ပြည်တွင်းကုန်သွယ်မှုသတင်း

   ယခုမိုးဦးကာလတွင် ပြည်မြို့နယ်၊ ဂန္ဓမာစက်မှုဇုန်အတွင်းရှိ ကြံတောကုန်းရပ်ကွက်တွင် ခြံစိုက်တောင်သူများအနေဖြင့် စိန်ခြယ်ပန်းများ စတင်စိုက်ပျိုးနေပြီဖြစ်ပါသည်။ စိန်ခြယ်ပန်းသည် ဘုရားပန်း၊ နတ်ပန်းများနှင့် အလှူမင်္ဂလာဆောင်အခမ်းအနားများတွင် အသုံးပြုကြသောပန်းများ ဖြစ်ပါသည်။ စိန်ခြယ်ပန်း တစ်ဧကစိုက်ပျိုးရာတွင် မျိုးစေ့တစ်ပုလင်းလျှင် (၇၀၀၀)ကျပ်နှုန်း ဝယ်ယူစိုက်ပျိုးကြပြီး ဇူလိုင်လပထမပတ်တွင် စတင်စိုက်ပျိုးပြီး ဇူလိုင်လကုန်တွင် အပွင့်များ စတင်ပွင့်ကာ ဩဂုတ်၊ စက်တင်ဘာလတို့တွင် ရောင်းတန်းဝင်ပန်းများထွက်ရှိပါသည်။ စိန်ခြယ်ကို ရေသွင်း၍စိုက်ပျိုးသကဲ့သို့ မိုးရေကောင်းစွာရရှိလျှင် ပို၍အပွင့်အရောင်လှပပါသည်။ စိန်ခြယ်ပန်း စိုက်ပျိုးရာတွင် အမြစ်စွဲစေရန်အတွက် ပုလဲဓါတ်မြေဩဇာကို (၁၀)ရက်တစ်ကြိမ်ထည့် ပေးရပါသည်။ ပန်းပင်ခါးလောက်ရောက်လာမှသာ မြေဩဇာကျွေးခြင်းကို ရပ်နားရပါသည်။ စတင်ထွက်ပေါ်လာသော စိန်ခြယ်ပန်းများကို ရောင်းချရာတွင် အခက်(၃)ခက်ပါ တစ်စည်းကို (၂၀၀)ကျပ်ဖြင့် စတင် ရောင်းချ ကြောင်း သိရပါသည်။ ပန်းများလှိုင်လှိုင်ပေါ်လာသောအခါမှသာ တစ်စည်းကို (၁၀၀)ကျပ်နှုန်းဖြင့် ရောင်းချကြပါသည်။ စိန်ခြယ်ပန်း တစ်ဧကစိုက်ပျိုး ထုတ်လုပ်ကုန်ကျစရိတ်မှာ (၂၀၀၀၀)ကျပ်ခန့် ကုန်ကျပြီး ပန်းများထွက်ပေါ်ချိန်တွင် တစ်နေ့ဝင်ငွေ ရရှိမှုမှာ (၅၀၀၀)ကျပ်ခန့်ရရှိကြောင်းသိရပါသည်။ စိန်ခြယ်ပန်းစိုက်ပျိုးသူတောင်သူများအနေဖြင့် ပန်းပွင့်မတုံးမချင်း နေ့စဉ်ဝင်ငွေများရရှိသဖြင့် စိုက်ပျိုးသင့်သောပန်းဖြစ်ပါသည်။  မိမိတို့ အိမ်ခြံဝန်းများအတွင်းတွင်လည်း တစ်နိုင်တစ်ပိုင်စိုက်ပျိုးထားရှိလျှင် အိမ်အတွက်လည်းလှပပြီး ဘုရားပန်း၊ နတ်ပန်းများကပ်လှူရာတွင် အသုံးဝင်မှာဖြစ်ပါသည်။

DOCA(ပဲခူး)

