ပြည်တွင်းကုန်သွယ်မှုသတင်း

     ဧရာဝတီတိုင်းဒေသကြီးအတွင်းရှိ ဒေသထွက်ကုန်များတွင် ပြည်ပပို့ကုန် သီဟိုဠ်ဈေးကွက်မှာ ရာသီသီးနှံအဖြစ် ဖေဖော်ဝါရီလ နောက်ဆုံးပတ်မှစတင်၍ ဈေးကွက်သို့ ဝင်ရောက်လျက်ရှိပြီး မတ်လပိုင်းဆိုလျှင် သီဟိုဠ်လှိုင်လှိုင်ပေါ်မည်ဖြစ်ကြောင်း၊ သီဟိုဠ်ရာသီမှာ မိုးမရွာခင်အချိန်အထိ ဈေးကွက်၌ အရောင်းအဝယ်ဖြစ်၍ မေလ၊ ဇွန်လများတွင် မိုးဖြိုင်ဖြိုင်ရွာသွန်းပါက ဈေးကွက်တွင် အရောင်းအဝယ်မဖြစ်တော့ဘဲ သီဟိုဠ်ရာသီပြီးဆုံးသွားကြောင်း၊ ယခင်နှစ်သီဟိုဠ်ကုန်ကြမ်း ၁ပိဿာလျှင် ကျပ်၄၂၀၀၀ဈေးနှုန်းရှိပြီး ယခုနှစ်တွင် သီဟိုဠ် ၁ပိဿာလျှင် ကျပ် (၄၈၀၀/၅၀၀၀) ဈေးနှုန်းရရှိသည့်အတွက် ယခင်နှစ်ထက် ၁ပိဿာလျှင် ကျပ် (၆၀၀/၈၀၀) ဈေးနှုန်းပိုမိုရရှိပြီး သီဟိုဠ်တောင်သူများ တွက်ခြေကိုက်လျက်ရှိကြောင်း ပုသိမ်မြို့၊ သရဖူသီဟိုဠ်အဝယ်ဒိုင်မှသိရသည်၊၊

      တိုင်းဒေသကြီးအတွင်း ပြည်တွင်း/ပြည်ပဈေးကွက်ဝင် နှစ်ရှည်သီးနှံသီဟိုဠ်စိုက်ဧက (၆၅၉၃၃) ဧကရှိပြီး ပုသိမ်ခရိုင်၊ ဟင်္သာတခရိုင်နှင့် မြောင်းမြခရိုင်တို့တွင် အများဆုံးစိုက်ပျိုးလျက် လပွတ္တာခရိုင်နှင့် ဖျာပုံခရိုင်တို့တွင်လည်း စိုက်ပျိုးမှုရှိကြောင်း၊ သီဟိုဠ်ကို မြေအမျိုးအစားမရွေးစိုက်ပျိုးနိုင်ပြီး ၎င်းမှာ ရခိုင်ကမ်းရိုးတန်း၊ တနင်္သာရီကမ်းရိုးတန်း၊ အနောက်ဘက်ကမ်းရိုးတန်း၊ မြစ်ဝကျွန်းပေါ်နှင့် ပင်လယ်ပိုင်းဒေသများတွင်လည်း အောင်မြင်ဖြစ်ထွန်းလျက်ရှိကြောင်းသိရသည်၊၊

      ပုသိမ်မြို့နယ်နှင့် သာပေါင်းမြို့နယ်ထွက် သီဟိုဠ်သီဟိုစေ့မှာ အစေ့ကြီး၍ ရေကြည်မြို့နယ်ထွက် သီဟိုဠ်မှာ အလယ်အလတ်ရှိပြီး မြောင်းမြမြို့နယ်ထွက် သီဟိုဠ်စေ့မှာ အစေ့သေးသော်လည်း အထွက်နှုန်းပို၍ကောင်းမွန်ကြောင်း၊ ၎င်းမှာ စတင်စိုက်ပျိုးချိန်မှ ခူးဆွတ်ရသည်အထိ (၅)နှစ်ကြာပြီး အပင်သက်တမ်း နှစ်(၆၀)ရှိသဖြင့် ရေရှည်အကျိုးအမြတ်ရရှိသည့် နှစ်ရှည်သီးနှံအမျိုးအစားဖြစ်၍ သီဟိုဠ်ခူးဆွတ်ခြင်းကို ဖေဖော်ဝါရီလမှစတင်ခူးဆွတ်၍ မေလမိုးမရွာခင်အထိ ဈေးကွက်တွင် အရောင်းအဝယ်ဖြစ်၍ မိုးထိလျှင် သီဟိုဠ်စေ့မှာ မူလအရောင်ပျက်ကာ မဲသွားပြီး ဈေးကွက်တွင်လည်း အရောင်းအဝယ်မဖြစ်တော့ကြောင်းသိရသည်။

