ပြည်တွင်းကုန်သွယ်မှုသတင်း

    ပြည်ကုန်စည်ဒိုင်သည် ပြည်မြို့တွင်ရှိပြီး ဆန်စပါးနှင့်ပဲမျိုးစုံကိုအဓိကထား၍ အရောင်းအဝယ်ပြုလုပ်လျက်ရှိသောမြို့ဖြစ်ပါသည်။ နိုင်ငံခြားသို့တင်ပို့သော မတ်ပဲ၊ ပဲတီစိမ်းနှင့် ပဲစဉ်းငုံတို့အပြင် မြို့တွင်းအဝယ်ရှိသော စားတော်ပဲ၊ ကုလားပဲ၊ ဘိုကိတ်ပဲ၊ ပဲကြီးသီးနှံများကိုလည်း ကုန်စည်ဒိုင်တွင် ရောင်းဝယ်လျက်ရှိပါသည်။

မတ်ပဲ

     ၂၀၂၃ခုနှစ်၊ စက်တင်ဘာလ စတုတ္တအပတ်တွင် မတ်ပဲတစ်တင်းလျှင် ၈၂၅၀၀ကျပ်ဖြင့် ရန်ကုန်အဝယ်တစ်ရက် အိတ်၂၀၀ခန့်အဝယ်ရှိပါသည်။ အောက်တိုဘာလ ပထမအပတ်တွင် မတ်ပဲဈေးကျပြီး ပဲတစ်တင်းလျှင် ၈၁၅၀၀ကျပ်ဖြင့် တစ်ရက် အိတ်၁၅၀ခန့် ရန်ကုန်အဝယ်ရှိပါသည်။

ပဲစဉ်းငုံ

    စက်တင်ဘာလ စတုတ္တအပတ်တွင် ပြည်ကုန်စည်ဒိုင်၌ ပဲစင်းငုံတစ်တင်းလျှင် ၉၃၀၀၀ကျပ်ဖြင့် ဈေးအေးလျက်ရှိပြီး တစ်ခါတစ်ရံ၌ ရန်ကုန်အဝယ်ရှိကာ အရောင်းအဝယ်ရှိသောနေ့တွင် အိတ်၂၀၀ခန့်အရောင်းအဝယ်ဖြစ်ပါသည်။ အောက်တိုဘာလ ပထမအပတ်တွင် ပဲစဉ်းငုံတစ်တင်းလျှင် ၉၃၀၀၀ကျပ်ဖြစ်ပြီး အဝယ်ရှိသောနေ့တွင် အိတ်၁၅၀ခန့်အရောင်းအဝယ်ဖြစ်ပါသည်။

ကုလားပဲ

  ပြည်ကုန်စည်ဒိုင်၌ စက်တင်ဘာလ စတုတ္တအပတ်တွင် ကုလားပဲ (HL)တစ်တင်းလျှင် ၉၄၀၀၀ကျပ်၊ မြကြေးမှုံတစ်တင်းလျှင် ၉၄၀၀၀ကျပ်ဖြင့် မြို့တွင်းခွဲစက်သမားများနှင့် နယ်စုံအဝယ်ရှိပြီး တစ်ရက် အိတ် (၃၀၀-၃၅၀) ခန့်အဝယ်ရှိပါသည်။ အောက်တိုဘာလ ပထမအပတ်တွင် ကုလားပဲ (HL) တစ်တင်းလျှင် ၉၃၅၀၀ကျပ်၊ မြကြေးမှုံတစ်တင်းလျှင် ၉၃၅၀၀ကျပ်ဖြင့် မြို့တွင်းနှင့် ရန်ကုန်အဝယ်တစ်ရက် အိတ်၃၀၀ခန့်အဝယ်ရှိပါသည်။

ပဲကြီး

     ပြည်ကုန်စည်ဒိုင်၏ စက်တင်ဘာလ စတုတ္တအပတ်တွင် ပဲကြီး(ကုန်းပဲ)တစ်တင်းလျှင် ၁၀၃၀၀၀ကျပ်၊ ပဲကြီး(ရွှေကျွန်း)တစ်တင်းလျှင် ၁၀၅၀၀၀ကျပ်ဖြင့် မြို့တွင်းပဲကြော်သမားများ၏ အဝယ်တစ်ရက်လျှင် အိတ် (၃၀၀-၄၀၀) ခန့်ရှိပါသည်။ အောက်တိုဘာလ ပထမအပတ်တွင် ပဲကြီး(ကုန်းပဲ) တစ်တင်းလျှင် ၁၀၃၀၀၀ကျပ်၊ ပဲကြီး (ရွှေကျွန်း)တစ်တင်းလျှင် ၁၀၅၀၀၀ကျပ်ဖြင့် ဈေးအေးနေခဲ့ပြီး မြို့တွင်းအဝယ်တစ်ရက်လျှင် အိတ်၃၀၀ခန့်ရှိပါသည်။

