စစ်ကိုင်းတိုင်းဒေသကြီး၊ ရွှေဘိုခရိုင်တွင် စပါးကိုအဓိကစိုက်ပျိုးကြပြီး ပဲမျိုးစုံသီးနှံများကို အနည်းငယ်သာစိုက်ပျိုးသော်လည်း သက်ဆိုင်ရာဌာန၏ ၂၀၂၄-၂၀၂၅ခုနှစ် ရွှေဘိုခရိုင် ဆောင်းသီးနှံ စိုက်ပျိုးမှုစာရင်းများအရ ကုလားပဲ(၃၀၁၄၃)ဧကစိုက်ပျိုးကြောင်း သိရှိရပါသည်။ ပဲမျိုးစုံအသစ်များမှာ ဒီဇင်ဘာလမှစတင်၍ ဈေးကွက်အတွင်းသို့ ဝင်ရောက်ခဲ့ပြီး ရွှေဘိုခရိုင်အနေဖြင့် ကုလားပဲစိုက်ပျိုးမှု ရှိသော်လည်း ထွက်ရှိသည့်ကုလားပဲများကို ကုန်ကြမ်းအဖြစ်သာရောင်းချပြီး ပဲခွဲစက်ဖြင့်ခွဲ၍ ကုလားပဲဆံ များထုတ်လုပ်ရောင်းချမှုမရှိသည့်အတွက် ရွှေဘိုမြို့တွင်ရောင်းချသည့် ကုလားပဲဆံများကို မန္တလေးမြို့မှ ဝယ်ယူရောင်းချပြီး ကုလားပဲလုံးများကို ဒေသတွင်းရှိ ပွဲရုံများမှဝယ်ယူရောင်းချကြပါသည်။

ကုလားပဲဆံ

     ရွှေဘိုမြို့ ဈေးကွက်အတွင်း ဩဂုတ်လ၊ စတုတ္ထအပတ်တွင်ရောင်းချသည့် ကုလားပဲဆံဈေးနှုန်းမှာ (၁)ပြည်လျှင်(၈၃၀ဝိ/-)ကျပ်နှင့် တစ်တင်းလျှင်(၁၃၂၈၀ဝိ/-)ကျပ်ဖြစ်ကြောင်း၊ ယခင်အပတ်နှင့် ယခု အပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ ကုလားပဲဆံ(၁)ပြည် လျှင်(၈၃၀ဝိ/-)ကျပ်ပေါက်ဈေးရှိခဲ့သဖြင့်  ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတူညီပြီး ဈေးငြိမ်နေကြောင်း၊ ဈေးကွက်အနေဖြင့် တစ်ဆင့်ပြန်လည်ရောင်းချမည့်သူများ၊ ကိုယ်တိုင်ကြော်သည့် ကုလားပဲဆံကြော်ဖိုများ၊ အလှူမင်္ဂလာပွဲလမ်း ဆောင်ရွက်မည့်သူများမှ ဝယ်ယူ ကြကြောင်း ပဲမျိုးစုံရောင်းချသည့်ဆိုင်များမှ သတင်းရရှိပါသည်။

ကုလားပဲလုံး

    ရွှေဘိုမြို့ ဈေးကွက်အတွင်း ဩဂုတ်လ၊ စတုတ္ထအပတ်တွင်ရောင်းချသည့် ကုလားပဲလုံးဈေးနှုန်းမှာ (၁)ပြည်လျှင်(၆၀၀ဝိ/-)ကျပ်နှင့် တစ်တင်းလျှင်(၉၆၀၀ဝိ/-)ကျပ်ဖြစ်ကြောင်း၊ ကုလားပဲလုံးမှာ အဖြူရောင် နှင့်အဝါရောင်နှစ်မျိုးရှိပြီး ရောင်းချရသည့်ဈေးနှုန်းမှာလည်း တူညီကြောင်း၊ ယခင်အပတ်နှင့် ယခုအပတ် တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်အပတ်၌ ကုလားပဲလုံး(၁)ပြည်လျှင် (၆၀၀ဝိ/-)ကျပ် ပေါက်ဈေးရှိခဲ့သဖြင့် ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတူညီပြီး ဈေးငြိမ်နေကြောင်း၊  ဧပြီလ၊ စတုတ္ထအပတ်မှစတင်၍ ယခုအချိန်ထိ အရောင်းအဝယ် ဖြစ်သည့်ဈေးနှုန်းတူညီပြီး ဈေးအေးနေကြောင်း၊  ဈေးကွက်အနေဖြင့် ဒေသတွင်းရှိစားသုံးသူများ၊ တစ်ဆင့် ပြန်လည်ရောင်းချမည့်သူများ၊ ကုလားပဲသုတ်ရောင်းချသူများမှ ဝယ်ယူကြကြောင်း ပဲမျိုးစုံရောင်းချသည့် ဆိုင်များမှ သတင်းရရှိပါသည်။

