ပြည်တွင်းကုန်သွယ်မှုသတင်း

       ၂၀၂၂-၂၀၂၃ ဘဏ္ဍာနှစ် ပြည်ပသို့ ကြက်သွန်နီ တင်ပို့မှုအခြေအနေ၊ ၁-၂-၂၀၂၃ ရက်နေ့မှ ၂၂-၂-၂၀၂၃ ရက်နေ့ထိ ပြည်တွင်း ကြက်သွန်နီ လက်ကားဈေးနှုန်း၊ မြို့နယ်အလိုက် လက်လီ/လက်ကားဈေးနှုန်း၊ လက်ကျန်အခြေအနေနှင့် သုံးသပ်ချက်များအား ပူးတွဲ တင်ပြအပ်ပါသည်။

  ဧရာဝတီတိုင်းဒေသကြီးတွင် နိုင်ငံတော်ဝန်ကြီးချုပ်၏ လမ်းညွှန်မှာကြားချက်အရ နိုင်ငံ၏စီးပွားရေးအခြေအနေကောင်းများ ဖန်တီးနိုင်မှသာလျှင် နိုင်ငံဖွံ့ဖြိုးတိုးတက်အောင် ဆောင်ရွက်နိုင်မည်ဆိုသော မူဝါဒနှင့်အညီ လယ်ယာစိုက်ပျိုးရေးကဏ္ဍတွင် တောင်သူများ၏ စိုက်ပျိုးထုတ်လုပ် မှုဖွံ့ဖြိုးတိုးတက်၍ တစ်ဦးချင်းဝင်ငွေတိုးတက်စေရန်အတွက် နိုင်ငံ့စီးပွားမြှင့်တင်ရေး ရန်ပုံငွေထူထောင်ကာ ၂၀၂၂-၂၀၂၃ ခုနှစ်တွင် နွေစပါးသီးနှံဧက (၄၀၆၀၀၀) ဧက၊ ကျပ်ငွေ (၂)သိန်းနှင့် ညီမျှသော ယူရီးယားဓါတ်မြေဩဇာ(၂)အိတ်အားလည်းကောင်း၊ ဆောင်းပဲတီစိမ်းစိုက်ဧက (၁၅၀၀၀၀) ဧကအား တစ်ဧကလျှင် ငွေကျပ် (၁၂၀၀၀၀)ကျပ်နှင့် ညီမျှသော ရွက်ဖျန်းပိုးသတ်ဆေးများအား ကူညီပံ့ပိုးဆောင်ရွက်ပေးလျက်ရှိပါသည်။

    ထို့ကြောင့် စီမံကိန်း၌ပါဝင်သော တောင်သူအစုအဖွဲ့အားလုံးအတွက် သွင်းအားစုများကို ထည့်သွင်း အသုံးပြုရန် စီမံပေးခြင်းဖြစ်၍ တစ်ဧကအထွက်နှုန်းများ တိုးတက်လာစေခြင်း၊ ဈေးနှုန်းဈေးကွက်သေချာခြင်း၊ တောင်သူများဝင်ငွေပိုမိုရရှိသဖြင့်  နိုင်ငံစီးပွားတိုးတက်မြင့်မားလာခြင်း၊ တောင်သူများအားလုံး အကျိုးအမြတ်ပိုမိုရရှိခြင်း၊ အလုပ်အကိုင်အခွင့်အလမ်းများ ပိုမိုကောင်းမွန်လာ၍ ပုဂ္ဂလိကလုပ်ငန်းရှင်များ ပြည်ပဈေးကွက်သို့ ပိုမိုချိတ်ဆက်မှုရရှိစေခြင်းနှင့် ပူးပေါင်းဆောင်ရွက်သည့် အလေ့အကျင့်ကောင်းများရရှိလာစေခြင်း စသည့်အကျိုးကျေးဇူးများကို ရရှိခံစားစေမည်လည်းဖြစ်ပါသည်။

   ယခုအခါ ဧရာဝတီတိုင်းတွင် နွေစပါးလျာထားဧက (၄၀၆၀၀၀)ဧကအနက် ယခုအချိန်ထိ (၃၇၀၈၀) ဧကအား (၉၁.၃၃ )ရာခိုင်နှုန်း၊ ပဲတီစိမ်းစိုက်ဧက(၁၅၀၀၀၀)ဧကအား (၁၀၉၂၂၇)ဧက (၇၂.၈၂)ရာခိုင်နှုန်း စိုက်ပျိုးထားပြီး၊ ကျန်ဧကများကိုလည်း လျာထားချက်ပြည့်မီအောင် ဆောင်ရွက်လျက်ရှိရာ နိုင်ငံတော်ဝန်ကြီးချုပ်၏ လမ်းညွှန်ချက်အတိုင်း တိုင်းဒေသကြီးအစိုးရအဖွဲ့မှ နိုင်ငံစီးပွားဖွံ့ဖြိုးတိုးတက်အောင် ဆောင်ရွက်မှုသာမက စားနပ်ရိက္ခာဖူလုံရေးအတွက်ပါ ဖော်ဆောင်လျက်ရှိကြောင်း သတင်းရရှိပါသည်။

