ပြည်တွင်းကုန်သွယ်မှုသတင်း

       စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်တာဝန်ခံ (ဦးစီးမှူး) ဦးဆန်းလင်းမောင်သည် (၂၀.၆.၂၀၂၄)ရက်နေ့၊ နံနက်(၀၉:၀၀)နာရီတွင် ပြည်တွင်း ကုန်သွယ်မှုဖွံ့ဖြိုးတိုးတက် စေရေးအတွက် မိုးဝန်းကျေးရွာ နွေနှမ်းစိုက်တောင်သူ ဦးသိန်းဆွေနှင့် တွေ့ဆုံပြီး နွေနှမ်းစိုက်ပျိုး ထွက်ရှိမှုအခြေအနေအား ကွင်းဆင်းဆွေးနွေးခဲ့ရာ မိုးဝန်းကျေးရွာရှိ တောင်သူများသည် နှစ်စဉ် မိုးစပါး၊ ကုလားပဲနှင့် နွေနှမ်းတို့ကို စိုက်ပျိုးကြရာ ၎င်းတောင်သူအနေဖြင့် ယခုနှစ်တွင် နွေနှမ်း (ဂျပန်ဖြူ) (၃)ဧကစိုက်ပျိုးကြောင်း၊ မတ်လအလယ်တွင် စိုက်ပျိုးကြပြီး ဇွန်လ တတိယပတ်တွင် ရိတ်သိမ်းကြကာ အထွက်နှုန်း (၁)ဧကပျမ်းမျှ (၈)တင်းခန့် ထွက်ရှိပြီး မျိုးထွန် ယက်စိုက်ပျိုးခြင်း၊ သွင်းအားစုနှင့် လုပ်အားခအပါအဝင် တစ်ဧက ကုန်ကျစရိတ်မှာ ကျပ်(၈)သိန်း ခန့်ရှိ၍ ယခုပေါက်ဈေး ဂျပန်ဖြူနှမ်း တစ်တင်းလျှင် ကျပ်(၁၃၅၀၀၀)ရရှိ၍ အကျိုးအမြတ်မှာ ကျပ် (၂၈၀၀၀၀) ရရှိကြောင်း သိရပါသည်။

        မိုးဝန်းကျေးရွာတွင် နွေနှမ်းစိုက်ပျိုးချိန်မိုးရွာသွန်းမှုနည်းပါး၍ မြေအောက်ရေကို သုံးစွဲရသော ကြောင့် ယခုနှစ် နှမ်းအထွက်နှုန်းမှာ အသင့်အတင့်သာရှိခဲ့ကြောင်း မြေအနေအထားကွာခြားခြင်း၊ စိုက်ပျိုးပြီး အပင်ပြုပြင်မှုကွာခြားခြင်း၊ သွင်းအားစု သုံးစွဲပုံကွာခြားမှုတို့ကြောင့် နွေနှမ်း တစ်ဧက စိုက်ပျိုးလျှင် အထွက်နှုန်းမှာ (၈.၁၀)တင်းထိ ကွဲပြားထွက်ရှိကြောင်း သိရသည်။

          ဈေးနှုန်းဈေးကွက်အနေဖြင့် မိုးဝန်းကျေးရွာရှိ တောင်သူများသည် ယခင်နှစ်က နှမ်းဖြူ တစ်တင်းလျှင် ကျပ်(၉၅၀၀၀)ထိသာ အမြင့်ဈေးရရှိခဲ့သော်လည်း ယခုနှစ်တွင် သီးနှံပေါ်ချိန် ကျပ်(၁၃၅၀၀၀) ရရှိကြောင်းသိရသည်။

        တောင်သူများသည် ထွက်ရှိသည့် နှမ်းများကို မျိုးနှင့် ဆီကြိတ်ခွဲစားသုံးရန် ချန်ထားပြီး ကျန်ရှိသည့် နှမ်းများကို မြို့ပေါ်ပွဲရုံများသို့ တင်ပို့ရောင်းချကြပြီး ယခုနှစ်တွင် အထွက်နှုန်းနည်း သော်လည်း ဈေးနှုန်းရရှိမှုတို့ကြောင့် မိုးဝန်းကျေးရွာရှိ နွေနှမ်းစိုက်တောင်သူများ အဆင်ပြေလျက် ရှိကြောင်း နွေနှမ်းစိုက်တောင်သူ ဦးသိန်းဆွေထံမှ သိရပါသည်။

