ပြည်တွင်းကုန်သွယ်မှုသတင်း

          ဟုမ္မလင်းဒေသထွက် ငါးရံ့ခြောက်များကို တစ်ပိဿာလျှင် အကောင်အရွယ်အစားပေါ်မူတည်၍  ကျပ် ၈၀၀၀၀ မှ ၁၆၀၀၀၀ ထိရှိပြီး အသင့်စား၍ရသော မီးကင်ထားသည့် ငါးရံ့ခြောက်တစ်ဆယ်သား တစ်ဘူးလျှင် ၁၀၀၀၀ ကျပ်ဖြင့် ရောင်းချလျက်ရှိကြောင်း သိရသည်။ ဒေသထွက် ငါးရံခြောက်ကို ရန်ကုန်၊ မန္တလေးနှင့်မုံရွာမြို့များသို့ တင်ပို့ရောင်းချပြီး လက်ဆောင်ပေးရန် ဝယ်ယူသူများလည်း ရှိကြောင်းသိရသည်။ ယခုအချိန်သည် ရာသီဥတုကောင်းမွန်၍  ငါးပေါသောရာသီဖြစ်ရာ အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီး၊ မုံရွာမြို့နယ်၌ ကွမ်းကို မိမိတို့အိမ်ခြံဝင်းအတွင်း တစ်နိုင်တစ်ပိုင်အနေဖြင့်လည်းကောင်း၊ အပိုဝင်ငွေရရှိရန်အတွက်လည်းကောင်း စိုက်ပျိုးကြကြောင်း၊ ကွမ်းကို ဆောင်းစိုက်နှင့် မိုးစိုက်ဟူ၍ နှစ်မျိုးခွဲ၍ စိုက်ပျိုးကြရာ မိုးစိုက်သည် ပိုးကျလွယ်သည့်အတွက် အနည်းငယ်သာစိုက်ပျိုးကြပြီး ဆောင်းစိုက်ကိုသာ ပိုမိုစိုက်ပျိုးကြကြောင်း သိရသည်။

          မုံရွာမြို့နယ်၌ ဖြစ်ပေါ်နေသော ကွမ်းဈေးနှုန်းများအနေဖြင့် အရည်အသွေးအပေါ်မူတည်၍ နိုဝင်ဘာ(စတုတ္ထပတ်)တွင် ငွေကျပ် (၈၀၀၀-၁၀၀၀၀) များဖြင့်လည်းကောင်း၊ ဒီဇင်ဘာလ (ပထမပတ်)တွင် ငွေကျပ် (၁၁၀၀၀-၁၂၀၀၀) များဖြင့်လည်းကောင်း ရောင်းချလျက်ရှိကြောင်း၊ ဒီဇင်ဘာလ(ဒုတိယပတ်) တွင် ငွေကျပ် (၁၂၀၀၀-၁၄၀၀၀) များဖြင့်လည်းကောင်း ရောင်းချလျက်ရှိကြောင်း၊ ဆောင်းရာသီတွင် ကွမ်းအထွက်နှုန်း ထက်ဝက်ကျဆင်းခြင်းကြောင့် ဈေးကွက်အတွင်း ကုန်ဝင်ရောက်မှုနည်းကာ ဈေးနှုန်းမြင့်တက်လျက်ရှိကြောင်း ကွမ်းစိုက်တောင်သူများထံမှ သိရှိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျွဲရဲကျေးရွာ၊ မြေနဲကျေးရွာ၊ ရွာတုံကျေးရွာ၊ တောင်ပလူကျေးရွာများတွင် ကြက်သွန်နီကို အများဆုံးစိုက်ပျိုးကြောင်း သိရှိရ ပါသည်။ ယခုနှစ်တွင် မိုးကြက်သွန် စိုက်ဧကပေါင်း (၂၃၁၇)ဧကရှိပြီး ယခုအချိန်၌ လှိုင်လှိုင်ပေါ် ထွက်ပြီဖြစ်ရာ ဈေးနှုန်းအနေဖြင့် တစ်ပိဿာလျှင် (၃၅၀၀)ကျပ်မှ (၄၀၀၀)ကျပ် အထိ ဈေးကွက်ရှိကြောင်း သိရှိရပါသည်။

