ပြည်တွင်းကုန်သွယ်မှုသတင်း

          မိုးရာသီကာလများတွင် မန်ကျည်းသီးအကင်းများ စတင်ထွက်ရှိလာနေပြီး ဖြစ်ပါသည်။ မန်ကျည်းပင်သည် မုန်သုတ်ရာသီတွင်ပေါက်မြောက်သောအပင်ဖြစ်ပြီး၊ မြန်မာနိုင်ငံတွင် အလွန်ပေါများသည့်အတွက် လူတိုင်းမြင်ဖူးကြပါသည်။ မန်ကျည်းပင်သည် အမြဲစိမ်းလန်းသောအပင်ဖြစ်၍ မြန်မာနိုင်ငံအနှံ့အပြားတွင် စိုက်ပျိုးကြသလို အထက်အညာဒေသတွင် မန်ကျည်းပင်ကို အကြီးအကျယ် စိုက်ပျိုး ကြသည်။ လယ်ကွင်းများ၊ ခြံများ၊ ဥယျာဉ်များ၊ ကျွဲနွားစားကျက်များ၌ စိုက်ပျိုးကြပါသည်။

             အလွန်းကြီးခဲသော အပင်မျိုးဖြစ်ပြီး အစေ့မှအလွယ်တကူပေါက်ရောက်နိုင်သော အပင်မျိုးလည်း ဖြစ်ပါသည်။ မန်ကျည်းပင်သည် တစ်ပင်လုံးအသုံးဝင်သောအပင်ဟုဆိုနိုင်သလို၊ အသီးသည်လည်း ဟင်းချက်ရာတွင် အလွန်အသုံးဝင်ပြီး၊ ဆေးဖော်စပ်ရာတွင်လည်းကောင်း၊ အလှကုန်များ ဖော်စပ်ရာတွင်လည်း အသုံးဝင်သောပါသည်။

            ယခုအချိန် ဈေးကွက်အနေဖြင့် ပုသိမ်မြို့အနီးအနားမှ ထွက်ရှိသော မန်ကျည်းသီးအကင်းများကို ရောင်းချနေပြီး ဈေးနှုန်းအနေဖြင့် လက်ကားဈေးနှုန်းမှာ တစ်ပိဿာကို (၁၇၀ဝိ/-)နှုန်း ရောင်းချကြပြီး၊ လက်လီဈေးနှုန်းအနေဖြင့် တစ်ဆယ်သားကို (၂ဝ၀ဝိ/-)နှုန်းဖြင့် ရောင်းချနေကြပါသည်။

DOCA(ဧရာဝတီ)

    ကျွန်းလှမြို့၊ ပိတောက်မြိုင်ဈေးနှင့် သစ်ရာမြိုင်ဈေးများတွင် အသား/ငါးနှင့် အခြားစား‌သောက် ကုန်ပစ္စည်းများ၊ လူသုံးကုန်ပစ္စည်းများကို ရောင်းချလျက်ရှိရာ အသား/ငါး ဈေးနှုန်းများထဲမှ ကြက်သား ဈေးနှုန်းသည်လည်း မြင့်တက်လျက်ရှိပါသည်။