     ပြည်အနီးအနားတွင် ဇောင်လျားပင်များ အများအပြားတွေ့ရှိရပါသည်။ ဇောင်းလျားပင်တွင် အချိုသီးနှင့် အချဉ်သီးဟူ၍ နှစ်မျိုးရှိပါသည်။ ဇောင်းလျားသီးသည် ဆေးဖက်ဝင်သောသီးနှံတစ်မျိုးဖြစ်ပြီး ဗီတာမင်အေ၊ သတ္တုဓါတ်တို့များစွာ ပါဝင်ပါသည်။ ဇောင်လျားသီးကို သကြားနှင့် စားပေးခြင်းဖြင့် အစာမကြေဖြစ်ခြင်း၊ ရင်ပြည့်ရင်ကယ်ဖြစ်ခြင်းမှ ကင်းဝေးစေပါသည်။ ဟင်းချက်၍လည်းစားသုံးနိုင်ပြီး ငါးပြေမနှင့်ချက်၍စားသုံးလျှင် ကျောက်ကပ်တွင် ကျောက်တည်ခြင်းကို သက်သာစေပါသည်။ ဇောင်လျားသီးအချိုသီးကို ယိုထိုး၍စားသုံးနိုင်ကြောင်း၊ အစိမ်းသီးကို လက်ဖက်သားနှင့်နယ်၍ ချဉ်ငံစပ် စားသုံးနိုင်ကြောင်း၊ ကြယ်ပုံသဏ္ဍာန်ရှိသော ဇောင်လျားသီးကို စားသုံးပေးခြင်းဖြင့် ကျန်းမာရေးနှင့် သင့်တော်ပြီး အသားအရေကိုလည်း စိုပြေစေကြောင်း၊ ဇောင်းလျားသီး ဈေးနှုန်းများအနေဖြင့် တစ်ပိဿာလျှင် (၂၅၀၀)ကျပ်ဖြင့် ရောင်းချကြောင်း သိရပါသည်။

DOCA(ပဲခူး)

  နိုင်ငံတစ်နိုင်ငံ၏ စီးပွားရေးအဆင့်အတန်းများကို (SMEs) အသေးစား၊ အလတ်စား စီးပွားရေး လုပ်ငန်းများအပေါ် အစိုးရ၏အားပေးကူညီမှုနှင့် ယင်းတို့၏ဖွံ့ဖြိုးတိုးတက်မှုအပေါ်ကြည့်လျှင် သိ နိုင်ပါသည်။ မြန်မာနိုင်ငံ၏ စီးပွားရေးဖွံ့ဖြိုးတိုးတက်မှုတွင် အသေးစားနှင့် အလတ်စားစီးပွားရေး လုပ်ငန်းများ၏ အခန်းကဏ္ဍသည်လည်း များစွာအရေးပါပါသည်။ မြန်မာတစ်နိုင်ငံလုံးတွင်ရှိသော စီးပွားရေးလုပ်ငန်းများ၏ (၉၀) ရာခိုင်နှုန်းကျော်သည် အသေးစားနှင့် အလတ်စားစီးပွားရေးလုပ်ငန်း ကဏ္ဍများဖြစ်နေရာ ယင်းတို့၏ တိုတက်မှု၊ ဆုတ်ယုတ်မှုသည် တိုင်းပြည်စီးပွားရေးတည်ငြိမ်မှုကို ကျဆင်းမှုနှင့် တိုက်ရိုက်ဆက်စပ်နေမည်ဖြစ်ပါသည်။ နိုင်ငံ၏ထုတ်လုပ်မှုစွမ်းအား ပိုမိုတိုးတက်လာ စေရန်နှင့် GDP ပိုမိုတိုးတက်လာစေရန်တို့အတွက် ပြည်တွင်းရှိ SME များ ပိုမိုရှင်သန်ဖွံ့ဖြိုးတိုးတက်လာစေရန်နှင့် အလုပ်အကိုင်အခွင့်အလမ်းများပိုမိုတိုးတက်လာစေရန် စက်မှုလုပ်ငန်းကြီးများ၊ နိုင်ငံခြားမှရင်းနှီးမြှုပ်နှံသည့် စက်ရုံလုပ်ငန်းများနှင့် ပြည်တွင်းရှိ SME လုပ်ငန်းများအပြန်အလှန်ချိတ်ဆက် ဆောင်ရွက်နိုင်သည့် စက်မှုချိတ်ဆက်မှုမြှင့်တင်နိုင်ရေးသည် နိုင်ငံ၏လူမှုစီးပွားဘဝဖွံ့ဖြိုးတိုးတက်ရေးအတွက် အဓိကအရေးပါသည့် အချက်ဖြစ်သောကြောင့် နိုင်ငံတော်အစိုးရအနေဖြင့်လည်း SMEလုပ်ငန်းများဖွံ့ဖြိုးတိုးတက်ရေးအတွက် မူဝါတစ်ရပ်ချမှတ်ကာ ဆောင်ရွက်လျက်ရှိပါသည်။

