ပြည်တွင်းကုန်သွယ်မှုသတင်း

     ကျိုက်မရောမြို့နယ်၊ နတ်စမ်းကျေးရွာ၌ ခြံပိုင်ရှင်များအနေဖြင့် ဘိုစားပဲသီးများ တစ်နိုင်တစ်ပိုင် စိုက်ပျိုးလျက်ရှိရာ အထွက်ကောင်းပြီး စျေးကောင်းလည်းရရှိသဖြင့် မိသားစု စားဝတ်နေရေး အဆင်ပြေလျက်ရှိကြောင်း သိရပါသည်။

          အဆိုပါ ဘိုစားပဲသီးများကိုစိုက်ပျိုးရာ၌ ခြံရှင်များအနေဖြင့် ဘိုစားပဲသီးစေ့ကို အစေ့ လိုက်ချ၍ စိုက်ပျိုးပေးရပြီး အညွန့်လေးများတက်လာလျှင် တိုင်ထောင်ပေးရသည်။ မြေသြဇာအဖြစ် နွားချေးကိုအသုံးပြု၍ရကြောင်း၊ စိုက်ပြီး ၄၅ရက်ခန့်တွင် သန်မာကြီးထွားပြီး လတ်ဆတ်သည့် ဘိုစားပဲကို ဆွတ်ခူးကာ စျေးကွက်အတွင်း တင်ပို့ရောင်းချနိုင်ပြီဖြစ်ကြောင်း၊ ဘိုစားပဲကို မော်လမြိုင်မြို့ကြီးမှ ဖောက်သည်ဝယ်လက်များ၊ စားသောက်ဆိုင်ကြီးများမှ မှာယူမှု ပိုမို များပြားလာကြောင်း၊ ဘိုစားပဲတစ်ပိသာလျှင် ၅၀၀၀ကျပ်ထိ ဖောက်သည်ပေးရကြောင်း၊ တစ်ရက်ခြားခူးလျှင် ၂၅ ပိသာခန့်ရသဖြင့် တစ်ရက်ခြားဝင်ငွေ (၇၀၀၀၀)ခန့်ရကြောင်း နတ်စမ်း ကျေးရွာမှ ဘိုစားပဲသီးတစ်နိုင်တစ်ပိုင် စိုက်ပျိုးရောင်းချသူ ‌ဒေါ်အေး၏ ပြောပြချက်အရ သိရသည်။

DOCA (မွန်)

      မွန်ပြည်နယ်၊ ကျိုက်မရောမြို့နယ်၊ ကလိုင်းကနိုင်ကျေးရွာတွင် ယခုနှစ်ရာသီဥတု ကောင်းမွန်ပြီး မိုးများသဖြင့် ယခင်နှစ်ထက် သခွားသီးအထွက်နှုန်းတိုးကာ ဈေးကောင်းရရှိခြင်းကြောင့် သခွားသီးစီးပွားဖြစ် စိုက်ပျိုးသူများ ဝင်ငွေတိုးတက်လျက်ရှိသည်။

          မိုးရာသီအစ နယုန်လတွင် သခွားစေ့များကို မြေကြီးတွင် အစေ့ချစိုက်ပျိုးကာ ရက်ပေါင်း ၂၀ ခန့်အကြာတွင် တိုင်ထောင်ပေးရကြောင်း၊ နောက်ထပ် ရက်‌ (၃၀) ခန့်တွင် သခွားသီးများ ရရှိပြီးဖြစ်ကြောင်း သခွားပွင့်ချိန်တွင် အပွင့်အားတိုးဆေးနှင့် အသီးသီးချိန်တွင် ပျားပိုးမထိုးနိုင်အောင် ပိုးသတ်ဆေးဖျန်းပေးရကြောင်း သိရသည်။

