ပြည်တွင်းကုန်သွယ်မှုသတင်း

      တောင်ငူခရိုင်၊ ဖြူးမြို့တွင် မြေပဲဆီမှာ ဖေဖော်ဝါရီလလယ်ပိုင်းက တစ်ပိဿာလျှင် ၁၆၀၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၁၅၀၀၀ကျပ်ဖြင့် ဈေးနှုန်းအနည်းငယ်ကျဆင်းသွားကြောင်းသိရှိရပါသည်။

      ကြက်သွန်နီမှာ ဧပြီလက တစ်ပိဿာလျှင် ၂၂၀၀ကျပ်မှ ၂၅၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၂၆၀၀ကျပ်ဖြင့် ဈေးနှုန်းအနည်းငယ်တက်ပြီး ငရုပ်သီးခြောက်မှာ ဧပြီလက တစ်ပိဿာလျှင် ၁၂၀၀၀ကျပ်မှ ၁၅၀၀၀ကျပ်ရှိရာမှ ယခုမေလ တတိယအပတ်အစတွင် တစ်ပိဿာလျှင် ၁၀၀၀၀ကျပ်မှ ၁၁၀၀၀ကျပ်၊ အာလူးမှာ ဧပြီလက တစ်ပိဿာလျှင် ၂၄၀၀ကျပ်မှ မေလတတိယအပတ်အစတွင် တစ်ပိဿာလျှင် ၂၂၀၀ကျပ်ဖြင့် ဈေးနှုန်းအနည်းငယ်ကျဆင်းပါသည်။ ကြက်သွန်ဖြူမှာ တစ်ပိဿာလျှင် ၁၀၀၀၀ကျပ်မှ ၁၁၀၀၀ကျပ်အထိဖြင့် ဈေးနှုန်းတည်ငြိမ်နေပါသည်။

        ကုလားပဲခြမ်းမှာ ဧပြီလက တစ်ပိဿာလျှင် ၆၅၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၆၀၀၀ကျပ်၊  ကုလားပဲလုံးမှာ ဧပြီလက တစ်ပိဿာလျှင် ၅၀၀၀ကျပ်မှ ယခုမေလတတိယအပတ်အစတွင် တစ်ပိဿာလျှင် ၄၅၀၀ကျပ်၊  မြေပဲဆံ(အဖြူ)မှာဧပြီလက တစ်ပိဿာလျှင် ၈၀၀၀ ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၇၅၀၀ကျပ်နှင့် မြေပဲဆံ(အနီ)မှာ ဧပြီလက တစ်ပိဿာလျှင် ၈၀၀၀ကျပ်ရှိရာမှ ယခုမေလတတိယအပတ်အစတွင် တစ်ပိဿာလျှင် ၇၇၀၀ကျပ်ဖြင့် ဈေးနှုန်းကျဆင်းကြောင်း စည်ပင်သာယာဈေးအတွင်းရှိ ကိုမောင်မောင်ကုန်စုံဆိုင်မှ သိရှိရပါသည်။

DOCA(ပဲခူး)

            စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံသည် ၂၁.၅.၂၀၂၄ ရက်နေ့တွင် ဘီးလင်းမြို့နယ်တာဝန်ခံရုံး၌ ဘီးလင်းမြို့နယ်အတွက် ခွဲတမ်းရရှိသော စားအုန်းဆီများကို တာဝန်ယူဖြန့်ဖြူးရောင်းချနေသည့် လက်လီ/လက်ကား ကုန်သည်များနှင့် တွေ့ဆုံ၍ စားအုန်းဆီဖြန့်ဖြူးရောင်းချမှုနှင့်စပ်လျဉ်း၍ ဆွေးနွေးပွဲကျင်းပပြုလုပ်ခဲ့သည်။

           အဆိုပါ တွေ့ဆုံဆွေးနွေးပွဲသို့ မြို့နယ်အထူးစုံစမ်းစစ်ဆေးရေးအဖွဲ့၊ မြို့နယ်စည်ပင် သာယာရေးအဖွဲ့၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြန်မာနိုင်ငံရဲတပ်ဖွဲ့နှင့် ဆီလက်လီ/လက်ကားကုန်သည်များ စုစုပေါင်း (၂၇) ဦးတက်ရောက်ခဲ့သည်။

