ပြည်တွင်းကုန်သွယ်မှုသတင်း

            စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးခရိုင်၊ တောင်တွင်းကြီးမြို့နယ်တာဝန်ခံသည် (၁၈.၃.၂၀၂၅)ရက်နေ့၊ နံနက်(၁၀:၀၀) အချိန်တွင် ပြည်တွင်း ကုန်သွယ်မှုဖွံ့ဖြိုးတိုးတက်စေရေးအတွက် တောင်တွင်းကြီးမြို့၊ ဆိတ်ဖူးကျင်း ကျေးရွာသို့ ပဲစဉ်းငုံသီးနှံစိုက်ပျိုးသော တောင်သူဦးနေအောင်နှင့် သွားရောက်တွေ့ဆုံခဲ့ပြီး မိုးသီးနှံ ပဲစဉ်းငုံ စိုက်ပျိုးထွက်ရှိမှုအခြေအနေကို ကွင်းဆင်းလေ့လာမေးမြန်းခဲ့ရာ တောင်တွင်းကြီးမြို့နယ်သည် မြန်မာနိုင်ငံအလယ်ပိုင်း၊ မကွေးခရိုင်အတွင်းတည်ရှိပြီး စိုက်ပျိုးရေးကို အဓိကထားလုပ်ကိုင်၍ ကြက်သွန်နီ၊ စပါး၊ အာလူး၊ ပဲအမျိုးမျိုးကို နှစ်စဉ်မပြတ် စိုက်ပျိုးကြကြောင်း၊ ပဲစဉ်းငုံသီးနှံကို သီးညှပ် အဖြစ် စိုက်ပျိုးလျှက်ရှိကြကြောင်း၊ ၂၀၂၄ခုနှစ်အတွင်း တစ်မြို့နယ်လုံး စိုက်ဧက (၉၃၅)ဧက ခန့် စိုက်ပျိုးကြောင်း၊ ရာသီဥတုအနေအထား ကောင်းမွန်မှုကြောင့် သီးနှံအထွက်နှုန်းမှာ ကောင်းမွန်ကြောင်း သိရှိရပါသည်။

           ယခုနှစ်တွင် ပဲစဉ်းငုံ (သီးညှပ်) စိုက်တောင်သူ ဦးနေအောင်သည်   (၂)ဧကခန့် စိုက်ပျိုးထားရှိ ကြောင်း၊ အဓိကစိုက်ပျိုးသီးနှံမဟုတ်ဘဲ ကြားညှပ်ပြီးစိုက်ပျိုးခြင်းဖြစ်သောကြောင့် မြေပြုပြင်စရာမလို ဘဲ ကုန်ကျစရိတ်နည်းပါးကြောင်း၊ နှမ်းအခင်းများအကြားတွင် သီးညှပ်စိုက်ပျိုးမှုများပြားပြီး မြေဖျင်း မြေညံ့များတွင်လည်း စိုက်ပျိုးကြောင်းသိရှိရပါသည်။ တစ်ဧကစိုက်ပျိုးလျှင် မျိုးစေ့ (၂)ပြည်ခန့် ကုန်ကျကြောင်း၊ မျိုးစေ့(၁)ပြည်လျှင် (၇၀၀၀)ကျပ်နှုန်းဖြင့် ဝယ်ယူစိုက်ပျိုးရကြောင်း၊ (၂)ဧက စိုက်ပျိုးခြင်း ဖြစ်၍(၄)ပြည်ဝယ်ယူရပြီး မျိုးစေ့ဝယ်ယူစရိတ်မှာ (၂၈၀၀၀)ကျပ်ဝန်းကျင်ခန့် ကုန်ကျ ကြောင်း၊ ဇူလိုင်လတွင် စတင်စိုက်ပျိုးပြီး နှမ်းခင်းများကြားတွင် စိုက်ပျိုးသည့်အတွက် သီးသန့် ဆေးဖြန်းခြင်း၊ ပေါင်းသင်ခြင်းများ ပြုလုပ်ရန်မလိုအပ်ပါ။ အပင်ဖြစ်နောက်ကျသည့်အတွက် ဇန်နဝါရီ လအတွင်း စတင်ရိတ်သိမ်းရကြောင်း၊ စိုက်ပျိုးသက်တမ်းမှာ (၅)လခန့်ကြာမြင့်ကြောင်း သိရှိရပါ သည်။

