ပြည်တွင်းကုန်သွယ်မှုသတင်း

      စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့၊ ပိတောက်မြိုင်ဈေးတွင် ဟင်းသီးဟင်းရွက် အမျိုးမျိုးဖြစ်သော  ရုံးပတီသီး၊ မုံလာထုတ်(ခေါ်)ဂေါ်ဖီထုတ်၊ ပန်းဂေါ်ဖီ၊ ဂေါ်ရခါးသီး၊ ခါကြက်ဥ၊ ဘိုစားပဲသီး၊ ရွှေပဲသီး၊ ပဲသီးတောင့်ရှည်၊ ကြက်ဟင်းခါးသီး၊ ကင်းမုံသီး ၊ မျှစ်စိမ်း၊ မျှစ်ပြုတ်၊ ရွှေဖရုံသီး၊ ဘူးသီး၊ ကန်ဇွန်းရွက်၊ ချဉ်ပေါင်ရွက် နှင့် ပဲလင်းမြွေသီး(ခေါ်)ဗုံလုံသီး တို့ကို ရောင်းချနေကြောင်း သိရှိရပါသည်။

          ၂၀၂၅ ခုနှစ်၊ အောက်တိုဘာလ(ဒုတိယပတ်)တွင် ကျွန်းလှမြို့၊ သစ်ရာမြိုင်ဈေး၌ ဖြစ်ပေါ်နေသော ဟင်းသီးဟင်းရွက်အမျိုးမျိုး၏ ဈေးနှုန်းအနေဖြင့် ဂေါ်ရခါးသီး တစ်လုံးလျှင်(၈၀၀/၇၀၀)ကျပ်၊ မုံလာထုတ် တစ်ထုတ်လျှင်(၃၀၀၀/၃၅၀၀)ကျပ်၊ ပန်းဂေါ်ဖီ တစ်ပွင့်လျှင်(၃၀၀၀)ကျပ်၊ ခါကြက်ဥ(ဗမာ) တစ်ပိဿာ လျှင်(၁၀၀၀၀)ကျပ်၊ ခါကြက်ဥ(တရုတ်)တစ်ပိဿာ(၁၅၀၀၀)ကျပ်၊ ကင်ပွန်းချဉ်ရွက် တစ်စီးလျှင်(၂၀၀) ကျပ်၊ ချဉ်ပေါင်ရွက် တစ်ပိဿာ(၁၂၀၀)ကျပ်၊ ကန်ဇွန်းရွက် တစ်စီးလျှင်(၁၀၀)ကျပ်၊ ကြက်ဟင်းခါးသီး တစ်ပြည်လျှင်(၃၈၀၀)ကျပ်၊ ကြက်ဟင်းခါးသီး  ထိုင်ဝမ် တစ်ပိဿာလျှင်(၄၀၀၀)ကျပ်၊ ရွှေဖရုံသီး တစ်ပိဿာလျှင်(၃၀၀၀)ကျပ်၊ ဘူးသီး တစ်လုံးလျှင် (၂၀၀၀)ကျပ် ကင်းမုံသီး တစ်ပြည်လျှင်(၁၅၀၀)ကျပ်၊ ပဲလင်းမြွေသီး တစ်တောင့်လျှင် (၇၀၀/၈၀၀/၅၀၀)ကျပ်၊ မုံညှင်းထုတ် တစ်ပိဿာလျှင်(၈၀၀၀)ကျပ်၊ မယ်ဇလီဖူး နို့ဆီ(၁)ဘူးလျှင်(၄၀၀)ကျပ်၊ခရမ်းသီး တစ်ပိဿာလျှင်(၃၈၀၀)ကျပ်၊ ရုံးပတီသီး တစ်ပိဿာ လျှင်(၂၀၀၀)ကျပ်၊ ပဲသီးတောင့်ရှည်(၅)တောင့်ပါ တစ်စည်းလျှင်(၃၀၀)ကျပ်၊ မျှစ်စိမ်း တစ်ပိဿာလျှင် (၅၀၀၀)ကျပ်၊ မျှစ်ပြုတ် တစ်ပိဿာလျှင်(၆၀၀၀) ကျပ်၊ ငရုပ်သီးစိမ်း တစ်ပိဿာလျှင်(၃၅၀၀)ကျပ်၊ ကုလားအော် ငရုပ်သီးစိမ်း တစ်ပြည်လျှင်(၈၀၀၀)ကျပ်၊ ရိုးရိုးဗမာပြောင်းဖူး တစ်ဖူးလျှင် (၂၅၀/၃၀၀) ကျပ်နှင့် ဘိုစားပဲသီး တစ်ပိဿာလျှင်(၁၂၀၀၀)ကျပ် ဈေးနှုန်းတို့ဖြင့် အရောင်းအဝယ်ဖြစ်နေကြောင်း သိရပါသည်။

