ပြည်တွင်းကုန်သွယ်မှုသတင်း

    မိတ္ထီလာခရိုင်သည် လယ်ယာထွက်ကုန်သီးနှံမျိုးစုံအောင်မြင်ဖြစ်ထွန်းလျက်ရှိရာ ယခုနှစ် မိုးရာသီအချိန်တွင် ဆီထွက်သီးနှံများအနက် မိုးနှမ်းသီးနှံကို အဓိကအများဆုံး စိုက်ပျိုးလျက်ရှိကြောင်း၊  နှမ်းစိုက်ပျိုးရန် သင့်တော်ဆုံးအချိန်မှာ မိုးနှမ်းကို မေလနှင့် ဇွန်လထိ စိုက်ပျိုးပြီး  ဆောင်းနှမ်းကို ဖေဖော်ဝါရီလနှင့် မတ်လတို့တွင် စိုက်ပျိုးကြကြောင်း သိရှိရပါသည်။

     ယခုနှစ် မိုးနှမ်းကို နှမ်းညိုနှင့် နှမ်းနက် အများဆုံးစိုက်ပျိုးကြကြောင်း၊  နှမ်းတစ်ဧက စိုက်ပျိုးလျှင် မျိုးစေ့ (၂) ပြည်ခန့်ကုန်ကြပြီး စိုက်ပျိုးရာသီချိန်၌ မျိုးစေ့၊ ထွန်ယက်ခ၊ လုပ်သားခနှင့် သွင်းအားစု စုစုပေါင်း တစ်ဧကလျှင် (၁၅၀၀၀၀) ကျပ်ခန့် ကုန်ကျကြောင်း ယခုနှစ်  ရာသီဥတုကောင်းမွန်ပြီး ရောဂါကျရောက်မှုမရှိဘဲ အထွက်နှုန်းကောင်း၍  ဈေးနှုန်းကောင်းမွန်မည်ဆိုလျှင် နှမ်းစိုက်တောင်သူများအဖို့ အမြတ်အစွန်းများစွာ ရရှိလာနိုင်မည်ဖြစ်ကြောင်း သိရှိရပါသည်။

DOCA(မန္တလေး)

          မကွေးတိုင်းဒေသကြီး၊ ပခုက္ကူမြို့နယ်အတွင်းရှိ မြစ်ခြေ၊ ကမ္မမြို့များတွင် ခါကြက်ဥသီးနှံ ကို တပိုင်တနိုင်စိုက်ပျိုးလျက်ရှိပြီး ဈေးကွက်သို့ ဝင်ရောက်အရောင်းအဝယ်ဖြစ်သည့်အပြင် ရှမ်းပြည်နယ်ဒေသထွက် ခါကြက်ဥများလည်း ပခုက္ကူသီးနှံဈေးကွက်သို့ ဝင်ရောက်လျက်ရှိသည်။ ခါကြက်ဥသီးနှံသည် ကျန်းမာရေးနှင့်ညီညွှတ်သည့် သီးနှံတစ်မျိုးဖြစ်၍ စားသုံးမှုများလျက်ရှိသည်။

