ပြည်တွင်းကုန်သွယ်မှုသတင်း

          မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံစိုက်ပျိုး ဖြစ်ထွန်းလျက်ရှိရာ ၎င်းသီးနှံများအနက် ငရုတ်သီးနှံကို ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်ခရိုင်အတွင်း (၇၄၂၂)ဧက စိုက်ပျိုးခဲ့ပြီး ကျောက်ဆည်မြို့နယ်တွင် (၁၆၁၅)ဧကစိုက်ပျိုးခဲ့ပြီး ရိတ်သိမ်းဧက (၆၈၄)ဧက ရိတ်သိမ်းပြီးစီးပြီဖြစ်ကြောင်း သက်ဆိုင်ရာ ဌာန၏ စာရင်းများအရသိရှိရသည် ။ ငရုတ်မျိုးများ အနေဖြင့် သာမို ၊ ဒီမွန် ၊ အက်စတာ၊ ၆၉၂၊ကျားခေါင်း ငရုတ်မျိုးများကိုစိုက်ပျိုးကြပြီး၎င်းမျိုးများအနက် ၆၉၂ငရုတ်မျိုးများကို ဇန်နဝါရီလ နှင့် ဖေဖော်ဝါရီလများတွင် စိုက်ပျိုးကြကြောင်း ၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း(၁၅၀၀၀၀၀/-)ကျပ် ခန့်ကုန်ကျကြောင်း ၊ အထွက်နှုန်း အနေဖြင့် (၃၅၀-၄၀၀)ပိဿာခန့်ထွက်ရှိကြောင်း ၊ ငရုတ်သီး ဈေးနှုန်းအနေဖြင့် ငရုတ်သီးခြောက် အညှာပါ တစ်ပိဿာလျှင်(၉၀၀၀)ကျပ်၊ ငရုတ်သီးခြောက်အညှာခြွေ တစ်ပိဿာလျှင်(၁၀၀၀၀)ကျပ်၊ ဈေးနှုန်း များဖြင့် အရောင်းအဝယ်ဖြစ်နေကြောင်း ၊ (၁)ဧက အကျိုးအမြတ်အနေဖြင့် (၁၆၅၀၀၀၀/-) ကျပ် ဝန်းကျင်မြတ်ကြောင်း၊ ငရုတ်ပွဲစားများမှ စိုက်ခင်းအထိလာရောက်ဝယ်ယူကြပြီး ဈေးကွက်ရှိရာ မန္တလေး ၊ ရန်ကုန်မြို့များသို့ တင်ပို့ရောင်းချကြကြောင်း၊ ငရုတ်စိုက်ပျိုးခြင်းဖြင့် အပိုဝင်ငွေရရှိသည့် အပြင်မိသားစုစားဝတ်နေရေးပါ ပြေလည်သည့်အတွက် ပိုမိုတိုးချဲ့စိုက်ပျိုးသင့်ပါကြောင်း ငရုတ် စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

             မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံစိုက်ပျိုး ဖြစ်ထွန်းလျက်ရှိရာ ၎င်းသီးနှံများအနက် ပဲစဉ်းငုံ(မိုးဦး)ကို ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင် (၉၄၀)ဧက၊စဉ့်ကိုင်မြို့နယ်တွင်(၄၅၈)ဧက၊မြစ်သား မြို့နယ်တွင်(၃၀၂)ဧက ၊ စုစုပေါင်း(၁၇၀၀)ဧက စိုက်ပျိုးထားကြောင်း သက်ဆိုင်ရာဌာန၏ စာရင်းများအရသိရှိရပါသည်။ ပဲစဉ်းငုံကို သီးသန့်စိုက်ပျိုးမှုများရှိသလို သီးထပ်သီးညှပ်အဖြစ်လည်း စိုက်ပျိူးကြကြောင်း ၊ အများဆုံးစိုက်ပျိုးသောမျိုးများမှာ ကြေးနီရောင်တဘက်လှဲမျိုး၊ ရွှေဝါရောင် လုံးသေးဒင်္ဂါးမျိုးများကို အများဆုံးစိုက်ပျိုးကြကြောင်း၊ မေလနှင့်ဇွန်လများတွင် စတင်စိုက်ပျိုးခဲ့ပြီး ဖေဖော်ဝါရီလနှင့်မတ်လ များတွင် စတင်ထွက်ပေါ်မည်ဖြစ်ကြောင်း ၊ ယခုအချိန်တွင် မိုးရွာသွန်းမှု ကောင်းသောကြောင့် ပဲစဉ်းငုံအပင်များ အသီးအပွင့်ဝေဝေဆာဆာဖြင့် အောင်မြင်ဖြစ်ထွန်းလျက်ရှိ ကြောင်း ၊ တစ်ဧကကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း (၃၀၀၀၀၀/-)ကျပ် ဝန်းကျင်ခန့် ကုန်ကျကြောင်း ၊ ယခင်နှစ် အထွက်နှုန်းအနေဖြင့် (၁၀-၁၁)တင်းခန့် ထွက်ရှိခဲ့ကြောင်း၊စျေးနှုန်းအနေဖြင့် တစ်တင်းလျှင် (၁၀၈၀၀၀/-)ကျပ် စျေးနှုန်းရှိခဲ့ပြီး အကျိုးအမြတ် အနေဖြင့်(၇၈၀၀၀၀/-)ကျပ်ခန့်မြတ်ခဲ့ကြောင်း ၊ ယခုအချိန်တွင် ပဲစဉ်းငုံများ ထွက်ပေါ်ခြင်းမရှိသေး သော်လည်း စျေးနှုန်းအနေဖြင့် စက်တင်ဘာလ နောက်ဆုံးပတ်တွင် တစ်တင်းလျင်(၉၀၀၀၀/-) ကျပ်စျေးနှုန်းများရှိခဲ့ပြီး၊ အောက်တိုဘာလ ဒုတိယပတ်တွင် တစ်တင်းလျှင် (၇၃၀၀၀/-) ကျပ် ဈေးနှုန်းများဖြင့် အရောင်းအဝယ်ဖြစ်နေပြီး ယခင်လနှင့်နှိုင်းယှဉ်ပါက စျေးနှုန်းအနည်းငယ် ကျဆင်းသွားကြောင်းပွဲရုံများမှသိရှိရပါသည်။ ပဲစဉ်းငုံကို ပဲဟင်း ၊ ပဲကြော် ၊ ပဲစဉ်းငုံ အသီးကို အစိမ်းပြုတ်၍ စားသုံးကြပါသည် ။ ပဲစဉ်းငုံ စားသုံးခြင်းဖြင့်ပန်းနာရင်ကြပ်ရောဂါများကိုလည်း ပျောက်ကင်းစေသည့်အပြင်သွေးအားနည်းရောဂါ၊သွေးတိုးကိုကျစေပြီးကိုယ်ခံအားစနစ်ကိုကောင်းမွန် စေကြောင်း ၊ ပဲစင်းငုံထဲတွင်   ပိုတက်စီယမ် သတ္တုဓာတ်  အဓိက အများဆုံးပါရှိပြီး ၎င်းဓာတ်က ခန္ဓာကိုယ်ထဲ  ရောက်သွားသောအခါ ဓာတ်ပြုပြီးနောက် သွေးဖိအားကို လျှော့ချပေးပါသည် ။ ထို့ကြောင့် သွေးတိုးရောဂါရှိသူများအနေဖြင့် ပဲစင်းငုံကို နေ့စဉ် စားပေးသင့်သည်။ ပရိုတင်းဓာတ် အပြည့်အဝပါရှိသည့် ပဲစင်းငုံကို စားပေးခြင်းဖြင့် ဆဲလ်များ၊ တစ်သျှူးများ၊ ကြွက်သားများ နှင့် အရိုးများကို ကောင်းစွာတည်ဆောက်စေကာ ခန္ဓာကိုယ်ကြီးထွားဖွံ့ဖြိုးစေကြောင်း ကျန်းမာရေး စာစောင်များမှ လေ့လာသိရှိရပါသည် ။ ပဲစဉ်းငုံ စားသုံးခြင်းဖြင့် ကျန်းမာရေး အကျိုးကျေးဇူးများ ရရှိသဖြင့် စားသုံးသင့်ပါကြောင်းရေးသား တင်ပြအပ်ပါသည်။

