ပြည်တွင်းကုန်သွယ်မှုသတင်း

        ဧရာဝတီတိုင်းဒေသကြီး၊ ဖျာပုံခရိုင်၊ စားသုံးသူရေးရာဦးစီးဌာန၊ ဒုတိယခရိုင်ဦးစီးမှူးနှင့် မြို့နယ်စစ်ဆေးရေးမှူးတို့သည် ဩဂုတ်လ(၅) ရက်နေ့တွင် စားအုန်းဆီရန်ကုန်အထိုင် ရည်ညွှန်းလက္ကားဈေး နှုန်းအပေါ် ကုန်သည်များညွှန်ကြားချက်နှင့်အညီရောင်းချစေရေးနှင့် ဈေးနှုန်း အဆမတန်မြှင့်တင်ရောင်းချ ခြင်းမရှိစေရေးအတွက် အရောင်းဆိုင်များအား ကြီးကြပ်ဆောင်ရွက်လျက်ရှိကြောင်း သိရသည်။

     အဆိုပါအရောင်းဆိုင်များမှ ကုမ္ပဏီများက စားအုန်းဆီတင်သွင်း၊ ဖြန့်ဖြူးရောင်းချရာတွင် ဝယ်ယူရရှိသည့်လက္ကားကုန်သည်များအနေဖြင့် ရန်ကုန်အထိုင် ရည်ညွှန်းလက္ကားဈေးနှုန်းအပေါ် သယ်ယူပို့ဆောင်ခ ကုန်ကျ စရိတ်များထပ်ပေါင်း၍ (၂)ရာခိုင်နှုန်းအမြတ်ထက်မပိုသောဈေးနှုန်းဖြင့်ဈေးကွက်အတွင်းပြန်လည် ရောင်းချခြင်းနှင့် ဈေးနှုန်းအဆမတန်မြှင့်တင်ရောင်းချခြင်း မရှိစေရေးအတွက် ကွင်းဆင်းစိစစ်ကြပ်မတ် ဆောင်ရွက်ခဲ့ရာ ဖျာပုံမြို့နယ်အနေဖြင့် စားအုန်းဆီပေပါရရှိမှုအပေါ် စားသုံးသူပြည်သူများအား တစ်ပိဿာ (၃၈၅၀)ကျပ်ဖြင့် တစ်ဦးလျှင် တစ်ပိဿာနှုန်းဖြင့် နှစ်ရက်ရောင်းချပေးလျက်ရှိကြောင်း သိရသည်။

DOCA(ဧရာဝတီ)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီကို ဖွဲ့စည်းကာ ပြည်ပမှတင်သွင်းလာသည့် စားသုံးဆီ များအား သတ်မှတ်အရည်အသွေး၊ စံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများ ကျန်းမာ ရေးနှင့်ညီညွတ်သော စားသုံးဆီများကို သုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်ရေး တို့အတွက် ကြီးကြပ်ထိန်းကျောင်း ဆောင်ရွက်လျှက်ရှိပါသည်။

              စားသုံးဆီတင်သွင်းသည့် ကုမ္ပဏီများမှ လက်ကားကုန်သည်များသို့ ဖြန့်ဖြူးထုတ်ပေး သည့် စားအုန်းဆီများကို ရန်ကုန်အထိုင်ဈေး၊ ရည်ညွှန်းလက်ကားဈေးအပေါ် သယ်ယူပို့ဆောင်ခ ကုန်ကျစရိတ်များထပ်ပေါင်း၍ ၂ ရာခိုင်နှုန်းအမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချသွားရမည် ဖြစ်ပါသည်။

              စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးအနေဖြင့် တောင်ငူခရိုင်အတွင်း ဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းချစေရေး၊ ဈေးနှုန်းအဆမတန် ရောင်းချခြင်းများ မပြုလုပ်စေရေးတို့အတွက် ကွင်းဆင်းဆောင်ရွက်လျှက်ရှိပါသည်။

             တောင်ငူမြို့မှ ဆီကုန်သည်များဖြစ်ကြသော ဦးကျော်ဟိန်း၊ ဒေါ်ခင်လှ၊ ဒေါ်အေးမြင့်၊ ဒေါ်ဝင်းဝင်းမော်၊ ဦးဖိုးလုံး၊ ဦးအောင်ကျော်၊ ဦးကျော်ဝင်း၊ ဒေါ်သန္တာတို့မှ ရန်ကုန်အထိုင်ဈေး၊ ရည်ညွှန်းလက်ကားဈေးအပေါ် သယ်ယူပို့ဆောင်ခ ကုန်ကျစရိတ်များထပ်ပေါင်း၍ ၂ ရာခိုင်နှုန်း အမြတ်ထက် မပိုသောဈေးနှုန်းဖြင့် ဈေးကွက်အတွင်းလက်ကားဖြန့်ဖြူးခြင်းကို မိုဘိုင်းကားဖြင့် လှည့်လည်၍ သော်လည်းကောင်း၊ ဆီဆိုင်အထိုင်ဖြင့်သော်လည်းကောင်း ရည်ညွှန်းလက်ကား ဈေးပေါ် အခြေခံ၍ လက်လီ တစ်ပိဿာလျှင် ၅၄၀၀ ကျပ်၊ ၄၉၀၀ ကျပ်၊ ၃၉၀၀ ကျပ် စသည်ဖြင့် ရောင်းချလျှက်ရှိကြောင်း သိရှိရပါသည်။

