ပြည်တွင်းကုန်သွယ်မှုသတင်း

   မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက် ဒေသတစ်ခုဖြစ်ပြီး သီးနှံမျိုးစုံ စိုက်ပျိုးဖြစ်ထွန်းလျက်ရှိရာ စားဖိုဆောင်သီးနှံတစ်မျိုးဖြစ်သည့် ငရုတ်သီးရုံကိုလည်း စိုက်ပျိုးကြရာမြစ်သားမြို့နယ်အတွင်း ငရုတ်စိုက်ဧက (၁၃၆၉)ဧက စိုက်ပျိုးပြီးစီးပြီဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည် ။  စိုက်ပျိုးသော မျိုးအနေဖြင့် (၆၉၂ ၊ သာမို နှင့် ဒီမွန်မျိုးများကို) စိုက်ပျိုးကြကြောင်း ၊ စိုက်ပျိုးမှုအနေဖြင့် ပျိုးထောင်စိုက်ပျိုးကြပြီး ငရုတ်ပျိုး သက်တမ်း (၁)လတွင် ပျိုးနှုတ်စိုက်ပျိုးကြကြောင်း ဘောင်များဖွဲ့၍ တစ်ပေခြားလျှင် (၁)ပင် စိုက်ပျိုးပြီး တစ်ဧက ကုန်ကျစရိတ်အနေဖြင့် မျိုး၊ သွင်းအားစု ၊ လုပ်သားခအပါအဝင် စုစုပေါင်း (၁၅၀၀၀၀၀/-)ကျပ်ခန့် ကုန်ကျကြောင်း၊ အများဆုံးစိုက်ပျိုးသော ရွာများမှာ သိုတန်ရွာ၊ ဆင်းကွတ် ရွာနှင့်ကျောက်ဆောက်ရွာများတွင် အများဆုံး စိုက်ပျိုးကြကြောင်း ၊ အထွက်နှုန်းအနေဖြင့် ငရုတ် အခြောက်ပိဿာ (၄၀၀-၅၀၀) ပိဿာခန့် ထွက်ရှိခဲ့ပြီး ယခင်နှစ်ဈေးနှုန်းအနေဖြင့် ငရုတ်အခြောက် အညှာပါ တစ်ပိဿာလျှင် (၈၀၀၀)ကျပ်၊ အညှာခြွေတစ်ပိဿာလျှင် (၁၀၀၀၀)ကျပ်ဖြင့် ရောင်းချခဲ့ ပြီးအကျိုးအမြတ်အနေဖြင့် စိုက်ပျိုးစရိတ်နှုတ်ပြီး (၁၇၀၀၀၀၀/-)ကျပ်ခန့် မြတ်ခဲ့ကြောင်း ၊ ယခု လက်ရှိ ငရုတ်သီးပေါက်ဈေးအနေဖြင့် ငရုတ်သီးအညှာပါ တစ်ပိဿာလျှင် (၁၀၀၀၀/-)ကျပ်၊ အညှာခြွေ တစ်ပိဿာလျှင် (၁၂၀၀၀/-)ကျပ်တို့ဖြင့် ရောင်းဝယ်လျက်ရှိကြောင်း ၊ ငရုတ်ပင်များ အောင်မြင်ဖြစ်ထွန်းပြီး ငရုတ်သီးထွက်ပေါ်ချိန်တွင်လည်း ငရုတ်သီး ဈေးနှုန်းများကောင်းမွန်ပါက တောင်သူများ အကျိုးအမြတ် ပိုမိုဖြစ်ထွန်းနိုင်မည်ဖြစ်ကြောင်း ငရုတ်စိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