DOCA(စစ်ကိုင်း)

   မန္တလေးတိုင်းဒေသကြီး ၊ ကျောက်ဆည်ခရိုင်အတွင်းတွင် စပါး၊ပဲ၊ပြောင်း၊ကြက်သွန်နှင့်ငရုတ် သီးနှံများအပြင် ခဝဲသီးနှံကိုလည်း တောင်သူများမှာ တစ်နိုင်တစ်ပိုင်မှ စီးပွားဖြစ် စိုက်ပျိုးလာကြ ကြောင်း၊ ခဝဲစိုက်ပျိုးရန် အကောင်းဆုံးအချိန်မှာ ယခုလို မိုးတွင်းဖြစ်သော ဇွန်နှင့် ဇူလိုင်လများတွင် စိုက်ပျိုးလျှင် ပိုမိုဖြစ်ထွန်းကြောင်း၊ ခဝဲသီးနှံစိုက်ပျိုးရာတွင် မျိုးအနေဖြင့် ခဝဲရှည်မျိုးနှင့် ခဝဲပုမျိုး ဟူ၍ နှစ်မျိုးရှိကြောင်း၊ ခဝဲပုမျိုးသည် မြန်မာမျိုးဖြစ်ပြီး ၊ ခဝဲရှည်မျိုးသည် ထိုင်ဝမ်မျိုး ဖြစ်ကြောင်း အများဆုံးစိုက်ပျိုးသောမျိုးမှာ ထိုင်ဝမ်မျိုးများဖြစ်ကြောင်း၊ မြို့နယ်အတွင်းစိုက်ပျိုးသော ရွာများမှာ ပင်းတလည်၊ ကျောက်ခုံရွာများဖြစ်ပြီး ခဝဲစိုက်ပျိုးမှုအနေဖြင့် စင်ခံစိုက်ပျိုးကြကြောင်း၊ တစ်ဧကမျိုး အသုံးပြုမှုအနေဖြင့် (၅)ထုပ်မှ (၆) ထုပ်ကုန်ကျကြောင်း၊ မျိုးတစ်ထုပ် ဈေးနှုန်းအနေဖြင့် (၆၀၀၀/ ၇၀၀၀)ကျပ်ဖြင့် ဝယ်ယူစိုက်ပျိုးရကြောင်း၊ မျိုးသွင်းအားစု တိုင်၊ ဝါးများအပါအဝင် စုစုပေါင်း တစ်ဧက ကုန်ကျစရိတ် (၁၅၀၀၀၀၀/-) ကျပ်ခန့် ကုန်ကျကြောင်း၊ စိုက်ပျိုးပြီး နှစ်လခွဲခန့်အကြာ တွင် ရောင်းတန်းဝင်အသီးများ စတင်ခူးဆွတ်နိုင်ပြီဖြစ်ကြောင်း တစ်ဧကလျှင် ခဝဲပိဿာ (၁၅၀၀) ခန့် ထွက်ရှိကြောင်း၊ ခဝဲသီး တစ်ပိဿာလျှင် လက်ကားဈေး (၂၀၀၀/-)ကျပ်ဖြင့် ရောင်းချပေးလျက် ရှိကြောင်း၊ ခဝဲသီးကို လူတိုင်း ကြိုက်နှစ်သက်ကြပြီး ခဝဲဟင်းချို၊ ခဝဲသီးကြာဇံကြော်၊ ခဝဲသီး အတို့အမြှုပ်ဖြင့် စားသုံးကြကြောင်း၊ ခဝဲသီးစားသုံးခြင်းဖြင့် ကိုယ်အလေးချိန် ထိန်းညိုပေးခြင်း၊ အရိုးပွရောဂါကို ကာကွယ်ပေးခြင်းနှင့် နှလုံးကိုကျန်းမာစေကြောင်း လေ့လာသိရှိရပါသည်။ ခဝဲစိုက် ပျိုးခြင်းဖြင့် ကုန်ကျစရိတ်သက်သာပြီး စီးပွားဖြစ် ဝင်ငွေတိုးကြောင်း တစ်ဧကကုန်ကျ စရိတ်နုတ်ပြီး (၉၀၀၀၀၀/-)ကျပ်ခန့် မြတ်ကြောင်း၊ ခဝဲဈေး ကောင်းမွန်သောကြောင့် တောင်သူများ အကျိုးအမြတ် ဖြစ်ထွန်းကြောင်း၊ ခဝဲဈေးနှုန်းများ ဆက်လက် ကောင်းမွန်ပါက တောင်သူများ စိုက်ပျိုးရကျိုးနပ် ကြောင်း ခဝဲစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