   ထို့ကြောင့် ရှမ်းပြည်နယ် (တောင်ပိုင်း) ရှိ SME လုပ်ငန်းများလုပ်ကိုင်သူများအနက် တောင်ကြီးမြို့၊ ကံကြီးရပ်ကွက်ရှိ ဦးလာ အမှတ်တံဆိပ် အာလူးကြော်လုပ်ငန်းသို့ သွားရောက်လေ့လာခဲ့ပါသည်။ ကုန်ပစ္စည်း၏အမည်မှာ ရိုးရိုးလေးနှင့်ဆန်းနေခြင်းသည် ကုန်စည်၏စွဲဆောင်မှုတစ်ခုပင်ဖြစ်နေပါသည်။ ဦးလာ အာလူးကြော်လုပ်ငန်းမှာ ကိုဗစ်-၁၉ ကပ်ရောဂါမတိုင်မီက အစပြုခဲ့ပြီး  ကပ်ရောဂါအခြေအနေကြောင့် စီးပွားရေးလုပ်ငန်းများကို ခေတ္တရပ်နားခဲ့ရပြီး ကိုဗစ်-၁၉ ကာလအပြီးမှာတော့ တစိုက်မတ်မတ်ကြိုးစားမှုကြောင့် လုပ်ငန်း အောင်မြင်လာခဲ့သည်ဟုသိရပါသည်။

