ပြည်တွင်းကုန်သွယ်မှုသတင်း

     ကျွန်းလှမြို့ရှိ  ကုန်မျိုးစုံရောင်းဝယ်ရေးဆိုင်များတွင် ကွမ်းသီးများကို  ရန်ကုန်မြို့နှင့်မန္တလေးမြို့တို့ မှ မှာယူရောင်းချ လျက်ရှိကြောင်း သိရှိရပါသည်။

    ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ကျွန်းလှမြို့ရှိ ကုန်မျိုးစုံဆိုင်များတွင် ရောင်းချနေ‌သော ကွမ်းသီးစိတ် ဈေးနှုန်းများမှာ ကွမ်းသီးစိတ်(ရှယ်စ)တစ်ပိဿာလျှင်(၃၈၅၀၀)ကျပ်၊ (လတ်စ)တစ်ပိဿာလျှင်(၃၅၅၀၀)ကျပ်၊ (ညံ့)တစ်ပိဿာလျှင် (၂၃၅၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး ယခင်အပတ်နှင့် နှိုင်းယှဉ်ပါက ကွမ်းသီးဈေးနှုန်း အနည်းငယ်မြင့် တက်လျက် ရှိကြောင်း သိရသည်။

DOCA(စစ်ကိုင်း)

   ကျွန်းလှမြို့နယ်အတွင်းရှိ ကျေးရွာများတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ စားဖို ဆောင်သီးနှံ ဖြစ်သည့် ပဲတောင့်ရှည်သီး၊ ချဉ်ပေါင်ရွက်၊ ကင်ပွန်းချဉ်ပင်၊ ရုံးပတီသီး၊ ခရမ်းသီးနှင့် ကန်ဇွန်းရွက်များကို စိုက်ပျိုးလျက်ရှိသည့်အနက်မှ ကင်ပွန်းချဉ်ရွက်ကိုလည်း တစ်ပိုင်တစ်နိုင် စိုက်ပျိုး လျက်ရှိကြောင်း သိရသည်။

   ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ရောင်းချနေသော ကင်ပွန်းချဉ်ရွက် ဈေးနှုန်းများမှာ ကင်ပွန်းချဉ်ရွက် တစ်စီးလျှင်(၃၀၀)ကျပ်၊ (၂)စီးလျှင်(၅၀၀) ကျပ် နှင့် (၁၀)စီးတစ်ထုံးလျှင်(၂၇၀၀)ကျပ် ဈေးနှုန်းတို့ဖြင့် လည်းကောင်း၊ အလားတူပင်  ချဉ်ပေါင်ရွက် ဈေးနှုန်းများမှာ ချဉ်ပေါင်ရွက် (၁)ပိဿာလျှင်(၁၀၀၀)ကျပ်၊ ချဉ်ပေါင်ရွက် (၅၀)ကျပ်သားလျှင်(၅၀၀)ကျပ်တို့ဖြင့် ရောင်းချပေးလျက် ရှိကြောင်း သိရသည်။

DOCA(စစ်ကိုင်း)

   ကျောက်ဆည်ခရိုင်၊ ကျောက်ဆည်မြို့နယ်တွင် စပါး၊ ကြက်သွန်၊ ငရုတ်၊ နှမ်းကို အဓိကထား စိုက်ပျိုးကြသော်လည်း ကျေးလက်နေတောင်သူများသည် ဆေးဖက်ဝင် အပင်တစ်မျိုးဖြစ်သည့် ဒန့်သလွန်ပင်များကို စီးပွားဖြစ်စိုက်ပျိုးခြင်း ၊ မိမိတို့ခြံ အိမ်ဝန်းအတွင်း မိသားစုတစ်ပိုင်တစ်နိုင် စားသုံးရန်နှင့် အပိုဝင်ငွေရရှိအောင် စိုက်ပျိုးကြပါသည် ။ ဒန့်သလွန်ပင်ကို ရာသီဥတု မရွေး စိုက်ပျိုးနိုင်ပြီး နှုန်းဆန်သောမြေတွင် ရှင်သန်ကြီးထွားဖြစ်ထွန်းမှု မြန်ဆန်ကြောင်း သိရှိရပါ သည်။ ရေမဝပ်သော မြေတွင်စိုက်ပျိုးပါကလည်း ပိုမိုဖြစ်ထွန်းနိုင်ကြောင်း သိရှိရပါသည်။ ဒန့်သလွန်ပင် ကို အစေ့ချတိုက်ရိုက်စိုက်ပျိုးကြသလို ၊ ကိုင်းဖြတ်စိုက်ပျိုးနည်းဖြင့်လည်း စိုက်ပျိုး၍ရနိုင်ကြောင်း ၊ ကိုင်းဖြတ်စိုက်ပျိုးသော ဒန့်သလွန်ပင်သည် (၂)နှစ်သားအရွယ်တွင် စတင်အသီးပွင့်ကြောင်း သိရှိရ ပါသည်။ ယနေ့ခေတ်တွင် တောင်သူများသည် (၆)လမျိုးဖြစ်သော ဒန့်သလွန်မျိုးများကို စိုက်ပျိုး လာကြသည်ကိုလည်းတွေ့ရှိရပါသည်။ ဖေဖော်ဝါရီလ၊ မတ်လ၊ ဧပြီလ များတွင် ဒန့်သလွန်သီးများ မြိုင်မြိုင်သီးသောလများဖြစ်ပါသည်။ ဒန့်သလွန်ပင် တစ်ပင်တွင် တစ်နှစ်ပတ်လုံး ဒန့်သလွန်သီး (၆၅၀) ခန့် ထိသီးကြောင်း သိရှိရပါသည်။ ယခုအခါ ဒန့်သလွန်သီးများ ပေါ်ကာစဖြစ်၍ လက်ကားဈေးနှုန်း အနေဖြင့် (၃)ထောင့် တစ်စီးလျှင် (၃၀၀)ကျပ်၊ (၅)ထောင့် တစ်စီးလျှင် (၅၀၀)ကျပ်ဖြင့် ယူ၍ စျေးကွက်ထဲ၌လက်လီဈေးနှုန်းအနေဖြင့် (၃)ထောင့် တစ်စီးလျှင် (၅၀၀)ကျပ်၊ (၅)ထောင့် တစ်စီး လျှင်(၇၀၀)ကျပ်ဖြင့်‌ ရောင်းချကြောင်းသိရှိရပါသည် ။ ဒန့်သလွန်ပင်သည် ဆေးဖက်ဝင်သောကြောင့် အရွက်ကို ဟင်းချိုရည်ချက်၍ စားသုံးကြသလို အပွင့်ကို ရေနွေးဖျော်၍ အသုပ်သုပ်၍စားသုံးကြ ကြောင်း ၊ ဒန့်သလွန်သီးကို သီးစုံပဲကုလားဟင်း ချက်ပြုတ်၍ရနိုင်ကြောင်း သိရှိရပါသည်။ ဒန့်သလွန်အစေ့သည် သွေးတိုးရောဂါရှိသူများအတွက် အစေ့ကိုစားပါက ရောဂါသက်သာကြောင်း ၊ ဆေးဖက်လည်းဝင် ၊ စီးပွားလည်းဖြစ် ၊ မိသားစုဝင်ငွေ တိုးသောကြောင့် ဒန့်သလွန်ပင်ကို စိုက်ပျိုးသင့်ပါကြောင်း တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