   မန္တလေးတိုင်းဒေသကြီး ၊ ကျောက်ဆည်ခရိုင်သည် ဆီထွက်သီးနှံမျိုးစုံ အောင်မြင်ဖြစ်ထွန်းလျှက်ရှိရာ ၄င်းသီးနှံများအနက် နွေနှမ်းသီးနှံကို ၂၀၂၅-၂၀၂၆ ဘဏ္ဍာနှစ်တွင် စဉ့်ကိုင်မြို့နယ်၌ (၂၃၄၄၄)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာ၏ စာရင်းများအရသိရှိရပါသည်။ နွေနှမ်း(၁)ဧက စိုက်ပျိုးလျှင် မျိုးအနေဖြင့် (၃)ပြည်ခန့်ကုန်ကျကြောင်း ၊ နှမ်းမျိုး(၁)ပြည်လျှင် (၈၀၀၀/-)ကျပ် စျေးနှုန်းဖြင့်ဝယ်ယူစိုက်ပျိုးရကြောင်း၊နွေနှမ်းစိုက်ပျိုးမှု(၁)ဧကကုန်ကျစရိတ်အနေဖြင့်မျိုး၊သွင်းအားစု၊ လုပ်သားခအပါအဝင် စုစုပေါင်း (၄၀၀၀၀၀/-)ကျပ်ခန့်ကုန်ကျကြောင်း ၊ စိုက်ပျိုးသော မျိုးများမှာ နှမ်းဖြူ၊နှမ်းညို၊နှမ်းနက်မျိုးများကို အများဆုံးစိုက်ပျိုးကြကြောင်း၊ ယခုအချိန်တွင် နွေနှမ်းများ ဖြိုင်ဖြိုင်ရိတ်သိမ်းလျှက်ရှိရာ အထွက်နှုန်းအနေဖြင့်(၈)တင်း ဝန်းကျင်ခန့်ထွက်ရှိကြောင်း ၊ ယခင်နှစ် နှမ်းစျေးနှုန်းအနေဖြင့် နှမ်းဖြူတစ်တင်းလျှင်(၁၄၀၀၀၀/-)ကျပ် ၊ နှမ်းညိုတစ်တင်းလျှင်(၁၀၀၀၀၀/-) ကျပ်၊နှမ်းနက်ရိုးရိုးတစ်တင်းလျှင်(၇၅၀၀၀/-)ကျပ် စျေးနှုန်းများဖြင့် ရောင်းဝယ်ခဲ့ပြီး ၊ ယခုအချိန်တွင် နှမ်းဖြူတစ်တင်းလျှင် (၁၃၀၀၀၀/-)ကျပ် ၊ နှမ်းညိုတစ်တင်းလျှင်(၁၀၀၀၀၀/-)ကျပ် ၊ နှမ်းနက် ရိုးရိုး တစ်တင်းလျှင်(၉၅၀၀၀/-)ကျပ်စျေးနှုန်းများဖြင့်အရောင်းအဝယ်ဖြစ်နေကြောင်း၊ယခင်နှစ်နှင့်ယခုနှစ် စျေးနှုန်းများနှိုင်းယှဉ်ပါက နှမ်းဖြူနှင့်နှမ်းညိုစျေးမှာ အနည်းငယ်ကျဆင်းပြီး နှမ်းနက်ရိုးရိုးမှ အနည်း ငယ်မြင့်တက်လျှက်ရှိပါသည်။ စျေးကွက်အနေဖြင့် ကျောက်ဆည်မြို့ပေါ်ရှိ ပွဲရုံများသို့ လာရောက် ရောင်းချကြပြီးပွဲရုံများမှတစ်ဆင့်မန္တလေး၊ရန်ကုန်မြို့များသို့တင်ပို့ရောင်းချကြကြောင်းသိရှိရပါသည်။နှမ်းဆီစျေးနှုန်းအနေဖြင့် (၁)ပိဿာလျှင် (၁၅၀၀၀/-)ကျပ် စျေးနှုန်းများဖြင့် ရောင်းဝယ်လျှက်ရှိပြီး နှမ်းဖတ်(၁)ပိဿာလျှင်(၄၀၀၀/)ကျပ်စျေးနှုန်းများဖြင့်ရောင်းဝယ်လျှက်ရှိကြောင်း၊ အကျိုးအမြတ်အနေဖြင့်(၆၀၀၀၀၀/-)ကျပ် ဝန်းကျင်မြတ်ကြောင်း နှမ်းစိုက်တောင်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)

