ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ သရက်ခရိုင်၊ မင်းလှမြို့နယ်အတွင်းရှိ တောင်သူများသည် ဝါ၊ နှမ်း၊ ပဲမျိုးစုံ၊ ပြောင်း၊ ငရုတ်နှင့်စားဖိုဆောင်သီးနှံများကို အများဆုံးစိုက်ပျိုးကြပြီး မင်းလှမြို့နယ် မယ်ဇလီတောနှင့် ပန်းတောပြင်ကျေးရွာများတွင် စားဖိုဆောင်သီးနှံတစ်မျိုးဖြစ်သည့် ခရမ်းချဉ်သီးနှံကိုလည်း စီးပွားဖြစ်စိုက်ပျိုးလာကြကြောင်း၊ ၂၀၂၄ခုနှစ်၊ အောက်တိုဘာလတွင် စိုက်ပျိုးပြီး ၂၀၂၅ ခုနှစ်၊ ဇန်နဝါရီလတွင် စတင်ထွက်ပေါ်လျက်ရှိကြောင်း၊ မျိုးစေ့ကို ပျိုးဘောင်ဖြင့် ပျိုးထောင်ပြီး ပျိုးပင်(၂၅)ရက်သားအရွယ်တွင် စိုက်ပျိုးကြကြောင်း၊ ခရမ်းချဉ်သီးနှံကို မြေအောက်ရေတင်စနစ်ဖြင့်စိုက်ပျိုး၍ (၃)လအကြာတွင် အသီးများစတင်ဆွတ်ခူးနိုင်ကြောင်း၊ စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ မြေပြုပြင်ခ၊ ရေတင်ခ၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ်သိန်း(၂၀)ခန့်ကုန်ကျကြောင်း သိရသည်။

          အထွက်နှုန်းအနေဖြင့် ခရမ်းချဉ်သီးနှံကို ၃ ရက်ခြား တစ်ကြိမ် ခူးဆွတ်ရပြီး စတင်ခူးဆွတ်ချိန်တွင် ပိဿာချိန် ၁၅၀ ခန့် ထွက်ရှိ၍ တစ်ပတ်ထက်တစ်ပတ် အထွက်နှုန်းပိုမိုလာကြောင်း၊ ခရမ်းချဉ်သီးနှံကို စတင်ခူးဆွတ်ချိန်မှစ၍ (၂)လခန့်အကြာထိ ခူးဆွတ်နိုင်ပြီး တစ်ဧကလျှင် စုစုပေါင်း ပိဿာချိန် ၅၀၀၀-၆၀၀၀ ခန့် ထွက်ရှိရာ စိုက်ပျိုးမြေအနေအထား၊ သီးနှံဖြစ်ထွန်းအောင်မြင်မှုအပေါ်မူတည်၍ အထွက်နှုန်းကွဲပြားမှုရှိကြောင်း၊  မိုးရာသီစိုက်ခရမ်းချဉ်ပင်များထက် ဆောင်းရာသီစိုက် ခရမ်းချဉ်ပင်များမှာ အသီး၊ အပွင့်ပိုမိုဖြစ်ထွန်းပြီး အထွက်နှုန်းပိုမိုကောင်းမွန်ကြောင်း၊ ဈေးနှုန်း ဈေးကွက်အနေဖြင့် ဇန်နဝါရီလ(ပထမပတ်)တွင် ခရမ်းချဉ်သီး လက်ကားဈေးတစ်ပိဿာလျှင် ငွေကျပ် ၂၅၀၀-၃၀၀၀၊ လက်လီတစ်ပိဿာလျှင် ၃၅၀၀-၄၀၀၀ နှုန်းဖြင့် မင်းလှ-သရက်ကားလမ်းဘေးရှိ ကုန်စိမ်းဒိုင်သို့တင်ပို့ရောင်းချပြီး ထိုမှတစ်ဆင့် မင်းလှမြို့၊ ဇေယျာသီရိဈေး၊ မလွန်ဈေးနှင့် မန်းသံပုရာကန်ဈေးများသို့ တင်ပို့ကြောင်း၊ အကျိုးအမြတ်အနေဖြင့် တစ်ဧကလျှင် ငွေကျပ် သိန်း (၁၀၅-၁၃၀)ခန့်ရရှိကြောင်း သိရှိရပါသည်။

