုံစိတ်ချရမှုရှိစေရေးနှင့် MSMEs လုပ်ငန်းများ ဖွံ့ဖြိုးတိုးတက်ရေး ကွင်းဆင်းစစ်ဆေးခဲ့ကြပါသည်။

     ထိုသို့ ကွင်းဆင်းစစ်ဆေးရာတွင် ခရိုင်ဦးစီးမှူး ဦးထွေးသိမ်းက ဆန်စပါး ဈေးနှုန်းဈေးကွက် အခြေအနေများ တည်ငြိမ်မှု ရှိ/မရှိ ၊ ထုတ်ကုန်လုံခြုံစိတ်ချရမှုရှိစေရေးနှင့် MSMEs လုပ်ငန်းများ ဖွံ့ဖြိုးတိုးတက်ရေးအတွက် ခေတ်မီ စက်ကိရိယာများ တပ်ဆင်ထားရှိမှု အခြေအနေ၊ ဆန်စက်လည်ပတ်ရာမှ ထွက်ရှိလာသော စွန့်ပစ်ပစ္စည်းများ စနစ်တကျ စွန့်ပစ်ထားရှိမှု အခြေအနေတို့ကို ကွင်းဆင်းစစ်ဆေးခဲ့ကြပြီး ခေတ်မီစက်ကြီးများနှင့် လည်ပတ်ရခြင်းကြောင့် ထုတ်ကုန်များ ပိုမိုထုတ်လုပ်နိုင်ပြီး အလုပ်သမားမိသားစုဝင်များ၏ စားဝတ်နေရေး အဆင်ပြေနိုင်မည်ဖြစ်ကြောင်း ကွင်းဆင်းစစ်ဆေးခဲ့မှုအပေါ်  သတင်းရရှိပါသည်။

DOCA(ဧရာဝတီ)