ပြည်တွင်းကုန်သွယ်မှုသတင်း

    ပြည်မြို့ သစ်သီးဝလံဈေးကွက်တွင် ယခုရာသီပေါ် ပိန္နဲသီးမှည့်များလည်း ရောင်းဝယ်လျက် ရှိသလို Online ဈေးကွက်၌ ယခုရာသီတွင်သာရရှိသော တောင်ပိန္နဲသီး (ခ)စုံပဒက်သီး များလည်း ရောင်းချနေသည်ကို တွေ့ရပါသည်။ စုံပဒက်ပင်သည် ပိန္နဲပင်နှင့်တူ၍ အသီးမှာလည်း ပိန္နဲသီးကဲ့သို့ပင် အဝါရောင်အမွှာများရှိပါသည်။ သူ၏အရသာမှာ ချိုသောအရသာရှိ၍ အနံ့မှာလည်း ဒူးရင်းသီးအနံ့ထက်ပိုပြင်း၍ ပိုမွှေးပါသည်။ စုံပဒက်သီးများကို စုံကဒက်၊ စွန်မတက်၊ စုံတတ် စသည်ဖြင့် အမျိုးမျိုးခေါ်ကြပါသည်။ နေရာဒေသလိုက်၍ အခေါ်အဝေါ်များလည်း ကွဲပြားကြပါသည်။ ဒူးရင်းသီးများစားပြီး၍ အပူများလျှင် အပူငြိမ်းစေရန် မင်းဂွတ်သီးများကို စားလေ့ရှိကြပါ သည်။ အပူငြိမ်းစေရန် မင်းဂွတ်သီးထက် စုံပဒက်သီးက ပို၍အစွမ်းထက်သည်ဟု မွန်တိုင်းရင်း ဆေးဆရာကြီးများက အမိန့်ရှိသည်ဟုလည်း လေ့လာသိရှိရပါသည်။ စုံပဒက်သီးများကို အသေး တစ်လုံးလျှင် (၂၅၀၀)ကျပ် နှင့် အကြီးတစ်လုံးလျှင် (၃၅၀၀)ကျပ်ဖြင့် ပြည် Online ဈေးကွက်တွင် ရောင်းချနေသည်ကိုတွေ့ရပါသည်။ အဆိုပါ စုံပဒက်သီးသည် မြိတ်၊ ထားဝယ်ဒေသများတွင် အများဆုံးထွက်ရှိခြင်းဖြစ်ပြီး ပြည်မြို့ရှိ သစ်သီးဝလံရောင်းချသူများမှ ဝယ်ယူရောင်းချလျက်ရှိကြောင်း သိရပါသည်။

DOCA(ပဲခူး)

   ချင်းကို လူများကဟင်းခတ်အမွှေးအကြိုက်အဖြစ် အသုံးပြုကြသလို ဓါးလှီးချင်းကို ချင်းသုပ် သုပ်၍စားကြပါသည်။  အသားဟင်းများချက်ရာတွင် ချင်းသည် မပါမဖြစ် အသုံးဝင်သော မီးဖိုချောင်သုံး သီးနှံတစ်မျိုးဖြစ်ပါသည်။ ပြည်ခရိုင်အနေဖြင့် ချင်းထွက်ရှိမှုမရှိဘဲ ချင်းထွက်ရှိရာ ဒေသဖြစ်သော အောင်ပန်းမှ မှာယူ၍ရောင်းချကြောင်း သိရပါသည်။ ယခုအချိန်တွင် ချင်းထွက်ရှိရာ ဒေသဖြစ်သော အောင်ပန်းမြို့တွင် ချင်းထွက်ရှိမှုနည်းပြီး အိန္ဒိယမှ ဝယ်ယူမှုရှိ၍ ချင်းစိုက် တောင်သူများအနေဖြင့် ဈေးတက်၍ရောင်းချကြောင်း သိရပါသည်။ အိန္ဒိယဘက်သို့ တင်ပို့မှုရှိသဖြင့် ပြည်ဈေးကွက်သို့ တင်ပို့မှုနည်းလာကြောင်း၊ မေလတတိယပတ်မှစ၍ ချင်းဈေးများ တက်လာခဲ့ပါကြောင်း၊ ပြည်ချင်းပွဲရုံများမှာ လှောင်ချင်းများနှင့် အနည်းငယ်ဝင်ရောက်မှုရှိသော ချင်းများဖြင့်သာ ရောင်းဝယ်မှုရှိ၍ ချင်းဈေးများအဆမတန်မြင့်တက်လာခဲ့ပါကြောင်း၊ ယခုအပတ်ချင်းဈေးများမှာ ပွဲရုံဈေး ဥမ (ရှယ်) တစ်ပိဿာလျှင် (၁၅၀၀၀)ကျပ်၊ (ဂျွန်)တစ်ပိဿာလျှင် (၁၀၀၀၀-၁၂၀၀၀) ကျပ်ရှိပြီး လက်လီဈေးမှာ ချင်းဥမ(ရှယ်) တစ်ပိဿာလျှင် (၁၈၀၀၀)ကျပ်၊ (ဂျွန်)တစ်ပိဿာလျှင် (၁၃၀၀၀)ကျပ်ဈေးဖြင့် ရောင်းချကြောင်းနှင့် ပြည်ဈေးကွက်သို့ ယခုအပတ်တွင် ပိဿာချိန် (၅၀)ခန့် အရောင်းအဝယ်ဖြစ်ပြီး ယခင်ကာလများထက် အရောင်းအဝယ်ပိုဖြစ်လျက်ရှိကြောင်း သိရှိရပါသည် ။

