ပြည်တွင်းကုန်သွယ်မှုသတင်း

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ ကုန်မျိုးစုံဆိုင်များတွင် သရေစာ စားစရာ များဖြစ်သည့် ကြံသကာ၊ ဇီးတော်ဖီ၊ မြေပဲယို၊ နှမ်းယို၊ ဖရုံယို၊ ကုလားပဲချောင်းနှင့် မလိုင်လုံးများကို ရွှေဘို မြို့နှင့် မန္တလေးမြို့တို့မှ ဝယ်ယူရောင်းချသည့်အပြင် ဒေသထွက်များလည်းရောင်းချလျက်ရှိကြောင်း၊ သရေစာ မလိုင်လုံကို ဧည့်သည်များအား တည့်ခင်းဧည့်ခံရာ၌လည်းကောင်း၊ အချိုတည်းစရာဖြစ်လည်း ကောင်း ဝယ်ယူအသုံးပြုလျက်ရှိကြောင်း  သိရသည်။

      ၂၀၂၅ ခုနှစ်၊ စက်တင်ဘာလ စတုတ္ထပတ်အတွင်း မလိုင်လုံးလက်လီတစ်ပိဿာလျှင် (၉၈၀၀၀) ကျပ်၊ မလိုင်လုံးလက္ကားတစ်ပိဿာလျှင် (၉၅၀၀)ကျပ်၊ (၁၀)ကျပ်သားလျှင် (၁၀၀၀)ကျပ်ဈေးနှုန်းဖြင့် ရောင်းချလျက်ရှိကြောင်း၊ ယခင်တတိယပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း မလိုင်လုံး (၁)ပိဿာလျှင်(၂၀၀)ကျပ် ဈေးနှုန်းကျဆင်းသွားကြောင်း လုပ်ငန်းရှင်များထံမှ သိရသည်။

DOCA (စစ်ကိုင်း)

       မန္တလေးတိုင်းဒေသကြီး၊        ကျောက်ဆည်ခရိုင်၊မြစ်သားမြို့နယ်တွင် မိုးပြောင်းဖူးစိုက်ဧကများ အောင်မြင်ဖြစ်ထွန်းလျက် ရှိပြီး ဇူလိုင်လကုန်မှစတင်၍ မိုးပြောင်းဖူးစိုက်ဧက မြို့နယ်အတွင်း(၂၆၉)ဧက စိုက်ပျိုးထားပြီး ၎င်းဧကအားလုံး ရိတ်သိမ်းပြီးစီးကြောင်း သက်ဆိုင်ရာဌာန၏ စာရင်းများအရ သိရှိရပါသည်။

           အများဆုံးစိုက်ပျိုးသောမျိုးများမှာ သကြားပြောင်း မျိုးဖြစ်ပြီး (၁)ဧကမျိုးအနေဖြင့် ပြောင်းဖူးစေ့ (၈)ပြည် စိုက်ပျိုးရကြောင်း ၊ မျိုးစျေးနှုန်းအနေဖြင့် မျိုးစေ့(၁)ပြည်လျှင် (၅၅၀၀/-) ကျပ်ဖြင့် ဝယ်ယူစိုက်ပျိုးကြကြောင်း ၊ မေလတွင် စိုက်ပျိုးခဲ့သော မိုးပြောင်းဖူးများ ယခုသြဂုတ်လဆန်းမှ စတင်၍ ထွက်ရှိနေပြီဖြစ်ကြောင်း၊ (၁)ဧက စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း(၄၅၀၀၀၀/-)ကျပ်အထိ ကုန်ကျကြောင်း ၊ (၁)ဧက အထွက်နှုန်းအနေဖြင့် ပြောင်းဖူးစုစုပေါင်း(၄၅၀၀-၅၀၀၀)ဖူးခန့် ထွက်ရှိကြောင်း ၊ ပြောင်းဖူးစျေးနှုန်းအနေဖြင့်တစ်ဖူးလျှင် လက်ကား(၃၀၀/-)ကျပ်ဖြင့် ရောင်းဝယ်လျှက်ရှိကြောင်း၊ ပြောင်းဖူးပြုတ် တစ်ဖူးလျှင်(၇၀၀-၈၀၀) ကျပ်စျေးများဖြင့် ရောင်းဝယ်လျှက်ရှိကြောင်း၊ ပြောင်းဖူးကို လူကြိုက်များသောကြောင့် အရောင်း သွက်ကြောင်း ၊ ပြောင်းဖူးကို ပွဲစားများမှ အခင်းထဲအရောက် လာရောက်ဝယ်ယူကြကြောင်း၊ ပွဲစားများမှတဆင့် ရန်ကုန်၊မန္တလေးမြို့များရှိ ကုန်စိမ်းသီးနှံပွဲရုံများသို့ တစ်ဆင့်ပြန်လည်ရောင်းချကြောင်း၊ အကျိုးအမြတ်အနေဖြင့် စိုက်ပျိုး စရိတ်နှုတ်ပြီး(၉၀၀၀၀၀/-) ကျပ်ခန့် မြတ်ကြောင်း၊ မိသားစုစားဝတ်နေရေး ဖူလုံသည့်အပြင် အကျိုးအမြတ်ဖြစ်ထွန်းသော ပြောင်းဖူးသီးနှံကိုလည်း တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