          ဈေးနှုန်းအနေဖြင့် ၂၀၂၅ ခုနှစ်၊ မေလ(တတိယပတ်)တွင် ဖြစ်ပေါ်နေသော ခါကြက်ဥဈေး နှုန်းများမှာ ဥ အကြီး၊ အသေးနှင့် သီးနှံလတ်ဆတ်မှုပေါ် မူတည်၍ တစ်ပိဿာလျှင် ကျပ်(၃၀၀၀-၂၅၀၀)ဈေးဖြင့် အရောင်းအဝယ်ဖြစ်လျက်ရှိကြောင်း၊ မေလ(ပထမပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၃၀၀)ခန့်ဈေးတက်လျက်ရှိကြောင်း သီးနှံဈေးကွက်မှ သိရှိရသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် ပဲမျိုးစုံအရောင်းအဝယ်ဖြစ်လျက်ရှိရာ  ၂၀၂၅ခုနှစ်၊ မေလ(တတိယပတ်)တွင် ပြည်တွင်းသုံးကုလားပဲဈေးကွက် ဈေးဆက်လက်မြင့်တက် အရောင်းအဝယ်ဖြစ်လျက်ရှိပြီး ဈေးကွက်သို့ ကုလားပဲသီးနှံစိုက်ပျိုးရာ ဒေသများဖြစ်သော ပခုက္ကူမြို့နယ်အတွင်းရှိ ကျေးရွာများ၊ မြစ်ခြေ၊ ကမ္မ၊ မြိုင်၊ ပေါက်၊ ရေစကြိုမြို့နယ်တွင်းရှိ ကျေးရွာများအပြင် မန္တလေးတိုင်းဒေသကြီး ညောင်ဦးမြို့နယ်အတွင်းရှိ ကျေးရွာများနှင့် စစ်ကိုင်းတိုင်းဒေသကြီးအတွင်းရှိ ကျေးရွာများမှ အများဆုံး ဝင်ရောက်အရောင်းအဝယ်ဖြစ်ကြောင်း၊ ယခုအချိန်တွင် ကုလားပဲသီးနှံများ ရိတ်သိမ်းပြီးချိန်ဖြစ်၍ ဈေးကွက်သို့ ဒေသ အနှံ့အပြားမှ ကုလားပဲ (အသစ်)များ လှိုင်လှိုင် ဝင်ရောက်လျက်ရှိကြောင်း သိရှိရသည်။

          ၂၀၂၅ခုနှစ်၊ မေလ(ဒုတိယပတ်)တွင် ကုလားပဲအမျိုးအစားအလိုက် ဈေးကွက်သို့ အရောင်း အဝယ်ဖြစ်လျက်ရှိရာ သီးနှံအမျိုးအစားအလိုက် ကုလားပဲ (V2)တစ်တင်းလျှင် ကျပ်(၈၁၅၀၀)၊ ကုလားပဲ(V6) တစ်တင်းလျှင် ကျပ်(၈၂၀၀၀)၊ ကုလားပဲ(HL) တစ်တင်းလျှင် ကျပ်(၈၁၀၀၀)၊ ကုလားပဲ(929)တစ်တင်းလျှင် ကျပ်(၈၁၈၀၀)အရောင်းအဝယ်ဖြစ်ခဲ့ပြီး မေလ(တတိယပတ်)တွင် ပြည်တွင်းသုံး ကုလားပဲများ ဈေးဆက်လက်မြင့်တက်ပြီး အရောင်းအဝယ်ဖြစ်ခဲ့ရာ ကုလားပဲ (V2) တစ်တင်းလျှင် ကျပ်(၈၈၅၀၀)၊ ကုလားပဲ(V6) တစ်တင်းလျှင် ကျပ်(၈၈၀၀၀)၊ ကုလားပဲ(HL) တစ်တင်းလျှင် ကျပ်(၈၇၀၀၀)၊ ကုလားပဲ(929)တစ်တင်းလျှင် ကျပ်(၈၈၀၀၀) အရောင်းအဝယ် ဖြစ်ခဲ့ပြီး ဈေးနှုန်းနှိုင်းယှဉ်ပါက တစ်ပတ်အတွင်း ကုလားပဲတစ်တင်းလျှင် ကျပ်(၇၀၀၀)ခန့် ဈေးပို ရရှိနေကြောင်း၊ ပွဲရုံဈေးကွက်သို့ နေ့စဉ်ပိဿာ(၂၀)ဝင်အိတ် (၁၅၀၀ မှ ၂၀၀၀)ခန့်ထိ ဝင်ရောက် ကြောင်း၊ ကုလားပဲသီးနှံ ဈေးမြင့်တက်၍ ဈေးကွက်သို့ ကုန်ဝင်ရောက်မှုများကြောင်း၊ ပြည်ပ တင်ပို့မှုနည်းပြီး ကုန်သည်များမှ ဝယ်ယူသိုလှောင်ထားရှိမှု များကြောင်း၊ ပခုက္ကူပွဲရုံ ဈေးကွက်သို့ ဝင်ရောက်သည့် ကုလားပဲများကို တန်ဖိုးမြှင့်ထုတ်ကုန် အမျိုးမျိုးထုတ်လုပ်လျက်ရှိသော မြို့ပေါ်ရှိ ပဲခွဲစက်လုပ်ငန်းရှင်များ၊ ပဲကြော်/ပဲမုန့် (အစိမ်း/ အကျက်) ထုတ်လုပ်သောလုပ်ငန်းရှင်များမှ ဝယ်ယူမှုများကြောင်း၊ ကုလားပဲဈေးမြင့်တက်၍ ကုလားပဲခြမ်းများလည်း တစ်ပြည်လျှင် ကျပ် (၈၀၀၀)ဈေးဖြင့် အရောင်းအဝယ်ဖြစ်ကြောင်း၊ ဒေသတွင်း ဝယ်ယူ သုံးစွဲမှုအပြင် ရန်ကုန်၊ မန္တလေး ဈေးကွက်သို့ အများဆုံးတင်ပို့ကြောင်း၊ ကုလားပဲသီးနှံသည် ကျန်းမာရေးနှင့်ညီညွတ်ပြီး ပြည်တွင်း စားသုံးမှုများ၍ ယခုအချိန်တွင် ရောင်းလိုအား ဝယ်လိုအားကောင်းပြီး အရောင်းအဝယ်သွက်လျက်ရှိကြောင်း မြို့ပေါ်ရှိ ပဲရောင်းဝယ်ရေး လုပ်ငန်းရှင်တစ်ဦးထံမှ သိရှိရပါသည်။

