ပြည်တွင်းကုန်သွယ်မှုသတင်း

           ဧရာဝတီတိုင်းဒေသကြီး၊ မအူပင်ခရိုင်တွင် ဆောင်းသီးနှံမျိုးစုံ စိုက်ပျိုးခဲ့ပြီး မိုးရာသီ သီးနှံ ဆီထွက်သီးနှံစိုက်ပျိုးခြင်း မရှိကြောင်း သိရသည်။ စိုက်ပျိုးသော ဆောင်းသီးနှံများမှာ, မြေပဲ၊ ဆောင်းနှမ်း၊ နေကြာ၊ ပန်းနှမ်း၊ စသော သီးနှံ ၆မျိုးကို စိုက်ပျိုးထားကြောင်း မြေစာရင်းဌာန၏ စာရင်းများအရသိရသည်။

         နေကြာစိုက်ပျိုးသီးနှံ ၂၀၂၄-၂၀၂၅ ခုနှစ် စိုက်ပျိုး မှု မအူပင်မြို့နယ်အနေဖြင့် (၁၁၅၅၂) ဧက။ ပန်းတနော်မြို့နယ် အနေဖြင့်၊ (၄၇၄၆)ဧက၊ ညောင်တုန်းမြို့နယ်အနေဖြင့် (၆၉၀၁)ဧက၊ ဓနုဖြူမြို့နယ်အနေဖြင့် (၁၇၆၆၀)ဧက စုစုပေါင်းခရိုင်ချုပ် အနေဖြင့်(၄၀၈၅၉) ဧကရှိကြောင်း၊ မြေပဲသီးနှံ အနေဖြင့် မအူပင်စိုက်ဧက (၂၀၁၂)ဧက၊ ပန်းတနော်၊ (၁၂၆)ဧက ညောင်တုန်း၊ (၉၆၅)ဧက၊ ဓနုဖြူမြို့နယ် (၃၃)ဧက စိုက်ပျိုးထားရှိပြီး ခရိုင်ချုပ်အနေဖြင့်(၃၁၃၆)ဧက စိုက်ပျိုးခဲ့ ကြောင်း သိရသည်။  စိုက်ပျိုးသော နေကြာ၊ မြေပဲ သီးနှံတွေ အထွက်နှုန်းကောင်းစေဖို့၊ ပိုးမွှားအန္တရာယ် ကင်းရှင်း စေဖို့  သက်ဆိုင်ရာဌာန များမှလည်း ကူညီဆောင်ရွက်ပေးလျက်ရှိ ကြောင်းသိရပြီး၊   နေကြာက မြေအမျိုး အစားပေါ်မူ တည်ပြီး  အထွက်နှုန်း တွေ ကွာခြားပြီး  အထွက်နှုန်း နည်းတဲ့မြေယာတွေကို ပိုမိုထွက်ရှိအောင် စိုက်ပျိုးနိုင်ဖို့ တစ်မြို့နယ်လုံးအနေနဲ့ အထွက်တိုးအောင် ခရိုင်နဲ့မြို့နယ်စိုက်ပျိုးရေးဦးစီးဌာနနဲ့    တောင်သူတွေ ပူးပေါင်းလုပ် ဆောင်နေကြောင်း၊ မြေပဲ စိုက်ပျိုးသော်လည်း အထွက်နည်းပြီး လုပ်ငန်းလိုအပ်ချက်များအရ အခြားဒေသထွက် မြေပဲများကို မှာယူ၍ ဆီကြိတ်ခွဲထုတ်လုပ်ကြောင်း  ဦးဇော်မင်းထွန်းထံမှ သိရသည်။