            ယခင်နှစ်ဒီဇင်ဘာလတွင်  ကြက်သွန်နီတစ်ပိဿာအနိမ့်ဈေးမှာ (၂၂၀၀)ကျပ်မှ ကြက်သွန်နီ တစ်ပိဿာအမြင့်ဈေး (၂၈၀၀)ကျပ် ရှိခဲ့ရာ ယခုနှစ် ကြက်သွန်နီ တစ်ပိဿာ ဈေးနှုန်းနှင့် နှိုင်းယှဥ်ပါက ယခုနှစ်တွင် တောင်သူများအနေဖြင့် အကျိုးအမြတ်ပိုမိုရရှိကြောင်း သိရှိရပါသည်။

DOCA(စစ်ကိုင်း)

            ဧရာဝတီတိုင်းဒသကြီး၊ မြန်အောင်ခရိုင်၊ ကြံခင်းမြို့နယ်တွင် စာဖိုဆောင်သုံးသီးနှံဖြစ်သော ခရမ်းချဉ်သီးနှံကို စီးပွားဖြစ်စိုက်ပျိုးလျက်ရှိသည်။ ခရမ်းချဉ်သီးနှံကို စက်တင်ဘာလတွင် စတင်စိုက်ပျိုးပြီး ဒီဇင်ဘာလပထမပတ်တွင် စတင်ခူးဆွတ်ကြကြောင်း၊ စိုက်ပျိုးမှုအနေဖြင့် မျိုးစေ့ကိုပျိုးထောင်ပြီး  အပင်သက်တမ်း တစ်လခန့်အချိန်တွင် မြေချစိုက်ပျိုးရကြောင်း၊ တစ်ဧကလျှင် မျိုးစေ့ထုတ် ၆-၇ ထုတ်ခန့် စိုက်ပျိုးရကြောင်း၊ အထွက်နှုန်းအနေဖြင့်စတင်ခူးစွတ်ချိန် တစ်ဧကလျှင် ၃၀-၅၀ပိဿာခန့် ထွက်ရှိပြီး တစ်ပတ်ထက်တစ်ပတ် ပိုမိုထွက်ရှိပြီး၊ ၃-၄ရက်ခြားတစ်ကြိမ် ခူးဆွတ်ရပါသည်။ စိုက်ပျိုးမှုကုန်ကျစရိတ်အနေဖြင့် တစ်ဧကလျှင် ၁၂ သိန်းခန့်ကုန်ကျကြောင်း၊ ဈေးနှုန်းအနေဖြင့် ဒိုင်သွင်းဈေးအနေဖြင့် တစ်ပိဿာလျှင် ၄၀၀၀-၅၀၀၀ ကျပ်ရရှိပြီး၊ အကျိုးအမြတ်အနေဖြင့် တစ်ဧကလျှင်  သိန်း ၂၀ ကျပ်ခန့် ရရှိခြင်းကြောင့် တွက်ခြေကိုက်လျက်ရှိကြောင်း ခရမ်းချဉ်သီးစိုက် တောင်သူတစ်ဦး၏ပြောကြား ချက်အရ သိရှိရပါသည်။

DOCA(ဧရာဝတီ)

          ပဲခူးတိုင်းဒေသကြီး၊ ညောင်လေးပင်ခရိုင်၊ ညောင်လေးပင် မြို့မဈေးရှိ ကုန်စိမ်းအရောင်းတန်း၊ သီးနှံဆိုင်များတွင် လိမ္မော်သီးများ လှိုင်လှိုင်ပေါ်၍ သီးနှံဈေးသည်များတွင်သာမက လမ်းဘေးတွင်ခင်းကျင်း၍လည်း လိမ္မော်သီးများ ရောင်းချနေသည်ကို တွေ့ရပါသည်။