           ပဲစဉ်းငုံ (သီးညှပ်)သီးနှံသည် မိုးများစွာ ရွာသွန်းလျှင် အပင်မသန်၍ အထွက်နှုန်းနည်းကြောင်း၊ စတင်စိုက်ပျိုးချိန်တွင် မိုးအကြိုက် ရေများစွာရွာသွန်းခဲ့သော်လည်း အပွင့်ပွင့်ချိန်တွင် မိုးရွာသွန်းမှု နည်းပါးသွားသောကြောင့် အပွင့်မကြွေဘဲ အသီးတင်မှုများ၍ အထွက်နှုန်းမှာ အသင့်အတင့် ကောင်းမွန်ကြောင်း၊ မြေအနေအထားကွာခြားခြင်း၊ စိုက်ပျိုးချိန်တွင် မြေအစိုဓါတ်ကွာခြားခြင်း၊ စိုက်ပျိုးပြီး အပင်ပြုပြင်မှုကွာခြားခြင်း၊ စိုက်ပျိုးမြေသည် သဲမြေဖြစ်လျှင် မိုးများပါက အသီး မတင်ခြင်း၊ အကျဲအစိပ် စိုက်ပျိုး မှုကွာခြားခြင်းတို့ကြောင့် ပဲစဉ်းငုံ (၄)ပြည်စိုက်လျှင် အထွက်နှုန်းမှာ (၄)တင်းမှ (၁၀)တင်းအထိ အမျိုးမျိုး ကွဲပြားထွက်ရှိကြောင်း၊ ယခုနှစ် ပဲစဉ်းငုံစိုက်တောင်သူ ဦးနေအောင်သည် တစ်ဧကလျှင် (၉)တင်းခန့်ထွက်ရှိကြောင်း၊ ယခုနှစ်အတွင်း အထွက်နှုန်း ကောင်းမွန်ကြောင်း သိရှိရပါသည်။

           စျေးနှုန်း/ စျေးကွက်အနေဖြင့် ယခုနှစ်တွင် ပဲစဉ်းငုံ(၁)တင်းလျှင် သီးနှံပေါ်စအချိန်၌ (၉၆၅၀၀) ကျပ်ဖြင့် ရောင်းချရပြီး ယခင်နှစ်စျေးနှုန်းမှာ (၁၁၀၀၀၀)ကျပ်မှ (၁၂၀၀၀၀)ကျပ်အထိ အမြင့်ဆုံး စျေးနှုန်းဖြင့် ရောင်းချခဲ့ရကြောင်း၊ ပဲစဉ်းငုံစိုက်တောင်သူများအနေဖြင့် ယခင်နှစ်ထက် စျေးနှုန်းမကောင်းသော်လည်း အထွက်နှုန်းကောင်းသဖြင့် အမြတ်ပိုမိုရရှိကြောင်း၊ စိုက်ပျိုးထွက် ရှိသော ပဲစဉ်းငုံ များကို တောင်တွင်းကြီးမြို့သို့ သွားရောက်ရောင်းချလျက်ရှိကြောင်း သိရှိရပါသည်။

           တစ်ဧကစိုက်ပျိုးလျှင် ကုန်ကျစရိတ်မှာ (၃၅၀၀၀၀)ကျပ်ခန့် ကုန်ကျကြောင်းသိရှိရပါသည်။ တစ်ဧကဝင်ငွေမှာ (၈၆၈၅၀၀)ကျပ်ခန့် ရရှိ၍ (၅၁၈၅၀၀)ကျပ်ခန့် အကျိုးအမြတ်ရရှိကြောင်း ပဲစဉ်းငုံ စိုက်တောင်သူ၏ ပြောကြားချက်အရ လေ့လာသိရှိရပါသည်။