    ကြက်သားများသည် မွေးမြူးရေးကြက်နှင့် ဗမာကြက်ဟူ၍ နှစ်မျိုးရောင်းချရာ  မွေးမြူရေးကြက် အကောင်များကိုဒေသတွင်းနှင့် ရွှေဘိုမြို့တို့မှ ဖောက်သည်ဝယ်ယူရောင်းချလျက်ရှိရာ ကြက်သား ဈေးနှုန်းများမှာ ၂၀၂၅ ခုနှစ်၊ ဇူလိုင်လ တတိယပတ် မွေးမြူရေးကြက်သားဈေးနှုန်း လက်လီဈေး (၂၅၀၀၀)ကျပ်၊ လက္ကားဈေး(၂၃၀၀၀)ကျပ်၊ ဗမာကြက်သား ဈေးနှုန်း လက်လီဈေး (၃၃၀၀၀)ကျပ်၊ ကြက်မြစ် ကြက်သဲ တစ်ပိဿာလျှင်(၂၅၀၀၀)ကျပ်နှင့် ကြက်အရိုးအစုံဖြစ်သည့် လည်ပင်းရိုး၊ တောင်ပံရိုး၊ ခြေထောက်ရိုးတို့၏ ဈေးနှုန်းအနေဖြင့်  တစ်ပိဿာလျှင် လက်လီဈေး (၁၈၀၀၀)ကျပ် ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း ကြက်သားကို ထမင်းဆိုင်များ၊ စားသောက်ဆိုင်များနှင် အကင်ဆိုင်များမှ အများဆုံးအသုံးပြုကြသည့်အတွက် ရောင်းအားကောင်းလျက်ရှိပါကြောင်း  ကြက်သားရောင်းချသူထံမှ သိရှိရပါသည်။

DOCA(စစ်ကိုင်း)

      ကျွန်းလှမြို့တွင်  ကုန်မျိုးစုံရောင်းဝယ်ရေးဆိုင်များနှင့် မြို့တွင်းရပ်ကွက်ဈေးများတွင် ကျောက်ဖရုံ ယိုများကို ရွှေဘိုမြို့နှင့်မန္တလေးမြို့တို့မှ မှာယူရောင်းချလျက်ရှိကြောင်း သိရှိရပါသည်။

     ၂၀၂၅ ခုနှစ်၊ ဇူလိုင်လ တတိယပတ်အတွင်း ကျွန်းလှမြို့ပေါ်ရပ်ကွက်ဈေးများအတွင်း ကုန်မျိုးစုံ ရောင်းချသည့်ဆိုင်များတွင် ဖြစ်ပေါ်နေ‌သော ကျောက်ဖရုံယို ဈေးနှုန်းအနေဖြင့် ကျောက်ဖရုံယို တစ်ပိဿာလျှင်(၁၂၀၀၀)ကျပ်၊ ကျောက်ဖရုံယို(၅၀)ကျပ်သားလျှင်(၆၀၀၀)ကျပ်နှင့် ကျောက်ဖရုံယို(၂၅) ကျပ်သားလျှင်(၃၀၀၀)ကျပ် ဈေးနှုန်းတို့ဖြင့်လည်းကောင်း ချစ်တီးမုန့် ဈေးနှုန်းအနေဖြင့် ချစ်တီးမုန့်  လက္ကား တစ်ပိဿာလျှင်(၁၆၀၀၀)ကျပ်၊ ချစ်တီးမုန့် လက်လီတစ်ပိဿာလျှင်(၁၈၀၀၀)ကျပ်၊ ချစ်တီးမုန့် (၅၀)ကျပ်သားလျှင်(၉၀၀၀)ကျပ်နှင့် ချစ်တီးမုန့်(၂၅)ကျပ်သားလျှင်(၄၅၀၀)ကျပ်ဈေးနှုန်းတို့ဖြင့် ရောင်းချ လျက်ရှိကြောင်း ကျောက်ဖရုံယိုကို ဒံပေါက်ဖောက်ရာတွင်လည်းကောင်း၊ နနွင်းမကင်း ဖုတ်ရာတွင် လည်း ကောင်း၊ ထိုးမုန့်ထိုးရာတွင်လည်းကောင်း၊ ရွှေရင်အေး၊ ဖာလူဒါတို့ထဲတွင် ထည့်သုံးသည့်အတွက် ဈေးကြီး သော်လည်း ရောင်းအားကောင်းလျက်ရှိကြောင်း  ကျွန်းလှမြို့ ကုန်မျိုးစုံရောင်းချနေသည့် လုပ်ငန်းရှင်များ ထံမှ သတင်း ရရှိပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူမြို့နယ်တွင် ပန်းမျိုးစုံရောင်းချခြင်းလုပ်ငန်းများ လုပ်ကိုင်ကြ ရာနှင်းဆီပန်း၊ နှင်းပန်း၊ ဂန္ဓမာပန်း၊ အောင်သပြေပန်း၊ အာစီယံသပြေပန်း၊ စံပါယ်ပန်း၊ ဇွန်ပန်း၊ စသည်တို့ကို စိုက်ပျိုးရောင်းချလျက်ရှိကြောင်း သိရှိရပါသည်။

