ပြည်တွင်းကုန်သွယ်မှုသတင်း

            ပြည်ခရိုင် နွေစပါးဈေးမှာ ဇူလိုင်လနောက်ဆုံးပတ်တွင် ဈေးများ ဆက်လက်မြင့်တက်လာခဲ့ပါသည်။ ပြည်မြို့နယ်တွင် ယခင်က ၇၇၀၀၀၀ကျပ်ရှိခဲ့ရာမှ ယခုတွင် တင်း ၁၀၀လျှင် ၇၉၀၀၀၀ကျပ်၊ ပေါက်ခေါင်းမြို့နယ်တွင် ယခင် ၇၅၀၀၀၀ကျပ်၊ ယခုပေါက်ဈေးမှာ ၇၆၆၀၀၀ကျပ်၊ သဲကုန်းမြို့နယ်တွင် ယခင်က ၇၆၀၀၀၀ကျပ်၊ ယခု ၇၈၀၀၀၀ကျပ်ဖြင့် တင်း ၁၀၀လျှင် ၂သောင်းကျော် ဈေးမြင့်တက်ခဲ့ပါသည်။ ဆန်ဈေးများမှာ ဈေးမြင့်တက်ခြင်းမရှိဘဲ ၁၀၈ပေါင်တစ်အိတ်လျှင် ၃၂၀၀၀ကျပ်ဈေးဖြင့် ဆက်လက်ဈေးရှိနေခဲ့ပြီး စပါးဈေးများတက်လာသော်လည်း  ဆန်စက်ပိုင်ရှင် များမှာ စပါးဝယ်ယူခြင်း မရှိတော့သည့်အတွက် စပါးဈေးများမြင့်တက်နေသော်လည်း အရောင်းအဝယ် မရှိကြောင်းသိရှိရပါသည်။

DOCA(ပဲခူး)

          ပြည်ခရိုင်အတွင်းရှိ ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်လျှက်ရှိပြီး ဇူလိုင်လ တတိယပတ်မှာ ပဲဈေးများတက်လာခဲ့ပြီး ရန်ကုန်ဝယ်လက်နှင့် မြို့တွင်းရောင်းဝယ်မှုများရှိနေကြောင်း သိရှိရပါသည်။

          ပြည်ကုန်စည်ဒိုင်တွင်  မတ်ပဲအရောင်းအဝယ်ဖြစ်လျှက်ရှိပြီး  ဇူလိုင်လတတိယပတ်တွင် ပဲတစ်တင်းကို ၅၃၀၀၀-၅၃၅၀၀ ကျပ်ဖြင့်  ရန်ကုန်အဝယ်တစ်ရက်ကို ၁၅၀/၂၀၀ခန့် အဝယ် ရှိပါသည်။ ဇူလိုင်လစတုတ္တပတ်တွင် မတ်ပဲတစ်တင်းကို ၅၄၀၀၀ကျပ်ဖြင့် အရောင်းအဝယ် အနည်းငယ် ရှိခဲ့ပါသည်။

          ဇူလိုင်လတတိယပတ်တွင် ပဲစင်းငုံဈေးတက်လာပြီး ပဲတစ်တင်းကို ၄၅၅၀၀-၄၆၀၀၀ကျပ်ဖြင့် ရန်ကုန်အဝယ် တစ်ရက်ကိုအိတ် ၂၀၀/၃၀၀ခန့် အဝယ်ရှိပါသည်။ စတုတ္တပတ်တွင် ပဲစင်းငုံ ဈေးထပ်တက်လာပြီး ပဲတစ်တင်းကို ၄၆၅၀၀ကျပ်ဖြင့် ရန်ကုန်သို့တစ်ရက်ကိုအိတ် ၂၀၀/၃၀၀ခန့် တင်ပို့ပါသည်။