           မအူပင်ခရိုင် ဆီထွက်သီးနှံအမျိုးမျိုး ကြိတ်ခွဲသောဆီစက်များရှိပြီး မေလ ၁လအတွင်း ထုတ်လုပ်နိုင်မှု တန်ချိန်အနေဖြင့်  မအူပင်တွင် ဆီစက် ၃စက်နှင့် ကြိတ်ခွဲထုတ်လုပ်နိုင်မှု တန်(၁.၄၁)တန်၊ ပန်းတနော်မြို့နယ်မှ ဆီစက်လုပ်ငန်း ၃စက် မှ ကြိတ်ခွဲထုတ်လုပ်မှုတန် (၀.၅၃)တန်၊ ညောင်တုန်းမြို့နယ်မှ ဆီစက် ၁ စက်မှ ကြိတ်ခွဲထုတ်လုပ်မှုတန် (၀.၁၆)တန်၊ ဓနုဖြူမြို့နယ်မှ ဆီစက်လုပ်ငန်း ၂စက်မှ ကြိတ်ခွဲထုတ်လုပ်နိုင်မှု တန်(၀.၄၈)တန် ရှိပြီး မအူပင်ခရိုင်အနေဖြင့် ဆီစက်လုပ်ငန်း စုစုပေါင်း(၉)စက်နှင့် စုစုပေါင်း ကြိတ်ခွဲထုတ်လုပ်နိုင်မှု တန်(၂.၅၈) တန်ကြိတ်ခွဲနိုင်ကြောင်း စားသုံးသူရေးရာဦးစီးဌာန၏ စာရင်းများအရ သိရသည်။ မြေပဲသီးနှံများကိုလည်း လိုအပ်ချပ်အရ အခြားဒေသမှ  မှာယူကြိတ်ခွဲထုတ်လုပ် ကြောင်းလဲသိရ သည်။  စိုက်ပျိုးထွက်ရှိသော ဆီထွက်သီးနှံများ ကို ကြိတ်ခွဲထုတ်လုပ်ပေးသော ဆီစက်လုပ်ငန်းများဖွံ့ဖြိုးတိုး တက်ရေး သည်လည်း အ‌ရေးကြီးသော ကဏ္ဍတစ်ရပ်ဖြစ်သည်။  ဆီစက်လုပ်ငန်း ဖွံ့ဖြိုးတိုးတက်ရေးနှင့် ကြိတ်ခွဲထုတ်လုပ်သော ဆီများ ဘေးအန္တရာယ်ကင်းစွာ ထုတ်လုပ်နိုင်ရေး ထုတ်ကုန်လုံခြုံစိတ်ချရမှု ရှိစေရေးအတွက် သက်ဆိုင်ရာဌာနတို့က  ကွင်းဆင်း စစ်ဆေးဆောင်ရွက်ခြင်း များလည်းရှိသည်။

           ဆီစက်လုပ်ငန်းများအား မြေပြင်ကွင်းဆင်းပြီး စားသုံးနေကြာဆီ ထုတ်လုပ်ရောင်းချရာတွင် ကုန်ကြမ်းမှကုန်ချောသို့ ရောက်ရှိပုံအဆင့်ဆင့် အခြေအနေ များ၊ ဆီထုတ်လုပ်နေမှုနှင့် ထုတ်ပိုးနေမှုများအား ကြည့်ရှုစစ်ဆေးခဲ့ပါသည်။ ဆီစက်လုပ်ငန်းတစ်ခုမှ   နေကြာ တစ်နာရီကိုတင်း(၄)ကြိတ်ခွဲ နေပြီး မီးအားကောင်းပါက တစ်နာရီ (၆)တင်းကြိတ်ခွဲနိုင်ကြောင်း ထွက်ရှိသောနေကြာဆီများကို ဈေးကွက်ဖြန့်ဖြူးရောင်းချမှုကို မေးမြန်းခဲ့ပြီး စားသုံးသူပြည်သူများ လူတန်းစားမရွေး စားသုံးနိုင်ရန် နေကြာဆီများကို (၁)ပိဿာလျှင် ယနေ့ ဇွန်လ တတိယပါတ် ပါတ်ရောင်းဈေး ငွေကျပ်(၁၈၀၀၀)ဦ မြေပဲဆီ ၁ပိဿာ ရောင်းဈေး ငွေကျပ်(၂၂၀၀၀)ဖြင့် မြို့နယ်တွင်းသို့သာ ဈေးကွက်ဖြန့်ချီရောင်းချပေးလျက်ရှိကြောင်းနှင့် သိရှိရပါသည်။

DOCA(ဧရာဝတီ)

