ပြည်တွင်းကုန်သွယ်မှုသတင်း

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကော့သောင်းခရိုင်ဦးစီးမှူးသည် ၂၀၂၄ ခုနှစ်၊ မေလ (၁၄) ရက်နေ့တွင် ကော့သောင်းခရိုင် ကုန်သည်ကြီးများအသင်းအစည်းအဝေး ခန်းမတွင် စားအုန်းဆီ  တင်သွင်း၊ သိုလှောင်၊ ဖြန့်ဖြူး၊ ထုတ်လုပ်ရောင်းချလျက်ရှိသော စားအုန်းဆီများနှင့် ပတ်သက်၍ သတ်မှတ်ရည်ညွှန်းစျေးအတိုင်းရောင်းချရန်၊ စျေးကစားရန်ရည်ရွယ်၍ သိုလှောင်ခြင်းမပြုရန် နှင့် မသမာသည့်လုပ်ဆောင်မှုများမဖြစ်စေရေး၊ထို့အတွက်ကျင်းပဆောင်ရွက်ခဲ့ခြင်းဖြစ်ကြောင်းသိရှိရပါသည်။

     ထိုသို့တွေ့ဆုံဆွးနွေးရာတွင် ကော့သောင်းခရိုင်ဦးစီးမှူးဒေါ်မြသီတာ (ဦးစီးအရာရှိ)က အဖွင့်အမှာစကားပြောကြားခဲ့ပြီး စားသုံးဆီတင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်‌ရေးကော်မတီအနေဖြင့် ကမ္ဘာစျေးနှုန်းဖြစ်ပေါ်ပြောင်းလဲမှုနှင့်အညီပြည်တွင်း၌ဖြစ်သင့်ဖြစ်ထိုက်သည့် စားအုန်းဆီစျေးနှုန်းများဖြစ်ပေါ်စေရေး၊ ထိန်းကျောင်းဆောင်ရွက်လျက်ရှိကြောင်း၊ စားသုံးသူပြည်သူများထံ လက်ဝယ်ရောက်ရှိစေ‌ ရေးအတွက် စားအုန်းဆီများကိုဝိသမလောဘဖြင့် စျေးနှုန်းမြှင့်တင်ရောင်းချခြင်း စျေးကစားရန်ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန် ဆောင်မှုဥပဒေအရ ထိရောက်စွာအရေးယူဆောင်ရွက်သွားမည်ဖြစ်ကြောင်း၊ ဆီဖူလုံမှုရရှိစေရေးအတွက် ဆီ ခွဲတမ်းများ ပိုမိုရရှိအောင်ဆောင်ရွက်လျက်ရှိကြောင်း၊ ဗူးသွပ်ဆီများကို တင်သွင်းသိုလှောင်ဖြန့်ဖြူးရောင်းချပါက ကုန်အညွှန်းမှတ်အသားများပါရှိရမည်ဖြစ်ကြောင်း ပြောကြားခဲ့ပြီး ဘေးအန္တာရယ်ကင်းရှင်းပြီး စံချိန်စံညွှန်းနှင့် ကိုက်ညီသည့် စားအုန်းဆီများကိုသာ ရောင်းချရန်ပြောကြားခဲ့ကြောင်း သတင်းရရှိပါသည်။

DOCA(တနင်္သာရီ)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် မိသားစုစားဝတ်နေရေးအတွက် ရာသီပေါ်သီးနှံစိုက်ပျိုးခြင်းလုပ်ငန်းအပြင် မိသားစုတစ်နိုင်တစ်ပိုင်ဖြစ်သော ပဲလင်းမြွေသီး(ခေါ်) ဗုံလုံသီးကို စိုက်ပျိုးရောင်းချပါကြောင်း၊ ပဲလင်းမြွေသီး(ခေါ်)ဗုံလုံသီးကို မိမိတို့ကုန်းကွက်များနှင့် အိမ်ခြံဝင်းများအတွင်းတွင် စင်ထိုးစိုက်ပျိုးကာ မြေအောက်ရေတင်စနစ်ဖြင့်စိုက်ပျိုးပါကြောင်း၊ ပဲလင်းမြွေသီး (ခေါ်)ဗုံလုံသီးများကို ကန့်ဘလူမြို့နယ်အတွင်း ကျေးရွာများနှင့် မြို့ပေါ်ရပ်ကွက်များမှ လာရောက်ရောင်းချကြောင်းသိရှိရပါသည်။