           ကုလားပဲသီးနှံဈေးမှာ ဇူလိုင်လ တတိယပတ်တွင် ကုလားပဲ(ဟော်လန်) တစ်တင်းကို ၅၁၅၀၀ - ၅၁၇၀၀ ကျပ်၊ ကုလားပဲ(မြကြေးမှုံ)တစ်တင်းကို ၅၂၀၀၀ကျပ်ဖြင့် မြို့တွင်းခွဲစက် သမားများ အဝယ်ရှိပြီး တစ်ရက်ကိုအိတ် ၃၀၀/၄၀၀ ခန့် အဝယ်ရှိခဲ့ပါသည်။ ဇွန်လကထက် ဈေးတက် လာခဲ့ပြီး ဇူလိုင်စတုတ္တပတ်တွင် ကုလားပဲဈေးတက်လာပြီး ကုလားပဲ(ဟော်လန်) တစ်တင်းကို ၅၂၀၀၀ကျပ်၊ ကုလားပဲ(မြကြေးမှုံ) တစ်တင်းကို ၅၂၅၀၀ ဖြင့်မြို့တွင်းခွဲစက်သမားများ ရန်ကုန်အဝယ်နှင့် နယ်စုံ တင်ပို့မှုရှိခဲ့ပါသည်။

       ပြည်ကုန်စည်ဒိုင်တွင်ပဲကြီးအရောင်းအဝယ်ဖြစ်လျှက်ရှိပြီး ဇူလိုင်လတတိယပတ်တွင် ပဲကြီး (ကမ်းနား)တစ်တင်းကို ၇၀၀၀၀ကျပ်ဖြင့် မြို့တွင်းပဲကြော်သမားများအဝယ်ရှိပြီး တစ်ရက်ကို အိတ် ၂၅၀/၃၀၀ခန့် အဝယ် ရှိခဲ့ပါသည်။ ဇူလိုင် စတုတ္တပတ်တွင် ပဲကြီး(ကမ်းနား) တစ်တင်းကို ၇၀၀၀၀ကျပ်ဖြင့် ဈေးအေးနေခဲ့ပြီး မြို့တွင်းပဲကြော်သမားနှင့် ရန်ကုန်အဝယ် အနည်းငယ် ရှိခဲ့ပါ သည်။

         ဇူလိုင်တတိယပတ်တွင်  စားတော်ပဲ(ကျွန်း)သီးနှံတစ်တင်းကို ၉၅၀၀၀-၁၀၀၀၀ကျပ်ဖြင့် မြို့တွင်း အဝယ်ရှိခဲ့ပါသည်။ ဇူလိုင်လစတုတ္ထပတ်တွင်  စားတော်ပဲ(ကျွန်း)တစ်တင်းကို ၁၀၀၀၀၀ ကျပ်ဖြင့် မြို့တွင်းအဝယ်ရှိခဲ့ပြီး တစ်ရက်ကို အိတ် ၂၀၀ခန့်အဝယ်ရှိခဲ့ပါသည်။

        ဇူလိုင်လတတိယပတ်တွင် ဘိုကိတ်ပဲတစ်တင်းကို ၃၅၀၀၀ကျပ်ဈေးဖြင့် မြို့တွင်းအဝယ်နှင့် ရန်ကုန်အဝယ် အနည်းငယ်ရှိပြီး တစ်ရက်ကို အိတ် ၅၀/၁၀၀ခန့် အဝယ်ပါသည်။  ဇူလိုင်လ စတုတ္တပတ်တွင် ပဲဈေးအေးနေပြီး ဘိုကိတ်တစ်တင်းကို ၃၅၀၀၀ကျပ်ဖြင့် အရောင်းအဝယ် ရှိခဲ့ပါသည်။

