ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ မကွေးခရိုင်၊တောင်တွင်းကြီးမြို့နယ်၌ ဆည်ရေသောက်စနစ်ကို အသုံးပြု ပြီး နွေစပါးလယ် (၁၀၀၂)ဧက စိုက်ပျိုးပြီးစီးနိုင်ခဲ့ကြောင်း စိုက်ပျိုးရေးဌာနမှ သိရှိရပါသည်။

          တောင်တွင်းကြီးမြို့နယ်အတွင်းရှိ ရန်ပယ်ဆည်ရေသောက်၊ ငမင်ဆည်ရေသောက်စနစ်ဖြင့် နွေစပါး ဧက(၉၀၀)ကျော်စိုက်ပျိုးရန် လျာထားသတ်မှတ်ပြီး ယခုအခါတွင် သတ်မှတ်လျာထား ဧက ထက် ကျော်လွန်စိုက်ပျိုးနိုင်ခဲ့ကာ နွေစပါးဧကများ ပန်းတိုင်အထွက်နှုန်းရရှိရေး မြို့နယ်စိုက်ပျိုးရေးဦးစီး ဌာနမှ ဒေသခံတောင်သူများနှင့် ပူးပေါင်း၍ ဆောင်ရွက်လျက်ရှိပါသည်။  တောင်တွင်းကြီးမြို့နယ်တွင် အောင်နိုင်တိုး နွေစပါးမျိုးကို အဓိကထားစိုက်ပျိုးပြီး စပါးမျိုးစေ့ တစ်တင်းခွဲ (၁)အိတ်လျှင် (၇၅၀၀၀) ကျပ်ဖြင့် ဝယ်ယူရရှိပြီး တစ်ဧကလျှင် တစ်တင်းခွဲအိတ်(၁)အိတ် ကုန်ကျကြောင်း၊ တောင်တွင်းကြီး မြို့နယ်အနေဖြင့် နွေစပါးစိုက်ပျိုးထုတ်လုပ်မှုမှာ ရန်ပယ်ဆည်ရေသောက်စနစ်ဖြင့် (၉၅၂)ဧက၊ ငမင် ဆည်ရေသောက်စနစ်ဖြင့် နွေစပါး (၅၀)ဧက၊ စုစုပေါင်း (၁၀၀၂)ဧက လျာထားဧက ထက်ကျော် လွန်စိုက်ပျိုးနိုင်ခဲ့ကြောင်းနှင့် ရက်ပေါင်း (၁၂၀)ရှိလျှင် စတင်ရိတ်သိမ်းနိုင်မည်ဖြစ်ကြောင်း မြို့နယ် စိုက်ပျိုးရေးဦးစီးဌာနမှ သိရသည်။

DOCA(မကွေး)

