ပြည်တွင်းကုန်သွယ်မှုသတင်း

      ပြည်မြို့ရှိ မြေပဲဆံဈေးကွက်တွင် မတ်လဆန်း၌ မြေပဲဆန်ဈေးများမှာ အနည်းငယ်မြင့်တက်လာပါသည်။ ကံမ၊ မင်းတုန်း၊ ပေါက်ခေါင်းနှင့် ရွှေတောင်ဘက်မှ (၂-၃) ရက်ခြားတစ်ခါဝင်ရောက်လျက်ရှိပြီး ဝင်ရောက်သည့်ရက်တွင် မြေပဲဆံတစ်တင်းခွဲအိတ် (၅၀၀) အိတ်လောက်သာ ဝင်ရောက်မှုရှိပါသည်။ မြေပဲဆံကို ဒေသတွင်းဆီစက်သမားများနှင့် နယ်စုံမှဝယ်ယူမှုရှိသဖြင့် ဝင်သလောက်အရောင်းအဝယ်ဖြစ်ပြီး ယခု ၂၀၂၃ခုနှစ်၊ မတ်လဆန်းတွင် ဝယ်လိုအားများပြီး ဝင်ရောက်မှုနည်းသွားသဖြင့် မြေပဲဆံဈေးအနည်းငယ်မြင့်တက်လာပါသည်။ ယခုအပတ်၌ မြေပဲဆံဈေးများမှာ မြေပဲဆံ(အဖြူ)တစ်ပိဿာလျှင် (၅၈၀၀) ကျပ်၊ မြေပဲဆံ(အနီ)တစ်ပိဿာလျှင် (၆၈၀၀) ကျပ်ဖြင့် ယခင်အပတ်နှင့်နှိုင်းယှဉ်လျှင် တစ်ပိဿာလျှင် (၂၀၀) ကျပ်ခန့် ဈေးမြင့်တက်လာခဲ့ပါသည်။ ထို့တူ မြေပဲလုံးဆံဈေးမှာလည်း (အဖြူ) တစ်ပိဿာလျှင် (၆၅၀၀) ကျပ်၊ (အနီ) တစ်ပိဿာလျှင် (၇၃၅၀) ကျပ်ဖြင့် တစ်ပိဿာလျှင် ကျပ် (၁၀၀-၁၅၀) ခန့်သာ ဈေးအနည်းငယ်မြင့်တက်လာခဲ့ပါသည်။ မြေပဲဆီဈေးမှာလည်း တစ်ပိဿာလျှင် (၁၃၀၀၀) ကျပ်ဖြင့် ယခင်အပတ်ကအတိုင်း ဈေးငြိမ်ပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

     စားသုံးသူရေးရာဦးစီးဌာနအနေဖြင့် ဌာနလုပ်ငန်းများအပြင် ဝန်ကြီးဌာနကိုယ်စား ကုမ္ပဏီမှတ်ပုံတင်အသစ် လျှောက်ထားလာမှုများနှင့်ပတ်သက်၍လည်း မြေပြင်ကွင်းဆင်းစစ်ဆေးပေးခြင်းများ ဆောင်ရွက်ပေးလျက်ရှိပါသည်။

