ပြည်တွင်းကုန်သွယ်မှုသတင်း

   ပြည်ဈေးကွက်သို့ ထောပတ်သီးများ ရှမ်းပြည်နယ် လားရှိုး၊ တောင်ကြီးဘက်နှင့် မိုးကုတ်မြို့တို့မှ ဝင်ရောက်မှုရှိပြီး အောက်တိုဘာဆန်းတွင် ပိုမိုဝင်ရောက်မှုရှိလာပါသည်။ ယခင် ဝင်ရောက်မှုနည်းပြီး ယခုအချိန်တွင် တစ်ပတ်လျှင် အလုံးကြီး ၇၀ ပါခြင်းတောင်း ၃ တောင်းနှင့် အလုံးသေး ၁၀၀ ပါခြင်းတောင်း ၂တောင်းခန့် ဝင်ရောက်မှုရှိကြောင်း သိရပါသည်။

   ထောပတ်သီးပင်သည် နှစ်ရှည်သီးနှံပင်ဖြစ်ကာ စတင်စိုက်ပျိုးပြီး (၃)နှစ်အကြာတွင် အသီးသီးပြီး အပင်ကြီးအမျိုးအစားဖြစ်၍ ထောပတ်သီးသည် မမှည့်ခင် အစိမ်းရင့်ရောင်ရှိပြီး မှည့်သောအခါ အညိုပုပ်ရောင် (သို့) အမည်းရောင်သန်းလာပါသည်။ ထောပတ်သီး၏အရသာမှာ စိမ့်၍ အနည်းငယ်အီသော အရသာရှိကာ ထောပတ်သီးကို ဖျော်ရည်၊ ရေခဲမုန့်၊ ပူတင်း၊ ကိတ်မုန့်၊ ဂျယ်လီ၊ အသုပ်စသည်တို့ပြုလုပ် စားသုံးကြပြီး သဘာဝအတိုင်း ဆားအနည်းငယ်ထည့်၍ စားသုံးပါက ကျန်းမာရေးနှင့် ပိုမိုညီညွတ်ကြောင်းလည်း သိရပါသည်။ ထောပတ်သီးကို စားသုံးခြင်းဖြင့် ခေါင်းလိမ်းဆီ၊ ခေါင်းလျှော်ရည်၊ မျက်နှာသစ်ဆပ်ပြာ၊ ကိုယ်တိုက်ဆပ်ပြာ၊ မျက်နှာပေါင်းတင်ကပ်ခွာ စသည်ဖြင့် အလှအပရေးရာပစ္စည်းများတွင်လည်း ထည့်သွင်း အသုံးပြုလျက်ရှိကြောင်း သိရပါသည်။

      ပြည်ဈေးကွက်ရှိ ထောပတ်သီးဈေးနှုန်းများမှာ လက်လီစည်ပင်သာယာဈေးများနှင့် လက်လီ အသီးဆိုင်များတွင် တစ်လုံးလျှင် အလုံးကြီး ၁၀၀၀ကျပ်၊ အလုံးသေး ၈၀၀ကျပ် တို့ဖြင့် ရောင်းချလျက်ရှိပြီး ထောပတ်သီးလှိုင်လှိုင်ပေါ်ချိန် နိုဝင်ဘာနှင့် ဒီဇင်ဘာလများတွင် အလုံးကြီး တစ်လုံးလျှင် ကျပ် ၅၀၀ခန့်နှင့် ယခင်နှစ်က ဝယ်ယူစားသုံးရကြောင်း စားသုံးသူတစ်ဦး၏ ပြောကြားချက်အရ သိရပါသည်။ ပြည်မြို့တွင် Online ပေါ်တွင်ရောင်းချသောဈေးမှာ အလုံးအကြီးအသေးအရော တစ်ပိဿာလျှင် ကျပ် ၃၅၀၀ခန့်ရှိကြောင်း သိရပါသည်။

DOCA(ပဲခူး)

