ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး၊ ပြည်ခရိုင်တွင် ၂၀၂၂ခုနှစ်၊ အောက်တိုဘာလ မိုးစပါးစပေါ်ချိန်မှစ၍ ရောင်းဝယ်နေသောမှော်ဘီစပါးဈေးမှာ တင်း(၁၀၀)လျှင် (၁၁၀၀၀၀၀ ) ကျပ်နှင့် ကရင်မစပါးဈေးမှာ တင်း(၁၀၀)လျှင် (၉၈၀၀၀၀) ကျပ်၊ မှော်ဘီဆန် (၁၀၈) ပေါင်ပါ တစ်အိတ်လျှင် (၄၈၀၀၀) ကျပ်၊ ကရင်မဆန်တစ်အိတ်လျှင် (၄၃၀၀၀) ကျပ်ဖြင့် အရောင်းအဝယ်ရှိပြီး နိုဝင်ဘာလ၌ မှော်ဘီတင်း(၁၀၀)လျှင် (၁၂၉၀၀၀၀) ကျပ်၊ ကရင်မစပါးတင်း(၁၀၀)လျှင် (၁၂၀၀၀၀၀) ကျပ်၊ မှော်ဘီဆန်တစ်အိတ်လျှင် (၅၂၀၀၀) ကျပ်၊ ကရင်မဆန်အလတ်စတစ်အိတ်လျှင် (၄၅၀၀၀) ကျပ်နှင့် ၂၀၂၂ခုနှစ်၊ ဒီဇင်ဘာလထိ ဈေးငြိမ်နေခဲ့ရာမှ ၂၀၂၃ခုနှစ်၊ ဇန်နဝါရီလတွင် မှော်ဘီစပါးဈေးမှာ (၁၅) သိန်းကျပ်၊ ကရင်မစပါးမှာ (၁၄) သိန်းကျပ်၊ မှော်ဘီဆန်တစ်အိတ်လျှင် (၅၈၀၀၀) ကျပ်၊ ကရင်မဆန်တစ်အိတ်လျှင် (၅၀၀၀၀) ကျပ်ဖြင့် ဈေးများမြင့်တက်လာခဲ့ပါသည်။ ယခုနှစ်တွင် မိုးစပါးများမှာ သွင်းအားစုများ ဈေးမြင့်လာသည့်အတွက် သွင်းအားစုအနည်းငယ်သာသုံးစွဲခဲ့သောကြောင့် စပါးမှာ အထွက်နှုန်းနည်းသည့်အတွက်ကြောင့်လည်းကောင်း၊ နွေစပါးများထွက်ပေါ်မှုမရှိသေးသည့်အတွက်ကြောင့်လည်းကောင်း၊ စပါးဈေးမှာ အမြင့်ဈေးဖြင့် ဈေးငြိမ်နေခြင်းဖြစ်ကြောင်း သိရှိရပါသည်။

DOCA(ပဲခူး)

     ပြည်ကုန်စည်ဒိုင်တွင် မတ်ပဲ၊ ပဲစင်းငုံ၊ ကုလားပဲ၊ စားတော်ပဲ၊ ပဲကြီး၊ ဘိုကိတ်ပဲများ အရောင်းအဝယ်ဖြစ်လျက်ရှိပါသည်။ ဖေဖော်ဝါရီလ စတုတ္တပတ်တွင် မတ်ပဲ၊ ပဲစင်းငုံ၊ ပဲကြီးဈေးမှာ မြင့်တက်နေပြီး ကျန်ပဲများမှာ ဈေးအေးလျက်ရှိပါသည်။