               မန္တလေးတိုင်းဒေသကြီး၊ ကျောက်ဆည်ခရိုင်၊ စဉ့်ကိုင်မြို့နယ်သည် ဆည်ရေသောက်ဒေသ ဖြစ်သောကြောင့် စပါးကိုအဓိကထားစိုက်ပျိုးကြပြီး ကျေးလက်နေတောင်သူများသည် ရာသီအလိုက် သီးနှံမျိုးစုံကိုလည်း စိုက်ပျိုးကြပါသည်။  မိုးသီးနှံတစ်မျိုးဖြစ်သော ပြောင်းဖူးသီးနှံကိုလည်း မိသားစု အပိုဝင်ငွေရရှိရေးအတွက် တစ်နိုင်တစ်ပိုင်စိုက်ပျိုးကြရာမှ ယခုအချိန်တွင် စီးပွားဖြစ်စိုက်ပျိုး လာကြပြီး၊ ၂၀၂၆ - ၂၀၂၇ ဘဏ္ဍာနှစ်၊  စဉ့်ကိုင်မြို့နယ်တွင် မိုးပြောင်းဖူး စိုက်ဧက ( ၅၂၈  )ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏ စာရင်းများအရသိရှိရသည်။ အများဆုံးစိုက်ပျိုးသော မျိုးများမှာ သကြားပြောင်းမျိုးဖြစ်ပြီး (၁)ဧက မျိုးအနေဖြင့် ပြောင်းဖူးစေ့(၈)ပြည် စိုက်ပျိုးရကြောင်း ၊ မျိုးစျေးနှုန်းအနေဖြင့် မျိုးစေ့(၁)ပြည် လျှင်(၈၀၀၀/-)ကျပ်ဖြင့် ဝယ်ယူစိုက်ပျိုးကြကြောင်း ၊ မေလတွင် စတင်စိုက်ပျိုးကြပြီး မိုးပြောင်းဖူးများ သြဂုတ်လမှစတင်၍ ထွက်ရှိမည်ဖြစ်ကြောင်း၊  (၁)ဧက စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၆၀၀၀၀၀/-)ကျပ်အထိ ကုန်ကျကြောင်း ၊ (၁)ဧက အထွက်နှုန်းအနေဖြင့် ပြောင်းဖူးစုစုပေါင်း (၄၀၀၀-၄၅၀၀)ဖူးခန့် ထွက်ရှိကြောင်း၊ ထိုင်ဝမ်သကြားပြောင်းဖူးမှာ လူကြိုက်များသောကြောင့် ဈေးကွက်တွင် အရောင်းသွက်ပြီး ဈေးကောင်းရရှိကြောင်း၊  ပြောင်းဖူးစျေးနှုန်းအနေဖြင့် တစ်ဖူးလျှင် လက်ကား(၃၀၀/-)ကျပ်နှင့် လက်လီတစ်ဖူးလျှင်(၄၀၀)ကျပ်ဖြင့် အရောင်းအဝယ်ဖြစ်လျက် ရှိကြောင်း၊ ပြောင်းဖူးပြုတ် တစ်ဖူးလျှင် (၇၀၀-၈၀၀)ကျပ် စျေးများဖြင့်ရောင်းဝယ်လျက်ရှိကြောင်း ၊ ဈေးကွက်အနေဖြင့် မန္တလေးကုန်စိမ်းပွဲရုံများသို့ သွားရောက်ရောင်းချကြပြီး အချို့ပွဲစားများမှလည်း ကျေးရွာစိုက်ခင်းအထိ လာရောက်ဝယ်ယူလျက်ရှိကြောင်း၊ တောင်သူများမှ ရန်ကုန်၊မန္တလေး ကားလမ်းဘေးတွင်လည်း ရောင်းချကြကြောင်း သိရှိရပါသည်။ အကျိုးအမြတ်အနေဖြင့် အထွက် နှုန်းနှင့် ဈေးနှုန်းပေါ်မူတည်ပြီး အကျိုးအမြတ်များရရှိပါသည်။ ဖူးစားပြောင်း စိုက်ပျိုး ခြင်းဖြင့် ကျွဲစာ၊နွားစာများ ဖူလုံသည့်အပြင် ပြောင်းဖူးမျိုးပင်များကိုလည်း ပြန်လည်ရောင်းချ ရသဖြင့် တွက်ချေကိုက်သည့် သီးနှံဖြစ်သောကြောင့် ပြောင်းဖူးသီးနှံကို ပိုမိုတိုးချဲ့စိုက်ပျိုးသင့်ကြောင်း ရေးသားတင်ပြအပ်ပါသည်။

DOCA(မန္တလေး)      

          တနင်္သာရီတိုင်းဒေသကြီး မြိတ်မြို့နှင့် အနီးဝန်းကျင်ဒေသများတွင် ဒေသထွက်ရာသီပေါ်သီးနှံ တစ်မျိုးဖြစ်သော ဒူးရင်းသီးများသည်  ဧပြီလဆန်းမှ စတင်ထွက်ရှိပြီး ယခုမေလ တတိယအပတ် အတွင်း မိုးရွာသွန်းမှုအခြေအနေများကြောင့် ဒူးရင်းပင်များမှ ဒူးရင်းသီးများသည် လှိုင်လှိုင်ရင့်မှည့် ထွက်ရှိလာသောကြောင့်ဒူးရင်းဈေးကွက်အနည်းငယ်ကျဆင်းလာသဖြင့် အရောင်းအဝယ်သွက်လျက် ရှိပြီး စားသုံးသူဝယ်လိုအားလည်း မြင့်တက်လျက်ရှိကြောင်း ဒေသခံသစ်သီးရောင်းဝယ်သူများထံမှ သိရသည်။