     ထိုသို့ မြေပြင်ကွင်းဆင်းစစ်ဆေးခြင်းများတွင် ပြည်မြို့၊ ဆံတော်ရပ်ကွက်၊ နဂါးလိမ်လမ်းရှိ ဦးမြင့်သိန်းဦးက Star(Joshua)Co.,Ltd အမည်ဖြင့် ကုမ္ပဏီမှတ်ပုံတင်လျှောက်ထားလာခြင်းကို ကွင်းဆင်းစစ်ဆေးဆောင်ရွက်ခဲ့ရာ အဆိုပါလုပ်ငန်းရှင်က ကုမ္ပဏီထူထောင်ရခြင်းမှာ လက်ရှိလုပ်ငန်းဖြစ်သော ငါးနီတူခြောက်များကို Handcarry ဖြင့် မလေးရှားနိုင်ငံသို့ တိုက်ရိုက်တင်ပို့လျက်ရှိရာမှ နောင်တွင် ပို့ကုန်သွင်းကုန်လိုင်စင်လျှောက်ထား၍ ပမာဏများများတင်ပို့နိုင်ရေးအတွက် ရည်ရွယ်ဆောင်ရွက်ရခြင်းဖြစ်ပါကြောင်း လေ့လာသိရှိခဲ့ရပါသည်။ လုပ်ငန်းရှင်က ငါးနီတူခြောက်များကို မလေးရှားနိုင်ငံသို့ Handcarry ဖြင့် တိုက်ရိုက်တင်ပို့မှုအား ၂၀၂၂ခုနှစ် ဒီဇင်ဘာလမှစ၍ တင်ပို့လျက်ရှိပြီး ယခုအခါ သင်္ဘောဖြင့်တင်ပို့နိုင်ရေး ပို့ကုန်သွင်းကုန်လိုင်စင်လျှောက်ထားရရှိနိုင်ရေး ဆောင်ရွက်လျက်ရှိပါသည်။ ကုန်ကြမ်းအား ရခိုင်ပြည်နယ်၊ သံတွဲမြို့နယ်အတွင်းရှိ လှေကြီးချိုင်ရွာမှဝယ်ယူပြီး ပြန်လည်သန့်စင်၍ တင်ပို့ကြောင်းနှင့် ပြည်ပမှ ငါးနီတူခြောက်ဝယ်ယူသူများမှာ ယခင်က ထိုင်းနိုင်ငံမှဝယ်ယူခြင်းဖြစ်ပြီး ထိုင်းငါးနီတူခြောက်မှာ ကြော်လျှင် မာဆတ်လျက်ရှိသည့်အတွက် မြန်မာငါးနီတူခြောက်မှာ ပိုမိုစားကောင်းကြောင်း လေ့လာသိရှိရပါသည်။

    ကုန်ကြမ်းအား ပြည်အရောက် တစ်ပိဿာလျှင် (၁၃၀၀၀ - ၁၅၀၀၀) ကျပ်ခန့်ကုန်ကျပြီး ပြန်လည်သန့်စင်သည့်လုပ်သားခ၊ ထုပ်ပိုးခနှင့်မလေးရှားအရောက် ကုန်ကျစရိတ်အနေဖြင့် တစ်ပိဿာလျှင် (၁၈၀၀၀-၂၀၀၀၀) ကျပ်ခန့်ကုန်ကျပါသည်။ ငါးနီတူခြောက်တစ်ကီလိုလျှင် မလေးရှားငွေ (၂၅-၃၀) ရင်းဂစ်ရရှိပါသဖြင့် မလေးရှားငွေ ၁ရင်းဂစ်လျှင် မြန်မာကျပ်ငွေ ယနေ့ပေါက်ဈေး ၆၆၀ကျပ်ဖြစ်၍ တစ်ကီလိုလျှင် မြန်မာကျပ်ငွေ (၁၆၅၀၀-၁၉၈၀၀) ကျပ်ရရှိမည်ဖြစ်ပါသည်။ ၃ကီလိုလျှင် ၂ပိဿာရရှိသည့်အတွက် တစ်ပိဿာလျှင် (၂၄၇၅၀-၂၉၇၀၀)ကျပ် ဈေးရရှိပါသဖြင့် တစ်ပိဿာအကျိုးအမြတ်အနေဖြင့် (၆၀၀၀-၁၀၀၀၀) ကျပ်ခန့် အကျိုးအမြတ်ရရှိပါသည်။ တစ်လလျှင်  ပိဿာချိန် ၂၀၀နီးပါးတင်ပို့ရသဖြင့် အကျိုးအမြတ်အနေဖြင့် ကျပ်(၁၂)သိန်းမှ ကျပ်(၂၀) သိန်းဝန်းကျင်ခန့် အကျိုးအမြတ်ရရှိကြောင်း သိရှိရပါသည်။

     အဆိုပါလုပ်ငန်းမှ ပို့ကုန်သွင်းကုန်လိုင်စင်ရရှိပြီးပါက ယခုထက်လုပ်ငန်းပိုမို တွင်ကျယ်လာမည်ဖြစ်ပြီး ပြည်ခရိုင်အတွင်း အလုပ်အကိုင်အခွင့်အလမ်းများ ပိုမိုရရှိလာမည်ဖြစ်ပါသည်။

DOCA(ပဲခူး)