DOCA(ဧရာဝတီ)

     ကယားပြည်နယ်သည်   ကုန်စည်ရောင်းဝယ်သောစီးပွားရေးလုပ်ငန်းများသာမက ရွှေထည်ရောင်းဝယ်ရေးလုပ်ငန်းများလည်း ပုံမှန်ရောင်းဝယ်လျက်ရှိရာ ရွှေထည်လက်ဝတ်ရတနာများကို ကိုယ်ပိုင်ပန်းတိမ်လုပ်ငန်းများဖြင့် ပြုလုပ်ရောင်းချသည့်အပြင် မန္တလေး၊ တောင်ကြီးဘက်မှလည်း ရွှေထည်များအား မှာယူရောင်းချလျက်ရှိပါသည်။

   ယခုလက်ရှိ ဖေဖော်ဝါရီလ စတုတ္ထအပတ်အတွင်း ဈေးကွက်တွင်ဖြစ်ပေါ်နေသောရွှေဈေးနှုန်းမှာ ၁၆ ပဲရည်တစ်ကျပ်သားလျှင် (၂၈၆၀၀၀၀)ကျပ်၊ ၁၅ ပဲရည်တစ်ကျပ်သားလျှင် (၂၆၈၁၂၅၀) ကျပ်ဖြင့် အရောင်းအဝယ်ဖြစ်လျက်ရှိပြီး ယခင်ဇန်နဝါရီလ စတုတ္ထအပတ်အတွင်း ဈေးကွက်တွင်ဖြစ်ပေါ်ခဲ့သောရွှေဈေးနှုန်းမှာ ၁၆ ပဲရည်တစ်ကျပ်သားလျှင် (၂၈၂၀၀၀၀)ကျပ်၊ ၁၅ ပဲရည်တစ်ကျပ်သားလျှင် (၂၆၄၃၇၅၀)ကျပ်ရှိခဲ့ပြီး ယခင်ဇန်နဝါရီလ စတုတ္ထအပတ်နှင့် ယခုဖေဖော်ဝါရီလ စတုတ္ထအပတ်တို့ကိုနှိုင်းယှဉ်လျှင် ၁၆ ပဲရည်တစ်ကျပ်သားလျှင် (၄၀၀၀၀)ကျပ်၊ ၁၅ ပဲရည်တစ်ကျပ်သားလျှင် (၃၇၅၀၀)ကျပ်ခန့် စသည်ဖြင့် ဈေးနှုန်းများဆက်လက်မြင့်တက်လာကြောင်း ရွှေဆိုင်လုပ်ငန်းရှင်တစ်ဦးထံမှသိရှိရပါသည်။

DOCA(ကယား)

     မကွေးတိုင်းဒေသကြီး၊ မကွေးခရိုင်၊ တောင်တွင်းကြီးကုန်စည်ဒိုင်နှင့် ပွဲရုံများသို့ ကျီးပင်၊ ကန်ဦး စသည့်ကျေးရွာများမှ မတ်ပဲများဝင်ရောက်အရောင်းအဝယ်ဖြစ်လျက်ရှိရာ ဖေဖော်ဝါရီလ ပထမအပတ်တွင် မတ်ပဲစျေးနှုန်းမှာ မြင့်တက်လာခဲ့ကြောင်းနှင့် ဇန်နဝါရီလ နောက်ဆုံးအပတ်တွင် မတ်ပဲ(၁)ပိဿာလျှင် ကျပ်(၂၆၇၅)ဖြစ်ခဲ့ပြီး ဖေဖော်ဝါရီလ(ပထမ)ပတ်တွင် မတ်ပဲ(၁)ပိဿာလျှင် ကျပ်(၃၀၀၀)အထိ စျေးနှုန်းပြန်လည်မြင့်တက်လာခဲ့ကြောင်း ကုန်စည်ဒိုင်မှသိရှိရပါသည်။

    သို့ဖြစ်၍ ဇန်နဝါရီလနောက်ဆုံးအပတ်နှင့်နှိုင်းယှဉ်ပါက မတ်ပဲ(၁)ပိဿာလျှင် ကျပ်(၃၂၅)စျေးနှုန်းမြင့်တက်လျက်ရှိကြောင်းနှင့် ဈေးကွက်အနေဖြင့် (၁)ပတ်လျှင် အိတ်ရေ(၂၀၀၀)ခန့် ရန်ကုန်သို့တင်ပို့ရကြောင်း ကုန်သည် ဦးမောင်ချို၏ပြောကြားချက်အရသိရှိရပါသည်။