     ပဲလင်းမြွေသီး(ခေါ်)ဗုံလုံသီး၏ ကျန်းမာရေးအကျိုးအာနိသင်များနှင့် ရောဂါများအတွက် ဆေးဘက်ဝင်ပုံများမှာ ဆီးချိုရောဂါကိုကာကွယ်နိုင်ခြင်း၊ အသားဝါသက်သာစေခြင်း၊ ကိုယ်အလေးချိန်လျော့ကျစေခြင်း၊ ခန္ဓာကိုယ် ကိုယ်တွင်းအင်္ဂါအစိတ်အပိုင်းများမှ ဖြစ်ပွားတက်သည့် အဆိပ်အတောက် များကိုလည်ထိရောက်စွာ ဖယ်ရှားပေးခြင်း၊ ဆီးရွှင်စေခြင်း၊ နှလုံးကိုလည်ကျန်းမာစေခြင်း၊ ဝမ်းမှန်စေခြင်း၊ အရိုးနှင့်သွားများကိုလည်ခိုင်မာစေခြင်းနှင့် အရည်ညစ်ပြီး ဦးရေပြားမှာလိမ်းပေးပါကာ နာရီဝက်ခန့်ထားပြီး ခေါင်းလျှော်ပေးလျှင် အရေးပြားရဲ့အစိုဓါတ်များကိုလည်ထိန်းသိမ်းပေးပြီး ဗောက်ပြဿနာကင်းစင်စေခြင်း စသည့်အကျိုးအာနိသင်များရရှိသည့်အတွက် ပဲလင်းမြွေသီး(ခေါ်)ဗုံလုံသီးကို စားသုံးသင့်ပါကြောင်း သိရှိရပါသည်။

      ယခု ၂၀၂၄ ခုနှစ်၊ ဇွန်လတတိယပတ်အတွင်း ဖြစ်ပေါ်နေသော ကန့်ဘလူမြို့၏ ပဲလင်းမြွေသီး (ခေါ်)ဗုံလုံသီး ဈေးနှုန်းမှာ ပဲလင်းမြွေသီး(ခေါ်)ဗုံလုံသီးအတောင့်ကြီး တစ်တောင့်လျှင်(၈၀၀)ကျပ်၊ အတောင့်အလတ်တစ်တောင့်လျှင်(၇၀၀)ကျပ်၊ အတောင့်အသေးတစ်တောင့်လျှင်(၅၀၀)ကျပ် ဈေးနှုန်းအသီးသီးဖြင့် ‌ရောင်းချလျက်ရှိပါကြောင်း ကန့်ဘလူမြို့မစည်ပင်သာယာဈေးတွင် ကုန်စိမ်းသီနှံရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ အနောက်ပိုင်းရွာသစ်ရပ်ကွက်နှင့် ကိုးတောင့်၊ ရေလယ်ကျွန်း၊ သံဇလုံ၊ အောက်ဆိပ်၊ ချဉ်တောင်၊ မြင့်ကဝ၊ ချောင်းမန်ကျည်း၊ တူရွင်းမျှော၊ ဂွေးပင်ကျေးရွာများတွင် မိသားစုအပိုဝင်ငွေရရှိစေရန် ကုန်စိမ်းသီးနှံ၊ ဟင်းသီးဟင်းရွက်များစိုက်ပျိုးကြကြောင်း၊ ဆောင်းသီးနှံစိုက်ပျိုးမှုများပြီး နွေသီးနှံပင်ထောင်ခရမ်းချဉ်များကို စိုက်ပျိုးမှုနည်း၍ ဈေးကွက်လိုအပ်ချက်အရ ဒေသတွင်းခရမ်းချဉ်သီးအပြင် ရှမ်းပြည်အောင်ပန်းနှင့် ပုပ္ပါးဒေသထွက်ခရမ်းချဉ်သီးများ ဝင်ရောက်အရောင်းအဝယ်ဖြစ်လျက်ရှိသည်။

