ပြည်တွင်းကုန်သွယ်မှုသတင်း

    နတ်တလင်းခရိုင်၊ နတ်တလင်းမြို့နယ်အတွင်း ယခု ဖေဖေါ်ဝါရီလ ဒုတိယပတ်တွင် မတ်ပဲများ လှိုင်လှိုင်ရိတ်သိမ်းနေချိန်ဖြစ်ပြီး  မတ်ပဲများ ရိတ်ခြွေရာတွင် မတ်ပဲသယ်ခြင်းများကို အသုံးပြုကြသည့်အတွက် ဈေးကွက်အတွင်း ပဲသယ်ခြင်းများ ရောင်းအားကောင်းလျက်ရှိပါသည်။ ပဲသယ်ခြင်းများကို အဝိုင်းကွက်နှင့် လေးထောင့်ကွက်စသည်ဖြင့် (၂)မျိုး ရောင်းချနေပြီး အရည်အသွေးကို လိုက်၍ ပဲသယ်ခြင်း တစ်ခြင်းကို  (၅၀၀၀-၇၀၀၀) ကျပ်နှုန်းဖြင့် ရောင်းချနေကြောင်း သိရှိရပါသည်။

     ပဲသယ်ခြင်းများ ရောင်းအားကောင်းနေသလို ပဲရိတ်ခြွေရာတွင် ကျွေးရန် ဖရဲသီးများ ဝယ်ယူသည့်အတွက် ဈေးကွက်အတွင်း ဖရဲသီးများလည်း အရောင်းသွက်နေကြောင်း သိရှိရပါသည်။ ယခုအချိန်တွင် ဖရဲသီးများလည်း လှိုင်လှိုင်ထွက်ရှိနေချိန်ဖြစ်ပြီး ဖရဲအကြားသီး၊ အကြီး တစ်လုံး (၅၀၀၀-၄၀၀၀) ကျပ် ၊ အလတ်တစ်လုံးလျှင် (၃၅၀၀-၃၀၀၀) ကျပ် ၊ အသေးတစ်လုံးလျှင် (၂၀၀၀-၁၅၀၀ ) ကျပ်နှုန်းဖြင့် ရောင်းချနေကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့တွင် တိုင်းဒေသကြီးအစိုးရအဖွဲ့ ဝန်ကြီးချုပ်၏ လမ်းညွှန်မှုဖြင့် ၁၉.၂.၂၀၂၄ ရက်နေ့တွင် ကိုယ်တိုင်စိုက်ပျိုး/ မွေးမြူထုတ်လုပ်သူ များက တိုက်ရိုက်ရောင်းချပေးသည့် ဈေးကားများဖြင့် သက်ဆိုင်ရာမြို့နယ် အထွေထွေအုပ်ချုပ်ရေး ဦးစီးဌာန၊ စည်ပင်သာယာစိုက်ပျိုးရေးဌာန၊ မွေးမြူရေးဌာန၊ စားသုံးသူ‌ရေးရာဦးစီးဌာနတို့မှ ပူးပေါင်း ရောင်းချပေးလျက်ရှိပါသည်။

    သာယာဝတီမြို့နယ် သာယာဝတီမြို့ဈေးရပ်ကွက်ဈေးလမ်းရှိ ကိုယ်တိုင်စိုက်ပျိုးထုတ်လုပ် ရောင်းချသူများ၏ဈေးတွင် ၁၉.၂.၂၀၂၄ ရက်နေ့က မနောသုခဆန်(၁)ပြည်လျှင် ၃၀၀၀/ ကျပ်ဈေးနှုန်း ဖြင့် ဆန်အိတ် (၅)အိတ်၊ ကြက်ဥ ၁လုံးလျှင် ၂၀၀ ကျပ်ဈေးနှုန်းဖြင့် အလုံးရေ (၈၀၀) လုံး၊ ဆီပိဿာ (၁၁၀)ပိဿာ၊ ကြက်သားပိဿာ(၃၀)ပိဿာ၊ ငါးမြစ်ချင်း(၃၀)ပိဿာနှင့် ဟင်းသီးဟင်းရွက် မျိုးစုံ ရောင်းချပေးလျှက်ရှိပါသည်။ လက်ပံတန်းမြို့ စက်မှုလက်မှုသိပ္ပံကျောင်းတွင် ဆန်အိတ်(  ၆) အိတ်၊ ကြက်ဥ အလုံးရေ(၁၆၃၀)၊ ဆီပိဿာ (၇၈) ပိဿာ၊ ကြက်သားပိဿာ (၃၀)ပိဿာ၊ ငါးမြစ်ချင်း(၁၅) ပိဿာနှင့် ခရမ်းချဉ်သီး၊ မုန်လာဥ၊ ပန်းဂေါ်ဖီ၊ ဂေါ်ဖီထုပ်နှင့် ဟင်းသီးဟင်းရွက်များကို သက်သာသောဈေးနှုန်းဖြင့် ရောင်းချပေးလျက်ရှိကြောင်း သိရှိရပါသည်။