DOCA(မကွေး)

            ကုန်စိမ်းစျေးကွက်အတွင်း သံပုရာသီးနှင့်သံပုယိုသီးဝင်ရောက်မှုမှာ ဧပြီလနောက်ဆုံးပတ်တွင် ရာသီဥတုပူပြင်းလာပြီဖြစ်၍ အရောင်းသွက်လျက်ရှိကြောင်း သိရပါသည်။ စျေးကွက်အတွင်းရောက်ရှိလာသည့် သံပုရာသီးမှာ တောင်အင်းမြောက်အင်းကျေးရွာ၊ မီချောင်းတပ်ကျေးရွာတို့မှာ စိုက်ပျိုးထွက်ရှိသည့် အသီးများနှင့်သံပုယိုသီးမှာ ရွှေစာယံကျေးရွာ၊  မီးသွေးဘုတ်ကျေးရွာတို့မှ စိုက်ပျိုးထွက်ရှိသည့် အသီးများပိုမိုဝင်ရောက်ပြီး၊ မန္တလေးတိုင်းဒေသကြီးအတွင်း အခြားမြို့နယ်များနှင့် စစ်ကိုင်းတိုင်းဒေသကြီးတို့မှလည်း ဝင်ရောက်ကြောင်း   သိရပါသည်။ သံပုရာသီးနှင့် သံပုယိုသီးများမှာ မိုးရာသီတွင် ပိုမိုထွက်ရှိပြီး၊ ဆောင်းရာသီတွင် ထွက်ရှိမှုလျော့ကျသည့်အတွက် စျေးအနည်းငယ်မြင့်ကြောင်း သိရှိရပါတယ်။ သံပုရာသီးနှင့်သံပုယိုသီးများအား သံပုရာဖျော်ရည်၊ သံပုရာယို၊ သံပုရာချဉ်ဖတ်၊ အသုပ်မျိုးစုံနှင့် သရေစာတို့တွင် ထည့်သွင်းစားသုံးခြင်း၊ လူသုံးကုန်နှင့်ကျန်းမာ‌‌ရေးဓါတ်စာအဖြစ် စားသုံးခြင်းတို့ကြောင့် တစ်နှစ်ပတ်လုံးသုံးစွဲမှုများသည့်သီးနှံဖြစ်ကြောင်း သိရပါသည်။ မန္တလေးမြို့၊ ၄၁လမ်း၊ ကုန်စိမ်းသီးနှံများ လက္ကားရောင်းချသည့်စျေးတွင် အသီးအရွယ်အစား အလိုက်စျေးအနည်းငယ်ကွာခြားမှုရှိပြီး၊ ၂၀၂၅ခုနှစ်ဧပြီလ နောက်ဆုံးပတ်အတွင်း ဖြစ်ပေါ်လျက်ရှိသော  သံပုရာသီးလက္ကားစျေးမှာ ၂၅လုံးလျှင် ၃၅၀ဝိ/- နှင့် ၄၅၀ဝိ/-စျေး၊ သံပုယိုသီးလက္ကားစျေးမှာ ၂၅ လုံးလျင် ၂၀၀ဝိ/- နှင့် ၂၅၀ဝိ/-စျေး၊ သံပုယိုနှင့် သံပုရာ ချဉ်ထုတ်တစ်ထုတ် (တစ်ပိဿာ ပါ)လျင်  လက္ကားစျေး ၂၀၀ဝိ/- နှင့် ၄၀၀ဝိ/- စျေး၊ လက်လီစျေးမှာ သံပုရာသီးတစ်လုံးလျင် ၂၅ဝိ/- နှင့်၃၀ဝိ/-စျေး၊ သံပုယိုသီးတစ်လုံးလျှင် ၁၅ဝိ/- နှင့် ၂၅ဝိ/- စျေးတို့ဖြစ်ပေါ် လျက်ရှိကြောင်း ကုန်စိမ်းရောင်းချသူတစ်ဦး၏ပြောပြချက်အရ သိရပါသည်။