     ဦးလာ အာလူးကြော်လုပ်ငန်းကို ခေတ်စနစ်အရ ယခင်ကဲ့သို့ထင်းမီး၊ ဖွဲမီးများနှင့်ကြော်ခြင်း မဟုတ်ဘဲ ဂက်စ်ကိုအသုံးပြုပြီး ကြော်သောကြောင့် အလုပ်ရုံ၏သန့်ရှင်းမှုမှာ အလွန်ကောင်းမွန်သည်ကိုတွေ့ရပါသည်။ ဂက်စ်ကိုအသုံးပြုခြင်းကြောင့် မီးအနည်း/အများချိန်ဆမှုများမလိုအပ်ခြင်းနှင့် လုပ်သားအင်အားအများကြီးသုံးစရာမလိုခြင်းတို့ကြောင့် လုပ်အားစရိတ်များသက်သာသည်ကိုတွေ့ရပါသည်။ ဂက်စ်အိုးများကိုလည်း အလုပ်ရုံ၏အပြင်ဘက်တွင်ထားပြီး ဂက်စ်ထုတ်ပေးသည့်ပိုက်နှင့် အာလူးကြော်ရာမှထွက်သောညှော်နံ့များကို အိပ်ဇောပိုက်များနှင့်သေချာပြန်ထုတ်ထားတာကြောင့် အလုပ်ရုံကိုသန့်ရှင်းသပ်ရပ်စေပါသည်။ အာလူးများကို ခွာခြင်း/ခြစ်ခြင်းတို့ပြုလုပ်ရာတွင်လည်း စက်များကိုအသုံးပြုပြီး အာလူးခြစ်ကန်၊ အာလူးဆေးကန်များကို အဆင့်ဆင့် သေချာသပ်ရပ်စွာပြုလုပ်ထားပြီး ပိုးမွှားပေါက်ပွားလွယ်မှုများမဖြစ်အောင် အတတ်နိုင်ဆုံး စတီးများကိုသာအသုံးပြုထားသည်ကိုလည်းတွေ့ရပါသည်။ အာလူးကိုခြစ်ပြီးလျှင် အနံ့၊ အရသာ (ဆား၊ ဟင်းခတ်မှုန့်၊ ငရုတ်ကောင်း၊ ငရုတ်သီးဆီ) များနှင့် အရသာရှိအောင် ပါဝင်ပစ္စည်းများ၏ အချိန်အဆအတိုင်းထည့်၍ ရောနယ်ပြီး Meizan အမှတ်တံဆိပ် ဆီကိုသာအသုံးပြု၍ ကြော်သည်ဟုသိရပါသည်။ အာလူးကြော်တွင် ထည့်သွင်းအသုံးပြုသည့် အနံ့၊ အရသာဖြစ်သော ငရုတ်ကောင်းနဲ့ ငရုတ်သီးကုန်ကြမ်းများကို မန္တလေးဘက်မှ မှာယူအသုံးပြုသည်ဟုသိရပါသည်။ ဦးလာ အာလူးကြော်ကို အပါး (အချို/အစပ်) နှင့် စကာ (အချို/အစပ်) ဆိုပြီး အရသာ (၂) မျိုး၊ အမျိုးအစား (၂) မျိုးတို့ဖြင့် ထုတ်လုပ်ဖြန့်ချိလျက်ရှိသည်ဟုသိရပါသည်။

      အာလူးကြော်၏ အဓိကကုန်ကြမ်းဖြစ်သော အာလူးကို အောင်ပန်း၊ ဟဲဟိုးမှမှာယူပြီး အကောင်းဆုံးအာလူးအမျိုးအစား (ထိပ်စ) ကိုသာသုံးသည်ဟုသိရပါသည်။ တစ်ရက်လျှင် အာလူးပိဿာချိန် (၄၀) ကျော် (၅၀) ခန့်ရပြီး အော်ဒါရှိလျှင် ရှိသလောက် ကြော်ရကြောင်းသိရှိရပါသည်။ ကိုဗစ်-၁၉ ကာလမတိုင်မီတွင် တစ်ရက်လျှင် အာလူးပိဿာချိန် (၈၀) ခန့်အထိကြော်ရပြီး ကိုဗစ်-၁၉ ကာလအလွန်နောက်ပိုင်းတွင် ရောင်းအားမှာ အနည်းငယ်ကျသွားသည်ဟုလည်းသိရပါသည်။ အာလူးပိဿာချိန် (၄၀) ကိုကြော်လျှင် အာလူးကြော် (၃၀၀) ဂရမ်ထုပ် (၈၅) ထုပ်ခန့်ထွက်ပြီး (၉၀) ဂရမ်ထုပ် (၂၅၀) ကျော်ခန့်ထွက်သည်ဟုသိရပါသည်။ အာလူးတစ်ပိဿာကိုကြော်လျှင် ဆီ (၁၅) ကျပ်သားခန့်ကုန်ပြီး ပိဿာချိန် (၈၀) ကိုကြော်လျှင် ဆီ (၁၂) ပိဿာခန့်ကုန်သည်ဟုလည်းသိရှိရပါသည်။ စားသုံးသူများအတွက် ပါကင်အိတ်ကိုလည်း အကောင်းဆုံးပစ္စည်းများနှင့် အသေအချာလုပ်ထားကြောင်းတွေ့ရပါသည်။ အာလူးကြော်ပါကင်အိတ်ကုန်ကြမ်းများကို  တရုတ်ပြည်မှမှာယူ၍ မန္တလေးတွင် တစ်ဆင့်ပါကင်အိတ်စက်ရုံ၌ အိတ်နမူနာပုံစံပြ၍ မှာယူကြပါသည်။ နယ်ဝေးသို့ပို့သည့် ကတ္တူပုံးများကို  ပြည်တွင်းတွင်ပြုလုပ်သည့်ပုံးများကိုသာသုံးသည်ဟုသိရပါသည်။ ပါကင်အိတ်များတွင်လည်း စားသုံးသူများယုံကြည်စိတ်ချစွာစားသုံးနိုင်ရန်အတွက် စားသုံးသူကာကွယ်ရေးဥပဒေနှင့်အညီ ကုန်ညွှန်းအမှတ်အသားများကို ပြည့်စုံစွာဖော်ပြပေးထားတာကိုလည်းတွေ့ရှိရပါသည်။ ကုန်စည်၏လိုအပ်သည့်အချက်အလက်များကို ပြည့်စုံစွာဖော်ပြပေးထားမှုကြောင့် စားသုံးသူများဝယ်ယူစားသောက်သည့်အခါ ကုန်စည်လုံခြုံစိတ်ချမှုကိုရရှိစေပါသည်။