DOCA(ပဲခူး)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်တွင် ပဲမျိုးစုံဖြစ်သော ပဲစင်းငုံနီ၊ ကုလားပဲအမျိုးမျိုး၊ ပဲယင်းနီ၊ ပဲယင်းဝါများ၊ပဲနီ၊ ပဲထောပတ်နှင့် တခြားပဲမျိုးစုံစိုက်ပျိုးထုတ်လုပ်လျက်ရှိပါသည်။  ဖေဖေါ်ဝါရီလ (တတိယပတ်)တွင်   ပဲမျိုးစုံအရောင်းအဝယ်ဖြစ်နေကြောင်း ကုန်စည်ဒိုင်မှသိရှိရပါသည်။  ယခုအပတ်တွင် အရောင်းအဝယ်ဖြစ်ခဲ့သောပဲများမှာ ပဲစင်းငုံနီ၊ ကုလားပဲဖြူလုံးကြီး၊ ပဲယင်း၊ ထောပတ်ပဲ၊ ပြောင်းဖူးစေ့ (CP)၊ ပဲလွန်းပြာနှင့် နေလဲစေ့တို့ဖြစ်သည်။  ပခုက္ကူကုန်စည်ဒိုင်သည် ပခုက္ကူမြို့၏ စီးပွားရေးအချက်အချာဖြစ်ပြီး ရောင်းဝယ်ဖောက်ကားရာတွင်လည်း နေရာဒေသစုံမှ လာရောက်အရောင်းအဝယ်ဖြစ်နေပါသည်။

      ၂၀၂၄ခုနှစ်၊ ဖေဖေါ်ဝါရီ (တတိယပတ်)တွင် ပခုက္ကူကုန်စည်ဒိုင်၌ အရောင်းအဝယ်ဖြစ်ခဲ့သောပဲဈေးနှုန်းများမှာ ပဲစင်းငုံနီတစ်တင်းလျှင် ကျပ် (၁၂၂၂၀၀-၁၂၃၀၀၀-၁၂၅၂၀၀)၊ ပဲယင်း(မြစ်ခြေ) တစ်တင်းလျှင် ကျပ်(၅၁၀၀၀)၊ ပဲယင်းနီတစ်တင်းလျှင် ကျပ် (၆၉၀၀၀)၊ ကုလားပဲဖြူလုံးကြီး (V6) တစ်တင်းလျှင် ကျပ်(၈၇၅၀၀)၊ ပဲလွန်းပြာတစ်တင်းလျှင် ကျပ်(၆၇၀၀၀)၊ ကုလားပဲဝါလုံးကြီး (929) တစ်တင်းလျှင် ကျပ်(၈၆၀၀၀)၊ ကုလားဖြူလုံးကြီး(V2) တစ်တင်းလျှင် ကျပ်(၈၇၀၀၀)၊ ပဲပုတ်(ကျွန်း) တစ်တင်းလျှင် ကျပ်(၅၃၅၀၀)၊ ပြောင်းဖူးစေ့ (CP) တစ်တင်းလျှင် ကျပ်(၁၆၈၀၀)၊ နေလဲစေ့တစ်ပိဿာလျှင် ကျပ်(၇၆၀၀)ဖြစ်ပြီး အရောင်းအဝယ်ဖြစ်မှုအိတ်ရေမှာ ပဲစင်းငုံနီ (၅၀၀မှ ၂၀၀၀)၊ ပဲယင်း(မြစ်ခြေ) (၂၀၀)၊ ပဲယင်းနီ (၅၀၀)၊ ကုလားပဲဖြူလုံးကြီး (V6) (၁၀၀)၊ ပဲလွန်းပြာ (၂၀၀)၊ ကုလားပဲဝါလုံးကြီး (929) (၁၀၀)၊ ကုလားဖြူလုံးကြီး(V2) (၁၀၀)၊ ပဲပုတ်(ကျွန်း) (၅၀၀)၊ ပြောင်းဖူးစေ့ (CP) (၁၀၀၀)၊ နေလဲစေ့ပိဿာချိန် (၁၀၀၀၀) ဥပုသ်နေ့မှလွဲ၍ အရောင်းအဝယ်ဖြစ်နေကြောင်း ကုန်စည်ဒိုင်မှသိရှိရပါသည်။