DOCA(မန္တလေး)

            မန္တလေးတိုင်းဒေသကြီးအတွင်း အမရပူရ၊ ပုသိမ်ကြီး၊မတ္တရာ၊ ကျောက်ဆည်၊ စဉ့်ကိုင်၊ မြစ်သားမြို့နယ်တို့မှ စိုက်ပျိုးထွက်ရှိသည့်ကန်စွန်းဥများ ၂၀၂၅ ခုနှစ်မတ်လနောက်ဆုံးပတ်အတွင်း ဝင်ရောက်မှုများပြားပြီး အရောင်းသွက်လျက်ရှိကြောင်း သိရပါသည်။ ကန်စွန်းဥအတွင်းသားမှာ အဖြူရောင်၊ ခရမ်းရောင်၊ ပန်းရောင်၊ လိမ္မော်ရောင်နှင့်အဝါနုရောင်တို့အား စျေးကွက်အတွင်း အများဆုံးတွေ့ရပါသည်။ ကန်စွန်းဥအား ပြုတ်စား၊ မီးဖုတ်စား၊ ကြော်စား၊ ပေါင်းစား၊ ယိုထိုးခြင်း၊ သီးနှံအခြောက်ခံခြင်းနှင့် ပူတင်းဖုတ်စသည်ဖြင့် အမျိုးမျိုးစားသုံးကြောင်း သိရပါသည်။ ကန်စွန်းဥသီးနှံမှာ အဟာရဓါတ်ကြွယ်ဝခြင်း၊ ဓါတ်တိုးဆန့်ကျင်အာနိသင်လည်းကြွယ်ဝခြင်း၊ သွေးတွင်းသကြားဓါတ်ထိန်းညှိပေးခြင်း၊ ဦးနှောက်လုပ်ဆောင်မှုကောင်းမွန်ခြင်း၊ ကိုယ်ခံအားကောင်းခြင်း၊ အမြင်အာရုံကောင်းမွန်စေခြင်း၊ ကိုယ်အလေးချိန်ကျစေခြင်း၊ လေးဖက်နာကြောင့်နာကျင်မှုကိုသက်သာစေခြင်း၊ အစာအိမ်အနာကိုသက်သာစေခြင်းနှင့် ရေဓါတ်ဆုံးရှုံးမှုကို ကာကွယ်ပေးခြင်းစသည့် အကျိုးကျေးဇူးများလည်းရရှိကြောင်း သိရပါသည်။ ၂၀၂၅ ခုနှစ် မတ်လနောက်ဆုံးပတ်အတွင်း စျေးကွက်အတွင်း ရောင်းချသည့်ကန်စွန်းဥ တစ်ပိဿာစျေးနှုန်းများအနေဖြင့် ခရမ်းရောင် ၆၀၀ဝိ/-နှင့် ၇၀၀ဝိ/-၊ ပန်းရောင်၊ လိမ္မော်ရောင်နှင့်အဝါနုရောင် ၅၀၀ဝိ/- နှင့် ၆၀၀ဝိ/-၊ အဖြူရောင် ၄၀၀ဝိ/-နှင့် ၅၀၀ဝိ/-စျေးတို့ဖြင့် ရောင်းချလျက်ရှိကြောင်း သိရပါသည်။

DOCA(မန္တလေး)