  ပြည်ကုန်စည်ဒိုင် ၂၀၂၃ခုနှစ်၊ ဖေဖော်ဝါရီလ နောက်ဆုံးပတ်တွင် မတ်ပဲတစ်တင်းလျှင် (၆၂၀၀၀-၆၂၅၀၀) ကျပ်ဖြင့် တစ်ရက်လျှင် အိတ် (၅၀၀) ခန့် အရောင်းအဝယ်ဖြစ်ခဲ့ပါသည်။ ၂၀၂၃ခုနှစ်၊ မတ်လ ပထမပတ်တွင် မတ်ပဲဈေးကျလာပါသည်။ ပဲတစ်တင်းလျှင် (၆၀၀၀၀-၆၁၀၀၀)ကျပ်ထိ ဈေးကျလာခဲ့ပြီး ပဲတစ်တင်းလျှင် (၁၀၀၀)ကျပ်ခန့် ဈေးလျော့ခဲ့ပါသည်။ ရန်ကုန်ဝယ်လက်အဝယ်ရှိပြီး တစ်ရက်လျှင် အိတ် (၄၀၀/၅၀၀) ခန့် အရောင်းအဝယ်ဖြစ်ပြီး သွက်လျက်ရှိပါသည်။

     ဖေဖော်ဝါရီလ စတုတ္တပတ် ပြည်ကုန်စည်ဒိုင်၏ ပဲစင်းငုံဈေးမှာ တစ်တင်းလျှင် (၆၉၀၀၀-၆၉၅၀၀) ကျပ်ဖြင့် လှောင်သမားများနှင့် ရန်ကုန်အဝယ်ရှိပြီး တစ်ရက်လျှင် အိတ် (၆၀၀)ခန့် အဝယ်ရှိခဲ့ပါသည်။ မတ်လ ပထမပတ်တွင် (၆၈၅၀၀-၆၉၀၀၀) ကျပ်ဖြင့် ရန်ကုန်အဝယ်တစ်ရက်လျှင် အိတ် (၅၀၀) ခန့် အဝယ်ရှိပြီး ဈေးငြိမ်နေကြောင်း သိရှိရပါသည်။

   ပြည်ကုန်စည်ဒိုင်တွင် ဖေဖော်ဝါရီလ စတုတ္တပတ်၌ ကုလားပဲ(HL) တစ်တင်းလျှင် (၆၆၀၀၀-၆၆၅၀၀)ကျပ်၊ ကုလားပဲ (မြကြေးမှုံ) တစ်တင်းလျှင် (၆၆၀၀၀-၆၆၅၀၀) ကျပ်ဖြင့် ခွဲစက်သမားနှင့် ရန်ကုန်အဝယ်တစ်ရက်လျှင် အိတ် (၄၀၀/၅၀၀) ခန့် အဝယ်ရှိခဲ့ပါသည်။ မတ်လ ပထမပတ်တွင် ကုလားပဲ (HL) တစ်တင်းလျှင် (၆၈၀၀၀)ကျပ်၊ ကုလားပဲ (မြကြေးမှုံ) တစ်တင်းလျှင် (၆၈၀၀၀) ကျပ်ဖြင့် ခွဲစက်သမားများမြို့တွင်းအဝယ်နှင့် ရန်ကုန်ဝယ်လက်ရှိခဲ့ပါသည်။ ပဲခွဲကြမ်းများကို နယ်စုံသို့ တင်ပို့မှုရှိခဲ့ပါသည်။

      ပြည်ကုန်စည်ဒိုင်တွင် ဖေဖော်ဝါရီလ စတုတ္ထပတ်တွင် ပဲကြီးအရောင်းအဝယ်ရှိပြီး ပဲကြီး(ရွှေကျွန်း)တစ်တင်းလျှင် (၇၈၅၀၀-၇၉၀၀၀-၈၀၀၀၀)ကျပ်ဈေးဖြင့် မြို့တွင်းပဲကြော်သမားများနှင့် တစ်ခါတစ်ရံ ရန်ကုန်ဝယ်လက်ရှိခဲ့ပါသည်။ ပြည်ကုန်စည်ဒိုင်၏ မတ်လ ပထမပတ်တွင် ပဲကြီး(ရွှေကျွန်း)တစ်တင်းလျှင် (၇၅၀၀၀)ကျပ်ဈေးထိ ဈေးကျလာခဲ့ပြီး တစ်ရက်လျှင် အဝယ်အိတ် (၃၀၀) အိတ်ခန့် ပဲကြော်သမားများ မြို့တွင်းအဝယ်ရှိခဲ့ပါသည်။ မတ်လ ပထမပတ်တွင် ပဲကြီး(ကုန်းပဲ)များလည်း အရောင်းအဝယ်ဖြစ်လျက်ရှိပြီး ပဲကြီး(ကုန်းပဲ)တစ်တင်းလျှင် (၇၈၀၀၀)ကျပ်ခန့်ရှိပါသည်။