   မန္တလေးတိုင်းဒေသကြီး၊ကျောက်ဆည်ခရိုင်တွင် ၂၀၂၅-၂၀၂၆ ဘဏ္ဍာနှစ်တွင် မိုးနှောင်း ချည်မျှင်ရှည်ဝါစိုက်ဧကအနေဖြင့် (၅၁၁)ဧက စိုက်ပျိုးပြီးစီးပြီးဖြစ်ကြောင်း သက်ဆိုင်ရာဌာန၏ စာရင်းများအရသိရှိရပါသည်။ မိုးနှောင်းဝါကို ဩဂုတ်လဆန်းပိုင်းတွင် စတင်စိုက်ပျိုးလျက်ရှိပြီး ဝါစိုက်ပျိုးမှုအနေဖြင့် ဘောင်ကြောင်းဘေးစနစ်ဖြင့် စိုက်ပျိုးကြကြောင်း၊ မျိုးအနေဖြင့် အိန္ဒိယ ရာကာမျိုးများဖြစ်သော (၃၃၃)လုံး၊ (၆၆၆) လုံးနှင့် (၉၉၉)မျိုးများကို စိုက်ပျိုးကြကြောင်း၊ မျိုးအသုံး ပြုမှုအနေဖြင့် တစ်ဧကလျှင် ဝါမျိုးစေ့ (၁၂)ပိဿာမှ (၁၃)ပိဿာ အသုံးပြု စိုက်ပျိုးကြကြောင်း၊ ဝါမျိုးစေ့ တစ်ပိဿာလျှင် (၂၅၀၀/-)မှ (၃၀၀၀/-)ကျပ်ဈေးဖြင့် ဝယ်ယူစိုက်ပျိုးရကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း (၄၅၀၀၀၀/- မှ ၅၀၀၀၀၀/-) ကျပ်ခန့် ကုန်ကျကြောင်း၊ ယခုနှစ်တွင် မိုးရွာသွန်းမှု အားကောင်းသောကြောင့် ဝါစိုက်ပျိုးမှုတွင် ဝါပင်များအောင်မြင်စွာ ပေါက်ရောက်ရှင်သန်နေပြီဖြစ်ကြောင်း၊ မိုးနှောင်း ချည်မျှင်ရှည်ဝါ အများဆုံး စိုက်ပျိုးသော ရွာများမှာ မြိုင်ကုန်းရွာ၊ ဒိုင်းရွာ၊ မြနဒီရွာနှင့် မှက္ခရာရွာများတွင် အများဆုံးစိုက်ပျိုး ကြကြောင်း၊ မိုးနှောင်းချည်မျှင်ရှည်ဝါများကို နိုဝင်ဘာလကုန်ပိုင်းနှင့် ဒီဇင်ဘာလများတွင် ထွက်ပေါ် မည်ဖြစ်ကြောင်း၊ ဝါထွက်ပေါ်ချိန်တွင်လည်း အထွက်နှုန်းအနေဖြင့် ပိဿာ(၄၀၀ မှ ၅၀၀) အထိ ထွက်ရှိနိုင်မှာဖြစ်ကြောင်း၊ ယခုလက်ရှိ ဝါရောင်းချမှု ဈေးနှုန်းအနေဖြင့် ဝါတစ်ပိဿာလျှင် (၃၂၀၀/- မှ ၃၃၀၀/-)ကျပ်၊ ဂွမ်းတစ်ပိဿာလျှင် (၇၅၀၀/- မှ ၈၀၀၀/-)ကျပ်၊ ဝါစေ့တစ်ပိဿာလျှင် (၁၂၀၀/- မှ ၁၃၀၀/-)ကျပ် ဈေးနှုန်းများဖြင့် ရောင်းဝယ်လျက်ရှိကြောင်း၊ ဝါထွက်ပေါ်ချိန်တွင်လည်း တောင်သူ များမှ မြို့ပေါ်ပွဲရုံများသို့ တိုက်ရိုက်တင်ပို့ ရောင်းချကြောင်း၊ ပွဲစားများမှလည်း ဝါထွက်ရှိရာ ဒေသများ သို့ လာရောက်ဝယ်ယူ လျက်ရှိကြောင်း၊ ပွဲရုံများမှတစ်ဆင့် ဝါစက်ရုံ၊ ဝါပွဲရုံများနှင့် မန္တလေးစက်မှုဇုံ (၁)နှင့် ချည်မျှင်စက်ရုံများ၊ ယက်ကန်းစက်ရုံများသို့ တင်ပို့ရောင်းချလျက်ရှိကြောင်း၊ ချည်မျှင်ချည်ဝါ ထွက်ပေါ်ချိန်တွင် ဈေးနှုန်းများကောင်းမွန်ပါက အကျိုးအမြတ်ပိုမိုဖြစ်ထွန်းနိုင်မည် ဖြစ်ကြောင်း၊ ယခုလက်ရှိ ဝါပေါက်ဈေးအနေဖြင့် တစ်ပိဿာလျှင် (၃၂၀၀/-)ကျပ်ဖြင့် ရောင်းဝယ်ခဲ့သောကြောင့် တစ်ဧက အကျိုးအမြတ်အနေဖြင့် (၈၃၀၀၀၀/-)ကျပ်ခန့် အကျိုးအမြတ်ဖြစ်ထွန်းခဲ့ကြောင်း၊ ဝါအရည် အသွေးကောင်းမွန်ပြီး ဈေးကောင်းရရှိရန်အတွက် တောင်သူများမှ ဝါသီးနှံကို ရင့်မှည့်သော အချိန်၊ ဝါပေါက်အားကောင်းချိန်မှသာ ကောက်ယူရောင်းချမှသာ အရည်အသွေးပြည့်မီသော ဝါများရရှိမည် ဖြစ်ကြောင်း၊ တောင်သူများမှ ဝါများကို ပြည်တွင်းဈေးကွက်သာမက ပြည်ပဈေးကွက်များ ရရှိနိုင်ပါက အကျိုးအမြတ်ပိုမိုခံစားရနိုင်မည်ဖြစ်ကြောင်းကို ဝါစိုက်ပျိုးသော တောင်သူတစ်ဦး၏ပြောကြားချက် အရ သိရှိရပါသည်။