DOCA(မကွေး)

      ကြက်သွန်နီကို ဟင်းခတ်အမွှေးအကြိုင်အဖြစ် မြန်မာလူမျိုးများ နေ့စဉ်စားသောက်နေသော ဟင်းလျာများတွင် မပါမဖြစ်စားသောက်ကြပါသည်။ ကြက်သွန်နီကို ဟင်းလျာထဲတွင်ထည့်၍ ချက်ပြုတ် စားသောက်ကြသည့်အပြင် ယခုအခါကြာရှည်ခံအောင် အမှုန့်ပြုလုပ်၍လည်းကောင်း၊ ကြော်၍လည်း ကောင်းပြုလုပ်ပြီး ဒံပေါက်၊ မုန့်ဟင်းခါး ၊နို့စိမ်းခေါက်ဆွဲ၊ မုန့်တီ၊ခေါက်ဆွဲနှင့် အသုပ်မျိုးစုံတို့တွင် ထည့်၍ စားသုံးကြပါသည်။

      ကြက်သွန်နီသည် မြန်မာဆေးကျမ်းများအရ ကျန်းမာရေးအတွက်ကောင်းမွန်ခြင်း၊ ဆီးချုပ် ရောဂါ၊ ဆီးပူရောဂါ၊နားပြည်ယိုရောဂါ၊ အော့အန်ရောဂါများကိုပျောက်ကင်းစေသဖြင့် ကြက်သွန်နီသည် အစာလဲဆေး၊ဆေးလဲအစာတစ်မျိုးဖြစ်သဖြင့် ကျန်းမာရေးအတွက်ကောင်းမွန်သော အစားအစာ တစ်မျိုး ဖြစ်ပါသည်။

       မိတ္ထီလာခရိုင်တွင် စားဖိုဆောင်သီးနှံတစ်မျိုးဖြစ်သည့် ကြက်သွန်နီကို အဓိကစိုက်ပျိုးသီးနှံအဖြစ် နွေ ၊ဆောင်း ရာသီနှစ်မျိုးလုံး စိုက်ပျိုးကြပါသည်။  ထွက်ရှိသော ကြက်သွန်နီကို ဒေသတွင်းစားသုံးခြင်း၊ ကုန်သည်များမှ ပြည်ပတိုက်ရိုက်တင်ပို့ခြင်းမရှိသော်လည်း ရန်ကုန် ၊ပဲခူး၊ တာချီလိတ်မြို့များသို့ တင်ပို့ ကြသည့်အပြင် ကြက်သွန်နီကို တန်ဖိုးမြှင့်ထုတ်ကုန်အဖြစ် ကြက်သွန်နီကြော်ထုတ်လုပ်၍ ဒေသတွင်း အပြင်၊ ရန်ကုန်၊ မန္တလေးမြို့ ကြီးများသို့အဓိကတင်ပို့လျက်ရှိပါသည်။