          သခွားသီးကို တစ်ရက်ခြားတစ်ကြိမ်ခူးဆွတ်နိုင်ပြီး တစ်ခါခူးလျှင် ပိဿာချိန် ၃၀၀ ခန့် ရရှိကြောင်း၊ ယခုကာလတွင် တစ်ပိဿာ ၂၀၀၀ ခန့်ရရှိသဖြင့် မိသားစုအပိုဝင်ငွေရရှိကာ စိုက်ပျိုးစရိတ်လည်းကာမိကြောင်း၊ သခွားသီးသည် ထမင်းဝိုင်းတွင် တို့စရာအဖြစ် လူအများ နှစ်သက်ကြသဖြင့် ဈေးကွက်အတွင်း အရောင်းသွက်သော သီးနှံတစ်မျိုးဖြစ်ကြောင်း စီးပွားဖြစ် သခွားစိုက်တောင်သူ ဦးကျော်ဦး၏ ပြောကြားချက်အရ သိရသည်။

DOCA (မွန်)

        ကျိုက်မရောမြို့နယ်၊ ဥယျာဥ်ခြံမြေများ၌ မိသားစုအပိုဝင်ငွေရရှိစေရန် တစ်နိုင်တစ်ပိုင် စိုက်ပျိုးထားသည့် ဒေသထွက်ငရုတ်သီးတောင့်များ ဆွတ်ခူးချိန်လှိုင်လှိုင်ထွက်ပြီး စျေးကောင်း လည်းရရှိသဖြင့် မြွေဟောက်ကျေးရွာမှ ငရုတ်သီးတစ်ပိုင်တစ်နိုင် စိုက်ပျိုးသူများ မိသားစုဝင်ငွေ တိုးကာ စီးပွားရေးအဆင်ပြေလျက်ရှိကြောင်း သိရပါသည်။

          ကော့ကလော့ကျေးရွာအုပ်စု၊ မြွေဟောက်ကျေးရွာရှိ ခြံစိုက်တောင်သူများက မြေပဲ စိုက်ပျိုးချိန်တွင် သီးညှပ်အဖြစ် ငရုတ်သီးကိုပါရော၍ စိုက်ပျိုးကြသည်။ ငရုတ်ပင်သည် အများအားဖြင့် မြေအစိုဓာတ်ဖြင့်သာကြီးထွားပြီး အပင်သုံးလသား၌ အပင်သန်ဆေး၊ အသီး သန်ဆေး၊ ပိုးသတ်ဆေးတို့ကို ဖျန်းပေးရသည်။ ငရုတ်ခင်းအတွင်း ပေါင်းမြတ်ရှိပါက ပေါင်းနှုတ် ပေးရသည်။

          မြွေဟောက်ကျေးရွာရှိစိုက်ပျိုးသည့် ငရုတ်သီးမျိုးမှာ မိုးမျှော်သီးဒေသခေါ် ကုလားအော် သီးမျိုးများကိုသာ အဓိကထားစိုက်ပျိုးကြပြီး စပ်သည့်အတွက် ဒေသပြည်သူများ အလွန်  ကြိုက်နှစ်သက်၍စျေးကွက်ဝင်ကြောင်း၊ ငရုတ်သီးကို တစ်နှစ်ပတ်လုံး စိုက်ပျိုးနိုင်ပြီး စတင်စိုက်ပျိုးပြီး နှစ်လအကြာ ခူးဆွတ်ရောင်းချနိုင်ပြီးကြောင်း၊ ယခုလိုခူးဆွတ်ချိန်တွင် တစ်ပိသာလျှင် တစ်သောင်းခွဲကျပ်ဖြင့် ဖောက်သည်ပေးရပြီး တစ်ခါခူးလျှင် ၆ ပိဿာခန့်ရသဖြင့် တစ်ပတ်ကိုဝင်ငွေ တစ်သိန်းရရှိကြောင်း ငရုတ်သီးများစနစ်တကျစိုက်ပျိုးသူ ဒေါ်ကျင်မွှေး၏ ပြောပြချက်အရ သိရပါသည်။

DOCA (မွန်)

      ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်အတွင်းရှိ သဖန်းကုန်း၊ ဓနုအေး၊ ခြံတန်း၊ ပဲကွဲ၊ ကျောင်းကွင်း၊ စစ်တော စသော ကျေးရွာများတွင် မိသားစုတစ်နိုင်တစ်ပိုင်အဖြစ် ရှမ်းနံနံပင်များ ကို စိုက်ပျိုးကြပါသည်။ (၈.၈.၂၂၅)ရက်နေ့ နံနက်(၁၀:၀၀) အချိန်တွင် စားသုံးသူ ရေးရာဦးစီးဌာန၊ မြို့နယ်ဦးစီးမှူးရုံးမှ ဒု-ဦးစီးမှူး ဒေါ်စိမ်းမြသီတာမှ ကွင်းဆင်းလေ့လာမှုကို ဆောင် ရွက်ခဲ့ပါသည်။

     ဇလွန်မြို့နယ် ဒေသတွင်း စိုက်ပျိုးသော ရှမ်းနံနံပင်များသည် ထိုင်ဝမ်မျိုးစေ့ကိုသာ စိုက်ပျိုးကြ ပြီး တစ်ပြည်လျှင် (၃၂၀၀၀/-)ကျပ်ဖြင့် ဝယ်ယူရပါသည်။ (၀.၁၀ ဧက)လျှင် တစ်ပြည် ကြဲပက်ရကာ စိုက်ပျိုးပြီး (၂)လခွဲအကြာတွင် ခူးဆွတ်နိုင်ပါသည်။ ခူးဆွတ် ချိန် တွင် ရက်(၂၀)ခြားတစ်ခါ ခူးဆွတ်ကာ (၅ ကြိမ်မှ ၆ ကြိမ်)ထိ အပင်လှိုင်လှိုင် နှုတ်ရကြောင်း၊ ကုန်ကျစရိတ် အနေဖြင့် ၀.၁၀ ဧကလျှင် မျိုးစေ့၊ ဝါး၊ အမိုး၊ သွင်းအားစုနှင့် လုပ်သားခအပါအဝင် ၅ သိန်းကျပ်ဝန်းကျင် ကုန်ကျပါသည်။ ယခုအခါ ထိုင်ဝမ်ရှမ်းနံနံ တစ်ပင်လျှင်(၆ ကျပ်) နှုန်းရရှိပြီး ခြံအတွင်း လက္ကားဈေးဖြင့် အရောင်းအဝယ်ဖြစ်လျက် ရှိပါသည်။ အကျိုးအမြတ်အနေဖြင့်   ၆ သိန်း ဝန်းကျင် ကျန်ရှိကြောင်း ရှမ်းနံနံစိုက်ပျိုးသူများထံမှ သိရှိရပါသည်။ အပင်မျိုးသန့်သောကြောင့် ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးအတွင်း ရှိ မြို့နယ်များ သို့ တင်ပို့ရောင်းချလျက် ရှိသည့်အတွက် မိသားစုဝင်ငွေတိုးသော တစ်နိုင်တစ်ပိုင် စိုက်ပျိုးရေးလုပ်ငန်း ဖြစ်ကြောင်း လေ့လာတင်ပြအပ်ပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ ဟင်္သာတခရိုင်သည် လယ်ယာစိုက်ပျိုးရေးနှင့်ဥယျာဉ်ခြံမြေလုပ်ငန်း ကိုအဓိကထားလုပ်ကိုင်ကြပြီး၊ဒေသတွင်းကုန်ထုတ်လုပ်ငန်းများဖြစ်သည့်  အသေးစားစက်မှု/လက်မှု လုပ်ငန်းများလည်း လုပ်ကိုင်ကြပါသည်။  ထိုလုပ်ငန်းများအထဲမှ ဟင်္သာတမြို့ ၊နတ်မော်တိုက်နယ်ရှိ မြေခြားကျေးရွာတွင် ပီနံကြိုးကျစ်လုပ်ငန်းကို အိမ်တိုင်းစေ့နီးပါး တစ်နိူင်တစ်ပိုင် လုပ်ကိုင်ကြရာ (၉.၈.၂၀၂၅)ရက်နေ့တွင် ၎င်းပီနံကြိုးကျစ်လုပ်ငန်းများသို့ စားသုံးသူရေးရာဦးစီးဌာန၊ ဟင်္သာတမြို့နယ် ဦးစီးမှူး ဦးမိုးကျော်မှ သွားရောက်တွေ့ဆုံ၍ လုပ်ငန်းအခြေအနေများကိုကွင်းဆင်းလေ့လာခဲ့ပါသည်။