DOCA(မကွေး)

      နွေကူးရာသီ၊ နွေရာသီ သို့မဟုတ် ဆောင်းကူးရာသီတို့၌ မိုးတစ်ကြိမ်/ နှစ်ကြိမ်လောက် ရွာအပြီးတွင် မှိုများထွက်ပေါ်လေ့ရှိပြီး ကရင်ပြည်နယ်တွင် ဇွန်လနှောင်းပိုင်းတွင် မှိုများထွက်ပေါ်၍ ဈေးကွက်အတွင်း ရောင်းချကြကြောင်းသိရသည်။

       ကရင်ပြည်နယ်၊ ဘားအံခရိုင်၊ ထီလုံဒေသမှ မှိုအများဆုံးထွက်ပြီး ထီလုံမှထွက်ရှိသော မှိုဈေးနှုန်းများမှာ အဖူးတစ်ပိဿာလျှင် ၄၀၀၀၀ကျပ်၊ အပွင့်တစ်ပိဿာလျှင် ၃၀၀၀၀ကျပ်ဖြင့် ဘားအံမြို့ မြို့မဈေး၊ လမ်းဂွဈေးတို့တွင်  ရောင်းချသည်ကိုတွေ့ရပြီး မှိုဈေးကောင်းကြောင်းသိရသည်။

      မှိုကို လူကြိုက်များသဖြင့် တချို့က စီးပွားရေးအဖြစ်စိုက်ပျိုး၍ ရောင်းချလေ့ရှိရာ ဈေးကွက်အတွင်း ရာသီမရွေးဝယ်ယူစားသုံးနိုင်သော်လည်း စိုက်ပျိုးရေးမှိုထက် ဈေးကြီးသော သဘာဝမှိုများကို လူအများကြိုက်နှစ်သက်ကြောင်းနှင့်  ကရင်ပြည်နယ်တွင် သစ်တောကြိုးဝိုင်းများတည်ရှိရာ ထီလုံဒေသမှ မှိုအများဆုံးထွက်ရှိပြီး ထီလုံဒေသထွက် သဘာဝမှိုများမှာ ဈေးကောင်း၍  လူအများကြိုက်နှစ်သက်ကြောင်းသိရှိရပါသည်။

DOCA(ကရင်)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်မှ ဝန်ထမ်းများသည် ထုတ်ကုန်များ လုံခြုံစိတ်ချရမှုရှိစေရေးအတွက် မျှော်မှန်းချက်နှင့်အညီ တိုင်းဒေသကြီး ဦးစီးမှူးနှင့်ခရိုင်ဦးစီးမှူးတို့၏ လမ်းညွှန်မှုဖြင့် စားသုံးသူကာကွယ်ရေးဆိုင်ရာ အသိပညာပေးလုပ်ငန်းများ၊ စားသုံးသူကာကွယ်ရေးဥပဒေပါ ပြဌာန်းချက်များအား သိရှိလိုက်နာဆောင်ရွက်နိုင်စေရန် စီးပွားရေးလုပ်ငန်းရှင်များနှင့်တွေ့ဆုံဆွေးနွေး အသိပညာပေးခြင်း၊ ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိရာ (၂၁.၆.၂၀၂၄)ရက်နေ့၊ နေ့လယ်(၁၃:၀၀)နာရီအချိန်တွင် စလင်းမြို့နယ် တာဝန်ခံနှင့်အဖွဲ့သည် စားသုံးသူများ ဘေးအန္တရာယ်ကင်းရှင်းပြီး ထုတ်ကုန်များလုံခြုံစိတ်ချရမှု ရှိစေရေးအတွက် ရည်ရွယ်၍ စလင်းမြို့နယ် ဆင်ကျုံးကျေးရွာရှိ ရွှေတိုးပဲကြော် ထုတ်လုပ်ဖြန့်ဖြူးနေသည့် လုပ်ငန်းရှင် ဦးစံဝင်းမောင်နှင့် တွေ့ဆုံ၍ အသိပညာပေး ဆောင်ရွက်ခဲ့ပါသည်။