     ဈေးနှုန်းဈေးကွက်အနေဖြင့် ၂၀၂၄ခုနှစ်၊ ဇွန်လ(တတိယပတ်)တွင် ခရမ်းချဉ်သီး (ထိုင်ဝမ်)တစ်ပိဿာလျှင် လက်ကား ကျပ်(၅၀၀၀)၊ လက်လီ ကျပ်(၆၀၀၀)ဈေးနှုန်းဖြင့်အရောင်းအဝယ်ဖြစ်ပြီး ယခင်မေလ(တတိယပတ်)တွင် ခရမ်းချဉ်သီးတစ်ပိဿာလျှင် လက်ကားဈေး ကျပ် (၂၀၀၀)၊ လက်လီဈေး ကျပ်(၂၈၀၀)ဈေးနှုန်းဖြင့်အရောင်းအဝယ်ဖြစ်ခဲ့၍ တစ်လအတွင်း ခရမ်းချဉ်သီးတစ်ပိဿာလျှင် ကျပ်(၃၀၀၀)ခန့်ဈေးနှုန်းမြင့်တက်လာပြီး အရောင်းအဝယ်ဖြစ်လျက်ရှိကြောင်း၊ ဈေးနှုန်းမြင့်တက်ရခြင်းမှာ ဒေသတွင်းခရမ်းချဉ်သီးထွက်ရှိမှုနည်းပြီး နယ်မြေအခြေအနေအရ ဈေးကွက်သို့ ခရမ်းချဉ်သီးဝင်ရောက်မှုနည်းခြင်းကြောင့် ဈေးနှုန်းမြင့်တက်ကြောင်း ကုန်စိမ်းသီးနှံရောင်းဝယ်ရေးလုပ်ငန်းရှင်တစ်ဦးထံမှသိရှိရပါသည်။

DOCA(မကွေး)

      မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ဝန်ရအုပ်စုရှိ ကံကုန်းကျေးရွာတွင် မိုးနှမ်းကို ကြဲပက်စနစ်ဖြင့် တန်ခူးလတွင် တောင်သူ(၇၀)ဦးသည် စိုက်ဧက(၁၅၀)ဧကစိုက်ပျိုးထားရာ ဝါဆိုလတွင် ရိတ်သိမ်းမည်ဖြစ်ကြောင်းသိရပါသည်။

         နှမ်းနက်စမုံမျိုးကို အများဆုံးစိုက်ပျိုးပြီး (၁)ဧကလျှင် မျိုး(၅)ပြည်ခန့်ကုန်ကျကြောင်း၊ ၎င်းအနေဖြင့် နှမ်းနက်စမုန်မျိုး(၅)ဧကခန့်စိုက်ပျိုးထားကြောင်း၊ မျိုးကို(၁)ပြည်လျှင် ကျပ်(၁၁၀၀၀)ဖြင့် စလင်းမြို့မှဝယ်ယူကြောင်း၊ ယခင်နှစ်တွင် (၁)ဧကလျှင် ကျပ်(၂၅၀၀၀၀) သာကုန်ကျသော်လည်း ယခုနှစ်တွင် သွင်းအားစုစရိတ်မြင့်တက်လာ၍ မြေပြုပြင်ခ၊ လုပ်အားခနှင့် မျိုးဖိုးအပါအဝင် စုစုပေါင်း ကျပ်(၃၀၀၀၀၀)ခန့်ကုန်ကါကြောင်း၊ ယခင်နှစ်တွင် (၁) ဧကလျှင် (၁၀)တင်းမှ(၂၀)တင်းထိထွက်ရှိပြီး ဈေးနှုန်းမှာ (၁)တင်းလျှင် ကျပ်(၁၄၀၀၀၀)ထိရရှိခဲ့ကြောင်း၊ ဈေးကွက်အနေဖြင့် စလင်းမြို့ပေါ်ရှိ ပွဲရုံများသို့တင်ပို့ရောင်းချကြောင်း ကံကုန်းကျေးရွာနေ မိုးနှမ်းစိုက်တောင်သူ ဦးမြင့်စိုးထံမှသိရှိရပါသည်။

DOCA(မကွေး)

      ၂၅-၆-၂၀၂၄ ရက်နေ့တွင်  တိုင်းဒေသကြီး/ ပြည်နယ်များရှိ ကုန်စည်ဒိုင်များတွင်ဖြစ်ပေါ်နေသော မတ်ပဲ၊ ပဲတီစိမ်းနှင့် ပဲစင်းငုံများ၏ ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူဈေးနှုန်းစာရင်းဇယားနှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်-