ပြည်တွင်းကုန်သွယ်မှုသတင်း

   ဧရာဝတီတိုင်းဒေသကြီး မအူပင်ခရိုင်၊ ပန်းတနော်မြို့နယ်၌ ကြက်ဥအလုံး ၁၀၀ လျှင် ငွေကျပ် ၄၃၀၀၀ အထိ ဈေးကောင်းရရှိလာသဖြင့် မွေးမြူသူ များ    အဆင်ပြေ လာကြောင်းသိရသည်။ ပန်းတနော်မြို့နယ် ကြက်ဥ၊ ဘဲဥ ရောင်းဝယ်ရေးပွဲရုံပိုင်ရှင် ပြောပြချက် အရ သိရသည်။ ပန်းတနော်မြို့နယ်၌ စက်တင်ဘာလက ကြက်ဥအလုံး ၁၀၀ လျှင် ငွေကျပ် ၄၅၀၀၀ အထိသာ ရရှိခဲ့ပြီး လက်ရှိတွင် ကြက်ဥအလုံး ၁၀၀ လျှင် ငွေကျပ် ၄၃၀၀၀ အထိ လက်ကားဈေးနှုန်း ကျဆင်းတည်ငြိမ်လာခြင်းဖြစ်သည်။  

          လက်ရှိပန်းတနော်မြို့နယ်တွင် ‌ရောင်းချနေသော ကြက်ဥ၊ဘဲဥ များသည် မအူပင်မြို့နှင့် ညောင်တုန်းမြို့မှ လည်း မှာယူရောင်းချခြင်းဖြစ်သည်။  ရောင်းချနေသော လက်လီဈေးနှုန်းအနေဖြင့် ကြက်ဥ ၁လုံး ၄၅၀ကျပ်၊ ဘဲဥ တစ်လုံးလျှင် ၅၀၀-၅၅၀ကျပ်ဖြင့် ရောင်းချနေကြောင်း သိရသည်။

DOCA(ဧရာဝတီ)

           မြင်းခြံမြို့နယ်အတွင်းရှိ စည်ပင်သာယာဈေးကြီးတွင် လူသုံးကုန်ပစ္စည်းအမျိုးမျိုး၊ သစ်သီးဝလံဟင်းသီးဟင်းရွက်နှင့် အခြေခံစားသောက်ကုန်အမျိုးမျိုး  ရောင်းချလျက်ရှိကြောင်း၊ ၂၀၂၅ ခုနှစ်၊ အောက်တိုဘာလပထမပတ်တွင် ရောင်းချလျက်ရှိသော အခြေခံစားကုန် လက်လီလက်ကား ဈေးနှုန်းများအနေဖြင့် ပေါ်ဆန်းမွှေးဆန်တစ်ပြည်လျှင် (၆၀၀၀ - ၆၅၀၀) ကျပ်၊ ဆီ(စားအုန်းဆီ) ၁ပိဿာလျှင် (  ၇၇၉၀-၇၅၄၀) ကျပ်၊ ပဲဆီသန့် တစ်ပိဿာလျှင် (၁၅၀၀၀- ၁၄၅၀၀) ကျပ်၊ ကြက်သွန်နီ ၁ ပိဿာလျှင် (၁၁၀၀ - ၁၂၀၀) ကျပ်၊ ကြက်သွန်ဖြူ ၁ ပိဿာလျှင် (၆၀၀၀ - ၅၅၀၀) ကျပ်၊ ဆိတ်သား ၁ ပိဿာလျှင် (၂၃၀၀၀-၂၅၀၀၀) ကျပ်၊ ဝက်သား(သုံးထပ်သား) ၁ ပိဿာလျှင် (၃၀၀၀၀ - ၂၈၀၀၀) ကျပ်၊ အမဲသား ၁ ပိဿာလျှင် (၂၅၀၀၀- ၂၂၀၀၀) ကျပ်၊ ငါးမြစ်ချင်း အကောင်လိုက် ၁ ပိဿာလျှင် (၁၂၀၀၀ - ၁၄၀၀၀) ကျပ်၊ ကြက်သား CP(မွေးမြူရေးကြက်) အကောင်လိုက် ၁ ပိဿာ လျှင်(၁၈၀၀၀ - ၁၈၅၀၀) ကျပ်၊ ကြက်ဥတစ်လုံးလျှင် (၄၅၀-၄၈၀) ကျပ်၊ ဘဲဥတစ်လုံးလျှင် (၆၀၀-၇၀၀)ကျပ်ပေါက်ဈေးများဖြင့် ရောင်းချလျက်ရှိကြောင်း၊ ယခင်စက်တင် ဘာလပထမပတ်နှင့် နှိုင်းယှဉ်ပါက ယခုလတွင် ဆန်ဈေးနှင့် ကြက်ဥ၊ ဘဲဥဈေးများမှာ တည်ငြိမ်လျက်ရှိပြီး စားအုန်းဆီနှင့် ကြက်သား၊ ဝက်သား၊  ဆိတ်သား၊ အမဲသားဈေးများမှာ ဈေးနှုန်းမြင့်တက်ခဲ့၍ ပဲဆီသန့်၊ ကြက်သွန်နီ၊ ကြက်သွန်ဖြူ ဈေးများမှာဈေးနှုန်း ကျဆင်းခဲ့ ကြောင်းသိရှိရသည်။