      ထိုသို့ အသိပညာပေးဆွေးနွေးရာတွင် စီးပွားရေးလုပ်ငန်းရှင်များအနေဖြင့် ကုန်စည်များ ထုတ်လုပ်ဖြန့်ဖြူးရောင်းချရာတွင် စီးပွားရေးလုပ်ငန်းရှင်များ သိရှိလိုက်နာဆောင်ရွက်စေရန်အတွက် စားသုံးသူကာကွယ်ရေးဥပဒေ(၂၀၁၉)ပါ စားသုံးသူအခွင့်အရေးနှင့်တာဝန်များ၊ စီးပွားရေး လုပ်ငန်းရှင်၏တာဝန်များနှင့် အခန်း(၁၈)ပါ ကုန်အညွှန်းအမှတ်အသားဆိုင်ရာ ဖော်ပြချက်များ အသေးစိတ်ရှင်းလင်းဆွေးနွေးပြီး လုပ်ငန်းရှင်များသည် မိမိတို့ထုတ်လုပ်ဖြန့်ဖြူးသော ကုန်စည်များတွင် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြေငြာချက် အမှတ် (၂/၂၀၁၉)နှင့်အညီ ထုတ်လုပ်ဖြန့်ဖြူးပေးရမည်ဖြစ်ကြောင်း၊ အခြားဌာနများ နှင့်လည်း ချိတ်ဆက်၍ ကူညီဆောင်ရွက်ပေးမည်ဖြစ်ကြောင်း ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

      ပြည်ဈေးကွက်တွင် ရှမ်းပြည်နယ်ဘက်မှဝင်ရောက်လာသော ခရမ်းချဉ်သီးများနှင့် ဒေသထွက်ခရမ်းချဉ်သီးများ ဈေးကောင်းရလျက်ရှိပါသည်။ ပြည်ခရိုင်တွင် ခရမ်းချဉ်သီးဒေသမျိုးကို ပြည်မြို့နှင့် ရွှေတောင်မြို့အနီးတဝိုက်ရှိ ကျေးရွာများတွင် စိုက်ပျိုးကြပါသည်။ ခရမ်းချဉ်သီးကို အများဆုံးစိုက်ပျိုးသည့်အချိန်မှာ မိုးရာသီတွင်စိုက်ပျိုးကြပြီး ဆောင်းဦးပေါက်ရာသီတွင် ထွက်ရှိပါသည်။ ယခုကဲ့သို့သောအချိန်ဖြစ်သည့် ဇွန်လ နောက်ဆုံးပတ်တွင် ခရမ်းချဉ်သီးများစိုက်ပျိုးနေချိန်ဖြစ်၍ ခရမ်းချဉ်သီးအထွက်မရှိသေးသော်လည်း ရှမ်းပြည်နယ်ဘက်မှဝင်ရောက်လာသော ခရမ်းချဉ်သီးများ အရောင်းအဝယ်ဖြစ်လျက်ရှိပါသည်။ ဒေသမျိုးမှာ ယခုအချိန်တွင် ရေသွင်း၍စိုက်ပျိုးရသဖြင့် အလုံးအရွယ်အစားမှာ ဆောင်းရာသီတွင်ထွက်ရှိသော ခရမ်းချဉ်သီးလောက်မကြီးဘဲ အလုံးအရွယ်မှာ သေးငယ်ပါသည်။ ဈေးနှုန်းအနေဖြင့် ဇွန်လ နောက်ဆုံးပတ်တွင် ပြည်မြို့ရှိဈေးကွက်များတွင်ရောင်းချသော ခရမ်းချဉ်သီးမှာ (ရှမ်းသီး)တစ်ပိဿာလျှင် (၄၀၀၀-၅၀၀၀) ကျပ်၊ ဒေသမျိုးတစ်ပိဿာလျှင် (၆၀၀၀-၇၀၀၀) ကျပ်ဖြင့်ရောင်းချကြောင်းသိရပါသည်။ ယခင်နှစ်က ခရမ်းချဉ်သီးပေါ်ချိန်တွင် ဒေသမျိုးတစ်ပိဿာလျှင် (၂၄၀၀-၃၀၀၀) ကျပ်၊ (ရှမ်းသီး)တစ်ပိဿာလျှင် ၃၀၀၀ကျပ်ဖြင့်ရောင်းချခဲ့သဖြင့် ယခင်နှစ်နှင့်နှိုင်းယှဉ်လျှင် ယခုနှစ်၌ ဈေးနှုန်းများမြင့်တက်လာခဲ့ပြီး ဒေသမျိုးတစ်ပိဿာလျှင် ၄၀၀၀ကျပ်နှင့် ရှမ်းသီးတစ်ပိဿာလျှင် ၃၀၀၀ကျပ်ဖြင့် ဈေးနှုန်းများမြင့်တက်လာခဲ့ပါသည်။