         ပြည်ကုန်စည်ဒိုင်တွင် ပဲဈေးများတက်နေပြီး ယခင်နှစ်ကဈေးထက် တက်နေပြီး အရောင်းအဝယ်ဖြစ်မှုမှာလည်း ယခင်နှစ်ကထက် ပိုကြောင်းသိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ ပြည်ခရိုင်အနေဖြင့်  ၂၀၂၂-၂၀၂၃ ဘဏ္ဍာနှစ်တွင် မိုးနှမ်းလျာထား စိုက်ဧကမှာ (၈၂၂၇၉) ဧကရှိပြီး ယခုအချိန်အထိ (၇၂၇၆၈)ဧက စိုက်ပျိုးပြီးဖြစ်ပါသည်။ ပြည်ဈေး ကွက်သို့ ဇူလိုင်လနောက်ဆုံးပတ်တွင် မိုးနှမ်းအနည်းငယ်ဝင်ရောက်လာနေပြီဖြစ်ပြီး၊ နတ်တလင်း မြို့နှင့် မြန်အောင်မြို့ဘက်ရှိ ကျေးရွာများမှ တစ်နေ့လျှင် အိတ် ၁၀၀/၂၀၀ခန့် နေ့စဉ်ဝင်ရောက် လာနေပြီဟု သိရှိရပါသည်။ မန္တလေးရှိဝယ်လက်များက ပြည်မြို့ရှိ ပွဲရုံများသို့ကွင်းဆင်း၍ ဝယ်ယူ မှုရှိသလို ပြည်မြို့မှလည်း တင်ပို့ရောင်းချခြင်းများလည်းရှိပါသည်။ ယခုအချိန် ဈေးကွက်သို့ ရောက်ရှိလာသော နှမ်းများမှာ နှမ်းနက်များသာဖြစ်ပြီး နှမ်းနီမှာထွက်ပေါ်ချိန်စောသေးသဖြင့် ဈေးကွက်သို့ ဝင်ရောက်မှုမရှိ၍ နှမ်းဆီကြိတ်သည့်ဆီစက်များက လှောင်ထားသည့် နှမ်းနီများကို ဆီကြိတ်၍ရောင်းချကြောင်းသိရှိိရပါသည်။

        ပြည်ဈေးကွက်တွင်ရောင်းချလျှက်ရှိသောနှမ်းဈေးများမှာ ဇူလိုင်နောက်ဆုံးပတ်တွင် နှမ်းနီ (၃) တင်းတစ်အိတ်လျှင် ၁၆၀၀၀၀ ကျပ်ဖြင့် ဇူလိုင်လ ဒုတိယပတ်ကအတိုင်းငြိမ်နေပြီး၊ နှမ်းနက် (၃)တင်း တစ်အိတ်လျှင် ၂၂၀၀၀၀ကျပ်နှင့် စမုံနက်နှမ်း (၃)တင်းတစ်အိတ်လျှင် ၂၃၅၀၀၀ကျပ်ဖြင့် ဇူလိုင်လဒုတိယပတ်ထက်စာလျှင် ဝယ်လိုအားများလာသဖြင့် ဈေးနှုန်းများမြင့်တက်လာသည်ဟု သိရှိရပါသည်။ နှမ်းဆီ တစ်ပိဿာလျှင် ၉၅၀၀ကျပ်ဖြင့် ပြည်ဈေးကွက်တွင် အရောင်းအဝယ် ဖြစ်လျှက်ရှိပါသည်။

DOCA(ပဲခူး)