          ဆွေးနွေးပွဲတွင် စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံက ခွဲတမ်းရရှိသော စားအုန်းဆီများအား တာဝန်ယူဖြန့်ဖြူးရောင်းချနေသော ကုန်သည်များအား သတ်မှတ်အရေအတွက်ပြည့်မီစွာရောင်းချပေးရေး၊ ဈေးနှုန်းမြှင့်တင်ရောင်းချခြင်းမပြုရေး၊ ဈေးကစား ရန်အလို့ငှာ စားအုန်းဆီများအား လက်ဝယ်သိုလှောင်ထားမှုမရှိစေရေးနှင့် ဈေးနှုန်းမြှင့်တင် ရောင်းချခြင်းပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း၊ ပုဒ်မ (၅) အရ ထိုက်သင့် သော ပြစ်ဒဏ်များ ခံရမည်ဖြစ်ကြောင်း ဆွေးနွေးခဲ့သည်။ ထို့နောက် အထူးစုံစမ်းစစ်ဆေးရေးအဖွဲ့မှ ဦးစီးအရာရှိ ဦးကျော်စိုးလင်း က စားအုန်းဆီနှင့်ပတ်သက်သည့် သက်ဆိုင်ရာညွှန်ကြားချက်များကို လိုက်နာကြရန်ဆွေးနွေးခဲ့ပြီး တက်ရောက်လာသူများကို သိလိုသည်များကို ဆွေးနွေးခဲ့ကြပြီး ဆွေးနွေးပွဲအား ရုပ်သိမ်းခဲ့ကြကြောင်း သိရှိရပါသည်။

DOCA(မွန်)

          ကျိုက်မရောမြို့နယ်၌ ဒေသထွက်သီးနှံ တစ်မျိုးဖြစ်သည့် ကြက်မောက်သီးများလှိုင်လှိုင် ထွက်ရှိနေပြီး ဖြစ်သော်လည်း အခြားမြို့များသို့ တင်ပို့ရန် လမ်းခရီးအခက်အခဲရှိ၍ စျေးအနည်းငယ် ကျဆင်းနေကြောင်း သိရသည်။

         ကျိုက်မရောဒေသထွက် ယိုးဒယားသီးများ လှိုင်လှိုင်ထွက်ရှိနေချိန်တွင် ကုန်သည်များ အဝယ်လိုက်နေသော်လည်း ရန်ကုန်မြို့ နှင့်အခြားသောမြို့ကြီးများသို့ တင်ပို့ရောင်းချရန် လမ်းပန်းဆက်သွယ်ရေး  အခက်အခဲကြောင့် ကြက်မောက်သီး ကုန်သည်များ အရှုံးပေါ် နေကြောင်းလည်းသိရသည်။ လက်ရှိ ဖြစ်ပေါ်နေသော မော်လမြိုင်၊ ရန်ကုန်သွားကားလမ်း အခြေအနေအရ ရန်ကုန်မြို့သို့ တင်ပို့ရမည့်အသီးများ နေပူရှိန်ပြင်းသဖြင့် အသီးများနွမ်းခြောက်ကာ ပို့ရန်ခက်ခဲလျက်ရှိနေသဖြင့် မော်လမြိုင်နှင့် သထုံ မြို့နယ် အထိသာရောင်းချနေရကြောင်း၊ ကြက်မောက်သီးအလုံး ၅၀ ပါတစ်တွဲလျှင် ယခင်က တစ်သောင်းထိ ရခဲ့သော်လည်း ယခုအခါ ၆၀၀၀ မှ ၅၀၀၀ ကျပ်ထိသာ ရရှိကြောင်း   ကျိုက်မရောမှ ကြက်မောက်သီးကုန်သည်  ဦးစိုးမြင့်ထံမှ သိရှိရပါသည်။

DOCA(မွန်)

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ ခရမ်းသီးများကို ပခုက္ကူကျွန်း၊ ဘောလုံးခုံ၊ လေးလံကျွန်း၊ မြင်းကျွန်း၊ ကုက္ကိုလ်လှ၊ သင်္ဘောကုန်း၊ ရွာသစ်ကုန်း ကျေးရွာများတွင် ခရမ်းသီးကို သီးညှပ်အဖြစ် အဓိကစိုက်ပျိုးကြပါသည်။ ခရမ်းသီးရာသီကုန်ဆုံးသည်ဖြစ်သောကြောင့် ခရမ်းသီး ဈေး မှာလည်း တရိပ်ရိပ်နှင့် ဈေးတက်လျက်ရှိပါသည်။ ယခုအချိန်တွင် ပခုက္ကူဒေသမှထွက်သော ခရမ်းသီး များ ရာသီစာကုန်ဆုံး၍ ပခုက္ကူမြို့အနီးအနားမြို့နယ်များဖြစ်သော မြစ်ခြေ၊ ကမ္မမြို့နယ်များမှ ထွက်ရှိသော ခရမ်းသီးများ နေ့စဉ်ကုန်ချိန် ပိဿာ(၃၀၀၀ မှ ၄၀၀၀ ထိ)ဝင်ရောက် အရောင်းအဝယ်ဖြစ် လျက်ရှိပါသည်။