          လိမ္မော်သီးသည် ကျန်းမာရေးအတွက် အကျိုးပြုသော သီးနှံတစ်မျိုးဖြစ်ပါသည်။ လိမ္မော်သီး တွင်ကယ်လိုရီ (၈၀)မီလီဂရမ်၊ ပိုတလ်စီရမ် (၂၅၀)မီလီဂရမ်၊ ကာဗိုလ် ဟိုက်ရိတ်(၁၉)ဂရမ်၊ ပရိုတင်း (၁)ဂရမ်၊ ပါရှိပြီး အဆီဓါတ် မပါရှိသောအသီးဖြစ်ပြီး ထိုဓာတ်လေးမျိုးလုံးသည် အရေးပါတဲ့ ဓာတ်များဖြစ်ပါသည် လိမ္မော်သီးစားပေးခြင်းဖြင့်  ကိုယ်ခံအားကောင်းစေခြင်း၊ အရိုးကိုသန်မာ စေခြင်း၊ အမြင်အာရုံကောင်းမွန်စေခြင်း၊ သွေးတွင်းအဆီဓါတ်ကို ကျဆင်းစေခြင်း၊ မောပန်းမှုကို ပြေပြောက်စေခြင်း ၊အစာအိမ်အူလမ်းကြောင်းကို အထောက်ကူပြုစေခြင်း စသည့်အကျိုးများစွာ ရရှိစေပါသည်။ အထူးသဖြင့် ကလေးငယ်များစားသုံးသင့်ပါသည်။ ကလေးငယ်များ စားသုံးပေးခြင်း ကြောင့် ကလေးငယ်များတွင် ဉာဏ်ရည်မြင့်မားခြင်း၊ အရပ်ရှည်ခြင်း ၊ ကိုယ်ခန္တာဖွံဖြိုးမှုမြန်ဆန်ခြင်း၊ စသည့်အကြိုးကျေးဇူးများ ရရှိနိုင်ပါသည်။ သွေးတွင်းသကြားဓာတ်များသော ဆီးချိုရှိသူများ စားသုံးနိုင်ပါသည်။ ဆီးချိုရှိသူများ လိမ္မော်သီးများ စားသုံးခြင်းသည် ဆီချိုကိုမတက်စေဘဲ အမောပြေလန်းဆန်းစေပြီး သွေးတွင်းသကြားဓါတ်ကို ထိန်းညှိပေးပါသည်။ အသက်အရွယ်ကြီး ရင့်သူများလည်း စားသုံးပေးခြင်းဖြင့် ကိုယ်ခန္တာကိုယ် ကို ကျန်းမာလန်းဆန်းစေပါသည်။ ကားမူး တတ်သူများအနေဖြင့်လည်း အခွံခွာစားနိုင်သလို အခွံများကိုလည်းရှူ၍ အမူးပြေစေပါသည်။

           လိမ္မော်သီးများကို အပြင်အခွံကို ခွာပြီး အမွှာစိတ်အသေးလေးတွေအတိုင်းစားသုံးနိုင်သလို ကြိတ်စက်များဖြင့်ကြိတ်ပြီး ပျားရည်ဖြင့် ဖျော်ရည်အဖြစ်လည်းဖေျာ်သောက်နိုင်ပါသည်။ လိမ္မော်သီး အမွှာစိတ်လေးများကို တခြားသီးနှံများဖြင့်ရောနှောပြီး လူငယ်များအကြိုက် ငရုပ်သီးများ၊ ငပိ အနည်းငယ်၊ ဆားအနည်းငယ်တို့ဖြင့် သုပ်စားနိုင်ပါသည်။ လိမ္မော်သီးများကို အခွံခွာ အစေ့ထုတ်ပြီး သကြားအနည်းငယ်ဖြင့် ယိုထိုးပြီး မိမိအိမ်ရှိရေခဲသေတ္တာများတွင်ထည့်၍ သိမ်းပြီး မိမိစားချင် သည့်အချိန်မှ လိုသလို ထုတ်စားနိုင်ပါသည်။

         ပဲခူးတိုင်းဒေသကြီး၊ ညောင်လေးပင်ခရိုင်၊ ညောင်လေးပင် (မြို့မဈေး)တွင် လိမ္မော်သီးအကြီး တစ်လုံးလျှင် (၁၀၀၀)ကျပ်၊ အသေးတစ်လုံးလျှင် (၅၀၀) ကျပ်မှ (၈၀၀)ကျပ်အတွင်း၊ အခွံနွှာ ပြီးတစ်ခြားအသီးများဖြင့်အသုပ်တစ်ပွဲလျှင် (၁၅၀၀)ကျပ်၊ လိမ္မော်ရည်အဆီတစ်ဘူးလျှင်  (၇၀၀၀) ကျပ်၊ နှုန်း ဖြင့်ရောင်းချနေကြောင်း သိရှိရပါသည်။

DOCA(ပဲခူး)