ပြည်တွင်းကုန်သွယ်မှုသတင်း

၂၁.၅.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

       အရပ်ဒေသအလိုက် သရက်သီးမျိုးများစွာရှိသည့်အနက် ပဲခူးတိုင်းဒေသကြီး၊ နတ်တလင်းမြို့နယ်တွင် ဦးပု၊ မန္တလေးရင်ကွဲသရက်မျိုးများကို အများဆုံးစိုက်ပျိုးကြပြီး မြကျောက်၊ စိန်တစ်လုံး၊ စိမ်းစားသရက်၊ သုံးလုံးတစ်တောင် စသည့ဖြင့် အခြားသရက်မျိုးများကိုလည်းစိုက်ပျိုးကြပါသည်။ နတ်တလင်းမြို့နယ်တွင် သရက်ပင်ကို ခြံလိုက်စိုက်ပျိုးခြင်းမရှိဘဲ အခြားသီးပင်၊ စားပင်များနှင့်ရောကာ တစ်နိုင်တစ်ပိုင်စိုက်ပျိုးကြပါသည်။ ဦးပုသရက်သီးမှာ ဒေသတွင်း ဈေးကွက်တွင် စောစီးစွာထွက်ရှိပြီး ဈေးကောင်းရရှိခြင်းကြောင့် စိုက်ပျိုးမှုများကြောင်း သရက်စိုက်ပျိုးသူတစ်ဦးထံမှသိရပါသည်။ ၂၀၂၃ခုနှစ်တွင် ပေါ်ဦးပေါ်စဖြစ်သော ဦးပုသရက်သီးမှည့်တစ်လုံးလျှင် ၁၅၀ကျပ်မှ ၁၀၀ကျပ်ဈေးနှုန်းသာရှိခဲ့သော်လည်း ယခု၂၀၂၄ခုနှစ်၌ ဈေးကွက်အတွင်း ဦးပုသရက်သီးမှည့်များကို ဧပြီလ စတုတ္တပတ်မှ စတင်ရောင်းချလျက်ရှိရာ ပေါ်ဦးစသရက်သီးမှည့်တစ်လုံးလျှင် အရွယ်အစားကိုလိုက်၍ ၂၅၀ကျပ်မှ ၂၀၀ကျပ်နှုန်းဖြင့် ဈေးကောင်းရရှိခဲ့ကြောင်းသိရပါသည်။

     ယခု၂၀၂၄ခုနှစ်၊ မေလ ဒုတိယပတ်တွင် ဦးပုသရက်သီးမှည့်တစ်လုံးလျှင် ၁၈၀ကျပ်မှ ၁၅၀ကျပ်ပေါက်ဈေးဖြင့် ရောင်းချလျက်ရှိသဖြင့် ပေါ်ဦးစထက် ဈေးနှုန်းအနည်းငယ်ကျဆင်းသွားကြောင်းသိရပါသည်။ နတ်တလင်းမြို့နယ်မှထွက်ရှိသော ဦးပုသရက်သီးမှည့်များကို ဒေသတွင်းနှင့် ပေါင်းတည်၊ ကြို့ပင်ကောက်၊ သုံးဆယ်နှင့် ရန်ကုန်မြို့သို့ပါ တင်ပို့ရောင်းချကြောင်းသိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့မဈေးအတွင်း ရောင်းချလျက်ရှိသော ကြက်သွန်နီဈေးနှုန်းများမှာ ဧပြီလ ပထမပတ်နှင့် ဒုတိယပတ်တွင် ကြက်သွန်နီ(အကြီး) လက်လီဈေးနှုန်းမှာ တစ်ပိဿာလျှင် (၂၃၀၀-၂၅၀၀) ကျပ်ဈေးနှုန်းဖြင့် အရောင်းအဝယ်ရှိနေခဲ့သော်လည်း သင်္ကြန်ပြီးကာလ တတိယပတ်အတွင်း ကြက်သွန်နီဈေးနှုန်းများမှာ ဈေးကွက်အတွင်း၌ ဈေးငြိမ်နေပြီး ဧပြီလ နောက်ဆုံးပတ်တွင် ကြက်သွန်နီများကို မိုးရာသီစားသုံးရန် စားသုံးသူများသိုလှောင်ကြသဖြင့်  ကြက်သွန်နီဈေးနှုန်းများ အနည်းငယ်မြင့်တက်လာကြပြီး ကြက်သွန်နီ(အကြီး) လက်လီဈေးနှုန်းမှာ တစ်ပိဿာလျှင် (၂၅၀၀-၂၈၀၀-၃၀၀၀) ကျပ်၊ အသေးတစ်ပိဿာလျှင် (၂၀၀၀) ကျပ်ဈေးနှုန်းဖြင့် ယခုမေလ ဒုတိယပတ်ထိ ဈေးနှုန်းငြိမ်နေပြီး ရောင်းချလျက်ရှိကြောင်းသိရှိရပါသည်။