      မိတ္ထီလာခရိုင်အတွင်း ကြက်သွန်နီကြော်လုပ်ငန်းများကို အချို့မှာတစ်ပိုင်တနိုင်လုပ်ကိုင်ကြခြင်း၊ အချို့မှာ အခြားဒေသများသို့ တင်ပို့နိုင်သည့်အထိ လုပ်ကိုင်ကြပါသည်။ ရာသီပေါ်ချိန်တွင် ဒေသတွင်း ထွက်ရှိသည့် ကြက်သွန်နီများကို ဝယ်ယူအသုံးပြုကြပြီး ရာသီပေါ်ချိန်မဟုတ်သည့်ကာလများတွင် ဒေသတွင်း အပြင်လိုအပ်ပါက အခြား‌ဒေသဖြစ်သည့် မြင်းခြံ၊ မြစ်သားနယ်မှ ကြက်သွန်နီများကိုလည်း ဝယ်ယူ အသုံးပြုကြရပါသည်။

    ကြက်သွန်နီကြော်လုပ်ငန်းကြီးတစ်ခု၌ တစ်ရက်လျှင် ကုန်ကြမ်းပိဿာ(၁၀၀၀) ခန့်ထုတ်လုပ် နိုင်ပြီး ကုန်ကြမ်းပိဿာ(၁၀၀၀)လျှင် ကုန်ချောပိဿာ(၂၅)ပိဿာခန့်ထွက်ရှိကြောင်း၊ ကြက်သွန်နီကြော် ထုတ်လုပ်ရာတွင် ပထမဆုံးကြက်သွန်နီအလုံးများသန့်စင်ပြီး အခွံနွှာခြင်း၊ လှီးခြင်းပြုလုပ်ပြီးပါက အကြော်အိုးထဲသို့ ဆီပူလာလျှင်ထည့်၍ ကြော်ရပါသည်။ ကြက်သွန်နီပိဿာ(၁၀၀၀)လျှင် ဆီပိဿာ (၈၀)ခန့်ကုန်ပြီး ကြက်သွန်နီကြော်ရာ၌ အသုံးပြုသော လောင်စာကို ဇီးစေ့ ခွဲခြမ်းကို အသုံးပြုကြပြီး ဇီးစေ့ ခွဲခြမ်းခွံမှာ မီးခိုးမထွက်ခြင်း၊ ပြာမလွင့်ခြင်း၊ စပါးခွံနှင့်စာလျှင် ကုန်ကျစရိတ်သက်သာခြင်းကြောင့် အသုံးပြုကြခြင်းဖြစ်ပါသည်။ လောင်စာဇီးစေ့ခွဲခြမ်း( ၃၀ )ပိဿာလျှင် (၁၁၀၀၀)ကျန့်ခန့် ဝယ်ယူရပြီး ကြက်သွန်နီ ကုန်ကြမ်းတစ်ပိသာလျှင် (၁၀၀၀)ကျပ်ခန့်ဝယ်ယူ၍ ထုတ်လုပ်ကြရပါသည်။

    ကြက်သွန်နီကြော်လုပ်ငန်းတွင် လုပ်သားခအနေဖြင့် အခွံနွှာတစ်ပိဿာလျှင်(၁၅၀)ကျပ်၊ အလှီးနှင့် အကြော်လုပ်သား နေ့စားတစ်ဦီးလျှင် (၈၀၀၀)ကျပ်ခန့်ပေးရပြီး တစ်ရက်လျှင် လုပ်သား(၂၀)ဦီးဖြင့် ထုတ်လုပ်လျက်ရှိပါသည်။ ဒေသတွင်းအသုံးပြုရန်အတွက် အထုပ်ငယ်များ ထုတ်လုပ်ပြီး အခြားဒေသသို့ တင်ပို့ရာတွင် (၁၂)ပိဿာဝင်အိတ်များကို စက္ကူဖာတွင် ထည့်ပြီးတင်ပို့ကြပါသည်။ ကုန်ချောဈေးကွက်အနေဖြင့် ကြက်သွန်နီကြော်တစ်ပိဿာလျှင် (၉၀၀၀)မှ(၁၀၀၀၀)ကျပ်အထိ ရောင်းချရကြောင်း  သိရှိရပါ သည်။

