ပြည်တွင်းကုန်သွယ်မှုသတင်း

          ပြင်ဦးလွင်မြို့သည် ဥယျာဉ်ခြံမြေနှင့်နှစ်ရှည်သီးနှံ ပန်းမာလ်များ အများဆုံးစိုက်ပျိုးနိုင်တဲ့ မြို့လေးဖြစ်ပါသည်။ စိုက်ပျိုးထားရှိသည့် ဥယျာဉ်ခြံမြေများတွင် ဂေါရခါးညွန့်နှင့်ဂေါရခါးသီးများကို အိမ်တိုင်း၊ခြံတိုင်တွင် ဝင်လိုက်တာနှင့်တွေ့မြင်ရမှာဖြစ်ပါသည်။ အိမ်အတွက် မီးဖိုချောင်စရိတ်ကာမိ သလိုသန့်ရှင်းလတ်ဆက် အသီးအရွက်ကို ကျန်းမာရေးနှင့်ညီညွတ်စွာစားရပြီး ပိုလျှံလျှင်လည်း ပြန်လည်ရောင်းချနိုင်ပြီး မိသားစု တစ်ပိုင်တစ်နိုင်ဝင်ငွေရရှိကြလို့ နှစ်စဉ်စိုက်ပျိုးလာကြသည်ကို တွေ့ရှိရပါသည်။ ဂေါရခါးသီးကို စင်တင်စိုက်ပျိုးကြပြီး ဂေါရခါးအညွန့်ကို မြေပြင်တွင်စိုက်ပျိုးပြီး အညွန့်ထွက်ချိန် ၁ ပေ လောက်တွင် ဖြတ်ယူပြီး ဈေးကွက်အတွင်းရောင်းချကြပါသည်။ ဈေးနှုန်း ဈေးကွက်အနေဖြင့် ပွဲရုံဖြတ်ဈေး အညွန့်(၁)ပိဿာလျှင်(၃၅၀၀/-)ကျပ်၊ဂေါရခါးသီး(၁)ပိဿာလျှင် (၄၀၀၀/-)ကျပ် ၊ လက်လီရောင်းဈေး အညွန့်(၁)ပိဿာလျှင်(၄၀၀၀-၄၂၀၀)ကျပ် ၊ ဂေါရခါးသီး (၁)ပိဿာလျှင်(၄၂၀၀-၄၃၀၀)ကျပ်ဖြင့် ရောင်းဝယ်လျှက်ရှိပါသည်။

DOCA (မန္တလေး)