  အာလူးဈေးကွက်ရောင်းချမှုအနေဖြင့် အာလူးတစ်ပိဿာလျှင် ဧပြီလ ပထမပတ်မှ ဧပြီလ နောက်ဆုံးပတ်တို့တွင် အာလူးတစ်ပိဿာလျှင် (၂၅၀၀-၃၀၀၀-၃၅၀၀)ကျပ်ပေါက်ဈေးဖြင့် အရောင်းအဝယ်ရှိနေခဲ့ပြီး မေလ ဒုတိယပတ်အတွင်း၌ အာလူးဈေးနှုန်းမှာ (၂၀၀၀-၂၅၀၀) ကျပ်ဈေးနှုန်းတို့ဖြင့် အရောင်းအဝယ်ဖြစ်နေပါသဖြင့် ဈေးနှုန်းအနည်းငယ်ကျဆင်းနေကြောင်းသိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ ပြည်ခရိုင်၊ ပန်းတောင်းမြို့နယ်၊ နတ်မောက်အုပ်စု၊ နတ်မောက်ကျေးရွာရှိ ကွင်းအမှတ်(၈၈) ဝန်လိုကွင်းတွင် စိုက်ပျိုးသူတောင်သူ ဦးဇော်မင်းထွေးနှင့်တွေ့ဆုံ၍ (ရခိုင်) ငှက်ပျောသီးမျိုးစိုက်ပျိုးထွက်ရှိမှုအား (၁၄-၅-၂၀၂၄)ရက်နေ့၊ နံနက်ပိုင်းတွင် ပန်းတောင်းမြို့နယ်တာဝန်ခံနှင့် အဖွဲ့သည် ကွင်းဆင်းလေ့လာဆွေးနွေးခဲ့ပါသည်။

      စိုက်ပျိုးထားရှိသည့် ငှက်ပျောသက်တမ်းမှာ (၃/၄) နှစ်ခန့်စိုက်ပျိုးထားရှိပါသည်။ လက်ရှိတွင် ဒေသမျိုးအပင် (၅၀၀)ခန့်စိုက်ပျိုးထားရှိပြီး စိုက်ပျိုးစဉ်ကတစ်ပင်ကို ၂၀၀ပေး၍စိုက်ပျိုးရပါသည်။ ငှက်ပျောပင်စိုက်ရန် စိုက်ကျင်းတူးခမှာ တစ်ကျင်းကို ၅၀၀ကျပ်ပေးရပါသည်။ တစ်နှစ်လျှင် ငှက်ပျောရုံတစ်ရုံကို (၄/၅) ပင်သာထားရှိပါသည်။ ချောင်းမြောင်းဘေး လယ်ကန်သင်းတွင် စိုက်ပျိုးထားသည့်အတွက် တစ်ရာသီကို ငှက်ပျောတစ်ရုံလျှင် ငှက်ပျောခိုင် (၅)ခိုင်၊ (၆)ခိုင်ခန့်ခုတ်ယူရပါသည်။ ငှက်ပျောခိုင်တစ်ခိုင်လျှင် (၇/၈)ဖီးခန့်ထွက်ရှိပြီး လေဝင်လေထွက်ကောင်းခြင်း၊ အပင်သန်လျှင် အခိုင်ကို အဖီး(၁၀)ဖီးခန့်ထွက်ရှိကြောင်းသိရပါသည်။ စတင်စိုက်ပျိုးစဉ်က ရေလောင်းရပြီး မြေဩဇာကျွေးရန်မလိုပါ။ ချောင်းရေ၊ မြောင်းရေအေးစိမ့်နေရခြင်းကြောင့် နောက်ပိုင်းတွင် ရေလောင်းရန်မလိုပါ။ ငှက်ပင်(၅၀၀)အတွက် ကုန်ကျစရိတ်မှာ ၃၅၀၀၀၀ကျပ်ခန့်ကုန်ကျကြောင်းသိရပါသည်။ ၂၀၂၃ခုနှစ်၊ မေလပိုင်းလောက်တွင် ရခိုင်ငှက်တစ်ဖီးကို (၂၀၀)ကျပ်ဖြင့်ရောင်းချခဲ့ရပြီး ၂၀၂၄ခုနှစ်၊ မေလ ဒုတိယပတ်တွင် ငှက်ပျောသီးတစ်ဖီးကို ၅၀၀ကျပ်ဖြင့်ရောင်းချကြောင်းသိရပါသည်။ ငှက်ပျောပင်ကို တစ်ခါစိုက်ပျိုးထားပြီးလျှင် တစ်နှစ်ပတ်လုံး ခုတ်ယူရောင်းချကြောင်းသိရပါသည်။ ရခိုင်ငှက်ပျောပင် ၅၀၀အတွက် တောင်သူအကျိုးအမြတ်မှာ ကျပ်(၁၅)သိန်းခန့်ရရှိကြောင်းသိရပါသည်။ ထွက်ရှိလာသော ငှက်ပျောသီးကို ဒေသတွင်းအပြင် အခြားမြို့နယ်များမှ ငှက်ပျောသီးပွဲစားများက လာရောက်ဝယ်ယူမှုရှိလျှင်လည်း ရောင်းချကြောင်းသိရပါသည်။ ရခိုင်ငှက်ပျောသီးမှာ ၂၀၂၃ခုနှစ်ထက် ယခု၂၀၂၄ခုနှစ်၌ ဈေးပိုရသဖြင့် ယခုနှစ်တွင် အကျိုးအမြတ်များပိုမိုရရှိကြောင်းသိရှိရပါသည်။

