ပြည်တွင်းကုန်သွယ်မှုသတင်း

     စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့်ဒေသ တွင်းစိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ဈေးကွက်အ ခြေအနေတို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင် ရောင်းချလျက်ရှိသည့် သကြားနှင့်ဆားတို့ကို ရွှေဘိုမြို့ရှိလက္ကားဆိုင်များမှ ဝယ်ယူရောင်းချ ကြောင်းသိရသည်။

     ၂၀၂၅ခုနှစ်၊ အောက်တိုဘာလ ဒုတိယပတ်တွင် ရောင်းချနေသော သကြားနှင့်ဆားဈေး နှုန်းတို့မှာ သကြား(၁)ပိဿာလျှင် (၆၀၀၀)ကျပ်၊ (၅၀)ကျပ်သားလျှင် (၃၀၀၀)ကျပ်၊ (၂၅)ကျပ် သားလျှင်(၁၅၀၀)ကျပ်၊ ဆား(၁)ပိဿာလျှင် (၂၅၀၀)ကျပ်၊ (၅၀)ကျပ်သားလျှင် (၁၂၅၀)ကျပ်နှင့် (၂၅)ကျပ်သားလျှင် (၆၅၀)ကျပ်ဖြင့် ရောင်းချလျက်ရှိကြောင်း၊ သကြားကို လက်ဖက်ရည်များ၊ ကော်ဖီများ၊ သစ်သီးများဖျော်ရာတွင်လည်း အများဆုံး အသုံးပြုကြသည့်အပြင်  သကြားနှင့်ဆား များကို အိမ်ရှင်မများဟင်းချက်ရာတွင်လည်း မပါမဖြစ်အသုံးပြုသော အခြေခံစားကုန်ပစ္စည်း များဖြစ်သဖြင့်  အရောင်းအဝယ်သွက်လျက်ရှိကြောင်း ကုန်စုံဆိုင်များမှ သိရှိရပါသည်။

DOCA(စစ်ကိုင်း)

           မြင်းခြံမြို့နယ်အတွင်းသို့ ပြင်ဦးလွင်ဒေသမှထွက်ရှိသော ပန်းထိမ်ငိုပန်းများ ဈေးကွက်တွင် ရောင်းချလျက်ရှိကြောင်း၊ မြင်းခြံမြို့၊ အေးမြသီတာဈေးရှိ ဘုရားပန်းရောင်းချသောဆိုင်များတွင် အခြားဘုရားပန်းများနှင့်အတူ ပန်းထိမ်ငိုပန်းများကိုလည်း ရောင်းချလျက်ရှိကြောင်း၊ ၂၀၂၅ ခုနှစ်၊ အောက်တိုဘာဒုတိယပတ်တွင် ပန်းထိမ်ငိုပန်း (၁၀)ခက်ပါတစ်စီးလျှင် (၁၅၀၀) ကျပ်ပေါက်ဈေးများ ဖြင့်ရောင်းချကြောင်း၊ ယခင်စက်တင်ဘာလ ဒုတိယပတ်တွင် ပန်းထိမ်ငိုပန်း (၁၀) ခက်ပါတစ်စီးလျှင် (၂၅၀၀) ကျပ်ပေါက်ဈေးများဖြင့် ရောင်းချလျက်ရှိခဲ့ကြောင်း၊ ကာလတူနှိုင်းယှဉ်ပါက ယခုအောက်တို ဘာလ တွင် ပန်းထိမ်ငိုပန်း (၁၀)ခက်ပါတစ်စီးလျှင် (၁၀၀၀) ကျပ်ခန့်ဈေးနှုန်း များကျဆင်း ခြင်းဖြစ်ကြောင်း၊ ယခုအချိန်တွင် ပန်းများပေါများစွာထွက်ပေါ်ချိန်ဖြစ်သောကြောင့် ဈေးနှုန်း ကျဆင်းခြင်းဖြစ်ကြောင်း၊ အပွင့်အခက် အကြီး၊ အသေး၊ လတ်ဆတ်မှုအပေါ်တွင် မှုတည်၍ ဈေးနှုန်းများအနည်းငယ်ကွာခြားကြောင်း၊ ပန်းထိမ်ငိုပန်းများသည် ဘုရားပန်းထိုးရာတွင် ရက်ကြာ ရှည်ခံသဖြင့် လှပသောကြောင့် ဈေးကွက်တွင် လူကြိုက်များပြီး အရောင်းသွက်လျက်ရှိကြောင်း ပန်းရောင်းချသူတစ်ဦး၏ ပြောပြချက်အရသိရှိရသည်။ ပန်းထိမ်ငိုပန်းမျိုးတွင် တစ်ထပ်ပန်း၊ နှစ်ထပ်ပန်းနှင့် သုံထပ်ပန်း ဟူ၍သုံးမျိုးရှိကြောင်း၊ပန်း၏အရောင်မှာ မရမ်းရောင်နှင့် အဖြူရောင် တို့ရှိကြောင်း၊ အအေးပိုင်းဒေသများတွင်‌ အောင်မြင်ဖြစ်ထွန်းကြောင်း၊ စိုက်ပျိုးရန်အတွက် စိုထိုင်း ဆများပြီး အရိပ်ရသောနေရာများကို နှစ်သက်ကြောင်း၊ အပူပိုင်း ဒေသများတွင် ဆောင်းဦးရာသီ၌ စိုက်ပျိုးကြကြောင်း စနစ်တကျစိုက်ပျိုးပါက စီးပွားဖြစ်စိုက်ပျိုးထုတ်လုပ် နိုင်ကြောင်းသိရသည်။