DOCA(ပဲခူး)

    ဖလံတောင်ဝှေးကို မြန်မာပြည်၏ အချို့ဒေသများတွင် ကလန်တောင်ဝှေး ဟုခေါ်ဝေါ် ကြပါသည်။ အရှေ့တောင်အာရှနိုင်ငံများ၏ မိုးဥတုတွင် ပေါက်ကြပါသည်။ ယခုလို မိုးရာသီ ကာလများတွင် တွေ့ရသော ရာသီစာဖလံတောင်ဝှေးကို အိမ်ရှင်မများက ပေါ်ဦးပေါ်ဖျား ဝယ်ကြပြီး အရသာရှိရှိ ကြော်လှော်ချက်ပြုတ်စားကြပါသည်။ ဖလံတောင်ဝှေးဥကို အခြောက်ခံ၍ အမှုန့် ပြုလုပ်ပြီး နေ့စဉ်သောက်သုံးပေးခြင်းဖြင့် ဆီးချိုရောဂါများပျောက်ကင်းစေကာ ခန္ဓာကိုယ်မှမလိုအပ်သော အဆီများကို ကျဆင်းစေပါသည်။ ရှေးလူကြီးများက ဖလံတောင်ဝှေးအမြစ်ကို ထောင်းထု၍ နှာစေး၊ ချောင်းဆိုး၊ အစာမကြေ၊ လေနာ၊ အရေပြားရောဂါတို့အတွက် ဆေးမီးတိုအဖြစ် ကုသလေ့ရှိကြပါသည်။ ဖလံတောင်ဝှေးပင်ကို အိမ်တွင်တစ်နိုင်တစ်ပိုင်စိုက်ပျိုးခြင်းဖြင့် မီးဖိုချောင် စရိတ်လည်း ရရှိပါသည်။ ပြည်မြို့ရှိဈေးကွက်သို့ ပေါက်ခေါင်း၊ ပေါင်းတလည်၊ ရွှေတောင်၊ ပန်းတောင်းဘက်မှ အများဆုံးဝင်ရောက်လျက်ရှိပြီး ပြည်မြို့နယ်အတွင်းသာမက ရန်ကုန်မြို့သို့ပါ တင်ပို့ရောင်းချလျက်ရှိပါသည်။ ဈေးနှုန်းအနေဖြင့် ဖလံတောင်ဝှေးတစ်စည်းလျှင် (၅၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်တွင် အခြေခံစားသောက်ကုန်များ ဖြစ်သော ဆီ၊ ဆား၊ ကြက်ဥနှင့် ငါးတန်ငါးများကို ပြင်ပပေါက်ဈေးထက် ဈေးနှုန်းသက်သာစွာရောင်းချပေးခြင်းကို စားသုံးသူရေးရာဦးစီးဌာနကဦးဆောင်၍ သက်ဆိုင်ရာဌာနများဖြစ်သော တိုင်းဆားလုပ်ငန်းဦးစီးဌာန၊ တိုင်းမွေးမြူရေးဌာနနှင့်ကုသ‌ရေးဦးစီးဌာန၊ တိုင်းဆီကုန်သည်နှင့် ဆီလုပ်ငန်းရှင်များအသင်းတို့ပူးပေါင်းပါဝင်ပြီး ၂၀၂၃ခုနှစ်၊ ဇွန်လ (၁၈) ရက်နေ့၊ နံနက်ပိုင်းတွင် တိုင်းအထွေထွေအုပ်ချုပ်ရေးဦးစီးဌာန၊ တိုင်းစီမံကိန်း၊ တိုင်းဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ ပုသိမ်ပညာရေးကောလိပ်တွင် ရောင်းချပေးခဲ့ကြောင်းသိရပါသည်။

