ကန့်ဘလူမြို့နယ်၌ မြန်မာ့ရိုးရာရက်ကန်းလုပ်ငန်းလုပ်ကိုင်ခြင်းဖြင့် ဝင်ငွေရရှိ
မြန်မာ့ရိုးရာရက်ကန်းအထည်အလိပ်များသည် နိုင်ငံ၏ယဉ်ကျေးမှု၊ ကြွယ်ဝမှုနှင့် ရာစုနှစ်များစွာရှိ လက်မှုပညာကိုရောင်ပြန်ဟပ်ကာ စွဲမက်ဖွယ်ကောင်းသော ဆွဲဆောင်မှုတစ်ခုဖြစ်သည်။ ချည်ထည်တစ်ခုစီသည် ရိုးရာ၊ သမိုင်းနှင့် ကျွမ်းကျင်မှုဆိုင်ရာ ဇာတ်လမ်းတစ်ပုဒ်ကိုသရုပ်ဖော်ထားပြီး ယင်းအထည်များမှာ မြန်မာ့အမွေအနှစ်၏ အရေးပါသော အစိတ်အပိုင်းတစ်ခုဖြစ်လာစေပါသည်။
မြန်မာ့ရိုးရာရက်ကန်းအထည်အလိပ်များသည် ယဉ်ကျေးမှုပွဲတော်များနှင့် ဘာသာရေးအခမ်းအနားများတွင် အဓိကအခန်းကဏ္ဍ၌ ပါဝင်လျက်ရှိပါသည်။ ပွဲတော်များနှင့် မင်္ဂလာဆောင်များအတွင်း လူများသည် ၎င်းတို့၏အနုစိပ်ဆုံးနှင့် အရောင်အသွေးစုံလင်သော ဝတ်စုံများကိုဝတ်ဆင်ကြပြီး ပျော်ရွှင်စရာကောင်းသော လူမှုဆက်ဆံရေးကိုထင်ဟပ်စေပါသည်။
ယခုအခါ ကန့်ဘလူမြို့နယ်အတွင်းရှိ မြို့ပေါ်နှင့် ကျေးရွာများတွင် ရက်ကန်းလုပ်ငန်းကိုလုပ်ကိုင်လျက်ရှိပြီး ရက်ကန်းလုပ်ငန်းလုပ်ကိုင်ရာတွင် မိမိတို့ကိုယ်ပိုင်လုပ်ငန်းတစ်ခုအဖြစ် လုပ်ကိုင်ကြပြီး တချို့မှာ နေ့စားအနေဖြင့် လုပ်ကိုင်သူများလည်းရှိကြပါသည်။ ရက်ကန်းထည်များ၏ဈေးနှုန်းများမှာ ချည်အမျိုးအစားနှင့် ဒီဇိုင်းဆန်းသစ်လှပမှုအပေါ်မူတည်၍ ဈေးနှုန်းများလည်းကွဲပြားမှုရှိပြီး အနိမ့်ဆုံး ကျပ် (၂၀၀၀၀) မှ အမြင့်ဆုံး ကျပ်(၂၀၀၀၀၀)ကျော်အထိရောင်းချရ ကြောင်း၊ ရက်လုပ်ပြီးသော ရက်ကန်းထည်များကို ကန့်ဘလူမြို့ပေါ်ရှိ ရက်ကန်းထည်ဝယ်ယူသည့် ဒိုင်ကြီးများသို့ရောင်းချသကဲ့သို့ မြစ်ကြီးနား၊ ရွှေဘိုနှင့် မန္တလေး အစရှိသည့် မြို့ကြီးများသို့လည်းတင်ပို့ရောင်းချကြောင်း၊ ရက်ကန်းလုပ်ငန်းကိုလုပ်ကိုင်ရသည့်အတွက် မိသားစုဝင်ငွေရရှိနေကြောင်း၊ မြန်မာ့ရိုးရာလက်မှုပညာကို လက်ဆင့်ကမ်းထိန်းသိမ်းရာရောက်သည့်အတွက် ဂုဏ်ယူဝမ်းမြောက်စွာ ဆက်လက်လုပ်ကိုင်ဆောင်ရွက်သွားမည်ဖြစ်ကြောင်း ရက်ကန်းလုပ်ငန်းလုပ်ကိုင်သူတစ်ဦးထံမှသိရပါသည်။
DOCA(စစ်ကိုင်း)
