ပြည်တွင်းကုန်သွယ်မှုသတင်း

၁.၃.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

     မကွေးတိုင်းဒေသကြီး၊ ပခုက္ကခရိုင်၊ ပခုက္ကူမြို့နယ် ဆိက္ခဝအုပ်စုအတွင်းရှိ ကျေးရွာများမှ နှစ်စဉ် ငရုတ်၊ ကြက်သွန်နီ၊ မြေပဲ၊ ပဲနီပြား၊ ပဲဇီးကွက် သီးနှံများကို ရေမြုပ်မြေ မြေနုကျွန်းများပေါ်တွင် စိုက်ပျိုးကြသည်။ အဓိကသီးနှံအဖြစ် ငရုတ်နှင့် မြေပဲကို စိုက်ပျိုးကြောင်း၊ ဆီထွက်သီးနှံမြေပဲကို ဒေသခံပြည်သူများမှ နှစ်စဉ်တပိုင်တနိုင် စိုက်ပျိုးကြောင်း၊ ဆိက္ခဝအုပ်စုတွင် မြေပဲသီးနှံကို  နှစ်စဉ်ဧက (၅၀)ခန့်စိုက်ပျိုးရာမှ ပြည်ပနိုင်ငံများမှ မြေပဲဆံအဝယ်လိုက်၍ ဈေးကွက်ခိုင်မာမှုရှိသော မြေပဲကို ယခုနှစ်တွင် စိုက်ဧက(၁၀၀)ထိ တိုး၍စိုက်ပျိုး လာကြောင်း၊ တောင်သူတစ်ဦးလျှင်(၀.၃)မှ(၁)ဧကထိ စိုက်ပျိုးကြောင်း ဆိက္ခဝကျေးရွာရှိ စိုက်တောင်သူမှ ပြောပါသည်။

      ယခုနှစ်တွင် ဆီထွက်သီးနှံ လုံးဆံ(သေး)အဖြူနှင့် လုံးဆံ(ကြီး)အနီ စိုက်ပျိုးရာမှ လုံးဆံ(သေး) အဖြူမျိုးကို  အများဆုံးစိုက်ပျိုး၍ အောက်တိုဘာလကုန်တွင် စတင်စိုက်ပျိုးပြီး ဖေဖော်ဝါရီလ လဆန်း ပိုင်းတွင် သီးနှံရိတ်သိမ်းကြောင်း၊ ယခုနှစ်  မြေပဲစိုက်ချိန်တွင် တန်ဆောင်မုန်းမိုး ရွာသွန်းခြင်းကြောင့် မြေပဲအထွက်နှုန်းကောင်းကြောင်း၊ ကျေးရွာတွင်းရှိ တောင်သူများသည် မြေပဲစိုက်ရာတွင် နွားရှဉ်း ထယ်နောက်လိုက်၍ ဖြူးချစနစ်ဖြင့် စိုက်ပျိုးကြောင်း၊ လက်ဖြင့်စိုက်ပျိုးလျှင် မြေပဲဆံ(၂၄)ပြည် ကုန်ကျ ပြီး ဖြူးချစိုက်လျှင် ပြည်(၄၀)ခန့် ကုန်ကျကြောင်း၊ တစ်ဧကလျှင် ကုန်ကျစရိတ်စုစုပေါင်း ကျပ် (၇၀၀၀၀၀)ခန့် ကုန်ကျကြောင်း၊  အထွက်တင်းအနေဖြင့် တောင်သူတစ်ဦးချင်းမတူညီ၍ တင်း(၄၀)မှ (၆၀)ထိထွက်ရှိကြောင်း၊ စိုက်တောင်သူများမှ ထွက်ရှိသောမြေပဲများကို ရောင်းချခြင်းမရှိဘဲ မြေပဲဆံ ရောင်းချမှုရှိသော်လည်း တောင်သူအများစုမှာ ဆီကြိတ်ခွဲ၍ စားသုံးမှုများကြောင်း၊ ပိုလျှံသောမြေပဲဆံကို ရောင်းချကြောင်း၊ ယခုနှစ်သီးနှံပေါ်ချိန်တွင် ဒေသပေါက်ဈေး မြေပဲဆံတစ်ပြည်လျှင် ကျပ်(၆၄၀၀)ဖြင့် ပေါက်ဈေးရှိကြောင်း၊ တောင်သူတစ်ဦးလျှင် မြေပဲတင်း(၅၀)ခန့် ထွက်ရှိပြီး တစ်တင်းလျှင် (၄)ပြည် (၄)ဗူးခန့်ထွက်ရှိ၍ မြေပဲဆံပြည်(၂၂၀)ခန့် ထွက်ရှိကြောင်း၊ ဒေသပေါက်ဈေး ကျပ်(၆၄၀၀)ဈေးရှိ၍ ဝင်ငွေမှာ ကျပ်(၁၄၀၀၀၀၀)ရရှိပြီး ကုန်ကျစရိတ်မှာ ကျပ်(၇၀၀၀၀၀)ဖြစ်၍ အကျိုးအမြတ်မှာ ကျပ်(၇၀၀၀၀၀)ခန့် ရရှိကြောင်း သိရှိရပါသည်။