          ထိုသို့ ရောင်းချရာတွင် ကြက်ဥ (၄) လုံးလျှင် (၁၀၀ဝိ/-) ကျပ်နှုန်းဖြင့် ကြက်ဥအလုံး (၂၄၀၀)၊ ဆား (၁) ပိဿာလျှင် (၃၀ဝိ/-) ကျပ်နှုန်းဖြင့် ဆားပိဿာ (၂၅၀)၊ ငါးတန် (၁) ပိဿာလျှင် (၃၃၅ဝိ/) ကျပ်နှုန်းဖြင့် ငါးတန်ပိဿာ (၃၀)၊ ဆီ (၁) ပိဿာလျှင် (၄၂၀ဝိ/-) ကျပ်နှုန်းဖြင့် ဆီပိဿာ (၆၁၀) ရောင်းချပေးခဲ့ကြောင်းသိရပါသည်။

DOCA(ဧရာဝတီ)

        တောင်ငူခရိုင်၊ ဖြူးမြို့မှ ခြံဝင်းကျယ်ကြီးများရှိ မြေကွက်လွတ်များတွင် ဆူးပုပ်နှင့် ကင်မွန်းချဉ် စိုက်ပျိုးသူများမှာ ဝင်ငွေကောင်းလျက်ရှိပါသည်။ ဆောင်းရာသီနှင့် နွေရာသီတို့တွင် ရောင်းအားကောင်းပြီး မိုးရာသီတွင်မူ တခြားရာသီပေါ် ဟင်းသီးဟင်းရွက်များ ပေါများသဖြင့် ရောင်းအား အနည်းငယ်ကျကြောင်း သိရပါသည်။

         ယခုကာလတွင် ဆူးပုပ်ရွက်၊ ကင်မွန်းချဉ်ရွက် စိုက်ပျိုးသူများအနေဖြင့် ဆူးပုပ်အခက် ၇ ခက်ပါ တစ်စည်းလျှင် ၁၀၀ ကျပ်နှင့် ကင်မွန်းချဉ် အခက် ၈ ခက်ပါ တစ်စည်းလျှင် ၁၀၀ ကျပ်ဖြင့် ဖြူးမြို့ စည်ပင်သာယာဈေးရှိ ဟင်းသီးဟင်းရွက်ရောင်းချသူများသို့ ပို့ဆောင်ပေးရပါသည်။

      ဆောင်းရာသီနှင့် နွေရာသီများတွင် တစ်နေ့လျှင် စည်ပင်သာယာဈေးသို့ တစ်မျိုးလျှင် အစည်း ၈၀ မှ ၁၀၀ ခန့် ပို့ဆောင်ပေးရပြီး ယခုမိုးကာလတွင် အစည်း ၅၀ ခန့်သာ ပို့ဆောင်ရောင်းချပေးရကြောင်း ခြံဝင်းမြေကွက်လပ်တွင် ဆူးပုပ်နှင့် ကင်မွန်းချဉ်စိုက်ပျိုးသူ ဒေါ်သန်းသန်းအေး၏ ပြောပြချက်အရ သိရပါသည်။

DOCA(ပဲခူး)