DOCA(မန္တလေး)

   ဗုဒ္ဓဘာသာမြန်မာလူမျိုးများသည် မိမိတို့နေအိမ်များရှိ ကိုးကွယ်ကြသော မြတ်စွာဘုရား ရုပ်ပွားတော်များအား ဘုရားပန်းအမျိုးမျိုးဖြင့်ကပ်လှူကြရာ သစ္စာပန်းများကိုလည်း ဘုရားပန်း များအဖြစ် လှူဒါန်းပူဇော်ကြကြောင်းသိရှိရသည်။  မြင်းခြံဈေးကွက်တွင်ရောင်းချနေသော ဘုရား ပန်းများကို မန္တလေးတိုင်းဒေသကြီး ပြင်ဦးလွင်မြို့တို့မှ မှာယူ၍ ဒေသတွင်းဖြန့်ဖြူး ရောင်းချ ကြောင်း၊ ၂၀၂၅ခုနှစ်၊အောက်တိုဘာလ ပထမပတ်တွင် အေးမြသီတာဈေးနှင့်မြို့မဈေးတို့တွင် ရောင်းချ နေသောသစ္စာပန်း(၁၀)ခတ်ပါ တစ်စည်းလျှင် (၃၅၀၀-၄၀၀၀)ကျပ်ခန့် ပေါက်ဈေးများဖြင့် ရောင်းချလျက်ရှိကြောင်းသိရှိရသည်။ ၎င်းပန်းသည်ဘုရားပန်းလှူရာတွင် တာရှည်ခံသော၍ ဝယ်ယူမှုများပြားကြောင်း ဘုရားပန်း‌ရောင်းချသူ၏ပြောပြချက်အရသိရှိရသည်။ မြန်မာလူမျိုးများသည်ဘုရားပန်းလှူသလို၊ သစ္စာပန်းများကိုလည်း ပန်းပွဲတော်များ၌ အလှဆင် ရန်မြင်ကွင်းများ၊ ဥယျာဉ်များ၊ ပန်းခြံများနှင့်အလှူမင်္ဂလာပွဲများတွင် လည်းပန်းအလှ ဆင်ခြင်း၊ စီးပွာရေးနှင့်ပတ်သက်သောပွဲများတွင် ပန်းအဆင်အပြင်များ အဖြစ်လည်းအသုံး ပြုကြကြောင်း သိရှိရသည်။

DOCA(မန္တလေး)