          ပဲစဉ်းငုံစိုက်တောင်သူများသည် ပြည်တွင်းမှ စိုက်ပျိုးထွက်ရှိသည့် သီးနှံများကို ပြည်တွင်းသာမက ပြည်ပအထိ သီးနှံကုန်သည်အသင်းမှ နှစ်စဉ် တင်ပို့ရောင်းချမှု ပြုလုပ်ဆောင်ရွက် ပေးနိုင်ပါက စျေးနှုန်း၊ စျေးကွက်များ ပိုမိုကောင်းမွန်လာပြီး အကျိုးအမြတ်များစွာ ရရှိနိုင်မည်ဖြစ်ပါကြောင်း၊ ပဲစဉ်းငုံ သီးနှံသည် စားသုံးသူပြည်သူများ နေ့စဉ်စားသုံးသင့်ပြီး ကျန်းမာရေးအတွက် များစွာအထောက်အကူပြုသော သီးနှံတစ်မျိုးဖြစ်သောကြောင့် နှစ်စဉ်မပြတ် စိုက်ပျိုးပေးသင့် ပါကြောင်း ပဲစဉ်းငုံစိုက် တောင်သူထံမှ တစ်ဆင့် သိရှိရပါသည်။

DOCA(မကွေး)

သံပုရာသီးတွင် သံပုရာသီးနှင့် သံပုယိုသီးဟူ၍ နှစ်မျိုးရှိသည်။ သံပုရာပင်၊ သံပုယိုပင်များကို နေရာဒေသမရွေး စိုက်ပျိုးနိုင်ပါသည်။ အိမ်တိုင်း၊ ခြံတိုင်းလိုလိုမှာ တစ်ပင်နှစ်ပင်စိုက်ပျိုးလေ့ရှိ ကြပါသည်။ စီးပွားဖြစ်ဧကများစွာ စိုက်ပျိုးကြသူများလည်း ရှိကြပါသည်။ သံပုရာ၊ သံပုယိုပင်သည် တစ်ခါစိုက်ပြီးလျှင်(၁၀/၁၅) နှစ်အထိခူးယူ၍ရသော နှစ်ရှည်ပင်သီးပင်စားပင်မျိုးဖြစ်ပါသည်။ သံပုရာ၊ သံပုယိုပင်သည် ဈေးကွက်အမြဲရှိသော သီးနှံဖြစ်သည်။ ဈေးကွက်အတွင်း၌ သံပုရာသီးတစ်လုံးလျှင် (၅၀၀)ကျပ်၊ သံပုယိုသီးတစ်လုံးလျှင်(၃၀၀)ကျပ်ဖြင့် ရောင်းချလျှက်ရှိကြောင်း သိရှိရသည်။ သံပုရာ၊ သံပုယိုသီးကို ရေ၊ သကြား၊ ဆားအနည်းငယ်ထည့်၍ သဘာဝသံပုရာဖျော်ရည်ပြုလုပ်၍ ရောင်းချကြ သလို မိမိတို့ကိုယ်တိုင်ဖျော်၍လည်း သောက်သုံးလို့ရပါသည်။ သဘာဝသံပုရာဖျော်ရည်ကို သောက် သုံးခြင်းဖြင့် မောပန်းနွမ်းနယ်မှုကို ပြေစေပါသည်။ အစာအဆိပ်၊ အရက်အဆိပ်၊ ခေါင်းမူးတို့ကို ပျောက်ကင်းစေပါသည်။ နှလုံးတုန်ခြင်း၊ ရင်ခုန်ခြင်း၊ မူးဝေမောပန်းခြင်းများကို သက်သာပျောက် ကင်းစေပါသည်။ သံပုရာသီးကို ရှူပေးလျှင်လည်း အမူးအမော်ကို ပြေစေပါသည်။ သံပုရာ၊ သံပုယိုသီးကို သံပုရာချဉ်တည်၍လည်းကောင်း၊ သံပုရာသီးသနပ်လုပ်၍လည်းကောင်း စားသုံး ကြသလို ကြာဇံဟင်းခါး၊ မုန့်တီသုပ်၊ မုန့်ဟင်းခါးများတွင်လည်း  သူမပါလျှင်မပြီးဖြစ်ပါသည်။ ယခုဈေးကွက်တွင် နာမည်ကြီးနေသော သံပုရာသီးသုပ်မှာလည်း မြင်ရသူတို့မစားရမနေနိုင်တဲ့စိတ် သားရေတမျှမျှဖြစ်စေပါသည်။ အသင့်သောက်ဖျော်ရည်များ ဘယ်လောက်ပဲထွက်ပေါ်ပါစေ သဘာဝ သံပုရာ ဖျော်ရည်က ယခုထက်တိုင် ဈေးကွက်ရှိဆဲဖြစ်ပါသည်။ သဘာဝသံပုရာဖျော်ရည်တစ်ခွက် လျှင်(၁၀၀၀)ကျပ်ဖြင့် ရောင်းချလျှက်ရှိကြောင်း သစ်သီးမျိုးစုံဖျော်ရည်အရောင်းဆိုင်မှ သိရှိရသည်။