          ခရမ်းသီးဈေးနှုန်းမှာ ယခင်လများက ခရမ်းသီးတစ်ပိဿာလျှင် ကျပ်(၁၀၀၀-၁၅၀၀)ဈေးရှိခဲ့ပြီး ယခုမေလ(ပထမပတ်)မှစ၍ ခရမ်းသီးတစ်ပိဿာလျှင် ကျပ်(၁၅၀၀ မှ ၂၀၀၀ ထိ)ဖြစ်ပါသည်။ မေလ (တတိယပတ်)တွင် ခရမ်းသီးတစ်ပိဿာလျှင် ကျပ်(၂၅၀၀ မှ ၃၀၀၀)ဖြစ်ပြီး ယခင်လများနှင့် နှိုင်းယှဉ် ပါက တစ်ပိဿာလျှင် ကျပ်(၁၅၀၀)ဈေးတက်နေကြောင်း၊ ခရမ်းသီးမှရရှိသော ခရမ်းသီးခြောက်ဈေးမှာလည်း တစ်ပိဿာလျှင် ကျပ်(၆၀၀၀)ဖြင့် ရောင်းချနေကြောင်း မြို့မဈေးသည်များထံမှ သိရှိရပါသည်။

DOCA(မကွေး)

              မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီကုန်စည်ဒိုင် ဈေးကွက်တွင် စားဖိုဆောင်သီးနှံ ကြက်သွန်နီဈေးနှုန်းများ ဈေးငြိမ်၍ အရောင်းအဝယ်ဖြစ်လျက်ရှိသည်။ ၂၀၂၄ ခုနှစ်၊ မေလ (တတိယပတ်)တွင် ကြက်သွန်နီ အမြင့်ဈေး တစ်ပိဿာလျှင် ထိပ်စ ကျပ်(၂၀၀၀)၊ အလတ်စ ကျပ် (၁၈၀၀)၊ အသေးစ ကျပ်(၁၆၀၀)ဈေးရှိခဲ့ပြီး ယခင်မေလ(ဒုတိယပတ်)တွင်လည်း အမြင့်ဈေး ကျပ် (၂၀၀၀)ဖြင့် အရောင်းအဝယ်ဖြစ်ခဲ့၍ ယခင်အပတ်နှင့် ကာလတူနှိုင်းယှဉ်ရမည်ဆိုလျှင် ဈေးအတက်အကျမရှိ ဈေးငြိမ်ပြီး အရောင်းအဝယ်ဖြစ်ကြောင်း၊ ကုန်စည်ဒိုင်ဈေးကွက်နှင့် ပွဲရုံများသို့ နေ့စဉ်ကုန်ချိန် ပိဿာ (၂၀၀၀၀ မှ ၃၀၀၀၀)ခန့် ဝင်ရောက်လျက်ရှိကြောင်း၊ တောင်သူများမှ မိမိတို့ စိုက်ခင်းထွက် ကြက်သွန်နီများကို ဈေးကွက်ရရှိရန်ထိန်း၍ ရောင်းချလျက်ရှိခြင်းကြောင့် ဈေးကွက်သို့ ကုန်ဝင်လျော့ နည်းသွားကြောင်း သိရှိရသည်။

             ဈေးကွက်သို့ ဒေသတွင်း ကြက်သွန်နီစိုက်ပျိုးမှုများသော ကျေးရွာများနှင့်စလင်း၊ ပွင့်ဖြူမြို့ များမှ ဝင်ရောက်လျက်ရှိကြောင်း၊ ကုန်စည်ဒိုင်ဈေးကွက်သို့ နေ့စဉ်ဝင်ရောက်မှုမရှိသော်လည်း မြို့ပေါ်ရှိ ပွဲရုံများတွင် အရောင်းအဝယ်ဖြစ်လျက်ရှိကြောင်း၊ ပြည်ပအဝယ်နည်း၍ ယခုတစ်ပတ် ဈေးငြိမ်၍ အရောင်းအဝယ်ဖြစ်ကြောင်း သိရှိရသည်။

          ကုန်စည်စီးဆင်းမှုအနေဖြင့် ပြည်တွင်း ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များနှင့် မြဝတီ၊ မော်လမြိုင် မြို့များမှတစ်ဆင့် ပြည်ပ ထိုင်း၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ ယခုမေ (တတိယပတ်)တွင် ကြက်သွန်နီ ကုန်ချိန်ပိဿာ(၃)သိန်း၊ တန်ချိန်အားဖြင့်(၄၉၀)တန်ခန့် ကုန်စည် စီးဆင်းခဲ့ကြောင်း ဈေးကွက်မှ သိရှိရပါသည်။

DOCA(မကွေး)