စားတော်ပဲ

      စက်တင်ဘာလ စတုတ္တအပတ်တွင် စားတော်ပဲ(ကျွန်း)တစ်တင်းလျှင် ၁၃၆၀၀၀ကျပ်ဖြင့် မြို့တွင်းအဝယ်တစ်ရက် အိတ် (၁၅-၂၀) ခန့်ရှိပါသည်။ အောက်တိုဘာလ ပထမအပတ်တွင် စားတော်ပဲ(ကျွန်း) တစ်တင်းလျှင် ၁၃၆၀၀၀ကျပ်ဖြင့် ဈေးအေးနေခဲ့ပါသည်။ တစ်ရက်လျှင် အိတ် ၃၀ခန့် မြို့တွင်းအဝယ်ရှိပါသည်။

ဘိုကိတ်

      စက်တင်ဘာလ စတုတ္တအပတ်တွင် ဘိုကိတ်တစ်တင်းလျှင် ၆၉၀၀၀ကျပ်ဖြင့် မြို့တွင်းနှင့်ရန်ကုန်အဝယ်ရှိပြီး တစ်ရက်လျှင် အိတ် (၅၀-၁၀၀) ခန့်အဝယ်ရှိပါသည်။ အောက်တိုဘာလ ပထမအပတ်တွင် ဘိုကိတ်တစ်တင်းလျှင် ၆၉၀၀၀ကျပ်ဖြင့်ဈေးအေးနေပြီး တစ်ရက်လျှင် မြို့တွင်းအဝယ် ၅၀အိတ်ခန့်ရှိခဲ့ပါသည်။

  ပြည်ကုန်စည်ဒိုင်တွင် နိုင်ငံခြားသို့တင်ပို့သည့် မတ်ပဲ၊ ပဲတီစိမ်း၊ ပဲစဉ်းငုံများထက် မြို့တွင်းအဝယ်ရှိသည့်ပဲများမှာ ပိုမိုအရောင်းအဝယ်ကောင်းမွန်ကြောင်းသိရှိရပါသည်။

DOCA(ပဲခူး)

   ပြည်ခရိုင်၊ ပြည်မြို့ရှိစည်ပင်သာယာဈေးကြီးနှင့် ရပ်ကွက်ဈေးတို့တွင် ကန်စွန်းဥများရောင်းချလျက်ရှိပါသည်။ ဈေးကွက်တွင်ရောင်းချနေသော ကန်စွန်းဥအမျိုးအစားမှာ မြန်မာကန်စွန်းဥ၊ ရွှေကန်စွန်းဥနှင့် ငချိတ်ကန်စွန်းဟူ၍ အမျိုးအစား(၃)မျိုးရှိပါသည်။ ၂၀၂၃ခုနှစ်၊ အောက်တိုဘာလ ဒုတိယအပတ်တွင် ဈေးကွက်အတွင်းရောင်းချနေသော ကန်စွန်းဥဈေးများမှာ မြန်မာကန်စွန်းဥတစ်ပိဿာလျှင် ၃၂၀၀ကျပ်၊ ရွှေကန်စွန်းဥတစ်ပိဿာလျှင် ၃၅၀၀ကျပ်၊ ငချိတ်ကန်စွန်းဥတစ်ပိဿာလျှင် ၃၅၀၀ကျပ်ဖြင့် ရောင်းချလျက်ရှိပါသည်။ ရွှေကန်စွန်းဥနှင့် ငချိတ်ကန်စွန်းဥမှာ မြန်မာကန်စွန်းဥထက် အရသာအနည်းငယ်ပိုရှိသည့်အတွက် အရောင်းအဝယ်ပိုဖြစ်ကြောင်းသိရပါသည်။

DOCA(ပဲခူး)

