ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေး လုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး မိုးသီးနှံ၊ ဆောင်းသီးနှံများအပြင် သီးထပ်သီးညှပ်များလည်း စိုက်ပျိုးကြကြောင်း၊ ပြည်တွင်းစားသုံးမှုရှိသလို ပြည်ပပို့ကုန်လည်းဖြစ်သည့် ကုလားပဲသီးနှံကို ကန့်ဘလူမြို့နယ် မှော်တော်ကျေးရွာ၊ မြေထူးကျေးရွာနှင့် အခြားသောကျေးရွာများတွင် စိုက်ပျိုးကြပြီး ယခုအခါ ဈေးကွက်အတွင်း ကုလားပဲအသစ်များ စတင်ဝင်ရောက်လျက် ရှိကြောင်း သိရသည်။

            ကန့်ဘလူမြို့နယ်တွင် စိုက်ပျိုးလျက်ရှိသည့် ကုလားပဲသီးနှံမျိုးမှာ ထိုင်ဝမ်မျိုး၊ (929)မျိုးနှင့် (V2)မျိုးဟူ၍(၃)မျိုးရှိကြောင်း၊ ဈေးနှုန်းအနေဖြင့် မတ်လစတုတ္ထပတ်တွင် ကုလားပဲအသစ် ထိုင်ဝမ် တစ်တင်းလျှင် (၆၆၀၀၀)ကျပ်၊ ကုလားပဲ(929)တစ်တင်းလျှင်(၆၉၀၀၀)ကျပ်နှင့် ကုလားပဲ (V2)တစ် တင်းလျှင်(၇၂၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ကုလားပဲ(၁)တင်းလျှင် (၆၀၀၀) ကျပ်ဈေးနှုန်းကျဆင်းသွားကြောင်း၊ ကန့်ဘလူခရိုင်မှထွက်ရှိသည့် ကုလားပဲများကို မန္တလေးမြို့ရှိ ကုန်စည်ဒိုင်များနှင့် ပွဲရုံများသို့တင်ပို့ကြောင်း ဒေသတွင်းပွဲရုံလုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ဝန်ထမ်းများသည် မင်းဘူးဈေးကွက်အတွင်းရှိ အိမ်ဆောက်ပစ္စည်းဘိလပ်မြေများ ပစ္စည်းပြတ်လပ်မှုရှိ/မရှိနှင့် ဈေးနှုန်း နှင့်လက်ကျန်အခြေအနေများအား အိမ်ဆောက်ပစ္စည်းအရောင်းဆိုင်များသို့ အပတ်စဉ်ကွင်းဆင်း လေ့လာ စုံစမ်းတင်ပြပေးလျက်ရှိပါသည်။

၂၀၂၅ခုနှစ်၊ မတ်လ(စတုတ္ထပတ်)တွင် ဘိလပ်မြေဈေးနှုန်းများမှာ အပါချီအမှတ်တံဆိပ် တစ်အိတ်လျှင် ကျပ်(၁၆၃၀၀)၊ ကြံ့နှစ်ကောင်အမှတ်တံဆိပ်တစ်အိတ်လျှင် ကျပ်(၁၆၅၀၀)၊ အယ်လ်ဖာအမှတ်တံဆိပ်တစ်အိတ်လျှင် ကျပ်(၁၆၃၀၀)ဖြင့် အရောင်းအဝယ်ဖြစ်လျက်ရှိပြီး  (တတိယပတ်)တွင် အပါချီအမှတ်တံဆိပ်တစ်အိတ်လျှင် ကျပ်(၁၇၈၀၀)၊ ကြံ့နှစ်ကောင် အမှတ် တံဆိပ်တစ်အိတ်လျှင် ကျပ်(၁၇၈၀၀)၊ အယ်လ်ဖာအမှတ်တံဆိပ် တစ်အိတ်လျှင် ကျပ်(၁၇၈၀၀) ဖြစ်၍ ဈေးနှုန်းနှိုင်းယှဉ်ပါက ယခုတစ်ပတ်တွင် ကြံ့နှစ်ကောင်တစ်အိတ်လျှင် ကျပ်(၁၃၀၀)၊ အပါချီနှင့် အယ်လ်ဖာတစ်အိတ်လျှင် ကျပ်(၁၅၀၀) ဈေးနှုန်းကျဆင်းသွားကြောင်း၊ ဈေးကွက် အတွင်း ဘိလပ်မြေလက်ကျန်ရှိနေသေးကြောင်းနှင့် ဘိလပ်မြေကားများလည်း အဆက်မပြတ် ဝင်ရောက်လျက်ရှိပြီး ပစ္စည်းပြတ်လပ်မှုမရှိကြောင်း အိမ်ဆောက်ပစ္စည်းအရောင်းဆိုင်များမှ လေ့လာ သိရှိရပါသည်။