          ပဲခူးတိုင်းဒေသကြီး၊ သာယာဝတီခရိုင် လက်ပံတန်းမြို့ဈေးအတွင်းရောင်းချလျှက်ရှိသော ကြက်သွန်နီလက်လီဈေးနှုန်းများမှာ ဇွန်လပထမပတ်မှဇွန်လတတိယပတ်ထိ ကြက်သွန်နီ အကြီးတစ်ပိဿာလျှင် ၂၀၀၀/ ကျပ်၊အသေး တစ်ပိဿာလျှင် ၁၅၀၀/ကျပ် ဈေးနှုန်းဖြင့် လက်လီ ရောင်းချခဲ့ပါသည်။ လက်ကားဈေးနှုန်းအနေဖြင့် အချိန်(၁၀)ပိဿာ မှ စတင်၍အိတ်လုံးဈေး ကြက်သွန်နီအကြီး တစ်ပိဿာလျှင်၁၈၀၀/ကျပ်၊  ကြက်သွန်နီအလတ် တစ်ပိဿာ လက်ကား ဈေးနှုန်းမှာ ၁၆၀၀/ ကြက်သွန်နီအသေး လက်ကားဈေးနှုန်းတစ်ပိဿာလျှင်၁၃၀၀/ ကျပ်ဈေးနှုန်းဖြင့် အသီးသီးရောင်းချခဲ့ပါသည်။ ယခင်နှစ် ကြက်သွန်နီ ဈေးနှုန်းများသည် ဧပြီလ နောက်ဆုံး ပတ်လောက်တွင် ကြက်သွန်နီဈေးများ တရိပ်ရိပ်တက်နေပြီး ယခုနှစ်တွင် ကြက်သွန်နီ ဈေးနှုန်းများ သည် ဇွန်လ တတိယပတ်အထိ ဈေးနှုန်းများတက်သွားခြင်းမရှိ ဈေးငြိမ်နေကြောင်း ကြက်သွန်နီဈေး ရောင်းချ သူ တစ်ဦးထံမှ သိရှိရပါသည်။

           အာလူးဈေးကွက် ရောင်းချမှုအနေဖြင့် အာလူးတစ်ပိသာလျှင် ဇွန်လ ပထမပတ်တွင်  ၄၀၀၀/ ကျပ်မှ ၄၅၀၀/ ကျပ်ဈေးရှိခဲ့သော်လည်းယခု ဇွန်လ တတိယပတ်တွင်  လည်းအာလူး ဈေးနှုန်းများမှာ ၅၀၀၀/ ကျပ်ဈေးဖြင့် ရောင်းချသဖြင့် ဈေးနှုန်းအနည်းငယ်တက်နေပါကြောင်း သိရှိရပါသည်။

DOCA(ပဲခူး)

             ပဲခူးတိုင်းဒေသကြီး သာယာဝတီခရိုင် အုတ်ဖိုမြို့နယ်မှခြံစိုက်ပျိုး၍ စီးပွားရေးလုပ်ကိုင် လာကြသည်။ တောင်သူများသည်ယခုနှစ်တွင်ရုံးပတီကိုအဓိကထားစိုက်ပျိုးကြပါသည်။

            ရုံးပတီပင်သည် ရက်တိုတိုဖြင့် ဝင်ငွေရရှိပြီး ရာသီဥတုဒဏ်ခံနိုင်ရည်ရှိသည့် သက်တမ်းတို အပင်မျိုးဖြစ်ပြီး တစ်ရက်ခြား ခူးဆွတ်ရရှိခြင်းဖြစ်သဖြင့် ဝင်ငွေမပြတ်ရရှိနိုင် ကြောင်းသိရှိရပါသည်။ ရုံးပတီသီး စိုက်ပျိုးရန်အတွက် ကုန်ကျစရိတ်အနေဖြင့် ရုံးပတီသီး တစ်ဧကလျှင် မျိုးစေ့ဘိုး (၃၅၀၀၀၀/)ကျပ်၊ အပင်အားဆေး ကျွေးရန် (၃) ကြိမ် အတွက်(၁၄၆၀၀၀/၀)ကျပ်၊မှိုသတ်ဆေး ဘိုး  (၄၆၀၀၀/)ကျပ်၊စိုက်ပျိုးထွန်ယက်ပြုပြင်ခြင်းကုန်ကျစရိတ်(၁၆၀၀၀၀/)ကျပ်၊မြက်နှုတ်ပေါင်းလိုက်ခ(၂၅၀၀၀၀/)ကျပ်၊ ခူးဆွတ်သယ်ယူခ (၂၇၀၀၀၀/) ကျပ် ခန့် ကုန်ကျနိုင်ပြီး စုစုပေါင်းကုန် ကျစရိတ်ငွေ (၁၂၂၂၀၀၀/) ကျပ် ခန့်ကုန်ကျနိုင်ပါသည်။