     သီဟိုဠ်ပေါ်ချိန်၌ ပုသိမ်မြို့တွင် အဝယ်ဒိုင် (၅)ဒိုင်၊ သာပေါင်းမြို့ပေါ်တွင် (၃)ဒိုင်ခန့်၊ မြောင်းမြမြို့ပေါ် တွင် အဝယ်ဒိုင် (၂)ဒိုင်နှင့် ရေကြည်မြို့ပေါ်တွင် အဝယ်ဒိုင် (၂)ဒိုင်ဖြင့် ဝယ်ယူလျက်ရှိပြီး ဝယ်ယူရရှိသော သီဟိုဠ်ကုန်ကြမ်းများကို ရန်ကုန်မြို့သို့အဓိကတင်ပို့၍ ပုသိမ်မြို့နှင့် ရေကြည်မြို့တို့တွင် သီဟိုဠ်စေ့ကုန်ချောပြုလုပ်၍ ပြည်တွင်းဈေးကွက်နှင့် Export ဈေးကွက်အဖြစ် တရုတ်နိုင်ငံ၊ ကိုရီးယားနိုင်ငံ၊ စင်ကာပူနိုင်ငံနှင့် မလေးရှားနိုင်ငံများသို့ ရန်ကုန်မှတစ်ဆင့် တင်ပို့ရောင်းချလျက်ရှိကြောင်းသိရသည်။ သီဟိုဠ်စေ့ကို တန်ဖိုးမြှင့်စားသောက်ကုန်အဖြစ် ချောကလက်၊ ရေခဲမုန့်၊ ထိုးမုန့်၊ ကိတ်မုန့်အမျိုးမျိုး၊ မုန့်မျိုးစုံ၊ ယိုစုံ၊ ဒံပေါက်နှင့် ဟိုတယ်စာအဖြစ် မုန့်အမျိုးမျိုးတို့တွင် ပါဝင်အသုံးပြုလျက်ရှိပြီး သီဟိုဠ်စေ့တွင် Vitamine-E ပါဝင်သဖြင့် ပြည်ပနိုင်ငံများတွင် ဆံပင်၊ အသားအရေလှပသည့် မိတ်ကပ်အကူပစ္စည်း ခေါင်းလိမ်းဆီထုတ်လုပ်ရာနှင့် အိန္ဒိယနိုင်ငံတွင် သီဟိုဠ်စေ့အခွံ ကို သင်္ဘောဆေးလုပ်ငန်းတွင် ကုန်ကြမ်းအဖြစ် အသုံးပြုလျက်ရှိကြောင်းသိရသည်။

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ အစည်းအဝေးခန်းမတွင် ဖေဖော်ဝါရီလ ၂၇ရက်နေ့၊ နံနက် (၁၀:၀၀) နာရီအချိန်၌ သီဟိုဠ်ကဏ္ဍဖွံ့ဖြိုးတိုးတက်ရေး အလုပ်ရုံဆွေးနွေးပွဲကျင်းပပြုလုပ်ခဲ့ရာ စားသုံးသူရေးရာဦးစီးဌာန၊ တိုင်းဦးစီးမှူး ဦးစိုးအောင်၊ ပုသိမ်တက္ကသိုလ်၊ ပထဝီဝင်ဌာနမှ ပါမောက္ခ ဒေါက်တာဇင်မေဦး၊ စိုက်ပျိုးရေးဦးစီးဌာန၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနမှ တိုင်းအဆင့်အကြီးအကဲများ၊ အစိုးရစက်မှုလက်မှုအထက်တန်းကျောင်းမှ ကျောင်းအုပ်ဆရာကြီး၊ ဧရာဝတီကုန်သည်စက်မှုအသင်းအထွေထွေအတွင်းရေးမှူး ဦးမောင်မောင်ဦး၊ ဧရာဝတီတိုင်းဒေသတွင်းထုတ်ကုန်များသုတေသနနှင့် ဈေးကွက်သုတေသနကော်တီဥက္ကဋ္ဌ ဦးဝင်းမြင့်လှိုင်နှင့် တိုင်းအတွင်းရှိ မြို့နယ်သီဟိုဠ်အသင်းဥက္ကဋ္ဌနှင့်အဖွဲ့ဝင်များ၊ သီဟိုဠ်စိုက်ပျိုးထုတ်လုပ်သော တောင်သူလုပ်ငန်းရှင်များ၊ စုစုပေါင်း (၃၅)ဦးတက်ရောက်ခဲ့ကြပါသည်၊၊