     ထိုပီနံကြိုးကျစ်လုပ်ငန်းလုပ်ကိုင်ရာတွင် အသုံးပြုသော ကုန်ကြမ်းပစ္စည်း ပီနံစများကို လက္ကား ကုန်သည် အများစုက ရန်ကုန်မြို့မှ ဝယ်ယူကြပြီး ပြန်လည်ဖြန့်ဖြူးကြောင်း၊ ကုန်ကြမ်းအဖြစ်သုံးရ သော  ပီနံကြိုးစများကို တစ်ပိဿာလျှင် ၆၅၀၀ မှ ၇၀၀၀ ကျပ်ဖြင့် ဝယ်ယူရပြီး မိမိတို့ဒေသ အရောက်ဈေး ဖြစ်ကြောင်း၊ တစ်ကြိမ်ဝယ်လျှင် ပီနံစ အခွေ ၁၀၀ မှ ၂၀၀ ခန့်အထိ ဝယ်ယူအသုံး ပြုလျက်ရှိပါသည်။ ကြိုးကျစ်ရာတွင် ကြိုးကျစ်စင်တွင် လွန်းဆွဲ၍ ဒလက်ဖြင့် ကျစ်ရပါသည်။ ပီနံကြိုး တစ်ပိဿာ အသုံးပြုလျှင် လုပ်သားခအပါ ၇၀၀၀ ကျပ်ခန့် ကုန်ကျပြီး ကျစ်ပြီးသား ကြိုးခွေ ၁၀ ကျပ်သား ကြိုး ၁၀ ချောင်း ရရှိကာ တစ်ကြိုးလျှင် ၁၀၀၀/- ကျပ်ဖြင့် ရောင်းချရပါသည်။ ပီနံ့ကြိုး တစ်ပိဿာလျှင် အမြတ်ငွေ ၃၀၀၀/- ကျပ် ဝင်ငွေရရှိကြောင်း၊ တစ်လလျှင် ကြိုး ၁ သောင်းခန့် ပြုလုပ်ရောင်းချရသည့်အတွက် အကျိုးအမြတ်များကြောင်း သိရှိရပါသည်။  ထွက်ရှိလာသော ပီနံကြိုး များကို ဆောင်လုပ်ရေးလုပ်ငန်းများ၊ ကုန်စည်ထုတ်ပိုးခြင်းများ၊ လယ်ယာစိုက်ပျိုးရေးနှင့် မွေးမြူရေး လုပ်ငန်းများတွင် အသုံးပြုကြခြင်းကြောင့ ဟင်္သာတခရိုင်အတွင်းရှိ မြို့နယ်များအပြင် ဧရာဝတီတိုင်း ဒေသကြီးနှင့် ပဲခူးတိုင်းဒေသကြီးသို့ တင်ပို့ရောင်းချရသောကြောင့် ပီနံကြိုးကျစ်လုပ်ငန်းသည် မိသားစု တစ်နိုင်တစ်ပိုင် ဝင်ငွေတိုးသော  ၊တစ်နှစ်ပတ်လုံး ရာသီမရွေး လုပ်ကိုင်ရသော လုပ်ငန်းဖြစ်သည့် အတွက်  ပုံမှန်ဝင်ငွေကောင်းသည်ဟု လုပ်ငန်းရှင်ထံမှ သိရှိရပါသည်။

DOCA(ဧရာဝတီ)