    ၂၀၂၅ ခုနှစ်၊ ဇူလိုင်လ တတိယပတ်အတွင်း ကန့်ဘလူမြို့မဈေး၌ ဖြစ်ပေါ်နေသော နှင်းပန်း ဈေးနှုန်းအနေဖြင့် နှင်းပန်းတစ်စီးလျှင် (၈၀၀)ကျပ်နှင့် နှင်းပန်း(၃)စီးလျှင်(၂၂၀၀)ကျပ်ဖြင့်လည်းကောင်း ၊ပန်တိမ်ငို  အခက်ကြီးတစ်ခက်လျှင်(၃၀၀)ကျပ်၊ (၃)ခက်တစ်စည်းလျှင်(၉၀၀)ကျပ်၊ ပန်တိမ်ငိုပန်း(၁၀) စည်းလျှင်(၈၀၀၀)ကျပ်နှုန်းဖြင့်  အရောင်းအဝယ်ဖြစ်လျက်ရှိကြောင်း၊ ပန်းထိမ်းငိုပန်းသည် အထားခံ သည့်အပြင် လှပသည့်အသွင်သဏ္ဍာန်ကြောင့် လူကြိုက်များကာ အရောင်းသွက်လျက်ရှိကြောင်း ပန်းရောင်းချသူများထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် ဒေသအတွင်းမှ ထွက်ရှိသည့်မျှစ်များကို မျှစ်စိမ်းနှင့် မျှစ်ပြုတ်အဖြစ်ရောင်းချသလို မျှစ်ချဉ်သိပ်၍ သိုလှောင်ထားကြပြီး ဈေးကွက်အတွင်းသို့ ရောင်းချလျက်ရှိကြောင်း သိရသည်။

      ၂၀၂၅ ခုနှစ်၊ ဇူလိုင်လ တတိယပတ်အတွင်း ကန့်ဘလူမြို့မဈေး၌ ဖြစ်ပေါ်နေသော မျှစ်ချိုနှင့် မျှစ်ချဉ်ဈေးနှုန်းမှာ မျှစ်ချို တစ်ပိဿာလျှင်(၇၀၀၀)ကျပ်၊ (၅၀)ကျပ်သားလျှင်(၃၅၀၀)ကျပ်နှင့် မျှစ်ချဉ် တစ်ပိဿာလျှင်(၅၃၀၀)ကျပ်၊ (၅၀)ကျပ်သားလျှင်(၂၇၀၀)ကျပ်နှင့် (၁၀)ကျပ်သားလျှင်(၅၅၀)ကျပ်ဖြင့် ရောင်းချလျက်ရှိကြောင်း၊ ယခုလိုမိုးရာသီတွင် မျှစ်များလှိုင်လှိုင်ပေါ်နေသောကြောင့် နောက်နှစ်အတွက် မျှစ်ခြောက်လှန်းအတွက် ဝယ်ယူကြသလို၊ မျှစ်ချဉ်ပြုလုပ်ရန်အတွက် ဝယ်ယူကြသည့်အတွက် မျှဉ်ချိုသည် အရောင်းအဝယ်သွက်လျက်ရှိကြောင်း၊ မျှစ်ချဉ်သည် မျှစ်ချိုရှားပါးလာသည့်အချိန်၌သာ အရောင်းသွက်လေ့ရှိကြောင်း မျှစ်ချိုနှင့် မျှစ်ချဉ် အရောင်းဆိုင်များမှ သတင်းရရှိပါသည်။ 

DOCA(စစ်ကိုင်း)