    အဆိုပါဆွေးနွေးပွဲတွင် တက်ရောက်လာသော တိုင်းအဆင့်ဌာနဆိုင်ရာများမှ သက်ဆိုင်ရာကဏ္ဍအလိုက် ဆွေးနွေး၍ သီဟိုဠ်စိုက်ပျိုးထုတ်လုပ်သူများ၏ တင်ပြလာသော ဈေးကွက်အခြေအနေ၊ နည်းပညာ၊ အရင်းအနှီး၊ ဈေးကွက်လိုအပ်ချက်ကုန်စည်စီးဆင်းမှုအခြေအနေများအပေါ် ဆွေးနွေးခဲ့ရာ ဌာနဆိုင်ရာများအနေဖြင့် ပြန်လည်ဆွေးနွေးခဲ့ရာတွင်  ဧရာဝတီတိုင်းဒေသကြီးအတွင်း သီဟိုဠ်စိုက်ပျိုးသော ဧကများစွာရှိပြီး ဆက်စပ်နေရာများတွင် စိုက်ပျိုးနိုင်ခြင်း၊ မြေလွတ်မြေရိုင်းများရှိနေခြင်း၊ နေရာမရွေးစိုက်ပျိုးနိုင်ပြီး အထွက်နှုန်းသင့်တင့်ကောင်းမွန်၍ ပြည်တွင်း/ ပြည်ပဈေးကွက်ဝယ်လိုအားရှိသည့်အတွက် ကုန်ကြမ်းအဆင့်မှတစ်ဆင့် တန်ဖိုးမြှင့်ထုတ်ကုန်အဖြစ် တိုးမြင့်ထုတ်လုပ်၍ ပုဂ္ဂလိကကဏ္ဍပိုမိုဖွံ့ဖြိုးတိုးတက်လာစေရန်နှင့် ပြည်တွင်းကုန်သွယ်ရေးဖွံ့ဖြိုးတိုးတက်မှုမှ ပို့ကုန်ကဏ္ဍတိုးမြှင့်တင်ပို့နိုင်ရန်အတွက် တိုင်းသီဟိုဠ်အသင်းကို သင်းဖွဲ့စည်းမျဉ်းများနှင့်အညီ ကျစ်လစ်ခိုင်မာစွာဖွဲ့စည်းနိုင်ရေး ဧရာဝတီကုန်သည်များနှင့် စက်မှုအသင်းဌာနဆိုင်ရာများသာမက နောက်ပိုင်းတွင် UMFCCI အသင်းကြီးနှင့်လည်းချိတ်ဆက်ဆောင်ရွက်နိုင်ရန်နှင့် One Village One Product ကဲ့သို့ ပို့ကုန်အမယ်သစ်အဖြစ် ပြည်ပဈေးကွက်ပိုမိုဖောက်နိုင်ရန်အတွက် အားလုံးဝိုင်းဝန်းကြိုးပမ်းဆောင်ရွက်သွားကြရန်နှင့် ရှေ့ဆက်လက်ဆောင်ရွက်မည့် ကိစ္စရပ်များကို ဆွေးနွေးခဲ့ကြကြောင်းသိရှိရပါသည်၊၊

DOCA(ဧရာဝတီ)