DOCA(မကွေး)

          ၂၀၂၅ ခုနှစ်၊ ဇန်နဝါရီလ ဒုတိယပတ်တွင်  ကရင်ပြည်နယ်၊ ဘားအံမြို့ ဈေးကွက်အတွင်  ဆောင်ရာသီပေါ် ဟင်းသီးဟင်းရွက်ဖြစ်သည့် ကင်ပွန်းချဉ်ရွက် ဈေးကောင်းလျက်ရှိကြောင်း သိရသည်။ ကင်ပွန်းချဉ်ရွက်ကို ဘားအံမြို့အနီးတဝိုက်ကျေးရွာများတွင် တစ်နိုင်တစ်ပိုင်စိုက်ပျိုးကြသည့်အပြင် စီးပွားဖြစ်လည်း စိုက်ပျိုးကြပါသည်။ ကင်ပွန်းချဉ်ရွက်ကို (ပတက်စာ) နဲ့ချည်ရည် ဟင်းချိုကျဲကျဲ အရည်သောက်ပဲချက်ချက်၊ ငါးလေးနဲ့ပဲချက်ချက်၊ ပုစွန်စိတ်ကလေးနဲ့ပဲကြော်စားစား ထမင်းမိန်ကာစားလို့ကောင်းရုံတာမက ကျန်းမာရေးကိုလည်း အထောက်အကူပြု ပေးနိုင်ပါသည်။ ကင်ပွန်းချဉ်ရွက်ကို အစည်းလိုက်ရောင်းချကြရာ ကင်ပွန်ချဉ်ရွက် အစည်းသေး  တစ်စည်း (၁၀၀၀)ကျပ်၊ နှင့် အစည်းကြီးတစ်စည်း (၄၀၀၀) ကျပ် တို့ဖြင့် အရောင်းအဝယ်ဖြစ်လျက်ရှိပြီး ယခင်အပတ် ဈေးနှုန်းနှင့်နှိုင်းယှဉ်လျှင် ဈေးနှုန်း ပြောင်းလဲမှုမရှိပဲ ဈေးနှုန်းတည်ငြိမ် နေကြောင်းသိရှိရပါသည်။

DOCA(ကရင်)

           ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်တွင် အထွေထွေအုပ်ချုပ်ရေးဦးစီးဌာနမှ ဦးဆောင်ကြီးကြပ်မှုဖြင့် မြို့နယ်တွင်း ပြည်သူများ စားဝတ်နေရေး တဖက်တစ်လမ်းမှ အဆင်ပြေစေရန်အတွက် အခြေခံစား‌သောက်ကုန်များဖြစ်သော ကြက်ဥ၊ ဘဲဥ၊ သား၊ ငါး များအား သက်သာသောနှုန်းထားဖြင့် နေ့စဉ်ရောင်းချနေကြောင်း သိရသည်။