DOCA(ပဲခူး)

              မြန်မာတို့၏ မနက်ခင်းထမင်းကြမ်းဝိုင်းတွင် ပဲပြုတ်သည် မပါမဖြစ်သည့် ဟင်းအမည် တစ်မျိုးဖြစ်သည်။ ပဲပြုတ်ကို ထမင်းပူပူလေးနှင့်ဖြစ်စေ၊ ထမင်းကြော်၊ ပလာတာ၊ အီကြာကွေးတို့နှင့် ဖြစ်စေ စားသုံးလေ့ရှိပါသည်။ ပဲပြုတ်ကို အလွယ်တကူ ဝယ်ယူနိုင်သော်လည်း အရသာကောင်းမွန် သည့် ပဲပြုတ်ကိုတော့ လွယ်လွယ်ကူကူနှင့်မရပါ။

              ပဲပြုတ်ကို စားတော်ပဲဖြင့်ပြုလုပ်ပါသည်။ စားတော်ပဲကို ရေထဲသို့လက်နှစ်ကြည့်လျှင် လက်အပူခံနိုင်သည့် ရေနွေးနွေလေးဖြင့် ၃ နာရီကြာအောင်စိမ်ရပါမည်။ ထို့နောက် စကာဖြင့် ရေစစ် ပြီး မနက်တစ်ကြိမ်၊ ညတစ်ကြိမ် ရေလောင်းပေးရပါသည်။ နောက်တစ်နေ့ ပဲအညှောင့်ပေါက်လာမှ ပြုတ်လို့ရပါသည်။ ပြုတ်သည့်အခါတွင် ပဲနှင့်ရေကို အတိဖြစ်အောင်ထည့်ရပါသည်။ ရေခမ်းသွား လျှင် ထမင်းအိုးနှပ်သလို မီးအေးအေးဖြင့် ရေခမ်းအငွေ့ထွက်အောင် ထားရပါသည်။ တစ်ချို့က ရေခမ်းလာလျှင် ဇကာနှင့်စစ်ပြီး ရေနွေးငွေ့ဖြင့်ပေါင်းသဖြင့် ပဲပေါင်းဟု ခေါ်သူတွေလည်း ရှိပါသည်။

              စားတော်ပဲကို ယခင် ပိဿာ ၃၀ တစ်အိတ်လျှင် ၅၀၀၀၀ ကျပ်ဖြင့် ဝယ်ယူရစဉ်က ပဲပြုတ် တစ်ဆယ်ကျပ်သားကို ၂၀၀ ကျပ်ဖြင့် ရောင်းချခဲ့ကြောင်း၊ ယခုနှစ် သင်္ကြန်ကာလနောက်ပိုင်းတွင် စားတော်ပဲဈေး တအိအိတက်လာကြောင်း၊ ယခုအခါတွင် စားတော်ပဲ ပိဿာ ၃၀ တစ်အိတ်လျှင် ၁၅၀၀၀၀ ကျပ် ပေးရသဖြင့် ပဲပြုတ် ၁၀ ကျပ်သားကို ၅၀၀ ကျပ်ရောင်းပါကြောင်း ပဲပြုတ်သည် အမျိုးသမီးတစ်ဦး၏ ပြောပြချက်အရ သိရှိရပါသည်။

DOCA(ပဲခူး)

              တောင်ငူခရိုင် အုတ်တွင်းမြို့နယ်တွင် ယခုနှစ်မိုးစပါးကာလတွင် ၈၉၁၈၄ ဧက စိုက်ပျိုး ရန် လျာထားလျက်ရှိရာ ဇူလိုင်လကုန်တွင် လျာထားချက်အတိုင်း စိုက်ပျိုးပြီးစီးသွားပြီး ဖြစ်ပါသည်။