DOCA(မန္တလေး)

          မြန်မာနိုင်ငံသည် နွေ၊ မိုး၊ဆောင်း ဥတုသုံးပါးညီမျှခြင်းကြောင့် ဒေသမရွေး သီးပင်၊ စားပင်များ အားစိုက်ပျိုးဖြစ်ထွန်းကြပါသည်။ ၎င်းသီးနှံများအနက် ခရမ်းချဉ်သီး သီးနှံကို ဒေသမရွေး လွယ်ကူစွာ စိုက်ပျိုးလျှက်ရှိပါသည် ။ ယခုအချိန်တွင် အောင်ပန်း ၊ အင်းလေးမှထွက်ရှိသော ခရမ်းချဉ်သီးများ ကျောက်ဆည်ခရိုင်အတွင်းသို့ ဝင်ရောက်လျက်ရှိကြောင်း ၊ မြို့နယ်အတွင်း စိုက်ပျိုးထားသော ခရမ်းချဉ်သီး သီးနှံများလည်း ထွက်ပေါ်နေပြီဖြစ်ကြောင်း ၊ ခရမ်းချဉ်သီး‌ စျေးနှုန်းအနေဖြင့် စက်တင်ဘာလ နောက်ဆုံးပတ်တွင် တစ်ပိဿာလျှင်(၁၅၀၀-၂၀၀၀)ကျပ် ရှိခဲ့ရာမှ အောက်တိုဘာလ ဒုတိယပတ်တွင် တစ်ပိဿာလျှင် (၂၀၀၀-၂၅၀၀)ကျပ်  စျေးနှုန်းများဖြင့်  ရောင်းဝယ်လျက်ရှိပြီး ယခင်အပတ် နှင့် ယခုအပတ် နှိုင်းယှဉ်ပါက စျေးနှုန်းအနည်းငယ် မြင့်တက်လာကြောင်း ၊ ခရမ်းချဉ်သီးများ ဈေးကွက်အတွင်း ဝင်ရောက်မှုအနေဖြင့် အောင်ပန်း ၊ အင်းလေးမြို့များမှ ဝင်ရောက်ရာတွင် သယ်ယူစရိတ်များပြားခြင်း နှင့် ဝင်ရောက်မှုနည်းခြင်းတို့ကြောင့် ခရမ်းချဉ်သီး ဈေးနှုန်းများ မြင့်တက်လျက်ရှိကြောင်း ခရမ်းချဉ်သီးရောင်းချသည့် စျေးသည်များထံမှ သိရှိရပါသည်။

DOCA(မန္တလေး)