     ၂၀၂၄ခုနှစ်၊ ဖေဖေါ်ဝါရီလ နောက်ဆုံးပတ်တွင် မြင်းခြံခရိုင်အတွင်းဖြစ်ပေါ်နေသော မိုးကြက်သွန်နီဈေးနှုန်းများအနေဖြင့် အကြီးစတစ်ပိဿာလျှင် ၂၉၀၀ကျပ်မှ ၃၀၀၀ကျပ်၊ အလတ်စတစ်ပိဿာလျှင် ၂၅၀၀ကျပ်မှ ၂၇၀၀ကျပ်ဖြစ်ပြီး အသေးစတစ်ပိဿာလျှင် ၁၉၀၀ကျပ်မှ ၂၀၀၀ကျပ်နှုန်း စသည့်ဈေးနှုန်းအသီးသီးဖြင့် အရောင်းအဝယ်ဖြစ်နေကြောင်းသိရှိရပါသည်။ ယခင်အပတ်တွင်ဖြစ်ပေါ်ခဲ့သော ဈေးနှုန်းများအနေဖြင့် မိုးကြက်သွန်နီအကြီးတစ်ပိဿာလျှင်  ၁၉၀၀ကျပ်မှ ၂၂၀၀ကျပ်၊ အလတ်စတစ်ပိဿာလျှင် ၁၅၀၀ကျပ်မှ ၁၈၀၀ကျပ်၊ အသေးစတစ်ပိဿာလျှင် ၁၀၀၀ကျပ်မှ ၁၃၀၀ကျပ်ဖြင့် အရောင်းအဝယ်ဖြစ်ခဲ့ကြောင်းသိရှိရပါသည်။ ယခင်အပတ်ထက် ယခုအပတ်တွင် မိုးကြက်သွန်နီအရွယ်အစားအလိုက် တစ်ပိဿာလျှင် ၇၀၀ကျပ်အထိဈေးနှုန်းမြင့်တက်လာခဲ့ပါသည်။ ယင်းသို့မြင့်တက်ရခြင်းမှာ တောင်သူများလက်ထဲတွင် မိုးကြက်သွန်နီလက်ကျန်လျော့နည်းနေပြီး ဝယ်လိုအားများသောကြောင့် ဈေးနှုန်းမြင့်တက်လာခြင်းဖြစ်သည်ဟု ကြက်သွန်နီကုန်သည်တစ်ဦး၏ ပြောပြချက်အရသိရှိရပါသည်။

     ယခုအပတ်တင်ပို့မှုအနေဖြင့် မိုးကြက်သွန်နီကုန်ချိန်ပိဿာ (၁၂၃၀၀၀)ပိဿာကျော်တင်ပို့ခဲ့ပြီး ယခင်အပါတ်တင်ပို့မှုမှာ (၁၁၀၀၀၀)ပိဿာကျော်တင်ပို့ခဲ့ကြောင်းသိရှိရပါသည်။ ယခင်အပတ်ထက် ယခုအပတ်တွင် ကုန်ချိန်ပိဿာ(၁၃၀၀၀)ကျော်ပိုမိုတင်ပို့နိုင်ခဲ့ပြီး ဈေးနှုန်းလည်းပိုမိုရရှိခဲ့ကြောင်း၊ မြင်းခြံမြို့နယ်မှ စိုက်ပျိုးထွက်ရှိသော မိုးကြက်သွန်နီများကို မန္တလေး၊ ရန်ကုန်၊ နေပြည်တော်နှင့် မော်လမြိုင်မြို့များသို့ တင်ပို့လျက်ရှိကြောင်းသိရှိရပါသည်။ မကြာမီ နွေကြက်သွန်နီများလည်းထွက်ပေါ်လာတော့မည်ဖြစ်ကြောင်းသိရှိရပါသည်။

DOCA(မန္တလေး)

    မွန်ပြည်နယ်သည် စပါးစိုက်ဧကများပြီး ဆန်ဖူလုံမှုရှိပြီး ဒေသထွက် ဧည့်မထ(စပါး) စိုက်ပျိုးမှုများပြီး ပိုလျှံသော်လည်း ပေါ်ဆန်း(ဆန်)များကို အခြားတိုင်းဒေသကြီးမှလည်း ဝယ်ယူ တင်သွင်းရသောဒေသဖြစ်သည်။

    ဖေဖော်ဝါရီလနောက်ဆုံးအပတ်တွင် မော်လမြိုင်မြို့၌ဖြစ်ပေါ်နေသော ဆန်ဈေးနှုန်းများမှာ ပေါ်ဆန်း(ဆန်)၂၄ပြည်တစ်အိတ်လျှင်  ကျပ် ၁၂၂၀၀၀၊ တစ်ပြည်လျှင် ကျပ် ၅၃၀၀ ဖြစ်ပြီး ယခင် အပတ်နှင့်နှိုင်းယှဉ်ပါကဈေးနှုန်းပြောင်းလဲမှုမရှိဘဲ ယခင်လနှင့်နှိုင်းယှဉ်ပါကပေါ်ဆန်း(ဆန်) ၂၄ပြည် တစ်အိတ်လျှင်  ကျပ် ၁၂၀၀၀၊ တစ်ပြည်လျှင် ကျပ် ၆၀၀ ခန့် ဈေးနှုန်းမြှင့်တက်လာပြီး ယခင်နှစ် ဖေဖော်ဝါရီ ၂၉ ရက်တွင် ဖြစ်ပေါ်နေသော ပေါ်ဆန်း(ဆန်) ပေါ်ဆန်း(ဆန်)၂၄ပြည်တစ်အိတ်လျှင်  ကျပ်၅၂၀၀၀၊ တစ်ပြည်လျှင် ကျပ် ၂၃၀၀ ခန့်ဈေးနှုန်းမြှင့်တက်လာခဲ့သည်ကို တွေ့ရှိရသည်။