DOCA(မကွေး)

          မကွေးတိုင်းဒေသကြီး၊ မကွေးမြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်ရွာ ဟောင်းကန်၊ သစ်ရာကောက်စသည့်ကျေးရွာများနှင့် စလင်း၊ ဆင်ဖြူကျွန်း၊ နတ်မောက်၊ တောင်တွင်းကြီး၊ မြို့သစ်မြို့တို့မှထွက်ရှိသော   ပဲတီစိမ်း၊ ပဲကြီး၊ စားတော်ပဲ၊ မတ်ပဲ၊ ကုလားပဲ၊ မြေပဲနှင့် နှမ်းသီးနှံများ မကွေးဈေးကွက်သို့ နေ့စဉ် ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

မြေပဲ

          ၂၀၂၅ခုနှစ်၊ မတ်လ(တတိယပတ်)တွင် မြေပဲလုံးဆံနီ(၁)ပိဿာလျှင် ကျပ်(၈၁၀၀)၊ မြေပဲလုံး ဆံဖြူ(၁)ပိဿာလျှင် ကျပ်(၈၈၀၀)၊ မြေပဲအောက်ကျ(ဆီဆံ) (၁)ပိဿာလျှင် ကျပ်(၇၂၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့်နှိုင်းယှဉ်ပါက ဈေးနှုန်းမှာတည်ငြိမ်လျက်ရှိကြောင်း သိရသည်။ ထွက်ရှိသည့်မြေပဲများကို မကွေးမြို့ပေါ်ရှိပွဲရုံများသို့ တင်ပို့ရောင်းချပြီး ထိုမှတဆင့် ရန်ကုန်မြို့နှင့် မန္တလေးမြို့များသို့ လည်းကောင်း၊ ဒေသတွင်းရှိ ဆီစက်လုပ်ငန်းရှင်များမှ အများဆုံး ဝယ်ယူကြကြောင်း၊ တစ်ပတ်အတွင်း တန်ချိန်(၃၀)ခန့် အရောင်းအဝယ်ဖြစ်ကြောင်း  သိရသည်။

ကုလားပဲ

          မကွေးဈေးကွက်၌ မြို့သစ်၊ တောင်တွင်းကြီး၊ နတ်မောက်မြို့နယ်အတွင်းရှိ ကျေးရွာများမှ ထွက်ရှိသည့် ကုလားပဲသီးနှံများ နေ့စဉ် အရောင်းအဝယ်ဖြစ်လျက်ရှိကြောင်း သိရသည်။ ဈေးနှုန်း အနေဖြင့် မတ်လ(တတိယပတ်)တွင် ကုလားပဲ(ဟော်လန်)(၁)တင်းလျှင် ကျပ်(၇၄၀၀၀)၊ ကုလားပဲ (929)(၁)တင်းလျှင် ကျပ်(၇၅၅၀၀)ပေါက်ဈေးဖြင့် အရောင်းအဝယ်ဖြစ်လျက်ရှိကြောင်း၊ ယခင်တစ် ပတ်နှင့်နှိုင်းယှဉ်ပါက ယခုတစ်ပတ်တွင် ကုလားပဲ(ဟော်လန်) ကျပ်(၁၀၀၀)၊ ကုလားပဲ(929) ကျပ်(၂၀၀၀)ဈေးနှုန်းမြှင့်တက်လာကြောင်း သိရသည်။ ပြည်တွင်းကုလားပဲဈေးကွက်၌ အရောင်း အဝယ်သွက်၍ အဝယ်လိုက်နေသောကြောင့် ဈေးနှုန်းမြှင့်တက်ရခြင်းဖြစ်ကြောင်း၊ ဈေးကွက် အနေဖြင့် တစ်ပတ်အတွင်း မကွေးမြို့မှရန်ကုန်မြို့သို့ ကုလားပဲအိတ်ရေ(၃၀၀၀)၊ ပဲခူးမြို့သို့ အိတ်ရေ (၂၀၀၀)တင်ပို့ပြီး တန်ချိန်(၃၀၀)ခန့် အရောင်းအဝယ်ဖြစ်ကြောင်း သိရသည်။