DOCA(မန္တလေး)

  မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ မြစ်သားမြို့နယ်တွင် မိုး၊ ဆောင်း ကြက်သွန်များ စိုက်ပျိုးရန်အတွက် ဇူလိုင်တတိယအပတ်နှင့် ဩဂုတ်လဆန်းပိုင်းများတွင် ကြက်သွန်ပျိုးများ စတင်ပျိုးထောင်လျက်ရှိကြောင်း၊ မိုးကြက်သွန်ကို စက်တင်ဘာလဆန်းတွင် စတင်စိုက်ပျိုးမည်ဖြစ်ကြောင်း၊ ကြက်သွန်ပျိုးတစ်ဧက စိုက်ပျိုးမှုကုန်ကျစရိတ်အနေဖြင့် ထွန်ယက် ခြင်း၊ ရေသွင်း၊ ရေထုတ်ခြင်း၊ မြေဩဇာပက်ခြင်း၊ ဆေးဖျန်းခနှင့် မျိုးဖိုးအပါအဝင် စုစုပေါင်း (၅၀၀၀၀၀/-)ကျပ်ခန့် ကုန်ကျကြောင်း၊ မျိုးအနေဖြင့် ရွှေဖလားမျိုးများကိုသာ အများဆုံး စိုက်ပျိုး ရန်အတွက် ပျိုးထောင်ကြကြောင်း၊ မျိုးစေ့(၁)ပြည်လျှင် (၅၀၀၀၀/-)ကျပ်ဖြင့် ဝယ်ယူပျိုးထောင်ရ ကြောင်း၊ တစ်ဧကစိုက်ပျိုးလျှင် မျိုးအနေဖြင့် (၂)ပြည်ပျိုးထောင်ရကြောင်း၊ ကြက်သွန်ပျိုး ထောင် သက်တမ်း (၁)လခွဲ(၂)လ အကြာတွင် စတင်စိုက်ပျိုးနိုင်ကြောင်း၊ ကြက်သွန်ဧက အများကြီးစိုက်သော တောင်သူများအနေဖြင့် စိုက်ပျိုးစရိတ် အကုန်အကျများသော်လည်း ကြက်သွန်များပေါ်ဦးပေါ်စတွင် ဈေးနှုန်းများကောင်းမွန်ရန် မျှော်လင့်ကြောင်း ကြက်သွန်အများဆုံး စိုက်ပျိုးသော ကသဲကုန်း ကျေးရွာမှ တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