ဇူလိုင်လ ဒုတိယလဝက်ခန့်တွင် မိုးရွာသွန်းမှုအလွန်နည်းပါးခဲ့သော်လည်း အုတ်တွင်းမြို့နယ်အတွင်းတွင် နွေစပါးစိုက်ပျိုးနိုင်ရန်အတွက် ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ ခပေါင်းဆည်၊ ရေသိုးဆည်နှင့် မင်းရဲဆည်တို့ တည်ဆောက်ထားပြီး ၎င်း ဆည်များမှ ရေပေးဝေသည့် ရေလွှဲမြောင်းများ တည်ဆောက်ထားသဖြင့် ယခုကဲ့သို့ မိုးခေါင်သည့် ကာလတွင် မိုးစပါးအတွက် ရေပေးဝေနိုင်ခဲ့ပါသည်။

              အုတ်တွင်းမြို့နယ်အတွင်း ဇူလိုင်လနှောင်းပိုင်း မိုးရွာသွန်းမှု အလွန်နည်းပါသော်လည်း ဆည်ရေများ၏ ကျေးဇူးကြောင့် မိုးစပါးကို လျာထားချက်အတိုင်း အပြည့်အဝစိုက်ပျိုးနိုင်ခဲ့ပြီး စပါး များအောင်မြင်ဖြစ်ထွန်းလျက်ရှိကြောင်း သိရှိရပါသည်။

DOCA(ပဲခူး)

       ကလေးမြို့နယ်တွင် စားဆီများဖြစ်သည့် ပဲဆီ၊ နေကြာဆီ၊ စားအုန်းဆီ၊ ဈေးနှုန်းများမှာ ပဲဆီတစ်ပိဿလျှင် ( ၉၂၀၀ ) ကျပ်၊ (၁၀)ပိဿာဝင်တစ်ပုံးလျှင် (၉၀၀၀၀)ကျပ်၊  စားအုန်းဆီ တစ်ပိဿာလျှင် ( ၇၅၀၀ ) ကျပ်၊(၁၀)ပိဿာဝင်တစ်ပုံးလျှင် ( ၇၄၀၀၀ ) ကျပ်၊  နေကြာဆီ တစ်ပိဿာ လျှင် ( ၈၂၀၀ )ကျပ်၊ ( ၁၀ )ပိဿာဝင်တစ်ပုံးလျှင် ( ၈၀၀၀၀ )ကျပ်၊ ပေါက်ဈေးနှုန်းဖြင့် ‌‌‌ဈေးကွက် အတွင်း ရောင်းချလျှက်ရှိပြီး၊ ယခုလ( ၈/၂၀၂၂ ) လဆန်းပိုင်းတွင် ပဲဆီတစ်ပိဿာလျှင် (၁၀၀၀၀)ကျပ်၊ (၁၀)ပိဿာပုံးတစ်ပုံးလျှင် ( ၉၅၀၀၀ ) ကျပ်၊ နေကြာဆီတစ်ပိဿာလျှင်(၉၀၀၀) ကျပ်၊ (၁၀)ပိဿာဝင် တစ်ပုံးလျှင် ( ၈၈၀၀၀ ) ကျပ်၊ စားအုန်းဆီတစ်ပိဿာလျှင်( ၉၀၀၀ ) ကျပ်၊ (၁၀)ပိဿာ တစ်ပုံးလျှင် (၈၉၀၀၀ ) ကျပ်‌ဈေးနှုန်းဖြင့် ရောင်းဝယ်ပြုလုပ်လျှက်ရှိပါသည်။ စားသုံးဆီဈေးနှုန်းများသည် ယခင်လထက် ယခုလဆန်းပိုင်းတွင် ဈေးနှုန်းမြင့်တက်လျှက်ရှိကြောင်း ဈေးကွက်အတွင်းမှ စုံစမ်းသိရှိ ရပါသည်။ ဆီစက်ပိုင်များအနေဖြင့်လည်း ဆီထွက်သီးနှံ ကြိတ်ခွဲမှုများကို ယခုလ(၈/၂၀၂၂)လကုန် ပိုင်းအထိသာ ကြိတ်ခွဲရန်သီးနှံများရှိကြောင်း ဆီစက်ပိုင်ရှင် ဦးကျော်မျိုးထွန်းထံမှ သိရှိရပါသည်။ ကလေးမြို့နယ်မှ အခြားမြို့နယ်များသို့ ယခုနှစ်တွင် ယခင်နှစ်များကထက် တင်ပို့ရသည့်အတွက် ဆီပုံးများ လက်ကျန်အနည်းငယ်သာကျန်ရှိနိုင်ပြီး ဆီထွက်သီးနှံများပြန်လည်ထွက်ရှိမှသာ ဆီရရှိရန် ကြိတ်ခွဲနိုင်မည်ဖြစ်ကြောင်း သတင်းရရှိပါသည်။

DOCA(စစ်ကိုင်း)