        ပြည်ဈေးကွက်သို့ မိုးပဲတီစိမ်းသစ်များ ဇွန်လအတွင်းမှစ၍ ဈေးကွက်သို့ဝင်ရောက်လာခဲ့ကာ ယခုအချိန်မှာလည်း နေ့စဉ်ဝင်ရောက်လျှက်ရှိပေမယ့် အထွက်မလှိုင်သေး၍ အမြောက်အများ ဝင်ရောက်ခြင်းမရှိသေးသော်လည်း ဝင်လာသမျှ ပဲသစ်များအနေဖြင့် အရောင်းအဝယ်ဖြစ်ခဲ့ကြပါ သည်။ မန္တလေးလိုင်းသမားအဓိက အဝယ်ရှိကာ ပဲတစ်တင်း ၄၆၀၀၀ ကျပ် ဖြင့်ရောင်းဝယ်လျှက် ရှိခဲ့ပါသည်။ ယခုနှစ်တွင် ပဲတီစိမ်းသီးနှံဈေးမှာ တစ်တင်းလျှင် ကျပ် ၄သောင်းကျော် ရရှိသည့် အတွက် ယခင်နှစ်ဈေးထက်စာလျှင်  တစ်တင်းလျှင် ကျပ် ၁သောင်းကျော် ဈေးမြင့်တက်ခဲ့ပါသည်။ ယခင်နှစ်ကဇူလိုင်လအတွင်း   ပဲသစ်ဝင်ရောက်ခြင်း   မရှိခဲ့ပေမယ့်    ယခုနှစ်မှာ ပဲသစ်အဝင် စောလာသောကြောင့် ဇွန်လမှစ၍ ပဲဈေးကွက်အတွင်း စတင်ဝင်ရောက်ခဲ့ကာ ရောင်းဝယ်နေခဲ့ကြောင်း သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ ပြည်မြို့နယ်အတွင်း စားသုံးသူရေးရာဦးစီးဌာနနှင့် ပြည်မြို့နယ် ဆီကုန်သည်များပူးပေါင်း၍ စားအုန်းဆီတင်သွင်း သိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီမှ သတ်မှတ်ရည်ညွှန်းဈေးဖြင့် ခွဲတမ်းရရှိသော စားအုန်းဆီများကိုရပ်ကွက်အလိုက် အခြေခံလူတန်းစားများသို့ ဈေးကားများဖြင့် လှည့်လည်ရောင်းချပေးလျှက်ရှိကြောင်း သိရပါသည်။

          ဈေးကားများဖြင့်လှည့်လည်ရောင်းချမှုကို (၂၂.၇.၂၀၂၂)နေ့တွင် နဝင်းနယ်မြေအတွင်းရှိ အခြေခံလူတန်းစားများသို့လည်းကောင်း၊ (၂၃.၇.၂၀၂၂)နေ့တွင် ရွာဘဲနယ်မြေအတွင်း အခြေခံ လူတန်းစားများသို့လည်းကောင်း၊ (၂၄.၇.၂၀၂၂)နေ့တွင် ပြည်သာယာနယ်မြေအတွင်းရှိ အခြေခံ လူတန်းစားများသို့လည်းကောင်း ၊ (၃၀.၇.၂၀၂၂) နေ့တွင် ဂန္ဓမာ ကွက်သစ်ရှိ အခြေခံ လူတန်းစားများသို့လည်းကောင်း ၊ ဆင်စုရပ်ကွက် ပေါ်တော်မူရပ်အတွင်းရှိ အခြေခံလူတန်းစား များသို့ ရောင်းချပေးခဲ့ကြောင်း သိရှိိရပါသည်။

          ရောင်းချရာတွင် အိမ်ထောင်စုတစ်စုလျှင် စားအုန်းဆီ (၁)ပိဿာကို အခြေခံရည်ညွှန်းဈေး (၄၉၀၀)ကျပ်နှုန်း ဘူးခွံ့အပါ တစ်ပိဿာကို (၅၂၀၀)ကျပ်ဖြင့် အိမ်ထောင်စု စုစုပေါင်း (၁၆၅၀) အတွက် စားအုန်းဆီ ပိဿာချိန် (၁၆၅၀) ပိဿာရောင်းချပေးခဲ့ကြောင်း သတင်းရရှိပါသည်။

          ရောင်းချမှုကို ပြည်မြို့နယ်ဆီလုပ်ငန်းရှင်များက ၎င်းတို့ရရှိသော ခွဲတမ်းများထဲမှ ရပ်ကွက်နေပြည်သူများသို့ ရောင်းချပေးခဲ့ခြင်းဖြစ်ကြောင်း သိရှိရပါသည်။

DOCA(ပဲခူး)