      ပြင်ဦးလွင်မြို့နယ်တွင် ဝိုင်လုပ်ငန်းရှင်ဦးရေ(၁၆)ဦးလုပ်ကိုင်လျှက်ရှိပြီး ထုတ်ကုန်များမှာ မက်မန်းဝိုင်၊စတော်ဘယ်ရီဝိုင်၊နာနတ်ဝိုင်၊စပျစ်ဝိုင်၊ဂျင်းဝိုင်၊ပိုးစာဝိုင် နှင့် ပင်မှည့်ဝိုင်တို့ကို ထုတ်လုပ် ၍စျေးကွက်အတွင်းရောင်းချလျှက်ရှိပါသည်။ ဝိုင်အမျိုးအစားအလိုက် အရည်အသွေးနှင့်ထုတ်ပိုးမှု အရ မက်မန်းဝိုင် (၀.၇၅)ပုလင်းတစ်လုံးလျှင် လက်ရှိရောင်းစျေးနှုန်းမှာ (၈၀၀၀-၁၆၀၀၀)ကျပ် ၊ စတော်ဘယ်ရီဝိုင်(၀.၇၅)ပုလင်းတစ်လုံးလျှင်(၇၀၀၀-၁၅၀၀၀)ကျပ်၊ နာနတ်ဝိုင်(၀.၇၅)ပုလင်းတစ်လုံး လျှင်(၇၀၀၀-၁၅၀၀၀)ကျပ်  ၊ စပျစ်ဝိုင် (၀.၇၅)ပုလင်းတစ်လုံးလျှင် (၆၀၀၀-၁၃၅၀၀)ကျပ် ၊ ဂျင်းဝိုင် (၀.၇၅)ပုလင်းတစ်လုံးလျှင် (၇၀၀၀-၁၅၀၀၀)ကျပ် ၊ ပိုးစာဝိုင် (၀.၇၅)ပုလင်းတစ်လုံးလျှင် (၆၀၀၀-၁၃၅၀၀)ကျပ်နှင့်ပင်မှည့်ဝိုင်(၀.၇၅)ပုလင်းတစ်လုံးလျှင် (၆၀၀၀-၁၃၀၀၀)ကျပ်ဖြင့် စျေးကွက်အတွင်း ရောင်းချလျှက်ရှိပါသည်။ဝိုင်လုပ်ငန်းသည် အခြားလုပ်ငန်းများကဲ့သို့ရက်အနည်းငယ်ဖြင့်ထုတ်လုပ်၍ မရဘဲ အနည်းဆုံး စတင်ဝိုင်စိမ်သည့်အချိန်မှစတင်၍ တစ်နှစ်ကြာမြင့်မှသာ စတင်ထုတ်ယူရခြင်း ဖြစ်ပါသည်။နှစ်ကြာလေ အရည်အသွေးပိုကောင်းလေဖြစ်ပါသည်။ ဝိုင်ဈေးကွက်အနေဖြင့် ပြည်တွင်း ဈေးကွက်ဖြစ်သော ရန်ကုန်၊ မန္တလေး၊ နေပြည်တော် စသည့်မြို့များသို့ တင်ပို့ရောင်းချလျှက်ရှိပြီး ပြင်ဦးလွင်မြို့နယ်သို့ လာရောက်လည်ပတ်သော ခရီးသွားဧည့်သည်များအား အပြန်ခရီးအတွက် လက်ဆောင်ပစ္စည်းအနေဖြင့် တွင်ကျယ်စွာရောင်းဝယ်လျှက်ရှိပါသည်။

DOCA (မန္တလေး)

       ကျောက်ဆည်မြို့နယ်အတွင်းသို့ ပိန္နဲသီးများ ပုံမှန်ဝင်ရောက်လျှက်ရှိကြောင်းသိရပါသည် ။ မြို့နယ်အတွင်းဒေသများမှ အနည်းငယ်ထွက်ရှိမှုရှိသလိုယခုအခါ အောင်ပန်း၊ကလော၊ရွာငံဒေသများ မှပိန္နဲသီးများဝင်ရောက်လျှက်ရှိပါသည်။အိမ်ပျော့မျိုးနှင့်အကြွပ်သီးခေါ်အိမ်မာမျိုးဟူ၍ရှိရာ အိမ်မာ မျိုးကိုလူကြိုက်များကြောင်း ၊ ယခင်နှစ် စျေးနှုန်းအနေဖြင့် အလုံးသေးတစ်လုံးလျှင် (၅၀၀၀-၇၀၀၀) ကျပ်၊အလုံးအလတ်တစ်လုံးလျှင်(၈၀၀၀-၁၀၀၀၀)ကျပ်၊ အလုံးအကြီးတစ်လုံးလျှင်(၁၂၀၀၀-၁၅၀၀၀) ကျပ် စျေးနှုန်းများဖြင့်ရောင်းဝယ်ခဲ့ပြီး  ယခုနှစ် စျေးနှုန်းအနေဖြင့် အလုံးသေးတစ်လုံးလျှင်(၃၀၀၀-၄၀၀၀)ကျပ်၊ အလုံး အလတ်တစ်လုံးလျှင်(၅၀၀၀-၆၀၀၀)ကျပ်၊ အလုံး အကြီးတစ်လုံးလျှင်(၈၀၀၀-၉၀၀၀)ကျပ်စျေးနှုန်းများဖြင့်အရောင်းအဝယ်ဖြစ်နေကြောင်း၊ အလုံးအကြီး၊ အသေးအပေါ်မူတည်၍ ရောင်းသူ၊ဝယ်သူ စျေးနှုန်းညှိ၍ ရောင်းချရကြောင်း၊ အောင်ပန်း၊ကလော၊ရွာငံဒေသများမှ ကင်တာ (၆)ဘီးကုန်စိမ်းကားလေးများ နေ့စဉ်ပျမ်းမျှအားဖြင့်(၅)စီမှ(၈)စီးဝန်းကျင်ဝင်ရောက်လျှက်ရှိကြောင်း၊ ပိန္နဲသီးရောင်သူတစ်ဦး၏ ပြောကြားချက် အရသိရှိရပါသည်။

