ပြည်တွင်းကုန်သွယ်မှုသတင်း

  ကျွန်းလှမြို့ရှိ ဈေးဆိုင်များတွင် ပဲပုတ်ပဲငပိများကို မိမိဒေသထွက် ကိုယ်တိုင်လုပ်ရောင်းခြင်းနှင့် ကာဘိုးကျေးရွာတို့ မှ တဆင့် မှာယူရောင်းချ လျက်ရှိကြောင်း သိရှိရပါသည်။

    ယခု ဩဂုတ်လ ဒုတိယပတ်အတွင်း ရောင်းချနေသော ပဲပုတ် ပဲငပိ ဈေးနှုန်းများမှာ ပဲပုတ်ပဲငပိ လက်လီ တစ်ပိဿာလျှင် (၆၅၀၀)ကျပ်၊(၅၀)ကျပ်သားလျှင်(၃၅၀၀)ကျပ်၊(၂၅)ကျပ်သားလျှင်(၁၅၀၀)ကျပ် နှင့် ပဲပုတ်ပဲငပိခြောက် ဈေးနှုန်းများမှာ  ပဲပုတ်ပဲငပိခြောက် တစ်ပိဿာလျှင်(၁၈၅၀၀)ကျပ်၊ (၅၀)ကျပ်သားလျှင်(၉၅၀၀)ကျပ် နှင့် (၁၀)ကျပ်သားလျှင်(၂၀၀၀)ကျပ် ဈေးနှုန်း တို့ဖြင့် ရောင်းချလျက် ရှိကြောင်း သတင်းရရှိပါသည်။

DOCA(စစ်ကိုင်း)

   ကျွန်းလှမြို့တွင် စိုက်ပျိုးရေးကို အဓိကထား၍ လုပ်ကိုင်လျက်ရှိရာ ရာသီစာပေါ်သည့် အချိန်၌ မျှစ်ချိုးခြင်း၊ မှိုရှာခြင်းနှင့် ပျားရည် နှင့် ပျားသလက် ရှာဖွေသည့် လုပ်ငန်းကို လုပ်ကိုင်လျက်ရှိကြောင်း သိရသည်။

ယခု ဩဂုတ်လ ဒုတိယအပတ် ရောင်းချနေသော ပျားသလက်ဈေးနှုန်းများမှာ ပျားသလက် တစ်ပိဿာလျှင်(၁၂၀၀၀)ကျပ်နှုန်း၊ (၁၀)ကျပ်သားခန့် တစ်ပြားလျှင် (၁၂၀၀)ကျပ် နှင့် (၅)ကျပ်သားခန့် တစ်ပြားလျှင်(၇၀၀)ကျပ် ဈေးနှုန်းတို့ဖြင့်လည်းကောင်း၊ အလားတူပင် ပျားရည်ဈေးနှုန်းမှာ ပျားရည်(၄၀)ကျပ်သားဝင် တစ်ပုလင်းကို (၂၀၀၀၀) ကျပ်၊ (၂၀)ကျပ်သားဝင် ဂျပ်ပြား တစ်ပုလင်းကို(၁၀၀၀၀)ကျပ် ဈေးနှုန်းတို့ဖြင့် အရောင်းအဝယ် ဖြစ်လျက် ရှိကြောင်း သိရပါ သည်။

DOCA(စစ်ကိုင်း)

           ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် တောင်သူများ အဓိကစိုက်ပျိုးသီးနှံဖြစ်သည့် မိုးစပါးများကို ပြည်တွင်းဝမ်းစာ ဖူလုံစေရေး၊ ပြည်ပဝင်ငွေရရှိစေရေးနှင့် နိုင်ငံစီးပွားမြင့် မားလာစေရေး တောင်သူများ သီးနှံဝင်ငွေရရှိစေရန်အတွက် နှစ်စဉ်မေလကုန်မှ စတင်၍ စိုက်ပျိုးလျက်ရှိရာ ၂၀၂၅-၂၀၂၆ခုနှစ် မိုးပါးများကို ဇူလိုင်လကုန်တွင် တစ်မြို့နယ်လုံး စိုက်ဧကများ ရာနှုန်းပြည့်စိုက်ပျိုးပြီးစီး၍ အောင်မြင်ဖြစ်ထွန်းလျက်ရှိကြောင်း သိရှိရပါသည်။