DOCA(ပဲခူး)

      ယခုကဲ့သို့သော အချိန်ဖြစ်သည့် မေလဆန်းမှစ၍ ရာသီဥတုမှာ ပူပြင်းလာသဖြင့် အသီးအနှံများလည်း နေရောင်ခြည်လွန်ကဲစွာရရှိသောကြောင့် အထွက်နှုန်းနည်းလာကြောင်းသိရပါသည်။ ၂၀၂၄ခုနှစ်၊ မေလလယ်ပိုင်းတွင် ပုတီးကုန်းဒေသမှထွက်ရှိသော ကျောက်စိမ်းငရုတ်သီးစိမ်းမှာ ယခုအချိန်၌ အထွက်နှုန်းနည်းပြီး ဝင်ရောက်မှုလည်းနည်းသွား၍ ဈေးကွက်တွင် ဈေးနှုန်းများမြင့်တက်လာပြီး တစ်ပိဿာလျှင် ၁၀၀၀၀ကျပ်ဖြင့်ရောင်းချကြောင်းသိရပါသည်။ ပီနန်ငရုတ်သီးစိမ်းမှာ ရန်ကုန်ဘက်မှ ပြန်လည်ဝင်ရောက်လာပြီး ဈေးကွက်တွင် တစ်ပိဿာလျှင် ၁၅၀၀၀ကျပ်ဈေးနှုန်းဖြင့်ရောင်းချနေကြောင်းသိရပါသည်။ ငရုတ်သီးစိမ်းမှာလည်း ဈေးကွက်တွင် ရောင်းချသော်လည်း ကုန်ပစ္စည်းမှာနည်းပြီး အရောင်းအဝယ်ဖြစ်ကြောင်းသိရပါသည်။ ၂၀၂၃ခုနှစ်၊ မေလပိုင်းတွင် ငရုတ်သီးစိမ်း (ကျောက်စိမ်းသီး) မှာ တစ်ပိဿာလျှင် ၇၀၀၀ကျပ်နှင့် ပီနန်ငရုတ်သီးစိမ်းတစ်ပိဿာလျှင် ၁၀၀၀၀ကျပ်ဖြင့် အရောင်းအဝယ်ဖြစ်ခဲ့၍ ၂၀၂၄ခုနှစ်၊ မေလပိုင်းတွင် ငရုတ်သီးစိမ်းဈေးနှုန်းများမြင့်တက်လာကြောင်းသိရှိရပါသည်။

DOCA(ပဲခူး)