      အောက်တိုဘာလဆန်းပိုင်း ပြည်ပဲမျိုးစုံဈေးကွက်တွင် လက်လီ/လက်ကားပဲမျိုးစုံ ရောင်းဝယ်လျက်ရှိကြရာတွင် ပြည်ပဝယ်လက် အဓိကပဲများဖြစ်သည့် မတ်ပဲ၊ ပဲတီစိမ်း၊ ပဲစင်းငုံ ပဲများမှာ မတ်ပဲနှင့် ပဲတီစိမ်းသီးနှံ နေ့စဉ် အရောင်းအဝယ်ဖြစ်သော်လည်း ပဲစင်းငုံသီးနှံအနေဖြင့် ပဲလက်ကျန် အဟောင်း အနည်းငယ်ရှိမှုအပေါ် နေ့စဉ်အရောင်းအဝယ်မဖြစ်ဘဲ ရက်ခြားသာ ရန်ကုန်ဝယ်လက် အဝယ်ရှိကြောင်း သိရပါသည်။ ဒါကြောင့် အရောင်းအဝယ်ဖြစ်သည့်ရက်၌ အိတ် ၂၀၀/၃၀၀ကျော် အရောင်းအဝယ်ဖြစ်ခဲ့ကြပါသည်။ ပဲစင်းငုံသီးနှံ၏ နှစ်အလိုက် ကာလတူအချိန် အရောင်းအဝယ် ဖြစ်ခဲ့သော ဈေးနှုန်းများကို အောက်ပါအတိုင်းတွေ့ရှိရပါသည်-

နှစ်အလိုက်ဈေးနှုန်းနှိုင်းယှဉ်မှု (တစ်တင်းဈေးနှုန်း)

          ခုနှစ်                                အနိမ့်                               အမြင့်