     ဧည့်မထ(ဆန်)မှာ ဖေဖော်ဝါရီလ နောက်ဆုံးအပတ်တွင် ဧည့်မထ(ဆန်) ၂၄ပြည်တစ်အိတ်လျှင် ကျပ် ၇၉၀၀၀၊ တစ်ပြည်လျှင် ကျပ် ၃၅၀၀ ဖြစ်ပေါ်နေပြီး ယခင်အပတ်နှင့် နှိုင်းယှဉ်ပါက ဈေးနှုန်း ပြောင်းလဲခြင်းမရှိဘဲ ယခင်လနှင့်နှိုင်းယှဉ်ပါက ဧည့်မထ(ဆန်) ၂၄ပြည် တစ်အိတ်လျှင် ၁၁၀၀၀ ကျပ် ၊ တစ်ပြည်လျှင် ၅၀၀ ကျပ်  ယခင်နှစ်အလားတူ ကာလနှင့်နှိုင်းယှဉ်ပါကလည်း ဧည့်မထ(ဆန်) ၂၄ပြည်တစ်အိတ်လျှင် ကျပ်၂၁၀၀၀၊ တစ်ပြည်လျှင် ကျပ် ၁၀၀၀ ခန့်ဈေးနှုန်းမြှင့်တက်လာခဲ့သည်ကို တွေ့ရှိရသည်။

စီးဝင်မှုစီးထွက်မှု

      မွန်ပြည်နယ်အတွင်းသို့ (၁၈.၂.၂၀၂၄ မှ ၂၄.၂.၂၀၂၄) ရက်နေ့ထိ ပေါ်ဆန်း(ဆန်) ဝင်ရောက် မှုမှာ ရန်ကုန်တိုင်းဒေသကြီးမှ (၁၉၁၉၉)အိတ်(၉၆၀တန်)၊ စစ်ကိုင်းတိုင်းဒေသကြီးမှ (၂၅၂၅) အိတ်(၁၂၆တန်)၊ ဧရာဝတီတိုင်းဒေသကြီးမှ (၁၆၂၈)အိတ် (၈၁တန်) ပဲခူးတိုင်းဒေသကြီးမှ (၂၉၉၀)အိတ်(၁၄၅တန်)၊ စုစုပေါင်း(၂၆၅၄၂)အိတ်(၁၃၂၇တန်)ခန့်စီးဝင်လျှက်ရှိပြီး ပြည်နယ်တွင်းမှ စီးထွက်မှုမှာ  ကရင်ပြည်နယ်သို့ ပေါ်ဆန်း (ဆန်) (၁၈)တန်၊ ကမာကြည်(ဆန်)(၂၂)တန်၊ ဧည့်မထ (ဆန်)(၄၁)တန်၊ စုစုပေါင်း(၈၁)တန်ခန့်ရှိကြောင်း ပြည်နယ် ဆန်ကုန်သည်အသင်းထံမှ သိရှိရသည်။

DOCA(မွန်)