       တနင်္သာရီတိုင်း‌‌ဒေသကြီး၊ မြိတ်မြို့ပေါ်တွင် သြဂုတ်လပထမပတ်တွင် ကုန်ဈေးနှုန်းများ အနည်းငယ်မြင့်တက်လာခြင်းကြောင့် အသား၊ ငါးဈေးနှုန်းများတွင် ပုစွန်ထုပ်ဈေးနှုန်းသည်လည်း မြင့်တက်လျက်ရှိပါသည်။ ပုစွန်ထုပ်များကို ငါးလှေလံဈေးများမှတဆင့် ဝယ်ယူရောင်းချ ကြပြီး မြိတ်မြို့ပေါ်ရှိဈေးများတွင် ပြန်လည်ရောင်းချလျက်ရှိကြောင်း သိရှိရပါသည်။ ပုစွန်ထုပ်များသည် ဈေးကောင်းသော်လည်း ထမင်းဆိုင်များ၊ စားသောက်ဆိုင်များနှင့် စားဖွယ်စုံ‌ရောင်းချသည့်ဆိုင်များမှ ပိုမိုဝယ်ယူကြကြောင်း သိရှိရပါသည်။

          ယခု၂၀၂၅ခုနှစ်၊ သြဂုတ်လဒုတိယပတ်တွင် မြိတ်မြို့ပေါ်ရှိ ရောင်းချနေသောဈေးများတွင် ရေချိုပုစွန်ထုပ်ဈေးနှုန်းမှာ အငယ်တစ်ပိဿာလျှင် (၄၀၀၀၀)ကျပ်ရှိပြီး အကြီးတစ်ပိဿာလျှင် (၅၅၀၀၀)ကျပ်ရှိကြောင်း အသား၊ငါးရောင်းချသူများထံမှ သိရှိရပါသည်။  

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့တွင် ဒေသခံပြည်သူများသည် နှစ်ရှည်သီးနှံများနှင့် ရာသီပေါ်သီးနှံများကို အသက်မွေးဝမ်းကျောင်းဖြင့် စိုက်ပျိုးရောင်းချကြပါသည်။ ယခုလရာသီတွင် ငှက်ပျောသီးဈေးကောင်းရရှိ၍ ဝင်ငွေများပိုမိုရရှိကြောင်း သိရှိရပါသည်။ ငှက်ပျောသီး အမျိုး အစားတွင် ဆင်အံသီး၊ ဖီးကြမ်း၊ ရခိုင်နှင့် ရွှေငှက်ပျောတို့သည် လူကြိုက်များသည်အတွက် ရောင်းအားအလွန်ကောင်းကြောင်း သိရှိရပါသည်။ အိမ်ခြံဝန်းများတွင်လည်း အသီးသီးစိုက်ပျိုးကြပြီး စည်ပင်သာယာဈေးနှင့် ရပ်ကွက်ဈေးငယ်များတွင် တစ်နိုင်တစ်ပိုင် တင်ပို့ရောင်းချကြပါ သည်။ ငှက်ပျောသီးအမှည့်များကို ဌက်ပျောကြော်များပြုလုပ်၍  မနက်စာအနေဖြင့် လက်ဖက်ရည်များနှင့် စားသုံးကြပါသည်။ ငှက်ပျောသီးအစိမ်းများကို သရေစာငှက်ပျောကြော်ခြောက်များ ပြုလုပ်ပြီး ရောင်းချကြကြောင်း သိရှိရပါသည်။

      ယခုသြဂုတ်လဒုတိယပတ်တွင် မြိတ်မြို့နယ်ရှိ ငှက်ပျောသီးဈေးနှုန်းမှာ ဖီးကြမ်းသီး တစ်ဖီးလျှင်(၄၅၀၀)ကျပ်ရှိပြီး ရွှေငှက်ပျောသီးတစ်ဖီးလျှင် (၅၀၀၀)ကျပ်ခန့် ရှိကြောင်း သိရှိရပါ သည်။

DOCA(တနင်္သာရီ)