          တစ်ဧကအထွက်နှုန်းအနေဖြင့် တစ်ရက်လျှင် အတောင့်(၈၀၀၀/မှ၁၀၀၀၀)အထိ အကြိမ် ရေ (၁၅ကြိမ်မှ ၂၀ကြိမ်)ထိခူးဆွတ်ရရှိနိုင်ပါသည်.။ယခုအချိန်ဈေးကွက်ပေါက်ဈေးအရ တစ်တောင့်လျှင် (၂၀ကျပ်မှ၃၀ကျပ်) ထိရရှိနေပြီး၊ ပျမ်းမျှအကြိမ်(၁၆)ကြိမ်၊အတောင့်ရေ(၁၂၈၀၀၀)တောင့် ပျမ်းမျှ ပေါက် ဈေး(၂၄)ကျပ် ဈေးဖြင့်တစ်ဧက ဝင်ငွေ(၃၀၇၂၀၀၀/)ကျပ် ရရှိပါသည်။ တစ်ဧကအကျိုးအမြတ်အနေဖြင့် ကျပ်သိန်း (၂၀) ကျော် ရရှိနိုင်ပါသော်လည်း ယခုနှစ်တွင် ရေကြီးနစ်မြှပ်မှုဖြစ်ပေါ်ခဲ့သောကြောင့် အပင်အနည်းငယ် ထိခိုက်မှု ရှိသဖြင့်ကျပ်သိန်း (၁၈) သိန်းခန့်သာ ရရှိကြောင်း သိရှိရပါသည်။

DOCA(ပဲခူး)

          မကွေးတိုင်းဒေသကြီး၊ အထက်မင်းလှမြို့၊ ပန်းတော်ပြင်ကျေးရွာအုပ်စုရှိ မယ်ဇလီတောကျေးရွာတွင် သီးနှံမျိုးစုံစိုက်ပျိုးကြပြီး ပြောင်းသီးနှံများကို စိုက်ဧက ၃၅ ဧကခန့် စိုက်ပျိုးထားရှိကြောင်း သိရသည်။

     ပြောင်းသီးနှံကို ဧပြီလတွင် စတင်စိုက်ပျိုး၍ စိုက်ပျိုးပြီး(၂)လကျော်အကြာတွင် ခူးဆွတ်ရ ကြောင်း၊ မျိုးအနေဖြင့် ထိုင်ဝမ်ပြောင်းစီး(အဖြူ)မျိုးများကို စိုက်ပျိုးကြပြီး တစ်ဧကလျှင် မျိုးထုပ် (၈) ထုပ်ခန့် ကုန်ကျကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ ယခင် နှစ်ကစိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခ အပါအဝင် တစ်ဧကလျှင် ငွေကျပ်(၉)သိန်းခန့် ကုန်ကျခဲ့သော်လည်း ယခုနှစ်တွင်မူ သွင်းအားစုစရိတ် အနည်းငယ်မြင့်တက်လာ၍ ကျပ်(၁၀)သိန်းခန့်ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ပြောင်းဖူးအရေအတွက် (၉၀၀၀) ခန့်ထိထွက်ရှိရာ စိုက်ပျိုးမြေအနေအထားနှင့် သီးနှံဖြစ်ထွန်းအောင်မြင်မှုအပေါ်မူတည်၍ သီးနှံ အထွက်နှုန်းများ ကွဲပြားမှုရှိကြောင်း၊ ဈေးနှုန်းအနေဖြင့် ၂၀၂၅ခုနှစ်၊ ဇွန်လ(တတိယပတ်)တွင် ပြောင်းဖူး တစ်ဖူးလျှင် (အကြီး၊ အသေးအလိုက်)လက်ကားဈေး ကျပ်(၃၅၀-၄၀၀)နှုန်းဖြင့်ရောင်းချရပြီး အကျိုး အမြတ်အနေဖြင့် တစ်ဧကလျှင် ကျပ်(၂၁)သိန်းမှ(၂၆)သိန်း ခန့်ရရှိကြောင်း၊ ဈေးကွက်အနေဖြင့် အထက်မင်းလှမြို့ပေါ်ရှိ ကုန်စိမ်းပွဲရုံများသို့ တင်ပို့ရောင်းချလျက်ရှိရာ ပြောင်းသီးနှံစိုက်ပျိုးခြင်းဖြင့် တောင်သူများ အကျိုးအမြတ်ရရှိကာ အဆင်ပြေလျက်ရှိကြောင်း ပြောင်းစိုက်တောင်သူတစ်ဦးထံမှ သိရသည်။

DOCA(မကွေး)