ပြည်တွင်းကုန်သွယ်မှုသတင်း

       ရှမ်းလူမျိုးများ၏ ရိုးရာအစားအစာများထဲတွင် ပဲပုပ်သည် ထိပ်ဆုံးမှ ပါဝင်လျက်ရှိပါသည်။ အောက်ပြည်အောက်ရွာမှ လူအများတို့သည် ထမင်းဝိုင်းတွင် ငါးပိမပါလျှင် မပြီးမပြည့်စုံသကဲ့သို့ ရှမ်းလူမျိုးတို့၏ နေ့စဉ်ဟင်းလျာတွင်လည်း ပဲပုပ်မပါလျှင် မပြီးမပြည့်စုံနိုင်ဖြစ်ရပါသည်။ ထို့ကြောင့်လည်း ရှမ်းလူမျိုးများကို ပဲပုပ်နှင့်တွဲဖက်၍မြင်ကြသောကြောင့် “ရှမ်းပဲပုပ်” ဟုခေါ်ဆိုကြပြီး “ပဲပုပ်စားပြီး ခေါင်းပြားအောင်အိပ်”ဆိုသော ရှမ်းစကားပုံလည်းရှိပါသေးသည်။

          ရှမ်းလူမျိုးများသည် ပဲပုပ်ကို ကြော်၍သော်လည်းကောင်း၊ ချက်၍သော်လည်းကောင်း အမျိုးမျိုးပြုလုပ်၍စားသုံးကြပါသည်။ ထိုထဲတွင် ပဲပုပ်ချပ်နှင့် ချင်း/ ဂျူးပဲပုပ်စပ်ချပ်ကို အများဆုံးပြုလုပ်စားသုံးကြပါသည်။ ရှမ်းလူမျိုးများ၏ ပဲပုပ်ချပ်ပြုလုပ်ပုံမှာ ပဲပုပ်စေ့များကို ပထမဦးစွာ ရေနှင့်သုံးနာရီခန့်စိမ်ထားပြီးမှ ဆယ်ယူကာ ပဲပုပ်စေ့များကျက်အောင် သုံးနာရီခန့်ပြုတ်ပေးရပါသည်။ ထို့နောက် ပြုတ်ပြီးသောပဲပုပ်များအား အိုးထဲသို့ထည့်ကာ နှစ်ရက် (သို့မဟုတ်) သုံးရက်ခန့် လေလုံအောင်ထုတ်၍ နှပ်ထားရပါသည်။ ပဲပုပ်နှပ်ပြီဆိုပါက ညက်နေအောင်ထောင်းပေးပြီး ရရှိလာသောပဲပုပ်နှစ်များကို မိမိလိုချင်သော အနေတော်ပမာဏခန့်လုံးပေးပြီး အခြောက်ခံရန် ဝိုင်းနေအောင်အချပ်ပြုလုပ်၍ နှစ်ရက်ခန့်နေလှမ်းပေးပြီးလျှင် ပဲပုပ်ချက်များရရှိလာပါသည်။

       ချင်း/ဂျူးပဲပုပ်စပ်ချပ်ပြုလုပ်ပုံမှာလည်း ထိုနည်းတူစွာပင်ဖြစ်ပါသည်။ ပဲပုပ်ချပ်ပြုလုပ်ပုံနှင့် ကွာခြားသွားသည်မှာကား ထောင်း၍ရရှိလာသော ပဲပုပ်နှစ်များထဲသို့ ချင်း/ ဂျူး၊ ဆား၊ ငရုတ်သီးတို့အား အချိုးအစားအတိုင်းထည့်၍ နှံစပ်အောင်ရောနှောပေးရပါသည်။ ထိုသို့ရောနှောထားသော ပဲပုပ်နှစ်များကိုလည်း အလုံးများပြုလုပ်၍ အချပ်ပြုလုပ်ပြီး နှစ်ရက်ခန့် အခြောက်ခံပြီးပါက အရသာကောင်းမွန်သော ချင်း/ ဂျူးပဲပုပ်စပ်ချပ်များရရှိလာပါသည်။ ဈေးကွက်တွင် အခြောက်ခံပြီး ရရှိလာသော အရသာကောင်းမွန်သည့်ပဲပုပ်ချပ်များကို တစ်ပိဿာလျှင် (၂၂၀၀၀)ကျပ်နှင့် ချင်း/ဂျူး ပဲပုပ်စပ်ချပ်များကိုမူ တစ်ပိဿာလျှင် (၂၅၀၀၀)ကျပ်ဖြင့်ဝယ်ယူရရှိနိုင်ပါသည်။ ရှမ်းလူမျိုးများသည် အဆိုပါပဲပုပ်ချပ်နှင့် ချင်း/ ဂျူးပဲပုပ်စပ်ချပ်များအား ဒေသတွင်းစားသုံးသည့်အပြင် နေပြည်တော်၊ မန္တလေးနှင့် အခြားသောဒေသများသို့လည်းတင်ပို့ရောင်းချပြီး တစ်ဖက်တစ်လမ်းမှ မိသားစုဝင်ငွေများရရှိနေပါတော့သည်။

