ပြည်တွင်းကုန်သွယ်မှုသတင်း

     သောကြာနေ့တိုင်း တစ်ပတ်တစ်ကြိမ် စက်သုံးဆီဈေးနှုန်းများ ပြောင်းလဲလျက်ရှိရာ ယခု တစ်ပတ်(၃.၁၀.၂၀၂၅) ရက်နေ့တွင် ဒီဇယ်(ရိုးရိုး) (အဆင့်မြင့်)၊ ဓါတ်ဆီ(ရိုးရိုး) (အဆင့်မြင့်) တို့၏ ဈေးနှုန်းပြောင်းလဲမှုမှာ 95 Octance ဓါတ်ဆီ(အဆင့်မြင့်) ဈေးနှုန်းတစ်လီတာမှာ ၂၈၉၅ ကျပ်၊ 92 Octance ဓါတ်ဆီ (ရိုးရိုး) ဈေးနှုန်းတစ်လီတာမှာ ၂၈၃၀ ကျပ်၊ ဒီဇယ်(ရိုးရိုး) ဈေးနှုန်းတစ်လီတာမှာ ၂၅၄၅ ကျပ်၊ ဒီဇယ် (အဆင့်မြင့်) ဈေးနှုန်းတစ်လီတာမှာ ၃၁၁၅ ကျပ်ဖြစ်ကြောင်း သိရှိရပါသည်။ ယခင်တစ်ပတ် သောကြာနေ့ စက်သုံးဆီဈေးနှုန်းမှာ 95 Octance ဓါတ်ဆီ (အဆင့်မြင့်) ဈေးနှုန်း တစ်လီတာမှာ ၂၉၈၀ ကျပ်၊ 92 Octance ရိုးရိုး ဓါတ်ဆီဈေးနှုန်း တစ်လီတာမှာ ၂၉၂၀ ကျပ်၊ ဒီဇယ် (ရိုးရိုး) ဈေးနှုန်းတစ်လီတာမှာ ၂၅၈၀ ကျပ်၊ ဒီဇယ်(အဆင့်မြင့်) ဈေးနှုန်း တစ်လီတာမှာ ၃၁၇၅ ကျပ် ဖြစ်ကြောင်း၊ ယခုတစ်ပတ်သောကြာနေ့တွင် စက်သုံးဆီ ဈေးနှုန်းများမှာ ယခင်တစ်ပတ်ထက် ယခုတစ်ပတ်တွင် ဒီဇယ်(အဆင့်မြင့်)မှာ ၆၀ ကျပ် ဈေးကျပြီး  ဒီဇယ်(ရိုးရိုး) မှာ ၃၅ ကျပ် ဈေးကျပါကြောင်း၊  ဓါတ်ဆီ (အဆင့်မြင့်)မှာ ၈၅ ကျပ်ဈေးကျပြီး  ဓါတ်ဆီ(ရိုးရိုး)မှာ ၉၀ ကျပ် ဈေးကျလျက် ရှိကြောင်း သိရှိရပါသည်။

DOCA (ရန်ကုန်)

            စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုး ရောင်းချလျက်ရှိရာ ယခုအခါ ကြက်ဟင်းခါးပင်၊ ခဆော့ပင်နှင့် ကင်းမုံသီး များကို  မိမိတို့နေအိမ်ခြံဝင်းများတွင် လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင် စိုက်ပျိုး၍ မုံရွာမြို့ ပေါ်ရှိ ဈေးဟောင်းနှင့်ရပ်ကွက်ဈေးများတွင် လာရောက်ရောင်းချကြကြောင်း သိရှိရပါသည်။  

          ၂၀၂၅ ခုနှစ်၊ အောက်တိုဘာလ ပထမပတ်တွင် မုံရွာမြို့၊ ဈေးဟောင်းတွင် ရောင်းချ လျက်ရှိသော  ကြက်ဟင်းခါးသီးဈေးနှုန်းများမှာ ကြက်ဟင်းခါးသီး (၂၅)ကျပ်သားလျှင် (၈၀၀) ကျပ်၊ (၅၀)ကျပ်သားလျှင် (၁၆၀၀)ကျပ်၊ (၁)ပိဿာလျှင် (၃၀၀၀)ကျပ်၊ ခဆော့သီးတစ် (၁)ဘူးလျှင် (၄၀၀)ကျပ်နှင့် ကင်းမုံသီ(၁)ပြည်လျှင် (၂၄၀၀)ကျပ် ဖြင့် ရောင်းချလျက်ရှိကြောင်း ကုန်စိမ်းရောင်းချသူများထံမှ  သိရှိရပါသည်။

DOCA(စစ်ကိုင်း)

     ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်အတွင်းရှိ ကျေးရွာအများစုတွင် မိသားစု တစ်နိုင်တစ်ပိုင်အဖြစ် ပင်စိမ်းပင်များကို စိုက်ပျိုးကြပါသည်။ ဇလွန်မြို့နယ် ဒေသတွင်း စိုက်ပျိုးသော ပင်စိမ်းပင်များသည် ဟင်းစားပင်စိမ်းကိုသာ စိုက်ပျိုးကြပြီး တစ်ပြည်လျှင် (၅၃၀၀၀/-)ကျပ်ဖြင့် ဝယ်ယူရပါသည်။ ရာသီမရွေး စိုက်ပျိုးနိုင်ပြီး (၀.၂၀ ဧက)လျှင် တစ်ပြည် ကြဲပက်ရပါသည်။ စိုက်ပျိုးပြီး (၂)လခွဲအကြာတွင် ခူးဆွတ်နိုင်ပြီး တစ်လလျှင် နှစ်ကြိမ် အညွှန့်ချိုးရပါသည်။ အပင်သက်တမ်း     တစ်နှစ်ကျော် ကြာမြင့်စွာ ရှင်သန်နိုင်ပြီး ပင်စိမ်း ညွှန့်များ စတင်ခူးဆွတ်ချိန်တွင် အညွှန့် ၅၀၀ ခန့် ဝင်ဆန့်သော ခြင်းတောင်းဖြင့် ၇ ခြင်းမှ  ၈ ခြင်းထိ ခူးဆွတ်နိုင်ကြောင်း သိရှိရပါသည်။ ပင်စိမ်းပင်သည် သက်တမ်းရင့်လေ အညွှန့်အရေအတွက် ပိုမိုထွက်ရှိလေ ဖြစ်သောကြောင့် အကျိုးအမြတ်များကြောင်း၊ ပထမအကြိမ် စတင်ခူးဆွတ်ချိန်တွင် အညွှန့် ၅၀၀ တစ်ခြင်းလျှင် ၁၂၀၀၀/-ကျပ် ဝန်းကျင်ဈေးနှုန်းဖြင့် လက္ကားရောင်းချရသည်ဟု စိုက်ပျိုးသူ တောင်သူများထံမှ သိရှိရပါသည်။ အပင်မျိုးသန့်သောကြောင့် ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးအတွင်းရှိ မြို့နယ်များသို့ တင်ပို့ရောင်းချလျက် ရှိသည့်အတွက် မိသားစုဝင်ငွေတိုးသော တစ်နိုင်တစ်ပိုင် စိုက်ပျိုးရေးလုပ်ငန်းဖြစ်ကြောင်း သိရှိရပါသည်။

 (DOCA ဧရာဝတီ)

          စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော်တာဝန်ခံနှင့် ဝန်ထမ်းများသည် (၂၄.၉.၂၀၂၅) ရက်နေ့တွင် ရန်ကုန်-ပုသိမ်ကားလမ်းဘေးရှိ သင်ဖြူးဖျာဆိုင်များသို့ ကွင်းဆင်းလေ့လာ ဆောင်ရွက်ခဲ့ကြောင်း သိရသည်။

          အဆိုပါကွင်းဆင်းလေ့လာမှုတွင် သင်ဖျာဆိုင်များမှ ပြောကြားချက်အရ ချောင်းသာ-ပုသိမ် ကားများ ဝင်ရောက်ရပ်နား ဝယ်ယူမှုများ ရရှိလာကြောင်းနှင့် ဦးကြည်လွင်သင်ဖြူးဖျာဆိုင်မှ နေကထိုင်ဖျာ တစ်ချပ်လျှင် ၁၀၀၀ခန့်၊ သုံးထောင်ထွာ ဖျာတစ်ချပ်လျှင် ၅၅၀၀၀ကျပ်ခန့်၊ နှစ်ယောက် အိပ်ဖျာ တစ်ချပ်လျှင် ၇၅၀၀၀ကျပ်ခန့်နှင့် ကြိမ်ကုလားထိုင်များနှင့် သင်ဖျာ အမှတ်တရပစ္စည်းများကို ဈေးကွက်ရရှိနေကြောင်း သိရှိရပါသည်။