            ခရမ်းမြို့နယ်တွင် မိုးစပါးစိုက်ပျိုးရန် လျာထားဧက (၁၁၀၆၃၉)ဧကလျာထားချက် ထားရှိပြီးခဲ့ပြီး စိုက်ပျိုးခဲ့ရာ စိုက်ခင်းဧက (၁၃၄၄၆)၊ ကြဲခင်းဧက (၉၇၁၉၃)ဖြင့် စုစုပေါင်း စိုက်ပျိုးဧက (၁၁၀၆၃၉)ဧကဖြင့် လျာထားချက် ပြည့်မီအောင် စိုက်ပျိုးနိုင်ခဲ့ပြီး စိုက်ပျိုးထားသော စပါးမျိုးများ မှာ မနောသုခ(၄၁၄၇)ဧက၊ ဆင်းသုခ (၃၁၄၇၉)ဧက၊ မှော်ဘီ-၃(၃၀၇၃၂)ဧက၊ ရွှေဝါထွန်း (၂၂၇၀၆)ဧက၊ အောင်နိုင်တိုး (၂၇၆)ဧက၊ ပုသိမ်ရာကျော် (၂၀၂၄၆)ဧက၊ ငကျွဲ (၁၀၃၂)နှင့် ကောက်ညှင်း(၂၁)ဧကတို့ကို စိုက်ပျိုးထားကြောင်း မြို့နယ်ကြေးတိုင်နှင့်မြေစာရင်းဦးစီးဌာန၊ စိုက်ပျိုးဦးစီးဌာနဌာနတို့၏ စာရင်းများအရ သိရှိရပါသည်။ ယခုနှစ်တွင် မိုးစပါးစိုက်ပျိုးဧကများမှာ ရေကြီးနစ်မြှပ်ခြင်းနှင့် သီးနှံဖျက်ပိုးများ ကျရောက်မှုမရှိကြောင်းနှင့် စိုက်ပျိုးဧကများ အောင်မြင်ဖြစ်ထွန်းလျက်ရှိကြောင်းတို့ကို မြို့နယ်အတွင်းရှိ တောင်သူကြီးများထံမှ စုံစမ်းသိရှိရပါသည်။

DOCA(ရန်ကုန်)

  ကျွန်းလှမြို့ရှိ ပြည်သူများသည် စိုက်ပျိုးရေး နှင့် မွေးမြူရေး လုပ်ငန်းများကို  လုပ်ကိုင်လျက်ရှိရာ  ဗမာနွားများနှင့် မေထုံခေါ် နို့စားနွား မွေးမြူရေးလုပ်ငန်းကို တစ်ပိုင် တစ်နိုင် မွေးမြူလျက်ရှိပြီး နွားနို့ များကို ဈေးကွက်အတွင်းသို့ ရောင်းချလျက်ရှိကြောင်း သိရသည်။

    ၂၀၂၅ ခုနှစ်၊ ဩဂုတ်လ ပထမပတ် အတွင်း ရောင်းချနေသော နွားနို့ ဈေးနှုန်း များမှာ နွားနို့(၁)လီတာ တစ်ဘူးလျှင်(၂၀၀၀)ကျပ်၊ နွားနို့ခဲ(၁၀)ကျပ်သားလျှင်(၁၅၀၀)ကျပ် နှင့် ဒိန်ချဉ် (၁)လီတာ တစ်ဘူးလျှင်(၅၀၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး  ဩဂုတ်လ ဒုတိယပတ် တွင် ရောင်းချနေသော နွားနို့ ဈေးနှုန်းများမှာ နွားနို့(၁)လီတာ တစ်ဘူးလျှင်(၂၂၀၀) ကျပ်၊ နွားနို့ခဲ(၁၀)ကျပ်သားလျှင်(၁၅၀၀)ကျပ် နှင့် ဒိန်ချဉ်(၁)လီတာ တစ်ဘူးလျှင်(၅၀၀၀)ကျပ် ဈေးနှုန်း တို့ဖြင့်  အရောင်းအဝယ်ဖြစ်လျက်ရှိကြောင်း  သိရသည်။

DOCA( စစ်ကိုင်း)

  ကျွန်းလှမြို့တွင် စိုက်ပျိုးရေး၊ မွေးမြူရေးလုပ်ငန်းများကို လုပ်ကိုင်သူများရှိသည်အနက်   တောတောင်ကို အမှီပြု၍ သဘာဝအရပေါက်ရောက်သည့် တောမှို၊ တောင်ဘို့မှိုတို့ကို  ရှာဖွေလျက်ရှိပြီး ဈေးကွက်အတွင်းသို့ ရောင်းချလျက်ရှိကြောင်း သိရသည်။

  ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ကျွန်းလှမြို့၌ ရောင်းချလျက်ရှိသော  တောင်ဘို့မှို ဈေးနှုန်းများမှာ တောင်ဘို့မှို တစ်ပိဿာလျှင်(၂၃၀၀၀)ကျပ်၊ (၅၀)ကျပ်သားလျှင် (၁၁၅၀၀)ကျပ် နှင့်(၂၅)ကျပ်သားလျှင်(၆၀၀၀)ကျပ် ဈေးနှုန်းတို့ဖြင့်လည်းကောင်း၊အလားတူပင် တောမှို ဈေးနှုန်းများမှာ တောမှို တစ်ပိဿာလျှင်(၁၅၀၀၀)ကျပ်၊ (၅၀)ကျပ်သားလျှင် (၇၅၀၀)ကျပ် နှင့် (၂၅) ကျပ်သားလျှင် (၄၀၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး ရာသီစာဖြစ်သည့်အတွက် ဈေးကောင်းရနေကြောင်း သိရသည်။

DOCA(စစ်ကိုင်း)