    မြစ်ငါးများသည် လူကြိုက်များသော သဘာဝရေချိုငါးများဖြစ်ကြောင်း၊ မြင်းခြံမြို့၊ လေး အိမ်တန်းအုပ်စု၊ အင်ကြင်းပင်ကျေးရွာသည် ဧရာဝတီမြစ်၏ အရှေ့ဘက်တွင်တည်ရှိပြီး တံငါလုပ် ငန်းဖြင့် အသက်မွေးဝမ်းကျောင်းများ ပြုကြောင်း၊  ရေလုပ်သားများသည် မြစ်မှရရှိသောငါးများကို   မြင်းခြံမြို့၊ အေးမြသီတာဈေးတွင် လာရောက် ရောင်းချကြောင်း၊ မြစ်ငါးများသည် သဘာဝငါးများ ဖြစ်သောကြောင့်အရသာမှာ ထူးကဲချိုမြပြီး  မွေးမြူရေးငါးများထက် ဈေးကောင်းရရှိကြောင်း၊ တိလားဘီးရားငါး ၂၅ ကျပ်သားလျှင် (၂၅၀၀) ကျပ်၊ တစ်ပိဿာလျှင် (၉၅၀၀) ကျပ်၊ ငါးဇင်ရိုင်း အဖြူကြီး၂၅ ကျပ်သားလျှင် (၅၀၀၀) ကျပ်၊ တစ်ပိဿာလျှင် (၁၉၀၀၀)၊ မြစ်ငါးခူ (၂၅) ကျပ်သားလျှင် (၆၀၀၀)ကျပ်၊တစ်ပိဿာလျှင်(၂၃၀၀၀)ကျပ်၊  မြစ်ပုစွန်(၂၅)ကျပ်သားလျှင်(၁၂၀၀၀)ကျပ်၊ တစ်ပိဿာ လျှင်(၄၇၀၀၀)ကျပ် ပေါက်ဈေးများဖြင့် ရောင်းချကြောင်း၊ မြစ်ငါးများသည် သဘာဝရေချိုငါးများ ဖြစ်သောကြောင့် ဈေးကွက်တွင်လူကြိုက်များ၍ အရောင်းအဝယ် သွက်လျက်ရှိကြောင်း ငါးရောင်းချ သူတစ်ဦး၏ ပြောပြချက်အရသိရသည်။ မြစ်ငါး၏ အာဟာရတန်ဖိုးများမှာ ပရိုတင်းဓာတ် ကြွယ်ဝပြီး အဆီနည်းကြောင်း၊ အိုမီဂါ-၃ ဖက်တီး အက်စစ်ပါဝင်သောကြောင့် နှလုံးကျန်းမာရေးအတွက် ကောင်းမွန်ကြောင်း၊ စားသုံးမှုအနေဖြင့် မြန်မာဟင်းလျာများတွင် မြစ်ငါးများကို အမျိုးမျိုးချက်ပြုတ် စားသုံးကြကြောင်း သိရှိရသည်။

DOCA(မန္တလေး)

         ဧရာဝတီတိုင်းဒေသကြီး၊ မအူပင်မြို့နယ်၌ ရာသီအလိုက် ပဲသီးနှံအမျိုးမျိုးနှင့်ဟင်းသီးဟင်းရွက် ပဲတောင့်ရှည်ပင်များ စိုက်ပျိုးဖြစ်ထွန်းလျက်ရှိရာ ယခုလအတွင်း မိုးရာသီ ဟင်းသီးဟင်းရွက် စိုက်ခင်းများမှ ပဲတောင့်ရှည် များလှိုင်လှိုင် ထွက်လျက်ရှိသည်။

          ၂၀၂၅ခုနှစ် ဇွန်လမိုးဦးကာလအတွင်း ဟင်းသီးဟင်းရွက် ၃၃၈ ဧက စိုက်ပျိုးပြီးကြောင်း မြို့နယ်မြေစာရင်းဦးစီးဌာနမှသိရပြီး ပဲတောင့်ရှည်သည် အနယ်နယ်အရပ်ရပ် ဟင်းသီးဟင်းရွက်စျေးကွက်များ၌ နှစ်စဉ်ရောင်းအားကောင်းခဲ့၍ ယခုနှစ် မအူပင်မြို့နယ်၌ ပဲတောင့်ရှည်စိုက်ပျိုးသူများပြားလာကြောင်းသိရှိရသည်။