      ဖေဖော်ဝါရီလ နောက်ဆုံးပတ်တွင် စားတော်ပဲ(ကျွန်း)တစ်တင်းကို (၁၀၅၀၀၀)ကျပ်ဖြင့် မြို့တွင်း အဝယ်တစ်ရက်လျှင် (၂၅)အိတ်ခန့် အဝယ်ရှိခဲ့ပါသည်။ မတ်လ ပထမပတ်တွင် စားတော်ပဲ (ကျွန်း) တစ်တင်းလျှင် (၁၀၅၀၀၀-၁၁၀၀၀၀)ကျပ်ဖြင့် မြို့တွင်းအရောင်းအဝယ်ဖြစ်ခဲ့ပါသည်။

      ပြည်ကုန်စည်ဒိုင်၏ ဖေဖော်ဝါရီလ စတုတ္တပတ်တွင် ဘိုကိတ်ပဲတစ်တင်းကို (၄၇၀၀၀)ကျပ်ဖြင့် မြို့တွင်းနှင့်ရန်ကုန်အဝယ်တစ်ရက်လျှင် အိတ် (၅၀/၁၀၀) ခန့် အဝယ်ရှိပါသည်။ မတ်လပထမပတ်တွင် ဘိုကိတ်တစ်တင်းလျှင် (၄၇၀၀၀-၄၈၀၀၀) ကျပ်ဖြင့် မြို့တွင်းရောင်းဝယ်မှုရှိပါသည်။

       ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်မှုမှာ သွက်လျက်ရှိကြောင်း သိရှိရပါသည်။

DOCA(ပဲခူး)

      ပြည်ပဲမျိုးစုံဈေးကွက်၌ ဆောင်းပဲသီးနှံများစွာဝင်ရောက်လျက်ရှိပြီး မတ်ပဲသီးနှံ၊ ပဲစင်းငုံ၊ ကုလားပဲနှင့် ပဲကြီးသီးနှံ၊ ဘိုကိတ်၊ ပဲလွမ်းသီးနှံများနေ့စဉ်ဝင်ရောက်ခဲ့ကာ ဈေးအမြင့်ဖြင့် အရောင်းအဝယ်ဖြစ်နေသည့်ပဲမှာ ပဲကြီးသီးနှံပင်ဖြစ်ပါသည်။ ပဲကြီးသီးနှံမှာတစ်ရက်လျှင် အိတ် ၂၀၀/၃၀၀ ကျော်ဝင်ရောက်ခဲ့၍ ပဲကြော်ဖိုလုပ်ငန်းသမားများ အဓိကဝယ်ယူပြီး ဝင်လာသမျှ အရောင်းအဝယ်ဖြစ်ခဲ့ပါသည်။ ပဲကြီးသီးနှံဈေးနှုန်းအနေဖြင့် ဈေးအမြင့်ရသောကြောင့် (ရွှေကျွန်း) တစ်တင်းလျှင် (၈၁၀၀၀)ကျပ်၊ (ကမ်းနား)တစ်တင်းလျှင် (၇၈၀၀၀)ကျပ်တို့ဖြင့် အသီးသီးရောင်းဝယ်နေခဲ့သောကြောင့် ပြည်ပဝယ်လိုအားရှိသော မတ်ပဲ၊ ပဲစင်းငုံသီးနှံများထက်ပင် ဈေးပိုရခဲ့ပါသည်။ ယခင်နှစ်က မတ်လအတွင်း ပဲကြီးသီးနှံဈေးမှာတစ်တင်းလျှင် ကျပ် (၆)သောင်းကျော်သာရရှိ ခဲ့သည့်အတွက် ယခု ၂၀၂၃ခုနှစ်၊ မတ်လ၌ ပဲကြီးသီးနှံဈေးမှာ ယခင်နှစ်ကထက် ကျပ်(၂)သောင်းနီးပါးဈေးပိုရ၍ ပဲဈေးကွက်အတွင်း အခြားပဲများထက် ဈေးအမြင့်ဖြင့် ရောင်းဝယ်နေခဲ့ကြောင်း သိရှိရပါသည်။

