ပြည်တွင်းကုန်သွယ်မှုသတင်း

   နတ်တလင်းခရိုင်၊ ပေါင်းတည်မြို့နယ်အတွင်းသို့ ဖရဲသီးများလှိုင်လှိုင်ဝင်ရောက်လျက်ရှိပြီး ဖရဲသီးကို လူတိုင်းနီးပါး ကြိုက်နှစ်သက် သည့်အတွက် နေရာဒေသအလိုက် အရာင်းအဝယ်ဖြစ် လျက်ရှိပါသည်။ ဆောင်းအကုန် နွေအကူးတွင် ဖရဲသီးများ ထွက်ရှိပြီးရေဓာတ် ဖြည့်တင်းပေးသည့် အသီးဖြစ်သည့် အတွက် နွေရာသီရာသီနှင့် လိုက်ဖက်သည့် အသီးတစ်မျိုးလည်း   ဖြစ်ပါသည်။ အလှူပွဲများတွင်လည်း ဖရဲသီးကိုအချိုပွဲအဖြစ် တည်ခင်းကျွေးမွေးကြပါသည်။      

   ပေါင်းတည် မြို့နယ် အတွင်း ရောင်းချလျက်ရှိသည့် ကျောက်စိမ်းဖရဲနှင့် ဖရဲကြားသီးများကို ရွှေတောင်မြို့နယ်နှင့် ထုံးဘိုမြို့နယ် တို့မှ ဝယ်ယူရောင်းချကြောင်းသိရပြီး ပေါင်းတည်မြို့နယ် ဈေးကွက်အတွင်း ယခု ဧပြီလ ပထမအပတ်တွင် အရွယ်အစားကိုလိုက်၍ ကျောက်စိမ်း ဖရဲသီး တစ်လုံးလျှင် (၃၀၀၀)ကျပ် မှ (၅၀၀၀)ကျပ်နှုန်း ၊ ဖရဲကြားသီး တစ်လုံးလျှင်  (၃၅၀၀)ကျပ်မှ (၇၀၀၀)ကျပ်နှုန်းဖြင့် အသီးသီး ရောင်းချနေကြောင်း သိရပါသည်။

DOCA(ပဲခူး)

      မြန်မာနိုင်ငံတွင် ဖရဲသီးကို ဒေသအနှံ့အပြား၌စိုက်ပျိုးကြပြီး ဖရဲသီးအများဆုံးစိုက်ပျိုးသော ဒေသများမှာ ပဲခူးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်း‌ဒေသကြီး၊ စစ်ကိုင်းတိုင်း ဒေသကြီးစသည့်ဒေသများတွင် စိုက်ပျိုးကြပါသည်။ ဖရဲသီးသည် ကျန်းမာရေးအတွက် အလွန် ကောင်းမွန်သော ရာသီစာအသီးတစ်မျိုးဖြစ်ပါသည်။ ဖရဲသီးသည် ယခင်က နွေအခါမှသာပေါ်သော ရာသီစာဖြစ်သော်လည်း ယခုအခါတွင် ရာသီအားလုံး၌စိုက်ပျိုးကြပါသည်။