          ၂၀၂၀                               ၂၉၀၀၀ ကျပ်                     ၃၀၀၀၀ ကျပ်

          ၂၀၂၁                               ၄၅၀၀၀ ကျပ်                     ၄၇၀၀၀ ကျပ်

          ၂၀၂၂                                ၆၀၀၀၀ ကျပ်                     ၆၂၀၀၀ ကျပ်

          ၂၀၂၃                               ၉၃၀၀၀ ကျပ်                     ၉၅၀၀၀ ကျပ်

          အထက်ဖော်ပြပါ ဈေးနှုန်းဇယားအရ ပဲစင်းငုံသီးနှံ၏ နှစ်အလိုက်ဈေးနှုန်းများကို လေ့လာကြည့်မည်ဆိုလျှင် ရှေ့(၃)နှစ်ခန့် ၂၀၂၀ ခုနှစ် ပဲဈေးကွက်၌ ဈေးအနိမ့်ဖြင့် မတ်ပဲ၊ ပဲတီစိမ်း သီးနှံများ ထက်လည်းဈေးလျော့သလို အခြားပဲများထက်လည်း ဈေးလျော့နည်းခဲ့တာကြောင့် တစ်တင်း ၂၉၀၀၀ ကျပ်၊ ၃၀၀၀၀ ကျပ် ခန့်သာရောင်းဝယ်မှုဖြစ်ခဲ့ပါသည်။ ၂၀၂၁ ခုနှစ်မှစ၍ ဈေးအနည်းငယ် မြင့်လာသော်လည်း မတ်ပဲသီးနှံဈေးကို မမှီဘဲ တစ်တင်း ၄၅၀၀၀ ကျပ် မှ ၄၇၀၀၀ ကျပ်ထိ ရောင်းဝယ်မှုဖြစ်ခဲ့ကာ ၂၀၂၂ ခုနှစ်မှာတော့ ပဲစဉ်းငုံသီးနှံဈေးမြင့်တက်မှုရှိလာသည့်အတွက်  တစ်တင်း ၆၀၀၀၀ ကျပ်မှ ၆၂၀၀၀ကျပ်ထိ ရရှိလာခဲ့ပါသည်။ ယခု ၂၀၂၃ ခုနှစ်တွင်တော့ ပဲဈေးကွက်မှာ ပဲသစ်ပေါ်စအချိန် ဇန်နဝါရီ၊ ဖေဖော်ဝါရီလကတည်းက ၆၉၀၀၀ ကျပ်ဖြင့် အရောင်းအဝယ်ဖြစ်ခဲ့ရာမှ ပဲအဝင်လှိုင်ချိန်တွင်လည်းဈေးအမြင့်ဖြင့်သာ ဆက်လက် အရောင်းအဝယ်ဖြစ်ခဲ့ကြပါသည်။ သင်္ကြန်ပြီးကာလမှစ၍ ပဲဈေးနှုန်းများတရိပ်ရိပ်မြင့်တက်လာပြီး မေလအတွင်း ပဲစင်းငုံ တစ်တင်း ၈၅၀၀၀ ကျပ်ဖြင့် ရောင်းဝယ်နေရသလို ဇွန်လအတွင်းမှာတော့ ပြည်ပဝယ်လိုအားနှင့် ငွေဈေးအတက်အကျပေါ်မူတည်၍ ပဲစင်းငုံသီးနှံဟာ ဈေးကွက်အတွင်းစံချိန်တင်ဈေးအမြင့်ဖြင့် မတ်ပဲသီးနှံထက် ဈေးပိုကာ တစ်တင်း ၁၀၅၀၀၀ ကျပ်ထိရရှိလာခဲ့ပါသည်။ သို့သော်လည်း လက်ကျန်ပဲ အချို့သာရှိသည့်အတွက် အရောင်းအဝယ်ပမာဏကတော့ ရန်ကုန်ဝယ်လက်ပေါ်မူတည်၍ အိတ် ၂၀၀/၃၀၀ ရက်ခြားရောင်းဝယ်မှုဖြစ်ခဲ့ကြပါသည်။ ဇူလိုင်လဆန်းပိုင်းမှစ၍ ပဲဈေးပြန် လျော့သွားတာကြောင့် ပဲတစ်တင်း ၉၇၀၀၀ကျပ်ဖြင့် ရောင်းဝယ်နေခဲ့ရာ ယခု အောက်တိုဘာလဆန်းမှာတော့ တစ်တင်း ၉၃၀၀၀ကျပ်ဖြင့် လက်ကျန်လှောင်ပဲအချို့ အရောင်းအဝယ်ဖြစ်ခဲ့သည်ဟု သိရပါသည်။ ပဲစင်းငုံသီးနှံသည် ပြည်ခရိုင်အတွင်း မတ်ပဲသီးနှံကဲ့သို့ စိုက်ဧကမများဘဲ စိုက်ဧက တစ်သောင်းကျော်သာ စိုက်ပျိုးမှုရှိလို့ ပဲဈေးကွက်အတွင်း မတ်ပဲသီးနှံကဲ့သို့ ဝင်ရောက်မှုအနေဖြင့် ပဲအဝင်အထွက် သိပ်မများဘဲ ပဲထွက်ပေါ်ချိန်ကာလတွင်သာ ဈေးကွက်သို့ နေ့စဉ်အဝင်ရှိပြီး ကျန်ကာလများမှာတော့ လက်ကျန်လှောင်ပဲများဖြင့်သာ အရောင်းအဝယ်ဖြစ်ကြသည်ဟု သိရပါသည်။ ပြည်ခရိုင်အတွင်းရှိ(၄)မြို့နယ်၌ ပေါက်ခေါင်းနှင့် ပန်းတောင်းမြို့နယ်တွင် အဓိက စိုက်ပျိုးပြီး ကျန်မြို့နယ်များဖြစ်သော ရွှေတောင်နှင့် ပြည်မြို့နယ်တို့တွင် စိုက်ဧကထောင်ဂဏန်း အထိ စိုက်ပျိုးနိုင်ခြင်းမရှိဘဲ မတ်ပဲနှင့် ပဲတီစိမ်းကိုသာ စိုက်ပျိုးမှုပိုများကြောင်း သိရှိရပါသည်။