         ရောင်းချရာတွင် ဌာနစုံပူးပေါင်းပါဝင်ဆောင်ရွက်ကြပြီး အောက်တိုဘာလ တတိယပါတ်တွင် စတင်ရောင်းချပေးလာခဲ့ပြီး (၃.၁.၂၀၂၅)ရက်နေ့က မအူပင်မြို့နယ်အနေဖြင့် ၃လမ်း၊  မီးသပ်ရုံးရှေ့၊ ရွှေပြည်သူဈေးတို့တွင် ကြက်ဥ အလုံး(၄၅၀၀) ကြက်ဥ တစ်လုံး ၃၅၀ကျပ်ဖြင့်လည်းကောင်း၊ ဘဲဥ အလုံး(၃၀၀) ၁လုံး ၅၀၀ကျပ်ဖြင့်လည်းကောင်း၊  ကြက်သား ၁၆ပိဿာ ဈေးနှုန်း ၁ပိဿာ ၁၄၀၀၀ကျပ်ဖြင့် ရောင်းချပေးလျက်ရှိကြောင်း၊ အလားတူပင် ပန်းတနော်မြို့နယ်မှလည်း ကြက်ဥ ၃၀၀၀လုံးနှင့် ကြက်သား ၁၀ပိဿာ ရောင်းချပေးနေကြောင်း သိရှိရပါသည်။

DOCA (ဧရာဝတီ)

          အစေ့ထုတ်ပြောင်းသီးနှံသည် ဧရာဝတီတိုင်းဒေသကြီး၏ ပြည်ပပို့ကုန်သီးနှံတစ်ခုဖြစ်ပြီး ဟင်္သာတခရိုင်တွင်  ၁၈၆၇၀ ဧက၊ မြန်အောင်ခရိုင်တွင် ၁၂၈၂၅ ဧကနှင့် မအူပင်ခရိုင် ၂၀၂၇၀ ဧက နှင့် မြောင်းမြခရိုင်တွင် ၁၂၂၆ ဧက စိုက်ပျိုးပြီး တတိုင်းလုံးအနေဖြင့် စုစုပေါင်း ဧက ၅၃၀၀၀ကျော် စိုက်ပျိုး သော သီးနှံလည်းဖြစ်ပါသည်။

          ဧရာဝတီတိုင်းဒေသကြီးတွင် အစေ့ထုတ်ပြောင်းကို မိုးစပါးပြီးချိန် နှင့် မြစ်ရေကျချိန် အောက်တိုဘာလဆန်းတွင် အစောဆုံး သီးထပ်စိုက်ဧကအဖြစ် စိုက်ပျိုးကြသကဲ့သို့၊ မြေနုကျွန်း များတွင် ပဲမျိုးစုံနှင့် ကိုင်းသီးနှံ တစ်ကြီမ် စိုက်ပျိုးပြီးချိန် နိုဝင်ဘာနောက်ဆုံးပတ်တွင်မှ နောက်ကျ သီးထပ်သီးနှံအဖြစ်လည်း ထပ်မံစိုက်ပျိုးကြသည့်အတွက် ဧရာဝတီတိုင်းတွင် အစေ့ထုတ်ပြောင်း သီးနှံသည် ဇန်နဝါရီလကုန် ဖေ‌ဖော်ဝါရီလဆန်းတွင် စတင်ထွက်ရှိလေ့ရှိပါသည်။

          ဧရာဝတီအစေ့ထုတ်ပြောင်း၏ အထွက်နှုန်းသည် တစ်ဧကလျှင် ပျမ်းမျှ တင်း ၁၀၀ ခန့်ထွက် ရှိပြီး အရောင်လှအရည်အသွေးကောင်းသည့်အတွက် exporter တို့ကြိုက်နှစ်သက်သော ပြည်ပ ပို့ကုန်တစ်ခု လည်းဖြစ်ပါသည်။ နှစ်စဉ် ပျမ်းမျှ တင်း သိန်း ၅၀ ခန့်ထွက်ရှိပြီး ၇၅ရာခိုင်နှုန်းခန့်မှာ ရန်ကုန် ဘုရင့်နောင်ဈေးကွက်မှ တဆင့် ပြည်ပသို့တင်ပို့ပြီး ၂၅ ရာခိုင်နှုန်းခန့်မှာ ဒေသတွင်းနှင့် မွေးမြူရေးအစာစပ် စက်ရုံများတွင် သုံးစွဲ ကြကြောင်းသိရှိရပါသည်။