          ဖရဲသီးများကို ဝယ်ယူရာတွင် အလုံးအကြီး၊ အလတ်၊ အသေးခွဲ၍ ဝယ်ယူရခြင်းများ ရှိပါသည်။ ပဲခူးတိုင်းဒေသကြီး၊ ပြည်မြို့နယ်၊ ဈေးကြီး၌ ၂၀၂၅ခုနှစ်၊ ဧပြီလ ပထမအပတ်တွင် ဖရဲသီးအကြီး တစ်လုံးလျှင် (၅၀၀၀)ကျပ်၊ အလတ်တစ်လုံးလျှင် (၄၀၀၀)ကျပ်၊ အသေးတစ်လုံးလျှင် (၃၀၀၀)ကျပ် ဖြင့် ရောင်းချနေကြောင်း သိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ မင်းတဲကျွန်းကွက်သစ်သို့ စားသုံးသူရေးရာဦးစီးဌာန၊ တာဝန်ရှိသူများမှဦးစီး၍(၃.၄.၂၀၂၅)ရက်နေ့၊ နံနက်(၁၀:၀၀)နာရီတွင် ကန်စွန်းဥ စိုက်ပျိုးခြင်းအား သွားရောက်လေ့လာခဲ့ပါသည်။ ကန်ဇွန်းဥစိုက်ပျိုးရန်အတွက် ပျိုးပင်အထုန်းများ ဝယ်ယူစိုက်ပျိုးရပါသည်။ ပျိုးပင်အထုန်း (၁)ထုန်းတွင် အပင်ရေ (၃၅၀-၄၀၀)အထိပါပြီး (၁)ထုန်းလျှင် (၇၅၀၀)ကျပ်ပေးရပါသည်။ (၁၅)ထုန်း စိုက်ပျိုးထားပြီး (၂)လခွဲကြာလျှင် တူးဖော်လို့ရ ပြီးဖြစ်သည်။ ပိဿာ (၃၅၀-၄၀၀)ပတ်ဝန်းကျင် ထွက်ရှိပါသည်။ ထွက်ရှိသည့် ကန်ဇွန်းဥများကို ပြည်၊ ဥသျှစ်ပင်၊ ရွှေတောင်ဈေးများ ဖောက်သည် ဈေး (၁၃၀၀)ကျပ်ပေးရသည်။ စိုက်ပျိုးသည့်အချိန်တွင် ပျိုးထုန်းများကို တယ်ထိုးပြီးအခင်းတွင် စိုက်ပျိုးလိုက်ယုံဖြစ်ပြီး ရေလောင်းခြင်း၊ မြေဩဇာကျွေးခြင်း၊ ပိုးသတ်ဆေးဖျန်းခြင်းစသည့် သွင်းအားစု ကုန်ကျစရိတ်မရှိပါ၊ အကျိုးအမြတ်အားဖြင့် (၃)သိန်း၊ (၃)သိန်းခွဲ ပတ်ဝန်းကျင်ရှိကြောင်း သိရပါသည်။

DOCA(ပဲခူး)

    ပြည်မြို့၏အသီးမျိုးစုံဈေးကွက်တွင် အသီးအမျိုးအစားအစုံကို ရှမ်းပြည်တောင်ပိုင်းမှ ဝင်ရောက်လျက်ရှိပါသည်။ ပြည်မြို့ ပေါ်ရှိ ဈေးများတွင်သာမက Online မှတစ်ဆင့်လည်း ရောင်းချလျက်ရှိပါသည်။ အသီး ဈေးနှုန်းများ ကတော့ ချွန်းပန်းစပျစ်အညိုသီး တစ်ပိဿာလျှင် (၁၉၀၀၀)ကျပ်၊ အော်ဂန်လိမ္မော်သီး 1Kgလျှင် (၆၅၀၀)ကျပ်၊ ဂျပန်စတော်ရှယ်သန့် တစ်ပိဿာလျှင် (၂၂၅၀၀)ကျပ်၊ ယိုးဒယားပန်းသီး ကြွပ်သီး တစ်လုံးလျှင် (၁၅၀၀)ကျပ်၊ ယိုးဒယားသရက်သီးမှည့် တစ်လုံးလျှင်(၁၉၀၀)ကျပ်၊ ဖရဲသီးတစ်လုံးလျှင် (၆၀၀၀)ကျပ်၊ ဘေဘီနာနတ်သီး 1Kgကို (၁၃၀၀၀)ကျပ်၊ ယိုးဒယား ရေငန်းသီး(အချို) 1Kg (၁၄၀၀၀)ကျပ်၊ ယိုးဒယားပိန္နဲသီး ၁၀မွှာပါ တစ်ဘူးကို(၃၀၀၀)ကျပ်၊ ပန်းမာလကာသီး တစ်ပိဿာကို ၆၅၀၀ကျပ်ဖြင့် ရောင်းချကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်အတွင်း ဟင်းသီးဟင်းရွက်များကို အများအပြားစိုက်ပျိုးကြ သော်လည်း ရပ်ကွက်၊ ကျေးရွာများတွင် နေထိုင်ကြသော တောင်သူများသည် ဆေးဖက်ဝင်ပြီး ကျန်းမာရေးအရ ကောင်းမွန်သော အပင်တစ်မျိုးဖြစ်သည့် ဒန့်သလွန်ပင်ကို စီးပွားဖြစ်စိုက်ပျိုးကာ မိသားစုတစ်ပိုင်တစ်နိုင် စားသုံးရန်နှင့် အပိုဝင်ငွေရရှိရန် စိုက်ပျိုးကြကြောင်း သိရှိရပါသည်။