          မြိတ်ဒေသအတွင်း ရောင်းချနေသည့် ဒူးရင်းသီးများမှာ မြိတ်မြို့နယ်အတွင်း ကျေးရွာများရှိ တောတောင်ဥယျာဥ်များမှ ထွက်ရှိလာသော ဒူးရင်းသီးများအပြင် ပုလော၊ တနင်္သာရီ၊ ဘုတ်ပြင်း၊ ကျွန်းစုများမှတစ်ဆင့် လာရောက်ရောင်းချလျက်ရှိပြီး ဒေသထွက်ဒူးရင်းများအပြင် ထိုင်းမျိုးဒူးရင်း များကိုလည်း ရောင်းချလျက်ရှိကြောင်းသိရှိရပါသည်။ မြိတ်ဈေးကွက်အတွင်း ဒူးရင်းသီးဈေးနှုန်း များမှာဒေသထွက် ရိုးရိုးဒူးရင်း တစ်လုံးလျှင် အလုံးအရွယ်အစားပေါ်မူတည်၍ ၁၅၀၀ ကျပ်မှ ၁၀,၀၀၀ ကျပ်အထိ စျေးနှုန်းအသီးသီးဖြင့် ကန်ဖျားကုန်စိမ်းစျေး၊ သစ်သီးဆိုင်များနှင့် လမ်းဘေးယာယီ သစ်သီးဆိုင်များတွင် ‌ရောင်းချလျက်ရှိပြီး ညနေပိုင်းနှင့် ညပိုင်းအချိန်များတွင် ဝယ်ယူသူများပြား လေ့ရှိပြီး ဒူးရင်းသီးများကို ဒေသတွင်းစားသုံးမှုသာမက ရန်ကုန်နှင့် အခြားမြို့များသို့ တင်ပို့ ရောင်းချ မှုများလည်း ရှိနေကြောင်း သိရှိရပါသည်။

DOCA(တနင်္သာရီ)

