ပြည်တွင်းကုန်သွယ်မှုသတင်း

      မန္တလေးတိုင်းဒေသကြီး ၊ ကျောက်ဆည်ခရိုင်တွင် သီးနှံမျိုးစုံ စိုက်ပျိုးလျက်ရှိရာ စားဖိုဆောင် သီးနှံတစ်မျိုးဖြစ်သည့် ကြက်သွန်ဖြူသီးနှံကိုလည်း စိုက်ပျိုးလျက်ရှိပါသည် ။ ခရိုင်အတွင်းတွင် ကြက်သွန်ဖြူစိုက်ဧက(၂၁၇)ဧကစိုက်ပျိုးထားရှိပြီး ဧပြီလကုန်ပိုင်းမှစ၍ အားလုံးရိတ်သိမ်းပြီးဖြစ် ပါသည်။ကြက်သွန်ဖြူ(၁)ဧက ကုန်ကျစရိတ်အနေဖြင့် သွင်းအားစုအပါအဝင်(၁၂၀၀၀၀၀/-)ကျပ်ခန့် ကုန်ကျကြောင်း ၊ မျိုးအနေဖြင့် ဗမာကြက်သွန်မျိုးများကိုသာ စိုက်ပျိုးကြပါသည် ။ တစ်ဧက ကြက်သွန်ဖြူစိုက်ပျိုးမှုမျိုးအနေဖြင့်ပိဿာ(၆၀)ခန့်ကုန်ကျကြောင်း၊ ကြက်သွန်ဖြူသည်ကြက်သွန်နီ ထက်(၁)လနောက်ကျပြီးမှထွက်ကြောင်း၊ (၁)ဧက အထွက်နှုန်းအနေဖြင့် (၁၅၀၀)ပိဿာခန့်ထွက်ရှိကြောင်း ၊ ပေါ်ဦးပေါ်စတွင် ဗမာကြက်သွန်ဖြူ (၁)ပိဿာလျှင်(၄၀၀၀/-)ကျပ်စျေးဖြင့် ရောင်းချရပြီး ယခုအချိန်တွင်(၈၀၀၀/-)ကျပ်စျေးဖြင့် ရောင်းဝယ်လျက်ရှိပါသည် ။ ရှမ်းကြက်သွန်ဖြူအနေဖြင့် တစ်ပိဿာလျှင်(၇၀၀၀/-)ကျပ်ဖြင့် ရောင်းဝယ်လျက်ရှိပါသည်။အိမ်ရှင်မများအနေဖြင့် ကြက်သွန်ဖြူကို ရွေးချယ်အသုံးပြုရာတွင် ဗမာကြက်သွန်ဖြူကို ပို၍အသုံးများကြကြောင်း၊ ဗမာကြက်သွန်ဖြူမှာ အခွံပါး၍ပိုမိုမွှေးသောကြောင့် အသုံးများခြင်းဖြစ်ပါသည်။ကြက်သွန်ဖြူသည် အိမ်ရှင်မများ ချက်ပြုတ်ကြော်လှော်သောနေရာတွင် မပါမဖြစ်သောသီးနှံတစ်မျိုးဖြစ်ပါသည်။ တောင်သူများအနေဖြင့် ယခင်နှစ်များထက် ကြက်သွန်ဖြူ စျေးနှုန်းကောင်းမွန်သောကြောင့်  အကျိုးအမြတ်များ ပိုမိုရရှိသဖြင့် ကြက်သွန်ဖြူသီးနှံကို တိုးချဲ့စိုက်ပျိုးသင့်ကြောင်း ရေးသားတင်ပြအပ်ပါသည်။

DOCA(မန္တလေး)