ထောပတ်သီးပင်သည် နှစ်ရှည်ပင်အမျိုးအစား အပင်ကြီးမျိုးဖြစ်၍ စိုက်ပျိုးပြီး သုံးနှစ်ကြာမှ အသီးများစတင်သီးကြောင်း၊  မြန်မာနိုင်ငံတွင် ထောပတ်သီးကို              ရှမ်းပြည်နယ်(တောင်ပိုင်းနှင့် မြောက်ပိုင်း)   မန္တလေးတိုင်းဒေသကြီး ပြင်ဦးလွင်၊ကချင်ပြည်နယ်နှင့် ချင်းပြည်နယ်တို့တွင်အဓိက စိုက်ပျိုးထွက်ရှိကြောင်းသိရှိရသည်။ ထောပတ်သီးများထွက်ပေါ်ချိန်မှာ အောက်တိုဘာလမှ ဇန်န ဝါရီလ  အထိဖြစ်ပြီး၊ မျိုးကွဲများအနေဖြင့် ဟာစ်(Hass)၊ဘေးကွန်(Bacon)၊ ဖွတ်(Fuerte)၊ လမ် (Lamb Hass) စသည့်တို့ဖြစ်ကြောင်း၊ ထောပတ်သီးအခွံသည် အစိမ်းရင့်ရောင်ရှိပြီး အဆီဓာတ် ပိုများ၍ ဖောလစ်အက်ဆစ်၊ပိုတက်ဆီယမ်၊အမျှင်ဓာတ်၊များနှင့် Omega-3 ဓာတ် များပါဝင်ပြီး၊ သွေးပေါင်ချိန်ထိန်းချုပ်ရန်၊ ဝမ်းချုပ်မှုမှကာကွယ်ရန်နှင့် ဦးနှောက်ဖွံ့ဖြိုးမှုအတွက် အထောက်အကူ ဖြစ်ကာကင်ဆာနှင့် အဆစ်အမြစ်ရောင်ရမ်းမှုကို ကာကွယ်ပေးကြောင်း၊ ဗီတာမင်အီးကြွယ်ဝ သောကြောင့် အသားအရေကြည်လင်ပြီး နှလုံးကျန်းမာရေးကိုကောင်းမွန်ကြောင်း၊ အာရုံကြော လုပ်ဆောင်မှုနှင့် သွေးကြောများကျန်းမာခြင်းကို အထောက်အကူပြုကြောင်း၊ အမျှင်ဓာတ်ကြွယ်ဝ သောကြောင့် ဝမ်းချုပ်ခြင်းကိုကာကွယ်ပေး၍ ထောပတ်သီးတွင် အာဟာရဓာတ်များစွာပါဝင် ကြောင်းလေ့လာဖတ်ရှု့ရသည်။ ထောပတ်သီးဝယ်ယူလျှင် အညှာအောက်အစိမ်းရောင်ရှိပါက မှည့်ရန်အသီးဖြစ်ပြီးရွေးချယ်ဝယ်ယူသင့်ကြောင်း၊ အသီးကိုလက်ဖဝါးပေါ်တင်၍ ကိုင်ဆကြည့်ပါက အလေးချိန်ပါလျှင် ၎င်းထောပတ်သီးကို ရွေးချယ်ဝယ်ယူသင့်ကြောင်းသိရှိရပြီး၊ မြင်းခြံမြို့၊‌ အေးမြသီတာဈေးတွင် ရောင်းချနေသောထောပတ်သီးတစ်လုံးလျှင် ၅၀၀ ကျပ်မှ ၁၅၀၀ ကျပ်ခန့် ပေါက် ဈေးများဖြင့်ရောင်းချကြောင်း သိရှိရသည်။  

DOCA(မန္တလေး)

      စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့၊ ပိတောက်မြိုင်ဈေးတွင် ဟင်းသီးဟင်းရွက် အမျိုးမျိုးဖြစ်သော  ရုံးပတီသီး၊ မုံလာထုတ်(ခေါ်)ဂေါ်ဖီထုတ်၊ ပန်းဂေါ်ဖီ၊ ဂေါ်ရခါးသီး၊ ခါကြက်ဥ၊ ဘိုစားပဲသီး၊ ရွှေပဲသီး၊ ပဲသီးတောင့်ရှည်၊ ကြက်ဟင်းခါးသီး၊ ကင်းမုံသီး ၊ မျှစ်စိမ်း၊ မျှစ်ပြုတ်၊ ရွှေဖရုံသီး၊ ဘူးသီး၊ ကန်ဇွန်းရွက်၊ ချဉ်ပေါင်ရွက် နှင့် ပဲလင်းမြွေသီး(ခေါ်)ဗုံလုံသီး တို့ကို ရောင်းချနေကြောင်း သိရှိရပါသည်။