       မြန်မာနိုင်ငံ၏ အထက်အညာဒေသဖြစ်သည့် မန္တလေးတိုင်း‌ဒေသကြီး ၊ ကျောက်ဆည်ခရိုင် သည်သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းအပင်များအနက် ဆေးဖတ်ဝင်အပင် တစ်မျိုး ဖြစ်သည့် မယ်ဇလီပင်များ ဖူးပွင့်လျက်ရှိပါသည် ။ ဖူးပွင့်နေသော မယ်ဇလီဖူးပွင့်လေးများအား သေချာစွာခူးယူ၍ အပွင့်အစိမ်းအတိုင်း ရောင်းချကြသလို အဖူးအပွင့်လေးများကို ရေနွေးဖြင့်ဖျော၍ ရောင်းချကြပါသည် ။ ယခုအချိန်တွင် မယ်ဇလီဖူးများ စတင်ထွက်ပေါ် လျှက်ရှိပါသည် ။ ရာသီပေါ် မယ်ဇလီဖူးများကို ဆေးဖက်ဝင်သောကြောင့် စားသုံးသူများ   ကြိုက်နှစ်သက်ကြပါသည် ။  ကျောက်ဆည်မြို့ရှိ မြို့မစျေး နှင့် အေးမြကြည်လင်စျေးများတွင် မယ်ဇလီဖူး အစိမ်း နို့ဆီဗူး (၁)ဗူးလျင် (၅၀၀/-)ကျပ် ၊ ပြုတ်ပြီးသား နို့ဆီဗူး(၁)ဗူးလျှင် (၈၀၀/-)ကျပ် ၊ (၂)ဗူးလျင်(၁၅၀၀/-)ကျပ် စျေးနှုန်းများဖြင့် ရောင်းချရကြောင်း ၊ ရောင်းချသူများမှာ နေ့စား အလုပ်သမားများမှ မိသားစု ဝင်ငွေတိုးရန်အတွက် ခူးဆွတ်၍ ရောင်းချခြင်းဖြစ်ပါသည် ။ ပြုတ်ပြီးသော မယ်ဇလီဖူးလေးများကို ငရုတ်ဆုံဖြင့် လေးစိတ်ကွဲအောင် မညက်တညက်ထောင်းပြီး ဇလုံကြီးတစ်ခုထဲတွင်ထည့်၍  ဆီချက် (ဆီ)၊ ပါးပါးလှီးထားသည့် ကြက်သွန်နီ၊   ပုစွန်ခြောက်မှုန့်၊ မြေပဲထောင်း မှုန့်၊ နှမ်း၊ ဆား၊ ဟင်းခတ်မှုန့် တို့ကိုရောနယ်ပြီး အသုပ်သုပ်၍စားသုံးကြပါသည်။ မယ်ဇလီဖူးသည် ချို၊ ဆိမ့်၊ ဖန်  အရသာသုံးမျိုး ရောပြွမ်း၍ ခါးသက်သက်အရသာလွှမ်းမိုးသော  မဲဇလီတွင်  အာပေါဓာတ်ကြီးစိုး၍ ဝါယောဓာတ် ပူးတွဲပါရှိနေသောကြောင့် ရှေးတိုင်းရင်းသမားတော်ကြီးများက မြန်မာ့ရိုးရာ ဆေးမြီးတိုအဖြစ် အိပ်မပျော်ခြင်း ၊ သွေးတက်ခြင်း ၊ ရုပ်ရည်ခန်းခြောက်ခြင်း ၊ အသက်ရှူပြွန်ချောင်းရောင်ခြင်း ၊  ချောင်းခြောက်ဆိုးခြင်း စသည့် ရောဂါများအတွက်  ကုသပေးခဲ့ကြကြောင်း လေ့လာသိရှိရပါသည် ။ ဆေးဖက်လည်းဝင် အဟာရတန်ဖိုးလည်းမြင့်မားပြီး ခံတွင်းမြိန်စေသော မယ်ဇလီဖူးများကို ဝယ်ယူ စားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

    စစ်ကိုင်းတိုင်းဒေသကြီး၊ မုံရွာမြို့၊ မန်ကျည်းပင်ဈေးအတွင်းတွင်  ကြိတ်ခေါက် ဆွဲလုပ်ငန်းများကို စီးပွားဖြစ် တစ်နိုင်တစ်ပိုင်လုပ်ကိုင်ကြပါသည်။ ကြိတ်ခေါက်ဆွဲများ ကို မုံရွာမြို့ပေါ်နှင့်ကျေးရွာများမှ ဝယ်ယူစားသုံးကြကြောင်း၊ ကြိတ်ခေါက်ဆွဲရောင်းချသူများ၊  အလှူပွဲ၊ မွေးနေ့ပွဲနှင့် ဘုရားပွဲများတွင် အသုံးပြုရန်အတွက် ဝယ်ယူကြသဖြင့် အရောင်းအဝယ်သွက်လျက် ရှိကြောင်း သိရပါသည်။

    ၂၀၂၅ခုနှစ်၊ အောက်တိုဘာလ ဒုတိယအပတ်အတွင်း ရောင်းချလျက်ရှိသော ကြိတ်ခေါက်ဆွဲ ဈေးနှုန်းများမှာ (၂၅)ကျပ်သား လျှင် (၇၀၀)ကျပ်၊ (၅၀)ကျပ်သားလျှင် (၁၃၀၀)ကျပ်၊ (၁)ပိဿာ လျှင် (၂၅၀၀) ကျပ်နှုန်းဖြင့် အရောင်းအဝယ်ဖြစ်လျက်ရှိကြောင်း ကြိတ်ခေါက်ဆွဲ ရောင်းချသူထံမှ သိရှိရပါသည်။

DOCA(စစ်ကိုင်း)