          ဒန့်သလွန်ပင်သည် ရာသီမရွေးစိုက်ပျိုးနိုင်ပြီး မည်သည့်မြေအမျိုးအစားမဆို ရှင်သန် ကြီးထွားသည့် အပင်မျိုးဖြစ်သည်။ ဒန့်သလွန်ပင်ကို အစေ့ချစိုက်ပျိုး၍ရသလို ကိုင်းဖြတ်စိုက်ပျိုးလို့ လည်းရပါတယ်။ ကိုင်းဖြတ်စိုက်ပျိုးလျှင် (၂)နှစ်သားအတွင်း အသီးသီးပါသည်။ (၆)လနှင့်သီးသော ဒန့်သလွန်မျိုးများလည်း စိုက်ပျိုးလာကြကြောင်း သိရသည်။ အပင်တစ်ပင်တွင် အသီးအတောင့်ရေ (၇၀၀)ခန့်ထိ သီးကြောင်းသိရပါသည်။ ပေါ်ဦးပေါ်ဖျားတွင် ဈေးကွက်အတွင်း ဒန့်သလွန်သီး (၁၀)သီးတောင့်ပါ တစ်စီးလျှင် (၂၅၀၀)ကျပ်ဖြင့် ရောင်းချလျက်ရှိပြီး  စိုက်ပျိုးမှုများသော ဒန့်သလွန်ခြံများတွင် ခြံပိုင်ရှင်များသည် ဒန့်သလွန်သီးများကို ဖောက်သည်ဈေးပေးသည့်အခါ အသီးတောင့် (၁၀၀)လျင် (၁၅၀၀ - ၂၀၀၀)ကျပ်ဖြင့် ရောင်းချကြောင်းသိရှိရပါသည်။ ယခုအချိန်တွင် ဒန့်သလွန်သီး (၁၀)သီးတောင့် တစ်စီးလျှင် (၇၀၀)ကျပ်ဖြင့် ရောင်းချ နေကြောင်းသိရသည်။ ဒန့်သလွန်ပင်သည် ဆေးဖက်ဝင်အပင် မျိုးနွယ်ဖြစ်ပြီး တစ်ပင်လုံး အသုံးဝင်ပါသည်။ ဒန့်သလွန်အရွက်ကို ဟင်းချိုချက်၍ စားသောက်လို့ ရသလို အပွင့်/အဖူး များကိုလည်း ရေနွေးဖျော၍ သုပ်စားနိုင်ပါသည်။ သီးစုံကုလားပဲဟင်းနှင့် အချဉ်ရည်ဟင်း များတွင်လည်း ဒန့်သလွန်အသီးမှာ မပါမဖြစ်သော အသီးများဖြစ်ပါသည်။ ဒန့်သလွန်အစေ့မှာလည်း သွေးတိုးရောဂါရှိသူများအနေဖြင့် အရေးပေါ်သွေးကျဆေးမရှိပါက ဒန့်သလွန်အစေ့ကို ဝါးစား၍ သွေးတိုးရောဂါကိုထိန်းညှိပေးပါသည်။ ဒန့်သလွန်ပင် စိုက်ပျိုးခြင်းဖြင့် စီးပွားဖြစ် ဝင်ငွေတိုး စေသည့်အပြင် ကျန်းမာရေအတွက် ဆေးဖက်ဝင်သော သီးနှံဖြစ်သည့်အတွက် ဒန့်သလွန်ပင်များကို အိမ်တိုင်းတွင် စိုက်ပျိုးသင့်ပါကြောင်း ရေးသားတင်ပြလိုက်ရပါသည်။

DOCA(ပဲခူး)