      ရန်ကုန်တိုင်းဒေသကြီး လှိုင်မြို့နယ်  သီရိမင်္ဂလာဈေးတွင် တိုင်း/ပြည်နယ်များမှ သစ်သီး များ အများဆုံးဝင်ရောက်ကြောင်း သိရှိရပြီး စက်တင်ဘာလ (၂၃) ရက်နေ့ မှ စက်တင်ဘာလ (၂၉) ရက် နေ့အထိဖြစ်ပေါ်ခဲ့သော သစ်သီးအဝင်များမှာ ပြင်ဦးလွင်မှ အာတာလွတ်ဥ တစ်ပိဿာ ကျပ် ၅၀၀၀၊ ရှမ်းပြည်မှ ထောပတ်သီး အိတ်ကြီးတစ်အိတ် ကျပ် ၅၀၀၀၀၊  တိုက်ကြီးမှ ကလောဥ တစ်ပိဿာ ကျပ် ၁၀၀၀/၁၃၀၀၊ ပုပ္ပါးမှ ဩဇာသီး အလုံးကြီး ဂျပ်ဖာ ကျပ် ၄၀၀၀၀၊  မော်လမြိုင်မှ ကျွဲကောသီး ကျပ် ၁၅၀၀/၃၅၀၀/၆၀၀၀/၈၀၀၀၊ မန္တလေးမှ သင်္ဘောသီး တစ်လုံး ကျပ် ၂၅၀၀/၆၀၀၀၊ တန့်ယန်းမှ နာနတ်သီး တစ်လုံး ကျပ် ၁၅၀၀/၂၅၀၀/၃၀၀၀၊ ပုပ္ပါး၊ ပြင်ဦးလွင်မှ နဂါးမောက်သီး ဂျပ်ဖာ ကျပ် ၂၅၀၀၀၊  အောင်ပန်းမှ လိမ္မော်သီး တစ်လုံး ကျပ် ၇၀၀/၈၀၀၊ ချောင်းဦးမှ ဖရဲသီး(211) အလုံးကြီး ကျပ် ၃၀၀၀/၄၀၀၀/၅၀၀၀၊  တိုက်ကြီး၊ မှ မာလာကာသီး အိတ်ကြီးတစ်အိတ် ၅၀၀၀၀/၁၁၀၀၀၀ ကျပ်၊ ယိုးဒယားပန်းသီး တစ်သေတ္တာ ကျပ် ၁၈၀၀၀၀၊ ရှမ်းပြည်မှ ပန်းသီး တစ်သေတ္တာကျပ် ၈၀၀၀၀၊  ရှမ်းပြည်မှ သရက်သီး တစ်သေတ္တာ ကျပ် ၅၀၀၀၀/၆၅၀၀၀၊  ရှိကြောင်း သစ်သီးဈေးနှုန်းများသည့် ဈေးနှုန်းမြင့် တက်မှုမရှိဘဲ ယခင်တစ်ပတ်နှင့် ယခုတစ်ပတ် ဈေးနှုန်းများ အနည်းငယ်သာပြောင်းလဲ ကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံပန်းမန်ဟင်းသီး ဟင်းရွက်စိုက်ပျိုးထုတ်လုပ် တင်ပို့ ရောင်းချသူများအသင်း (MFVP) မှ သိရှိရပါသည်။

DOCA (ရန်ကုန်)       