DOCA(ပဲခူး)

   ၂၀၂၃ ခုနှစ် ၊ အောက်တိုဘာလ (၁၄)ရက်နေ့ နံနက် (၆:၀၀)နာရီအချိန်တွင် ကရင်ပြည်နယ်၊ ဘားအံမြို့ရှိ အမှတ်(၃)ရပ်ကွက်တွင် ကမ်းနားလမ်းအခွန်လွတ်ဈေးကို စတင်ဖွင့်လှစ်ခဲ့ပါသည်။ ထိုကမ်းနားလမ်းအခွန်လွတ်ဈေးတွင် ကရင်ပြည်နယ်ဆန်လုပ်ငန်းရှင်ဆန်ကုန်သည်များအသင်းမှ သက်သာသောဈေးနှုန်းဖြင့် ဆန်များရောင်းချပေးလျက်ရှိကြောင်းနှင့် အဆိုပါအခွန်လွတ်ဈေးတွင် ကရင်ပြည်နယ်ဆန်ကုန်သည်များနှင့် ဆန်လုပ်ငန်းရှင်များ အသင်းမှ ဈေးကားဖြင့် ဆန် (၁) ပြည်ကို (၂၇၀၀) ကျပ်နှုန်းဖြင့် လူတစ်ဦးလျှင် (၄)ပြည်နှုန်းဖြင့် မြေပြင်ပေါက်ဈေးထက် သက်သာသောဈေးနှုန်းဖြင့် ဖြန့်ဖြူးရောင်းချပေးလျက်ရှိကြောင်း သိရသည်။ အဆိုပါ အခွန်လွတ်ဈေးကို ယခင်က အမှတ် (၃) ရပ်ကွက်၊ကန်သာယာတွင်ဖွင့်လှစ် ရောင်းချခဲ့ခြင်းဖြစ်ပြီး၊(၁၄.၁၀.၂၀၂၃)ရက်နေ့မှစ၍ အခွန်လွတ်ဈေးကို ကမ်းနားလမ်းသို့ ပြောင်းလဲဖွင့်လှစ်ခြင်းဖြစ်ကြောင်း သိရသည်။

DOCA(ကရင်)