          ဧရာဝတီတိုင်းဒေသကြီးတွင် အစေ့ထုတ်ပြောင်းမျိုးအဖြစ် CP 808,112၊ AWBA 612,625၊ GT 722, 822 တို့ကိုစိုက်ပျိုးကြပြီးအစေ့ထုတ်ပြောင်း တစ်ဧက ကုန်ကျစရိတ်မှာ (မြေပြင်၊ မျိုးစေ့၊ ပေါင်း လိုက်၊ ရေတင်၊ မြေဩဇာ၊ ဆေးကျွေး၊ရိတ်ခြွေ)တို့အတွက် တစ်ဧကလျှင် ပျမ်းမျှ ၁၅သိန်းမှ ၁၇ သိန်းကြား ကုန်ကျ နိုင်ပါသည်။  အစေ့ထုတ်ပြောင်း ပေါက်ဈေးမှာ ဧရာဝတီတိုင်းတွင် စတင် စိုက်ပျိုးချိန် ၂၀၂၄ ခုနှစ် အောက် တိုဘာ လတွင် တစ်တင်းလျှင် ၃၃၅၀၀ ကျပ်ဈေးပေါက်ပြီး ယခု ၂၀၂၄ ခုနှစ် ဒီဇင်ဘာလ ကုန်တွင် လည်း တစ်တင်းလျှင် ၎င်းဈေးနှုန်းတွင်ပင်ရှိသည့်အတွက် တစ်ဧက တင်းတရာနှုန်းဖြင့် တွက်ပါက တစ်ဧက အကျိုးအမြတ် ပျမ်းမျှ ၁၆ သိန်းနှင့် ၁၇သိန်းကြား ရရှိနိုင်ပါသည်။ ပြောင်းစိုက်တောင်သူများမှလည်း အစေ့ထုတ်ပြောင်းပေါ်ချိန် ဇန်နဝါရီကုန် ဖေဖော်ဝါရီဆန်းတွင်လည်း ယခုဈေးနှုန်းအတိုင်း ဆက်လက်ရှိနေစေရေးမျှော်လင့်လျက် ရှိကြပါသည်။

          ယခု ၂၀၂၄ -၂၀၂၅ ဘဏ္ဍာနှစ် ဆောင်းသီးနှံ အစေ့ထုတ်ပြောင်းသည် လက်ရှိဈေးနှုန်းအတိုင်း ဆက်လက်တည်ငြိမ်နေပါက ဧရာဝတီတိုင်းဒေသကြီးရှိ  စိုက်ပျိုးသူ တောင်သူ များအတွက် အကျိုးရှိစေ သော ပြည်ပပို့ကုန်သီးနှံ တစ်ခုဖြစ်စေမှာဖြစ်ကြောင်းလေ့လာသိရှိရပါသည်။

DOCA(ဧရာဝတီ)

            မအူပင်မြို့နယ်အတွင်းရှိ တလုပ်လပ်အရှေ့၊ စစ်ကိုင်း၊ ရေကျော်၊ လေးအိမ်စု ကျေးရွာ များတွင် မတ်ပဲ၊ ပဲတီစိမ်း၊ ငှက်ပျော၊ သခွား၊ ငရုတ်၊ ပဲတိုင်တောင်ရှည်၊ ကြက်ဟင်းခါးသီး၊ မုန်လာဥ နှင့် ဖူးစားပြောင်းသီးနှံများကို စိုက်ပျိုးကြပြီး ဖူးစားပြောင်းသီးနှံကို စစ်ကိုင်းကျေးရွာ၌ စိုက်ဧက ၄၀ ဧက ခွဲခန့် စိုက်ပျိုးထားရှိကြောင်း သိရသည်။