DOCA (မန္တလေး)

       ကျောက်ဆည်ခရိုင်အတွင်းရှိ ဈေးများသို့ ဂေါ်ရခါးသီးများ ဝင်ရောက်လျက်ရှိပြီး ရှမ်းပြည်၊ အောင်ပန်း ၊ ပင်းတယနှင့်ရွာငံရေဦးမြို့များမှ ဝင်ရောက်လျက်ရှိကြောင်း ဂေါ်ရခါးသီး သီးနှံသည် တစ်နှစ်ပတ်လုံး စိုက်ပျိုး၍ရကြောင်း၊ အေးသောဒေသတွင် ပိုမိုဖြစ်ထွန်းကြောင်း ပြင်ဦးလွင် ၊ နောင်ချိုနယ်များတွင်လည်း စိုက်ပျိုးကြကြောင်း၊ ဟင်းသီးဟင်းရွက်များထဲမှ အဟာရဓာတ် အများဆုံး ပါဝင်သော ဂေါ်ရခါးသီးကို လူအများနှစ်ကြိုက်စွာ စားသုံးလျက်ရှိကြောင်း ဂေါ်ရခါးသီး ကို ဟင်းချိုအဖြစ်စားသုံးကြသလို အစိမ်းကြော်ကြော်၍လည်းကောင်း၊ ပြုတ်၍ တို့စရာအဖြစ်လည်း စားသုံးကြပါသည်။ ဂေါ်ရခါးသီး ဈေးနှုန်းအနေဖြင့် ဖောက်သည်ဈေး တစ်လုံး လျှင် (၂၀၀/-)ကျပ်၊ လက်လီ တစ်လုံးလျှင် (၃၀၀-၅၀၀/-)ကျပ် ဖြင့်ရောင်း ဝယ်လျက်ရှိကြောင်း၊    ဂေါ်ရခါးသီးစားသုံး ခြင်းဖြင့် ကယ်လိုရီပါဝင်မှုနည်းပြီး ကိုလက်စထရောနှင့် ပြည့်ဝဆီလုံးဝမပါဝင်သောကြောင့် သွေးတွင်းကိုလက်စထရောကို မတက်စေဘဲ ထိန်းညှိပေးနိုင်ကြောင်း၊ ကျောက်ကပ်ကျောက်တည် ခြင်းနှင့် ဝမ်းချုပ်ခြင်းကို သက်သာစေနိုင်ကြောင်း၊ ‌ ကျန်းမာရေးအကျိုးကျေးဇူးများစွာပါရှိသော ဂေါ်ရခါးသီးကို နေ့စဉ်စားသုံးသင့်ပါကြောင်း ရေးသားတင်ပြအပ်ပါသည်။

 DOCA (မန္တလေး)