           ထိုပဲတောင့်ရှည်ပင်ကို မိုးဦးကျမှစ၍ စတင်စိုက်ပျိုးလေ့ရှိကြပြီး ရက်၃၀ ခန့်ကြာလျှင် စတင်ဆွတ်ခူးရောင်းချနိုင်ကြောင်း၊ တန်းခြားသုံးပေခန့်၊ပင်ခြားတစ်ပေခန့် ခွာကာဝါးတိုင်များ ထောင်၍စိုက်ပျိုးရ၍ တိုင်ထောင်ပဲဟုလည်းခေါ်ဆိုကြကြောင်း၊ တစ်ဧကလျှင်စုစုပေါင်း စိုက်ပျိုးမှုကုန်စရိတ် ငွေကျပ် သုံးသိန်းကျော်ရှိကြောင်း၊ ပဲသီး ၁၀တောင့်စီး ၁စီးလျှင် ၅၀၀-၇၀၀ကျပ်ရောင်းချနေကြောင်း၊ ၁ဧက ကုန်ကျစရိတ် ၃သိန်းကျပ်ရှိပြီး ၁ဧက အကျိုးအမြတ်အနေဖြင့် ၃သိန်းကျပ် ကျန်ရှိကြောင်း မိုးဦးကာလတွင်  ဒေသခံကုန်စိမ်းဒိုင်များက စျေးကောင်းပေး ဝယ်ယူနေကြ၍ စိုက်ပျိုးထုတ်လုပ်သူများ အကျိုးအမြတ်ရရှိလျက်ရှိကြောင်း ကျေးလက်တောင်သူများထံမှ သိရှိရပါသည်။

DOCA(ဧရာဝတီ)

            မြင်းခြံမြို့နယ်အတွင်းရှိ ကျေးရွာများဖြစ်သော လေးအိမ်တန်း၊ ဘောလုံး၊ လှိုင်းတက်၊ အနိမ့်နှင့် နဘူးအိုင်ကျေးရွာများမှ တောင်သူများက မိသားစုစားဝတ်နေရေးအတွက် အပိုဝင်ငွေရ ရှိရန်  ဥယျာဉ်ခြံမြေများ စိုက်ပျိုးလျှက်ရှိရာ ထွက်ရှိသောရွှေဖရုံညွှန့်များကို တောင်သူများက အေးမြသီတာဈေးသို့ လာရောက်‌ရောင်းချကြောင်း၊ ၂၀၂၅ ခုနှစ်၊ ဇွန်လ တတိယပတ်တွင် ရောင်းချ နေသော ရွှေဖရုံညွှန့် (၂၅) ကျပ်သားလျှင် (၁၅၀၀) ကျပ် ပေါက်ဈေးများရှိကြောင်း၊ ယခုမိုးရာသီ အချိန်တွင် ရာသီပေါ်ရွှေဖရုံညွှန့်များ လှိုင်လှိုင်ထွက်ပေါ်ချိန်ဖြစ်သောကြောင့် ပေါပေါများများရရှိ နိုင်ကြောင်း၊ လူကြိုက်များသော ရွှေဖရုံညွှန့်များ စားသုံးမှုများ၍  အရောင်းအဝယ်ဖြစ်လျက်ရှိပြီး တောင်သူများ အနေဖြင့်အပိုဝင်ငွေရရှိကြောင်း သိရှိရသည်။  ကျန်းမာရေးအကျိုးကျေးဇူးအနေဖြင့် ရွှေဖရုံညွှန့်သည် အမျှင်ဓာတ်ကြွယ်ဝသဖြင့် အစာခြေစနစ်ကိုကောင်းမွန်စေပြီး ဝမ်းချုပ်ခြင်းကို ကာကွယ်ပေးကြောင်း၊ ပိုတက်ဆီယမ် ပါဝင်သောကြောင့် သွေးပေါင်ချိန်ကို ထိန်းညှိပေးပြီး နှလုံး ရောဂါကိုလျော့ချပေးကြောင်း၊ ဗီတာမင် အေ၊ စီ ပါဝင်သောကြောင့် ကိုယ်ခံအားကိုမြှင့်တင်ပေး၍ အရွယ်တင်နုပျိုစေကြောင်းသိရှိရသည်။ 