      စားအုန်းဆီ တင်သွင်း သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီသည် စားအုန်းဆီ များသတ်မှတ်အရည်အသွေး၊ စံချိန်စံညွှန်းများနှင့်အညီများနှင့်အညီ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများသုံးစွဲနိုင်ရေး၊ ဈေးနှုန်းတည်ငြိမ်စွာ ဝယ်ယူစားသောက်နိုင်ရေး ကြီးကြပ်ထိန်းကျောင်း၍ သက်ဆိုင်ရာ ကုမ္ပဏီများက စားအုန်းဆီများ ပြည်ပမှ တင်သွင်းလျက်ရှိရာ ရန်ကုန်တိုင်းဒေသကြီး သီလဝါဆိပ်ကမ်း၊ ဗားကရာ (သဲကွင်း) ဆိပ်ကမ်း၊ ကြည့်မြင်တိုင်မြို့နယ် ကမ်းနားဈေးဆိပ်ကမ်း၊ KIPT ဆိပ်ကမ်းသို့ ဆီသင်္ဘောများ ဆိုက်ကပ်ပြီး ၂၈.၉.၂၀၂၅ ရက်နေ့တွင် ကြည့်မြင်တိုင်မြို့နယ် KIPT ဆိပ်ကမ်းသို့ MT. BAUHINIA V 07/25 OP သင်္ဘောဖြင့် Star 2 ဆီကန်သို့  300 MT ၊  Star 3   ဆီကန်သို့ 1897 MT၊ Star 4  ဆီကန်သို့ 3100 MT စုစုပေါင်း တန်ချိန်(5297) ဝင်ရောက်လျက်ရှိကြောင်း သိရှိရပါသည်။

DOCA (ရန်ကုန်)

          မန္တလေးတိုင်းဒေသကြီး ၊ ကျောက်ဆည်ခရိုင်သည် ဆီထွက်သီးနှံမျိုးစုံ အောင်မြင်ဖြစ်ထွန်း လျက်ရှိရာ ၄င်းသီးနှံများအနက်မိုး နှမ်းသီးနှံကို၂၀၂၅-၂၀၂၆ဘဏ္ဍာနှစ်တွင် မြစ်သားမြို့နယ်တွင် (၄၂၀၀)ဧက စိုက်ပျိုးပြီး ၎င်းဧကများအားလုံး ရိတ်သိမ်းပြီးစီးပြီဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ မိုးနှမ်း(၁)ဧကစိုက်ပျိုးလျှင် မျိုးအနေဖြင့်(၂-၃) ပြည်စိုက်ပျိုးရ ကြောင်း၊ (၁)ပြည်လျှင် (၈၀၀၀/-)ကျပ်စျေးနှုန်းဖြင့် ဝယ်ယူစိုက်ပျိုးရကြောင်း၊ မိုးနှမ်းစိုက်ပျိုးမှု (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း (၃၅၀၀၀၀/-) ကျပ်ခန့် ကုန်ကျကြောင်း၊ စိုက်ပျိုးသော မျိုးများမှာ နှမ်းဖြူ၊ နှမ်းညို၊ နှမ်းနက်မျိုးများကို အများဆုံးစိုက်ပျိုး ကြကြောင်း၊ အများဆုံးစိုက်ပျိုးသော ရွာများမှာ နွားလျှာရိုးရွာ၊ ညောင်ဂျစ်ရွာ၊ ရိုးကန်ရွာနှင့် မန်ကျည်းကန်ရွာများတွင် အများဆုံးစိုက်ပျိုးကြကြောင်း၊ မိုးနှမ်းကို ထွန်ကြောင်းဆွဲ အစေ့ချစနစ်ဖြင့် စိုက်ပျိုးကြကြောင်း၊ မိုးနှမ်းတစ်ဧက အထွက်နှုန်းအနေဖြင့် (၁၀-၁၂)တင်းခန့် ထွက်ရှိကြောင်း၊ ယခင်နှစ်တွင် နှမ်းဖြူ တစ်တင်းလျှင်(၁၂၂၀၀၀/-)ကျပ်၊ နှမ်းညို တစ်တင်းလျှင် (၉၆၀၀၀/-)ကျပ်၊ နှမ်းနက်တစ်တင်းလျှင်(၉၆၀၀၀/-)ကျပ်၊ နှမ်းဆီ တစ်ပိဿာလျှင် (၁၇၅၀၀/-)ကျပ်၊ ယခုနှစ်တွင် နှမ်းဖြူတစ်တင်းလျှင် (၁၀၂၀၀၀/-)ကျပ်၊ နှမ်းညိုတစ်တင်းလျှင် (၉၂၀၀၀/-)ကျပ်၊ နှမ်းနက်တစ်တင်း လျှင်(၁၀၀၀၀၀/-)ကျပ်၊ နှမ်းဆီ တစ်ပိဿာလျှင် (၁၈၀၀၀/-)ကျပ်၊ စျေးနှုန်းများဖြင့် အရောင်းအဝယ် ဖြစ်နေကြောင်း သိရှိရပါ သည်။ (၁)ဧက အထွက်နှုန်းအနေဖြင့် (၁၀-၁၁)တင်းခန့်ထွက်ရှိခဲ့ပြီး အကျိုးအမြတ်အနေဖြင့် (၆၇၀၀၀၀/-)ကျပ် မြတ်ခဲ့ကြောင်း မိုးနှမ်းစိုက်ပျိုးသော တောင်သူတစ်ဦး ပြောကြားချက်အရ သိရှိရပါသည်။

DOCA(မန္တလေး)