    ပြည်ခရိုင်၊ ပြည်မြို့ရှိ ၂၀၂၃ခုနှစ်၊ အောက်တိုဘာလ ဒုတိယအပတ်တွင် အခြေခံစားသောက်ကုန်ဈေးနှုန်းများဖြစ်သည့် ဧည့်မထဆန်တစ်ပြည်လျှင် ၃၀၀၀ကျပ်၊ နှမ်းဆီတစ်ပိဿာလျှင် ၁၂၅၀၀ကျပ်နှင့် စားအုန်းဆီတစ်ပိဿာလျှင် ၄၇၀၀ကျပ်၊ စားဖိုဆောင်သုံးသီးနှံများဖြစ်သည့် ငရုတ်သီးခြောက် (အရှည်၊ အပု) တစ်ပိဿာလျှင် ၁၈၀၀၀ကျပ်၊ ကြက်သွန်နီတစ်ပိဿာလျှင် ၃၄၀၀ကျပ်၊ ကြက်သွန်ဖြူကြူကုတ်တစ်ပိဿာလျှင် ၈၀၀၀ကျပ်၊ ရှမ်းတစ်ပိဿာလျှင် ၁၀၀၀၀ကျပ်၊ ချင်းတစ်ပိဿာလျှင် ၆၀၀၀ကျပ်၊ ကုလားပဲခြမ်းတစ်ပိဿာလျှင် ၆၅၀၀ကျပ်၊ အာလူးတစ်ပိဿာလျှင် ၂၈၀၀ကျပ် နှင့်မန်ကျည်းသီးမှည့်တစ်ပိဿာလျှင် ၆၀၀၀ကျပ်ဖြင့်ရောင်းချလျက်ရှိပြီး အသားငါးဈေးများအနေဖြင့် အမဲသားတစ်ပိဿာလျှင် ၁၅၀၀၀ကျပ်၊ ဝက်သားတစ်ပိဿာလျှင် ၂၀၀၀၀ကျပ်၊ ဆိတ်သားတစ်ပိဿာလျှင် ၂၅၀၀၀ကျပ်၊ ငါးကြင်းဖြူတစ်ပိဿာလျှင် ၁၈၀၀၀ကျပ်၊ ငါးမြစ်ချင်းတစ်ပိဿာလျှင် ၁၃၀၀၀ကျပ်၊ ပုစွန်တစ်ပိဿာလျှင် ၂၅၀၀၀ကျပ်ဖြင့် ရောင်းချလျက်ရှိပါသည်။ ဈေးကွက်အနေဖြင့် စားသုံးဆီ၊ ဆန်ဈေးနှုန်းများမှာ အတက်အကျမရှိဘဲ စားဖိုဆောင်သီးနှံဖြစ်သည့် ကြက်သွန်နီမှာ ယခင်အောက်တိုဘာလ ပထမအပတ်တွင် ၃၀၀၀ကျပ်မှ ယခုအောက်တိုဘာလ ဒုတိယအပတ်တွင် ၃၄၀၀ကျပ်ဖြင့် အရောင်းအဝယ်ရှိပြီး ဈေးအနည်းငယ်မြင့်တက်နေကြောင်းသိရှိရပါသည်။

DOCA(စစ်ကိုင်း)

   စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကအားထားလုပ်ကိုင်သော ဒေသတစ်ခုဖြစ်သည်။ သီးနှံစိုက်ပျိုးရာတွင် အထွက်နှုန်းများပိုမိုကောင်းမွန်စေရေးအတွက် စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးများကို စိုက်ပျိုးသူတောင်သူများ ဝယ်ယူအသုံးပြုလျက်ရှိကြသည်။

      ကန့်ဘလူခရိုင်အတွင်းရှိ စိုက်ပျိုးသူတောင်သူများ ဝယ်ယူအသုံးပြုလျက်ရှိသော စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးများ၏ အောက်တိုဘာလ ဒုတိယအပတ်အတွင်း ဖြစ်ပေါ်ခဲ့သောဈေးနှုန်းများမှာ ပန်းဖူး (50)kg တစ်အိတ်လျှင် (၈၇၀၀၀)ကျပ်၊ မျှားကမ္ဘာ (50)kg တစ်အိတ်လျှင် (၇၇၀၀၀)ကျပ်၊ ကွန်ပေါင်း (10:10:5) (50)kg တစ်အိတ်လျှင် (၇၇၀၀၀)ကျပ်၊ ကွန်ပေါင်း (15:15:15) (50)kg တစ်အိတ်လျှင် (၁၆၀၀၀၀)ကျပ်၊ ပိုတက် (50)kg တစ်အိတ်လျှင် (၁၄၈၀၀၀)ကျပ်နှင့် ရွှေတောနစ် (၅၀၀)စီစီတစ်ဘူးလျှင် (၁၁၀၀၀)ကျပ်၊ မိုရယ်လ်မုန်း (၅၀၀)စီစီတစ်ဘူးလျှင် (၂၅၀၀၀) ကျပ်၊ ဟတ်ကာ(၅၀၀)စီစီတစ်ဘူးလျှင် (၂၄၅၀၀)ကျပ်၊ AP ဇာပြာ (၅၀၀)စီစီတစ်ဘူးလျှင် (၂၁၅၀၀)ကျပ်ဖြင့်ရောင်းချလျက်ရှိကြောင်း စိုက်ပျိုးရေးသုံးဆေးနှင့် ဆေးပစ္စည်းရောင်းချသည့် လုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)