       ထိုသို့ဈေးနှုန်းများမြင့်တက်လာရခြင်းမှာ သယ်ယူစရိတ်များကြီးမြင့်ခြင်း၊ နွေရာသီတွင် ရာသီဥတုပူပြင်း၍ အသီးအနှံများထွက်ရှိမှုနည်းသွား၍ ယခုကဲ့သို့ ဈေးနှုန်းများမြင့်တက်လာခြင်း ဖြစ်ကြောင်းသိရပါသည်။

DOCA(ပဲခူး)

      ပြည်ခရိုင်၊ ပေါက်ခေါင်းမြို့နယ်ရှိ သဖန်းချိုအုပ်စု၊ လေးကြီးကျေးရွာတွင် သခွားသီးများစိုက်ပျိုးထားရှိသဖြင့် စိုက်ပျိုးထုတ်လုပ်မှုကုန်ကျစရိတ်၊ အထွက်နှုန်းနှင့် အကျိုးအမြတ်များအား သိရှိနိုင်ရန်အတွက် စားသုံးသူရေးရာဦးစီးဌာ၊ ပေါက်ခေါင်းမြို့နယ်တာဝန်ခံနှင့် ဝန်ထမ်းများသည် သွားရောက်၍ ကွင်းဆင်းလေ့လာခဲ့ကြပါသည်။

      ပေါက်ခေါင်းမြို့နယ်၊ လေးကြီးကျေးရွာတွင် သခွားသီးစိုက်ပျိုးတောင်သူ ဦးမျိုးဝင်းက သခွားသီးစိုက်ဧက (၀.၂၅)ဧကကို မေလ နောက်ဆုံးပတ်တွင် စတင်စိုက်ပျိုးထားပြီး စိုက်ပျိုးပြီး (၁)လခွဲခန့်အကြာတွင် အသီးများစတင်ခူးဆွတ်၍ရကြောင်းသိရပါသည်။ သခွားသီး (၀.၂၅)ဧကတွင် စိုက်ပျိုးထုတ်လုပ်ကုန်ကျစရိတ်အနေဖြင့် ၁၈၅၀၀၀ကျပ်ကုန်ကျပြီး ထွက်ရှိသည့် သခွားသီးအလုံးရေမှာ ၈၀၀၀ကျော်ထွက်ရှိသည်ဟုသိရပါသည်။ သခွားသီးစတင်ခူးဆွတ်ရောင်းချချိန်တွင်  ကုန်စိမ်းပွဲစားများက စိုက်ခင်းအထိလာရောက်ဝယ်ယူကြပြီး တစ်လုံးလျှင်  ၇၀ကျပ်ဖြင့်ရောင်းချပြီး ရောင်းရငွေအနေဖြင့် ၅၆၀၀၀၀ကျပ်ရရှိကြောင်းသိရပါသည်။ သခွားသီး (၀.၂၅)ဧကတွင် တောင်သူအကျိုးအမြတ်မှာ ၃၇၅၀၀၀ကျပ်ရရှိကြောင်းသိရပါသည်။

      သခွားသီးမှာ စိုက်ပျိုးသူတောင်သူများအနေဖြင် ရက်တိုတိုနှင့် ဝင်ငွေများရရှိကာ စိုက်ပျိုးသင့်သော သီးနှံတစ်မျိုးဖြစ်ကြောင်း ရေးသားတင်ပြလိုက်ရပါသည်။

DOCA(ပဲခူး)