မြေပဲစိုက်တောင်သူများသည် ယခု(၂၀၂၃)ခုနှစ်တွင် မြေပဲစိုက်ပျိုးရာတွင် အလုပ်သမားငှားရမ်းမှု များပြားခြင်းနှင့် စိုက်ပျိုးစရိတ်မြင့်မားခြင်းတို့ကြောင့် အလွယ်တကူစိုက်ပျိုနိုင်းပြီး ကုန်ကျစရိတ်သက်သာသော ပဲဇီးကွက်၊ ပဲထောပတ်၊ ပဲနီလေးနှင့် အခြားပဲများကို အစားထိုးစိုက်ကြ၍ ဆောင်းသီးနှံမြေပဲပေါ်ချိန်တွင် ထွက်ရှိမှုနည်းပါးကြောင်း၊ ပခုက္ကူမြေပဲဈေးကွက်တွင် ကုန်ဝင်နည်းသွားခြင်းကြောင့် မြို့ပေါ်ရှိလုပ်ငန်းရှင်များမှ ယခင်ဝယ်ယူသိုလှောင်ထားရှိသော မြေပဲများကို ကြိတ်ခွဲကာ ပြည်တွင်း၌သာ ထုတ်လုပ်ရောင်းချဖြန့်ဖြူးလျက်ရှိပြီး ယခုအပတ်တွင် ပြည်ပသို့တင်ပို့ဖြန့်ဖြူးရောင်းချမှုမရှိကြောင်းနှင့် မြေပဲအရောင်းအဝယ်မှာ အေးလျက်ရှိကြောင်း မြို့ပေါ်ရှိမြေပဲရောင်းဝယ်ရေးလုပ်ငန်းရှင်ထံမှ သိရှိရသည်။

ပခုက္ကူမြေပဲဈေးကွက်မှာ မတ်လ(ဒုတိယ)ပတ်အတွင်း မြေပဲတောင့်အစို (၆)လပဲ တစ်ပိဿာလျှင် ကျပ်(၂၁၀၀)၊  မြေပဲဆံအရည်အသွေးလိုက်၍ လက်ကားတစ်ပိဿာလျှင် ကျပ်(၆၀၀၀/ ၆၃၀၀)၊ လက်လီဈေးမှာ ကျပ်(၆၅၀၀/၆၈၀၀)၊ မြေပဲဆီတစ်ပိဿာလျှင် ကျပ်(၁၂၀၀၀မှ ၁၃၀၀၀) စသည်ဖြင့် အရောင်းအဝယ်ဖြစ်လျက်ရှိကြောင်း မြေပဲဈေးကွက်မှ သိရှိရပါသည်။

ပပရွှေ(ပခုက္ကူ)

  တောင်ငူမြို့ရှိ ဆန်ပွဲရုံများတွင် ရွှေဘိုပေါ်ဆန်း(အသစ်)တစ်အိတ်လျှင် ၈၂၀၀၀ကျပ်၊ ဖျာပုံပေါ်ဆန်း(အသစ်)တစ်အိတ်လျှင် ၇၈၀၀၀ကျပ်၊ ဒေသပေါ်ဆန်း(အသစ်)တစ်အိတ်လျှင် ၇၂၀၀၀ကျပ်နှင့် ဧည့်မထဆန်သစ်(ထိပ်စ)တစ်အိတ်လျှင် ၅၇၀၀၀ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်လျက်ရှိပါသည်။

       မြေပဲဆီမှာ ယခင်အပတ်ကအတိုင်း တစ်ပိဿာလျှင် ၁၅၀၀၀ကျပ်နှုန်းဖြင့် ဈေးနှုန်းတည်ငြိမ်နေပြီး စားအုန်းဆီမှာ ယခင်အပတ်က တစ်ပိဿာလျှင် ၇၂၀၀ ကျပ်မှ ၇၅၀၀ ကျပ်ထိဈေးတက်ခဲ့ပြီး ယခုအပတ်တွင် တစ်ပိဿာလျှင် ၇၂၀၀ကျပ်မှ ၇၀၀၀ကျပ်ထိ ဈေးကျခဲ့ပါသည်။