ပဲစဉ်းငုံ

၂၀၂၅ခုနှစ်၊ မတ်လ(တတိယပတ်)တွင် ပဲစဉ်းငုံနီ(၁)တင်းလျှင် ကျပ်(၉၆၀၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် နှိုင်းယှဉ်ပါက ကျပ်(၁၀၀၀)ဈေးနှုန်းအနည်း ငယ်မြင့်တက်ခဲ့ကြောင်း သိရသည်။ မကွေးဈေးကွက်သို့ ပဲစဉ်းငုံနီသစ်များ လှိုင်လှိုင်ဝင်ရောက် လျက်ရှိကြောင်း၊ ဈေးကွက်အနေဖြင့် ရန်ကုန်မြို့၊ မန္တလေးမြို့ကြီးများသို့ တင်ပို့လျက် ရှိကြောင်း၊ တစ်ပတ်အတွင်း မကွေးမြို့မှ ရန်ကုန်မြို့သို့ ပဲစဉ်းငုံအိတ်ရေ (၁၀၀၀)တင်ပို့ပြီး တန်ချိန်(၁၅၀)ခန့် အရောင်းအဝယ်ဖြစ်ကြောင်း သိရသည်။

မတ်ပဲ

၂၀၂၅ခုနှစ်၊ မတ်လ(တတိယပတ်)တွင် မတ်ပဲ(၁)တင်းလျှင် ကျပ်(၉၀၀၀၀)ဖြင့် အရောင်း အဝယ်ဖြစ်လျက်ရှိပြီး ယခင်တစ်ပတ်နှင့် နှိုင်းယှဉ်ပါက ဈေးနှုန်းတည်ငြိမ်လျက်ရှိကြောင်း၊ ဈေးကွက်အနေဖြင့် တစ်ပတ်အတွင်း မကွေးမြို့မှ ရန်ကုန်မြို့သို့ မတ်ပဲအိတ်ရေ(၂၅၀၀)တင်ပို့ပြီး တန်ချိန်(၁၀၀)ခန့် အရောင်းအဝယ်ဖြစ်ကြောင်း သိရသည်။

DOCA(မကွေး)

             စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက်သီးနှံ များအပြင် ကြက်ဆူစေ့သီးနှံများလည်း စိုက်ပျိုးကြောင်း၊ ကြက်ဆူစေ့ကို ယာကွက်လွတ်များ၌လည်း ကောင်း၊ ယာခင်းဘေးပတ်လည်၌လည်းကောင်း၊ ကြဲပက်စနစ်နှင့် တန်းစိုက်စနစ်တို့ဖြင့် စိုက်ပျိုး ကြကြောင်း၊ ကြက်ဆူစေ့သီးနှံများသည် ကန့်ဘလူမြို့နယ် ကံကြီးကုန်းကျေးရွာ၊ တောက္ကရှပ်ကျေး ရွာနှင့် အခြားသောကျေးရွာများမှ ဝင်ရောက်လျက်ရှိပြီး ကြက်ဆူစေ့သည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများအနေဖြင့် အပိုဝင်ငွေရရှိကာ မိသားစုအဆင်ပြေလျက်ရှိကြောင်း သိရသည်။

             ၂၀၂၅ ခုနှစ်၊ မတ်လ စတုတ္ထပတ်အတွင်း ဈေးနှုန်းမှာ ကြက်ဆူစေ့တစ်တင်းလျှင် (၃၁၀၀၀) ကျပ်၊ ကြက်ဆူစေ့ညံ့လျှင်(၃၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက် အနေဖြင့် ကန့်ဘလူမြို့နယ်မှထွက်ရှိသော ကြက်ဆူစေ့များကို ရွှေဘိုမြို့နှင့်မန္တလေးမြို့ရှိ ပွဲရုံများ၊ ကုန်စည်ဒိုင်များသို့ တင်ပို့လျက်ရှိကြောင်း သီးနှံရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

            စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက်သီးနှံ များအပြင် ပဲမျိုးစုံကိုလည်းစိုက်ပျိုးကြောင်း၊ ပဲလွန်းဖြူသီးနှံများကို ကန့်ဘလူမြို့နယ် ကံကြီးကုန်း ကျေးရွာ၊ တောက္ကရှပ်ကျေးရွာနှင့် အခြားသောကျေးရွာများမှ ဝင်ရောက်လျက်ရှိကြောင်း၊  ပဲလွန်းဖြူ သီးနှံသည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများအနေဖြင့် ဝင်ငွေရရှိကာ အဆင်ပြေလျက်ရှိကြောင်း သိရသည်။

              ၂၀၂၅ ခုနှစ်၊ မတ်လစတုတ္ထပတ်အတွင်း ဈေးနှုန်းများမှာ ပဲလွန်းဖြူတစ်တင်းလျှင် (၈၀၀၀၀) ကျပ်၊အကွဲအနာပါတစ်တင်းလျှင်(၇၉၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက် အနေဖြင့် ကန့်ဘလူမြို့နယ်မှထွက်ရှိသော ပဲလွန်းဖြူသီးနှံများကို မန္တလေးမြို့ရှိ ပွဲရုံများ၊ ကုန်စည်ဒိုင် သို့တင်ပို့လျက်ရှိကြောင်း သီးနှံရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)