   ဦးလာ အာလူးကြော်ကို (၃၀၀) ဂရမ်တစ်ထုပ်လျှင် (၅၀၀ဝိ/-) ကျပ်နှင့် (၉၀) ဂရမ်တစ်ထုပ်လျှင် (၁၅၀ဝိ/-) ကျပ်နှုန်းတို့ဖြင့် ဈေးကွက်တွင်းရောင်းချလျက်ရှိပါသည်။ ဦးလာ အာလူးကြော်ကို ရန်ကုန်၊ မန္တလေး၊ နေပြည်တော်၊ မူဆယ်၊ သံဖြူဇရပ်၊ မြဝတီနှင့် ရှမ်းပြည်နယ်အတွင်းရှိ မြို့နယ်များသို့ တင်ပို့ရောင်းချလျက်ရှိပါသည်။ နယ်ဝေးများသို့ပို့လျှင် ဦးလာ အာလူးကြော်၏ Logo အမှတ်တံဆိပ်ပါ ကတ္တူပုံးများဖြင့် တင်ပို့ရောင်းချလျက်ရှိပါသည်။ ကတ္တူပုံးတစ်ပုံးလျှင် အာလူးကြော် (၃၀၀) ဂရမ်အထုပ် ၂၄ထုပ်၊ (၉၀) ဂရမ်အထုပ် (၈၀) ခန့် ဝင်ဆံ့သည်ဟုလည်းသိရှိရပါသည်။

    ဦးလာ အာလူးကြော်လုပ်ငန်းမှာ စားသုံးသူများအပေါ် စေတနာထားမှုများကြောင့် အချိန်ကာလတစ်ခုအတွင်း အောင်မြင်မှုရလာသည်ဟုလည်းသိရပါသည်။ ထုပ်ပိုးမှုတွင်လည်း ကုန်ပစ္စည်း၏ Logo အမှတ်တံဆိပ်မှာ ရိုးရှင်းပြီး ခေါ်ရလွယ်ကူခြင်း၊ ပါကင်ထုပ်မှာလည်း မျက်စိပသာဒရှိသောကြောင့် လက်ဆောင်ပေးရာတွင်လည်း မျက်နှာပန်းလှသကဲ့သို့ ရရှိသူမှာလည်း စိတ်ကျေနပ်မှုကိုရရှိစေပါသည်။ အာလူးကြော်မှာ အသက်အရွယ် (၂/၃) နှစ်အရွယ်မှစ၍ (၆၀/၇၀) အရွယ်ထိ အရွယ်သုံးပါးလုံးနှင့် ရဟန်း၊ ရှင်၊ လူများအားလုံးပါ စားသုံးနိုင်သည့်ကုန်စည်ဖြစ်၍ အာလူးကြော်ဈေးကွက်တွင် ကျယ်ပြန့်ပြီး ရေရှည်တည်တံ့နိုင်သောလုပ်ငန်းတစ်ခုဖြစ်၍ ပြည်နယ်၏ အောင်မြင်သော SME လုပ်ငန်းတစ်ခုဖြစ်ပါကြောင်း ရေးသားတင်ပြလိုက်ရပါသည်။