DOCA(စစ်ကိုင်း)

        ဧရာဝတီတိုင်ဒေသကြီးအတွင်း ပင်လယ်ကမ်းခြေဒေသများဖြစ်သော ငွေဆောင်ပင်လယ် ကမ်းခြေဒေသများတွင် သဘာဝအလျောက်နေထိုင်ပြီး အများဆုံးတွေ့ရှိရသည့် ဇီဝဇိုးငှက်များမှ အသိုက်ကိုအန်ဖတ်ဖြင့် ပြုလုပ်၍ ဥ ဥကာ ငှက်ပေါက်ကလေးများအတောင်အလက်စုံပြီး အသိုက်ကိုစွန့်ခွာသွားချိန် ၎င်းအသိုက်ကို ခွာယူ၍ လူသားတို့ကျန်းမာရေးအတွက် ခွန်အားဖြည့် ဖြည့်စွက်စာအဖြစ် ငှက်သိုက်ကုန်ချောပြုလုပ်ကာ ဈေးကွက်တွင် ရောင်းချလျှက်ရှိကြောင်း သိရသည်။

          ဧရာဝတီတိုင်းဒေသကြီး ချောင်းသာ၊ ငွေဆောင်ပင်လယ်ကမ်းခြေဒေသများတွင် ဇီဝဇိုး ငှက်မွေးမြူသူလုပ်ငန်းရှင် (၁၄) ဦးရှိပြီး ယခုအခါဖျာပုံမြို့နယ် ၊ သလိပ်ကြီးကျေးရွာအုပ်စု၊ သလိပ်ကလေးကျေးရွာတွင်လည်း ၁၀၂၃ ခုနှစ်မှစ၍ ယခုအချိန်အထိ ဇီဝဇိုးငှက်မွေးမြူသူ (၂၀) ဦးခန့် တိုးချဲ့မွေးမြူလျှက်ရှိကြောင်းသိရပါသည်။

          ငှက်သိုက်သည် ပရိုတင်းဓာတ်ကြွယ်ဝ၍ အဟာရဓာတ်များစွာ ပါဝင်ပြီး သက်ကြီးရွယ် အိုများ နာတာရှည်ရောဂါရှိသူများ ၊လူမမာများ၊ အားကစားသမားများ ၊ အားအင်ကုန်ခမ်း နေသူများ၊ သွေးတိုးရောဂါ၊ဆီချိုရောဂါနှင့် အဆုတ်လူမမာများ အတွက် ကိုယ်ခံအားစနစ် အထူးကောင်းမွန်စေပါသည်။ ငှက်သိုက်ကုန်ချောများကို ပြည်တွင်းသုံးစွဲလျှက်ရှိသလို ပြည်ပ နိုင်ငံများသို့လည်း တင်ပို့ရောင်းချလျှက်ရှိသည့်အတွင်း တိုင်းပြည်စီးပွားရေးဖွံ့ဖြိုးတိုးတက် မှုအတွက် တဖက်တလမ်းမှပါဝင်လျက်ရှိကြောင်းရေးသားလိုက်ရပါသည်။

DOCA(ဧရာဝတီ)

                မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့ရှိ အေးမြကြည်လင်စျေးနှင့် မြို့မစျေးတို့တွင်  ရာသီစာအသီးအနှံများကို  စိုက်ပျိုးရောင်းချလျက်ရှိရာ  ယခုအခါ  ပုပ္ပါးဒေသမှ ဩဇာသီးများလှိုင်လှိုင်ဝင်ရောက်လျက်ရှိကြောင်း၊ သြဇာသီးကို အိန္ဒိယလူမျိုးတွေက အစိမ်းစားသည့် အပြင် ကိတ်မုန့်တွေ မုန့်အချို တွေလုပ်စားကြကြောင်း၊ ကျောက်ဆည် ဈေးကွက်အတွင်းသို့ သြဂုတ်လတွင် စတင် ဝင်ရောက်လျက်ရှိပြီး  သြဇာသီးစျေးနှုန်းအနေဖြင့် စက်တင်ဘာလ ပထမအပတ်တွင် အကြီးတစ်လုံး လျှင် (၁၃၀၀/-)၊ အလတ်တစ်လုံးလျှင်(၁၀၀၀/-)ကျပ်၊ အသေးတစ်လုံးလျှင်(၈၀၀/-)ကျပ်ဖြင့် အရောင်းအဝယ်ဖြစ်ပေါ်ခဲ့ပြီး စက်တင်ဘာလ ပထမပတ်၊ ဒုတိယပတ်။တတိယပတ်များတွင် စျေးနှုန်းတည်ငြိမ်ခဲ့ပြီး စက်တင်ဘာလ နောက်ဆုံးအပတ်တွင် အကြီးတစ်လုံးလျှင် (၇၀၀/-)ကျပ်၊ အလတ်တစ်လုံးလျှင် (၅၀၀/- ကျပ်၊ အသေးတစ်လုံးလျှင်(၃၀၀/-) ကျပ် စျေးနှုန်းများဖြင့် ‌ရောင်းချလျှက်ရှိပြီး သြဇာသီး များလှိုင်လှိုင် ဝင်ရောက်လျက်ရှိသောကြောင့် စျေးနှုန်းအနည်းငယ် ကျဆင်းသွားကြောင်းသိရှိရပါ သည်။