      ယခုနှစ်သီးနှံပေါ်ချိန်တွင် မြေပဲဈေးကွက်ကောင်းမွန်ပြီး အထွက်နှုန်းကောင်းမွန်ခြင်းကြောင့် ဆီထွက်သီးနှံ မြေပဲစိုက်ပျိုးခြင်းဖြင့် စိုက်တောင်သူများ အကျိုးအမြတ်ရရှိနေကြောင်း ဒေသခံတောင်သူများထံမှ သိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကုန်စည်ဒိုင် ကြက်သွန်နီဈေးကွက်သို့ မိုးကြက်သွန်နီ များ ဖေဖော်ဝါရီလ(စတုတ္ထပတ်)တွင် ဒေသတွင်းကြက်သွန်နီစိုက်ပျိုးရာကျေးရွာများနှင့် ပွင့်ဖြူ၊ ဆင်ဖြူ ကျွန်း၊ စလင်း၊ ဒေသများမှ ကုန်စည်ဒိုင်ဈေးကွက်သို့ နေ့စဉ်ပိဿာ(၃)သောင်းခန့် တစ်ပတ်အတွင်း ကုန် ချိန်ပိဿာ(၃)သိန်းခန့် ဝင်ရောက်လျက်ရှိကြောင်း ဈေးကွက်မှသိရှိရသည်။

    ကြက်သွန်နီဈေးကွက်အနေဖြင့် ၂၀၂၄ခုနှစ်၊ ဖေဖော်ဝါရီလ(စတုတ္ထပတ်)တွင် တရိပ်ရိပ်ဈေးမြင့်၍ အရောင်းအဝယ်ဖြစ်လျက်ရှိသည်။ မိုးကြက်သွန်နီ(ဂျွန်)တစ်ပိဿာလျှင် ထိပ်စ အမြင့်ဈေး ကျပ်(၂၆၀၀)၊ အလတ်စ ကျပ်(၂၄၅၀)၊ အနိမ့်စကျပ်(၁၉၀၀)အရောင်းအဝယ်ဖြစ်ခဲ့ပြီး ယခင်ဖေဖော်ဝါရီ(တတိယပတ်)တွင် ကြက်သွန်နီ တစ်ပိဿာလျှင် ထိပ်စအမြင့်ဈေးမှာ ကျပ်(၂၂၂၅)၊ အလတ်စ ကျပ်(၂၀၅၀)၊ အနိမ့်စ ကျပ် (၁၆၀၀) ဈေးနှုန်းအသီးသီးဖြင့် အရောင်းအဝယ်ဖြစ်ခဲ့ပါသည်။  

   ယခင်ဖေဖော်ဝါရီ(တတိယပတ်)နှင့် ဈေးနှုန်းနှိုင်းယှဉ်ရမည်ဆိုလျှင် ယခုဖေဖော်ဝါရီလ(စတုတ္ထ ပတ်)တွင် ကြက်သွန်နီတစ်ပိဿာလျှင် အမြင့်ဈေးထိပ်စ ကျပ်(၃၇၅)၊ အလတ်စ ကျပ်(၄၀၀)၊ အသေးစ ကျပ်(၃၀၀)ဈေးမြင့်၍ အရောင်းအဝယ်ဖြစ်ခဲ့ကြောင်း၊ ဈေးနှုန်းမြင့်တက်ရခြင်းမှာ ပြည်ပဝယ်လိုအား ဈေးကွက်များခြင်းနှင့် ကြက်သွန်နီကုန်လက်ကျန်နည်းခြင်းကြောင့် ဈေးနှုန်းမြင့်တက်သွားကြောင်း သိရှိရသည်။