DOCA(ပဲခူး)

      ပြည်ပဲဈေးကွက်၌ ပြည်ပဝယ်လက်ပဲသာမက ပြည်တွင်းဝယ်လက်ပဲများလည်း နေ့စဉ်အရောင်းအဝယ်ဖြစ်လျက်ရှိပါသည်။ ပြည်ပဝယ်လိုအားများသောပဲအားလုံးမှာ ဈေးကောင်းရရှိပြီး ပြည်တွင်းလက်လီ/လက်ကား ရောင်းဝယ်မှုများသည့်ပဲများတွင် ထောပတ်ပဲသီးနှံသည် အခြားပဲများထက် ဈေးသိသိသာသာပိုရလျက်ရှိပါသည်။ တစ်တင်းလျှင် (၆၇၀၀၀)ကျပ်ဖြင့် လက်လီ/လက်ကား အရောင်းအဝယ်ဖြစ်၍ တစ်ရက်လျှင် အိတ်(၅၀)ကျော်၊ (၁၀၀)နီးပါး ရောင်းဝယ်ခဲ့ကြကြောင်း သိရှိရပါသည်။ ယခင်နှစ် မတ်လအတွင်း ထောပတ်ပဲသီးနှံဈေးမှာ တစ်တင်းလျှင် (၄၅၀၀၀)ကျပ်သာရရှိခဲ့တဲ့အတွက် ယခု ၂၀၂၃ခုနှစ်၊ မတ်လဈေးနှုန်းနှင့်နှိုင်းယှဉ်လျှင် ယခင်နှစ်ထက် ကျပ်(၂)သောင်းကျော်အထိ ဈေးကောင်းပိုရလျက်ရှိ၍ ယခုနှစ် ထောပတ်ပဲစိုက်ပျိုးသူများ အကျိုးအမြတ်ပိုရလာခဲ့ကြောင်း သိရှိရပါသည်။

DOCA(ပဲခူး)