DOCA(မန္တလေး)

         မြင်းခြံမြို့နယ်သည် ဧရာဝတီမြစ်၏ အရှေ့ဘက်ကမ်းတွင်တည်ရှိပြီး ပဲမျိုးစုံ၊ ဆီထွက်သီးနှံ၊ ပြောင်း၊ ထန်းလုပ်ငန်းစသည့် လယ်ယာစိုက်ပျိုးရေး လုပ်ငန်းများလုပ်ကိုင်လျက်ရှိရာ မိုးငရုတ် များကိုလည်းစိုက်ပျိုးထားကြောင်း၊  မိုးငရုတ်ကို မေလနှင့် ဇွန်လ တို့တွင် စတင်စိုက်ပျိုးပြီး၊ အောက်တိုဘာနှင့် နိုဝင်ဘာလတို့တွင် ရိတ်သိမ်းမည်ဖြစ်ကြောင်း၊ စိုက်ပျိုးချိန်မှ ရိတ်သိမ်းချိန် ကာအထိ (၄) လခန့်ကြာမြင့်ကြောင်းသိရှိရသည်။

         ၂၀၂၅-၂၀၂၆ ခုနှစ်၊ မြင်းခြံမြို့နယ်တွင်  မိုးငရုတ်စိုက်ဧကပေါင်း (၇၆) ဧကစိုက်ပျိုးထားရှိ ကြောင်း မြို့နယ်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ မိုးငရုတ်များကို နဘူးအိုင်ရွာ၊ တလုပ်ရွာ၊ တောပုရွာ၊ အနိမ့်ရွာနှင့် ပတ္တာကျေးရွာများတွင် စိုက်ပျိုးထားကြောင်း သိရှိရသည်။ ယခင်နှစ်တစ်ဧက အထွက်နှုန်းအနေဖြင့် (၄၀၃) ပိဿာခန့်ထွက်ရှိကြောင်း၊ ဈေးကွက် တင်ပို့မှုအနေဖြင့် မြင်းခြံမြို့ရှိ ပွဲရုံများနှင့် မန္တလေးမြို့သို့ တင်ပို့ရောင်းချကြောင်း သိရှိရသည်။ ၂၀၂၅ခုနှစ်၊ အောက်တိုဘာလ ဒုတိယပတ်တွင် ငရုတ်သီးစိမ်း  ၂၅ ကျပ်သားလျှင် (၁၀၀၀)ကျပ်၊ တစ်ပိသာလျှင် (၄၀၀၀) ကျပ်ပေါက်ဈေးများဖြင့်ရောင်းချကြောင်း၊ ယခင်စက်တင်ဘာလ ဒုတိယပတ်နှင့်နှိုင်းယှဉ်ပါက ယခုလ တွင် ငရုတ်သီးစိမ်းတစ်ပိဿာလျှင် (၁၅၀၀) ကျပ်ခန့်ဈေးနှုန်းကျဆင်းခြင်းဖြစ်ကြောင်း၊ ယခုအချိန် တွင် မြင်းခြံဈေးကွက်သို့ ပုပ္ပါးမြို့၊ကျောက်ဆည်မြို့နှင့် မြစ်သားမြို့တို့မှထွက်ရှိသော ငရုတ်သီး စိမ်းဝင်ရောက်လာသောကြောင့် ဈေးနှုန်းကျဆင်းခြင်းဖြစ်ကြောင်း၊ ဈေးကွက် တင်ပို့မှုအနေဖြင့် မြင်းခြံမြို့ရှိ ပွဲရုံများနှင့် မန္တလေးမြို့သို့ တင်ပို့ရောင်းချကြောင်း သိရှိရသည်။