DOCA(မန္တလေး)

   လူတိုင်းလူတိုင်း ကျန်းမာစွာအသက်ရှင်သန်နိုင်ဖို့အတွက် လွန်စွာအရေးကြီးလှပါသည်။ အစာစားတိုင်း ကြေညပ်အောင် ဝါးစားသင့်ပါသည်။ ထို့အတူ ကျန်းမာရေးအတွက် ကန်စွန်းရွက်ကိုနေ့စဉ်စားသုံးသင့်ပါသည်။ အိမ်ရှင်မများ နေစဉ်စားသုံးဟင်းလျာအဖြစ် လွန်စွာအရေးပါသော အသီးအရွက်တစ်မျိုးဖြစ်ပါသည်။ ကန်စွန်းရွက်သည် ဝမ်းဗိုက်ထဲရောက်နေသော ရောဂါဖြစ်မည့် အဆိပ်မျိုးစုံကို ပယ်ဖျောက်ပေးနိုင် ပါသည်။ သွေးကိုသန့်ရှင်းစေပါသည်။ အမျိုးသမီးများ ဓမ္မတာကိစ္စ၊ သွေးဆုံးမီးယပ်ရောဂါမှန်သမျှ ကောင်းအောင်ကုသပေးနိုင်သော သဘာဝသမားတော်ဖြစ်သည်။ အသက်ကြီးလာလျှင် ကုန်ခမ်း သွားသော ရိုးတွင်းမှ  ကယ်စီယမ်ဓါတ်ကို ကန်စွန်းရိုးနီက ပြန်လည်ဖြည့်ပေးနိုင်ပါသည်။ ကန်စွန်း ရွက်ကို ကြော်ချက်၍သော်လည်းကောင်း၊ ချဉ်ရည်ဟင်းချက်၍သော်လည်းကောင်း စားသုံးကြပါ သည်။ ကန်စွန်းရိုးနီကို ထန်းလျက်နှင့်ပြုတ်သောက်လျှင် ဆီးရွှင်ကျန်းမာစေပါသည်။ ကျန်းမာရေး ကောင်းမွန်စေတဲ့ အစားအစာတွေထဲမှာ ကန်စွန်းရွက်လည်းပါပါသည်။ ကန်စွန်းရွက်တွင် ရေဓါတ်၊ အမျှင်ဓါတ်များစွာပါ၍ အစာကြေစနစ်ကို ကောင်းမွန်စေပါသည်။ ဝမ်းချုပ်ခြင်းမှ ပျောက်ကင်းစေပါသည်။ မျက်စိအာရုံကောင်းမွန်စေပြီး နှလုံးကျန်းမာရေးလည်း ကောင်းမွန်စေ ပါသည်။ ကန်စွန်းရွက်သည် ရေထဲ(သို့) စိုစွတ်သောမြေပေါ်တွင် ရှင်သန်ဖြစ်ထွန်းပါသည်။ ကန်စွန်းရိုးကို အဆစ်များမှနေ၍ ဖြတ်တောက်စိုက်ပျိုး၍ရသလို မျိုးစေ့စိုက်၍လည်း စိုက်ပျိုး ကြပါသည်။ ဗမာကန်စွန်း၊ တရုတ်ကန်စွန်းဟူ၍ ရှိပါသည်။ ဗမာကန်စွန်းရွက်သည် အလေ့ကျ ပေါက်ပင်များဖြစ်ပြီး လယ်ကန်သင်းရိုး၊ ချောင်းများ၊ မြောင်းများ စသည်ဖြင့် နေရာစုံပေါက်ရောက် ရှင်သန်ပါသည်။ ဗမာကန်စွန်းရိုးသည် အရိုးနီပြီး အရွက်သေးပါသည်။ တရုတ်ကန်စွန်းသည် အစိမ်းရောင်ရှိပြီး အရိုးပွကာအရွက်ကြီးပါသည်။ ဈေးကွက်အတွင်း၌ ဗမာကန်စွန်းရွက် (၁၀)ကျပ်သားလျှင်(၅၀၀)ကျပ်၊ တရုတ်ကန်စွန်းရွက်တစ်စည်းလျှင်(၂၀၀/၃၀၀)ကျပ်ဖြင့် ရောင်းချ လျှက်ရှိကြောင်း ကုန်စိမ်းဆိုင်မှ သိရှိရသည်။