DOCA( ရှမ်း)

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့ပေါ် စည်ပင်သာယာဈေးများသို့ ပဲစောင်းလျားသီးများ ဇွန်လနောက်ဆုံးပတ်မှစကာ ဝင်ရောက်မှုရှိလာပြီး ပြည်ခရိုင်၊ ရွှေတောင်မြို့နယ်ရှိ ဘယ်လတ်ရွာတွင် တစ်ရွာလုံးနီးပါး စီးပွားဖြစ်စိုက်ပျိုးလျက်ရှိကြောင်းသိရပါသည်။ ရွှေတောင်မြို့နယ်ရှိ ကျန်ရှိသည့်ရွာများတွင် အနည်းငယ်စိုက်ပျိုးကြောင်းလည်းသိရပြီး ပြည်မြို့နယ်၊ ပျဉ်းပင်ကိုင်း၊ သဇင်လှ၊ မှော်ဇာစသည့်ရွာများတွင်လည်း အနည်းငယ်စိုက်ပျိုးကြောင်း သိရပါသည်။ ပဲစောင်းလျားသီးကို တို့စရာအဖြစ်၊ ချဉ်ဖတ်အဖြစ်စားသုံးကြပြီး ပဲစောင်းလျားသီး နုနုလေးတွေကို ရေနွေးဖျော၍ ပါးပါးလှီးပြီး သံပုရာသီးညှစ်၊ ပုစွန်ခြောက်လေးထောင်းထည့်ကာ ဆီချက်နှင့် သုပ်စား၍သော်လည်းကောင်း၊ သီးစုံပဲကုလားဟင်းနှင့် ချဉ်ဟင်း၊ ဟင်းချိုထဲထည့်သွင်း ချက်ပြုတ်၍သော်လည်းကောင်း စားသုံးကြကြောင်း သိရပါသည်။

   ပဲစောင်းလျားသီးတွင် သံဓါတ်၊ မဂ္ဂနိစ်၊ ကယ်လ်စီယမ်၊ ဖော့စဖောရပ်စ်၊ ဗီတာမင် (A,B,C,E)၊ ဖောလိတ်ဓါတ်၊ ပရိုတင်းဓါတ်စသည့် သံဓါတ်မျိုးစုံနှင့် ဗီတာမင်မျိုးစုံပါဝင်သဖြင့် အရွယ်အတိုင်မီ ရင့်ရော်မှုကို ကာကွယ်ပေးပြီး အသားအရည်တင်းရင်းစေသည့်အပြင် ကယ်လိုရီပါဝင်မှု ပမာဏနည်းသဖြင့် ဝိတ်ချချင်သူများအတွက် အထူးစားသုံးပေးသင့်ကြောင်း၊ ဗီတာမင်စီပါဝင်မှုလည်းများသဖြင့် ကိုယ်ခံအားစနစ်အား ကောင်းစေကြောင်း၊ ကယ်စီယမ်ဓါတ်ပါဝင်မှုမြင့်မားသည့်အတွက်လည်း အရိုးများသန်မာစေပြီး ခွန်အားတိုးစေခြင်းနှင့် အာရုံကြောအားကောင်းစေသည့်အပြင် မှတ်ဉာဏ်အားကောင်းစေခြင်းတို့ကြောင့် ကလေးငယ်များလည်း စားသုံးသင့်ကြောင်း၊ ကျန်းမာရေးအတွက် အထူးသင့်လျော်သည့်သီးနှံဖြစ်ကြောင်း သိရှိရပါသည်။