DOCA(မန္တလေး)

                ထောပတ်သီးကို နည်းမျိုးစုံဖြင့်စားသုံးကြသည်။ ထောပတ်သီး၏ မူရင်းအရသာသည် စိမ့်၍ အနည်းငယ်အီသော အရသာရှိသည်။  ထောပတ်သီးကို ဖျော်ရည်၊ အသုပ်၊ ပူတင်း၊ ကိတ်မုန့်၊ ရေခဲမုန့်၊ ဂျယ်လီ စသည်ဖြင့် ပြုလုပ်စားသုံးနိုင်သလို ဟင်းချက်စား၍လည်း ရသည်။ ကျွန်မတို့မြန်မာနိုင်ငံတွင် ထောပတ်သီးကို ဖျော်ရည်အနေဖြင့် အများဆုံးစားသုံးကြသည်။ ဆားအနည်းငယ်ထည့်၍ သဘာဝ အတိုင်း စားသုံးပါက ကျန်းမာရေး အလွန် ညီညွတ်သည်။ ထောပတ်သီးတွင် ကယ်လိုရီနှင့် အဆီဓာတ် များကြွယ်ဝစွာ ပါဝင်ပြီး ဗီတာမင်အေ၊ ဗီတာမင်စီ၊ ဗီတာမင်အီး၊ ဗီတာမင်ကေ၊ သတ္ထုဓာတ်နှင့် သံဓာတ် များလည်း ပါဝင်သည်ဟု သိရသည်။ ထောပတ်သီးက အာဟာရဓါတ်များစွာ ပေးသည့်အပြင်  စားသုံးရန် တစ်ခုတည်းအတွက်မဟုတ်ဘဲ ခေါင်းလျှော်ရည်၊ ဆပ်ပြာ၊သဘာဝဆိုးဆေး  စသည်ဖြင့်လည်း အလှကုန် ပစ္စည်းများတွင်လည်းအသုံးပြုကြသည်။ ထောပတ်သီးအစေ့ကို ရေနွေးဆူတွင်တည်ထားပါက ပန်းရောင် ထွက်သည်။ဆေးဆိုးချင်သော အထည်ကို ထိုထောပတ်ဆူရေထဲသို့ ထည့်ခြင်းအားဖြင့် ဆေးဆိုးနိုင်သည်။ ထောပတ်သီးအား ကြိုက်နှစ်သက်သူများလာပြီး စီးပွားရေး ဈေးကွက် ပိုမိုတွင်ကျယ်လာသည်။ ထောပတ်သီးကို ရှမ်းပြည်နယ် (တောင်ပိုင်း)တွင် တောင်ကြီး၊ ဟိုပုံး၊ ညောင်ရွှေ၊ ကလော၊ ပင်းတယ၊ ရွာငံ တို့တွင် စိုက်ပျိုးကြပြီး ရှမ်းပြည်နယ်(မြောက်ပိုင်း)ရှိ လားရှိုး၊ ကွတ်ခိုင်၊ ကျောက်မဲ၊ သီပေါ၊ နောင်ချိုတို့တွင်လည်းစိုက်ပျိုးကြပြီး မန္တလေးတိုင်းဒေသကြီးတွင်လည်း စိုက်ပျိုးကြသည်။ ထောပတ်သီး တွင် Hass ထောပတ်မျိုး၊ Bacon ထောပတ်မျိုး၊ lamb hass ထောပတ်မျိုး စသဖြင့် မျိုးပေါင်း များစွာ ရှိသည်။ထောပတ်ပင်သည်  ရေလောင်းပေးရသော်လည်း ရေမကြိုက်သောအပင်ဖြစ်သည်။ ရေဝပ်လျှင် အပင်သေတတ်သည်။ ထို့ကြောင့်ပင် အပင်စိုက်ရန် ခက်ခဲသော ကျောက်စရစ်မြေနှင့် သဲရော မြေများ ပေါ်တွင် စိုက်ပျိုးနိုင်သောအပင်တစ်မျိုးဖြစ်သည်။ အောက်တိုဘာလတွင် အသီးများစတင် ထွက်ရှိပြီး ထောပတ်ပင်များသည်နှစ်ရှည်သီးနှံပင်များဖြစ်ကာစတင်စိုက်ပျိုးပြီး(၃)နှစ်နေမှစတင်အသီးသီး ကြောင်း သိရသည်။ထောပတ်သီးသည် မမှည့်ခင်တွင် အစိမ်း ရင့်ရောင်ရှိပြီး မှည့်လာသောအခါ အညိုပုပ်ရောင် သို့မဟုတ် အမည်းရောင်သန်းလာသည်။ ရှမ်းပြည်နယ် (တောင်ပိုင်း)မှ စက်တင်ဘာလမှ ဒီဇင်ဘာလ အတွင်းထွက်ရှိသည့် Hass အမျိုးအစား ထောပတ်သီးများကို ပြည်ပနိုင်ငံများသို့အမယ်သစ် ပို့ကုန် တစ်မျိုးအဖြစ် အဓိကတင်ပို့ကြောင်းသိရပါသည်။ယနေ့ခေတ် Online မှဈေးရောင်းခြင်းများ ခေတ်စား လာသောကြောင့်ရှမ်းပြည်မှထောပတ်သီး၊ပြင်ဦးလွင်မှထောပတ်သီး၊ကြက်ဥအရွယ်ခန့်Babyထောပတ်သီး၊ ကျွဲကောသီး နီးပါးကြီးသော တောင်ပေါ် ထောပတ်သီးစသည်ဖြင့် မိမိစိတ်ကြိုက် ဝယ်ယူ စားသုံးနိုင်ပြီ ဖြစ်သည်။မန္တလေးဈေးကွက်အတွင်းသို့တောင်ကြီး၊ပြင်ဦးလွင်၊ရွာငံတို့ဘက်မှထောပတ်သီးများဝင်ရောက် လျက်ရှိပြီးဈေးနှုန်းအနေနှင့်ဒေသသီး(၃)လုံးတစ်ပိဿာလျှင် ကျပ် ၂၅၀၀/-၊ တစ်လုံးလျှင် (ကြီး)၁၅၀၀/- (လတ်)ကျပ် ၁၀၀၀/- ၊ (သေး) ကျပ် ၅၀၀/-၊ Hass ထောပတ်မျိုးများမှာ 1kg ကျပ် ၃၅၀၀-၄၅၀၀/- ဈေးနှုန်းများဖြင့် အရောင်း အဝယ် ဖြစ်လျက်ရှိကြောင်းသိရှိရပါသည်။