DOCA(မန္တလေး)

ကြက်ဟင်းခါးပင်သည် ပူနွေးသော ရာသီဥတုကို ကြိုက်နှစ်သက်ပြီး နေရာဒေသမရွေး စိုက်ပျိုးလေ့ရှိကြသည်။ အေးသောတောင်အရပ်ဒေသများတွင် နွေရာသီကိုသာ စိုက်ပျိုးဖြစ်ထွန်း လျက်ရှိပြီး ရေကြိုက်သောအပင်ဖြစ်ကြောင်းသိရှိရပါသည်။  ကြက်ဟင်းခါးပင်သည် နွယ်ပင် ဖြစ်သောကြောင့်  အပွင့်မှာ အဝါရောင်ဖျော့ဖျော့လေး ပွင့်လေ့ရှိ၍  အရွက်မှာ အစိမ်းဝါရောင်ရှိပြီး  အပူပိုင်းဒေသများတွင်အများဆုံးပေါက်ရောက်လျက်ရှိသည်။  ကြက်ဟင်းခါးသီးမျိုးများမှာ အလုံးမျိုး၊ အရှည်မျိုး၊ အပုမျိုးဟူ၍ အမျိုးမျိုးရှိကြောင်းသိရှိရပါသည်။ ကြက်ဟင်းခါးအရိုင်းမျိုးမှာ အ‌လေ့ကျ ပေါက်ရောက်လျက်ရှိကြပြီး အသီးမှာ အလုံးပုံသဏ္ဍာန်သီးလေ့ရှိကြသည်။ ကြက်ဟင်းခါးသီး၏ အရောင်မှာ အစိမ်းရင့်၊ အစိမ်းနုနှင့်အဖြူ အမျိုးမျိုးရှိကြပြီး အသီးမှာ ခါးသောအရသာရှိ၍ ဝါးခြမ်း စင်ထိုး၍ စိုက်ပျိုးလေ့ရှိကြသည်။ ကြက်ဟင်းခါးညွန့်များ စင်ပေါ်ရောက်လျှင် အညွှန်များကို ဖြတ်ပေးခြင်းအားဖြင့် နောက်ထပ်အညွန့်များဖြာထွက်လာပြီး အပွင့်များ အသီးများ ပိုမို၍ ဖြစ်ထွန်း လာကြောင်းသိရှိရပါသည်။ ကြက်ဟင်းခါးရွက်မှာ ကာဗိုဟိုက်ဒရိတ်၊ ပရိုတင်း၊ ဗီတာ K၊ ဗီတာမင် B6၊ ဗီတာမင် B9၊ ဗီတာမင် B2၊ ဗီတာမင် C နဲ့ သံဓာတ်၊ ကယ်လ်ဆီယမ်၊ ဖော့စဖရိတ် တို့ပါဝင်ခြင်းကြောင့် ကျန်းမားရေးအတွက် အထောက်အကူပြုသော ဆေးဖက်ဝင်သောအပင်တစ်မျိုးဖြစ်သည်။ ကြက်ဟင်း ခါးရွက်ကို ကြိတ်ခြေပြီး သတ္တုရည်ကို သောက်ခြင်း နှင့် ပြုတ်ရည်ကိုသောက်ခြင်းဖြင့် ဆီချို၊ လိပ်ခေါင်း၊ ဝမ်းပျက်ဝမ်းလျှော၊ ပန်းနာရင်ကျပ်၊ အသည်းရောင်အသားဝါ၊ လည်ချောင်းနာလျင် ကြက်ဟင်းခါး ရွက်နှင့် ပင်စိမ်းရွက်ကို ရေနွေးအပူထဲတွင် ၁၅ မိနစ်လောက်စိမ့်ပြီး ပျားရည်အနည်းငယ်ရော၍ သောက်သုံးခြင်းဖြင့် ပျောက်ကင်းနိုင်ပြီး၊ ရာသီတုတ်ကွေးများဖြစ်ခဲ့လျင် ကြက်ဟင်းခါးရွက်ကို ကြိတ်၍ မျက်လုံးထဲသို့ထည့်ပေးခြင်းဖြင့် ပျောက်ကင်းနိုင်ကြောင်း