DOCA(မန္တလေး)

   မန္တလေးတိုင်းဒေသကြီး ၊ ကျောက်ဆည်ခရိုင်တွင်  သီးနှံမျိုးစုံ စိုက်ပျိုးဖြစ်ထွန်းလျက်ရှိပြီး ရာသီ(၃)မျိုးလုံး စိုက်ပျိုးကြကြောင်း၊ ဈေးကွက်ဝယ်လိုအားရှိသော ဖူးစားပြောင်းကိုလည်း စိုက်ပျိုး လျက်ရှိရာ စဉ့်ကိုင်မြို့နယ်တွင် ဖူးစားပြောင်း စိုက်ပျိုးဧက (၉၉) ဧက စိုက်ပျိုးပြီးစီးပြီးဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ အများဆုံး စိုက်ပျိုးသောမျိုးမှာ သကြားပြောင်း မျိုးဖြစ်ကြောင်း၊ ပြောင်းဖူးစိုက်ပျိုးမှု မျိုးအနေဖြင့် တစ်ဧကလျှင် (၅)ပြည်ခန့် ကုန်ကျကြောင်း၊ ပြောင်းဖူးမျိုးစေ့ တစ်ပြည်လျှင်(၅၅၀၀/-)ကျပ်ဖြင့် ဝယ်ယူစိုက်ပျိုးရကြောင်း၊ တစ်ဧက ကုန်ကျစရိတ် အနေဖြင့် မျိုးသွင်းအားစု ၊ လုပ်သားခ အပါအဝင် စုစုပေါင်း (၃၀၀၀၀၀)ကျပ်ခန့် ကုန်ကျကြောင်း၊ ဖူးစားပြောင်း စိုက်ပျိုးမှုအနေဖြင့် ဘောင်ကြောင်းပေးစနစ်ဖြင့် အတန်းလိုက် အစေ့ချ ထယ်ဖုံး စနစ်ဖြင့် စိုက်ပျိုးကြကြောင်း၊ အများဆုံး စိုက်ပျိုးသော ရွာများမှာ ပင်းချား ၊ ဖလံဘိုရွာများတွင် အများဆုံးစိုက်ပျိုးကြကြောင်း ၊ တစ်ဧက အထွက်နှုန်းအနေဖြင့် (၄၀၀၀)ဖူးခန့် ထွက်ရှိခဲ့ပြီး ယခင်နှစ်ပြောင်းဖူးဈေးနှုန်းအနေဖြင့် တစ်ဖူးလျှင် (၃၀၀)ကျပ် ရောင်းချခဲ့ရပြီး စိုက်ပျိုးစရိတ်နှုတ်ပြီး (၉၀၀၀၀၀/-)ကျပ်ခန့် မြတ်ခဲ့ကြောင်း၊ ယခုလက်ရှိ ဈေးကွက်အတွင်း ရောင်းချနေသော ပြောင်းဖူး ဈေးနှုန်းအနေဖြင့် တစ်ဖူးလျှင်(၃၅၀/-)ကျပ်ဖြင့် ရောင်းဝယ်လျက်ရှိပြီး ပြောင်းဖူးပြုတ်ရောင်းချသူ များမှတစ်ဖူးလျှင် (၈၀၀/-)ကျပ်ဖြင့် ရောင်းဝယ်လျက်ရှိကြောင်း ၊ ပြောင်းဖူးပေါ်ချိန်တွင် ပွဲစားများမှ အခင်းထဲအရောက် လာရောက်ဝယ်ယူသူ ရရှိသလို တစ်ချို့ပွဲစားများမှာ ပြောင်းဖူးအခင်းပြတ် ကြိုတင်ဝယ်ယူသူများလည်းရှိကြောင်း ပြောင်းဖူးစိုက်ပျိုးသော တောင်သူတစ်ဦး၏ ပြောကြားချက် အရသိရှိရပါသည်။

DOCA(မန္တလေး)