ပြည်တွင်းကုန်သွယ်မှုသတင်း

     ပြည်မြို့မှထွက်ရှိသော အောင်သပြေတုံးများသည် ပြည်မြို့ပေါ်တွင်နေထိုင်သော လူများသာမက နယ်ဝေးရပ်နီးမှနေထိုင်သူများကပါ မှာယူကြသော အောင်သပြေပန်းဖြစ်ပါသည်။ ယခုအချိန် ဧပြီလကုန်မှစတင်၍ ပြည်မြို့ပေါ်ရှိပန်းဈေးကွက်တွင် ရန်ကုန်တွံတေးမှသပြေများ ဈေးကွက်သို့ဝင်ရောက်လာပါသည်။ ပြည်မြို့မှထွက်ရှိသောအောင်သပြေတုံးမှာ အငုတ်မှ အညွှန့်များဖြာထွက်နေပြီး ရေလဲပေးပါက အညွန့်သစ်များထပ်မံထွက်လာကာ (၂)လအထားခံပြီး ယခုဈေးကွက်တွင်‌ ရောင်းချနေသောရန်ကုန်တွံတေးသပြေမှာ ကိုင်းရင့်ပြီး ကိုင်းမှာအမြစ်အနည်းငယ်ရှိကာ ပုံမှန်ရေလဲပေးပါက (၆)လမှ (၈)လအထိ အထားခံပါသည်။၂၀၂၄ခုနှစ်၊ မေလ တတိယအပတ်အစတွင် ရန်ကုန်တွံတေးသပြေများကို တစ်ပိုင်းလျှင် (၁၅၀၀၀၀) ကျပ်ပေးရကြောင်း သပြေအခက်အပင်ကြီးတစ်ခက်လျှင် (၁၀၀၀)ကျပ်ရောင်းချပြီး အပင်အသေးလေးများ (၅)ခုခန့် စည်းထားသောတစ်ပိုင်းကို (၁၅၀၀)ကျပ်ခန့် ရောင်းချကြောင်း သိရှိရပါသည်။ ရန်ကုန် တွံတေးသပြေသည် လကြာကြာအထားခံသောကြောင့် ယခုကဲ့သို့ ပူပြင်းသောနွေရာသီတွင် ဘုရားပန်းထိုးရန်အတွက် ပြည်မြို့နေထိုင်သူအိမ်ထောင်ရှင်မများ အကြိုက်တွေ့နေသော ဘုရားပန်း ဖြစ်နေကြောင်းသိရှိရပါသည်။

DOCA(ပဲခူး)

      ပြည်ဈေးကွက်သို့ ယခုကာလများတွင် ဒူးရင်းသီးများကို တောင်ငူ၊ မော်လမြိုင်နှင့်ရေးဘက်မှ ဝင်ရောက်လျှက်ရှိရာ အမျိုးအစားများအနေဖြင့် ဗမာသီး၊ ယိုးဒယားကိုင်းဆက်သီး၊ မွန်ထောင်းသီး၊ ချန်နီသီးများအဝင်ရှိ၍ ပြည်ဈေးကွက်အတွင်းရှိ အသီးအနှံမျိုးစုံရောင်းချသည့်ဆိုင်များတွင် ရောင်းချလျက်ရှိသလို Online ဖြင့်ရောင်းချသူများ၊ ကားဖြင့်လှည့်လည်၍ ဒူးရင်းသီးတစ်မျိုးတည်းသာ ရောင်းချသူများလည်းရှိပါသည်။ ဈေးများတွင်သီးနှံစုံရောင်းချသည့်ဆိုင်များနှင့် ကားဖြင့်လှည့်လည်ရောင်းချသူများထက် Online မှရောင်းချသူများက ပိုမိုအရောင်းသွက်လျက်ရှိကြောင်းသိရှိရပါသည်။ ၂၀၂၄ခုနှစ်၊ မေလတတိယအပတ်အစတွင် ဗမာသီးဈေးနှုန်းများမှာ တစ်လုံးလျှင် ၆၅၀၀ကျပ်မှ ၁၅၀၀၀ကျပ်အထိ အလုံးအကြီးအသေးပေါ်လိုက်၍ ဈေးကွာခြားမှုရှိပြီး ယိုးဒယားကိုင်းဆက်သီး၊ မွန်ထောင်းသီး၊ ချန်နီသီး စသည့်အသီးများမှာ အသီးအရည်အသွေးပေါ်လိုက်၍ 1Kg လျှင် ၁၅၅၀၀ကျပ်မှ စ၍ ၂၀၀၀၀ကျော် အထိဈေးအမျိုးမျိုးရှိပြီး ဝယ်ယူ စားသုံးသူများအနေဖြင့် အသားထူ၍အရသာပိုမိုကောင်းမွန်သော ယိုးဒယားကိုင်းဆက်သီး၊ မွန်ထောင်းသီး၊ ချန်နီသီးများကို ဗမာသီးထက် ပိုမိုကြိုက်နှစ်သက်ကြပါသည်။ ပြည်ဈေးကွက်အတွင်းတွင် တစ်ရက်လျှင် အလုံး ၂၅၀ခန့် ဒူးရင်းသီးများ အရောင်းသွက်လျက်ရှိကြောင်း သိရှိရပါသည်။