လေ့လာသိရှိရပါသည်။ ကြက်ဟင်း ခါးသီးတွင် ရေဓာတ်၊ ပရိုတင်း၊ အဆီ၊ ကာဗိုဟိုက်ဒရိတ်၊ သံဓာတ်၊ ကယ်လ်ဆီယမ်၊ အမျှင်ဓာတ်၊ မဂ္ဂနီဆီယမ်၊ ဖော့စဖရိတ်၊ ပိုတက်ဆီယမ်၊ ဆိုဒီယမ်၊ ဇင့်နှင့်  ဗီတာမင် C တို့ပါဝင်ကြောင်း လေ့လာ သိရှိရပါသည်။  ကြက်ဟင်းခါးသီးတွင် ခါးဓာတ်ပါဝင်သောကြောင့် သွေးသန့်ခြင်း၊ သွေးတွင်းသကြား ဓာတ်ကိုထိန်းညှိပေးခြင်း၊ လေဖြတ်နိုင်ခြေကို လျော့ချ ပေးခြင်း၊ ဓာတ်တိုးဆန့်ကျင်ပစ္စည်းများ ကြွယ်ဝစွာပါဝင်သောကြောင့် ကင်ဆာမဖြစ်အောင် ကာကွယ်ပေးခြင်း၊ ပိုတက်ဆီယမ် ပါဝင်သောကြောင့် အသက်ရူလမ်းကြောင်းရှိ ချွဲသလိပ်များ ဖယ်ရှားပေးခြင်း၊ အမျှင်ဓာတ်နှင့် ရေဓာတ်ကြွယ်ဝစွာ ပါဝင်သောကြောင့် ဝမ်းချုပ်ခြင်းကို သက်သာစေပြီး အစာခြေစနစ်ကောင်းမွန်ခြင်း၊ ဗီတာမင် C နှင့် ဇင့်ဓာတ်များ ကြွယ်ဝစွာပါဝင်သောကြောင့် ကိုယ်ခံအားကောင်းမွန်ခြင်းနှင့် အသည်းကျန်းမာခြင်းကို အထောက်အကူပြုကြောင်းလေ့လာသိရှိရပါသည်။  ကြက်ဟင်းခါးသီးကို ကိုယ်ဝန်ဆောင်မိခင်၊ နို့တိုက်မိခင်၊ ရောဂါအခံရှိသူများ စားသုံးရန်မသင့်ကြောင်း လေ့လာသိရှိရပါသည်။ ကြက်ဟင်းခါး သီးစားခြင်းဖြင် အကြောတက်ခြင်း၊ သွေးတိုးခြင်းစသော အယူအဆများလဲရှိကြသလို အလွန်အကျွံ စားသုံးခြင်းကို ရှောင်ကျင်သင့်ကြောင်း လေ့လာသိရှိရပါသည်။  ကြက်ဟင်းခါးသီးသည် ခါးသက်သော အရသာလည်း လူအများစားသုံးသော အရံဟင်းလျာတစ်မျိုးဖြစ်သည်။  ကြက်ဟင်းညွှန့်ကို ပြုတ်၍ အတို့အမြှပ်အဖြစ် စားသောက်လေ့ရှိကြပြီး၊ ကြက်ဟင်းခါးသီးအကင်းများကိုပြုတ်၍ အတို့အမြှပ်ပြု လုပ်ခြင်းနှင့် ပုဇွန်ခြောက်၊ ကြက်ဥ၊ အသားမျိုးစုံနဲ့ကြော်၍ စားသောက်၍ရသလို၊ ကြက်ဟင်းခါးသီးကို ဆီပြန်နှပ်၍စားသုံးလေ့ရှိကြောင်း လေ့လာသိရှိရပါသည်။ မန္တလေးမြို့ပေါ်ရှိ ယခု မတ်လဈေးနှုန်း အနေဖြင့် လက်ကားဈေးနှုန်း(၁ပိဿာ)လျှင် ၄၀၀ဝိ/-၊ လက်လီဈေး(၁ပိဿာ)လျှင်၆၀၀ဝိ/-နှုန်းဖြင့် ရောင်းချလျက်ရှိကြောင်း ဈေးရောင်းချသူတစ်ဦးထံမှ သိရှိရပါသည်။