   ဆိပ်ဖြူမြို့မှ ထွက်ရှိသောကြက်သွန်နီများကို ရန်ကုန်ဘုရင့်နောင်ကုန်စည်ဒိုင်နှင့် ပြည်၊ ပုသိမ်မြို့နှင့် မြဝတီမြို့မှတစ်ဆင့် ထိုင်း၊ ဗီယက်နမ်နိုင်ငံများသို့ ကြက်သွန်နီကုန်ချိန် ပိဿာ (၃)သိန်းခန့်၊ တန်ချိန်အားဖြင့် (၄၉၀)တန်ခန့် ကုန်စည်စီးဆင်းခဲ့ကြောင်း ကုန်စည်ဒိုင်ဈေးကွက်မှ သိရှိရသည်။   

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင် ကြက်သွန်နီစိုက်ပျိုးထွက်ရှိရာဒေသများဖြစ်ကြသော ပေါက်၊ ဆိပ်ဖြူ၊ ကမ္မ၊ ရေပြာ နှင့်ပခုက္ကူကျွန်းတို့မှ ဆောင်းစိုက်(ပင်စိုက်)များ စတင်ထွက်ရှိနေပါသည်။ ဖေဖော်ဝါရီလ(ပထမပတ်)တွင် ကြက်သွန်နီဈေးမှာ အနည်းငယ်ကျနေခဲ့သော်လည်း ဖေဖော်ဝါရီ (စတုတ္ထပတ်)တွင် ကြက်သွန်နီဈေးနှုန်းများ အနည်းငယ်မြင့်တက်လာကြောင်း ကြက်သွန်နီကုန်စည်ဒိုင်မှ သိရပါသည်။

     ကြက်သွန်နီကုန်စည်ဒိုင်တွင် ပခုက္ကူဒေသထွက်သာမက အခြားဒေသများဖြစ်သော ရေနံချောင်း၊ ဆင်ဖြူကျွန်းတို့မှလည်း ဝင်ရောက်အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ ဖေဖော်ဝါရီလ (ပထမပတ်) ကြက်သွန်နီဈေးနှုန်းမှာ ထိပ်စ တစ်ပိဿာလျှင် ကျပ်(၁၄၅၀)၊ အလတ်စ တစ်ပိဿာလျှင် ကျပ်(၁၂၀၀)၊ အနိမ့်စတစ်ပိဿာလျှင် ကျပ်(၁၀၀၀)ရှိခဲ့ပြီး ဖေဖော်ဝါရီလ(စတုတ္ထပတ်)တွင် ယောကြက်သွန်နီ ထိပ်စ တစ်ပိဿာလျှင် ကျပ်(၂၇၀၀)၊ အလတ်စ တစ်ပိဿာလျှင် ကျပ်(၂၄၀၀)၊ အနိမ့်စ တစ်ပိဿာလျှင် ကျပ် (၂၀၀၀)ဖြင့် အရောင်းအဝယ်ဖြစ်ပြီး (ပထမပတ်)နှင့်နှိုင်းယှဉ်ပါက တစ်ပိဿာလျှင် ကျပ်(၁၂၅၀)၊ အလတ်စ တစ်ပိဿာလျှင် ကျပ်(၁၂၀၀)ထိ မြင့်တက်နေကြောင်း၊ နေ့စဉ်အရောင်းအဝယ် ဖြစ်မှု ကုန်ချိန်မှာလည်း ပိဿာချိန်(၂၀၀၀၀ မှ ၅၀၀၀၀) ထိ ဖြစ်နေကြောင်း၊ မြို့မစည်ပင်ဈေးနှင့် အမှတ်(၂)ဈေးတို့တွင် ထိပ်စ တစ်ပိဿာလျှင် ကျပ်(၃၀၀၀)၊ အလတ်စ တစ်ပိဿာလျှင် ကျပ်(၂၇၀၀)၊ အနိမ့်စ တစ်ပိဿာလျှင် ကျပ်(၂၅၀၀)ဖြင့် ကြက်သွန်အရွယ်အစားပေါ်မူတည်၍ အရောင်းအဝယ် ဖြစ်လျက်ရှိကြောင်း ဈေးသည်များထံမှ သိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးအနေဖြင့် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများကိုပါဆောင်ရွက်လျှက်ရှိပြီး ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားဖွံ့ဖြိုးတိုးတက်စေရန်ဟူသော မျော်မှန်းချက်နှင့်အညီ အသင်းအဖွဲ့များ၊ အစုအဖွဲ့များဖွဲ့စည်းပေးပြီး ပိုမိုအားကောင်းလာစေရေး ပူးပေါင်းဆောင်ရွက်လျက်ရှိပါသည်။ ပွဲရုံးများ၏ သီးနှံဈေးနှုန်းများနှင့် အရောင်းအဝယ်ဖြစ်မှုများကိုလည်း  တင်း/ တန်စာရင်းတို့ဖြင့် အပတ်စဉ်၊ လစဉ် တင်ပြလျက်ရှိပါသည်။