            မျိုးအနေဖြင့် ဖူးစားပြောင်း(၇၀၂)မျိုးကို စိုက်ပျိုးကြပြီး မြေအောက်ရေတင်စနစ်ဖြင့် တန်းကြား ၂ ပေအကွာ၊ ပင်ကြား ၁၀ လက်မအကွာ အစေ့ချ၍ ၁၀လန် ၈ ခွက်တွင် စိုက်ပျိုး ကြ ကြောင်း၊ ၁၀လန် ၈ ခွက်တွင် ဖူးစားပြောင်းမျိုးစေ့ တစ်ထုပ်လျှင် ၇၅၀၀၀ကျပ် အထုပ် ၃ ထုပ်ခန့် စိုက်ပျိုးရပြီး၊ တစ်ထုတ်လျှင် အစေ့ အပင် ၃၀၀၀ကျော်ပေါက်ကြောင်း၊ ယခု ၁၀လန် ၈ခွက်တွင် ပြောင်းဖူးအပင် ၁၀၀၀၀နီးပါးစိုက်ပျိုးထားသည်။ ဖူးစားပြောင်း ကို စက်တင်ဘာလတွင် စတင်စိုက်ပျိုး၍ ဒီဇင်ဘာလတွင် ထွက်ပေါ်လျက်ရှိကြောင်း၊ စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ ထွန်ယက်ခအပါအဝင် ၁၀လန် ၈ ခွက်လျှင် ငွေကျပ် ၂ ၀၀၀ ၀၀၀ နီးပါး ကုန်ကျပြီး အထွက်နှုန်းအနေဖြင့် ရာသီဥတုပြောင်းလဲမှုနှင့် ပြုစုပျိုးထောင်မှု အပေါ်မူတည်၍ တစ်ဧကလျှင် ပြောင်းဖူး ခေါင်ဖူး၊ ၁၀၀၀၀၊ ဖူးလတ် ၈၀၀၀၊ ဖူးကျ ၅၀၀၀ ခန့်ထွက်ရှိကြောင်း သိရသည်။ ခေါင်ဖူးသာ ဈေးကောင်းရပြီး၊ ဖူးလတ်၊ ဖူးကျများက ဈေးနည်းကြောင်းသိရသည်။

          ဈေးနှုန်းအနေဖြင့် ဒီဇင်ဘာလအတွင်း ခေါင်ဖူးပြောင်းဖူး တစ်ဖူးလျှင် လက်ကားဈေး ငွေကျပ် ၅၀၀-၇၀၀ ဖြင့် လည်းကောင်း၊ ရန်ကုန်တင်ပို့ပါက လက်ကားဈေး ငွေကျပ် ၅၀၀ ဈေးဖြင့်သာ တင်ပို့ အရောင်းအဝယ်ဖြစ်လျက်ရှိကြောင်း၊ တောင်သူများအနေဖြင့် တစ်ဧကလျှင် ငွေကျပ် ၅,၈၀၀,၀၀၀/-ရရှ၍ ငွေကျပ် ၃ ၈၀၀ ၀၀၀/- အကျိုးအမြတ်ရရှိကြောင်း၊ ဈေးကွက်အနေဖြင့် မအူပင်မြို့နှင့် ကျိုလတ်၊ ဖျာပုံမြို့သို့ ပြောင်းဖူး ၄၀၀၀ကျော် တင်ပို့ပြီး၊ ရန်ကုန်မြို့ ဒိုက်များသို့ ၆၀၀၀ကျော် တင်ပို့ကြောင်း  စိုက်ခင်းသို့ ပြောင်းဖူးအလတ်လာရောက်ဝယ်ယူမှုများရှိပြီး ဖူးကျပြောင်းဖူးများကို အနီးအနားကျေးရွာမိသားစုများသို့ အနည်းငယ်ပေးဝေပြီး ဈေးအနည်းငယ်ဖြင့်သာရောင်းချကြောင်းနှင့် ယခုပြောင်းစိုက်သူအနေဖြင့် မြေငှားချစိုက်ပျိုးခြင်းဖြစ်ကြောင်း သိရှိရပါသည်။

DOCA (ဧရာဝတီ)