    ကျောက်ဆည်ခရိုင်အတွင်းရှိ တောင်သူများသည် စပါး၊ ပဲ၊ ပြောင်း၊ နှမ်းစသည့် သီးနှံမျိုးစုံ စိုက်ပျိုးကြသော်လည်း စပါးကိုသာ အဓိကထားစိုက်ပျိုးကြကြောင်း သိရှိရပါသည်။ယခုဇွန်လတွင် မိုးစပါးရာသီအတွက် စပါးမျိုးများ စတင်ပျိုးထောင်နေပြီဖြစ်ပြီး ဧရာပဒေသာစပါးမျိုးကို အဓိကထား စိုက်ပျိုးကြကြောင်း၊ယခင်နှစ်ကစပါးမျိုး(၁)တင်းလျှင်(၂၀၀၀၀/-)ကျပ်ဝန်းကျင်ရှိခဲ့သော်လည်း ယခုအခါ ဧရာပဒေသာမျိုးစပါးတစ်တင်းလျှင်(၂၈၀၀၀-၃၀၀၀၀)ကျပ်အထိစျေးပေးဝယ်ယူရကြောင်း၊ တစ်ဧကစိုက်ပျိုးရန်အတွက် စပါးမျိုး(၂)တင်းပျိုးထောင်ရကြောင်း သိရှိရပါသည်။ ယခုအခါ စပါးများ ပျိုးထောင်ရန်အတွက် ဆည်မြောင်းဦးစီးဌာနမှ ဇွန်လ(၁၆)ရက်နေ့မှစတင်ပြီး ရေများပေးဝေပြီဖြစ်သည့်အတွက် တောင်သူများ စပါးပျိုးထောင်ရန် စတင်ပြင်ဆင်နေပြီဖြစ်ကြောင်း ၊ ပျိုးထောင်ရန်အတွက် ထယ်ရေးပြင်ရာတွင် နွားချေးနှင့်ဖွဲပြာအောက်ခံထားပြီး ပျိုးထောင်ပါက ပျိုးပင်ဖြစ်ထွန်းမှု အားကောင်းကြောင်း၊ပျိုးပင်တစ်လသားအကျော်တွင် ရွှေ့ပြောင်းစိုက်ပျိုးနိုင်ကြောင်း သိရပါသည်။ တစ်ချို့တောင်သူအနည်းငယ်မှာ ပျိုးနှုတ် ၊ လယ်ထွန် ၊ ကောက်စိုက်စရိတ် သက်သာရန်အတွက် လယ်ကွက်ထဲတွင် တိုက်ရိုက်အစေ့ချ စိုက်ပျိုးကြကြောင်းလည်း သိရှိရပါသည် ။ တိုက်ရိုက်အစေ့ချ စိုက်ပျိုးပြီး တစ်လကျော်အချိန်တွင် သမန်းနှိုးရပါသည်။သမန်းနှိုးသည့်အနေဖြင့် နွားထွန်ဖြင့် သမန်းနှိုးပြီး ဓါတ်မြေသြဇာထည့်သွင်းပတ်ကြဲပေးရပါသည်။တောင်သူအများစုမှာ ပျိုးထောင်ပြီး ရွှေ့ပြောင်းစိုက်ပျိုးသည့်စနစ်ကိုသာ အများဆုံးစိုက်ပျိုးကြကြောင်း ၊ တစ်ဧက စိုက်ပျိုးရန်အတွက် ပျိုးထောင်စရိတ်အနေဖြင့် ထွန်ယက်မြေပြင်၊ မျိုးစပါး၊ လုပ်သားခ စုစုပေါင်း(၁၀၀၀၀၀/-)ကျပ်ဝန်းကျင်ကုန်ကျကြောင်း စပါးစိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

       ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၃ ခုနှစ်၊ ဇွန်လ ၂၆ ရက်နေ့ မှ ဇူလိုင်လ ၂ ရက်နေ့အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄၀၁၀  ကျပ် ဖြစ်ကြောင်း ထုတ်ပြန်ကြေညာထားပါသည်။

      ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

      အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူရုံးမှ ဦးစီးမှူး ဒေါ်စန်းမြင့်ရီသည် တိုင်းဒေသကြီးဦးစီးမှူး၏ လမ်းညွှန်မှနှင့်အတူ ပခုက္ကူခရိုင်ဦးစီးမှူး၏ ကြီးကြပ်ကွပ်ကဲမှုဖြင့် ပြည်တွင်းထုတ်ကုန်ကဏ္ဍဖွံ့ဖြိုးတိုးတက်စေရေးအတွက် (၂၀-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဒေသတွင်းထုတ်ကုန်လုပ်ငန်းတစ်ခုဖြစ်သည့် မြေပဲဆုံဆီလုပ်ငန်းရှင်ထံသို့ သွားရောက်တွေ့ဆုံမေးမြန်းခြင်းများပြုလုပ်ခဲ့ပါသည်။

    မကွေးတိုင်းဒေသကြီးကို ဆီအိုးကြီးတိုင်းဟု သတ်မှတ်ခေါ်ဆိုသည့်အတိုင်း မကွေးတိုင်းအတွင်းရှိ  ပခုက္ကူခရိုင်သည်လည်း ဆီထွက်သီးနှံများစိုက်ပျိုး၍ ဆီများကြိတ်ခွဲထုတ်လုပ်ရောင်းချတင်ပို့လျက်ရှိသော ဒေသတစ်ခုဖြစ်ပါသည်။ ပခုက္ကူခရိုင်အတွင်း မြေပဲစိုက်ဧက (၁၅၂၇၄၆) ဧက၊ နှမ်းစိုက်ဧက (၁၆၀၂၂၅) ဧကရှိပြီး ဒေသတွင်းစားသုံးမှု/ဖူလုံမှုရှိသည့်အပြင် အခြားတိုင်းဒေသကြီးများသို့ပါ တင်ပို့ရောင်းချလျက်ရှိပါသည်။