   မန္တလေးတိုင်းဒေသကြီး ၊ ကျောက်ဆည်ခရိုင်အတွင်း ကျောက်ဆည်၊မြစ်သားမြို့နယ်များတွင် ၂၀၂၆-၂၀၂၇ ခုနှစ်၊မိုးချဉ်မျှင်ရှည်ဝါများ ပန်းတိုင်အထွက်နှုန်းရရှိရေး ရည်မှန်းချက်ထားဆောင်ရွက်လျက်ရှိရာ ကျောက်ဆည်မြို့နယ်တွင်(၁၀၅)ဧက၊စဉ့်ကိုင်မြို့နယ်တွင်(၄)ဧက၊မြစ်သားမြို့နယ်တွင် (၂၁၇၅)ဧက အစောစိုက်ပျိုးထားရှိမှုစုစုပေါင်း စိုက်ပျိုးဧက(၂၂၈၄)ဧက စိုက်ပျိုးထားကြောင်း သက်ဆိုင်ရာဌာန၏စာရင်းများအရသိရှိရပါသည်။ဧပြီလနှင့်မေလများတွင် စတင်စိုက်ပျိုးကြပြီး ဇူလိုင်လနှင့်သြဂုတ်လများတွင် စတင်ထွက်ရှိမှာဖြစ်ကြောင်း ၊ကျောက်ဆည်မြို့နယ်အနေဖြင့် မိုးကြို ချည်မျှင်ရှည်ဝါသီးနှံများကို ကျောက်ဆည်မြို့အရှေ့ဘက် ဖျောက်ဆိပ်ပင်ကျေးရွာ အပါအဝင် ရဲဘော်ကြီး၊မှိုင်းပန်၊ကလေး၊ရှမ်းတောင်ဦး၊ရဲယမန်းရွာ၊တောင်တော်၊ ပေါင်လောင်၊ ကင်းကျေးရွာများ နှင့်မြစ်သားမြို့နယ်တွင် ဒိုင်း၊မြနဒီကျေးရွာများတွင်လည်းအများဆုံးစိုက်ပျိုးကြကြောင်း ၊ ဝါစိုက်ပျိုး ရာတွင် ဘောင်ကြောင်းပေးစနစ်ဖြင့် အတန်းလိုက် စိုက်ပျိုးကျကြောင်း ၊ ဝါစိုက်ပျိုးမှုတွင် မျိုးအနေဖြင့် ငွေချည်-၆ ၊ ရွှေတောင် - ၈ မျိုးများကို အများဆုံး စိုက်ပျိုးကြပြီး (၁)ဧကလျှင် မျိုးထုပ်(၂-၃)ထုပ် အထိ ကုန်ကျကြောင်း ၊ မျိုး(၁)ထုပ် စျေးနှုန်း အနေဖြင့် (၆၄၀၀၀-၆၉၀၀၀)ကျပ် စျေးဖြင့် ဝယ်ယူစိုက်ပျိုးရကြောင်း ၊ စိုက်ပျိုးစရိတ်အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း (၆၀၀၀၀၀/-)ကျပ်ခန့် ကုန်ကျပြီး (၁)ဧက အထွက်နှုန်း အနေဖြင့် ပိဿာ(၄၀၀-၅၀၀) ပိဿာခန့် ထွက်ရှိကြောင်း ၊ ယခင် ဝါစျေးနှုန်းအနေဖြင့် ဝါ(၁)ပိဿာလျှင် (၃၈၀၀-၄၀၀၀)ကျပ် ၊ ဂွမ်း(၁)ပိဿာလျှင်(၉၅၀၀-၉၈၀၀)ကျပ် ၊ အရည်အသွေးကောင်းမွန်သော ဝါအသန့်(၁)ပိဿာလျှင် (၄၂၀၀)ကျပ်၊ ဂွမ်းအကောင်း(၁)ပိဿာလျှင် (၁၀၀၀၀)ကျပ် စျေးများဖြင့်အရောင်းအဝယ်ဖြစ်ခဲ့ပြီး  စိုက်ပျိုးစရိတ်နှုတ်ပြီး(၁၀၀၀၀၀၀/-)ကျပ်ခန့်မြတ်ကြောင်း၊ ယခုလက်ရှိပေါက်စျေးအနေဖြင့်ဝါ (၁) ပိဿာလျှင်(၄၈၀၀-၅၀၀၀)ကျပ်၊ ဂွမ်း(၁)ပိဿာလျှင်(၉၈၀၀-၉၉၀၀)ကျပ်၊ အရည်အသွေးကောင်းမွန် သောဝါအသန့်(၁)ပိဿာလျှင်(၅၁၀၀)ကျပ် ၊ ဂွမ်းအကောင်း(၁)ပိဿာလျှင် (၁၀၀၀၀)ကျပ်စျေးနှုန်း များဖြင့်ရောင်းဝယ်လျှက်ရှိပါသည်။ဝါထွက်ပေါ်ချိန်တွင် တောင်သူများမှ ပွဲရုံများသို့ တိုက်ရိုက်တင်ပို့ ရောင်းချကြပြီး ပွဲရုံများမှတဆင့် မန္တလေးစက်မှုဇုံ၊ ယက်ကန်းစက်ရုံ၊ ချည်မျှင်စက်ရုံများသို့တင်ပို့ ရောင်းချလျှက်ရှိကြောင်း ဝါထွက်ပေါ်ချိန်တွင်လည်း စျေးနှုန်းများကောင်းမွန်ပါက တောင်သူများ အကျိုးအမြတ်ပိုမိုဖြစ်ထွန်း နိုင်မည်ဖြစ်ပါသည်။