DOCA(ရှမ်း)

        ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် တာဝန်ရှိသူများနှင့်အတူ (၂-၉-၂၀၂၄) ရက်နေ့၊ မွန်းလွဲပိုင်းတွင် ပုသိမ်မြို့နယ်၊ ကန်ကြီးထောင်မြို့နယ်များရှိ ရေကြီးနစ်မြုပ် ပြန်ပေါ်စိုက်ဧကများ၌ မိုးစပါးများ ပြန်လည်စိုက်ပျိုးနေမှုများကို သွားရောက်ကြည့်ရှုအားပေးခဲ့သည်။

        ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် အနန်းကုန်းကျေးရွာအုပ်စု၊ ခွေးတောက်ချောင်းကျေးရွာရှိ တောင်သူ ဦးသန်းထွေး၏ ရေကြီးနစ်မြုပ် ပြန်ပေါ်စိုက်ဧက(၄)ဧကတွင် ဧရာမင်း မိုးစပါးမျိုးပြန်လည်စိုက်ပျိုးနေမှုများကို ကြည့်ရှုအားပေးခဲ့ပြီး မြေပြင်စရိတ်၊ ကောက်စိုက်ခ၊ ပျိုးနှုတ်ခ စသည့်တစ်ဧကကုန်ကျစရိတ်များနှင့် ပြန်လည်စိုက်ပျိုးမှုအခြေအနေများကိုဆွေးနွေးမေးမြန်းခဲ့ပြီး စိုက်ဧကများပြည့်မီစွာစိုက်ပျိုးရန်၊ ပန်းတိုင်အထွက်နှုန်းရောက်ရှိအောင်ဆောင်ရွက်ရန် စိုက်ဧကများ ရေကြီးနစ်မြုပ်မှုကြောင့် ပိုးမွှားကျရောက်မှုအန္တရာယ်ကျရောက်မှုကိုလည်း သတိပြုရန်လိုပါကြောင်းနှင့် ဓာတ်မြေဩဇာ၊ သဘာဝမြေဩဇာများကို အချိုးကျထည့်သွင်းသုံးစွဲရန်လိုပါကြောင်း”  ဆွေးနွေးပြောကြားခဲ့ပြီး ကောက်စိုက်လုံမေများအား စားသောက်ဖွယ်ရာများထောက်ပံ့ပေးအပ်ခဲ့သည်။

    ယင်းနောက် တိုင်းဒေသကြီးဝန်ကြီးချုပ်နှင့်အဖွဲ့သည် ကန်ကြီးထောင့်မြို့နယ်၊ ကွင်းယားအရှေ့ ကျေးရွာရှိ တောင်သူ ဦးကျော်ကိုကိုဟိန်းအောင်၏ ရေကြီးနစ်မြုပ် ထိခိုက်စိုက်ဧက(၃)ဧကတွင် မိုးစပါး ၏ပြန်လည်စိုက်ပျိုးနေမှုများကိုကြည့်ရှုအားပေးပြီး တာဝန်ရှိသူများက ထိုခိုက်ပျက်စီးအခြေအနေများနှင့် ပြန်လည်စိုက်ပျိုးမှုအခြေအနေများရှင်းလင်းတင်ပြမှုအပေါ် တိုင်းဒေသကြီးဝန်ကြီးချုပ်က စိုက်ဧကများ ပြည့်မီစွာအချိန်မီစိုက်ပျိုးစေရေး၊ သက်တမ်းတိုမျိုးစပါးစိုက်ပျိုးစေရေး ဆွေးနွေးပြောကြားခဲ့ပြီး ကောက်စိုက်လုံမေများအား စားသောက်ဖွယ်ရာများထောက်ပံ့ပေးအပ်ခဲ့ကြောင်း သတင်းရရှိပါသည်။