     ၁၂လရာသီပွဲတော်များအနက် တစ်ခုဖြစ်သည့် ကြည်နူးဖွယ်အကောင်းဆုံးပွဲတော်မှာ သီတင်းကျွတ်မီးထွန်းပွဲတော်ဖြစ်ပါသည်။ ဝါလကင်းလွတ် သီတင်းကျွတ်ကာလ၏ လပြည့်နေ့တွင် ကျင်းပသည့်ပွဲဖြစ်သော်လည်း လပြည့်နေ့မတိုင်မီ အကြို ၂ရက်အပါအဝင် စုစုပေါင်း ၃ရက်ကျင်းပလေ့ရှိပါသည်။ ဆီမီးရောင်စုံထွန်းကြသည့် ညပွဲသဘင်လည်းဖြစ်ပါသည်။ သီတင်းကျွတ်လသည် မြန်မာလများတွင် သတ္တမမြောက်လဖြစ်ပါသည်။ သီတင်းကျွတ်မရောက်မီ အကြိုရောင်စုံအလှမီးပုံးများမှာ ဈေးကွက်တွင် ဈေးကောင်းရနေပြီး အရောင်းလည်းသွက်ကြောင်းသိရှိရပါသည်။ မြန်မာလူမျိုးတို့၏ ရိုးရာလက်လုပ်ရောင်စုံမီးပုံးများမှာ အရွယ်အစား၊ ပုံသဏ္ဌာန်အလိုက် ဈေးကောင်းပေး၍ ဝယ်ယူကြရပါသည်။ ၂၀၂၃ခုနှစ်တွင် အိမ်များ၌ချိတ်ဆွဲကြသော ကာလာစုံ၊ ဒီဇိုင်းစုံရှိသော ရောင်စုံမီးပုံးတစ်ခုလျှင် ကျပ်၅၀၀၀မှ ၃၀၀၀ကျပ်၊ ကလေးများအတွက် လက်တွန်းလှည်းရောင်စုံ၊ ယုန်ရုပ်၊ ကြောင်ရုပ်၊ ကြက်ရုပ်မီးပုံးတစ်ခုလျှင် ကျပ်၂၅၀၀၊ အလှဆင်ချိတ်ဆွဲသော ရောင်စုံကြယ်ပုံမီးပုံးတစ်ခုလျှင် ကျပ်၅၀၀၀ပေး၍ဝယ်ရကြောင်းသိရပါသည်။ တရုတ်မီးပုံးဒီဇိုင်းများမှာလည်း ဒီဇိုင်းနှင့် အရွယ်အစားပေါ်မူတည်၍ ကျပ်၁၅၀၀၀မှ ကျပ်၂၀၀၀၀ထိရှိပြီး အရောင်းအဝယ်ဖြစ်ကြောင်းသိရပါသည်။

DOCA(ပဲခူး)

    ပြည်ဈေးကွက်သို့ မိုးနှမ်းများကို နတ်တလင်း၊ မိုးညိုနှင့် မြန်အောင်ဘက်မှ နှမ်းနက်နှင့် နှမ်းနီ တစ်နေ့လျှင် အိတ် ၅၀၀/၆၀၀ ခန့် ဝင်ရောက်လာခဲ့ပါသည်။ ပြည်မြို့အနီးတဝိုက်ရှိ ကျေးရွာများတွင် ယခုအချိန်တွင် မိုးနှမ်းများရိတ်သိမ်းပြီးဖြစ်၍ နှမ်းလက်ကျန်များ နည်းသွားသော်လည်း အခြား မြို့နယ်များမှ ဝင်ရောက်လာသောနှမ်းများဖြင့်သာ ပြည်ဈေးကွက်တွင် အရောင်းအဝယ်ဖြစ်လျက်ရှိပါသည်။ ဝင်ရောက်လာသောနှမ်းများနှင့် ဈေးကွက်လက်ကျန်နှမ်းများကို မန္တလေးဝယ်လက်များက ဝယ်ယူမှုရှိသဖြင့် ဈေးကွက်တွင် နှမ်းအရောင်းအဝယ်နေ့စဉ်ဖြစ်လျက်ရှိပါသည်။ အောက်တိုဘာလ ပထမပတ်တွင် မိုးနှမ်းဈေးများမှာ နှမ်းနီ (၃)တင်းတစ်အိတ်လျှင် ၃၀၅၀၀၀ကျပ်၊ နှမ်းနက် (၃)တင်းတစ်အိတ်လျှင် ၂၇၀၀၀၀ကျပ် နှင့် စမုံနက်နှမ်း (၃)တင်း တစ်အိတ် လျှင် ၃၁၅၀၀၀ကျပ်ဖြင့် အရောင်းအဝယ်ဖြစ်ပြီး ယခင် စက်တင်ဘာလကုန်ပတ်နှင့်ယှဉ်လျှင် နှမ်းနီ(၃) တင်း တစ်အိတ်လျှင် ၅၀၀၀ကျပ်၊ နှမ်းနက်(၃)တင်းတစ်အိတ်လျှင် ၁၀၀၀၀ကျပ် နှင့် စမုံနက်နှမ်း (၃)တင်းတစ်အိတ်လျှင် ၅၀၀၀ကျပ်ဖြင့် ဈေးအနည်းငယ်ကျဆင်းလာခဲ့ကြောင်း သိရှိရပါသည်။