   ကျောက်ဆည်ခရိုင်၊ ကျောက်ဆည်မြို့နယ်အတွင်းရှိ တောင်သူများသည် ငရုတ်၊ ကြက်သွန်၊ မြေပဲစသည့်သီးနှံမျိုးစုံ စိုက်ပျိုးသည့်အပြင် ကုန်စိမ်းသီးနှံတစ်မျိုးဖြစ်သော ခရမ်းကြွပ်သီးပင်ကို ကျောက်ဆည်မြို့နယ်၊ ပေါင်လောင်ကျေးရွာတွင် စိုက်ပျိုးကြောင်း သိရှိရပါသည်။ ခရမ်းကြွပ်ပင်ကို ရာသီမရွေးစိုက်ပျိုးနိုင်ကြောင်း သိရှိရပါသည်။ ခရမ်းကြွပ် စိုက်ပျိုးမည်ဆိုပါက မျိုးစေ့ကိုအရင် ပျိုးထောင်ပြီး၊ ပျိုးသက် (၁)လခွဲသားအရွယ်တွင် စတင်စိုက်ပျိုးရကြောင်း၊ (၂)လ၊ (၃)လခွဲ အကျော်တွင် အသီးများစတင် ခူးဆွတ်နိုင်ပြီး တစ်ပတ်ခြား တစ်ကြိမ်ခူးဆွတ်ရကြောင်း၊ စတင်ခူးဆွတ်သည်မှ တစ်ပတ်နှင့် တစ်ပတ်အထွက်နှုန်းပိုမိုလာကြောင်း၊ (၁)ဧကအထွက်နှုန်းအနေဖြင့် စတင်ခူးဆွတ်ချိန် တွင် ပိဿာ (၂၀-၃၀)ခန့် ထွက်ရှိပြီး အထွက်နှုန်းအများဆုံးအချိန်တွင် ပိဿာ (၁၅၀)ခန့် အထိ ထွက်ရှိကြောင်း၊ သက်တမ်းအနေဖြင့် (၂)လခန့်အထိ ခူးဆွတ်နိုင်ကြောင်း၊ တစ်ဧက ကုန်ကျစရိတ် လုပ်သားခ၊ မျိုး၊ သွင်းအားစု၊ မြေဆီ၊ ပိုးသတ်ဆေး စုစုပေါင်း ကုန်ကျစရိတ် (၉၀၀၀၀၀/- မှ ၁၀၀၀၀၀၀/-)ကျပ်ခန့် ကုန်ကျကြောင်း၊ ခရမ်းကြွပ်သီး ဖောက်သည်ဈေးအနေဖြင့် တစ်ပိဿာလျှင် (၁၇၀၀/-)ကျပ်၊ လက်လီဈေးအနေဖြင့် တစ်ပိဿာလျှင် (၂၀၀၀) ကျပ် ဈေးနှုန်းများဖြင့် အရောင်း ဝယ်ဖြစ်နေကြောင်း၊ တစ်ဧက အကျိုးအမြတ်အနေဖြင့် (၁၀၀၀၀၀၀/-) ကျပ် အမြတ်ရရှိကြောင်း၊ ကုန်စိမ်းပွဲစားများမှ စိုက်ခင်းအထိလာရောက်ဝယ်ယူပြီး ကျောက်ဆည်၊ စဉ့်ကိုင်နှင့် မန္တလေးမြို့ များသို့ တင်ပို့ရောင်းချကြောင်း သိရှိရပါသည်။

DOCA(မန္တလေး)