    မြေပဲဆံများအား စက်ကြီးများဖြင့်ကြိတ်ခွဲ၍ စားသုံးကြသည့်အပြင် ဆုံဖြင့်ကြိတ်သောဆုံဆီများကိုလည်း စားသုံးလာသောကြောင့် ယခုအချိန်တွင် ဆုံဆီလုပ်ငန်းများ တွင်ကျယ်စွာလည်ပတ်နေရကြောင်း၊  ဆုံဆီလုပ်ငန်းရှင်၏ ပြောကြားချက်အရသိရှိရပါသည်။ ကြိတ်ခွဲရာတွင် ဆုံကြိတ်သည့်အိမ်သို့ မြေပဲဆံကိုဝယ်၍ လာရောက်ကြိတ်ခွဲသူများရှိသည့်အပြင် မြေပဲဆံကို ဈေးကွက်ပေါက်ဈေးအတိုင်း ရောင်းချပေးပြီး ကြိတ်ခွဲရသည်များလည်းရှိကြောင်း၊ ဆုံဆီကြိတ်ခွဲရာတွင် မြေပဲလုံးဆံ၊ ပြန့်ဆံ၊ (၆) လပဲများကို အစိုဓာတ်မကျန်စေရန်အလို့ငှာ ခြောက်သွေ့အောင်နေလှန်းရကြောင်း၊ ခြောက်သွေ့သွားသောပဲများကို ကြီး/လတ်/ငယ် ခွဲခြမ်းများ အဆင့်ဆင့်ရောက်အောင် ပြာတီးသန့်စင်ရကြောင်း၊ ပြာတီးသန့်စင်ရာတွင် အမျိုးသမီးလုပ်သားများကိုငှားရကြောင်း၊ တစ်နေ့လျှင် တစ်ဦးလုပ်သားခမှာ (၅၀၀၀-၆၀၀၀) ကျပ်ပေးရကြောင်းသိရှိရပါသည်။ မြေပဲဆံအောင်လျှင် အောင်သလို ဆီထွက်ကောင်းသောကြောင့် မြေပဲလုံးဆံချောများကိုသာကြိတ်ခွဲကြောင်း၊ ဆုံ (၄) ဆုံရှိကြောင်း၊ တစ်ဆုံကြိတ်ခွဲလျှင် (၁း၀၀) နာရီမှ (၁:၃၀) နာရီခန့်ကြိတ်ခွဲရပါကြောင်း၊‌ မြေပဲအမျိုးအစားပေါ်မူတည်၍ ကြိတ်ခွဲချိန် မတူညီကြောင်း၊ မြေပဲ (၄၀) ပိဿာကြိတ်လျှင် ကုန်ချောပဲဆီ (၁၆) ပိဿာခန့်ထွက်ရှိကြောင်းသိရှိရပါသည်။

    လုပ်သားခအနေဖြင့် (၁) ဆုံအတွက် လုပ်သားခမှာ (၇၀၀) ကျပ်နှုန်းပေးရပြီး ကြိတ်ခွဲခအနေ ဖြင့် (၅) ပိဿာ (၁) ဆုံလျှင် (၁၈၀၀) ကျပ်၊ ပဲဖက်တစ်ပိဿာလျှင် (၃၀၀၀-၃၁၀၀) ကျပ်၊ ဆုံဆီတစ်ပိဿာလျှင် ယခုအချိန်တွင် (၁၄၀၀၀) ကျပ်ရှိသောကြောင့် ယခုနှစ်တွင် ပိုမိုကြိတ်ခွဲထုတ်လုပ်ရောင်းချရပါကြောင်း၊‌ ဈေးကွက်အနေဖြင့် ပခုက္ကူဒေသတွင်းနှင့် ရန်ကုန်၊ မန္တလေး၊ နေပြည်တော်၊ မုံရွာမြို့များသို့ တင်ပို့ရောင်းချလျက်ရှိကြောင်းသိရှိရပါသည်။

     ပခုက္ကူဒေသအတွင်း မြေပဲယို၊ မြေပဲဆားလှော်၊ မြေပဲကြော် အစရှိသော အသေးစားလုပ်ငန်းများစွာရှိသောကြောင့် မြေပဲတောင့်၊ မြေပဲဆံများလည်း အရောင်းအဝယ်ဖြစ်နေသည့်အပြင် စက်ပဲဆီ၊ ဆုံပဲဆီများလည်း  ထုတ်လုပ်တင်ပို့နိုင်ခြင်းဖြင့် ဒေသခံပြည်သူများနှင့် လုပ်ငန်းရှင်များ အလုပ်အကိုင်အခွင့်အလမ်းများရရှိပြီး ပြည်တွင်းကဏ္ဍဖွံ့ဖြိုးတိုးတက်ရေးအတွက် အထောက်အကူပြုလျက်ရှိကြောင်းသိရှိရပါသည်။

DOCA(မကွေး)

    ၂၄.၆.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-