       ကြက်သွန်နီအသေးတစ်ပိဿာလျှင် ၁၂၀၀ကျပ်၊ အလတ်တစ်ပိဿာလျှင် ၁၅၀၀ကျပ်နှင့် အကြီးတစ်ပိဿာလျှင် ၁၈၀၀ကျပ်ရှိပါသည်။ တရုတ်ကြက်သွန်အနီတစ်ပိဿာလျှင် ၂၅၀၀ကျပ်ရှိပါသည်။ ကြက်သွန်ဖြူအသေးတစ်ပိဿာလျှင် ၄၂၀၀ကျပ်၊ အလတ်တစ်ပိဿာလျှင် ၅၄၀၀ကျပ်နှင့်  အကြီးတစ်ပိဿာလျှင် ၅၀၀၀ကျပ်ရှိပါသည်။ တရုတ်ကြက်သွန်ဖြူမှာ တစ်ပိဿာလျှင် ၅၀၀၀ကျပ်ရှိပါသည်။

     အာလူးအသေးတစ်ပိဿာလျှင် ၂၀၀၀ကျပ်၊ အလတ်တစ်ပိဿာလျှင် ၂၄၀၀ကျပ်နှင့် အကြီးတစ်ပိဿာလျှင် ၂၈၀၀ကျပ်ရှိပါသည်။ တရုတ်အာလူးတစ်ပိဿာလျှင် ၃၂၀၀ကျပ်ရှိပါသည်။ ငရုတ်သီးအပုတစ်ပိဿာလျှင် ၁၈၀၀၀ကျပ်မှ ၂၀၀၀၀ကျပ်ထိ၊ အရှည်တစ်ပိဿာလျှင် ၁၇၀၀၀ကျပ်မှ ၁၉၀၀၀ကျပ်ထိနှင့် ငရုတ်သီးပွတစ်ပိဿာလျှင် ၂၃၀၀၀ကျပ်မှ ၂၅၀၀၀ကျပ်ထိရှိပါသည်။ စားအုန်းဆီဈေးအနည်းငယ်ကျဆင်းပြီး အခြားအခြေခံစားသောက်ကုန်များဈေးနှုန်းများမှာ တည်ငြိမ်လျက်ရှိပါကြောင်းနှင့် အရောင်းအဝယ်မှာလည်း ပုံမှန်အတိုင်းရှိပါကြောင်း သိရှိရပါသည်။

DOCA(ပဲခူး)

      တောင်ငူမြို့၊ ညောင်ပင်လေးဈေးတွင် စတော်ဘယ်ရီသီးများမှာ ပေါ်ဦးပေါ်စ၌ တစ်ပိဿာလျှင် ၁၃၀၀၀ ကျပ်မှ ၁၅၀၀၀ ကျပ်ထိရောင်းချခဲ့ရပါသည်။ ၂၀ ကျပ်သားကို ဘူးများဖြင့်ထုပ်ပိုးပြီး တစ်ဘူးလျှင် ၂၅၀၀ ကျပ်မှ ၃၀၀၀ ကျပ်အထိရောင်းချပါသည်။ ယခု အသီးများလှိုင်လှိုင်ပေါ်ချိန်တွင် တစ်ပိဿာလျှင် ၈၀၀၀ ကျပ်မှ ၉၀၀၀ ကျပ်ထိနှင့် ၂၀ ကျပ်သားဘူးတစ်ဘူးလျှင် ၁၅၀၀ ကျပ်မှ ၂၀၀၀ ကျပ်ထိရောင်းရကြောင်း ညောင်ပင်လေးဈေးရှိ သစ်သီးဆိုင်များမှသိရှိရပါသည်။

     စတော်ဘယ်ရီသီးများသည် အရည်ရွှမ်းပြီး ချိုမြိန်သည့်အရသာကြောင့် လူကြီးလူငယ်မရွေးနှစ်သက်ကြပါသည်။ ယခုကဲ့သို့ ပူအိုက်သည့်ရာသီတွင် စတော်ဘယ်ရီသီးများကို ဖျော်ရည်ဖြစ်စေ၊ ရေခဲမုန့်အဖြစ်ဖြစ်စေ အမျိုးမျိုးစိတ်တိုင်းကျသလို စားသောက်နိုင်ပါသည်။ စတော်ဘယ်ရီသီးကို ပုံမှန်စားသုံးခြင်းအားဖြင့် သွေးတိုးရောဂါဖြစ်ပွားမှုမှ ကြိုတင်ဟန့်တန်းပေးနိုင်ပါကြောင်းနှင့် ခန္ဓာကိုယ်အတွင်းရှိ သွေးများလည်ပတ်မှုကောင်းမွန်စေသောကြောင့် ကျန်းမာရေးကို များစွာအထောက်အကူဖြစ်စေကြောင်းသိရှိရပါသည်။

DOCA(ပဲခူး)