      ကြက်သွန်နီကြော်လုပ်ငန်းများသည် အခွံနွှာခြင်း၊ လှီးခြင်းလုပ်ငန်းများတွင် အမျိုးသမီးများဖြင့် ပြုလုပ်ကြသဖြင့် အချို့အမျိုးသမီးများမှာ အိမ်မှုကိစ္စဆောင်ရွက်ပြီး သွားရောက်လုပ်ကိုင်ခြင်းဖြင့် မိသားစုအပိုဝင်ငွေများ တစ်ဖက်တစ်လမ်းမှရရှိခြင်း၊ ကလေးလူကြီးမရွေးလုပ်နိုင်၍  အလုပ်အကိုင် အခွင့်အလမ်းများဖန်တီးပေးနိုင်သော အသေးစားလုပ်ငန်းများဖြစ်ပါသည်။

     ပြည်ပသွင်းကုန်အစားထိုး ပြည်တွင်းထုတ်ကုန်ထုတ်လုပ်မှုဖြင့်မြင့်မားတိုးတက် စေရေးအတွက် အငယ်စား၊ အသေးစား၊ အလတ်စားလုပ်ငန်းများ ဖွံဖြိုးတိုးတက်စေရေးကို ဦီးစားပေးကဏ္ဍအဖြစ် ဆောင်ရွက်လျက်ရှိသဖြင့် ဒေသတွင်းထွက်ရှိသော ကုန်ကြမ်းပစ္စည်းများကိုအခြေခံပြီး  တန်ဖိုးမြှင့်ထုတ်ကုန် ထုတ်လုပ်၍ အငယ်စား၊ အသေးစား၊ အလတ်စား  MSME လုပ်ငန်းများဖွံ့ဖြိုးတိုးတက်လာခြင်းဖြင့် ပြည်တွင်းလိုအပ်ချက်များ ဖြည့်ဆည်းပေးနိုင်ပြီး ပြည်ပတင်ပို့နိုင်အောင် ကြိုးပမ်းဆောင်ရွက်သွားမည့် အသေးစားလုပ်ငန်းများဖြစ်ကြောင်း သိရပါသည်။

DOCA(မန္တလေး)

    မကွေးတိုင်းဒေသကြီး၊ ပခုက္ကူခရိုင်အတွင်း စိုက်ပျိုးရေးဌာန၏စာရင်းအရ မြေပဲစိုက်ဧက (၁၅၄၁၅၂)ဧကရှိပြီး ရေစကြို၊ မြိုင်၊ ပေါက်၊ ဆိပ်ဖြူနယ်နှင့် ယောနယ်များတွင် ဆောင်းမြေပဲကို အောက်တိုဘာလမှ ဒီဇင်ဘာလထိစိုက်ပျိုးကြပြီး ယခုအချိန် ဇန်နဝါရီလမှ မတ်လထိအချိန်သည် ဆောင်းမြေပဲများရိတ်သိမ်းနေဆဲဖြစ်သည်။ (၃)လပဲ၊ (၆)လပဲမျိုးများကိုစိုက်ပျိုးပြီး တစ်ဧကအထွက်နှုန်းမှာ ပျမ်းမျှအားဖြင့် တင်း(၄၅-၅၅)နှုန်းထွက်ရှိကြောင်းသိရှိရပါသည်။

      ယောနယ်မှထွက်သော မြေပဲမျိုးမှာ အရည်အသွေးပိုကောင်းသောကြောင့် အရောင်းအဝယ်ဖြစ်မှုအများဆုံးဖြစ်ကြောင်း၊ ထွက်ရှိလာသောမြေပဲများကို ပခုက္ကူမြို့ပေါ်ရှိ ပွဲရုံများသို့ လာရောက်ရောင်းချပြီး  ပွဲရုံများမှတစ်ဆင့် မြေပဲခွဲစက်များနှင့် ဆုံဆီလုပ်ငန်းများ၊ စက်ပဲဆီလုပ်ငန်းများ၊ မြို့ပေါ် ရှိ ပဲလှော်၊ ပဲကြော်လုပ်ငန်းရှင်များနှင့် ရန်ကုန်၊ မန္တလေးမြို့ကြီးများသို့ တင်ပို့ရောင်းချကြောင်းသိရှိရပါသည်။