DOCA(မကွေး)

      အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဖေဖေါ်ဝါရီလ(၈)ရက်နေ့မှ ဖေဖေါ်ဝါရီလ(၁၄)ရက်နေ့အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်းသိရှိရပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်တစ်ပိဿာလျှင် ကျပ် ၁၆၀၀ မှ ကျပ် ၂၂၀၀ အတွင်း၊ ဂေါ်ဖီထုပ်တစ်ထုပ်လျှင် ကျပ် ၅၀၀ မှ ကျပ် ၁၀၀၀ အတွင်း၊ ပန်းဂေါ်ဖီထုပ်တစ်ထုပ်လျှင် ကျပ် ၂၅၀ မှ ကျပ် ၈၀၀ အတွင်း၊ အာလူးတစ်ပိဿာလျှင် ကျပ် ၂၄၀၀ မှ ကျပ် ၂၅၀၀ အတွင်း၊ မုန့်လာဥနီတစ်ပိဿာလျှင် ကျပ် ၁၀၀၀ မှ ကျပ် ၁၅၀၀ အတွင်း ရွှေဖရုံသီးတစ်လုံးလျှင် ကျပ် ၁၅၀၀ မှ ကျပ် ၄၅၀၀ အတွင်း၊ ဘူးသီးတစ်လုံးလျှင် ကျပ် ၇၀၀ မှ ကျပ် ၁၂၀၀ အတွင်း၊ မုန်ညှင်းထုပ်တစ်ပိဿာလျှင် ကျပ် ၁၈၀၀ မှ ကျပ် ၂၂၀၀ အတွင်း၊ ကြက်သွန်နီ(ဆိပ်ဖြူ)တစ်ပိဿာလျှင် ကျပ် ၁၂၀၀ မှ ကျပ် ၂၀၀၀ အတွင်း၊ ကြက်သွန်ဖြူ(ရှမ်း)တစ်ပိဿာလျှင် ကျပ် ၅၀၀၀ မှ ကျပ် ၆၀၀၀ အတွင်း၊ ကြက်သွန်ဖြူ (ကြူကုတ်) တစ်ပိဿာလျှင် ကျပ် ၃၆၀၀ မှ ကျပ် ၃၈၀၀ အတွင်း၊ ချင်းတစ်ပိဿာလျှင် ကျပ် ၁၅၀၀ မှ ကျပ် ၁၈၀၀ အတွင်း၊ ဆလပ်ရွက်တစ်စီးလျှင် ကျပ် ၂၀၀ မှ ကျပ်၂၅၀ အတွင်း၊ ချဉ်ပေါင်ရွက်တစ်စီးလျှင် ကျပ် ၆၅ မှ ကျပ် ၁၂၀ အတွင်း၊ ခရမ်းသီး  (ရှည်)တစ်ပိဿာလျှင် ကျပ် ၈၀၀ မှ ကျပ် ၁၂၀၀ အတွင်း၊ သံပရာသီးတစ်လုံးလျှင် ကျပ် ၈၀ မှ ကျပ် ၁၅၀ အတွင်း၊ ငရုတ်သီးစိမ်း (ကျောက်စိမ်း) တစ်ပိဿာလျှင် ကျပ် ၁၆၀၀ မှ ကျပ် ၂၀၀၀ အတွင်း၊ ဖရဲသီး (အကြီး၊ အလတ်၊ အသေး)တစ်လုံးလျှင် ကျပ် ၁၂၀၀ မှ ကျပ် ၄၀၀၀ အတွင်းဖြစ်ကြောင်းသိရှိရပါသည်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပရာသီးအလုံးပေါင်း (၉၇၂၀၀)ကျော်၊ ခရမ်းသီး(ရှည်)ပိဿာပေါင်း (၄၃၀၁၀)ကျော်၊ ဘူးသီးအလုံးပေါင်း (၆၆၂၀)ကျော်၊ ရွှေဖရုံသီးအလုံးပေါင်း း(၁၀၀)ကျော်၊ ဂေါ်ဖီထုပ်ပေါင်း (၃၁၅၀၀)ကျော်၊ ပန်းဂေါ်ဖီထုပ်ပေါင်း (၁၉၀၀၀)ကျော်၊ မုန်ညှင်းထုပ်ပိဿာပေါင်း (၉၄၂၀)ကျော်နှင့် ဖရဲသီးအလုံးပေါင်း (၁၄၄၀၀)ကျော်  စသည်ဖြင့် အသီးသီးကုန်အဝင်ရှိကြောင်းသတင်းရရှိပါသည်။

DOCA(ရန်ကုန်)