DOCA(မန္တလေး)

  စစ်ကိုင်းတိုင်းဒေသကြီး၊ ရွှေဘိုခရိုင်တွင် စပါးကိုအဓိကစိုက်ပျိုးကြပြီး ဆီထွက်သီးနှံများကိုလည်း စိုက်ပျိုးလျက်ရှိရာ ၂၀၂၅-၂၀၂၆ခုနှစ် ဒေသထွက်မိုးမြေပဲများ ဩဂုတ်လ၊ တတိယအပတ်မှ စတင်၍ ရွှေဘိုမြို့ ဈေးကွက်အတွင်းသို့ စတင်ဝင်ရောက်ခဲ့ကြောင်း၊ ရွှေဘိုမြို့ ဈေးကွက်အတွင်း စက်တင်ဘာလ၊ စတုတ္ထအပတ်တွင်ရောင်းချသည့် မြေပဲလုံးဆံဈေးနှုန်းမှာ(၁)ပြည်လျှင် (၉၀၀ဝိ/-)ကျပ်နှင့် တစ်တင်းလျှင် (၁၄၄၀၀ဝိ/-)ကျပ်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်း တို့ကိုနှိုင်းယှဉ်ပါက ယခင်အပတ်၌ မြေပဲလုံးဆံ(၁)ပြည်လျှင်(၉၀၀ဝိ/-)ကျပ် ပေါက်ဈေးရှိခဲ့သဖြင့် ယခင်အပတ်နှင့်ယခုအပတ်တို့၏ အရောင်းအဝယ်ဖြစ်သည့်ဈေးနှုန်းကြောင်း၊ ဈေးကွက်အနေဖြင့် မြေပဲဆီကြိတ်ခွဲမည့်သူများ၊ ဆောင်းမြေပဲစိုက်ပျိုးရန်အတွက် မျိုးပြုလုပ်မည့်သူများ၊ တစ်ဆင့်ပြန်လည် ရောင်းချမည့်သူများ၊ လ္ဘက်၊ အကြော်ဆံရောင်းချသည့်ဆိုင်များနှင့် စားသုံးမည့်သူများမှ ဝယ်ယူကြကြောင်း ပဲမျိုးစုံရောင်းချသည့် ဆိုင်များမှသတင်းရရှိပါသည်။

DOCA(စစ်ကိုင်း)