DOCA(ဧရာဝတီ)

       စက်မှုလယ်ယာဦးစီးဌာန၊ အစိုးရနည်းပညာအထက်တန်းကျောင်း(ပုသိမ်)နှင့် ပုသိမ်စက်မှုဇုန်တို့ ပူးပေါင်းထုတ်လုပ်သည့် (စက်ပါ) ခြောက်တန်းသွား လက်ဆွဲကောက်စိုက်စက်၊ (စက်မပါ) ခြောက်တန်းသွား လက်ဆွဲကောက်စိုက်စက်နှင့် လေးတန်းသွား လက်ထိုးလက်ဆွဲကောက်စိုက်စက်များဖြင့် ပုသိမ်မြို့နယ်၊ တွန်ပလွန်ကျေးရွာအုပ်စုရှိ တောင်သူ ဦးဝင်းမြင့်လှိုင်၏ လယ်ဧကတွင် စမ်းသပ်စိုက်ပျိုးနေမှုများကို တိုင်းဒေသကြီးဝန်ကြီးချုပ် ဦးတင်မောင်ဝင်းနှင့် တာဝန်ရှိသူများသည် သွားရောက်ကြည့်ရှုအားပေးခဲ့သည်။

      ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည်  ပုသိမ်မြို့နယ်၊ တွန်ပလွန်ကျေးရွာအုပ်စုရှိ တောင်သူ ဦးဝင်းမြင့်လှိုင်၏ လယ်ဧက(၅)ဧကတွင် ဗျော့ထွန်းစပါးမျိုးအား စက်မှုလယ်ယာဦးစီးဌာန၊ အစိုးရနည်းပညာအထက်တန်းကျောင်း(ပုသိမ်)နှင့် ပုသိမ်စက်မှုဇုန်တို့ ပူးပေါင်းထုတ်လုပ်သည့် (စက်ပါ) ခြောက်တန်းသွား လက်ဆွဲကောက်စိုက်စက်၊ (စက်မပါ) ခြောက်တန်းသွားလက်ဆွဲကောက်စိုက်စက်နှင့် လေးတန်းသွား လက်ထိုးလက်ဆွဲကောက်စိုက်စက်များဖြင့် စမ်းသပ်စိုက်ပျိုးနေမှုများကို ကြည့်ရှုအားပေးခဲ့ပြီး တောင်သူများနှင့်တွေ့ဆုံ၍ အထွက်နှုန်းများတိုးတက်စေရေးအတွက် ကောက်စိုက်စက်များ၊ လက်ဆွဲကောက်စိုက်များ၊ အစေ့ချစက်များအသုံးပြုစိုက်ပျိုးခြင်းများဆောင်ရွက်စေရေး၊ အထွက်တိုးမျိုးစပါးများအသုံးပြုစိုက်ပျိုးစေရေးမှာကြားခဲ့ပြီး တာဝန်ရှိသူများအား တောင်သူများ အဆင်ပြေစွာအသုံးပြုနိုင်မည့် ကောက်စိုက်စက်များထုတ်လုပ်နိုင်ရေး ဆောင်ရွက်သွားရန် လမ်းညွှန်ခဲ့ကြောင်း သတင်းရရှိပါသည်။

DOCA(ဧရာဝတီ)