DOCA(မန္တလေး)

             ပုဏ္ဍရိက်ပင်ကို အလှပန်းပင်အဖြစ် ခြံစည်းရိုးများ၊ ပန်းဥယျဉ်များတွင် အလှစိုက်ကြသည်။ ငယ်စဉ်ကလေးဘ၀ ပုဏ္ဍရိက်ပန်းသီးများခူး၍ ချိုဖန်သောအရသာကိုခံစားဖူးပါသည်။ အသီးမှည့်လေး များတွေ့ရင် ပျော်ကြသည်။ ကလေးဘဝဖြတ်သန်းကြဖူးသူအများစုမှာ ပုဏ္ဍရိက်ပန်းနှင့်ပုဏ္ဍရိက် အသီးကို မမေ့နိုင်ကြပေ။ နေရာဒေသအလိုက်အမျိုးမျိုးခေါ်ကြသည်။ ရွှေတ ဆုပ်၊ ခြံစည်းရိုးပန်း၊ ပုဏ္ဍရိက် စသည်ဖြင့်ဖြစ်လေသည်။ အချို့က အကြော်မှုန့်ဖြင့်အပွင့်ကိုကြော်စားသည် လည်းရှိကြသည်။ အပွင့်အဝါ၊အနီရှိသည်။ အရသာမှာ ခါး၊ ဖန် ရှိ၍ နူးညံ့စွာ၀မ်းသက်သည်။ အူများကိုပိတ်ဆို့ခြင်း၊ ရေဖျဉ်းရောဂါ၊ ဥတုသွေး လာစဉ်ကိုက်ခဲခြင်းကို ပြေပျောက်သည်။ သွားကိုက်၊ သွားဖုံးရောင်၊ အာခေါင်တွင်အပူအိတ်များရှိ၍ သွားဖုံးအတွင်းနာကျင်ကိုက်ခဲပါမူ အရွက်အား ဆားအနည်းငယ်ထည့်ပြီး ရေနွေးဆူဆူတွင်ချ၍ ခပ်နွေးနွေးအပူချိန်တွင် အာခံတွင်းငုံကာ အာလုပ်ကျင်းဆေးကြောပါက သွား ကိုက်၊ သွားနာပျောက်ကင်းသည်ဟု ဆိုထားသည်။ ပုဏ္ဍရိက်ရွက်များကို အရိပ်တွင်အခြောက်လှန်းပြီး ပြာချ၍ ဆားနှင့်ရောသွားတိုက်ပေးပါက သွားကိုက်၊သွားနာရောဂါများ ပျောက်သည်ဟုဆိုသည်။