       မြေပဲအရောင်းအဝယ်အများဆုံးဖြစ်သော ပွဲရုံများသို့ တစ်ပတ်လျှင် အိတ်ရေ(၄၀၀-၅၀၀)ဝင်ရောက်ပြီး ယခု၂၀၂၄ခုနှစ်၊ ဖေဖေါ်ဝါရီလ(တတိယပတ်)တွင် မြေပဲတောင့်တစ်ပိဿာလျှင် အရည်အသွေးကိုလိုက်၍ ကျပ်(၄၂၀၀-၄၆၀၀) ဝယ်ယူရကြောင်း၊ ဝယ်ယူရရှိသော မြေပဲတောင့်များကို ဒေသတွင်းမြေပဲခွဲစက်များသို့ ပြန်လည်ရောင်းချကြောင်းသိရှိရပါသည်။

      မြေပဲဆံဈေးများအနေဖြင့် ယခုဖေဖေါ်ဝါရီလ (တတိယပတ်)တွင် မြေပဲဆံအဖြူတစ်ပိဿာလျှင် ကျပ်(၆၀၀၀)၊ ဗြန့်လုံးဆံပဲတစ်ပိဿာလျှင် ကျပ်(၆၂၀၀)ဖြင့် အရောင်းအဝယ်ဖြစ်လျက်ရှိပါသည်။ ယခင်နှစ် ဖေဖေါ်ဝါရီလတွင် မြေပဲဆံတစ်ပိဿာလျှင် ကျပ်(၇၀၀၀-၇၂၀၀)ရှိခဲ့ပြီး ယခုနှစ်တွင် ဈေးနှုန်းအနည်းငယ်ကျနေသည်ကိုတွေ့ရှိရပါသည်။ ဆုံဆီလုပ်ငန်းများ၊ စက်ပဲဆီလုပ်ငန်းများလည်းလည်ပတ်လျက်ရှိရာ မြေပဲဆုံဆီတစ်ပိဿာလျှင် ကျပ်(၁၄၅၀၀)၊ စက်ပဲဆီတစ်ပိဿာလျှင် ကျပ်(၁၂၈၀၀)၊ မြေပဲဖတ်တစ်ပိဿာလျှင် ကျပ်(၂၆၀၀)နှင့် ရန်ကုန်၊ မန္တလေးမြို့ကြီးများသို့ တင်ပို့ရောင်းချလျက်ရှိပါသည်။

     တောင်သူများအနေဖြင့် ယခင်နှစ်၌ မြေပဲတစ်ဧကလျှင် အထွက်နှုန်းမှာ ပျမ်းမျှအားဖြင့် တင်း (၆၀)ခန့်ရှိခဲ့ပြီး ယခုနှစ်တွင် မိုးရွာသွန်းမှုနည်းပါးသောကြောင့် အထွက်နှုန်းမှာ ပျမ်းမျှအားဖြင့် တင်း(၄၅-၅၅)နှုန်းထွက်ရှိသော်လည်း စိုက်ဧကများမှာ ယခင်နှစ်ထက် ဧက (၂၀၀၀၀)ကျော်ပိုမိုစိုက်ပျိုးနိုင်သောကြောင့် အမြတ်အစွန်းများရရှိလျက်ရှိကြောင်း မြေပဲစိုက်တောင်သူတစ်ဦးထံမှသိရှိရပါသည်။

      ရန်ကုန်-မန္တလေးမြို့ကြီးများမှတစ်ဆင့် ပြည်ပဈေးကွက်ထိတင်ပို့ရပြီး ဈေးကွက်ခိုင်မာမှုရှိသောကြောင့် မြေပဲစိုက်ဧကများကို တိုးချဲ့စိုက်ပျိုးလျက်ရှိကြောင်း မြေပဲစိုက်တောင်သူထံမှ သိရှိရပါသည်။

DOCA(မကွေး)