DOCA(မန္တလေး)

               ပဲခူးတိုင်းဒေသကြီး၊ ပြည်ခရိုင်၊ ပြည်မြို့ရှိ ဈေးများတွင် သရက်သီးမှည့်များ ရောင်းချနေ ကြောင်းသိရသည်။ ပြည်တွင်း၌ အဓိကစားသုံးသည့် သရက်သီးများမှာ စိန်တလုံး၊ မြကျောက်၊ ရင်ကွဲနှင့် သုံးလုံးတစ်တောင်သရက်သီးအမျိုးအစားများဖြစ်ကြောင်းသိရသည်။ လတ်တလောတွင် စိန်တလုံးနှင့် မြကျောက်သရက်သီးအမှည့်များ ဈေးကွက်ထဲသို့ အများအပြားဝင်ရောက်နေပြီဖြစ် သော်လည်း ရင်ကွဲသရက်မျိုးမှာ အမှည့်ရရှိမှု အလွန်နည်းနေသေးကြောင်း တွေ့ရှိရသည်။ စိန်တလုံး သရက်သီးမျိုးများမှာ မှည့်လျှင် မွှေးလာသောကြောင့် ဟိုတယ်များ၊ စားသောက်ဆိုင်များတွင် အဓိက ဝယ်ယူသုံးစွဲကြောင်းသိရပါသည်။ ပြည်တွင်းသာမက ပြည်ပကပါ ဝယ်ယူမှုများကြောင်း သိရသည်။

          မြန်မာပြည်တွင်း၌  မြကျောက်သရက်မျိုးသာ ပိုကြိုက်ကြကြောင်းသိရသည်။ ဈေးကွက် အတွင်းတွင်လည်း မြကျောက်သရက်မျိုးမှာ အရောင်းသွက်ကြောင်းသိရသည်။ရင်ကွဲသရက်မျိုးများမှာ ကျေးလက်ဒေသများတွင်သာပေါများပြီးအရောင်းအဝယ်ဖြစ်ကာဈေးလည်း အနည်းဆုံးရကြောင်းသိရသည်။

          သရက်ပင်သည် နှစ်ရှည်သီးနှံပင်ဖြစ်သည့်အတွက် ခြံပိုင်ရှင်များအနေဖြင့် နှစ်စဉ် သရက်သီး ရာသီချိန်ရောက်တိုင်း အတိုင်းအတာတစ်ခုအထိ ဝင်ငွေရရှိနေကြောင်း သရက်ခြံပိုင်ရှင်တစ်ဦးထံမှ သိရှိရသည်။လက်ရှိတွင် ပြည်ဈေးကွက်အတွင်း သရက်သီးအမျိုးအစားအလိုက် ၅၀၀ ကျပ်၊ ၇၀၀ ကျပ်၊ ၈၀၀ ကျပ်မှစ၍ ၁၅၀၀ ကျပ်ဝန်းကျင်အထိသာ ဈေးရှိနေပြီး အဝယ်နည်းနေသေးကြောင်း သိရသည်။ ယခင်နှစ်နှင့် နှိုင်းယှဉ်လျှင် ဈေးနှုန်းနည်းနေသေးကြောင်း သိရသည်။ ဝယ်လိုအားနှင့် ရောင်းလိုအားမှာ ဝယ်လိုအားနည်းပြီး ရောင်းလိုအားများနေကြောင်းသိရသည်။

          သရက်သီးမှည့်ဈေးကွက်ကျဆင်းနေသော်လည်း သရက်ပြင်ဈေးမှာ ယခင်နှစ်ကထက် ပိုမို မြင့်တက်လာနေပြီး တစ်ပိဿာလျှင် ကျပ် (၃၀၀၀၀)ခန့်အထိ ဈေးပေါက်နေကြောင်းသိရသည်။

DOCA(ပဲခူး)