DOCA(ပဲခူး)

       ပြည်ဈေးကွက်အတွင်း ကြက်သွန်သီးနှံမှာ ၂၀၂၄ခုနှစ်၊ မေလလယ်၌အဝင်နည်းသွားပြီး မကွေးတိုင်း အောင်လံမြို့နယ်တစ်ခုတည်းမှသာ အဝင်ရှိနေပါသည်။ ပြည်ပွဲရုံများ၌ အရောင်းအဝယ်မှာ ပုံမှန်ဝယ်လက်များဖြင့်သာ ရောင်းဝယ်မှုရှိနေသည့်အတွက် မှာယူရောင်းချမှုနည်းသွားခြင်းဖြစ်ပြီး ဈေးနှုန်းမှာ အမြင့်ဈေးအတိုင်း ရောင်းဝယ်မှုရှိနေပါသည်။ ပွဲရုံလက်ကားဈေး တစ်ပိဿာလျှင်(ကြီး/ လတ်/ သေး)ကျပ်၂၀၀၀/ ၂၁၀၀-၂၂၀၀/ ၂၃၀၀ နှုန်းနှင့် လက်လီတစ်ပိဿာလျှင် ကျပ်၂၄၀၀/၂၆၀၀-၂၈၀၀/၃၀၀၀နှုန်းတို့ဖြင့် အသီးသီးရောင်းဝယ်မှုရှိနေသည်။ ပြည်ပွဲရုံဈေးကွက်အတွင်းတွင် မကွေးတိုင်းကြက်သွန်နီများသာရှိပြီး ပြည်အနီးတဝိုက်တွင်ထွက်ရှိသည့် မှော်ဇာကြက်သွန်နီများမှာဈေးနှုန်းမြင့်ပြီး ကိုယ်တိုင်စိုက်တောင်သူများမှ မြို့ပေါ်ဈေးများသို့သွားရောက်ရောင်းချခြင်းကြောင့် အကျိုးအမြတ်ပိုမိုရရှိကြောင်း သိရှိရပါသည်။ ပြည်၊ မှော်ဇာ ကြက်သွန်နီဈေးနှုန်းမှာ တစ်ပိဿာလျှင် ကျပ်၂၆၀၀-၂၈၀၀နှုန်းဖြင့် ရောင်းချကြောင်း သိရှိရပါသည်။

DOCA(ပဲခူး)

        မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အခြေခံသည့်နိုင်ငံဖြစ်၍ စပါးကိုအဓိကထား၍ စိုက်ပျိုးကြပါသည်။ စပါးကိုကြိတ်ခွဲ၍ရရှိသောဆန်ကို လူတို့စားသုံးကြသလို စပါးကိုကြိတ် ခွဲ၍ထွက်ရှိလာသော ဘေးထွက်ပစ္စည်းများဖြစ်သည့် ဆန်ကွဲနှင့် ဖွဲနုများကို တိရိစ္ဆာန်အစာအဖြစ် အသုံးပြုကြောင်းသိရှိရပါသည်။ ဆန်ကွဲကြီးကို သရေစာအဖြစ်စားသုံးရန်အတွက် ဆန်မရွေးအဖြစ်ပြုလုပ်ရန်ဝယ်ယူကြပါသည်။ ယခင်ဧပြီလတွင် ဖြစ်ပေါ်ခဲ့သော ဆန်ကွဲ၊ ဖွဲဈေးနှုန်းများမှာ ဆန်ကွဲကြီးတစ်အိတ်လျှင် ၅၀၀၀၀ကျပ်၊ ဆန်ကွဲ (၂၃၄) တစ်အိတ်လျှင် ၄၃၀၀၀ကျပ်၊ ဆန်ကွဲ (၁၂)တစ်အိတ် လျှင် ၄၉၀၀၀ကျပ် နှင့် ဖွဲနုတစ်ပေါင်လျှင် ၂၂၅ကျပ်ဖြင့် အရောင်းအဝယ်ဖြစ်ခဲ့ကြောင်းသိရှိရပါသည်။ ယခုလဖြစ်သော မေလဆန်းတွင် ဆန်ကွဲကြီးတစ်အိတ်လျှင် ၅၃၀၀၀ကျပ်၊ ဆန်ကွဲ (၂၃၄) တစ်အိတ်လျှင် ၄၅၀၀၀ကျပ်၊ ဆန်ကွဲ (၁၂) တစ်အိတ်လျှင် ၅၁၀၀၀ကျပ် နှင့် ဖွဲနုတစ်ပေါင်လျှင် ၂၃၅ကျပ်ဖြင့် ဧပြီလထက်စာလျှင် ဈေးနှုန်းများမြင့်တက်လာခဲ့ပါသည်။ ယခုအပတ်ဖြစ်သော မေလတတိယပတ်အစတွင် ဆန်ကွဲကြီးတစ်အိတ်လျှင် ၅၃၀၀၀ကျပ်၊ ဆန်ကွဲ (၂၃၄) တစ်အိတ်လျှင် ၄၆၀၀၀ကျပ်၊ ဆန်ကွဲ (၁၂) တစ်အိတ်လျှင် ၅၀၀၀၀ကျပ်နှင့် ဖွဲနုတစ်ပေါင်လျှင် ၂၅၀ကျပ်ဈေးဖြင့် အရောင်းအဝယ်ဖြစ်ခဲ့၍ ဆန်ကွဲ (၂၃၄)နှင့် ဖွဲနုဈေးသာအနည်းငယ်မြင့်တက်လာကြောင်း သိရှိရပါသည်။