       ကျောက်ဆည်မြို့နယ်ရှိ တောင်သူအများစုမှာ စပါးစိုက်ပျိုးမှုအပြင် ဟင်းသီးဟင်းရွက် သစ်သီးဝလံများအား စီးပွားဖြစ်စိုက်ပျိုးလျက်ရှိရာ တောင်နောက်ကျေးရွာ၊ သံရွာကျေးရွာနှင့်  အရှေ့ သပြေကုန်းကျေးရွာများတွင် အများဆုံးစိုက်ပျိုးလျက်ရှိပြီး  မိသားစုအပိုဝင် ငွေရရှိသည့် ရာသီမရွေး စိုက်ပျိုးနိုင်ပြီး ရာသီမရွေးစားသုံးနိုင်သည့် ဈေးကွက်ဝယ်လိုအားရှိသည့် ကီလိုမာလကာပင်များကို လည်း စိုက်ပျိုးလာကြပါသည်။ ၎င်းသီးနှံကို  ယာမြေများတွင် ဩဂုတ်၊ စက်တင်ဘာလ များတွင် အများဆုံး စိုက်ပျိုးကြပါသည်။ မိုးဦးကျကာလများတွင် စိုက်ပျိုးပါက အပင်များ ပိုမိုရှင်သန်နိုင်ပြီး  အစေ့မျိုးပင်(သို့မဟုတ်) မြေထုပ် စည်းမျိုးပင်ကို (၁)နှစ် သားအရွယ်ရောက်လျှင် မြေချစိုက်ပျိုးနိုင် ပါသည်။ စိုက်ပျိုးရာတွင် (၁)ပင် နှင့်(၁)ပင် (၁၅-၁၆)ပေ ခြား၍ စိုက်ပျိုးရပါသည်။ မာလကာပင်ကို အစေ့မှ စိုက်ပျိုးလျှင် (၄-၅) နှစ်ထိ ကြာနိုင်ကြောင်း၊ ကိုင်းဆက်မြေထုပ်ပျိုးပင်ကို (၁)နှစ်ခွဲ (၂)နှစ် အတွင်းမှာ အသီးသီးပါကြောင်း ၊ စီးပွားဖြစ်စိုက်ပျိုးသော တောင်သူဦးကြီးများက ကိုင်းဆက် မြေထုပ်စည်းအပင်ကိုသာ အများဆုံးစိုက်ပျိုးကြပါသည် ။ ပျိုးပင်တစ်ပင်လျှင် အပင်အရွယ်အစား ပေါ်မူတည်၍ (၁၅၀၀-၂၅၀၀-၃၅၀၀-၄၀၀၀)ကျပ် အထိ ဈေးနှုန်းရှိကြောင်း ၊ (၁)ဧကလျှင် ကီလိုမာလကာပင် (၃၅၀)ပင် စိုက်ပျိုးကြပြီး (၁)နှစ်ခွဲသားတွင် ရောင်းတန်းဝင်အသီးများ စတင် ခူးဆွတ်ရကြောင်း ၊ စတင် ခူးဆွတ်ချိန်တွင် မာလကာသီးအလုံး (၁၀၀၀-၁၂၀၀)ခန့် ခူးဆွတ်ရ ကြောင်း၊ ယခုမိုးဦးကျနှင့် မိုးရာသီတွင် အသီးများ ဖြိုင်ဖြိုင်ထွက်ရှိသော်လည်း ဆောင်းနှင့်နွေတွင် အသီးအထွက်နှုန်း လျော့နည်းပါသည်။ အသီးများ ဖြိုင်ဖြိုင်ထွက်သော ရာသီဖြစ်သောကြောင့် ဈေးနှုန်းအနည်းငယ် ကျဆင်းသော်လည်း အကျိုးအမြတ် လျော့နည်းခြင်း မရှိကြောင်း ၊ ကီလိုမာလကာသီး တစ်လုံးလျှင်လက်လီဈေး (၄၀၀-၅၀၀)ကျပ် အထိ ရောင်းချရကြောင်း ၊ လက်ကားဈေးအနေဖြင့် အလုံးအကြီး ၊ အသေးပေါ်မူတည်၍ (၃၀၀-၄၀၀)ကျပ် ဈေးများဖြင့် ရောင်းချပေးကြောင်း၊ ကျောင်းဖွင့်ရာသီချိန် ဖြစ်သဖြင့်  ပိုမိုအရောင်းသွက်ကြောင်း၊ မာလကာသီးကို ဒေသတွင်းမြို့နယ်များရှိဈေးများနှင့်ရွှေသိမ်တော်ဘုရားသို့ လာရောက်ဘုရားဖူးကြသူများမှာလည်း အိမ်ပြန်လက်ဆောင်အနေဖြင့် အများဆုံးဝယ်ယူကြကြောင်း ၊ မာလကာသီး စားသုံးခြင်းဖြင့် ဗီတာမင်စီ များစွာရရှိသဖြင့် ကျန်းမာရေးနှင့်ညီညွတ်ပြီး စီးပွားလည်းဖြစ် ဝင်ငွေလည်းတိုးသော ကီလိုမာလကာပင်များကို မိသားစုအပိုဝင်ငွေရရှိအောင် တိုးချဲ့စိုက်ပျိုးသင့်ပါကြောင်း မာလကာသီး အများဆုံး စိုက်ပျိုးသော တောင်သူတစ်ဦး၏ ပြောကြားချက်အရ သိရှိရသည်။

   DOCA (မန္တလေး)