DOCA(ပဲခူး)

     ပင်မှည့်သီးတွင်အဝါရောင်နှင့် ခရမ်းရောင်အပင်နှစ်မျိုးရှိပါသည်။ ခရမ်းရောင်အသီးများသည် အဝါရောင်အသီးများထက်ပို၍ အရသာမှာစားကောင်းသောအသီးဖြစ်ပါသည်။ ပင်စည်များသည် တုတ်ခိုင်ပြီး သန်မာသောနှစ်ရှည်နွယ်ပင်မျိုးဖြစ်ပါသည်။ နှာမောင်းတံအရှည်ကြီးများပါဝင်သော အနွယ်ပင်များဖြစ်သည့်အတွက် ၎င်းအပင်နှင့်အနီးကပ်ရှိသောအပင်များကို ရစ်ပတ်တွယ်တတ်တဲ့ အပင်များဖြစ်ပါသည်။ အခွံမှာထူထူပြောင်ပြောင်ဖြစ်ပြီး အသီးများနုချိန်တွင် အစိမ်းရောင်ရှိပြီး ရင့်မှည့်လာသောအခါ အဝါမျိုးတွင်အဝါရောင်ဖြစ်လာပြီး ခရမ်းရောင်မျိုးမှာ ခရမ်းရောင်ဖြစ်လာပါသည်။ ရင့်မှည့်လာသည့်အခါ ဆွတ်ခူးရပြီး ရင့်သထက်ရင့်မှည့်လာပါက အသီးများမှာ ကြွေကျတတ်ပါသည်။

      အဝါမျိုးများ၏ အရွက်မှာ ခရမ်းရောင်မျိုးထက် အရွက်များပိုကြီးပြီး အသီးများမှာလည်း အရွယ်အစားပိုကြီးပါသည်။ အဝါအသီးများမှာရင့်မှည့်လာလျှင် အဖြူ၊ အစက်အပြောက်ကလေးတွေ ပါရှိပါသည်။ စိုက်ပျိုးရာတွင် နွယ်ပင်ဖြစ်သည့်အတွက် စင်တင်ပြီးစိုက်ပျိုးရပါသည်။ စင်ပေါ် တင်ပြီး အညွှန့်များအား အပွင့်များမပွင့်ခင်အချိန်တွင် ခေါင်ညွှန့်များအားနှိမ်ပေးရပါသည်။ ပင်မှည့်သီးများသည် ကျေးလက်ဒေသများ အလေ့ကျပေါက်ရောက်တတ်ပါသည်။ စီးပွားဖြစ် စနစ်တကျ စိုက်ပျိုးရာလျှင် ကိုင်းဖြတ်စနစ်ဖြင့် စိုက်ပျိုးကြပါသည်။ ကိုင်းဖြင့်စိုက်ပျိုးရာတွင် အပင်စိုက်ပြီး (၁)နှစ် သို့မဟုတ် (၂)နှစ်အကြာတွင် ပင်မှည့်သီးများအား ခူးဆွတ်လို့ရပါသည်။

      ပင်မှည့်သီးများအားဈေးကွက်အတွင်းတွင် ဖျော်ရည်အဖြစ် သောက်သုံးကြပါသည်။ ပင်မှည့်သီးများအား ဈေးကွက်အတွင်း ရောင်းချရာတွင် အလုံးကြီးသီးသန့်တစ်ပိဿာလျှင် ၁၉၀၀ကျပ်၊ အလုံး အကြီး၊ အသေး သောင်းပြောင်းရောင်းချရာတွင် တစ်ပိဿာလျှင် ၁၆၀၀ကျပ်ဖြင့် ပြည်ဈေးကွက်အတွင်း ရောင်းချနေကြောင်း သိရှိရပါသည်။

DOCA(ပဲခူး)