    ၂၀၂၄ခုနှစ် စက်တင်ဘာလ ပထမပတ်အတွင်း အာလူးသီးနှံ၏ ဈေးနှုန်းများမှာအာလူးအသစ် S ₂  S ₁    တစ်ပိဿာလျှင် ၄၅၀၀ကျပ်မှ ၅၀၀၀ကျပ်အတွင်း အာလူးအသစ် S ₁ OK  တစ်ပိဿာလျှင် ၄၀၀၀ကျပ်၊ OK တစ်ပိဿာလျှင် ၃၅၀၀ကျပ်၊ A ₁A₁ တစ်ပိဿာလျှင် ၂၀၀၀/ ၂၅၀၀ကျပ်အတွင်း၊ ဂေါ်လီတစ်ပိဿာလျှင်၁၀၀၀/ ၁၂၀၀ကျပ်အတွင်း အသီးသီးပေါက်ဈေးရှိကြောင်းစုံစမ်းသိရှိရပါသည်။

    ၂၀၂၄ခုနှစ် ဩဂုတ်လနောက်ဆုံးပတ်နှင့်စက်တင်ဘာလ ပထမပတ်အတွင်း အာလူးသီးနှံ၏ဈေးနှုန်းများမှာ ကွာခြားချက်များစွာမရှိဘဲ ဈေးတန့်နေကြောင်း သိရှိရပါသည်။ အာလူးကုန်အသစ်များ အဝင်များလာသော်လည်း အကြော်သီးဆိုဒ်များဖြစ်သည့် S ₂  S ₁    များသာ ဈေးအနည်းငယ် (၅၀၀ကျပ်ခန့်) သာ မသိမသာဈေးမြင့်လာခဲ့ကြောင်း သိရှိရပါသည်။ဒေသတွင်းစားသုံးမှုနှင့် နယ်ဈေးကွက်အကြိုက် အလတ်ဆိုဒ်များဈေးကွက်ဖြုန်းအားပေါ်မှုတည်၍ ဆက်လက်ဈေးတန့်နေမည်ဟုသုံးသပ်ကြောင်း သိရှိရပါသည်။

DOCA(ရှမ်း)

        မအူပင်မြို့ရှိ (၅-၉-၂၀၂၄)ရက်နေ့တွင်ဖြစ်ပေါ်ခဲ့သော  ဓာတ်မြေဩဇာတစ်အိတ်ဈေးနှုန်းမှာ ယူရီးယား(အာမို) ၈၃၀၀၀ကျပ်၊ ယူရီယား (ဩဘာ) ၇၇၀၀၀ကျပ်၊ ယူရီးယား (ရွှေနဂါး) ၇၈၀၀၀ကျပ်၊ တီစူပါ(သံကွင်း) (တရုတ်) ၁၂၂၀၀၀ကျပ်၊ ပုလဲ(ရွှေတောင်(တရုတ်) ၈၀၀၀၀ကျပ်၊ ရွှေကောမက်(ဩဘာ) ၁၃၀၀၀၀ကျပ်၊ ပိုတက်(အာမို) ၁၃၀၀၀၀ကျပ်၊ ပိုတက်(ဂျာမဏီ)၁၂၀၀၀၀ကျပ်၊ ကွန်ပေါင်း(15,15,15) (အာမို) ၁၅၈၀၀၀ကျပ်၊ ကွန်ပေါင်း ကောမက်(15,15,15) ၁၁၀၀၀၀ကျပ်၊ ကွန်ပေါင်း (18.18.18) (တရုတ်) ၁၄၅၀၀၀ကျပ်ဈေးဖြင့် အရောင်းအဝယ်ပုံမှန်ရှိကြောင်းသိရသည်။

            ယခင်အပတ်ဈေးနှုန်းနှင့်နှိုင်းယှဉ်လျှင် ယူရီးယား(အာမို) ၅၀၀ကျပ်၊ တီစူပါ(သံကွင်း) (တရုတ်) ၂၀၀၀ကျပ်၊ ရွှေကောမက်(ဩဘာ) ၅၀၀၀ကျပ်၊ ကွန်ပေါင်း(15,15,15) (အာမို) ၃၀၀၀ကျပ်ဖြင့် တစ်ပတ်အတွင်း ဈေးနှုန်းအနည်းငယ်မြင့်တက်လာပြီး ကျန်ဓာတ်မြေဩဇာဈေးနှုန်းမှာ ငြိမ်လျက်ရှိကြောင်းသိရှိရပါသည်။

DOCA(ဧရာဝတီ)