     ကျောက်ဆည်ခရိုင်အတွင်း နနွင်းများကို ၂၀၂၄ခုနှစ်၊ ဖေဖော်ဝါရီလ ပထမပတ်မှစတင်၍ တူးဖော်လျက်ရှိရာ ယခုအချိန်တွင် နနွင်းများလှိုင်လှိုင်ထွက်ပေါ်လျက်ရှိပါသည်။ နနွင်းစတင်တူးဖော်ချိန်တွင် စျေးနှုန်းများကောင်းမွန်လျက်ရှိပြီး တောဝယ် နနွင်းအစို (၁)တင်းလျှင် (၁၂၅၀၀-၁၄၀၀၀) ကျပ်အထိရောင်းချခဲ့ရပြီး ဖေဖော်ဝါရီလ ဒုတိယအပတ်မှစတင်၍ နနွင်းစျေးများကျဆင်းလာပြီး တောဝယ် နနွင်းအစို(၁)တင်းလျှင် (၁၁၂၀၀-၁၁၆၀၀)ကျပ်အထိဈေးနှုန်းကျဆင်းခဲ့ပါသည်။ ၂၀၂၃ခုနှစ်၊ ဖေဖော်ဝါရီလတွင် နနွင်းတက်(၁)တင်းလျှင်(၈၈၀၀)ကျပ်၊ နနွင်းတက်အခြောက်(၁)ပိဿာလျှင် (၃၆၀၀)ကျပ်၊ နနွင်းမှုန့်(၁)ဘူးလျှင် (၈၀၀-၁၀၀၀)ကျပ်စျေးနှုန်းတို့ဖြင့် ရောင်းဝယ်လျက်ရှိပြီး ယခုဖေဖော်ဝါရီလ နောက်ဆုံးပတ်တွင် တောဝယ် နနွင်းတက်စို(၁)တင်းလျှင် (၁၁၂၀၀)ကျပ်၊ နနွင်းတက်အခြောက် (၁)ပိဿာလျှင် (၅၅၀၀)ကျပ်၊ နနွင်းမှုန့်(၁)ဘူးလျှင် (၁၀၀၀-၁၂၀၀)ကျပ်စျေးနှုန်းတို့ဖြင့် ရောင်းချရကြောင်း၊ နနွင်းများကို ပွဲစားများက ယာခင်းထဲအရောက်လာရောက်ဝယ်ယူပြီး နနွင်းကို ရေနွေးဖျော၊ အခြောက်ခံကာ မြို့ပေါ်ပွဲရုံများသို့သွားရောက်ရောင်းချကြောင်း၊ တချို့ပွဲစားများမှာ နနွင်းတက်အခြောက်များကိုလှောင်ထားပြီး စျေးနှုန်းမြင့်တက်ချိန်ရောက်မှသာ ထုတ်ရောင်းကြကြောင်း၊ နနွင်းများကို ပွဲရုံများမှတစ်ဆင့် ရန်ကုန်-မန္တလေးမြို့များသို့ တင်ပို့ရောင်းချကြကြောင်းသိရှိရပါသည်။

DOCA(မန္တလေး)

      မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးလျက်ရှိပြီး စားဖိုဆောင်သီးနှံတစ်မျိုးဖြစ်သော ငရုတ်သီးနှံကိုလည်းစိုက်ပျိုးလျက်ရှိရာ (၂၀၂၃-၂၀၂၄) ဘဏ္ဍာနှစ်တွင် (၅၈၁၀)ဧကစိုက်ပျိုးထားကြောင်း ခရိုင်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ ငရုတ်စိုက်ပျိုးမှု(၁)ဧကလျှင် ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၅)သိန်းကျပ်ခန့်ကုန်ကျကြောင်း၊ အများဆုံးစိုက်ပျိုးသော ငရုတ်မျိုးများမှာ (၆၉၂)ငရုတ်မျိုးနှင့် ကျားခေါင်းမျိုးတို့ဖြစ်ကြပါသည်။ ယခုအချိန်တွင် ကျားခေါင်းငရုတ်မျိုးများမှာ စတင်ထွက်ရှိနေပြီး (၁)ဧကလျှင် (၅)ရက်ခြားခူးဆွတ်မှုအနေဖြင့် (၁၀)တင်းနှုန်း၊ ပိဿာအနေဖြင့် (၈၀)ပိဿာခန့်ထွက်ရှိကြောင်း၊ ငရုတ်စျေးနှုန်းအနေဖြင့် ငရုတ်အစို(၁)ပိဿာလျှင် (၂၃၀၀-၂၄၀၀)ကျပ်စျေးနှုန်းတို့ဖြင့်ရောင်းချရကြောင်း၊ ငရုတ်အစိုများကို ငရုတ်ခင်းများအထိ လာရောက်ဝယ်ယူသူများရှိသလို နီးစပ်ရာပွဲရုံများသို့လည်းရောင်းချသူများရှိပါသည်။ အထွက်နှုန်းအနေဖြင့် ငရုတ်စတင်ထွက်ပေါ်ချိန်မှ ငရုတ်သီးအခင်းဖြတ်ချိန်အထိ ပိဿာ(၈၀၀-၉၀၀) အထိထွက်ရှိနိုင်ကြောင်း၊ ငရုတ်များကောင်းမွန်ပါက အကျိုးအမြတ်ပိုမိုရရှိနိုင်မည်ဖြစ်ကြောင်း ငရုတ်စိုက်ပျိုးသော တောင်သူတစ်ဦး၏ ပြောပြချက်အရသိရှိရပါသည်။

DOCA(မန္တလေး)