    ပြည်မြို့ပေါ်ဈေးများတွင် တောင်သူများမှ ပဲစောင်းလျားသီး အတောင့်(၁၀၀)လျှင် ကျပ် (၁၀၀၀-၁၂၀၀)ကျပ်တို့ဖြင့်သွင်းရပြီး ဈေးသည်များမှ ပြန်လည်းရောင်းချရာတွင် (၁၀၀)တောင့်လျှင် အကြီး/ အသေးခွဲခြား၍ ကျပ် (၁၅၀၀-၁၈၀၀-၂၀၀၀)တို့ဖြင့် ပြန်လည်ရောင်းချပြီး လက်လီ (၅)တောင့် စည်းတစ်စည်းလျှင် ကျပ်(၁၀၀)ဖြင့် ပြန်လည်ရောင်းချကြောင်း သိရပါသည်။ ပဲစောင်းလျားသီး အမြစ်ကျသွားလျှင် ပဲမြစ်တူးဖော်၍ ရောင်းချလို့လဲရသဖြင့် အမြစ်အထိဝင်ငွေ ရရှိသည့်အတွက် စီးပွားဖြစ် အကျိုးဖြစ်ထွန်းစေ၍ စိုက်ပျိုးသင့်သောသီးနှံဖြစ်ကြောင်း တင်ပြရေးသားရပါသည်။

DOCA(ပဲခူး)

    ရှမ်းနံနံပင်(သို့မဟုတ်) ကုလားနံနံဟုခေါ်သော ရှမ်းနံနံပင်သည် ဟင်းခတ်အမွှေးအကြိုင် အပင်တစ်မျိုးဖြစ်ပါသည်။ ရှမ်းနံနံပင်အား စိုက်ပျိုးရာတွင် ရာသီဥတုအနေဖြင့် ပူနွေးစွတ်စိုသော ရာသီ ဥတုကို ကြိုက်နှစ်သက်ပါသည်။ ရှမ်းနံနံကို မြေအမျိုးအစားအမျိုးမျိုးတွင် စိုက်ပျိုးနိုင်ပါသော်လည်း လေဝင်လေထွက်ကောင်းပြီး သဲဆန်သော နုန်းမြေများတွင် စိုက်ပျိုးလျှင် ပိုမိုဖြစ်ထွန်းစေပါသည်။ ရှမ်းနံနံပင်အား စတင်မစိုက်ပျိုးမှီ အပင်များအတွက် အာဟာဓါတ် ကောင်းမွန်စွာရရှိစေရန် မြေပြုပြင် ထားသော မြေကြီးများထဲသို့ မြေဆွေးနှင့် ဓါတ်မြေဩဇာများ ထည့်ပေးရပါသည်။ အပင်များ စိုက်ပျိုးရာတွင် အစေ့တိုက်ရိုက်ချနည်းဖြင့်လည်းကောင်း၊ ပင်အဖျားများအား ဖြတ်တောက်ပြီး အမြစ် အပိုင်းများအား ပြန်လည်စိုက်ပျိုးနည်းဖြင့် စိုက်ပျိုးကြပါသည်။