           ယောက်ျားကြီးများပင် မျက်ရည်ကျလောက်အောင် နာကျင်တဲ့ သွားကိုက်ပြီးသွားဖုံးရောင် နေခြင်းကို ချက်ချင်းသက်သာစေတဲ့ ပုဏ္ဍရိက်ပင် အစွမ်းကိုဖော်ပြပေးရမည်ဆိုရင် သွားကိုက်ဝေဒနာကို လူအများစုခံစားဖူးကြပေလိမ့်မည်။ သွားဖုံးရောင်ကာ မျက်ရည်များ တောက်တောက်ကျတဲ့အထိ နေမထိ ထိုင်မသာ ငိုယိုအော်ဟစ် ငိုကြွေးနေရလောက်အောင် နာကျင်ကိုက်ခဲလှပေသည်။ ဆေးနည်းစာပေများထဲတွင် ဖတ်မှတ်ဖူးသော ဆေးမြီတိုလေးတစ်ခု မျှဝေပေးလိုက်ပါသည်။ ပုဏ္ဍရိက်ရွက် အရွက်(၂၀)ကိုခူးပြီး ရေစင်အောင်ဆေးကာရေနှင့်ပြုတ်ပြီး ထိုရည်နွေးနွေးလေးအား ဆားအနည်းငယ်ဖြင့်ငုံ၍ ထွေးစေခြင်းသာဖြစ်သည်။  အခြားဆေးဝါးအကူအညီမပါ၀င်ဘဲ သွားကိုက် ဝေဒနာ သက်သာပျောက်ကင်းသွားလိမ့်မည်ကို အံ့ဩစွာတွေ့ရပေလိမ့်မည်ဖြစ်ကြောင်း ဖတ်မှတ်ခဲ့ဖူး သမျှကို မျှဝေဖော်ပြပေးလိုက်ရပါတယ်။ မြင်းခြံမြို့ရှိ  ချောင်း‌ဒေါင်းရပ်ကွက် ရွှေပျိုးပင်အရောင်းဆိုင်တွင် ရောင်းချနေသော ၂၀၂၅ ခုနှစ်၊ အောက်တိုဘာလဒုတိယပတ်တွင် ပုဏ္ဍရိက်ပင်ပျိုးပင်တစ်ပင်လျှင် (၂၅၀၀-၅၀၀၀) ကျပ်ခန့်ပေါက်ဈေးဖြင့်‌ရောင်းချကြောင်း သိရှိရသည်။

DOCA(မန္တလေး)

        မြန်မာလူမျိုးတို့သည် ခံတက်ရွက်ကို ချဉ်ဖတ်သိပ်၍ အမျိုးမျိုးပြုလုပ်စားသုံးကြကြောင်း သိရှိရသည်။ ခံတက်ပင်၏ အရွက်၊ အခေါက်၊ အမြစ်များသည် လွန်စွာမှ ဆေးဖက်ဝင်ကြောင်း၊ အပြင်းဖျားပြီး မူးဝေသောရောဂါများဖြစ်ခဲ့လျှင် ခံတက်မြစ်ကိုကြိတ်၍ ခေါင်း၌အုံပေးခြင်းဖြင့် အုံထားသောနေရာ၌ ပူလာကာ အခိုးများထွက်လာကြောင်း၊ ထို့နောက် အုံထားသောအဖတ်များကို ခွာ၍ အုန်းဆီ(သို့)နှမ်းဆီလိမ်းပေးခြင်းဖြင့် သက်သာပျောက်ကင်းကြောင်း၊ ဆီးချိုရောဂါဖြစ်လျှင် ခံတက်မြစ်ကို လေးခွက်တစ်ခွက်တင်ကျိုပြီး သောက်ပေးပါက သက်သာပျောက်ကင်းကြောင်း သိရှိရသည်။ လေထိုးလေအောင့်ဝေဒနာများ ဖြစ်ပါက ခံတက်ချဉ်ဖတ်ကို တို့မြှုပ်စားသောက်ခြင်း၊ အဆာပလာများနှင့် သုပ်စားခြင်းဖြင့် သက်သာပျောက်ကင်းစေကြောင်းသိရှိရသည်။ ဆီးကျောက် တည်ခြင်းနှင့် ဆီးအိမ်ရောင်ခြင်းများ ခံစားရလျှင် ခံတက်ခေါက်ကို ပြုတ်ပြီး ပြုတ်ရည်ထဲသို့ ကြံသကာအနည်းငယ်ရော၍ သောက်ပေးခြင်းဖြင့် သက်သာပျောက်ကင်းကြောင်း သိရှိရသည်။ မြင်းခြံမြို့ ‌အေးမြသီတာဈေးတွင် ရောင်းချနေသော ၂၀၂၅ ခုနှစ်၊ အောက်တိုဘာဒုတိယပတ်၌ ကတက်ရွက်ချဉ်ဖတ် ၂၅ ကျပ်သားလျှင် ၂၀၀၀ ကျပ်ခန့်ပေါက်ဈေးများဖြင့်ရောင်းချကြောင်း သိရှိရသည်။

DOCA(မန္တလေး)