          ၂၀၂၅ ခုနှစ်၊ အောက်တိုဘာလ(ဒုတိယပတ်)တွင် ကျွန်းလှမြို့၊ သစ်ရာမြိုင်ဈေး၌ ဖြစ်ပေါ်နေသော ဟင်းသီးဟင်းရွက်အမျိုးမျိုး၏ ဈေးနှုန်းအနေဖြင့် ဂေါ်ရခါးသီး တစ်လုံးလျှင်(၈၀၀/၇၀၀)ကျပ်၊ မုံလာထုတ် တစ်ထုတ်လျှင်(၃၀၀၀/၃၅၀၀)ကျပ်၊ ပန်းဂေါ်ဖီ တစ်ပွင့်လျှင်(၃၀၀၀)ကျပ်၊ ခါကြက်ဥ(ဗမာ) တစ်ပိဿာ လျှင်(၁၀၀၀၀)ကျပ်၊ ခါကြက်ဥ(တရုတ်)တစ်ပိဿာ(၁၅၀၀၀)ကျပ်၊ ကင်ပွန်းချဉ်ရွက် တစ်စီးလျှင်(၂၀၀) ကျပ်၊ ချဉ်ပေါင်ရွက် တစ်ပိဿာ(၁၂၀၀)ကျပ်၊ ကန်ဇွန်းရွက် တစ်စီးလျှင်(၁၀၀)ကျပ်၊ ကြက်ဟင်းခါးသီး တစ်ပြည်လျှင်(၃၈၀၀)ကျပ်၊ ကြက်ဟင်းခါးသီး  ထိုင်ဝမ် တစ်ပိဿာလျှင်(၄၀၀၀)ကျပ်၊ ရွှေဖရုံသီး တစ်ပိဿာလျှင်(၃၀၀၀)ကျပ်၊ ဘူးသီး တစ်လုံးလျှင် (၂၀၀၀)ကျပ် ကင်းမုံသီး တစ်ပြည်လျှင်(၁၅၀၀)ကျပ်၊ ပဲလင်းမြွေသီး တစ်တောင့်လျှင် (၇၀၀/၈၀၀/၅၀၀)ကျပ်၊ မုံညှင်းထုတ် တစ်ပိဿာလျှင်(၈၀၀၀)ကျပ်၊ မယ်ဇလီဖူး နို့ဆီ(၁)ဘူးလျှင်(၄၀၀)ကျပ်၊ခရမ်းသီး တစ်ပိဿာလျှင်(၃၈၀၀)ကျပ်၊ ရုံးပတီသီး တစ်ပိဿာ လျှင်(၂၀၀၀)ကျပ်၊ ပဲသီးတောင့်ရှည်(၅)တောင့်ပါ တစ်စည်းလျှင်(၃၀၀)ကျပ်၊ မျှစ်စိမ်း တစ်ပိဿာလျှင် (၅၀၀၀)ကျပ်၊ မျှစ်ပြုတ် တစ်ပိဿာလျှင်(၆၀၀၀) ကျပ်၊ ငရုပ်သီးစိမ်း တစ်ပိဿာလျှင်(၃၅၀၀)ကျပ်၊ ကုလားအော် ငရုပ်သီးစိမ်း တစ်ပြည်လျှင်(၈၀၀၀)ကျပ်၊ ရိုးရိုးဗမာပြောင်းဖူး တစ်ဖူးလျှင် (၂၅၀/၃၀၀) ကျပ်နှင့် ဘိုစားပဲသီး တစ်ပိဿာလျှင်(၁၂၀၀၀)ကျပ် ဈေးနှုန်းတို့ဖြင့် အရောင်းအဝယ်ဖြစ်နေကြောင်း သိရပါသည်။

DOCA(စစ်ကိုင်း)