DOCA(ပဲခူး)

       ပြည်မြို့၏သစ်သီးဝလံဈေးကွက်အတွင်း ယခုရာသီ သီးနှံမျိုးစုံဝင်ရောက်လျက်ရှိရာ လိမ္မော်သီး၊ ဖရဲသီး၊ ပန်းသစ်တော်၊ ပျားလိမ္မော်စသည့်သီးနှံများအပြင် လိုင်ချီးသီး၊ စတော်ဘယ်ရီသီး၊ မင်းကွတ်သီး၊ ကြက်မောက်သီး၊ ဒူးရင်းသီး စသည်ဖြင့် ရာသီစာသစ်သီးဝလံများကလည်း အရောင်းအဝယ်ကောင်းနေကြောင်းသိရပါသည်။ ၂၀၂၄ခုနှစ်၊ မေလတတိယအပတ်အစတွင် လိုင်ချီးသီးအနေဖြင့် တစ်ပိဿာ ၇၅၀၀ကျပ်၊ မင်းကွက်သီး အလုံးအရွယ်အစားအလိုက် (၁၀)လုံးဈေး ၂၀၀၀ကျပ်မှ ၂၅၀၀ကျပ်၊ ကြက်မောက်သီးဈေးနှုန်းမှာလည်း အသီးအရွယ်အစားပေါ်မူတည်၍ ၂၅၀ကျပ်မှ ၃၀၀ကျပ်အထိ ရောင်းဝယ်နေကြကြောင်းသိရှိရပါသည်။ ဒူးရင်းသီးများကလည်း ယိုးဒယားသီး၊ ဗမာသီး၊ မွန်ထောင်းသီး၊ ကိုင်းဆက်သီး စသည်ဖြင့် အလုံးအရွယ်အစား အသီး အမျိုးအစားပေါ်မူတည်၍ ရောင်းချကြပြီး ကျပ်(၁)သောင်း ကျော်မှ (၃)သောင်းကျော်ထိ အရည် အသွေးလိုက်၍ အသီးအမျိုးအစားလိုက်၍ ဈေးများကွာခြားမှုရှိကြပါသည်။ အလုံးလိုက်မဟုတ်ဘဲ ဘူးများဖြင့်လည်း ဂရမ်အလိုက် ဈေးကွာခြားမှုရှိကြပါသည်။ ဒါ့ကြောင့် တစ်ဘူးလျှင် ကျပ် (၁)သောင်းကျော်မှစ၍ ဂရမ်များလျှင်များသလို ဈေးပိုသွားကြကြောင်း သိရှိရပါသည်။ ပြည်သစ်သီးဝလံဈေးကွက်မှာသာမက Online ဈေးကွက်မှာပါ ယခုကာလရာသီစာသစ်သီးဝလံမျိုးစုံများတွင် မင်းကွတ်သီး၊ ကြက်မောက်သီး၊ ဒူးရင်းသီးများ အရောင်းအဝယ်ပိုသွက်နေကြောင်း သိရှိရပါသည်။

DOCA(ပဲခူး)