     ပြည်ဈေးကွက်အတွင်း ပြောင်းဖူးသီးနှံမှာ ဈေးကောင်းရလျက်ရှိပြီး ပြည်ဈေးကွက်အတွင်းသို့ ရွှေတောင်၊ သဲကုန်း၊ အင်းမ၊ ပုတီးကုန်း၊ မှော်ဇာ၊ ဆင်မြီးဆွဲ၊ တောင်ခွေးရဲ စသည့်နယ်များမှ ပြောင်းဖူးများဝင်ရောက်မှုရှိ၍ ရောင်းချသည့်မျိုးမှာ စိုက်ပျိုးရေးဆေးဆိုင်များမှ ဝယ်ယူရရှိသည့်မျိုးများကို အဓိကထားဝယ်ယူ၍ စိုက်ပျိုးရောင်းချလျက်ရှိပြီး ဆင်မြီးဆွဲ၊ ပြောင်းဖူး၊ ခွေးရဲပြောင်းဖူးမျိုးများကိုလည်း အနည်းငယ်စိုက်ပျိုးရောင်းချလျက်ရှိပါသည်။ ပြောင်းဖူးတွင် ဗီတာမင် B1၊ B5၊ B9၊ C၊ ပရိုတင်းဓာတ်၊ ကစီဓာတ်၊ အဆီဓာတ်၊ ထုံးဓာတ်၊ မီးစုန်းဓာတ်၊ သံဓာတ်၊ နိုင်ယာစင်၊ ဘီတာကယ်ရိုတင်း၊ ဖောလိတ်နှင့် အင်တီအောက်ဆီးဒင့် ဇီဇန်သင်း၊ Ferulic Acid စသည့် အာဟာဓါတ်များစွာပါဝင်မှုကြောင့် နှလုံးသွေးကြောဆိုင်ရာရောဂါ၊ လေဖြတ်ရောဂါ၊ အဆုတ်ကင်ဆာတို့အား ကာကွယ်ခြင်း၊ မှတ်ဉာဏ်စွမ်းအားနှင့် အမြင်အာရုံကောင်းမွန်စေခြင်း၊ ခန္ဓာကိုယ်တွင် ရောင်ရမ်းမှုလျော့ကျစေခြင်း၊ သွေးတွင်းကိုလက်စထရော လျော့ကျစေခြင်းများအပြင် ပြောင်းဖူးတွင် ဖိုက်ဘာအမျှင်ဓာတ် အတော်များများပါဝင်သောကြောင့် အူတွင်းရွေ့လျားမှုကို မြှင့်တင်ပေးနိုင်ပြီး စအိုကင်ဆာကာကွယ်ကုသခြင်းတွင် အရေးပါအရာရောက်သည့်သီးနှံဖြစ်ပါသည်။ အရောင်းအဝယ်အနေဖြင့်လည်း သက်သက်လွတ်စားခြင်း၊ အဆာပြေစားခြင်း၊ မြန်မာ့ရိုးရာလက်ဖက်နှင့်တွဲဖက်၍ ထမင်းနှင့်စားခြင်း၊ ချင်း၊ ကြက်သွန်ဖြူ၊ ကြက်ဥတို့နှင့်ရောကြိတ်၍ ပြောင်းဖူးအချပ်ကြော်၊ အပျော့ကြော် စသဖြင့် လုပ်စားကြခြင်းနှင့် မာလာရှမ်းကောထဲတွင်လည်း ထည့်သွင်းစားသုံးခြင်းများကြောင့် အရောင်းအဝယ်သွက်လျက်ရှိသည်။ လက်လီဈေးများတွင် အထိုင်ချရောင်းချခြင်း၊ စက်ဘီး/ဆိုင်ကယ်တို့ဖြင့် လှည့်လည်ရောင်းချခြင်း၊ လူစည်ကားရာနေရာများတွင် ပြောင်းဖူးပြုတ်အိုးနှင့် မီးဖုတ်မီးဖိုသံပြားများနှင့်အတူ ပူပူနွေးနွေးရောင်းချခြင်းများလည်းရှိပါသည်။ ယခင်ကာလများတွင် ပြောင်းဖူးတစ်ဖူးလျှင် အမြင့်ဆုံးရရှိသည့်ဈေးမှာ ကျပ် (၂၅၀-၃၀၀) ထိသာရှိခဲ့ပြီး ယခုပြောင်းဖူးဈေးနှုန်းများမှာ ပြောင်းဖူးအဝါတစ်ဖူးလျှင် အစိမ်း (၂၅၀-၃၀၀) ကျပ်၊ အပြုတ်တစ်ဖူးလျှင် (၄၅၀) ကျပ်ရှိပြီး အဝါအချောတစ်ဖူးလျှင် (၆၀၀-၅၀၀) ကျပ်တို့ဖြင့်ရောင်းချကြကာ ပြောင်းဖူးအဖြူတစ်ဖူးလျှင် အစိမ်း (၃၅၀) ကျပ်၊ အပြုတ် (၄၀၀-၅၀၀) ကျပ်တို့ဖြင့် ရောင်းချမှုရှိနေပါကြောင်း သိရှိရပါသည်။

DOCA(ပဲခူး)