     ရှမ်းနံနံပင်သည် အရွက်ကိုစားသောက်ရသည့်အတွက် အရွက်ပြားများ ချောစေရန်အတွက် အရိပ်ကောင်းမွန်စွာရရှိရန် ဝါးခြမ်းအမိုးလေးများဖြင့် စနစ်တကျပြုလုပ်ပေးခြင်းဖြင့် အရွက်များကို ပိုမိုကြီးထွားစေပါသည်။ ရှမ်းနံနံပင်၏အနံ့သည် မွှေးကြိုင်စေသဖြင့် အသားဟင်းများ ချက်ပြုတ်ရာ တွင် အရွက်များအား ထည့်ပေးခြင်းဖြင့် ဟင်းအညှီအနံ့များ ပျောက်ပြီး မွှေးကြိုင်စေပါသည်။ ရှမ်းနံနံပင်သည် ဟင်းခတ်အမွှေးအကြိုင်အဖြစ် အသုံးပြုရုံသာမက ကျန်းမာရေးအတွက်လည်း အထူးကောင်းမွန် စေပါသည်။ အရွက်ပြားများအား စနစ်တကျစားသုံးပေးလျှင် ပန်းနာရင်ကြပ်ရောဂါ ပျောက်ကင်းပြီး အစာအိမ်အတွက်လည်း အစာကြေစနစ်ကို ကောင်းမွန်စေပါသည်။  ထို့အပြင် အဆစ်အမြစ်များ ရောင်ရမ်းပြီး နာကျင်ခဲ့လျှင် နံနံအရွက်ပြားများအား ရေနွေးပူပူတွင်ထည့်ပြီး သောက်လျှင် သက်သာ ပျောက်ကင်းစေပါသည်။

    အပင်များအားစိုက်ပျိုးရာတွင် ပြာသိုလတွင် စတင်စိုက်ပျိုးပြီး ရက်(၃၀)ကြာလျှင် ပေါင်းမြတ် များကိုနှုတ်ပေးရသည်။ အဖူးများထွက်လာလျှင် ချိုးပေးရပါသည်။ သို့မှသာအရွက်များ ကြီးထွားနိုင်ပါ သည်။ မျိုးစေ့များအား ဝယ်ယူရာတွင် တစ်ပုလင်းလျှင် (၂၀၀၀၀)ကျပ်ဖြင့် ဝယ်ယူ၍ စိုက်ပျိုးရပါသည်။ နံနံပင်အား စတင်စိုက်ပျိုးပြီး (၂)လအကြာတွင် ဈေးကွက်အတွင်း စတင်ခူးယူ ရောင်းရပြီး တစ်နှစ် ပတ်လုံးခူးယူရောင်းချနိုင်ပါသည်။ ရှမ်းနံနံပင်စိုက်ပျိုးရာတွင် စီးပွားဖြစ် စိုက်ပျိုးခြင်း၊ မိသားစု တစ်နိုင်တစ်ပိုင်စိုက်ပျိုးခြင်းများပြုလုပ်ကြပါသည်။ ဈေးကွက်အနေဖြင့်လည်း ဈေးကွက်ရှိခြင်း၊ ပစ္စည်းတင်ပို့ရာတွင် လွယ်ကူခြင်းနှင့် တစ်နှစ်ပတ်လုံးရောင်းချရသဖြင့် ပုံမှန်ဝင်ငွေရရှိပါသည်။ တောင်တွင်းကြီးဒေသများတွင် စီးပွားဖြစ်စိုက်ပျိုးကြောင်းသိရှိရပြီး ပြည်မြို့နယ်အတွင်းရှိ ကျေးလက်ဒေသများတွင်လည်း တစ်နိုင်တစ်ပိုင်စိုက်ပျိုးကြပါသည်။  ဈေးကွက်အတွင်း ရောင်းချရာတွင် ကုန်စိမ်းဒိုင်များမှာ ရန်ကုန်၊ နေပြည်တော်၊ ကျောက်ပန်းတောင်းမြို့များသို့ တင်ပို့ရောင်းချကြောင်း သိရပါသည်။ ပြည်မြို့နယ်စည်ပင်သာယာဈေးများတွင် ကျေးလက်ဒေသများရှိ ခြံထွက်များမှ ရှမ်းနံနံပင်(၃)ပင်ပါ တစ်စည်းလျှင် (၁၀၀)ကျပ်နှုန်းဖြင့် ရောင်းချကြောင်း သိရပါသည်။

DOCA(ပဲခူး)