     ကန့်ဘလူပွဲရုံများအနေဖြင့် ဇန်နဝါရီလကုန်ပိုင်းမှ ဖေဖော်ဝါရီလလကုန်ပိုင်းအထိ ပွဲရုံသို့ဝင်ရောက်အရောင်းအဝယ်ဖြစ်နေသော သီးနှံအမျိုးအစား၏ ဒေသပေါက်ဈေးနှုန်းများ၊ အဝင် /အထွက် တင်း/တန်များ၏ အရောင်းအဝယ်ဖြစ်မှုအခြေအနေများမှာ ပဲစင်းငုံ(နီ)(၇၅၀၀)တင်း/(၆၈၉.၃၄)တန်ဈေးနှုန်းမှာ ကျပ်(၁၁၅၀၀၀)၊ ပဲစင်းငုံ(ဖြူ)(၁၀၅၀)တင်း/(၉၆.၅၁)တန်ဈေးနှုန်းမှာ ကျပ်(၁၁၀၀၀၀)၊ ကုလားပဲ v2၊ v7 929 (၃)မျိုးပေါင်း(၁၅၀)တင်း/(၁၄.၀၃)တန်ဈေးနှုန်းမှာ ကျပ်(၈၀၀၀၀/၈၃၀၀၀)၊ ကြက်ဆူ(၇.၅) တင်း/ (၀.၄၄)တန် ဈေးနှုန်းမှာ ကျပ်(၅၀၀၀)၊ မတ်ပဲ(၃၀၀)တင်း/ (၂၇.၅၇)တန်ဈေးနှုန်းမှာ ကျပ်(၈၅၀၀၀)၊ ပဲတီစိမ်း(၃၀)တင်း/(၂.၇၅)တန်ဈေးနှုန်းမှာ ကျပ်(၅၅၀၀၀)၊ ထောပတ်ပဲ(၇.၅)တင်း/ (၀.၇၁)တန်ဈေးနှုန်းမှာ ကျပ်(၁၃၀၀၀၀)၊ စွန်တာနီပဲ(၁၀.၅)တင်း/(၀.၉၉)တန်ဈေးနှုန်းမှာ ကျပ်(၇၀၀၀၀)၊ ပဲဇီးကွက်(၁၀.၅)တင်း/ (၀.၉၉)တန်ဈေးနှုန်းမှာ ကျပ်(၇၀၀၀၀)၊ ဘိလပ်စေ့(၁၂၀)တင်း/(၈.၈၂)တန်ဈေးနှုန်းမှာ ကျပ်(၆၀၀၀၀) စသည်ဖြင့် အသီးသီးပေါက်ဈေးရှိကြောင်းသိရှိရပါသည်။

     ယခုရာသီကာလတွင်မူ ပဲစင်းငုံ(နီ)အဝင်/ အထွက်အပေါများဆုံးအချိန်ဖြစ်ပြီး ကန့်ဘလူမြို့ပေါ် (၅)ရပ်ကွက်ရှိ တောက္ကရှပ်၊ နတ်ပေး၊ လိထ္ထူ၊ စန္ဒယား၊ အင်ကြင်းစု၊ (၃)မိုင်၊ (၈)မိုင်၊ ဆည်ကြီးကျေးရွာများမှ အဝင်/အထွက်ရှိပြီး  မိမိတို့ပွဲရုံမှသီးနှံများကို မန်းလေးမြို့၊ ဇောတိကပွဲရုံသို့ တင်ပို့ ရောင်းချလျက်ရှိကြောင်း ကန့်ဘလူမြို့ ပေါ်ရှိ  ပွဲရုံပိုင်ရှင်တစ်ဦးထံမှ သတင်းရရှိပါသည်။

DOCA(စစ်ကိုင်း)