          ပန်းတနော်မြို့နယ်တာဝန်ခံမှ ဈေးကွက်ရရှိမှုအပေါ် သင်ဖျာများကို လက်မှုထုတ်လုပ်မှုမှသည် နည်းပညာအသုံးပြု၍ ထုတ်လုပ်နိုင်ရေးသော်လည်းကောင်း၊ ပြည်တွင်းဈေးကွက်မှ ပြည်ပဈေးကွက်သို့ ထိုးဖောက်ရောင်းချနိုင်ရေးတို့ကို သက်ဆိုင်ရာဌာနများနှင့် ချိတ်ဆက်ဆောင်ရွက်ပေးနိုင်ရေး၊ ထုတ်ကုန် လုံခြုံစိတ်ချရမှုရှိစေရေး SME လုပ်ငန်းများ ဖွံ့ဖြိုးတိုးတက်စေရန် ရည်ရွယ်၍ အလေးပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်အတွင်းရှိ တောင်သူများသည် မိုးသီးနှံ စပါး၊ ဆောင်းသီးနှံ ပဲမျိုးစုံ စိုက်ပျိုးမှု အများဆုံးဖြစ်သော်လည်း မိသားစုဝင်ငွေ နေ့စဉ်ရရှိရေးအတွက် မိမိခြံမြေများတွင် ဂန္ဓာမာပန်း အမျိုးအစားမျိုးစုံအား စီးပွားဖြစ်အတွက်သော်လည်းကောင်း၊ နေ့စဉ် ဝင်ငွေအတွက်သော်လည်းကောင်း၊ နေရာဒေသများစွာတွင် စိုက်ပျိုးလာကြပါသည်။ ဟင်္သာတ မြို့နယ် ဒေသတွင်း စိုက်ပျိုးသောပန်းများကို ကာလ(၂)ပိုင်းခွဲခြား၍ စိုက်ပျိုးကြပါသည်။ မိုးရာသီပန်းကို ဇွန်လ ပထမပတ်တွင် စတင်စိုက်ပျိုးကြပြီး အောက်တိုဘာလတွင် ရောင်းချရန်အဆင့်သို့ ရောက်ရှိပြီး၊ ဆောင်း ရာသီပန်းကို ဇန်နဝါရီလတွင် စတင်စိုက်ပျိုးပြီး၊ မေလတွင် ခူးဆွတ်ရန် အဆင့်သို့ရောက်ရှိပါသည်။ ဟင်္သာတမြို့နယ်အတွင်း ပန်းစိုက်ဧက စုစုပေါင်း(၅၀၀)ဧကကျော်ရှိပါသည်။ မိုးရာသီပန်းအဖြစ် ဂန္ဒမာ ပန်းများကို စိုက်ပျိုးကြပြီး တစ်ဧကလျှင် ဂန္ဓာမာပန်းပင် (၃၅၀၀၀ မှ ၄၀၀၀၀) အထိ စိုက်ပျိုးနိုင်ပါ သည်။ ပန်းမျိုးများကို ပြင်ဦးလွင်၊ တောင်ကြီး စသော မြို့ကြီးများမှ မှာယူစိုက်ပျိုးပြီး ပန်းမျိုးမှာ တစ်ပင်လျှင် (၁၈ ကျပ် မှ ၂၀ ကျပ်) ဝန်းကျင် ဈေးနှုန်းဖြင့် ဝယ်ယူရပါသည်။ ဂန္ဓမာပန်း စိုက်ပျိုးချိန်မှ ခူးဆွတ်ချိန်အထိ လုပ်သားခ၊ ဓါတ်မြေဩဇာ၊ ဆေးဖြန်းခြင်း၊ ပေါင်းနှုတ်ခြင်းအပါအဝင် တစ်ဧက ကုန်ကျစရိတ်   သိန်း ၇၀ ကျပ် ဝန်းကျင်အထိရှိပြီး အောက်တိုဘာလ ပထမပတ်မှစ၍ ခူးဆွတ်ရောင်းချရာတွင် ဂန္ဓာပန်း အပွင့်ကြီး တစ်ပွင့်လျှင် ၈၀၀ ကျပ်မှ ၁၀၀၀ ကျပ်၊ ဂန္ဓမာပန်းအပွင့်သေး တစ်ပွင့်လျှင် ၅၀၀ ကျပ်မှ ၇၀၀ ကျပ်ဖြင့် ရောင်းချရပါသည်။ ဈေးကွက်အနေဖြင့် မိမိဒေသ၊ မိမိခရိုင်အတွင်း၊ ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးအတွင်းရှိ မြို့နယ်များသို့ ရထား၊ ကားများဖြင့် လက်လီ၊ လက္ကား ရောင်းချလျက်ရှိပါသည်။ ပန်းစိုက်တောင်သူများအနေဖြင့် ယခုနှစ်တွင် ပန်းဈေးကောင်းခြင်းကြောင့်  အကျိုးအမြတ် တွက်ခြေကိုက်မှုရှိပြီး မိသားစုဝင်ငွေတိုးနေသော ဂန္ဓာပန်းစိုက်ပျိုးခြင်းအကြောင်း လေ့လာတင်ပြအပ်ပါသည်။

EYDNS (DOCA ဧရာဝတီ)