DOCA(မန္တလေး)

မန္တလေးမြို့တွင်းသို့ ကျောက်ပန်းတောင်း၊ ရမည်းသင်းနှင့် မိတ္ထီလာ နယ်ဘက်များမှ ဝင်ရောက်သည့် မန်ကျည်းမှည့်များနှင့် မန္တလေးမြို့တွင်း အနီးတဝိုက်မှ ထွက်ရှိသော အမရပူရ၊ ပုသိမ်ကြီးနှင့် မတ္တရာမြို့နယ်များမှ မန်ကျည်းမှည့်များ ယခုအခါ လှိုင်လှိုင်ထွက်ရှိနေပါသည်။ မန်ကျည်းမှည့်အသစ်များကို မိုးရာသီနှင့် ဆောင်းရာသီတွင် စားသုံးရန်အတွက်ဝယ်ယူထားရှိခြင်း၊ နွေရာသီတွင် မန်ကျည်းမှည့်ဖျော်ရည်အေးအေးလေး သောက်သုံးရန်အတွက် ဝယ်ယူသိုလှောင် ထားရှိကြပါသည်။ မန္တလေးမြို့တွင် ပူပြင်းသည့်နွေရာသီကာလ၌ သစ်ပင်အရိပ်များအောက်တွင် တွန်းလှည်းလေးများဖြင့် ရောင်းချသည့် မန်ကျည်းကျောက်ကျောဖျော်ရည်သည် အလွန် ကောင်းလှ ပါသည်။ ပူပြင်းလှသည့် နွေတွင် ရင်ကိုအေးမြစေပါသည်။ ယခုနှစ် မန်းမြို့အတွင်း ဝင်ရောက် သည့် မန်ကျည်းဈေးကွက်အနေနှင့် (၁)ပိဿာလျှင် ၁၄၀၀၀ ကျပ်၊ ၁၆၀၀၀ ကျပ်များနှင့် ဈေးကွက်တွင် ရောင်းဝယ်မှုရှိနေပြီး ယခင်နှစ် ယခုလိုကာလတွင် မန်ကျည်းမှည့် (၁)ပိဿာ လျှင် ၈၀၀၀ ကျပ်၊  ၉၀၀၀ ကျပ်ဈေးနှုန်းများနှင့် ဈေးကွက်တွင်း ဖြစ်ပေါ်ခဲ့သည့်အတွက် ယခုနှစ်တွင် (၁)ပိဿာလျှင် ၅၀၀၀ ကျပ်ဝန်းကျင် ဈေးမြင့်ကြောင်း လေ့လာသိရှိရပါသည်။

DOCA(မန္တလေး)